Blog

भक्तपुर, साउन ३
प्रधानमन्त्री शेरबहादुर देउवालाई जनता समाजवादी पार्टी (जसपा)का अध्यक्ष महन्थ ठाकुर पक्षले पनि विश्वासको मत दिने भएको छ । संसदमा प्रधानमन्त्री देउवाको विश्वासको मत लिने प्रस्तावमाथी छलफल भइरहेको बेला ठाकुर पक्षले देउवालाई विश्वासको मत दिने निर्णय गरेको हो ।
जसपाको ठाकुर पक्षले पनि विश्वासको मत दिने भएपछि देउवालाई नेकपा एमालेका वरिष्ठ नेता माधवकुमार नेपाल पक्षले मत नदिएपनि आवश्यक मत पुग्ने भएको छ । हाल संसदमा २७१ सदस्य छन । विश्वासको मत प्राप्त गर्न १३६ मत आवश्यक छ ।
त्यसका लागि कांग्रेसका ६३ मध्ये ६१ जनाले मत दिन पाउनेछन् । कांग्रेसका दुई सांसद विजयकुमार गच्छदार र मोहम्मद अफ्ताब आलमले निलम्बनको कारण मत दिन पाउने छैनन् । त्यसैगरी, नेकपा माओवादी केन्द्रका ५३ सांसदमध्ये चार जना बर्खास्त भएका कारण ४९ जनाले मत दिन पाउँछन । माओवादी परित्याग गरी नेकपा एमाले प्रवेश गरेका माओवादी केन्द्रका चार सांसद टोपबहादुर रायमाझी, प्रभु साह, लेखराज भट्ट र गौरी शंकर चौधरी बर्खास्त भएका छन ।
जसपाका ३४ मध्ये ३२ सांसदले मत दिन पाउँछन । जसपाका रेशम चौधरी र हरिनारायण रौनियारले मतदान गर्न पाउने छैनन् । देउवालाई राष्ट्रिय जनमोर्चाका एक सांसदले पनि विश्वासको मत दिने निर्णय गरेको छ ।
जसपाको ठाकुर पक्षले पनि विश्वासको मत दिने भएपछि देउवाले कांग्रेसका ६१, माओवादीका ४९, जसपाका ३२ र जनमोर्चाको एक गरी कुल १४३ मत पाउने पक्का भएको छ ।

भक्तपुर, साउन ३
नेकपा एमाले उपाध्यक्ष एवम् अछाम निर्वाचन क्षेत्र नम्बर १ बाट निर्वाचित सांसद भीम रावलले प्रतिनिधि सभा सदस्यबाट राजीनामा दिनुभएको छ । उहाँले राजनीतिक दलका शीर्ष नेतामा स्वेच्छाचारिता बढेको भन्दै सभामुखलाई सम्बोधन गर्दै आइतवार सांसद पदबाट राजीनामा दिनुभएको हो ।
नेता रावलले घृणित राजनीतिक खेलबाट आफूलाई अलग राख्नु श्रेयस्कर ठानेर राजीनामा दिएको बताउनुभएको छ ।

यस्तो रावलको राजीनामा

सम्माननीय सभामुख ज्यु, प्रतिनिधि सभा सिंहदरबार काठमाडौँ ।

विषय ः राजीनामा ।

महोदय, झन्डै आधा शताब्दी लामो राजनीतिक जीवनमा मैले अनेकौँ राजनीतिक आरोह अवरोह तथा घात प्रतिघात व्यहोरेको छु । र तिनको सामना गर्दै आएको छु । यो सबै मैले मातृभूमिको स्वाधीनता, स्वतन्त्रताका लागि गरेको थिए । तर राजनीतिक नेतृत्वको त्यसविपरितका काम हुँदै देश र जनतालाई अनेकौँ पीडा र अनिश्चयको दिशातर्फ धकेल्ने किर्ते काम हुँदै गए ।

