Category: समाचार

भक्तपुर, जेठ २७
कोरोना महामारी नियन्त्रण र संक्रमितको उपचारमा सहयोग पुर्‍याउन भक्तपुर चेम्बर अफ कमर्श र भक्तपुर लायन्स सेवा समन्वय समितिले संयुक्तरुपमा ‘कोभिडसँग लड्छौंं, हामी सेवा दिन्छौं’ भन्ने नारा सहित ‘सेवा परमो धर्म’ अभियान सञ्चालन गर्दै आईरहेको छ ।
अभियान अन्तर्गत विभिन्न संघसंस्थाको सहयोगमा आइसोलेसनमा निःशुल्क खाना व्यवस्थापन, स्वास्थ्यकर्मीका लागि क्वारेण्टाइन सञ्चालन, जुम प्रविधिमार्फत सचेतना कार्यक्रम, निःशुल्क चिकित्सकिय परामर्श सेवा, अक्सिजन सहजीकरण, निःशुल्क २४ सै घण्टा एम्बुलेन्स सेवा र जनचेतनाका लागि माईकिङ सञ्चालन गर्दै आइरहेको छ ।
अभियानले चाँगुनारायण नगरपालिकाले नेपाल ईञ्जिनियर कलेजमा सञ्चालन गरेको ५० शैयाको आइसोलेसन केन्द्रमा निःशुल्क भोजनको व्यवस्था गर्दै आएको भक्तपुर चेम्बर अफ कमर्शका अध्यक्ष न्हुछे मानन्धरले बताउनुभयो । ‘आईसोलेसनमा बस्ने संक्रमित र कुरुवा समेतका लागि निःशुल्क रुपमा दिनको ४ पटक खाना खाजा व्यवस्थापन गर्दै आएका छौं,’ उहाँले भन्नुभयो, ‘हालसम्म ३० जना लाभान्वित भएका छन ।’

त्यस्तै चेम्बरले सिबिआर भवन ईन्द्रायणी पिठ भक्तपुरमा स्वास्थ्यकर्मीहरुको लागि क्वारेन्टिन सञ्चालन गर्दै आइरहेको छ । ‘अस्पताल एवं हेल्थ पोष्टमा कार्यरत स्वास्थ्यकर्मीहरु जो कोभिड–१९ का बिरामीको प्रत्यक्ष सम्पर्कमा आएका हुन्छन् त्यस्ता स्वास्थ्यकर्मीहरुका लागि निःशुल्क खानाको व्यवस्थासहित क्वारेन्टिन सञ्चालन गरेका छौं,’ उहाँले भन्नुभयो । सो क्वारेन्टिनमा हालसम्म १२ जना स्वास्थ्यकर्मीहरुले लाभ लिएको उहाँले बताउनुभयो ।
अभियान अन्तर्गत जुम प्रविधिमार्फत मनोचिकित्सक डा. कञ्चन दाहालले कोभिडबाट सुरक्षा र सजगता, वरिष्ठ कार्डियोलोजिष्ट डा. सञ्जय श्रेष्ठले घरमै कोभिड–१९ लाई कसरी व्यवस्थापन गर्ने, आयुर्वेद अस्पतालका सहायक प्रोफेसर डा. रेणु खायमलीले कोभिड–१९ ः आयुर्वेद र घरेलु उपचार र बालरोग विशेषज्ञ डा. गणेशभक्त रायले कोभिड–१९ र बच्चाहरुको सुरक्षा विषयमा सचेतना कार्यक्रम सञ्चालन गरेको अभियानका संयोजक रोशन भोयद्योले जानकारी दिनुभयो ।

त्यस्तै कोभिड– १९ का बिरामीहरुलाई सहजरुपमा अस्पतालसम्म पु¥याउनका लागि निःशुल्क रुपमा २४ सै घण्टा एम्बुलेन्स सेवा उपलब्ध गराउँदैं आएको संयोजक भोयद्योले बताउनुभयो । ‘भक्तपुर अस्पतालको हातामा रहने एम्बुलेन्सलाई हटलाईन नम्बर ९८६१७५६४६१ मा सम्पर्क गरी सेवा लिन सक्ने व्यवस्था गरेका छौं,’ उहाँले भन्नुभयो, ‘उक्त एम्बुलेन्सले उपत्यका भरीका बिरामीहरुका लागि सेवा पु¥याउँदै आएको छ ।’

अभियान अन्तर्गत चेम्बर र लायन्स समन्वय समितिले भक्तपुरका तीन वटा नगरपालिकालाई ५÷५ वटा ४० लिटरका अक्सिजन सहयोग गरेको छ । ‘भक्तपुर, सूर्यविनायक नगरपालिका र मध्यपुर थिमि नगरपालिकाले सञ्चालन गरेको नेपाल कोरिया अस्पताललाई अक्सिजन सहयोग ग¥यौं,’ भोयद्योले भन्नुभयो ।
त्यस्तै कोरोना संक्रमण भई होम आइसोलेसन बसेकाहरुलाई निःशुल्करुपमा चिकित्सकिय परामर्श, कोभिड–१९ बाट बच्न अपनाउनु पर्ने सावधानी लगायत सरकारले लागु गरेको निषेधाज्ञाको पूर्ण परिपालनाका लागि जनचेतना अभिवृद्धि गराउन माइकिङ गर्दै आएको भोयद्योले बताउनुभयो ।
अभियानका लागि भक्तपुरका सबै लायन्स क्लवहरुलाई संयोजन गरी ‘भक्तपुर लायन्स सेवा समन्वय समिति’ गठन गरेको समितिका संयोजक विष्णुभक्त मारिखुले बताउनुभयो ।
यो अभियानमा ९ वटा संघसंस्थाले सहकार्य गरेको छ । सहकार्य गर्ने संस्थाहरुमा नीजि तथा आवासिय विद्यालय अर्गनाइजेशन नेपाल (प्याब्सन) भक्तपुर, भक्तपुर डाक्टर्स सोसाइटी, भक्तपुर विद्युतीय सामग्री व्यवसायी संघ, नेपाल नर्सिङ संघ, सिबिआर भक्तपुर, भक्तपुर हार्ट एण्ड डायेवेटिक सेन्टर, निरोग मेडिकल केयर एट होम, भक्तपुर पार्टी प्यालेस तथा क्याटरिङ संघ र त्रिनेत्र बचत तथा ऋण सहकारी संस्था लि. छन ।

