Blog

भक्तपुर, असार ४
नेपाली कांग्रेसले १४ औं महाधिवेशनका लागि क्रियाशिल सदस्यता छानविन शुरु गरेको छ । कांग्रेसको शनिबार बसेको शीर्ष नेतासहितको केन्द्रीय पदाधिकारी बैठकले भदौ १६ देखि १९ गतेसम्म १४औं महाधिवेशन गर्ने गरी कार्यतालिका संशोधन गरेपछि क्रियाशिल सदस्यता छानविन शुरु गरेको हो ।
कांग्रेसले साउन १२ गते वडा तहको अभिवेशन गर्ने गरी महाधिवेशनको कार्यतालिका परिमार्जन गरेको छ । सोही अनुसार असार मसान्तभित्र क्रियाशील सदस्यता टुंग्याउनुपर्ने समयसीमा छ । पार्टीको स्थानीयदेखि केन्द्रीय नेतृत्वसम्म चयन प्रक्रिया सुरु गर्नुअघि क्रियाशील सदस्यता टुंग्याउनुपर्ने कांग्रेसको वैधानिक व्यवस्था हो ।
कांग्रेसले १४ औं महाधिवेशनका लागि क्रियाशिल सदस्यता दोब्बर बनाउने निर्णय गरेको थियो । जसअनुसार १३ औं महाधिवेशनमा रहेका करिव ५ लाख रहेका क्रियाशिल सदस्यको संख्या यो पटक १० लाख पु¥याउने लक्ष्य कांग्रेसले लिएको छ । कांग्रेसले विजयकुमार गच्छदार नेतृत्वको तत्कालीन फोरम लोकतान्त्रिकसँग भएको एकिकरण र कांग्रेस प्रवेश गरेका राप्रपा नेता सुनिल थापासहितका नेता कार्यकर्ताहरुको सदस्यता समायोजन समेत गर्नुपर्नेछ ।
त्यस्तै संघ र प्रदेशको निर्वाचनअघि अखण्ड नेपाल लगायत विभिन्न पार्टी परित्याग गरी दर्जनौं नेताहरु कांग्रेस प्रवेश गरेका थिए । ती सबैलाई कांग्रेसले ‘हैसियत’ अनुसार क्रियाशील सदस्यता दिएको छ ।
तर यसपटक जिल्ला र प्रतिनिधिसभा क्षेत्रीय कार्यसमितिले क्रियाशील सदस्यता (नवीकरण र नयाँ) पार्टीको सफ्टवेयरमा सिधै इन्ट्री गर्ने व्यवस्था गरेका कारण छानबिन समितिलाई सहज हुने जनाएको छ ।
समितिका अनुसार जेठ २९ गतेसम्म करिव आठ लाख सदस्यता इन्ट्री भइसकेको छ । समिति सदस्य कल्याण गुरुङका अनुसार ३ लाख ८० हजार पुराना सदस्य (नवीकरण) र ४ लाख २० नयाँ सदस्यता इन्ट्री भइसकेको छ । अझै दुई लाख क्रियाशील सदस्यता इन्ट्री हुनै बाँकी छ । बारा, सप्तरी, सिन्धुपाल्चोक, बर्दिया र डडेल्धुराबाट सदस्यता इन्ट्रीको काम सुरु भएको छैन । त्यस्तै काभ्रे, प्युठान, रुकुम पश्चिमलगायतका जिल्लामा पनि काम अधुरै छ ।
कांग्रेसको वडातहदेखी केन्द्रीय नेतृत्वसम्मको चयन क्रियाशिल सदस्यले गर्ने व्यवस्था छ । क्रियाशील सदस्यबाटै पार्टीका महाधिवेशन प्रतिनिधि चयन हुन्छन् । तिनीहरुले नै केन्द्रीय नेतृत्व छनौट गर्ने भएकाले महाधिवेशनको परिणाम आफ्नो पक्षमा पार्न कांग्रेसमा क्रियाशील सदस्यतामै चलखेल हुने गर्छ ।
सदस्यता छानबिनलाई सहज बनाउन समितिले मापदण्ड बनाउँदैछ । मापदण्ड तयार गर्न समिति सदस्यहरु छलफलमै छन् । निश्चित मापदण्ड बनाएपछि सदस्यता छानबिन सहज हुने सदस्य गुरुङले बताउनुभयो । ‘कसरी सदस्यता टुंग्याउने भनेर हामी मापदण्ड बनाउँदैछौं । एक–दुई दिनमै बैठक बसेर यसलाई अन्तिम रुप दिन्छौं र त्यही अनुसार काम अगडि बढ्छ,’ उहाँले भन्नुभयो ।
गच्छदारलाई दिएको २५ हजार क्रियाशील सदस्यता पनि पुरानै अन्तर्गत स्वतः नवीकरण हुनेछ । पुराना सदस्यताको हकमा पार्टीले अनुशासनको कारबाही गरेका, स्थानीय, प्रदेश र संघको निर्वाचनमा विद्रोही उम्मेवार, तिनका प्रस्तावक र समर्थक, मृत्यु भएका र पार्टी परित्याग गरेकाको नवीकरण हुनेछैन । अनुशासनको कारबाही फुकुवा भएकाहरुको भने स्वतः नवीकरण हुनेछ ।
समितिले क्रियाशील सदस्यताबारे कुनै गुनासो वा उजुरी भए इमेल, भाइवर, हृवाट्सएप वा एसएमएस गर्न सक्ने व्यवस्था गरेको छ ।
कांग्रेसले क्रियाशिल सदस्यता छानविन गर्न सात सदस्यीय छानबिन समिति गठन गरेको छ । समितिका संयोजकबाहेक बाँकी ६ सदस्यलाई प्रदेशअनुसार जिम्मेवारी दिइएको छ । जसअनुसार प्रदेश एक र दुईको सदस्यता हेर्ने जिम्मा आनन्द ढुंगाना र जीवन परियारलाई दिइएको छ । बागमती र गण्डकी प्रदेशमा श्याम घिमिरे र प्रदीप पौडेललाई जिम्मेवारी तोकिएको छ । लुम्बिनी, कर्णाली र सुदूरपश्चिमको क्रियाशील सदस्यता हेर्ने जिम्मेवारी कल्याण गुरुङ र योगेन्द्र चौधरीलाई दिइएको छ ।