फलस्वरूप आज नेपाल र नेपालीहरूको शिर निहुरिँदै गएको छ । अझ केही समययता राजनीतिक वृत्तको नेतृत्व तहमा देखिएको चरम सत्ता र पदलिप्सा तथा विधि र पद्धतिलाई आफ्नो उचित एवं निहित स्वार्थका लागि मिच्दै अत्यन्त स्वेच्छाचारी र निरंकुश तरिकाले काम गर्ने अनैतिक चरित्रको घृणित अभ्यास भइरहेको देख्दा कुनैपनि सच्चा, देशभक्त र लोकतन्त्र प्रेमी नेपालीको मन रुन्छ । यस्ता विकृत तथा देश र जनताका हितविपरितका क्रियाकलापका विरुद्ध जुध्दै रोक्नका लागि जनप्रतिनिधि एवं राजनीतिक कर्मीको हैसियतले मैले अधिकतम प्रयत्न पनि गरे । तर पछिल्लो समय प्रतिनिधि सभाको विघटनदेखि पुनर्स्थापना र प्रधानमन्त्रीले विश्वासको मत लिने अवस्थासम्म आइपुग्दा उच्च राजनीतिक नेतृत्व तहमा देखिएको अनियन्त्रित र चरम अनैतिक राजनीति, स्वेच्छाचारी व्यवहार तथा देश जनता र पार्टीको हित भन्दा निजी स्वार्थ अहम्, प्रतिशोध चरित्र र कार्य देख्दा देश र जनताको हितलाई सर्वोपरि सम्झने जुनसुकै नागरिकको मनमा घृणा उत्पन्न हुन्छ । यस्तो स्थितिमा अनैतिक राजनीतिक तथा देश र जनविरोधी राजनीतिक अभ्यासको मतियार हुनुभन्दा यसबाट अलग हुनु श्रेयस्कर भएकाले उक्त प्रकारको दूषित खेलबाट आफूलाई अलग गर्दै प्रतिनिधि सभाको सदस्य पदबाट राजीनामा दिएको छु ।

भीमबहादुर रावल सदस्य प्रतिनिधि सभा

भक्तपुर, साउन ३
प्रधानमन्त्री शेरबहादुर देउवाले आज (आइतवार) प्रतिनिधिसभामा विश्वासको मत लिने भएको छ । त्यसका लागि कानुनमन्त्री ज्ञानेन्द्र बहादुर कार्कीले सभामुखमार्फत संसदमा विश्वासको मत लिने प्रस्ताव दर्ता गर्नुभएको छ ।
प्रतिनिधिसभाको आजै बस्ने दोस्रो बैठकमा विश्वासको मत लिने प्रस्तावमा छलफल गरी निणर्याथ पेश हुने बताईएको छ । संविधानको धारा ७६ को उपधारा ५ बमोजिम प्रधानमन्त्रीमा नियुक्त देउवाले धारा ७६ (६) अनुसार संसदबाट ३० दिनभित्र विश्वासको मत लिनुपर्ने व्यवस्था छ ।
प्रतिनिधिसभा बैठकअघि कांग्रेसको संसदीय दलको बैठक बस्ने छ । सो बैठकमा पार्टीको संसदीय भूमिका, विश्वासको मत लिन पार्टीमा ह्वीप जारी गर्ने तथा सरकारलाई प्रभावकारी बनाउने लगायत विषयमा छलफल हुने बताईएको छ ।
यसैगरी प्रधानमन्त्री देउवाले संसदबाट विश्वासको मत लिन तयारी गरेपछि सत्ता साझेदार दल नेकपा माओवादी केन्द्रको संसदिय दलको बैठक बसेको छ । सो बैठकले देउवालाई विश्वासको मत दिने निर्णय गरेको छ ।
यस्तै देउवालाई प्रधानमन्त्री बनाउन हस्ताक्षर गरेका नेकपा एमालेका वरिष्ठ नेता माधवकुमार नेपाल पक्षले पनि देउवालाई विश्वासको मत दिने भएको छ । सर्वोच्च अदालतले नेपाल पक्षका सांसदहरुको हस्ताक्षरको आधारमा देउवालाई प्रधानमन्त्री नियुक्त गर्न परमादेश जारी गरेको र विश्वासको मत दिँदा पार्टीको ह्वीप समेत नलाग्ने आदेश भएकाले नेपाल पक्षका सांसदहरुले विश्वासको मत दिने तयारी गरेको हो ।
देउवालाई विश्वासको मत नदिँदा सर्वोच्चको आदेश विपरित हुन जाने कानुन व्यवसायी र संवैधानिक कानुनका ज्ञाताहरुको विष्लेषणले गर्दा पनि नेपाल पक्षका सांसदहरुले विश्वासको मत दिने तयारी गरेको बुझिएको छ ।
नेकपा एमाले माधव नेपाल समूहकी सांसद रामकुमारी झाँक्रीले प्रतिनिधि सभालाई पूरा कार्यकाल सञ्चालन गर्नका लागि प्रधानमन्त्रीलाई विश्वासको मत दिनुपर्ने बताउनुभयो । ‘हामी २३ जना निवेदककर्ताले भोट हाल्नु त हाम्रो कर्तव्य नै हो । हामीले विश्वासको मतको पक्षमा भोट हाल्नेछौं,’ झाँक्रीले भन्नुभयो ।
तर नेकपा एमालेका सचिव भीम आचार्यले भने एमाले विभाजित गर्ने षडयन्त्र अनुसार प्रधानमन्त्री देउवाले हतार–हतार विश्वासको मत लिन खोजेको टिप्पणी गर्नुभएको छ । नेता आचार्यले एक महिनाभित्र लिँदा हुने विश्वासको मत चार दिनमै लिनु एमाले फुटाउने षडयन्त्र भएको बताउनुभयो । ‘नेकपा एमालेलाई विभाजित गर्ने षडयन्त्र अन्तरगत यो सब भइरहेको छ । जबकी हामी १० बुँदे सहमति पश्चात विभाजित भएर एमालेले भोट हाल्दैन भनिरहेका छौं,’ उहाँले भन्नुभयो ।

