Blog

भक्तपुर असार ३१
भक्तपुरमा मानवअधिकार हनन र अपराधका घटना हुन नदिन एकिकृत कार्ययोजना बनाउनुपर्नेमा जोड दिईएको छ । अनौपचारिक क्षेत्र सेवा केन्द्र (इन्सेक) भक्तपुरले बिहिवार आयोजित नेपाल मानव अधिकार वर्ष पुस्तक २०२२ को अर्धवार्षिक समिक्षामा सहभागीहरुले स्थानीय तह, प्रहरी, मानवअधिकारवादी संघ संस्था, नागरिक समाज, नागरिक अधिकारकर्मी र सञ्चारकर्मीसहितको कार्यशालाबाट एकिकृत कार्ययोजना बनाउनुपर्नेमा जोड दिएको हो ।
कार्यक्रममा सूर्यविनायक नगरपालिकाका उपप्रमुख जुना बस्नेतले मानवअधिकारको रक्षा र अपराधका घटना हुन नदिन सबै स्थानीय सरकार र सरोकारवाला एकजुट हुनुुपर्ने औल्याउनुभयो । नगरपालिकाको न्यायिक समितिको संयोजक समेत रहनु भएका उपप्रमुख बस्नेतले जिल्लालाई अपराध मुक्त बनाउन नागरिक समाजबीच समन्वयतात्मक सम्बन्ध हुनुपर्ने बताउनुभयो ।
उहाँले नगरपालिकामा आउने उजुरी मध्ये महिला हिंसा, घरेलु हिंसाको मुद्दा २० प्रतिशतमात्रै आउने र अरु साँध सिमाना विवादका मुद्दा आउने गरेको जानकारी दिनुभयो । नगरपालिकाको न्यायिक समितिले असार मसान्तसम्म १५८ वटा मुद्दा छिनोफानो गरेको र सम्बन्ध बिच्छेदका मिलाउन नसकेका मुद्दा अदालत पठाएको बताउनुभयो ।
महानगरीय प्रहरी परिसर भक्तपुरका प्रमुख एवं प्रहरी उपरीक्षक शिवकुमार श्रेष्ठले अपराधका घटना न्यूनिकरण भए मात्रै मानवअधिकार सवल बन्ने बताउनुभयो । उहाँले समाजलाई अपराध मुक्त बनाउन प्रहरी एक्लैले नसक्ने बताउँदैं त्यसका लागि सबै क्षेत्रको साथ सहयोग र सहकार्यको आवश्यकता औंल्याउनुभयो ।
अपराधलाई न्यूनिकरण गर्दै मानवअधिकारलाई बलियो बनाउन एकिकृत योजना बनाएर जानुपर्नेमा सहमत जनाउनुभयो । उहाँले लागू पदार्थ दुव्र्यसनी र मदिरा सेवन आफैंमा अपराध भएपनि यी गतिविधि धेरै अपराधका घटनाका कारक तत्वको रुपमा रहेको स्पष्ट पार्नुभयो ।
इन्सेक भक्तपुर प्रतिनिधि रमेश गिरीको संयोजकत्वमा सम्पन्न कार्यक्रममा चाँगुनारायण नगरपालिका महिला शाखा प्रमुख निला घिमिरे, पत्रकार महासंघ भक्तपुरका अध्यक्ष जगत प्रजापति, गैसस भक्तपुरका अध्यक्ष नारायण न्यौपाने, पत्रकार महासंघ भक्तपुरका निवर्तमान अध्यक्ष पुष्कर बुढाथोकी, राष्ट्रिय सञ्चार केन्द्रका अध्यक्ष पेशल आचार्यलगायतले मानवअधिकारको रक्षाको लागि सबैले प्रतिवद्ध भएर लाग्नु पर्नेमा जोड दिनुभयो ।
कार्यक्रममा इन्सेकले भक्तपुरमा विगत ६ महिनामा घटेका विभिन्न अपराधका घटनाहरुको विवरण समेत सार्वजनिक गरिएको थियो । सो अनुसार भक्तपुरमा ६ महिनाको अवधिमा बालिका, किशोरी र महिला गरी २० जना बलात्कारको घटनाबाट पीडित भएका छन् । त्यस्तै गैर राज्यपक्षबाट तीन जनाको हत्या भएको र पाँच जनाको हत्या प्रयास भएको छ ।