भक्तपुर, जेठ २६
दक्षिण अफ्रिकाकी एक महिलाले एकै पटक १० शिशुलाई जन्म दिएकी छिन । ३७ वर्षीया गोसियामे थमराले एकै पटक १० बच्चा जन्माएकी हुन् । त्यसमा सात बालक र तीन जना बालिका छन् ।
यो संसारकै नयाँ विश्व रेकर्ड हुनसक्ने बीबीसीले उल्लेख गरेको छ । ती महिलाको स्वास्थ्य अवस्था सामान्य रहेको चिकित्सकहरुले बताएका छन् । यसअघि सन् २००९ मा अमेरिकी एक महिलाले एकै पटक ८ बच्चा जन्माएर विश्व रेकर्ड कायम गरेकी थिइन् ।

४ जना एमिकस क्युरी झिकाउने र १५ घण्टामा बहश सकाउनुपर्ने
भक्तपुर, जेठ २६

सर्वोच्च अदालतको संवैधानिक इजलासले प्रतिनिधि सभा विघटनसम्बन्धी निर्णयको फाइल सात दिनभित्र अदालतमा पेस गर्न राष्ट्रपति कार्यालयलाई आदेश दिएको छ । प्रतिनिधि सभा विघटनविरुद्ध परेको रिट निवेदनको सुनुवाई गर्दै सर्वोच्चले प्रतिनिधि सभा विघटन गर्ने मन्त्रिपरिषद् बैठकको निर्णय, प्रधानमन्त्रीको सिफारिस समेत पेस गर्न आदेश जारी गरेको छ ।
‘प्रतिनिधि सभा विघटनसम्बन्धी मिति २०७८ ०२ ०७ को नेपाल सरकार, मन्त्रिपरिषद्को निर्णय, प्रधानमन्त्रीले गर्नु भएको सिफारिस, तदनुसार राष्ट्रपतिबाट भएको निर्णयसम्बन्धी फाइल कागजात सम्बन्धि कार्यालयहरूबाट आजका मितिले ७ दिनभित्र अनिवार्य रूपमा झिकाइ मिसिल सामेल राख्नु’ इजलासले जारी गरेको आदेशमा भनिएको छ ।
प्रधानन्यायाधीश चोलेन्द्रशम्शेर जबरा, न्यायाधीश दीपककुमार कार्की, मीरा खड्का, ईश्वरप्रसाद खतिवडा र डा. आनन्दमोहन भट्टराईको इजलासले प्रतिनिधि सभा विघटनविरुद्धको मुद्दामा १५ घण्टामा बहस सक्ने गरी समय उपलब्ध गराउन आदेश समेत दिएको छ । इजलासले बहसको समयसीमा तोक्दै १२ घण्टाभित्र पक्षका वकिलहरुले र तीन घण्टाभित्र सरकारको तर्फबाट प्रत्युत्तर बहस सक्न आदेश दिएको हो ।
यस अनुसार रिट निवेदक पक्षले सुरुमा १२ घण्टा र प्रत्युत्तर बहसका लागि ३ घण्टा गरी १५ घण्टा समय पाउनेछन् । त्यस्तै विपक्षी सरकारका तर्फबाट पनि बहसका लागि १५ घण्टा समय पाउने भएका छन् ।
त्यस्तै सर्वोच्चले यो मुद्दामा ४ जना एमिकस क्युरी (अदालतको सहयोगी) पनि माग गरेको छ । जसमा नेपाल बार एशोसिएसनबाट २ जना र सर्वोच्च अदालत बार एशोसिएसनबाट २ जना माग गरिएको छ । एमिकस क्युरीका एक जनाले बढीमा आधा घण्टा गरी दुई घण्टा बहस गर्न पाउनेछन् ।
‘इजलास कक्षभित्र रिट निवेदकमध्येबाट एक–पटकमा अधिकतम् पाँच जना, कानुन व्यवसायीहरू बढीमा तीन जना, सरकारी वकिल बढीमा तीन जना र अन्य प्रत्यर्थीहरूमध्येबाट एक पटकमा बढीमा २÷२ जना कानुन व्यवसायीलाईमात्र इजलास कक्षभित्र प्रवेश गर्ने व्यवस्था गर्नु,’ आदेशमा भनिएको छ । असार १० गतेभित्र निवेदक र प्रत्यर्थीहरूले बहस नोट बुझाउनु पर्ने पनि इजलासले आदेश दिएको छ ।
संवैधानिक इजलासमा असार ९ गतेदेखि यी मुद्दामा निरन्तर सुनुवाइ हुनेछ । ‘निवेदनमा उठाइएका प्रश्नहरू सार्वजनिक महत्वको देखिएको र चाँडो किनारा लगाउन पर्ने आवश्यक हुँदा प्रस्तुत निवेदनका सम्बन्धमा निरन्तर सुनुवाइ प्रक्रिया अपनाइ अन्तिम सुनुवाइ गर्ने गरी असार १० गते नियमानुसार गरी पेश गर्नु,’ आदेशमा भनिएको छ ।
इजलासले प्रतिनिधि सभा विघटनविरुद्धको रिट निवेदनमा कारण देखाउ आदेश जारी गर्दै अन्तरिम आदेश दिन अस्विकार गरेको थियो । रिट निवेदक देउवाको पक्षबाट वरिष्ठ अधिवक्ता शम्भु थापा र महादेव यादवले अन्तरिम आदेशमार्फत देउवालाई प्रधानमन्त्रीको सपथका लागि बाटो खुलाउन माग गरेका थिए ।
संवैधानिक इजलासले सुरुमा शेरबहादुर देउवाको मुद्दाको सुनुवाइ गर्ने र त्यसपछि बाँकी रहेका २९ रिटको सुनुवाइ गर्ने निर्णय गरेको हो ।