नेकपा एमालेले विश्वासको मत नदिने

यसैबीच नेकपा एमालेको स्थायी समिति बैठकले प्रधानमन्त्री देउवालाई विश्वासको मत दिने सांसद एमालेमा नरहने निर्णय गरेको छ । अध्यक्ष के पी शर्मा ओली पक्षका मात्र सहभागी स्थायी समिति बैठकले देउवालाई विश्वासको मत नदिने निर्णय गर्दै सो निर्णय गरेको हो ।
बैठकपछि पार्टी प्रवक्ता प्रदिप ज्ञवालीले भन्नुभयो, नेकपा एमालेको संस्थागत निर्णयभन्दा बाहिर रहेर आफ्नो पार्टीको सरकारलाई ढलाएर बनेको सरकार या प्रधानमन्त्रीको पक्षमा मत हालिसकेपछि ती साथीहरु पार्टीमा रहनुहुन्न । यो चाहिं प्रष्टै हो ।’
संसद अधिवेशनको पहिलो दिनको बैठकमा औपचारिकता पूरा गर्ने परम्परा भएपनि एमाले एकतावद्ध भइहाल्छ कि भन्ने मनसायले हतार–हतार विश्वासकोमत लिन खोजेको ओली पक्षका नेताहरुको निष्कर्ष छ ।