बलात्कार प्रयासका घट्नाबाट २ जना, बालयौन दुव्र्यबहारबाट ७ जना र बहुविवाहका घटनामा ५ जना महिला पीडित भएका छन् । समिक्षा अवधिमा मानव बेचबिखनबाट ३ जना, मानव बेचबिखनसहित बलात्कारबाट १ जना किशोरी, ठगी गरि भएको बलात्कारबाट १ जना, अपहरण गरि बलात्कारबाट १ किशोरी पीडित भएका हुन् ।
अभद्र व्यवहारबाट ७७ जना पीडित भएको इन्सेकको तथ्याँकमा उल्लेख गरिएको छ । घरेलु हिंसाबाट १२ जना पिडित महिलाको उजुरी परेकोमा पाँच जनाको मिलापत्र भएको र ७ जनाको कारवाही प्रक्रिया चलिरहेको इन्सेकले जनाएको छ ।
त्यसैगरी आत्महत्या दुरुत्साहनमा २ जना, सार्वजनिक स्थलमा महिलाहरुलाई दुव्र्यवहार गरी यौनाङ्ग देखाउने एक जना, अप्राकृतिक मैथुन गराई हिंसा गर्ने एक जनालाई कारवाही गरिएको छ । विष सेवनबाट १० र झुन्डिएर १७ जनाको ज्यान गएको छ । विगत ६ महिनामा बालबालिका, महिला, पुरुष गरि २१८ जना हराएकोमा १५८ मात्रै भेटिएको र २३ जना बेवारिसे भेटिएको बताइएको छ ।

भक्तपुर, असार ३०
निवर्तमान प्रधानमन्त्री एवम् नेकपा एमाले अध्यक्ष केपी शर्मा ओलीले वरिष्ठ नेता माधवकुमार नेपाललाई गद्दारको संज्ञा दिनुभएको छ । सर्वोच्च अदालतको परमादेशले पदमुक्त भएपछि बुधवार लावा लस्करसहित बालुवाटारबाट बालकोट आइपुगेका ओलीले नेपालकै कारण आफु सत्ताबाट बाहिरिनु परेको बताउँदैं उहाँलाई क्षमा दिन नसक्ने बताउनुभएको हो ।
ओलीले नेता नेपाललाई विश्वासघाती भएको आरोप लगाउँदै लाज सरम हराएका मान्छे भएको टिप्पणी समेत गर्नुभयो । ओलीले भन्नुभयो, ‘पार्टी समक्ष आत्मालोचना गर्दै कमजोरी स्वीकारेर आए अरुलाई एकपटक पार्टीले मौका दिन सक्छ । तर, माधव नेपालले अब आत्मालोचना गरेर फर्किए पनि पार्टीले स्वीकारेर भित्र्याउने कुनै पनि ठाउँ छैन । माधव नेपाल जस्ता गद्दारलाई कुनै क्षमा गर्न सकिन्नँ ।’
समर्थकहरुलाई आफ्नो घरको बारदलीबाट सम्बोधन गर्नुभएका ओलीले आफ्नो नेतृत्वको विकास प्रेमी सरकार जालझेल गरेर ढालेको र त्यसको नेतृत्व नेता नेपालले गरेको भन्दै कडा आलोचना गर्नुभएको थियो ।
उहाँले भन्नुभयो, ‘जनादेशबाट होइन परमादेशबाट, काम गर्न नसकेर होइन देशको विकास गरेर, राष्ट्रलाई एकजुट बनाएर, संविधान कार्यान्वयन गराएर, सर्वस्वीकार्य बनाएर, विकास अगाडि बढाएर अन्तर्राष्ट्रिय स्तरमा नेपालको छवि अगाडि बढाएर काम गर्दागर्दै जाली झेलीहरूको जालझेल, कपट, षड्यन्त्र स्वरूप अदालतमा मुद्दा हालेर हटाइयो ।’ तर आफूले देशका लागि राम्रो काम गरेको र विकास गरेकाले ग्लानी नभएको ओलीले बताएउनुभयो ।

भक्तपुर, असार ३०
नवनियुक्त प्रधानमन्त्री शेरबहादुर देउवा नेतृत्वको मन्त्रिपरिषदको मंगलवार बेलुकी बसेको पहिलो बैठकले आगामी चैत्रभित्र तोकिएको उमेर पुगेका सबै नेपाली नागरिकलाई निःशुल्क रुपमा कोभिड–१९ विरुद्धको खोप उपलब्ध गराउने निर्णय गरेको छ । मन्त्रिपरिषदको पहिलो निर्णयका रुपमा सो निर्णय गरिएको हो ।