 भक्तपुर, जेठ २६
नेपाली कांग्रेसका सभापति शेरबहादुर देउवाले पार्टीको १४ औं महाधिवेशन आगामी भदौमा हुने बताउनुभएको छ । पार्टीको महाधिवेशनका सम्बन्धमा विभिन्न धारणा सार्वजनिक हुन थालेपछि सभापति देउवाले आज विज्ञप्ती प्रकाशन गरी पार्टीको १४ औं महाधिवेशन निर्धारित मितिमा नै हुने स्पष्ट पार्नुभएको हो ।
सभापति देउवाले विषम परिस्थतीमा महाधिवेशन गर्नुपरेको उल्लेख गर्दै विज्ञप्तीमा भन्नुभएको छ, ‘२०७८ साल भाद्र महिनामा पार्टीको महाधिवेशन हुन्छ । म त्यसमा प्रतिवद्ध छु ।’ पार्टीको महाधिवेशन प्राविधिक वा प्रशासनिक विषय मात्र नभएर यो एक महत्वपूर्ण राजनीतिक अभियान हो र पार्टीको जिवन्तताको लागि महायज्ञ हो भन्ने कुरा राम्ररी बुझेको बताउँदैं सभापति देउवाले भन्नुभएको छ, ‘पार्टीको महाधिवेशन सम्पन्न गर्ने विषयलाई विवादित बनाउने वा कसैले महाधिवेशन गर्न चाहेको र कसैले नचाहेको देखाउने गरी पटक–पटक आउने गरेका अभिव्यक्ति किमार्थ उचित होइनन् ।’

उहाँले महाधिवेशनको विषयलाई लिएर कसैले पनि भ्रममा राख्ने वा भ्रममा रहने काम गर्न हुँदैन भन्दै पार्टीको महाधिवेशन पार्टीका सबै नेता र सदस्यहरु मिलेर सम्पन्न गर्ने कार्य भएकाले सबै जिम्मेवार हुन आग्रह गर्नुभयो ।
‘हामीसँग अब बढी समय छैन । आषाढ र श्रावण दुई महिना भित्र महाधिवेशनका लागि सबै पूर्व तयारी गर्नुपर्छ । पार्टीको क्रियाशील सदस्यताको व्यवस्थापन, वडादेखि प्रदेश तहसम्मका अधिवेशनहरुको तयारी लगायत महाधिवेशनका सबै तयारी गर्नुछ । यस निमित्त निर्वाचन समिति, क्रियाशील सदस्यता छानविन समिति गठन भई काम गरिरहेका छन् । पार्टीको महाधिवेशन सम्पन्न गर्न आवश्यक सबै कार्य समयमा गरिने छन्,’ विज्ञप्तीमा उल्लेख गरिएको छ ।
देउवाले पार्टीका पदाधिकारी र केन्द्रीय कार्यसमितिका साथीहरु, पार्टीको स्थानीय तहका पदाधिकारी तथा सदस्यहरु, देशभरिका पार्टी सदस्यहरु, भ्रातृ एवं शुभेच्छुक संस्थाका साथीहरु, विदेश स्थित जनसम्पर्क समितिलाई कांग्रेसको महाधिवेशन सम्पन्न गर्ने बारे कुनै पनि भ्रममा नपरी आ–आफ्नो स्थानबाट महाधिवेशन समयमा सम्पन्न गर्नका लागि दत्तचित्त भई लाग्न आह्वान समेत गर्नुभएको छ ।
कांग्रेसले भदौ ७ देखि १० सम्म महाधिवेशन गर्ने गरी यसअघि नै निर्णय गरिसकेको छ, तर कोरोना महामारीले क्रियाशील सदस्यता वितरणका काम सकिएको छैन । महामारीकै बीच पनि महाधिवेशन गर्न वरिष्ठ नेता रामचन्द्र पौडेललगायत नेताहरूले सभापति देउवाको ध्यानाकर्षण गराइरहनु भएको छ ।

हेर्नुहोस विज्ञप्तीको पूर्ण पाठ

आदरणीय दिदीबहिनी, दाजुभाइ तथा पार्टीका सदस्य एवं शुभेच्छुक साथीहरू !