भक्तपुर, साउन ३
सर्वोच्च अदालतको आदेशानुसार संघीय संसदको अधिवेशन आज (आइतवार) शुरु हुँदैछ । संसदका दुवै सदनको बैठक नयाँ बानेश्वरस्थित संसद भवनमा बस्ने छ । सरकारको सिफारिशमा राष्ट्रपति विद्यादेवी भण्डारीले नयाँ बानेश्वरस्थित संसद् भवनमा आइतबार अपराह्न ४ बजेका लागि अधिवेशन आह्वान गर्नुभएको हो ।
बैठकका लागि तयारी पुरा भएको संसद सचिवालयले जनाएको छ । बैठकका लागि शनिवार सांसद र संसद सचिवालयका कर्मचारी र मर्यादापालकहरुको कोरोना एन्टीजेन परीक्षण गरिएको थियो ।
संसदको दुवै सदनमा राष्ट्रपति विद्यादेवी भण्डारीबाट प्राप्त अधिवेशन आह्वानसम्बन्धी पत्रको व्यहोरा पढेर सुनाउनेछन् । त्यस्तै प्रतिनिधिसभामा सभामुख अग्नी सापकोटाले प्रतिनिधिसभा नियमावली, २०७५ को नियम १० को उपनियम (१) बमोजिम अध्यक्षता गर्ने सदस्यहरुको मनोनयन गर्ने सम्भावित कार्यसूची छ ।
संसद बैठकले अघिल्लो सरकारले ल्याएका १६ वटा अध्यादेश र केही विधेयकहरुलाई प्रक्रियामा लगिने छ । अर्थमन्त्री जनार्दन शर्मा (प्रभाकर)ले अध्यादेशबाट ल्याइएको बजेट संसदमा पेश गर्ने जानकारी यसअघि नै दिईसक्नु भएको छ ।
मुलुकमा विद्यमान फरक राजनीतिक घटनाक्रमसँगै प्रतिनिधिसभा पुनःस्थापना भई शुरु हुन लागेको यस अधिवेशनमा करीब साढे तीन वर्ष सत्तामा रहेको नेकपा एमाले प्रमुख प्रतिपक्षीको हैसियतमा देखिने छ ।
तत्कालीन प्रधानमन्त्री केपी शर्मा ओलीको सिफारिशमा राष्ट्रपति विद्यादेवी भण्डारीले विघटन गरेको प्रतिनिधिसभालाई सर्वोच्च अदालतले असार २८ गते पुनःस्थापना गरेको थियो ।

भक्तपुर, साउन २
जनता समाजवादी पार्टी (जसपा) सरकारमा जाने भएको छ । जसपाका अध्यक्ष उपेन्द्र यादवको अध्यक्षतामा आज (शनिवार) बसेको सांसदहरुको बैठकले सरकारमा जाने निर्णयसँगै आइतवार बस्ने संसदको बैठकमा सत्तापक्षको कुर्सीमा बस्ने निर्णय गरेको हो ।
बैठकमा अर्का अध्यक्ष महन्थ ठाकुर पक्षका पाँच सांसदपनि सहभागी भएको बताईएको छ । अध्यक्ष यादवले ठाकुर पक्षका अमृता अग्रहरी, नरमाया ढकाल, रानी मण्डल, प्रमोद साह र रूही नाथ यादव बैठकमा सहभागी भएको बताउनुभयो ।
आन्तरिक विवादले अनौपचारिकरुपमा विभाजन भएको जसपाको ठाकुर पक्ष यसअघि ओली नेतृत्वको सरकारमा सहभागी भएको थियो । त्यसबेला ठाकुरको पक्षमा २० सांसद थिए । ठाकुर पक्षका पाँच जनाले कित्ता परिवर्तन गरेपछि अब यादवको पक्षमा सांसदको संख्या १७ पुगेको छ । यसले जसपाको संसदिय मोर्चा र पार्टीको कार्यकारी समिति दुवैमा यादवको बहुमत पुगेको छ ।
जसपाको आधिकारिता सम्बन्धी विवाद निर्वाचन आयोगमा विचाराधिन रहेको छ । आयोगले भोली आइतवार दुवै पक्षलाई छलफलका लागि बोलाएको छ । सम्भवतः आयोगले जसपाको आधिकारिता विवादका सम्बन्धमा आइतवार नै फैसला गर्न सक्ने आंकलन गरिएको छ ।