बैठकले आगामी असोज मसान्तभित्र एक तिहाइलाई र आगामी चैत मसान्तभित्र खोप लगाउन योग्य सबैलाई खोप सुनिश्चित गर्ने निर्णय गरेको नेपाल सरकारका प्रवक्ता एवं कानुन न्याय तथा संसदीय मामिला मन्त्री ज्ञानेन्द्रबहादुर कार्कीले जानकारी दिनुभयो ।
त्यस्तै बैठकले कोभिड–१९ महामारी रोकथाम, नियन्त्रण र उपचारका लागि यसअघिको ओली नेतृत्वको सरकारले गरेको खर्च सार्वजनिक गर्ने निर्णय पनि गरेको छ ।
बैठकले महामारीको समयमा फ्रन्टलाइनमा खटिने स्वास्थ्यकर्मी, सुरक्षाकर्मी र सफाइकर्मी लगायतले पाउनुपर्ने जोखिम भत्ता एक साताभित्र उपलब्ध गराउन शुरु गर्ने निर्णय समेत गरेको कार्कीले बताउनुभयो ।
बैठकले सरकारको विभिन्न प्राथमिकता समेत निर्धारण गरेको छ । सरकारले शान्ति सुव्यवस्था कायम गर्ने विषयलाई प्रमुख प्राथमिकतामा राखेको जनाएको छ । त्यस्तै कोभिड–१९ को रोकथाम, नियन्त्रण र उपचार, आर्थिक समृद्धि, कोभिड–१९ बाट प्रभावित अर्थतन्त्रको शीघ्र पुनरुत्थान गर्ने विषय सरकारको उच्च प्राथमिकतामा परेको छ ।
सरकारले विकास निर्माण कार्यमा तीव्रता दिँदै सार्वजनिक सेवाको प्रभावकारी वितरणलाई प्रमुख दायित्वमा रुपमा निर्धारण गरेको छ । संविधानको रक्षा, संघीय लोकतान्त्रिक गणतन्त्रको सुदृढीकरणलाई नवगठित सरकारले महत्वका साथ प्राथमिकतामा समेटेको छ । त्यस्तै विपतको व्यवस्थापन, स्थानीय निर्वाचनलाई पनि प्राथमिकतामा राखेको छ ।

भक्तपुर, असार २९
नवनियुक्त प्रधानमन्त्री शेरबहादुर देउवाले पद तथा गोपनीयताको शपथ लिनुभएको छ । राष्ट्रपति कार्यालय शितल निवासमा आयोजित समारोहमा मंगलवार बेलुकी ८ बजेर २५ मिनेटमा प्रधानमन्त्री देउवालाई राष्ट्रपति विद्यादेवी भण्डारीले शपथ खुवाउनु भएको हो ।
सर्वोच्च अदालतले सोमबार प्रतिनिधिसभा विघटनलाई बदर गरी देउवालाई प्रधानमन्त्री नियुक्त गर्न परमादेश जारी गरेको थियो । सो अनुसार राष्ट्रपति भण्डारीले देउवालाई मंगलवार दिउँसो ३ बजेर ३९ मिनेटमा प्रधानमन्त्रीमा नियुक्त गर्नुभएको हो ।
तर नियुक्तिको भाषाप्रति असहमति जनाउँदैं देउवाले भाषा नसच्चिएसम्म शपथ नलिने अडान लिनुभएको थियो । त्यसैले साँझ ६ बजेका लागि तय भएको शपथ करिव अढाई घण्टा ढिलो भएको हो । संविधानको धारा ७६ (५) बमोजिम प्रधानमन्त्रीको नियुक्ति भए पनि राष्ट्रपति कार्यालयले सो कुरा उल्लेख नगरीकन प्रधानमन्त्री नियुक्ति गरेको पत्र जारी गरेको थियो । भाषा सच्याइएपछि देउवाले शपथ लिनुभएको राष्ट्रपति कार्यालय स्रोतले बताए ।