भक्तपुर, असार ३
आयोजक ब्राजिलले कोपा अमेरिका कपको शुक्रवार बिहान सम्पन्न खेलमा पेरुलाई ४–० गोल अन्तरले पराजित गर्दै लगातार दोस्रो जित निकालेको छ ।
ओलम्पिक निल्टन सान्तोस स्टेडियममा ब्राजिललाई जित दिलाउन एलेक्स सान्ड्रो, नेयमार, एभर्टन र रिचार्लीसनले एक एक गोल गरे । ब्राजिलले खेलको १२ औं मिनेटमा एलेक्सको गोलले अग्रता लिएको थियो । एलेक्सले ग्राबियल जिससको पासमा गोल गर्दै ब्राजिललाई अग्रता दिलाएका थिए ।

ब्राजिलयन सुपरस्टार नेयमारले खेलको ६८ औं मिनेटमा गोल गर्दै ब्राजिलको अग्रता दोब्बर बनाए । खेलको ८९ औं मिनेटमा एभर्टनले गोल गर्दा ब्राजिलले ३–० को अग्रता बनायो । त्यसपछि खेलको इन्जुरी समयमा रिचार्लीसनले गोल गर्दै ब्राजिललाई ४–० को सानदार जित दिलाए । यस जितसँगै समूह ‘बी’ मा रहेका ब्राजिल २ खेलमा ६ अंक जोड्दै समूहको शीर्ष स्थानमा रहेको छ । ब्राजिलले पहिलो खेलमा भेनेजुएलालाई ३–० गोल अन्तरले पराजित गरेको थियो ।
यसै समूहको अर्को खेलमा कोलम्बिया र भेनेजुएलाले गोलरहित बराबरी खेल्दै अंक बाडेका छन् । शुक्रवार बिहान सम्पन्न खेलमा कोलम्विया र भेनेजुएलाले गोलरहित बराबरी खेल्दै अंक बाँडेका हुन । दुवै टोलीले गोलका केही सुवर्ण अवसर सृजना गरेपनि खेर फाल्दा खेल गोल रहित बराबरीमा टुंगिएको हो ।

ब्राजिलको स्टेडियो ओलिम्पिको पेड्रो लुडोभिको टेइसेरिया सम्पन्न खेलमा बल पोसेसनमा पकड बनाएपनि फिनिसिङमा चुक्दा कोलम्विया बराबरीमा रोकिन बाध्य भएको हो ।
समूह ‘बी’ मा ब्राजिल दुई खेलबाट ६ अंक जोड्दै शिर्ष स्थानमा रहेको छ । कोलम्वियाले दुई खेलबाट ४ अंक जोडेको छ । भेनेजुएलाले पहिलो अंक जोड््दै तेस्रो स्थानमा उक्लिएको छ । पेरु भने अंक विहिन रहेको छ ।

भक्तपुर, असार ४
नेदरल्यान्ड्स र बेल्जियम युरोकपको नकआउट चरणमा प्रवेश गरेको छ । नेदरल्यान्ड्सले बिहिवार राती सम्पन्न खेलमा अष्ट्रियामाथि २–० र बेल्जियमले एक गोलले पछि परेको स्थिती उल्ट्याउँदै डेनमार्कमाथि २–१ को जित निकाल्दै नकआउट चरणमा प्रवेश गरेको हो ।
समूह सी खेलमा लगातार दोस्रो जित निकाल्नेक्रममा नेदरल्यान्ड्सले घरेलु मैदानमा खेलको ११ औं मिनेटमा मेम्फिस डिपाएको पेनाल्टी गोलमा अग्रता लिएको थियो । अष्ट्रियाका कप्तान डेविड अलाबाले पेनाल्टी क्षेत्रभित्र डेन्जेल डम्फ्राईजलाई लडाएको भिडियो असिस्टेन्ट रेफ्रीले देखेपछि रेफ्रीले पेनाल्टी दिएका थिए । गोलरक्षक बाक्म्यानले डिपाएको प्रहारको दिशा ठम्याएपनि रोक्न भने सकेनन् ।
खेलको ६७ औं मिनेटमा नेदरल्यान्ड्सले डम्फ्राइजको गोलमा अग्रता दोब्बर पा¥यो । वैकल्पिक खेलाडी डनि मालेनले अफसाइड ट्रयाप बिट गर्दै पेनाल्टी क्षेत्र भित्रबाट दिएको पासलाई अनमार्क रहेका डम्फ्राइजले पहिलो टचमा नै गोल गरेका थिए ।
जितसँगै नेदरल्यान्ड्सको समूहको अन्तिम खेल अगावै नकआउट चरणमा प्रवेश गरेको छ । नेदरल्यान्ड्स १३ वर्षपछि युरोको नकआउट चरणमा पुगेको हो । यसअघि टोली सन् २००८ को युरोमा समूह चरण पार गर्न सफल रहेको थियो । यसै समूहमा रहेको युक्रेन र अष्ट्रियाको ३–३ अंक छ । नर्थ म्यासेडोनिया भने अंकविहिन रहेको छ । अन्तिम चरणमा युक्रेन र अष्ट्रिया तथा नेदरल्यान्ड्स र नर्थ म्यासेडोनिया भिड्नेछन् ।
बेल्जियम २–१ ले विजयी

