Category: समाचार

भक्तपुर, चैत्र ९
वरिष्ठ पत्रकार, प्रजातन्त्र सेनानी एवम् राजनीतिज्ञ माथवरसिंह बस्नेतको ७८ वर्षको उमेरमा शनिवार निधन भएको छ । गत बिहिवार राती मष्तिष्कघाटबाट पिडित बन्नुभएका उहाँको उपचारको क्रममा अन्नपूर्ण न्यूरो अस्पताल काठमाण्डौंमा निधन भएको हो ।
भक्तपुरको सूर्यविनायक–८ सिपाडोलस्थित निजी निवासमा अचानक लडेर अचेत भएपछि उहाँलाई उपचारको लागि मध्यपुर अस्पताल थिमि लगिएको थियो । मध्यपुरबाट थप उपचारका लागि अन्नपूर्ण लगिएको नेपाली कांग्रेस भक्तपुरका सचिव सुशिल बस्नेतले जानकारी दिनुभयो ।
बस्नेत पुनर्जागरण साप्ताहिकको प्रकाशक र सम्पादक भएर लामो समय पत्रकारितामा क्रियाशिल हुनुहुन्थ्यो । विशेष गरी उहाँले प्रजातन्त्रको पक्षमा आफ्नो पत्रकारितालाई केन्द्रीत गर्नुभएको थियो । पञ्चायतकालमा पुनर्जागरण साप्ताहिक प्रजातन्त्र पुर्नप्राप्तीको आन्दोलनको लागि उचित खुराकको रुपमा रहेको थियो ।
पत्रकारिता जीवनमा उहाँले प्रेस काउन्सिल नेपाल, गोरखापत्र संस्थान र राष्ट्रिय समाचार समितिको अध्यक्षको रुपमा कार्य गर्नुभएको छ । उहाँ पछिल्लो समय देशान्तर साप्ताहिकमा नियमितरुपमा लेख लेख्दै आइरहनुभएको थियो ।
उहाँ प्रजातान्त्रिक आन्दोलनका अथक योद्धा समेत हुनुहुन्थ्यो । २०१७ सालदेखि राजनीतिमा संलग्न बस्नेत प्रजातन्त्र स्थापनाका विभिन्न आन्दोलनहरूमा सहभागी हुनुहुन्थ्यो । नेपाली कांग्रेसमा आवद्ध भएर उहाँ लामो समय प्रजातन्त्र प्राप्तीको आन्दोलनमा सक्रिय हुनुभएको थियो । सोही क्रममा उहाँलाई आजीवन कारावासको सजाय सुनाइएको थियो । वि. सं. २०४६ सालको जनआन्दोलनको सफलताले प्रजातन्त्र पुनःस्थापना भएपछि उहाँ जेलमुक्त हुनुभएको थियो ।
कांग्रेसका संस्थापक मध्येका एक कृष्णप्रसाद भट्टराईको सामिप्यतामा रहेर काम गर्नुभएका बस्नेतले जननायक विपि कोइराला, लौह पुरुष एवम् सर्वमान्य नेता गणेशमान सिंहसँग पनि नजिक भएर काम गर्नुभएको थियो ।
कृष्ण प्रसाद भट्टराई दोस्रो पटक प्रधानमन्त्री बन्नु हुँदा बस्नेत प्रेस सल्लाहकारको भूमिकामा हुनुहुन्थ्यो । बस्नेतले सर्वमान्य नेता सिंहको जीवनी पनि लेख्नुभएको छ ।
बस्नेतको पार्थिव शरीरलाई अन्तिम श्रद्धाञ्जलीको लागि पशुपतिमा दिउँसो साढे एक बजेसम्म राखिएको थियो । त्यसपछि पशुपति आर्यघाटको एक नम्बर घाटमा उहाँको विधिवत अन्त्येष्टि गरिएको कांग्रेस भक्तपुरका सचिव बस्नेतले जानकारी दिनुभयो ।
बस्नेतको पार्थिक शरीरमा नेपाली कांग्रेसका उपसभापति धनराज गुरुङ, महामन्त्री गगनकुमार थापा, उपप्रधान तथा शहरी विकास मन्त्री प्रकाशमान सिंह, भक्तपुर जिल्ला सभापति एवम् सांसद दुर्लभ थापाले पार्टीको झण्डा ओढाई सम्मान गर्नुभएको थियो ।
बस्नेतलाई अन्तिम श्रद्धाञ्जली दिन नेपाली कांग्रेसका सहमहामन्त्री एवम् पर्यटन, संस्कृति तथा नागरिक उड्डयन मन्त्री बद्रीप्रसाद पाण्डे, नेपाली कांग्रेसका केन्द्रीय सदस्य एवम् सांसद रमा कोइराला पौडेल, सांसद रघुजी पन्त, बागमती प्रदेशका स्वास्थ्य मन्त्री किरण थापा, मध्यपुर थिमि नगरपालिकाका प्रमुख सुरेन्द्र श्रेष्ठ, सूर्यविनायक नगरपालिकाका प्रमुख बासुदेव थापा, प्रहरी महानिरिक्षक दिनेश थापा, नेपाल पत्रकार महासंघका केन्द्रीय अध्यक्ष निर्मला शर्मा, महासचिव रामप्रसाद दाहाल, प्रेस काउन्सिल नेपालका मूख्य अधिकृत झपेन्द्र भुसाल, नेपाली कांग्रेस भक्तपुरका विभिन्न तहका पदाधिकारी एवम् नेता कार्यकर्ताहरु पशुपति आर्यघाट पुग्नुभएको थियो । बस्नेतका श्रीमती, एक छोरा र तीन छोरी हुनुहुन्छ ।
बस्नेतको निधनमा नेपाली कांग्रेसका सभापति शेरबहादुर देउवाले शोक व्यक्त गर्नुभएको छ । पार्टी केन्द्रीय कार्यालयका कार्यबहाक सचिव डा. प्रदीप पराजुलीले शनिवार शोक वक्तव्य जारी गर्दै बस्नेतको निधनप्रति सभापति एवम् पूर्वप्रधानमन्त्री देउवाले गहिरो दुःख व्यक्त गरेको जनाएको हो । यसैगरी बस्नेतको निधनप्रति नेपाल पत्रकार महासंघका महासचिव रामप्रसाद दाहालले शोक वक्तव्य जारी गर्दै दुःख व्यक्त गरेको छ ।