प्रधानमन्त्री देउवाले आजै चार जनालाई मन्त्रीमा नियुक्त गर्नुभएको छ । प्रधानमन्त्री देउवाले बालकृष्ण खाँडलाई गृह, ज्ञानेन्द्र बहादुर कार्कीलाई कानुन, न्याय तथा संसदिय मामिला मन्त्री, पम्फा भुषाल उर्जा, जलस्रोत र सिचाई मन्त्री र जनार्दन शर्मा अर्थ मन्त्री नियुक्त गर्नुभएको हो । खाँड नेपाली कांग्रेस संसदिय दलका प्रमुख सचेतक समेत हुनुहुन्छ । खाँड र कार्की नेपाली कांग्रेस तथा भुषाल र शर्मा नेकपा माओवादी केन्द्रका तर्फबाट मन्त्री बनाईएको हो । नवनियुक्त चारै मन्त्रीले आजै शपथ लिनुभएको छ ।

भक्तपुर, असार २९
प्रधानमन्त्रीको नियुक्तिमा संविधानको धारा उल्लेख नगरी सर्वोच्च अदालतको फैसला बमोजिम भन्ने भाषा प्रयोग गरिएको प्रति नेपाली कांग्रेसका सभापति शेरबहादुर देउवाले आपत्ति जनाउनुभएको छ । उहाँले विज्ञप्तीको भाषा नसच्चिएसम्म शपथ नलिने अडान लिनु भएको छ । उहाँको अडानका कारण साँझ ६ बजेका लागि तय भएको शपथ साँझ ७ बजेसम्म शुरु हुन सकेको छैन ।
राष्ट्रपति विद्यादेवी भण्डारीले प्रधानमन्त्री नियुक्त गर्दै जारी गरेको विज्ञप्तिमा ‘संविधानको धारा उल्लेख नगरी सर्वोच्च अदालत, संवैधानिक इजलासको मिति २०७८÷३÷२८ को पैmसला’ बमोजिम भन्ने वाक्य प्रयोग गरिएको थियो ।
देउवाले मुख्यसचिव शंकरदास वैरागीलाई आफ्नै निवास बोलाएर प्रधानमन्त्री नियुक्तीको विज्ञप्ति नसच्चिएसम्म शपथ ग्रहण नगर्ने बताउनुभएको थियो । देउवाले आफू संविधानको धारा ७६ (५) अनुसार नियुक्त हुनुपर्ने भन्दै असहमति जनाउनुभएको हो ।
देउवाको अडान पछि राष्ट्रपति कार्यालय विज्ञप्ति सच्याउन तयार भएको बताईएको छ । राष्ट्रपति कार्यालयबाट विज्ञप्ति सच्चिएको खबर आएपछि देउवा शपथका लागि शीतल निवास प्रस्थान गरेको उहाँको सचिवालयले जनाएको छ ।

भक्तपुर, असार २९
राष्ट्रपति विद्यादेवी भण्डारीले नेपाली कांग्रेस सभापति शेरबहादुर देउवालाई प्रधानमन्त्री पदमा नियुक्त गर्नुभएको छ । सर्वोच्च अदालतको सोमवारको आदेश अनुसार राष्ट्रपति भण्डारीले संविधानको धारा ७६ (५) अनुसार देउवालाई प्रधानमन्त्री पदमा नियुक्त गर्नुभएको हो ।
नवनियुक्त प्रधानमन्त्री देउवालाई आजै शपथ ग्रहण गराउने तयारी भइरहेको राष्ट्रपति कार्यालयले जनाएको छ । देउवा पाँचौं पटक प्रधानमन्त्री बन्नुभएको हो । देउवा २०५२ भदौ २७ गते पहिलोपटक प्रधानमन्त्री बन्नुभएको थियो । देउवा दोस्रो पटक ०५८ साउन ११ गते प्रधानमन्त्री बन्नुभएको थियो । त्यसयता देउवाको राजनीतिक जीवनसँग सँगै र नेपालको राजनीतिमा समेत अनेक उतारचढाव आए ।
माओवादी सशस्त्र द्वन्द्व उत्कर्षमा पुगेका बेला संकटकाल लम्ब्याउने कि नलम्ब्याउने भन्ने विषयमा पार्टीसँग मत बाझिएपछि तत्कालिन कांग्रेस सभापति गिरिजाप्रसाद कोइरालाले ०५९ जेठ १९ मा प्रधानमन्त्री भएकै बेला देउवालाई साधारण सदस्यताबाट समेत निष्कान गरे । देउवाले पार्टी फुटाएर नेपाली कांग्रेस (प्रजातान्त्रिक) गठन गरे ।