केभिन डे ब्रुएनको प्रभावशाली प्रदर्शनमा बेल्जियमले डेनमार्कलाई पराजित गर्दै अन्तिम खेल अगावै युरोकपको अन्तिम १६ मा प्रवेश गरेको छ । बेल्जियमको जितमा थोर्गन हाजार्ड र ब्रुएनले गोल गरे । खेल बेल्जियमले जिते भने अग्रता भने डेनमार्कले लिएको थियो ।
दोस्रो हापमा मैदान प्रवेश गरेका ब्रुएनले ५५ औं मिनेटमा डेनमार्कको पेनाल्टी क्षेत्रभित्र संयमित भएर डिफेन्स लाइन तोड्दै दिएको पासमा हाजार्डले गोल गर्दै नेदरल्यान्ड्सलाई बराबरीमा ल्याएका थिए ।
यसअघि घरेलु मैदानमा दर्शकलाई खुसी बनाउँदैं डेनमार्कले खेलको दोस्रो मिनेटमा नै अग्रता लिएको थियो । बेल्जियमको डिफेन्समा कमजोरीको फाइदा उठाउँदै युसुफ पाउल्सेनले गोल गरेका थिए । उनले पिएर एमिल होएबिएरको पासलाई नियन्त्रणमा लिँदै पेनाल्टी क्षेत्रको ठिक भित्रबाट गरेको प्रहार गोलमा परिणत भएको थियो ।

खेलको ७१ औं मिनेटमा डे ब्रुएनले सानदार गोल गर्दै टोलीलाई अग्रता दिलाए । उनले इडेन हाजार्डको पासमा पेनाल्टी क्षेत्र बाहिरबाट गोल गर्दै टोलीलाई अग्रता दिलाएका थिए । अन्ततः खेलमा थप गोल भएन र बेल्जियम जित आत्मसाथ गर्दै नकआउट चरणमा प्रवेश ग¥यो ।
बेल्जियमले पहिलो हाफमा गोलको केही अवसर सिर्जना गरेपनि त्यसको सदुपयोग गर्न सकेन । डेनमार्कले पनि बेल्जियमलाई निरन्तर दवाब राखेको थियो तर गोल भने निकाल्न सकेन । दोस्रो हाफमा प्रशिक्षक रोबर्टो मार्टिनेजले मिडफिल्डर डे ब्रुएनलाई मैदान प्रवेश गराउँदै खेलको रुप नै बदलेका थिए ।

डेनमार्कले ८७ औं मिनेटमा खेल बराबरी गर्न अवसर पाएपनि क्रसबार त्यसमा बाधक बन्यो । ८७ औं मिनेटमा मार्टिन ब्रेथवेटले स्कोभ ओल्सनको क्रसमा गरेको हेडरमा कोर्टुवा निरिह बनेपनि क्रसबारले बेल्जियमको अग्रता जोगाएको थियो ।

यस जितसँगै बेल्जियम समूह बीको २ खेलमा ६ अंक जोड्दै शीर्षस्थानमा पुगेको छ । बेल्जियमले नकआउट चरणमा पनि स्थान पक्का गरेको छ । समूहमा फिनल्यान्ड र रसियाको समान ३–३ अंक छ । डेनमार्क भने दुवै खेलमा पराजित हुँदै समूह चरणबाट नै बाहिरिने सम्भावना बढेको छ ।

भक्तपुर, असार ३
युरोकप अन्तर्गत रोमानियाको नेसनल एरिनामा बिहिवार राती सम्पन्न खेलमा युक्रेनले नर्थ म्यासेडोनियालाई २–१ गोल अन्तरले पराजित गरेको छ । युक्रेनले १६ औं संस्करणको युरोकप फुटबलमा यो पहिलो जित हो ।
युक्रेनको जितमा एन्ड्री यार्मोलेन्को र रोमन यारेमचुकले एक एक गोल गरे । म्यासेडोनियाका एजान एलिओस्कीले एक गोल फर्काएपनि खेलमा फर्काउन सकेन ।
यार्मोलेन्कोले खेलको २९ औं मिनेटमा गोल गर्दै युक्रेनलाई अग्रता दिलाएका थिए । एलेक्सान्डर काराभाइवको पासमा उनले सहजै फिनिस गरेका थिए । ३४औं मिनेटमा यार्माेलेन्कोले पासमा रोमन यारेमचुकले अफसाइड बिट ट्रयापमा गोल गर्दै युक्रेनको अग्रता दोब्बर पारे । ३९औं मिनेटमा कप्तान गोरान पाण्डभले गोल गरेपनि उनी अफसाइड ठहरिदा म्यासेडोनियाले गोल अन्तर घटाउन सकेन ।