भक्तपुर, चैत्र ९
उरुग्वेलाई पराजित गर्दै अर्जेन्टिना फिफा विश्वकप–२०२६ को छनोट नजिक पुगेको छ । लिओनल मेसी, लउटारो मार्टिनेज र अन्य प्रमुख खेलाडी विना मैदानमा उत्रेको अर्जेन्टिनाले शुक्रवार सम्पन्न खेलमा उरुग्वेलाई १–० ले पराजित गरेपनि विश्वकपको छनोट नजिक पुगेको हो ।
दक्षिण अमेरिकी छनोटमा अर्जेन्टिना १३ खेलबाट २८ अंकसहित शिर्ष स्थानमा रहेको छ । विश्व फुटबल महासंघ (फिफा)को नियमानुसार विश्वकप २०२६ मा दक्षिण अमेरिकाबाट सोझै ६ टोलीले प्रवेश पाउने छन । दक्षिण अमेरिकी छनोटमा १३ औं चरणको खेल समाप्तीमा इक्वेडर २२ अंकसहित दोस्रो, ब्राजिल २१ अंक सहित तेस्रो, उरुग्वे २० अंकसहित चौंथो, पाराग्वे पनि २० अक सहित पाँचौं र कोलम्बिया १९ अंकसहित छैंटौं स्थानमा रहेको छ ।
सातौं स्थानमा रहेको बोलिभियाको १३ अंक रहेको छ जुन पहिलो स्थानको अर्जेन्टिनाको तुलनामा १५ अंकले कम हो । जसअनुसार साविक विश्व विजेता अर्जेन्टिना विश्वकप छनोटबाट एक अंक टाढा रहेको छ ।
अर्जेन्टिनालाई विश्वकप छनोट नजिक पु¥याउन थियागो आल्माडाले ६८औं मिनेटमा बक्सको छेउबाट सुन्दर कल्र्ड शट प्रहार गर्दै महत्वपूर्ण तीन अंक दिलाए । ब्राजिलविरुद्ध मंगलबार हुने घरेलु खेल बराबरी गरे या जित निकाले अर्जेन्टिनाले विश्वकपमा आफ्नो स्थान पक्का गर्नेछ । पछिल्लोपल्ट अर्जेन्टिनाले ब्राजिललाई रियो डि जनेरियोको मराकाना स्टेडियममा १–० ले हराएको थियो ।
अर्जेन्टिनाले यस खेल मेसी मात्र होइन, मार्टिनेज, लिसान्द्रो मार्टिनेज र रोड्रिगो डि पउलबिनै खेलेको हो । प्रशिक्षक लिओनल स्कालोनीले टिममा नयाँ अनुहार ल्याउँदै जुलियानो सिमेओनेलाई पहिलो रोजाइमा राखेका थिए, जसमा जुलियन अल्भारेज र थियागो आल्माडा आक्रमणमा थिए ।