भक्तपुर, साउन २
बागमति प्रदेश पूर्वाधार विकास साझेदारी कार्यक्रम अन्तर्गत आर्थिक वर्ष २०७७÷०७८ मा मध्यपुर थिमि नगरपालिकाभित्र १० वटा योजना सम्पन्न भएका छन । जसमध्ये सार्वजनिक शौचालय, अस्पताल भवन, फल्चा (पाटी), अति विभिन्न आवास निर्माणका साथै बाटो सुधार, खानेपानी तथा ढल बिस्तार र टेवा पर्खाल निर्माणलगायतका योजना छन ।
प्रदेश सभा सदस्य डा. राजेन्द्रमान श्रेष्ठको पहलमा निर्माण सम्पन्न भएका ती योजनामा मगरगाउँ शिक्षा विभागतिर खानेपानी लाईन पाइप बिस्तार, नमूना फुलबारी मार्ग सुधार, नारायणविलास जोशी स्मृति प्रतिष्ठान भवन निर्माण, नेपाल कोरिया मैत्री नगरपालिका अस्पताल प्रशासकिय भवन निर्माण रहेका छन ।

त्यसैगरी भुलाङखेल कलात्मक कुटु फल्चा पुनःनिर्माण, अति विपन्न आवास निर्माण अन्तर्गत चार वटा घर निर्माण, नीलबाराही सार्वजनिक शौचालय पुनःनिर्माण, बोडे थिमिलाँ कलात्मक फल्चा पुनःनिर्माण, हाडोल–कुण्डोलबाट गाखु जोड्ने बाटो सुधार र गट्ठाघर अरनिको बस्तीमा ढलान, ढल निकास, टेवा पर्खाल निर्माण योजना प्रदेश पूर्वाधार विकास साझेदारीमा सम्पन्न भएको प्रदेश सभा सदस्य डा. श्रेष्ठले बताउनुभयो ।

नगरको वडा नं. २ को मगरगाउँमा गरिएको खानेपानी पाइप लाइन बिस्तारले ५० घर लाभान्वित भएको उपभोक्ता समितिका अध्यक्ष राजेन्द्रबहादुर खड्काले बताउनुभयो । करिव ५ सय मिटर लामो उक्त पाइप लाइन बिस्तारका लागि १२ लाख ५१ हजार ८३ रुपैंया खर्च भएकोमा स्थानीय उपभोक्ताहरुबाट २ लाख ५० हजार २१७ रुपैंया व्यहोरेको खड्काले जानकारी दिनुभयो ।

त्यसैगरी भुलाँखेल कलात्मक कुटु फल्चा पुनःनिर्माणमा १७ लाख ९८ हजार ५५० रुपैंया खर्च भएको उपभोक्ता समितिका अध्यक्ष श्यामचन्द्र श्रेष्ठले बताउनुभयो । पूर्वाधार विकास साझेदारी कार्यक्रम अन्तर्गत नै मध्यपुर थिमिमा चार अति विपन्न परिवारलाई आवास निर्माण गरिएको छ । प्रदेश सरकारको करिव २० लाख सहयोगमा मध्यपुर थिमि ४ मा २ वटा, वडा नं. ७ र ८ मा एक एक वटा एकतल्ले आवास निर्माण गरिएको उपभोक्ता समितिका अध्यक्ष नविन प्रकाश श्रेष्ठले बताउनुभयो ।

त्यस्तै करिव ४ सय वर्ष पुरानो बोडे थिमिलाँ कलात्मक फल्चा निर्माणमा १७ लाख ९७ हजार ३९३ रुपैंया खर्च भएको उपभोक्ता समितिका अध्यक्ष द्रव्यलाल जयना श्रेष्ठले बताउनुभयो ।
बागमति प्रदेशबाट पूर्वाधार विकास साझेदारी कार्यक्रम अन्तर्गत गट्ठाघर अरनिको बस्तीमा ढलान, ढल निकास, टेवा पर्खाल निर्माणका लागि २० लाख, हाडोल–कुण्डोलबाट गाखु जोड्ने बाटो सुधारका लागि २० लाख, नारायणविलास जोशी स्मृति प्रतिष्ठान भवन निर्माणका लागि ९१ लाख, नेपाल कोरिया मैत्री नगरपालिका अस्पताल प्रशासकिय भवन निर्माणका लागि ५० लाख, नीलबाराही सार्वजनिक शौचालय पुनःनिर्माणका लागि ३० लाख विनियोजन गरेको प्रदेश सभा सदस्य डा. श्रेष्ठले जानकारी दिनुभयो ।
उल्लेखित योजनाहरुको कार्य प्रगतिको शनिवार डा. श्रेष्ठको नेतृत्व र जिल्ला समन्वय समितिका सदस्य उमेशलाल श्रेष्ठको अगुवाईमा अनुगमन गरिएको थियो । सो अनुगमनमा जिससका सदस्यहरु, सञ्चारकर्मी, स्थानीय उपभोक्ताहरुको सहभागिता रहेको थियो ।