खेलको ५७औं मिनेटमा इज्ग्जान एलिओस्कीले गोल गर्दै म्यासेडोनियालाई खेलमा फर्काउने संकेत दिए । एलेक्सान्डर ट्राजकोभ्स्कीको प्रहार क्रसबारमा लागेर फर्केपछि रिवाउन्डमा कप्तान गोरान पाण्डभले प्रहार गर्न खोजेका थिए । त्यसक्रममा काराइभले फउल गरेपछि रेफ्रीले भिएआरको सहायता लिदै म्यासेडोनियालाई पेनाल्टी प्रदान गरे । इज्ग्जान एलिओस्कीको पेनाल्टीलाई गोलरक्षक जर्ज बुस्चाले बचाएपनि रिवाउन्डमा एलिओस्कीनै गोल गर्न सफल भए ।
यस्तै खेलको ८४ औं मिनेटमा युक्रेनका रुस्लान मालिनोभ्सकीले पेनाल्टीमा गोल गर्न सकेनन् । उनको प्रहार नर्थ म्यासेडोनियाका गोलकिपर स्टोलले बचाएका थिए ।
यस जितसँगै समूह ‘सी’ मा रहेको युक्रेनले २ खेलमा ३ अंक जोडेको छ । पहिलो खेलमा युक्रेन नेदरल्यान्ड्ससँग ३–२ गोल अन्तरले पराजित भएको थियो । युक्रेन समूहको तेस्रो स्थानमा रहेको छ ।

नर्थ म्यासेडोनियाको यो लगातार दोस्रो हार हो । नर्थ म्यासेडोनिया पहिलो खेलमा अष्ट्रियासँग ३–१ ले पराजित भएको थियो । म्यासेडोनिया पुछारमा रहेको छ ।

भक्तपुर, असार ३
प्रतिनिधिसभा विघटन सम्बन्धी रिटमा राष्ट्रपति कार्यालयले केपी शर्मा ओली र शेर बहादुर देउवा दुवैले संसदबाट विश्वासको मत पाउने आधार नभएको जवाफ सर्वोच्च अदालतलाई दिएको छ ।
महान्यायाधिवक्ताको कार्यालयमार्फत बिहिवार राष्ट्रपतिको कार्यालयले लिखित जवाफ पठाउँदैं ओली र देउवा दुवैले संसदबाट विश्वासको मत पाउने आधार नदेखिएको हुनाले प्रधानमन्त्रीमा नियुक्त गर्न नमिलेको जवाफ दिएको हो ।
जवाफमा भनिएको छ,‘दाबीकर्ता दुवै माननीय सदस्यहरूका समर्थनकर्ता भनिएका सदस्यहरु एक अर्कोको दोहोरो परेका, दलको निर्णय विपरीत एकले अर्कालाई समर्थन गरेको समेत देखिएको हुनाले दुवै माननीय सदस्यहरुले संविधानको धारा ७६ को उपधारा (५) बमोजिम प्रतिनिधि सभामा विश्वासको मत प्राप्त गर्न सक्ने ठोस आधार नदेखिएकोले दाबीकर्ता दुबै माननीय सदस्यहरुको दाबी नपुग्ने देखिएकोले प्रधानमन्त्री पदमा नियुक्त गर्न मिल्ने देखिएन् ।’
राष्ट्रपति कार्यालयले संविधानको धारा ७६(५) को प्रधानमन्त्रीले विश्वासको मत पाउन सक्ने आधार छ कि छैन भनी यकिन गर्ने अधिकार राष्ट्रपतिको हुन समेत बताएको छ ।
संविधानको धारा ७६ बमोजिमको प्रधानमन्त्री नियुक्त गर्दा अपनाइने कार्यविधि एवं निर्णय राष्ट्र प्रमुख एवं संविधानको पालक र संरक्षणको हैसियतमा राष्ट्रपतिबाट नै निर्णय हुने विषय भएको जवाफमा उल्लेख गरेको छ ।
‘संविधानको धारा ७६ बमोजिमको प्रधानमन्त्री नियुक्त गर्दा अपनाइने कार्यविधि एवं निर्णयको लागि राष्ट्रपतिलाई कुनै पदाधिकारीको सिफारिस आवश्यक पर्ने नभई राष्ट्रपतिबाट नै राष्ट्र प्रमुख एवं संविधानको पालक र संरक्षकको हैसियतमा निर्णय हुने विषय हो’ राष्ट्रपति कार्यालये जवाफमा भनेको छ, ‘धारा ७६ को उपधारा ५ मा उल्लेख भए बमोजिम नियुक्ति प्रधानमन्त्रीले विश्वासको मत पाउन सक्ने आधार छ वा छैन भनी यकीन गर्ने अधिकार र कर्तव्य स्वयं राष्ट्रपतिको हो ।’