भक्तपुर, चैत्र ८
भक्तपुरमा अन्तरनगर जिम्नाष्टिक प्रतियोगिता हुने भएको छ । भक्तपुर नगरपालिकाको आयोजनामा यही चैत्र २३ गतेदेखी २६ गतेसम्म अन्त्रनगर जिम्नाष्टिक प्रतियोगिता हुने भएको हो ।
प्रतियोगिता आयोजनाबारे शुक्रवार आयोजित बैठकमा नगर प्रमुख सुनिल प्रजापतिले भक्तपुरको मात्र नभई देशकै खेलकुदलाई क्षेत्रलाई अगाडि बढाउन नगरपालिकाले खेलकुदलाई प्राथमिकतामा राख्दै आएको बताउनुभयो ।
उहाँले भक्तपुर नगरपालिकाको आयोजनामा हुने अन्तर नगर जिम्नाष्टिक खेलकुद प्रतियोगिता सभ्य र भव्य रुपमा सम्पन्न गर्न खेलकुद समिति, खेलाडी, निर्णायकलगायत सबैको भूमिका महत्वपूर्ण रहेको बताउँदै सबैको सामूहिक निर्णयमा जिम्नाष्टिक प्रतियोगिता गर्न लागेको जानकारी दिनुभयो ।
नेपाल जिम्नाष्टिक संघका अध्यक्ष एवम् सांसद धु्रवबहादुर प्रधानले भक्तपुर नपाले खेलकुद क्षेत्रमा गरिरहेको गतिविधिहरुबाट अन्य स्थानीय तहहरुलाई पनि प्रेरणा मिलेको बताउँदै जिम्नाष्टिक खेल सबै खेलहरुको प्रारम्भिक खेलको रुपमा रहेको र यो खेल सिकेपछि अन्य खेल खेल्न पनि सहज हुने जानकारी दिनुभयो ।
भक्तपुर नगरपालिकाका उपप्रमुख रजनी जोशीले खेलकुद मानव जीवनको अभिन्न अंग भएकोले विद्यालय तहदेखि खेलकुदमा विद्यार्थीहरुलाई सहभागी गराउन सके विद्यार्थीको व्यक्तित्व विकासमा टेवा पुग्ने बताउनुभयो ।
भक्तपुर नपा वडा नं. १ का वडाध्यक्ष एवम् युवा तथा खेलकुद समितिका संयोजक श्यामकृष्ण खत्रीले अन्तर नगर जिम्नाष्टिक प्रतियोगिता भव्यताका साथ सम्पन्न गर्न १५१ सदस्यीय मूल समारोह समिति गठन भई १३ वटा उपसमितिहरु गठन गरिएको जानकारी गराउँदै प्रतियोगिता भव्य रुपमा सम्पन्न गर्न सबैको साथ र सहयोग आवश्यक भएको बताउनुभयो ।
बैठकमा भक्तपुर नगरपालिकाका प्रमुख प्रशासकीय अधिकृत वसन्त भट्टराई, प्रशिक्षक राजेश्वरमान स्थापित, भक्तपुर जिल्ला जिम्नाष्टिक संघका अध्यक्ष दिपककृष्ण प्रजापति, युवा तथा खेलकुद समितिका सदस्य रामसुन्दर बासीलगायतले प्रतियोगिताको विविध पक्षमा जानकारी दिनुभएको थियो ।

भक्तपुर, चैत्र ७
नेपालले फुटबलमा सिंगापुर माथि ऐतिहासिक जित निकालेको छ । फिफा अन्तराष्ट्रिय मैत्रीपूर्ण फुटबल अन्तर्गत आज (शुक्रवार) राती सम्पन्न खेलमा नेपालले सिंगापुरलाई १–० ले पराजित गर्दै ऐतिहासिक जित निकालेको हो ।
सिंगापुरको सिंगापुर नेशनल स्टेडियममा सम्पन्न खेलमा नेपालका लागि जिलेस्पी जंग कार्कीले खेलको १२ औं मिनेटमा गोल गरेका थिए । मनिष डाँगीले दायाँ विंगबाट दिएको लो पासलाई उनले पहिलो टचमै गोलमा परिणत गरेका थिए । जिलेस्पीको राष्ट्रिय टोलीबाट यो तेस्रो गोल हो ।
त्यसपछि पनि नेपालले खेलमा गोल गर्ने मौका पाएको थियो तर सदुपयोग भएन । सिंगापुरले घरेलु मैदानमा बराबरी गोल फर्काउने लगातार प्रयास गरे पनि सफल भएन । सिंगापुरले अन्तिमतिर लगातार आक्रमण गरे पनि नेपाली डिफेन्स र कप्तान तथा गोलकिपर किरणले बचाएका थिए ।

एफसी एसियन कप छनोट अन्तर्गत मलेसिया विरुद्धको खेलअघि नेपालले तयारी स्वरुप सिंगापुर विरुद्ध मैत्रीपूर्ण खेल खेलेको हो । यसअघि नेपालले सिंगापुरलाई हराउन सकेको थिएन ।
नेपाल र सिंगापुर सन् १९८९ पछि आमुन्नेसामुन्ने भएका हुन् । ५ जुन १९८९ मा भएको पछिल्लो भेटमा सिंगापुरले नेपाललाई ७–० ले पराजित गरेको थियो । त्यसअघि भएको दुई भेट (१९८२ र १९८९) मा पनि नेपाल क्रमशः २–० र ३–० ले पराजित हुन पुगेको थियो ।

सन् १९८९ मा भएको दुई खेल विश्वकप छनोटका हुन् भने १९८२ को खेल किङ्स कपको रहेको थियो । तर, यसपल्ट भने फिफा वरीयतामा आफूभन्दा १५ स्थान (१६०औं स्थानमा) रहेको सिंगापुरलाई नेपालले हार चखाएको हो ।
प्रशिक्षक म्याट रसको पहिलो अधिकारिक खेलमा नेपालले विजयी सुरुवात गरेको हो । रसले आफ्नो डेब्यु खेलमा युवा मिडफिल्डर सुबास बम ठकुरीलाई पनि डेब्युको अवसर दिए ।

योसँगै नेपाल एएफसी एसियन कप छनोट २०२७ खेल्न प्रस्थान गर्नेछ । मार्च २५ मा नेपालले घरेलु टोली मलेसियासँग प्रतिस्पर्धा गर्नेछ । यस समूहमा भिएतनाम र लाओस पनि छन् । शीर्षस्थानमा रहेको टोलीले एसियन कप खेल्नेछ ।
सिंगापुरको समूहमा भने भारत, हङकङ र बंगलादेश छन् । सिंगापुरले पहिलो खेलमा हङकङको सामना गर्नेछ ।