भक्तपुर, साउन १
नेपाली कांग्रेसको पदाधिकारी र पूर्वपदाधिकारीहरुको बैठक पार्टी कार्यालय सानेपामा आज (शुक्रवार) दिउँसो २ बजे बस्ने भएको छ । पार्टीको १४ औं महाधिवेशनका लागि क्रियाशिल सदस्य छानविन गरी असारमसान्तसम्म टुंगो लगाउनु पर्ने समयसिमा तोकेको थियो तर केही जिल्लामा देखिएको विवादका कारण सकिएको छैन । त्यसैले महाधिवेशन कार्यतालिका हेरफेर गर्ने तयारी स्वरुप पदाधिकारी र पुर्वपदाधिकारी बैठक बोलाएको कांग्रेसले जनाएको छ ।
यसअघि बैठक असार २९ गते मंगलवारका लागि बोलाएको थियो । तर सर्वोच्च अदालतले संसद पुनःस्थापना गरेसँगै बदलिएको परिवेशका कारण बैठक आजका लागि तय गरेको हो ।
कांग्रेसको १४ औं महाधिवेशन भदौ १६ देखि १९ गतेसम्म काठमाडौंमा गर्ने गरी तय भएको छ । त्यसका लागि साउन १२ गतेदेखी पार्टीको तल्लो निकायको अधिवेशन गर्ने कार्यतालिका रहेको छ ।
कांग्रेसको गत असार ४ गतेको केन्द्रीय समिति बैठकले साउन १२ गते गाउँ र नगरका वडा समितिको अधिवेशन, साउन १६ गते गाउँ र नगरपालिका अधिवेशन, साउन २० गते प्रदेशसभा क्षेत्रीय अधिवेशन, साउन २३ गते प्रतिनिधिसभा क्षेत्रीय अधिवेशन, जिल्ला अधिवेशन साउन २६ र प्रदेश अधिवेशन भदौ १ र २ गर्ने तय गरेको थियो ।