त्यही बेला राजा ज्ञानेन्द्र शाहले देउवालाई असक्षम घोषणा गरी प्रधानमन्त्रीबाट पदच्युत गरे । ज्ञानेन्द्रको कदमको विरोधमा दलहरुले निरन्तर आन्दोलन गरेपछि ज्ञानेन्द्रले ०६१ साल जेठ २९ मा पुनः देउवालाई तेस्रोपटक प्रधानमन्त्री बनाए ।
तर, तेस्रो पटक प्रधानमन्त्री भएका देउवालाई पुनः असक्षम घोषणा गर्दै ज्ञानेन्द्रले वि.सं. ०६१ माघ १९ गते ‘शाही कू’ मार्फत सत्ता आफ्नो हातमा लिएर प्रत्यक्ष शासन गरे ।
तत्कालिन सात राजनीतिक दल र सशस्त्र युद्धरत तत्कालिन नेकपा (माओवादी) बीच १२ बुँदे सम्झौतासँगै शुरु भएको २०६२÷०६३ को जनक्रान्तिले ज्ञानेन्द्रलाई हटाएर नेपालमा लोकतन्त्रको स्थापना भयो ।
परिवर्तित राजनीतिक घटनाक्रमसँगै संविधान सभाको निर्वाचन भयो । संविधान सभाको पहिलो बैठकले नेपालमा गणतन्त्र स्थापना गर्यो । २०७२ असोज ३ गते संविधान सभाबाट नेपालको नयाँ संविधान जारी भयो । त्यसपछि मुलुक नयाँ संविधान अनुसार निर्वाचनमा गयो । सोही क्रममा २३ जेठ ०७४ मा देउवा चौथो पटक प्रधानमन्त्रीमा निर्वाचित हुनुभयो ।
देउवाको जन्म वि.सं. २००३ जेठ ३१ गते डडेल्धुराको साबिक असीग्राम गाविस–५ र हालको गन्यापधुरा गाउँपालिका–१ मा भएको हो । प्राथमिक शिक्षा गाउँकै असिग्राम प्राथमिक विद्यालय र एलएसली सीताराम मावि डोटीबाट पुरा गरेका देउवाले २०२० सालदेखि नै जननायक वि पी कोइरालाको प्रेरणाले कांग्रेसको राजनीतिमा सक्रिय हुनुभएको थियो ।
एसएलसीपछि देउवाले काठमाडौंको त्रिचन्द्र कलेजबाट उच्च शिक्षा हासिल गर्नुभयो । नेपाल विद्यार्थी संघमा सक्रिय देउवाले विभिन्न पटक गरी करिव ९ वर्ष जेलमा बिताउनुभयो ।
देउवा वि.सं. २०२८ सालमा पहिलोपटक नेपाल विद्यार्थी संघको सभापति बन्नुभयो । विद्यार्थी राजनीतिबाट आफूलाई अब्बल बनाएका देउवालाई बीपीले सुदूरपश्चिममा पार्टीको जिम्मेवारी दिएर खटाउनुभयो ।
तर कांग्रेसले २०४६ सालमा प्रजातन्त्र प्राप्तीका लागि जनआन्दोलनको घोषणा गर्दा देउवा लन्डन स्कुल अफ इकोनोमिक्समा अध्ययन गरिरहनुभएको थियो । जनआन्दोलन सफल भएपछि देउवा काठमाण्डौं आउनुभयो ।
प्रजातन्त्र पुनःस्थापनापछि सम्पन्न पहिलो आम निर्वाचनमा कांग्रेसले स्पष्ट बहुमत ल्याएपछि गिरिजा प्रसाद कोइराला प्रधानमन्त्री बन्नुभयो भने देउवा गृहमन्त्री बन्नुभएको थियो ।

भक्तपुर, असार २९
चाँगुनारायण नगरपालिकको मेयर उद्यमशिल विकास कार्यक्रमको शुभारम्भ भएको छ । नगरपालिकाले नेपाल बैंक लिमिटेड कमलविनायक शाखासँगको समन्वयमा हाइट हाउस खाजाघरका सञ्चालक राधाकृष्ण घिमिरेलाई मंगलवार तीन लाख नगद उपलब्ध गराउँदैं सो कार्यक्रमको शुभारम्भ गरेको हो ।