भक्तपुर, चैत्र ७
बेवारिसे सडक मानवको सहयोगार्थ महायज्ञ–२०८१ आयोजना हुने भएको छ । बिहीबार भक्तपुरको गठ्ठाघरस्थित राष्ट्रिय संचार केन्द्रमा पत्रकार सम्मलेन आयोजना गर्दै मानव कल्याण समाजले महायज्ञबारे जानकारी दिएको हो । महायज्ञ चैत्र २१ देखि २७ गतेसम्म मध्यपुर थिमि नगरपालिका–५ राधेराधेमा आयोजना हुनेछ भने कथावाचन संस्थाका संस्थापक अध्यक्ष देवी सुमी मानवबाट हुनेछ ।
सामाजिक सेवाको पवित्र उद्देश्यलाई आत्मसात गर्दै ‘बेवारिसे सडक मानवका लागि महायज्ञ–२०८१’ आयोजना गर्न लागिएको श्रीमद्भागवत सप्ताह ज्ञान–विज्ञान महायज्ञ प्रचारप्रसार समितिका संयोजक पेशल आचार्यले जानकारी दिनुभयो ।
‘बेवारिसे सडक मानवका लागि महायज्ञ २०८१’ का संयोजक गोपीकृष्ण न्यौपानेले महायज्ञमार्फत सडक तथा सार्वजनिक स्थलहरूमा अलपत्र तथा बेवारिसे अवस्थामा रहेका मानवहरूको लागि दीगो रूपमा खाना, नाना र छानाको व्यवस्थापन गर्ने लक्ष्य राखिएको जानकारी दिनुभयो ।
वि. सं. २०७४ सालमा स्थापना भएको संस्थाले बेवारिसे मानवहरूको उद्धार गर्दै उनीहरूको सरसफाइ, स्वास्थ्य उपचार, पुनर्मिलन, परामर्श तथा सुधारका लागि विभिन्न प्रयासहरूलाई निरन्तरता दिदै आएको छ ।
केही वर्ष अघिसम्म भक्तपुरका सडक तथा अन्य सार्वजनिक स्थलहरूमा बेवारिसे मानिसहरूको संख्या उल्लेख्य रहेको अवस्थामा संघकै अगुवाइमा व्यवस्थापनको काम हुँदै आइरहेको छ । संस्थाको सक्रियता पछि भक्तपुरमा बेवारिसे मानवहरु सडकमा कम हुँदै गएको छ भने सडकमा बेवारिसे फेला परेकाहरुलाई झौखेलमा अस्थायी बासको व्यवस्था गरि राखिएको छ ।
संस्थाका अध्यक्ष सुमी मानवका अनुसार त्यसअघि २०७२ देखि नै सडकमा बेवारिसे रहेका मानवहरुलाई चाउचाउ बिस्कुट तथा पानी बाड्ने अभियानबाट सेवाको सुरुवात गरिएको थियो । संघले हालसम्म २१ सय सडक मानव तथा बेवारिसे मानवको उद्धार गरी व्यवस्थापन गरिसकेको छ ।
हाल भक्तपुर, काभ्रे, काठमाण्डौं, बारा र दाङमा शाखा कार्यालय स्थापना गरेर संघले पाँच सय जनालाई आश्रय दिंदै आइरहेको छ । महायज्ञमार्फत सेवाहरूलाई थप प्रभावकारी बनाउने र दिगो व्यवस्थापनका लागि महायज्ञबाट संकलित सहयोग तिनै असहाय सडक मानवहरूको लागि जग्गा खरिद तथा स्थायी आवास निर्माणमा प्रयोग गरिने संघका अध्यक्ष मानवले जानकारी दिनुभयो ।
महायज्ञको मुख्य कार्यक्रम अन्तर्गत चैत्र २१ गते बिहान ७ देखि ९ बजेसम्म पुर्वाङ्ग हुनेछ भने सोही दिन विहान ९ बजे महायज्ञ स्थलबाट शोभाकलश यात्रा हुनेछ । महायज्ञको समुद्घाटन २१ गते दिउँसो साँढे १२ बजे हुनेछ ।
यस्तै लक्ष्यवर्तिका प्रज्वलन चैत्र २६ र २७ गते तथा समापन चैत्र २७ गते हुने बताइएको छ । महायज्ञ अन्तर्गत बिहान ५ देखि ७ बजेसम्म दैनिक योगाभ्यास, ७ बजेदेखि पूजा एवं पाठपारायण, ११ देखि ४ बजेसम्म संगीतमय कथावाचन, सवा ४ बजे आरती तथा साँढे ४ बजे प्रसाद वितरण गरिने छ ।
यस्तै दैनिक रुपमा साँझ ६ देख ९ बजेसम्म श्रृङ्गारिक महाआरती सहित सन्ध्याकालिन भजन हुने संघले जानकारी दिएको छ ।
महायज्ञ आयोजनाको संयोजक गोपीकृष्ण न्यौपानेको संयोजकत्वमा सम्पन्न पत्रकार सम्मेलनमा महायज्ञ समारोहका सहसंयोजक जुना बस्नेत र मधु ढुंगेल तथा कोषाध्यक्ष नरेश रञ्जितको पनि उपस्थिती रहेको थियो ।