जवाफको पूर्ण विवरण

भक्तपुर, असार ३
नेपाली कांग्रेस चाँगुनारायण नगरसमितिले कोभिडका कारण ज्यान गुमाउने नगरवासीका परिवारको भरणपोषणका लागि प्रति मृतक एक लाख रुपैंया राहत प्रदान गर्न माग गरेको छ । कांग्रेसले बिहिवार नगरप्रमुख सोमप्रसाद मिश्रलाई ज्ञापनपत्र बुझाउँदैं सो माग गरेको हो ।
कांग्रेसले सबै नगरवासीको स्वास्थ्य विमाको अभियान चलाउन समेत माग गरेको छ । कांग्रेसले नगरपालिकाको आगामी नगरसभाको पहिलो लक्ष्य कोभिड नियन्त्रण, स्वास्थ सामग्रीको ब्यवस्थापन, स्थायी र भरपर्दो स्वास्थ सेवाको तथा रोग नियन्त्रणको लागि बजेट ब्यवस्थापनका लागि पर्याप्त ध्यान दिन आग्रह गरेको छ । सवै वडाहरुमा रहेको स्थास्थ्य केन्द्रको स्तरबृद्धि गरी अन्तर्राष्ट्रिय स्वास्थ्य मापदण्ड बमोजिमको परिक्षण सामाग्रीहरु, खोप लगायतको उपकरण भण्डारणको ब्यवस्थापन, उच्चस्तरीय ल्यावको ब्यबस्था गर्न माग समेत कांग्रेसले माग गरेको छ ।
नगरपालिकाको उत्तरपुर्वी भाग विकासका दृष्टिले पछि परेको उल्लेख गर्दै कांग्रेसले सो क्षेत्रमा महिला तथा बालबालिका केन्द्रीत अस्पताल खोल्न माग गरेको छ । महिलाहरुमा बढी देखिने पाठेघरको क्यान्सर र प्रसुती सम्बन्धी रोगको उपचारको लागि विशेष व्यवस्था गर्न पनि कांग्रेसले माग गरेको छ ।
चाँगुनारायण ईञ्जिनियरिङ कलेज (नेक) सञ्चालन सम्बन्धमा कलेजको आयव्यय विवरण, वासलात सार्वजनिक गरी सर्वपक्षीय छलफल र कलेजबारे स्वेतपत्र जारी गर्न कांग्रेसले ज्ञापनपत्रमा माग गरेको छ । नगरभित्रको शैक्षिक संस्थाहरुको प्रभावकारीता लागि श्री कृष्ण मा.बि., चाँगुनारायण मा.बि., गणेश मा.बि. ताथली, सरस्वती मा.बि., बाल्मिकेश्वर मा.बि., चुनादेबी मा.बि., आजाद मा.बि., देबी मा.बि., गणेश मा.बि. छालिङ, डोलागिरी मा.बि., महेन्द्रग्राम मा.बि., कालिका मा.बि. लगायतका सम्पुर्ण माविहरुमा स्तरोन्नतीका लागि आवश्यक बजेट व्यवस्था गर्न पनि कांग्रेसले माग गरेको छ ।
कांग्रेसले ज्ञापनपत्रमा सवै बिद्यालयमा पर्याप्त शैक्षिक सामग्रीको ब्यवस्थापन, बालबालिकाहरुको शैक्षिक गुणस्तरीयता, पर्याप्त खेलकुद, मनोरञ्जनका साधनहरुको ब्यबस्थापन गर्न भनिएको छ ।
नगरपालिका भित्र सञ्चालनमा रहेका विभिन्न खानेपानी उपभोक्ता समितिहरुलाई एकत्रित गरि सवै नागरिकहरुलाई स्वच्छ पिउन योग्य पानी उपलब्ध गराउन ठोस कार्ययोजना बनाउन आवस्यक रहेको भन्दै कांग्रेसले मेलम्चीको खानेपानीको सञ्जालमा नगरपालिकाको सहभागिता र परम्परागत पानीका मुहानको संरक्षण, ब्यवस्थापनमा ठोस पहल कदमी चाल्न माग गरेको छ । नगरपालिकाको उत्तर पूर्वी क्षेत्रमा रहेको पानीको मुल जलाधार (मुहान पोखरी, तेलकोट) ड्यामको लागि बिशेष कार्यक्रम ल्याउन जोडदार माग गरेको छ । कांग्रेसले पानीका प्राकृतिक श्रोतहरु रहेको वोजिनी, कलमसी क्षेत्रको तत्काल संरक्षण गर्न आवस्यक रहेकोले कार्ययोजना बनाउन आग्रह गरेको छ ।
ज्ञापनपत्रमा नगरपालिकाले सडक मापदण्ड निर्माण गर्दा सर्वपक्षीय छलफल गर्न आवस्यक नठान्ने र कोही कसैको लहड र स्वार्थमा मापदण्डहरुको हेरफेर भईरहेको आरोप लगाउँदैं सडक मापदण्डका बिषयमा गम्भीर हुन आग्रह गरिएको छ । कांग्रेसले सवै वडाहरुमा भक्तपुर चक्रपथको बाँकी कार्यका लागि पहल गर्न र सवै वडा छुने गरी नगरभित्र सार्वजनिक यातायात सञ्चालनको लागि पहल कदमी चाल्न तथा नगरपालिकाभित्रका गोरेटो र कच्चीबाटोको स्तरोन्नती गरी उपभोग योग्य बनाउन माग गरेको छ ।
त्यस्तै पयर्टनतर्फ ऐतिहासिक विश्व सम्पदा सूचीमा सूचिकृत चागँुनारायण मन्दिरको आवश्यक पुननिर्माण तथा संरक्षण, पर्यटकीय क्षेत्र नगरकोटको विकासका लागि छिमेकी स्थानीय तहहरुसँग सहकार्य समन्वय गरी एकिकृत योजना बनाउन, नगरपालिका भित्रका सार्वजनिक पर्ति जग्गाको अतिक्रमण बढ्दै गएकोले तत्काल पर्ति जग्गाहरुको संरक्षणका लागि ठोस कदम चाल्न, दुवाकोट सरस्वती खेल हुदै चाँगुनारायण मन्दिर, तेलकोट, त्रिशुल डाँडा, कालिकादेवी मन्दिर, नगरकोट, भट्टेडाँडा, नगरकोट भंगेरी दरवार, महादेव पोखरी, कलममसी हुदै ताथली गढीसम्म पर्यटकीय पदमार्गको निर्माण, विकास र संरक्षणको लागि कार्य गर्न आग्रह गरिएको छ ।
त्यसैगरी किसानहरुलाई समयमै मल तथा बिउविजन सहज रुपमा पाउन सकिने व्यवस्था, कृषिमा आधुनिकीकरण गर्दै उन्नत खालका बिउबिजन, कृषिऔजारको ब्यवस्था गर्न माग गर्दै कांग्रेसले कृषि योग्य जमिनमा भइरहेको बस्ती विकासलाई ध्यान राख्दै सर्वपक्षीय सहमतिमा केही क्षेत्रलाई कृषि क्षेत्रको रुपमा विकास गर्न ध्यान दिनुपर्ने उल्लेख गरेको छ ।
त्यस्तै २०७२ सालको भूकम्पबाट पिडित नगरबासीहरुले अझै पनि राहतका लागि समस्या भोग्नु परेको अवस्था भएकोले सो तर्फ बिषेश ध्यान दिन कांग्रेसले अनुरोध गरेको छ ।
नगरसभाबाट विनियोजित विकास बजेटहरु खर्च नहुने, पछि आफूखुसी तोकआदेशमा रकमान्तर गर्ने, वडासमितिहरुबाट आफूखुसी बिना सार्वजनिक सूचना उपभोक्ता समितिहरु बनाउने, खर्च गर्ने कार्य भै रहेकोले तत्काल यस्ता कार्य रोक्न कांग्रेसले आग्रह गरेको छ । नगरपालिकाले आफुखुसी करका दायरा बढाएकाले नगरवासी समस्यामा परेको भन्दै कांग्रेसले अध्ययन, रोजगारीका लागि विदेश जाने नागरिकहरुलाई लाग्ने सिफारिस दस्तुर छुट दिन माग गरेको छ ।
नगरपालिकाका सवै वडाहरुमा बालबालिकाहरुको लागि मनोरञ्जनात्मक बाल उद्यान, ब्यायामशाला, खेल मैदानहरुका लागि आवश्यक प्रवन्ध मिलाउन, नगरपालिका क्षेत्रभित्र रहेका मठ मन्दिर, धारा, पाटी, पौवा धार्र्मिक तथा पर्यटकीय क्षेत्रको बिकास लागि कार्यक्रम सञ्चालन गर्न पनि कांग्रेसले माग गरेको छ ।
कांग्रेसले विकास निर्माण, जनताको जिउधनको रक्षा, कोभिड महामारी विरुद्धको सबै अभियानमा राजनैतिक, सामाजिक, आर्थिक तथा अन्य बिषयमा रहेका असहमतीलाई थाँती राखी हरतरहले सहयोग गर्न तयार रहेको प्रतिवद्धता पनि जनाएको छ ।
कांग्रेस चाँगुनारायण नगरसभापति शिवहरी केसी र नगरप्रमुखमा कांग्रेसका प्रत्याशी उम्मेदवार राजाराम खड्काको नेतृत्वमा ज्ञापनपत्र बुझाउन बागमति प्रदेशसभाका सांसद एवम् नेपाली कांग्रेस बागमति प्रदेश संसदिय दलका उपनेता कृष्णलाल भँडेल, नेपाली कांग्रेस भक्तपुर क्षेत्र नं. १का सभापति जीवन खत्री, जिल्ला उपसभापति हरिप्रसाद नेपाल, सहसचिव किरण न्यौपाने, उपप्रमुखका प्रत्याशी एवम् नेपाल महिला संघ भक्तपुरका सभापति सरु बानियालगायतका नेता कार्यकर्ताहरुको सहभागिता रहेको थियो ।