चाँगुनारायण नपाले चालु आर्थिक वर्षको नीति तथा कार्यक्रममा उद्यमी बन्न चाहने नगरबासीलाई बढीमा ३ लाख रुपैंया विना धितो निव्र्याजी ऋण उपलब्ध गराउने घोषणा गरेको थियो । सोही अनुसार पहिलो लाभग्राहीको रुपमा खाजाघरका सञ्चालक घिमिरेसँग सम्झौता भई कार्यान्वयनको शुभारम्भ गरिएको नगरप्रमुख सोमप्रसाद मिश्रले बताउनुभयो ।
सम्झौता अनुसार लाभग्राहीले पाँच वर्षमा उक्त रकम चुक्ता गर्नुपर्ने छ । समयावधीभित्र ऋण चुक्ता नगर्ने वा ऋणको दुरुपयोग गरेको खण्डमा नगरपालिकाले कालो सुचीमा समावेश गरी नगरका अन्य सेवा सुविधामा रोक लगाईने र बैंकले पनि प्रचलित ऐन नियमानुसार कारवाही गर्ने प्रावधान राखिएको नगरप्रमुख मिश्रले बताउनुभयो ।
नगरपालिकाले महिला उद्यम, दलित र पिछिडिएका वर्ग, वैदेशिक रोजगार, युवा स्वरोजगार र कृषि गरी पाँच वटा क्षेत्रमा उद्यमी बन्न चाहनेहरुलाई छनोट गरी, उद्यमी बन्ने तालिम निःशुल्क प्रदान गर्ने र तालिममा सहभागीहरुले प्रस्ताव गरेको उद्यमशिलताको कार्यक्रमका आधारमा छनोट गरी विना धितो निव्र्याजी ऋण दिने व्यवस्था गरिएको नगरप्रमुख मिश्रले जानकारी दिनुभयो ।
चालु आर्थिक वर्ष २६२ जना यो कार्यक्रमको लागि छनोट भएका छन । कार्यक्रमका लागि आवेदन दिने १ हजार १२१ जनाले निवेदन दिएका थिए । ती मध्ये मनोविज्ञको टोलीले विभिन्न ३६ वटा प्रश्नको सहायताले ३९० जनालाई उद्यमशिलता तालिमका लागि छनोट गरिएको नगरप्रमुख मिश्रले बताउनुभयो । तालिममा सहभागी मध्ये २९२ जनालाई छनोट गरी नगरपालिकाले नामावली नेपाल बैंकमा पठाएको र उनीहरुले प्रस्तुत गर्ने परियोजना प्रस्तावका आधारमा ऋण अनुदान दिने व्यवस्था गरिएको छ ।
त्यसका लागि नगरपालिकाले ३ करोड रुपैंया बैंकमा जम्मा गरिएको उहाँले बताउनुभयो । ‘यो वर्ष कार्यक्रमको शुरुवात गरेका छौं, कार्यविधि लगायतका तयारीले केही ढिलो हुन पुग्यो,’ उहाँले भन्नुभयो, ‘आगामी साउनमा कार्यक्रमले गति लिने र पहिलो चरणमा छनोट भएका २९२ जनाले लाभ लिने विश्वास लिएको छु ।’
कार्यक्रम अन्तर्गत नेपाल बैंकले उद्यमीलाई ७ दशमलव ९८ प्रतिशत व्याजमा ऋण उपलब्ध गराईने छ । सो व्याज मध्ये ऋणको विषयवस्तु अनुसार ५ वा ६ प्रतिशत नेपाल सरकार र राष्ट्र बैंकको अनुदानबाट व्यहोर्ने र बढीमा २ दशमलव ९८ प्रतिशत नगरपालिकाले व्यहोर्ने गरी कार्यविधि तयार गरिएको नेपाल बैंक कमलविनायक शाखाका प्रबन्धक विष्णुमान भैलले जानकारी दिनुभयो ।

भक्तपुर, असार २९
सर्वोच्च अदालतको फैसलाको स्वागत गर्दै नेपाल तरुण दल भक्तपुरले सोमवार साँझ भक्तपुरको टौमढीस्थित ङातापोल्हँ (पाँच तल्ले) मन्दिर परिसरमा दिप प्रज्वलन गरेको छ ।