भक्तपुर, चैत्र ७
मध्यपुर थिमि नगरपालिका वातावरण, सँस्कृति र पर्यटनतर्फ देशकै उत्कृष्ट नगरपालिका घोषित भएको छ । नेपाल नगरपालिका संघको ३२ औं स्थापना दिवसको अवसरमा बिहिवार मध्यपुर थिमि नगरपालिकालाई वर्ष २०८०÷०८१ को वातावरण, सँस्कृति र पर्यटनतर्फ देशकै उत्कृष्ट नगरपालिका घोषणा गर्दै सम्मान गरेको हो ।
‘हाम्रो कला हाम्रो संस्कृती, मध्यपुर थिमि हाम्रो सम्पत्ति’ भन्ने नारा आत्मसाथ गर्दै अघि बढेको मध्यपुर थिमि नगरपालिकाले कला सँस्कृतीको जगेर्ना, वातावरणीय संरक्षण र उत्थानशीलतामा बहुआयामिक दृष्टिले परिवर्तनीय अभ्यास गरिरहेकोले यसवर्षको वातावरण, सँस्कृति र पर्यटन शिर्षकमा ८० प्रतिशत अंक हासिल गरी उत्कृष्ट नगरपालिका बन्न सफल भएको हो ।
मौलिक कला संस्कृती र सम्पदा, वातावरणमैत्री स्थानीय शासन, जलवायु उत्थानशील योजना, जलाधार क्षेत्र, जैविक पोखरीहरुको संरक्षण, फोहोर मैला र ढलको उचित व्यवस्थापन, ढल रहित मनोहरा करिडोर निर्माण, सडकको सौन्दर्यकरण, खानेपानी तथा सरसफाई सेवामा प्रविधिको प्रयोग, वोटानिकल बगैंचा, हरियाली उद्यान, पर्यटन क्षेत्र बिस्तार र प्रवद्र्धन, सरसफाई गुरुयोजना निर्माण तथा कार्यान्वयन, मठमन्दीर, इनार ढुंगेधारा, पाटी पौवा जस्ता साँस्कृतिक, ऐतिहासिक तथा पुरातात्विक सम्पदाको संरक्षण, नगरको मौलिकता र सौन्दर्यताको सम्वद्र्धन जस्ता पाटोमा मध्यपुर थिमि नगरपालिकाले उल्लेख्य कार्य गरिरहेको संघको मूल्यांकनमा उल्लेख छ ।
हालसम्म बनेको योजना, गरेको अभ्यास र देखिएका परिणामले मध्यपुर थिमि एउटा पूर्ण वातावरण मैत्री सफा र हराभरा साँस्कृतिक नगरको रुपमा विकास भइरहेको आभास गर्न सकिने संघले जनाएको छ ।
संघको ३२ औं स्थापना दिवसको अवसरमा आयोजित कार्यक्रममा प्रधानमन्त्री केपी शर्मा ओलीले नगर प्रमुख सुरेन्द्र श्रेष्ठलाई उक्त सम्मान प्रदान गर्नुभयो ।
सो अवसरमा शहरी योजना तथा पूर्वाधार विकासमा सिद्धार्थ नगर नगरपालिका, सामाजिक विकासतर्फ कलैया उपमहानगरपालिका बारा कलैया, संस्थागत विकास, सेवा प्रवाह र वित्तिय सुशासनमा ठाकुरबाबा नगरपालिका, स्थानीय आर्थिक विकासमा गैडाकोट नगरपालिका नवलपरासी र घोडाघोडी नगरपालिका कैलाली देशकै उत्कृष्ट नगरपालिका घोषित भएका छन । उत्कृष्ट सबै नगरपालिकालाई प्रधानमन्त्री ओलीले सम्मान गर्नुभयो ।
संघले नगरपालिकाहरुको मूल्यांकनका लागि एक सिफारिस समिति गठन गरेको थियो । सोही सिफारिस समितिले विभिन्न मापदण्डहरुलाई सुक्ष्म ढंगले मूल्यांकन गरी सिफारिस गरेको आधारमा उत्कृष्ट नगरपालिका घोषणा गरिएको हो ।

कार्यक्रममा प्रधानमन्त्री ओलीले संघीय लोकतान्त्रिक गणतन्त्रको स्थापनापछि निर्मित स्थानीय सरकारले वास्तवमै गाउँ गाउँमा सिंहदरबार पु¥याएको बताउनुभयो । उहाँले नेपाली जनताको लामो संघर्ष र वलिदानस्वरुप मुलुकका राजतन्त्रको अन्त्यसँगै बलियो स्थानीय सरकार बनेकाले यसको विकल्प नभएको स्पष्ट गर्नुभयो ।
“संविधान कार्यान्वयनका क्रममा प्रदेशको संरचनाबारे केही बहस भएका छन् तर स्थानीय सरकारबारे कुनै प्रश्न उठेको छैन । त्यसकारण स्थानीय सरकारको कुनै विकल्प छैन । जनतालाई सेवा दिने नजिकको सरकार यही हो’’, उहाँले भन्नुभयो, “स्थानीय तहका समस्या र मागलाई उचित नीति र कानुनको निर्माण गरेर क्रमशः समाधान गरिनेछ । यसमा तीनै तहका सरकारबीच आवश्यक सहकार्य र समन्वय हुनेछ ।’’
प्रधानमन्त्री ओलीले राजतन्त्र फर्काउने नाममा भइरहेका गतिविधिप्रति लक्षित गर्दै राजतन्त्रकालमा लादिएका निरकुङ्शतालाई जनताले नबिर्सिएकाले गणतन्त्रको सुदृढीकरणमा सबै लाग्नुपर्नेमा जोड दिनुभयो ।
नगरपालिका उत्कृष्ट घोषणा भएपछि प्रतिक्रिया दिँदैं मध्यपुर थिमि नगरपालिकाका प्रमुख सुरेन्द्र श्रेष्ठले यो उपलब्धी सबैको साझा प्रयासबाट सम्भव भएको बताउनुभयो । उहाँले कुनै पनि योजना कार्यान्वयनमा योजना निर्माता, कार्यान्वयन गर्ने निकाय र सरोकारवाला सबैको उत्तिकै महत्वपूर्ण जिम्मेदारी हुने बताउँदैं यो उपलब्धी हासिल गर्न योगदान दिने सबैलाई आभार व्यक्त गर्नुभयो ।