कोभिड–१९ को महामारीले लामो समयदेखि हामी अत्यन्त कठिन अवस्थामा छौं । संक्रमणका कारण पार्टीका धेरै साथीहरु, साथीहरुका परिवारका सदस्य र नागरिकहरुले ज्यान गुमाउनु भयो भने कतिपय निकै पीडामा रहनु प¥यो । म कोभिड–१९ का कारण दिवंगत हुनु भएका सबैको आत्माको चीर शान्तिको कामना गर्दै शोक सन्तप्त परिवारजनमा हार्दिक समवेदना व्यक्त गर्दछु । संक्रमणका कारण घरमा आइसोलेसनमा बस्नु भएका वा अस्पतालमा भर्ना हुनु भएका सबैको शीघ्र स्वास्थ्यलाभको कामना गर्दछु । संक्रमित सबैलाई उच्च मनोबल राखी चिकित्सकको राय अनुसार रहन÷बस्न अनुरोध गर्दछु । सरकारले जनताको स्वास्थका बारेमा समयमा गम्भीर भई इमान्दारीपूर्वक काम नगरेका कारण यो अवस्था सृजना भएको छ । यसमा सरकार पूर्ण रुपले दोषी छ ।

यस्तो विषम परिस्थितिमा पनि हामीले यही भाद्र महिनाभित्रमा पार्टीको चौधौं महाधिवेशन सम्पन्न गर्नु परेको छ । म देशभरिका पार्टीका सम्पूर्ण साथीहरुलाई स्पष्टताका साथ भन्न चाहन्छु— २०७८ साल भाद्र महिनामा पार्टीको महाधिवेशन हुन्छ । म यसमा पूर्ण प्रतिवद्ध छु ।

पार्टीको महाधिवेशन प्राविधिक वा प्रशासनिक विषय मात्र नभएर यो एक महत्वपूर्ण राजनीतिक अभियान हो र पार्टीको जिवन्तताका लागि महायज्ञ हो भन्ने कुरा मैले राम्ररी बुझेको छु । महाधिवेशनको विषयलाई लिएर विभिन्न कुरा उठ्ने गरेको मैले सुनेको छु । पार्टीको महाधिवेशन सम्पन्न गर्ने विषयलाई विवादित बनाउने वा कसैले महाधिवेशन गर्न चाहेको र कसैले नचाहेको देखाउने गरी पटक–पटक आउने गरेका अभिव्यक्ति किमार्थ उचित होइनन् । महाधिवेशनको विषयलाई लिएर कसैले पनि भ्रममा राख्ने वा भ्रममा रहने काम गर्न हुँदैन । बरु पार्टीको महाधिवेशन पार्टीका सबै नेता र सदस्यहरु मिलेर सम्पन्न गर्ने कार्य हो । यसका लागि सबै जिम्मेवार हुनु पर्दछ । हामीसँग अब बढी समय छैन । आषाढ र श्रावण दुई महिना भित्र महाधिवेशनका लागि सबै पूर्व तयारी गर्नु पर्छ । पार्टीको क्रियाशील सदस्यताको व्यवस्थापन, वडादेखि प्रदेश तहसम्मका अधिवेशनहरुको तयारी लगायत महाधिवेशनका सबै तयारी गर्नुछ । यस निमित्त निर्वाचन समिति, क्रियाशील सदस्यता छानविन समिति गठन भई काम गरिरहेका छन् । पार्टीको महाधिवेशन सम्पन्न गर्न आवश्यक सबै कार्य समयमा गरिने छन् ।

म पार्टीका पदाधिकारी र केन्द्रीय कार्यसमितिका साथीहरु, पार्टीको स्थानीय तहका पदाधिकारी तथा सदस्यहरु, देशभरिका पार्टी सदस्यहरु, भ्रातृ एवं शुभेच्छुक संस्थाका साथीहरु, विदेश स्थित जनसम्पर्क समितिका साथीहरुलाई नेपाली कांग्रेसको महाधिवेशन सम्पन्न गर्ने बारे कुनै पनि भ्रममा नपरी आ–आफ्नो स्थानबाट महाधिवेशन समयमा सम्पन्न गर्नका लागि दत्तचित्त भई लाग्न आह्वान गर्दछु । कोभिड–१९ को महामारीलाई दृष्टिगत गर्दै स्वास्थ्य सुरक्षाका सबै मापदण्ड अपनाई काम गर्न पनि अनुरोध गर्दछु ।

जय नेपाल !

शेरबहादुर देउवा

सभापति

भक्तपुर, जेठ २६

 चाँगुनारायण नगरपालिका आगामी आर्थिक वर्ष २०७८–७९ को नीति तथा कार्यक्रम र बजेटको लागि सुझाव दिन आह्वान गरेको छ । नगरपालिकाले मंगलवार एक सूचना प्रकाशन गरी सुझावका लागि आह्वान गरेको हो ।

नगरपालिकाले राजनीतिक दल, संघ संस्था, बुद्धिजीवी, नागरिक समाज, विज्ञ, व्यवसायी, समाजसेवी, पेशाकर्मी, कर्मचारी, संचारकर्मीलगायत आम नागरिकहरुलाई सामाजिक सञ्जाल, टेलिफोन, म्यासेज र इमेलमार्फत सुझाव दिन आग्रह गरेको छ ।

‘चाँगुनारायण नगरपालिकालाई समृद्ध बनाउन लागि के कस्ता नीति तथा कार्यक्रम आवश्यक रहेको र सो मा समावेश गर्नुपर्ने विषयहरुका सम्बन्धमा आ–आफ्नो अमूल्य सुझाव दिन अनुरोध छ’, सूचनामा उल्लेख गरिएको छ ।

नगरपालिकाले यही जेठ मसान्तसम्म सुझाव दिन सूचित गरेको छ । नगरपालिकाले सूचना प्रविधि अधिकृत सिद्धान्त न्यौपानेको मोवाइल नं. ९८४३७२३९२४ मा सम्पर्क गरी वा नगरपालिकाको ईमेल mayor@changunarayanmun.gov.np, info@changunarayanmun.gov.np र ito.changunarayanmun@gmail.com  मार्फत सुझाव दिन सकिने जनाएको छ ।

स्थानीय सरकार सञ्चालन ऐन २०७४ मा स्थानीय तहले असार १० भित्र नगरसभाबाट नीति तथा कार्यक्रम र बजेट पारित गर्नुपर्ने प्रावधान रहेको छ ।