भक्तपुर, असार ३
मध्यपुर थिमि नगरपालिकाका ९ वटै वडामा शनिवार बृहतरुपमा कोभिडको एन्टीजिन परीक्षण गर्न लागिएको छ । नगरपालिकामा कोभिड संक्रमणको अवस्था विष्लेषण गर्न नगरपालिकाले ९ वटै वडामा करिव १० हजार जनाको एन्टीजिन परीक्षण गर्न लागेको हो ।
नगरपालिकाले नेपाल कोरिया मैत्री नगरपालिका अस्पतालको व्यवस्थापन, जिल्ला स्वास्थ्य कार्यालय, नेपाल रेडक्रस सोसाईटी भक्तपुर र नेपाल स्काउटको समन्वयमा सो परीक्षण गर्न लागेको हो । परीक्षणको रिपोर्ट तत्काल सार्वजनिक गरिने छ । त्यसका लागि ११ हजार किट नगरपालिकाले व्यवस्था गरिसकेको नगरप्रमुख मदनसुन्दर श्रेष्ठले जानकारी दिनुभयो ।
समूदायस्तरमा कोरोना संक्रमणको अवस्था विष्लेषण गरी संक्रमणको तथ्यगत अवस्था थाहा पाउन महत्वाकांक्षीरुपमा एन्टीजिन परीक्षण गर्न लागिएको नगरप्रमुख श्रेष्ठले बताउनुभयो । ‘समूदायस्तरमा कोरोनाको संक्रमण कस्तो छ ? सुशुप्तरुपमा कोरोना फैलिरहेको छ की छैन ? संक्रमितहरु टोलटोलमा हिँडडुल गरिरहेको छ की छैन ? भन्ने जानकारी र यसको निराकरणका लागि महत्वाकांक्षीरुपमा एकै पटक १० हजार जनाको परीक्षण गर्न लागिएको हो,’ नगरप्रमुख श्रेष्ठले भन्नुभयो ।
एन्टीजिन परीक्षणमा कोभिड संक्रमण देखिएकाहरुको तत्काल नेपाल कोरिया मैत्री नगरपालिका अस्पतालमा पिसिआर परीक्षणको पनि व्यवस्था गरिएको उहाँले जानकारी दिनुभयो । उहाँले भन्नुभयो, ‘एन्टीजिन परीक्षणमा कोभिड संक्रमण देखिएकाहरुको तत्काल पिसिआर परीक्षण गर्ने व्यवस्था गरेका छौं । दुई वटै परीक्षण निःशुल्क गरिनेछ ।’
यसले उपत्यकामा कोभिड संक्रमण घटेको भन्ने जुन तथ्यांक छ त्यो सँग वास्तविक वस्तुस्थित मेल खान्छकी खाँदैन भन्ने तथ्यांक र अन्वेषनात्मक रुपमो पुष्टि हुन जाने नगरप्रमुख श्रेष्ठले बताउनुभयो । परीक्षणको अनुसन्धानकर्ता वैज्ञानिकहरुले पनि अध्ययन गरिने नगरप्रमुख श्रेष्ठले जानकारी दिनुभयो ।
हाल उपत्यकामा कोरोना संक्रमण घटेको भनेर लकडाउन हटाउने तयारी भइरहेको अवस्थामा मिल्ने नमिल्ने वा कुन तहसम्म जान सकिन्छ भन्नेमा पनि नीतिगत तहमै निर्णय गर्न परीक्षणले सहज हुने श्रेष्ठले विश्वास व्यक्त गर्नुभयो ।
मध्यपुर थिमि नगरपालिकामा मात्र कोरोनाको पहिलो र दोस्रो लहरमा ६ हजार भन्दा बढी संक्रमित भएको छ । दोस्रोमा १ हजार ७ सय जनासम्म संक्रिय संक्रमित रहेको अवस्था थियो । अहिले मध्यपुर थिमिमा सक्रिय संक्रमितको संख्या ३ सय भन्दा तल रहेको छ । संक्रमण दर ५० प्रतिशतसम्म पुगेको मध्यपुर थिमिमा अहिले घटेर ७ देखी १० प्रतिशतमा झरेको नगरप्रमुख श्रेष्ठले बताउनुभयो ।