भक्तपुर, चैत्र ६
स्वतन्त्र विद्यार्थी युनियन (स्ववियु) निर्वाचनका दौरान फोहोर भएको भक्तपुर बहुमुखी क्याम्पस हाता र दुधपाटी क्षेत्र निर्वाचन सकिएको आधा घण्टामा चिरीच्याट्ट सफा भएको छ ।
निर्वाचनको दौरान विद्यार्थी संगठनहरुले छरेका प्रचार सामग्रीले फोहोर भएको क्याम्पस हाता र दुधपाटी क्षेत्र नेपाली कांग्रेस निकट नेपाल विद्यार्थी संघ (नेविसंघ)ले सरसफाई गरेका कारण चिरीच्याट्ट सफा भएको हो ।
सरसफाईका क्रममा विद्यार्थीहरुले यत्रतत्र छरिएका प्रचार सामग्रीहरु पर्चा, पम्पलेट, कार्डलगायतका वस्तु टिपेर संकलन गरी निश्चित स्थानमा विसर्जन गरेका थिए ।

सरसफाईमा बागमती प्रदेशसभाका सांसद सुरेश श्रेष्ठ, चाँगुनारायाण् नगरपालिकाका प्रमुख जीवन खत्री, नेविसंघ भक्तपुरका नेताहरु, नेविसंघ भक्तपुर बहुमुखी क्याम्पस इकाईका नेता एवम् विद्यार्थीहरुको सहभागिता रहेको थियो ।
नेविसंघका पूर्व नेता समेत रहनुभएका सांसद श्रेष्ठले फोहोर गरेपछि सफा गर्ने दायित्व पनि रहेकाले सरसफाई गरिएको बताउनुभयो । उहाँले निर्वाचनका दौरान ऐतिहासिक शहर भक्तपुर प्रवेश गर्ने प्रमुख नाका दुधपाटी क्षेत्र फोहोर भएपछि सरसफाई गरिएको बताउनुभयो ।

न्यूजअफ, ललितपुर, ५ चैत ।
भगवान बुद्ध जन्मनुभएको लुम्बिनीको पवित्र उद्यानमा फागुन २० गते श्रामणेर भावमा प्रव्रजित भएका “५०० बृहत श्रामणेर प्रव्रज्या” मा प्रव्रजित नव श्रामणेरहरु चैत ४ र ५ गते विभिन्न स्थानमा भिक्षाटनपछि चीवर छोडेर गृहस्थी जीवनमा फर्केका छन् ।
अखिल नेपाल भिक्षु महासंघका कोषाध्यक्ष एवं प्रव्रज्या सामाजिक नेपालका अध्यक्ष भिक्षु बोधिज्ञान महास्थविरले ललितपुरको पुल्चोकस्थित अक्षयश्वर महाविहारमा आज आयोजित समापन समारोहका बीच श्रामणेर जीवनलाई छाडेर गृहस्थी हुन पाउँ भनी प्रार्थना गरेका अल्पकालिन नव श्रामणेरहरुलाई अनुमति दिनुहुँदै पञ्चशील प्रदान गर्नुभई गृहस्थी जीवन नै फर्काउनुभयो ।
उहाँले अल्पकालिन श्रामणेर बनेर जतिपनि सिकाइ तथा अनुभवहरु संगालेका छन्, ती अनुभवहरु आफ्ना मानसपटलमा पछिसम्म रहिरहनेछन् भन्नुभयो । प्रव्रज्यामा सहभागी हुँदा अकुशललाई त्यागी कुशल कर्म वृद्धि गरेकालाई सम्झी त्यसमा गर्व गरी सिकेका कुशल कार्यहरुलाई घर फर्किंदा आफूका साथै अरुलाई पनि सिकाउँदै जानुपर्नेमा उहाँले ओवाद दिनुभयो ।
सो अवसरमा थाई धर्मदूत भिक्षु थावरन थावरोले छोटो समयावधिमा पनि नेपाली धम्मदायादहरुले धेरै कुरा चाँडो सिकेकोमा प्रशंसा तथा साधु अनुमोदन गर्नुभयो ।
उक्त श्रामणेर प्रव्रज्यामा प्रव्रजित हुनुभएका अनिश शाक्यले दुर्लभ मानव जीवनमा दुर्लभ प्रव्रज्या प्राप्त गर्न पाएकोमा अति नै प्रमुदित भई जन्म दिनुहुने आमाबुबा प्रति एवं प्रव्रज्या दिनुहुने गुरुहरु प्रति कृतज्ञता प्रकट गर्नुभयो ।
अखिल नेपाल भिक्षु महासंघ एवं थाई धर्मदूत इण्डिया–नेपालको संयुक्त आयोजनामा फागुन १४ गते नाम दर्ता गरी नेक्खमी पारमीको अभ्यास गरी घरबार, आफन्तजन, साथीसंगी त्यागी नयाँ अनौठो र नौलो जीवनको शुरुवात गरेका नेपाली कुलपुत्रहरु तथा केही भारतीय कुलपुत्रहरु दश पारमिताको अभ्यास गर्दै चैत ५ गते २१ दिनको अल्पकालिन प्रव्रजित जीवन बिताई आ–आफ्ना घर फर्केका हुन् ।
पूर्ण जीवनकालमा प्रव्रजित हुन नसकेका वा नपाएकाहरु केही समयको लागि अल्पकालिन रुपमा भएपनि प्रव्रजित भई भगवान बुद्धले सिकाउनु भएको त्यागी जीवन बिताइ, उपेक्षा, मैत्री, करुणाको जीवनमा जिएर, भिक्षाटन वा दानबाट जीवन निर्वाह गरी भगवान बुद्धको शिक्षा शील, समाधि र प्रज्ञाको अभ्यास गरेका छन् । उनीहरुले आन्तरिक सौन्दर्य, मनको शान्ति प्राप्ती गर्ने मूलस्रोततर्फ कदम अघि बढाउने अभ्यास गर्न पाएका छन् ।
जसमा फागुन १४ गते ललितपुरको पुल्चोकस्थित अक्षयश्वर महाविहारमा नाम दर्ता, १५ गते अक्षयश्वर विहारकै प्राङ्गनमा केश छेदन, १६ गते नागबहालमा भिक्षु संघ र आमाबुबासँग क्षमायाचना एवं त्रिचीवर दानपछि नागबहालबाट मंगलबजारको पाटन दरबारहुँदै गाबहालबाट पुल्चोकपुगी लुम्बिनीतर्फ प्रस्थान, २० गते भगवान बुद्धको जन्मस्थल लुम्बिनीको पवित्र उद्यानमा प्रव्रज्या । २२ गते लुम्बिनीको अन्तर्राष्ट्रिय बौद्ध सभा तथा ध्यान गृहमा भिक्षाटन । २४ गते शान्तिदीप नजिक नेपालको झण्डामुनि दीप प्रज्वलन । चैत २ गते  देवदह, बुटवल तथा भैरहवाको लुम्बिनी गेटमा धम्मयात्रा । चैत ४ र ५ गते विभिन्न स्थानमा भिक्षाटन गरेका छन् ।
प्रव्रज्या सामाजिक नेपालले व्यवस्थापन गरेको सो प्रव्रज्या कार्यक्रमको सहआयोजकहरु थाई राजकीय विहार, लुम्बिनी विकास कोष, नेपाल पर्यटन बोर्ड, ललितपुर महानगरपालिका, धर्मोदय सभा, बौद्ध विहार संघ, अक्षयश्वर महाविहार, हिरण्यवर्ण महाविहार, धम्मसाकच्छा संघ, नेपाल मगर बौद्ध सेवा समाज, युवक बौद्ध मण्डल नेपाल, बुद्ध समाज नेपाल, वल्र्ड एलियन्स अफ बुद्धिस्ट, लुम्बिनी विश्वविद्यालय, नागबहाल टोल सुधार समिति, धम्मकाय विश्वविद्यालय, धम्मकाय फाउण्डेसन र प्रोमिस ल्याण्ड रहेका छन् ।