भक्तपुर, जेठ २६
प्रदेश नं. २ मा जनता समाजवादी पार्टी (जसपा), नेपाली कांग्रेस र नेकपा माओवादी केन्द्रबीच सत्ता साझेदारी हुने भएको छ । त्यसका लागि तीन दलबीच मन्त्रालय बाँडफाँटका लागि छलफल चलिरहेको छ भने मन्त्री छनोटका लागि दलहरु आन्तरिक छलफलमा समेत जुटेका छन ।
जसपाको महन्थ ठाकुर– राजेन्द्र महतो समूह केपी ओली नेतृत्वको सरकारमा सहभागी भएपछि रुष्ट भएको उपेन्द्र यादव समूहले प्रदेश २ को सत्ता समीकरणको लागि विगत तीन दिन देखि कसरत गर्दै थिए । सो अनुसार तीन दलबीच मंगलवार सत्ता साझेदारीका विषयमा सहमति भएको थियो । सो अनुसार मन्त्रालय फुटाएर १० पु¥याउने र जसपाले ५, कांग्रेसले ३ र माओवादी केन्द्रले २ मन्त्रालय पाउने भएका छन ।
अहिले प्रदेशमा मुख्यमन्त्री तथा मन्त्रिपरिषद्को कार्यालय, भौतिक पूर्वाधार विकास, सामाजिक विकास, भूमि व्यवस्था कृषि तथा सहकारी, आन्तरिक मामिला तथा कानून, आर्थिक मामिला तथा योजना र उद्योग पर्यटन वन तथा वातावरण गरी ६ वटा मन्त्रालय छ । जसपा सांसद रामआशीष यादवका अनुसार सामाजिक विकासलाई टुक्रयाएर नयाँ मन्त्रालयका रुपमा शिक्षा तथा स्वास्थ्य मन्त्रालय, आन्तरिक मामिला तथा कानुन मन्त्रालयबाट सञ्चार झिकेर नयाँ सञ्चार मन्त्रालय बनाउने तयारी छ ।
त्यसैगरी भूमि व्यवस्था, कृषि तथा सहकारी मन्त्रालयबाट कृषि तथा सहकारीलाई अलग गर्ने र उद्योग, पर्यटन, वन तथा वातावरणबाट वन तथा वातावरणलाई अलग गरेर ४ वटा मन्त्रालय थप्ने प्रदेश सरकारले तयारी गरेको छ ।
मन्त्रालयको संख्या र कसले कुन दलले कतिवटा प्राप्त गर्ने विषय टुंगिएको माओवादीका सांसद भरत साहले जानकारी दिनुभयो । जसपा उपेन्द्र यादव समूहले महन्थ ठाकुर पक्षका एकजना मन्त्री र तीन जना राज्यमन्त्रीलाई सरकारबाट पदमुक्त गरेपछि कांग्रेस र माओवादी केन्द्रसँग सत्ता सहकार्यको वातावरण बनेको थियो ।
यसैबीच सरकारमा पठाउने मन्त्रीहरुको टुंगो लगाउन नेपाली कांग्रेसका उपसभापति विमलेन्द्र निधिले पार्टी सभापति शेरबहादुर देउवासँग छलफल गर्नुभएको छ । स्रोतका अनुसार कांग्रेसबाट रामसरोज यादवको नेतृत्वमा र माओवादी केन्द्रबाट भरत साहको नेतृत्वमा सरकारमा सहभागी हुने छ ।

भक्तपुर, जेठ २६
सर्वोच्च अदालतको संवैधानिक इजलासमा प्रतिनिधिसभा विघटनसम्बन्धी मुद्दाको सुनुवाइ आज हुने भएको छ । प्रधानन्यायाधीश चोलेन्द्रशम्शेर जबराको अस्वस्थ भएकाले सोमवार स्थगित भएको सुनुवाई आजबाट पुनः शुरु हुन लागेको हो । संवैधानिक इजलास प्रधानन्यायाधीशको अध्यक्षतामा गठन हुने व्यवस्था रहेको छ ।
प्रधानन्यायाधीश राणाले पहिले गठन गरेको संवैधानिक इजलासमा विवाद भएपछि पुनः वरिष्ठताको आधारमा अर्को इजलास गठन गरेको थियो । सो इजलासका बारेमा पनि सरकार पक्षका अधिवक्ताहरुले विवाद गरेपछि निवेदन केन्द्रीत बहश समेत हुन सकेको छैन ।
प्रधानन्यायाधीश राणाले आफुसहित वरिष्ठतम न्यायाधीश दीपककुमार कार्की, मीरा खड्का, ईश्वरप्रसाद खतिवडा र डा आनन्दमोहन भट्टराईको संवैधानिक इजलास आइतबार गठन गरी सुनुवाइ शुरु गरेर हेर्दाहेर्दैमा सोमबारका लागि राखिएको थियो । प्रधानन्यायाधीश राणाको स्वास्थ्यमा समस्या आएपछि सुनुवाइ बुधबारका लागि तय भएको सर्वोच्च अदालतका प्रवक्ता देवेन्द्र ढकालले जानकारी दिनुभयो ।
मन्त्रिपरिषद्को यही जेठ ७ को सिफारिसमा प्रतिनिधिसभा विघटन गरी आगामी कात्तिक २६ र मङ्सिर ३ गते मध्यावधि निर्वाचन गर्ने घोषणा गरेको थियो । उक्त निर्णय असंवैधानिक भएको भन्दै ३० रिट निवेदन दर्ता भएको छ । विपक्षी दल नेपाली कांग्रेसका सभापति शेरबहादुर देउवासहित विघटित प्रतिनिधिसभाका १४६ सांसदको हस्ताक्षरमा समेत रिट दर्ता भएको छ ।