भक्तपुर, असार ३
भक्तपुरको मध्यपुर थिमि नगरपालिका ४ चारदोबाटोस्थित ट्राफिक आइल्याण्डमा बुधवार राती मोटरसाइकल ठोक्किँदा एक जनाको मृत्यु भएको छ भने दुई जना घाईते भएका छन । घाईतेको त्रि.बि. शिक्षण अस्पताल महाराजगंज काठमाण्डौमा उपचार भइरहेको छ ।
मृत्यु हुनेमा मोटरसाइकल चालक सोलुखुम्बु चौलाखर्क–३ घर भई हाल काठमाण्डौ काँडाघारी बस्ने २७ वर्षिय रमेश कुमार बस्नेत हुन । त्यस्तै घाईते हुनेहरुमा मोटरसाईकलमा सवार हाल काँडाघारी बस्ने उदयपुर ताप्ले गाउँपालिका–५ का २२ वर्षिय लोकेन्द्र मगराती र सिन्धुली तिनपाटन गाउँपालिका–५ का २५ वर्षिय अमित जैरु छन ।
तिब्र गतिमा काठमाण्डौंबाट भक्तपुरतर्फ आइरहेको बा ७७ प ५६०५ नं. को मोटरसाइकल आफैं अनियन्त्रित भई बुधवार राती करिव ११ बजे सडक बिचमा रहेको ट्राफिक आइल्याण्डमा ठोक्किएर दुर्घटना भएको महानगरिय प्रहरी परिसर भक्तपुरले जानकारी दिए ।
घटना लगत्तै दुर्घटनामा घाईते तीनै जनालाई नागरिक सामूदायिक अस्पताल गट्ठाघरमा उपचारका लागि लगिएको परिसरका सूचना अधिकारी प्रहरी नायव उपरिक्षक दिपक गिरीले जानकारी दिनुभयो । नागरिकमा प्रारम्भिक उपचार पछि तीनै जनालाई थप उपचारका लागि त्रि वि शिक्षण अस्पताल पठाएकोमा त्यही उपचारका क्रममा मोटरसाइकल चालक बस्नेतको मृत्यु भएको प्रनाउ गिरीले बताउनुभयो । प्रहरीले घटनाको थप अनुसन्धान कार्य भइरहेको जनाएको छ ।

भक्तपुर, असार ३
कोरोना भाइरसको महामारीले आक्रान्त बनाएको भारतमा दोस्रो लहरको कोरोना संक्रमणका क्रममा ७ सय ३० जना चिकित्सकको मृत्यु भएको भारतीय मेडिकल एसोसिएशन (आईएमए)ले जनाएको छ । आईएमएका अनुसार ठूलो संख्यामा अन्य स्वास्थ्यकर्मी प्रभावित भएका छन् ।
राजधानी दिल्लीमा १०९ जना चिकित्सकको मृत्यु भएको आईएमएले बताए । कोरोनाको दोस्रो लहरमा सबैभन्दा धेरै बिहारमा १ सय १५ जना डाक्टरको मृत्यु भएको छ । सार्वजनिक तथ्यांकअनुसार उत्तर प्रदेशमा ७९, पश्चिम बंगालमा ६२, राजस्थानमा ४३, झारखण्डमा ३९ तथा आन्ध्र प्रदेशमा ३८ डाक्टरको मृत्यु भएको छ ।
यसैबीच पछिल्लो २४ घण्टामा भारतमा ६७ हजार २ सय ९४ जनामा कोरोना संक्रमण पुष्टि भएको छ । पछिल्ला केही दिनयता लगातार संक्रमितको संख्या घटिरहेको भारतमा पछिल्लो २४ घण्टामा फेरि संक्रमितको संख्या बढेको हो । यस्तै पछिल्लो २४ घण्टामा भारतमा १४ सय ७० जनाको मृत्यु भएको छ ।