भक्तपुर, साउन १
लुम्बिनी प्रदेशमा बजेट पास नहुने भएपछि बिहिवार मुख्यमन्त्री शंकर पोखरेलसहित सत्तापक्षले प्रदेश सभा बहिष्कार गरेका छन । प्रदेश सरकारले बिहिवार राती १२ बजेदेखी लागु हुनेगरी प्रदेश सभाको बैठक समेत अन्त्य गरेका छन ।
असार मसान्तभित्र प्रदेशसभाबाट बजेट पास गर्न असफल भएकाले लुम्बिनी प्रदेश सरकार साउन १ गते शुक्रबारदेखि राज्यकोषबाट खर्च गर्न नसक्ने अवस्थामा पुगेको छ । प्रदेश सभाको अधिवेशन अन्त्य गरेकाले शुक्रवार नै अध्यादेशमार्फत बजेट ल्याउन सक्ने अनुमान गरिएको छ ।
आर्थिक वर्ष ०७७÷७८ को अन्तिम दिन बिहिवार बजेट पास गर्नका लागि बसेको प्रदेश सभा बैठकमा मुख्यमन्त्री पोखरेलले सांसदहरुले उठाएका प्रश्नको जवाफ दिँदैं सहमतिमा बजेट पास गर्न आग्रह गर्नुभएको थियो ।
उहाँले विश्वासको मत दिनुपर्ने विपक्षी दलको माग पुरा गर्न तयार रहेको बताउँदैं भन्नुभयो, ‘विश्वासको मत लिनुप¥यो भन्नुहुन्छ, त्यसका लागि म तयार छु । तर त्यस पछाडिको परिणाम के त ? त्यो तपाईं हामी सबै विचार गरौं ।’
बजेट पास गर्ने प्रक्रियामा जानु अघि एमाले प्रमुख सचेतक भूमिश्वर ढकालले बजेटबारे सहमतिका लागि समय दिन सभामुखसँग माग गरेका थिए । सभामुख पूर्णबहादुर घर्तीले विपक्षी दललहरुको राय पनि लिने बताउँदैं प्रमुख प्रतिपक्षी दल कांग्रेस संसदीय दलका नेता वीरेन्द्रकुमार कनोडियालाई समय दिनुभयो ।
कनोडिया रोष्टममा बोलिरहँदा मुख्यमन्त्री पोखरेल बैठक छाडेर संसदबाट बाहिरिनुभयो । उहाँसँगै सत्तापक्षका सांसद मन्त्रीहरु पालैपालो उठेर हिँड्नुभयो र प्रदेश सभा सत्तापक्ष विहिन बन्यो ।
संसदमा सत्तापक्ष खाली भएपछि सभामुख घर्तीले सहमतिका लागि भन्दै आधा घण्टा संसद स्थगित गर्नुभयो । तर सहमतिका लागि बैठक नै बस्न नसकेपछि संसद सचिवालयले सूचना टाँसेर शुक्रबार १ बजेसम्मका लागि संसदको बैठक स्थगित भएको जानकारी दिए ।
विपक्षी गठबन्धनका नेताहरुले सरकार अल्पमतमा रहेको र अल्पमतको सरकारले पेश गरेको बजेट पास गर्न नसक्ने बताएका छन् । विपक्षी गठबन्धनको पत्रकार सम्मेलनमा कांग्रेस संसदीय दलका नेता कनोडिया जबरजस्ती अल्पमतको सरकारले शासन गरिरहेको बताउँदैं भन्नुभयो, ‘उहाँलाई थाहा छ कि अल्पमतमा छौं । तर अल्पमतमा रहँदा बजेटमा पेश गर्छ, हामीलाई पास गर्न सहयोग गर भन्छ ।’ कनोडियाले सरकारलाई बहुमत भए बजेट पास गर्न र नभए राजीनामा दिएर अर्को सरकार गठनको बाटो खोल्न आग्रह गर्नुभयो ।

माओवादी केन्द्रका संसदीय दलका नेता कुलप्रसाद केसी सोनामले बजेट पेश गरेर जवाफ दिइसकेपछि बैठक छाडेर हिड्नु सत्तारुढ दलको विचलन भएको बताउनुभयो ।
लुम्बिनी प्रदेशमा सरकार अल्पमतमा छ की बहुमतका भन्ने विवाद एक महिनादेखी चल्दै आएको छ । ८३ सदस्यीय प्रदेश सभामा एमालेका ३८ र जसपाका तीन जना गरी सत्तापक्षमा ४१ जना सांसद छन् भने विपक्षमा कांग्रेसका १९, माओवादी केन्द्रका १८ (सभामुख बाहेक), जसपाका ३ जना र राष्ट्रिय जनमोर्चाका १ जना गरी ४१ जना नै छन् ।

भक्तपुर, असार ३१
कुनै बेला फोहोर र झारले भरिएको मध्यपुर थिमि शंखधरचोकको पश्चिमतर्फको डाँडा अहिले पार्कको रुपमा रुपान्तर भइरहेको छ । नगरपालिकाले शंखधर पार्कको रुपमा यसलाई विकास गरेको छ । पार्कमा तीन धारे ढुंगेधारा निर्माण गरिएको छ । ठाउँठाउँमा हरिया दुवो रोपिएको छ । सिँढीले पार्कलाई थप आकर्षित बनाएको छ ।
बालकुमारी मन्दिरको दक्षिण पश्चिमतर्फको पोखरी जिर्ण अवस्थामा थियो । केही महिना अघि नगरपालिकाले यसको जिर्णाद्धारको थालनी ग¥यो । अहिले यसले पूर्णता पाउँदैछ । नगरप्रमुख मदनसुन्दर श्रेष्ठले बिहिवार पोखरीको मुख्य प्रवेशद्धारमा गजुर पदस्थापन गर्नुभयो ।