भक्तपुर, चैत्र ५
नेपाल च्याम्पियनका उपविजेता पुरुषोत्तम सिलवालले श्रीलंकामा सम्पन्न अन्तर्राष्ट्रिय बुद्धिचाल प्रतियोगितामा फिडे क्याण्डिडेड मास्टर (सिएम)को उपाधि जितेको छ । आफ्नै खर्चमा श्रीलंका पुगेका १७ वर्षे युवा पुरुषोत्तमले उच्चस्तरीय अन्तर्राष्ट्रिय प्रतियोगितामा ९ चरणको प्रतिस्पर्धा मार्फत ४.५ अंक जोडेर सिएम टाइटल प्राप्त गर्न सफल भएका हुन ।
वल्र्ड चेस फेडेरेसन (फिडे) र एसियन चेस फेडेरेसन (एसिएफ)को समन्वयमा श्रीलंका चेस फेडेरेसनको आयोजनामा सम्पन्न एसियन जोनल ३.२ चेस प्रतियोगितामा पुरुषोत्तमले मध्यम स्तरको खेल पस्केका छन्।
आयोजक श्रीलंका सहित नेपाल, बंगलादेश, पाकिस्तान, माल्दिभ्स र भुटानका खेलाडी बिच प्रतिस्पर्धा भएको एसियन जोनल ३.२ कोलम्बोस्थित फ्याकल्टि अफ ग्राजुएट स्टडिज युनिभर्सिटीको हलमा ११ मार्च देखि १८ मार्च सम्म सञ्चालन भएको हो ।
२५ औं नेपाल च्याम्पियन तथा १० औं महिला नेपाल च्याम्पियनको हैसियतमा एफएम रुपेश जैसवाल र सिन्दिरा जोशीलाई हवाई टिकट सहित अन्य सम्पूर्ण खर्च उपलब्ध गराउदै नेपाल बुद्धिचाल महासंघले सहभागी गराएका थिए ।
स्पर्धामा नेपाल च्याम्पियन फिडे मास्टर रुपेशले ५ अंक जोडेका छन् भने महिला च्याम्पियन सिन्दिराले कमजोर खेल खेल्दै ३.५ मात्र जोडिन ।
दक्षिण एसियाली देशको प्रतिष्ठित चेस खेलमा बंगलादेशका २४३१ रेटेड अन्तर्राष्ट्रिय मास्टर आईएम मनुन रेजा नीरले ७ अंक बनाउदै एकल अग्रता सहित पहिलो स्थान हासिल गरे ।
प्रतियोगितामा समान ६.५ अंक प्रोग्रेसिभ प्वाइन्टका आधारमा बंगलादेशका २३२७ रेटेड फिडे मास्टर जिया तहसिन तज्वार द्वितीय, श्रीलंकन २४०२ रेटेड आईएम लियानागे रानिन्दे दिलसान तृतीय, बंगलादेशका २४३१ रेटेड आईएम मोहमद फहाद रहमान चौथो, २११३ रेटेड एफएम रहमान साहिद महफुजुर पाँचौ र ६ अंक जोडेर श्रीलंकाका पेसान्दु रस्मिथा छैटौं स्थानमा रहे ।
महिलातर्फ बंगलादेशका २०९७ रेटेड अहमेद वादिफाले ७ अंक प्रोग्रेसिभ ४६ प्वाइन्ट बनाउदै पहिलो स्थान हासिल गरे । उनले महिला उपाधि सँगसँगै अन्तर्राष्ट्रिय मास्टरको आईएम टाइटल पनि पाउन सफल भए ।
समान ७ अंक जोडे पनि प्रोग्रेसिभ ४२.५ प्वाइन्टमा सिमित बन्दै श्रीलंकाका २१२१ रेटेड डेभिण्ड्या गुरुवर्धने दोश्रो स्थान प्राप्त गरे । प्रतिस्पर्धामा श्रीलंकाका १७८१ रेटेड एएफएम दुलिन्मा हेमाल्नी र २०५३ रेटेड डब्लूसिएम दाहाम्दि समान ६.५ अंक सहित तेस्रो र चौथो भईन् । यस्तै ६ अंकमा १८०१ रेटेट एम ईशान्दि र १७७६ रेटेड सेथुम्ली डेभहारा पाँचौ र छैटौं बनीन् ।
वल्र्ड चेस फिडेको अफिसियल बुद्धिचाल प्रतियोगितामा शीर्ष ६ पुरुष र ६ जना महिला खेलाडीहरुले ६ हजार १५० युएस डलर बराबरको पुरस्कार एक आपसमा बाँडे । जसमा पुरुषतर्फ क्रमशः १ हजार ५ सय, १ हजार, ५ सय, ३ सय, २ सय र १ सय ५० डलर प्राप्त गरे भने महिलातर्फका विजेताले १ हजार, ६ सय, ४ सय, २ सय ५० र १ सय डलर पुरस्कार प्राप्त गरे ।
यसैबीच सम्पन्न फन खेलको अर्को विधा ब्लिट्ज् चेस प्रतियोगितामा नेपालका २१५९ रेटेट एफएम रुपेश जैसवालले ५.५ अंक जोडेर चौथो स्थान प्राप्त गर्न सफल भएका छन् भने २१३५ रेटेड युवा पुरुषोत्तम सिलवालले ५ अंक जोडेर छैटौं स्थान हासिल गरेका छन् ।