सर्वोच्च अदालतको संवैधानिक इजलासले प्रतिनिधि सभा विघटन गरी मध्यावधी निर्वाचन गर्ने प्रधानमन्त्री के पी शर्मा ओलीको कदमलाई असंवैधानिक ठहर गरी बदर गरेको थियो । प्रधानन्यायाधिश चोलेन्द्र शमशेर जबरा नेतृत्वको संवैधानिक इजलासले नेपाली कांग्रेसका सभापति शेरबहादुर देउवालाई असार २९ गते साँझ ५ बजेभित्र प्रधानमन्त्री नियुक्त गर्न परमादेश समेत जारी गरेको थियो ।

सर्वोच्चको फैसला संविधानवाद, लोकतन्त्र र जनचाहनाको पक्षमा आएको भन्दै दिप प्रज्वलन गरेको नेपाल तरुण दल भक्तपुरका अध्यक्ष राजु थापाले बताउनुभयो ।
दिप प्रज्वलनपछि सम्वोधन गर्दै अध्यक्ष थापाले सर्वोच्च अदालतले जनताको माग अनुसार र संविधान अनुसार फैसला गरेको प्रतिक्रिया दिनुभयो । कांग्रेसले ओलीको असंवैधानिक कदमहरुको शान्तिपूर्ण आन्दोलन गर्दै आइरहेको स्मरण गराउँदैं उहाँले सर्वोच्चको पैmसलालाई सम्मान गरेर आत्मसात गर्न ओली र उनका कार्यकर्ताहरुलाई चेतावनी दिनुभयो ।
उहाँले भन्नुभयो, ‘ओलीका साइबर स्यालहरु माइतीघरमा जम्मा भएर सर्वोच्च अदालत र संविधानको विरोध गरिरहेका छन । कांग्रेस र तरुण दल जहिले पनि सर्वोच्चको सम्मान गर्दछ । कसैले फैसलाको विरुद्धमा अशान्ति मच्चाए तरुण दल चुप लागेर बस्ने छैन । प्रतिकारमा उत्रन्छ ।’

टौमढीमा नेपालको झण्डासँगै नेपाली कांग्रेसको झण्डा निर्माणगरी सहभागीहरुले दिप प्रज्वलन गरेका थिए । सो अवसरमा नेपाली कांग्रेस भक्तपुरका सचिव निशान ढुंगेल, भक्तपुर क्षेत्र नं. १ का सभापति जीवन खत्री, प्रदिप कार्की, रवि राणा, राजु पुरीलगायतका नेता कार्यकर्ताहरुको सहभागिता रहेको थियो ।

भक्तपुर, असार २८
नेपाल मजदुर किसान पार्टीका सचिव एवम् सांसद प्रेम सुवालले संसद पुनःस्थापनासँगै सांसद खरिद बिक्रिको जोखिम बढेको बताउनुभएको छ । भक्तपुर नगरपालिकाद्वारा प्रकाशित स्थानीय पाठ्यक्रम सन्दर्भ सामाग्री ‘ख्वपको पहिचान — भाग २’ पुस्तकको सोमवार अनलाइनमार्फत विमोचन गर्दै सांसद सुवालले संसद पुनःस्थापनासँगै देशको राजनीतिमा अन्योल यथावत रहेको बताउनुभएको हो ।
उहाँले भन्नुभयो, ‘संसद पुनःस्थापनासँगै देशको राजनीतिमा अन्योल यथावत रहेको र आगामी दिनमा पुनः सांसद खरिद बिक्रीको जोखिम रहेको छ ।’ उहाँले नयाँ बन्ने सरकारले देश र जनताको हितमा बजेट पेश गर्ने सम्भावना नरहेको बताउनुभयो ।
उहाँले देशको सन्तुलित विकास योजना लागु गर्न र बसाइँसराइँलाई निरुत्साहित गर्न पटक पटक सरकारको ध्यानाकर्षण गराउँदा पनि सुनुवाई नभएको बताउनुभयो ।
कार्यक्रममा भक्तपुर नगरपालिकाका प्रमुख सुनिल प्रजापतिले काठमाडौं, भक्तपुर र ललितपुर आफैमा एउटा स्मार्ट सिटीको रुपमा रहेको बताउँदै उपत्यकामा आधुनिक सहर बनाउने र विकासको सम्पदा विनास गर्ने कार्य भएको बताउनुभयो । उहाँले काठमाडौं उपत्यकालाई सांस्कृतिक केन्द्रको रुपमा विकास गर्नु उपयुक्त हुनेमा जोड दिनुभयो ।