त्यसैगरी वामुने टोलमा वामुने गणेशको मन्दिर पुनःनिर्माणको कार्य अन्तिम चरण रहेको छ । मन्दिरको गजुरमात्र राख्न बाँकी रहेको नगरप्रमुख श्रेष्ठले बताउनुभयो । यो मन्दिर गत बैशाख ११ गते पुनःनिर्माण शुरु गरिएको थियो ।
मध्यपुर थिमि नगरपालिका भित्र शंखधरपार्क, बालकुमारी पोखरी, वामुने गणेशको मन्दिरको मात्र होईन दर्जनौ मठमन्दिर, पाटी पौवा, पोखरी, ढुंगेधारा, बिहारजस्ता सम्पदाहरुको पुनःनिर्माण तथा जिर्णोद्धार र संरक्षणका कार्य भइरहेका छन ।

नगरपालिका जनप्रतिनिधि बहाल भएको चार वर्षमा ११३ वटा विभिन्न सम्पदा निर्माण तथा जिर्णाद्धारको काम भएका छन । ती मध्ये २३ वटा मन्दिर, ३७ वटा फल्चा (पाटी), २५ ढुंगेधारा, २० इनार, ५ बिहार र ३ वटा दरबार छन ।
नगरपालिकाले सम्पदा निमार्ण तथा जिर्णोद्धारमा चार वर्षमा ७५ करोड खर्च गरिसकेको र आगामी आर्थिक वर्ष २०७८÷०७९ का लागि थप ३५ करोड विनियोजन गरिएको नगरप्रमुख श्रेष्ठले बताउनुभयो ।

मध्यपुर थिमिलाई आन्तरिक तथा बाह्य पयर्टकको गन्तव्यस्थलको रुपमा विकास गर्न नगरपालिकाले शंखधरचोकदेखी बोडेसम्म सप्पदा पदमार्ग विकास गरेको छ । सोही पदमार्गको प्रचार प्रसार र नगरका सम्पदाहरुको अवलोकन गराउन बिहिवार नगरपालिकाले पत्रकारहरुलाई सम्पदा पदयात्रा गराए । मध्यपुर थिमिमा भइरहेको पुनःनिर्माण र विकासका कार्यलाई स्थलगत अवलोकन गरेर अनुभुती गरौं भन्ने उद्देश्यले पत्रकारहरुलाई सम्पदा पदयात्रा आयोजना गरिएको नगरप्रमुख श्रेष्ठले बताउनुभयो ।

शंखधरचोकबाट शुरु भएको पदयात्रा शंखधरपार्क, बालकुमारी, वामुने टोल, विष्णुवीर, विष्णुकुन्ड, नेपाल कोरिया मैत्री नगरपालिका अस्पताल, निगुपुखुः (दुई पोखरी) सिद्धिकाली मन्दिर परिसर, दिगु बहा, नगदेशहुँदै बोडेको कुमारी मन्दिर परिसर र पार्कमा पुगेर समापन भएको थियो ।
पदयात्राका क्रममा नगरप्रमुख श्रेष्ठले सम्पदा पदमार्गमा रहेका महत्वपूर्ण मन्दिर, पोखरी, फल्चा, ढुंगेधारा, बिहार, दरबार, पार्कको बारेमा जानकारी दिनुभएको थियो ।

पदयात्रामा मध्यपुर थिमि नगरपालिकाका उपप्रमुख अञ्जनादेवी मधिकर्मी, वडा नं. ४ का वडाअध्यक्ष कुमार श्रेष्ठ, नगरपालिकाका प्राविधिक ई. प्रेमलाल भासिमा, विभिन्न सञ्चारमाध्यमका करिव तीन दर्जन सञ्चारकर्मीहरुको सहभागिता रहेको थियो ।

तस्विर सौजन्य ः रामगोपाल तमाखु