भक्तपुर, असार ३
युरोकप अन्तर्गत बुधवार राती सम्पन्न खेलमा इटाली स्विटजरलयान्डलाई सहजै पराजित गरी प्रतियोगिताको प्रिक्वाटर फाइनलमा प्रवेश गरेको छ । समूह ए को दोस्रो चरणको खेलमा इटाली स्विट्जरल्यान्डलाई ३–० ले पराजित गर्दै अन्तिम १६ मा प्रवेश गरेको हो । जारी प्रतियोगितामा अन्तिम १६ मा प्रवेश गर्ने इटाली पहिलो टोली बनेको छ ।
इटालीको जितमा म्यानुएल लोकाटेलीको दुई तथा चिरो इम्मोबिलेको एक गोल गरे । खेलको २६ औं मिनेटमा इटालीले अग्रता लिएको थियो । डोमेनिको बेरार्डीको कटब्याकमा म्यानुएल लोकाटेलीले ६ यार्ड बक्सभित्र अनमार्क रहेको अवस्थामा गोल गरेका थिए । लोकाटेली आफैंले मिडफिल्डबाट लामो पास निकाल्दै बल बेरार्डीलाई बायाँ विंगमा दिएका थिए । बेरार्डीले विंगमा मुभ सिर्जना गर्दै दिएको बललाई लोकाटेलीले सहजै गोल गरेका थिए ।

त्यसअघि इटालीले कप्तान जिओर्जियो किएलिनीको गोल गरेका थिए तर त्यसलाई भीएआरले मान्यता दिएन । लोरेन्जो इन्सिग्नेको कर्नरमा किएलिनीले बललाई जाली चुमाएपनि रिप्लेमा हातले छोएको स्पष्ट देखिएको थियो ।
दोस्रो हाफको ५२ औं मिनेटमा निको बरेल्लाको पासमा पेनाल्टी क्षेत्र बाहिरबाट लोकाटेलीले व्यक्तिगत दोस्रो गोल गर्दै इटालीको अग्रता दोब्बर पारे । लोकाटेलीले आफ्नो व्यावसायिक करिअरमा एकै खेलमा दुई गोल गरेको यो पहिलो अवसर हो ।
खेलको ८९ औं मिनेटमा इम्मोबिलेले गोल गर्दै इटालीलाई ३–० को जित पक्का गरे । उनले राफाएल टोलोइको पासमा लामो दुरीबाट गरेको प्रहार गोल भएको थियो । इटालीले पछिल्लो १० खेलमा दुई वा सोभन्दा बढी गोल गर्ने सिलसिलालाई कायम नै राख्यो । यस जितसँगै इटालीको अपराजित यात्रा पनि २९ खेलमा लम्बिएको छ । इटालीले पछिल्लो १० खेलमा गोल समेत खाएको छैन ।
वेल्स २–० ले विजयी
त्यस्तै बुधवार राती नै सम्पन्न समूह ए को अर्को खेलमा वेल्सले टर्कीलाई २–० ले पराजित गर्दै नकआउट चरणमा पुग्ने सम्भावनालाई बलियो बनाएको छ । वेल्सका लागि राम्सीले ४२ औं मिनेटमा र इन्ज्युरी समयको पाँचौ मिनेटमा कनर रोबर्ट्सले गोल गरेका थिए ।
राम्सीले ग्यारेथ बेलको लामो पासलाई पेनाल्टी क्षेत्रभित्र उत्कृष्ट नियन्त्रण गर्दै फिनिस गरेका थिए । त्यसअघि उनले २४ औं मिनेटमा बेलकै पासमा गरेको प्रहार पोस्टभन्दा माथिबाट गएको थियो । ३७ औं मिनेटमा बुराक इल्माजको प्रहारले पनि पोस्टको दिशा लिन सकेको थिएन ।

खेलको ६० औं मिनेटमा वेल्सले पेनाल्टी पायो । जेकी चेलीकले पेनाल्टी क्षेत्रभित्र बेललाई लडाएपछि रेफ्रीले पेनाल्टी दिएका थिए । तर बेलको प्रहार पोस्टभन्दा निकै माथि गएपछि स्कोर १–० नै कायम रहयो । टर्कीले त्यसपछि लगातार आक्रमण गरेपनि गोलरक्षक वार्डले लगातार बचाउ गर्दै टर्कीलाई खेलमा फर्कन दिएनन् । इन्ज्युरी समयको पाँचौ मिनेटमा कनर रोबर्ट्सले गोल गर्दै वेल्सको जित सुनिश्चित गरे । उनले बेलको पासलाई नै पेनाल्टी क्षेत्रभित्र भिडभाड भएको अवस्थामा गोल गरेका थिए ।
समूह ए मा दोस्रो चरणको खेलको समाप्तिमा इटालीले २ खेलबाट ६ अंक बटुलेको छ भने वेल्सको ४, स्विट्जरल्यान्डको १ र टर्कीको शुन्य अंक रहेको छ । इटालीले समूहको अन्तिम खेलमा वेल्सको सामना गर्नेछ । त्यस्तै स्विट्जरल्यान्डले अंकविहिन रहेको टर्कीसँग खेल्नेछ ।