लक्ष्मी गारु, भक्तपुर, असार २८
भक्तपुर नगरपालिकाले स्थानीय पाठ्यक्रमको सन्दर्भ सामाग्रीको रुपमा ‘ख्वपको पहिचान — भाग २’ पुस्तक सार्वजनिक गरेको छ । नगरपालिकाले सोमवार अनलाइनमार्फत सो पुस्तक सार्वजनिक गरेको हो ।
पुस्तकमा विभिन्न व्यक्तित्वहरुको जीवनीसहित २४ वटा लेख समावेश गरिएको छ । पुस्तकमा छापिएका विभिन्न व्यक्तित्वका जीवनी तथा अन्य लेखहरुले भक्तपुरको समग्र इतिहासको उत्खनन् र अभिलेखकीकरण गरेको स्थानीय पाठ्यक्रम निर्माण कार्यदलका संयोजक योगेन्द्रमान बिजुक्छेँले बताउनुभयो । उहाँले विश्व मानव सभ्यतामा भक्तपुरको इतिहास, कला र सभ्यताका विभिन्न आयामबारे थप अध्ययन—अनुसन्धानमा पुस्तकले महत्वपूर्ण भूमिका खेल्ने विश्वास व्यक्त गर्नुभयो ।
पुस्तकको विमोचन गर्दै नेपाल मजदुर किसान पार्टीका सचिव एवम् सांसद प्रेम सुवालले पुस्तकमा समेटिएका विभिन्न व्यक्तित्वहरुको जीवनी अध्ययनले मानिस आफ्नो परिवारको लागि मात्र काम गर्ने नभई समाज र देशको निम्ति निःस्वार्थ भावनाले काम गर्नुपर्ने प्रेरणा दिने बताउनुभयो । उहाँले पुस्तकले नयाँ पुस्तालाई समाज, देश र जनताको लागि बाँच्ने प्रेरणा दिने बताउनुभयो ।
भक्तपुरको पहिचानलाई विश्वसामु पस्कन पुस्तकले मद्दत पु¥याएको बताउँदैं सांसद सुवालले पुस्तकका लेखहरुका विषयवस्तुमा भौतिकवादी व्याख्यालाई जोड दिनुपर्ने बताउनुभयो ।
भक्तपुर नगरपालिकाका प्रमुख सुनिल प्रजापतिले प्रकाशनमा ल्याएको ख्वपको पहिचान भक्तपुरको विषयमा जान्न चाहने सबैको निम्ति उपयोगी पुस्तकको रुपमा रहने विश्वास व्यक्त गर्नुभयो ।
पुस्तकका भाषा सम्पादक ज्ञानसागर प्रजापतिले प्रकाशित पुस्तकले शिक्षकहरुलाई सिर्जनशील बनाउन मद्दत पु¥याउने बताउनुभयो । स्थानीय पाठ्यक्रम कार्यदलका सदस्य प्रा. सिद्धिरत्न शाक्यले शिक्षकहरुको मागअनुरुप सन्दर्भ सामाग्री तयार भएको र पुस्तकको पाठनपाठनबाट पहिलेभन्दा शिक्षा स्तरीय हुने विश्वास लिएको बताउनुभयो । उहाँले प्रकाशित पुस्तक शिक्षक तथा विद्यार्थीलाई मात्र नभई भक्तपुरबारे अनुसन्धान गर्न चाहने सबैको लागि महत्वपूर्ण पुस्तकको रुपमा रहेको चर्चा गर्नुभयो ।
कार्यक्रममा शान्ति निकेतन माविका प्रधानाध्यापक महेन्द्रगोपाल कर्माचार्यले केन्द्रीकृत पाठ्यक्रमले विद्यार्थीहरुलाई स्थानीय विषयवस्तुबारे वञ्चित गरेको बताउँदैं स्थानीय पाठ्यक्रमको महत्वमाथि प्रष्ट पार्नुभयो । कर्माचार्यले स्थानीय पाठ्यक्रमको मर्मअनुसार विद्यार्थीहरुलाई पठनपाठन गर्ने जिम्मेवार निकाय शिक्षकहरु भएको र स्थानीय पाठ्यक्रमको सफल कार्यान्वयनमा ख्वपको पहिचान सन्दर्भ सामाग्रीले महत्वपूर्ण भूमिका खेल्ने बताउनुभयो ।