भक्तपुर, चैत्र ५
शहिद स्मारक बी डिभिजन लिगमा भक्तपुरको मध्यपुर युथ एशोसियसनले पहिलो जित निकालेको छ । एन्फा कम्प्लेक्स सातदोबाटोमा मंगलवार सम्पन्न रोमाञ्चक खेलमा मध्यपुरले झापा फुटबल क्लबलाई २–१ गोल अन्तरले हराउँदै लिगमा पहिलो जित निकालेको हो । मध्यपुरले पहिलो खेलमा टुसाल युथ क्लवसँग बराबरी खेलेको थियो ।
जितसँगैं मध्यपुरको दुई खेलबाट चार अंक भएको छ । झापाको भने यो लगातार दोस्रो हार हो । मध्यपुरलाई जित दिलाउन सजिन थापामगरले एक गोल गरे भने अर्को आत्मघाती गोल भएको थियो । झापाका लागि पुजन राईले एक गोल गरे ।

खेलको पहिलो हाफमा दुवै टिमबाट गोल हुन सकेन । दोस्रो हाफ भने अत्यन्त रोमाञ्चक बन्यो । खेलको ५१ औं मिनेटमा झापाका पेमा तामाङले आत्मघाती गोल गरे । यो गोलमा मध्यपुरले १–० को अग्रता बनायो ।
मध्यपुरका कप्तान राहुल खड्काले रिबाउन्डमार्फत आएको बललाई झापाको पेनाल्टी बक्सबाट प्रहार गरेका थिए । उक्त बललाई बचाउने प्रयास गर्दा पेमालाई ‘डिफ्लेक्ट’ हुँदै गोलमा परिणत भएको थियो ।

खेल सकिन एक मिनेट बाकी छँदा पुजन राईले गोलकिपरलाई बिट गर्दै गोल गरे र खेल १–१ को बराबरीमा पु¥याए । इन्जुरी समयमा सजिन थापा मगरले बक्स बाहिरबाट हानेको शक्तिशाली प्रहार गोलमा परिणत भयो । यही गोल निर्णायक बन्दा मध्यपुरले नाटकीय शैलीमा २–१ को जित दर्ता गर्यो ।

खेलमा निर्णायक गोलकर्ता सजिन प्लेयर अफ दी म्याच घोषित भए । उनले नगद ७ हजार ५ सय पुरस्कार प्राप्त गरे । मध्यपुर युथले खेल जिते वापत २५ हजार रुपैंया खेल विजेता पुरस्कार प्राप्त गरे ।