भक्तपुर, जेठ २५
भक्तपुरका शिक्षासेवी राजकुमार महर्जनको ५२ वर्षको उमेर आज दिउँसो निधन भएको छ । कोरोना संक्रमित भई गत बैशाख १२ गते उपचारका लागि बिएण्डबी अस्पताल ग्वार्कोमा भर्ना हुनुभएका महर्जनको कोरोना नेगेटिभ आएपनि थप उपचारको क्रममा निधन भएको हो ।
माउण्ट भ्यू इङ्लिस बोडिङ् स्कुलका संस्थापक प्रिन्सिपल स्व. महर्जन भक्तपुरको शिक्षा क्षेत्रको विकासमा निक्कै चिन्तित र क्रियाशिल हुनुहुन्थ्यो । उहाँले भक्तपुरलाई देशकै उत्कृष्ट शैक्षिक गन्तव्य र ‘शिक्षाको पर्यटन जिल्ला’ बनाउने अभियान सञ्चालन गर्नुभएको थियो ।
२०२६ साल कात्तिक २ गते ललितपुरको चाँगाथलीमा जन्मनु भएका महर्जनले शिक्षाको विकासका लागि दुई दशक योगदान दिनु भएको छ । पत्रकारितामा समेत चासो राख्ने उहाँले लेखेका शिक्षासंग सम्बन्धित धेरै प्रेरणादायक लेखहरु बिभिन्न सञ्चार माध्यममा प्रकाशित छन् ।
बिभिन्न ठाउँमा शिक्षाको विकास र शिक्षासंग सम्बन्धित बिभिन्न विषयमा प्रशिक्षण दिदै आउनु भएका महर्जनले यूट्युव च्यानलमार्फत विद्यार्थी, अभिभावक र शिक्षाकर्मीका लागि दिने प्रेरणादायी अभिव्यक्तिहरुबाट उहाँ चर्चामा आउनु भएको थियो । स्वर्गीय महर्जनको एक पत्नी र एक छोरा रहेका छन् ।
निजी तथा आवासीय विद्यालय अर्गनाइजेशन (प्याब्सन) का वर्तमान् केन्द्रीय प्राज्ञिक सल्लाहकार र क्वेष्ट नेपालका अध्यक्ष महर्जनले प्याब्सनका पूर्वकेन्द्रीय उपाध्यक्ष, प्याब्सन भक्तपुरका अध्यक्षकारुपमा समेत कार्य गरिसक्नुभएको छ ।
महर्जन नेपाल पत्रकार महासंघ भक्तपुर शाखाले प्रदान गर्ने स्व. भगवान महर्जन स्मृति पत्रकारिता पुरस्कारका संस्थापक समेत हुनुहुन्छ । उहाँको निधनमा महासंघ भक्तपुरले शोक वक्तव्य प्रकाशन गर्दै गहिरो दुःख व्यक्त गरेको छ । महासंघका जिल्ला सचिव संजीप घिमिरेले जारी गर्नुभएको शोक वक्तव्यमा महर्जनको निधनले भक्तपुरको शिक्षा क्षेत्रले एउटा नक्षत्र गुमाएको उल्लेख गरेको छ ।

भक्तपुर, जेठ, २५
भक्तपुर नगरभित्रका सम्पदा क्षेत्र र पुरानाबस्ती भित्र विद्युतका तार भूमिगत गर्नु चुनौतीपूर्ण भएको बताईएको छ । नगरभित्रका बाटोमा धमाधम ढुंगा छाप्ने कार्य भइरहेको अवस्थामा विद्युतका तार भूमिगत गर्ने योजनाले अन्योलता ल्याएको समेत सरोकारवालाहरुको भनाई छ ।
भक्तपुर नगरभित्र विद्युतका तार भूमिगत गर्ने विषयमा आज सम्पन्न अनलाइन बैठकमा सहभागीहरुले सरोकारवाला र जनताहरुबीच आवश्यक छलफलपश्चात योजना सञ्चालन गर्नुपर्नेमा जोड दिए ।
बैठकमा भक्तपुर नगरपालिकाका प्रमुख सुनिल प्रजापतिले तार भूमिगत गर्ने विषयमा आवश्यक सहकार्य र पहलको लागि नगरपालिका सकारात्मक रहेको बताउनुभयो । उहाँले भन्नुभयो, “अव्यवस्थित तार र केबलहरुबाट ऐतिहासिक, संस्कृतिक नगर भक्तपुरको दृश्य प्रदूषण भइरहेको छ । सम्पदा बस्तीभित्र तारहरु भूमिगत गर्ने विषय चुनौतीपूर्ण भएपनि नगरपालिका आवश्यक सहकार्य र पहल गर्न सकारात्मक छ ।”
उहाँले यस सम्बन्धमा सम्बन्धित सरोकारवाला र जनताहरुबीच आवश्यक छलफलपश्चात कार्यान्वयन सहज हुने धारणा राख्नुभयो । भक्तपुर नपाभित्रको मुख्य बजार क्षेत्रमा ढुंगा छाप्ने कार्य भइरहेको अवस्थामा पुनः तार भूमिगत गर्ने विषयले अन्योलता ल्याएको बताउँदैं उहाँले तार भूमिगत गर्दा देखिने चुनौतीका विषयमा आयोजनाले आवश्यक ध्यान दिनुपर्ने र यथाशीघ्र आयोजनाको काम अगाडि बढाउन पनि आग्रह गर्नुभयो ।
बैठकमा नेपाल विद्युत प्राधिकरणअन्तर्गत ललितपुर र भक्तपुरमा भूमिगत तार व्यवस्थाका आयोजना प्रमुख बीरेन्द्रकुमार झाले भक्तपुरको तार भूमिगत गर्ने विषयमा प्रस्तुतीकरण दिनुभयो । उहाँले भूमिगत केबलको विषयमा जनस्तरमा सूचना प्रवाह गर्न सके जनताबाट साथ र सहयोग पनि पाउने र आयोजना पनि समयमै सम्पन्न हुने बताउनुभयो ।
आयोजनाका केदारराज सिलवालले ऐतिहासिक नगरी भक्तपुरमा अव्यवस्थित तारले नराम्रो प्रभाव पारिरहेको हुँदा तार भूमिगत गर्न सकेको खण्डमा भक्तपुर सुन्दर र सुरक्षित पनि हुने बताउनुभयो । बैठकमा भक्तपुर नपाका जनप्रतिनिधिहरु र सरोकारवाला प्राविधिकहरुको उपस्थिति थियो ।

भक्तपुर, जेठ २५, लक्ष्मी गारु
गोरखा भूकम्पको ६ वर्षको अवधिमा भक्तपुरमा भूकम्पले क्षती गरेका पुरातात्विक महत्वका सम्पदाहरु मध्ये १३४ वटा साना ठूला सम्पदाहरुको पुनःनिर्माण सम्पन्न भएको छ । वि. सं. २०७२ बैशाख १२ गतेको भूकम्पले भक्तपुरमा २१३ वटा सम्पदामा क्षती पुगेको थियो । ती मध्ये १३४ वटाको पुनःनिर्माण सम्पन्न भएको स्मारक संरक्षण तथा दरवार हेरचाह अड्डा भक्तपुरले जनाएको छ ।
भूकम्पले क्षतिग्रस्त १२ वटा सम्पदाको पुनःनिर्माण कार्य भइरहेको र २० वटा सम्पदा पुनःनिर्माणको चरणमा रहेको स्मारक संरक्षण तथा दरवार हेरचाह अड्डा भक्तपुरका ई. मोहनसिं लामाले जानकारी दिनुभयो ।
भूकम्पले भक्तपुरका चार स्थानीय तहमध्ये भक्तपुर नगरपालिकामा सबैभन्दा धेरै सम्पदा क्षति गरेको थियो । सम्पदाको धनी भक्तपुर नगरका १४५ वटा सम्पदामा क्षति भएको थियो । त्यसैगरी मध्यपुर थिमि नगरपालिकामा २३, सूर्यविनायक नगरपालिकामा २९ र चाँगुनारायण नगरपालिकामा १६ सम्पदामा क्षति पुगेको ई. लामाले बताउनुभयो ।

भक्तपुर नगरपालिकाको क्षतिग्रस्त १४५ सम्पदा मध्ये १०८ वटा सम्पदाहरुको पुनःनिर्माण र जीर्णोद्वार सम्पन्न भएको नगरप्रमुख सुनिल प्रजापतिले बताउनुभयो । उहाँका अनुसार भक्तपुर नगरमा हालसम्म २३ वटा मन्दिर, ४० वटा पाटी, ६ वटा द्योछें, ३ वटा प्रवेशद्वार, ८ वटा पोखरी, ७ वटा इनार, ८ वटा सत्तल, ७ वटा ढुङ्गेधारा र अन्य ६ वटा सम्पदा पुनःनिर्माण र जीर्णोद्वार सम्पन्न भएका छन् भने अन्य डेढ दर्जनभन्दा बढी सम्पदाहरु जीर्णोद्धारको क्रममा रहेको छ ।
चालु आर्थिक वर्ष भक्तपुर नगरभित्र विश्वप्रसिद्ध ङातापोल्हँ मन्दिर (पाँचतल्ले मन्दिर) जीर्णोद्धार, दरबार क्षेत्रस्थित वत्सला मन्दिर पुनः निर्माण, भक्तपुर नपा ४ स्थित चपाल भैरव द्यो छेँ पुनः निर्माण, भक्तपुर ५ ल्योसिंख्योस्थित च्यासिंदेगः पुनःनिर्माण, भनपा ६ स्थित भोलाछेँ पुखु जीर्णोद्धार, भनपा ७ स्थित गय् भिंद्यो पुललगायतका कार्यहरु सम्पन्न भएको उहाँले बताउनुभयो ।

मध्यपुर थिमिमा ७ वटा सम्पदाको पुनःनिर्माण सम्पन्न भइसकेको छ । त्यस्तै २ वटाको पुनःनिर्माण भइरहेको र ४ वटाको शुरु हुने चरणमा रहेको छ । चाँगुनारायण नगरपालिकामा १० वटा सम्पदाको पुनःनिर्माण सकिएको छ । यहाँ ४ वटाको पुनःनिर्माण भइरहेको छ भने ४ वटाको शुरु गर्ने तयारी भइरहेको छ ।
सूर्यविनायक नगरपालिकामा क्षतिग्रस्त २९ सम्पदा मध्ये हालसम्म जम्मा ९ वटाको मात्र पुनःनिर्माण भएको छ । यहाँ २ वटाको पुनःनिर्माण भइरहेको र ६ वटा पुनःनिर्माणको चरणमा रहेको ईं. लामाले बताउनुभयो ।
चालु अर्थिक वर्ष २०७७÷०७८ मा राष्ट्रिय कला संग्रहालयको जिम्मेवारीमा २८ र स्मारक संरक्षण तथा दरवार हेरचाह अड्डाको जिम्मेवारीमा १२ वटा सम्पदा पुनःनिर्माणको जिम्मेवारी तोकिएको थियो । तर ती दुई वटै निकायले तोकिएको जिम्मेवारी पुरा गर्न भने नसक्ने भएको छ ।
कला संग्रहालयको जिम्मेवारी तोकिएका २८ मध्ये १५ वटाको मात्र लागत अनुमान पेश गरिएको छ । त्यसमा ५ वटाको पुनःनिर्माण सकिएको र १० वटाको कार्य भइरहेको छ । त्यस्तै १३ वटा सम्पदाको लागत अनुमान समेत तयार हुन नसकेको ई. लामाले बताउनुभयो ।
त्यस्तैगरी स्मारक संरक्षण तथा दरवार हेरचाह अड्डाको जिम्मेवारीमा परेका १२ मध्ये २ वटाको मात्र कार्य सम्पन्न भएको छ भने ९ वटाको कार्य भइरहेको छ । एउटा सम्पदाको कुनै कार्य हुन नसकेको ई. लामाले बताउनुभयो ।
भक्तपुर खौमा र अरनिको सभाभवनका गरी दुई वटा जगन्नाथ मन्दिरको पुर्व संरचनाको सम्बन्धमा एकिन गर्न नसकिएको, निजी स्वामित्वको सम्पदा भएकाले भक्तपुर कै टेराकोटा द्यो छें र विश्वकर्मा द्यो छेंको पुनःनिर्माण रोकिएको छ ।

यस्तै गरी भक्तपुर नगरको यक्षेश्वर महादेव संरक्षण गर्ने कार्य गत आर्थिक वर्षको अन्तिमतिर टेण्डर प्रक्रिया भई समय अभावका कारण र चालु वर्ष बजेट नभएकाले कार्य गर्न नसकिएको लामाले बताउनुभयो ।
भक्तपुरकै बालाखु गणेश द्यो छें संरक्षण गर्ने कार्य ठेक्का सम्झौता भएको तर कार्य नगरेको कारण कार्य हुन नसकेको, स्थानीयको विरोधका कारण चाँगुनारायणको बलम्बू पाटी संरक्षण गर्ने कार्य हुन नसकेको उहाँले बताउनुभयो ।
पुनःनिर्माण सकिएका सम्पदाहरुमा सूर्यविनायक नगरपालिका–४, तर्खगालको राधाकृष्ण मन्दिर पुनःनिर्माण र माकले पाटी संरक्षण, मध्यपुर थिमि–४ को वप्पा विश्वेश्वर महादेव मन्दिर पुनःनिर्माण र वडा नं. ७ नगदेशको गणेश मन्दिर तथा सत्तल पुनःनिर्माण, सूर्यविनायक ७ को रातो पाटी संरक्षण गर्ने कार्य रहेका छन ।
समस्या र चुनौतीहरु
सम्पदा पुनःनिर्माण र संरक्षणमा देखा परेका विभिन्न खाले समस्या र चुनौतिहरुले गर्दा पनि समयमा कार्य सम्पन्न गर्न नसकिएको ई. लामाले बताउनुभयो । उहाँका अनुसार खुल्ला प्रतिस्पर्धा भै न्यूनतम कवोल गर्ने निर्माण व्यावसायीको बोलपत्र स्वीकृत गर्नुपर्ने बाध्यात्मक परिस्थितिको कारण गुणस्तरको र तोकिएका समयमा कार्य गराउन नसक्ने समस्या देखिएको छ ।
सम्पदा संरक्षणको लागि कार्यालयबाट नै गर्ने गरी बजेट व्यवस्था हुनुपर्नेमा केन्द्रिकृत हुने परम्परा रहनु, सम्पदा संरक्षणमा चासो कम राख्ने प्रवृत्ति रहनु, क्षतिग्रस्त सम्पदाहरुको संख्या र संरक्षण एवं पुनःनिर्माणको लागि आवश्यक स्रोतको सुनिश्चितता नहुनुले पनि सम्पदा पुनःनिर्माणमा समस्या देखिएको उहाँले बताउनुभयो ।
त्यस्तैगरी दक्ष जनशक्ति र कालिगढहरुको अभाव, परम्परागत निर्माण सामग्रीहरु आवश्यकता अनुसारको नापसाईज र परिमाण सहज रुपमा उपलव्ध हुन नसक्नु, विस्तृत संरचना प्रतिवेदन तयार गरी सोही अनुसार प्रक्रिया गर्ने परम्परा पालन हुन नसक्नु, संरक्षण÷पुनःनिर्माण कार्यमा संलग्न जिम्मेवार निकायहरु (गुठी, स्थानीय निकाय र दाताहरु ) बीच सक्रिय, संवेदनशिल र समन्वय नहुनुले पनि सम्पदा पुनःनिर्माणमा ढिलाई हुने गरेको छ ।
बढदो शहरीकरण, व्यापारीकरण र भूमिको उच्च मूल्य बृद्धिका कारण प्राचीन स्मारकहरुलाई निजी स्वामित्व र निजी प्रयोगमा लगाई अतिक्रमण गर्ने प्रवृत्ति बढनु, संरक्षित स्मारक क्षेत्र÷स्थलहरुको प्रमाणिकता, ऐतिहासिकता, संवेदनशिलताका साथै विश्वव्यापी महत्वमा असर परी सम्पदा एवं स्थलहरुको महत्व दिन प्रतिदिन खस्कदै जानुले पनि सम्पदा संरक्षणमा चुनौति थपिएको लामाले बताउनुभयो ।
केही सम्पदाहरुको विस्तृत अभिलेखीकरण नभएको कारण पुनःनिर्माण वा संरक्षण कार्यमा केही परिवर्तन वा थप कार्य गर्नुपर्ने बाध्यता रहनु र सम्पदाहरुको पुनःनिर्माण÷संरक्षणको क्रममा आकस्मिक रुपमा आईपर्ने विविध कठिनाई र चुनौतिहरुले गर्दा पनि सम्पदाको पुनःनिर्माणमा ढिलाई भइरहेको छ ।