भक्तपुर, असार ३
भक्तपुरको सुर्यविनायक नगरपालिका–१ सिरुटारमा जुवातास खेलिरहेको अवस्थामा १२ जनालाई प्रहरीले शनिवार पक्राउ गरेको छ । स्थानीय ६२ वर्षीय राम प्रसाद राउतको घरमा जुवातास खेलिरहेको अवस्थामा प्रहरीले १२ जनालाई पक्राउ गरेको हो ।
जिल्ला प्रहरी परिसर भक्तपुरबाट खटिएको प्रहरीले उनीहरूलाई नगद १ लाख १० हजार ७ सय ८० रूपैयाँ र तास ६ बुक सहित पक्राउ गरेको हो ।
भक्तपुर, असार ३
भक्तपुर दरवारस्क्वायरस्थित श्री पद्य माध्यामिक विद्यालय यसवर्ष पनि उत्कृष्ट विद्यालय बन्न सफल भएको छ । भक्तपुरकै पहिलो तथा एक शताब्दी पुरानो सामुदायिक विद्यालय श्री पद्म शैक्षिक मूल्याङ्कनमा यो वर्ष पनि उत्कृष्ट बन्न सफल भएको हो ।
नेपाल सरकारको शिक्षा विज्ञान तथा प्रविधि मन्त्रालय अन्तर्गतको शैक्षिक गुणस्तर परिक्षण केन्द्र सानोठिमी भक्तपुरले प्रत्येक वर्ष देशैभरिको विद्यालयहरूमा गर्दै आएको शैक्षिक गुणस्तरीय मापन कार्य अन्तर्गत श्री पद्म शैक्षिक वर्ष २०८१ मा ९१ प्रतिशत अंक ल्याएर उत्कृष्ट विद्यालय बन्न सफल भएको हो ।
श्री पद्य गत शैक्षिक वर्ष २०८० मा पनि ९० प्रतिशत बढी अङ्क ल्याई देशभरिमै तेस्रो उत्कृष्ट बनेको थियो ।
गत जेठ २७ गते विज्ञ परिक्षक प्रकाश महर्जन सहितको टोलीले विद्यालय, विद्यार्थी, समुदाय समेतको अनौपचारिक अवलोकन गरि शैक्षिक, भौतिक, आर्थिक र वातावरणीय सरसफाई लगायतका विभिन्न नौ वटा मापदण्डको अनुगमन गरेको थियो ।
शैक्षिक गुणस्तर मापन केन्द्रको मापदण्ड अनुसार नमुना विद्यालयको जम्मा अंक भार १ सय ९५ हो । जस मध्ये श्री पद्यले १ सय ७९ अंक अर्थात ९१.७९ प्रतिशत अंक हासिल गर्न सफल भएको सोमवार आयोजित कार्यक्रममा सार्वजनिक गरिएको हो ।
सो कार्यक्रममा विद्यालय व्यवस्थापन समितिका अध्यक्ष समेत रहनुभएका भक्तपुर नगरपालिका वडा नं. ३ का वडाअध्यक्ष राजकृष्ण गोराले आलोचनालाई मार्गनिर्देशनको रूपमा बुझ्यौ भने यो विद्यालयलाई झन् उत्कृष्टताको उचाइमा पु¥याउन सकिने बताउनुभयो ।
करिव १ हजार ६ सय बढी विद्यार्थी सहित कक्षा १२ सम्म माध्यमिक र स्नातकसम्म कलेज संचालन गर्दै आएका श्री पद्म २०७५ मै नमुना विद्यालय घोषित भएको थियो । विद्यालयले यसअघि २०८० मै बागमती प्रदेश सरकारले असल अभ्यासहरुमा उत्कृष्ट विद्यालयको खिताब पाएका थिए ।
विज्ञ परिक्षक प्रकाश महर्जनका अनुसार हरेक सामुदायिक विद्यालयले पनि विद्यार्थीको रेकर्ड अभिलेख उत्कृष्ट रूपमा गर्नसक्नु पर्नेमा जोड दिनुभयो । उहाँले शिक्षक सरकारी कर्मचारी भन्दा पनि प्राविधिक व्यक्ति बन्नुपर्ने बताउँदैं उहाँले विद्यालय रणनैतिकतिर, शिक्षण सिकाई, विद्यालय व्यवस्थापन तथा कार्य व्यवस्थापन, पुस्तकालय, विज्ञान प्रयोगशाला नवपर्वतनात्म कार्यमा विद्यालयले राम्रो गरेको पाएको जनाउनुभयो ।
त्यस्तै चमेना गृह थप व्यवस्थित गर्नुपर्ने, पेशागत विकासको कार्य थप व्यस्थित गर्नुपर्ने, अनुसन्धनात्मक पाटोमा थप लगानी गर्नुपर्ने, शैक्षणिक विधि प्रयोगमा थप सहभागिता गर्नुपर्ने, शताब्दी पुरानो विद्यालयमा दाताहरुलाई अझ आकर्षित गर्न सकिने जस्ता सुझाव विज्ञ परिक्षक महर्जनले दिनुभएको थियो ।
केके मानन्धर, भक्तपुर, असार १
सात बुँदे घोषणापत्र जारी गर्दै दोस्रो अन्तर्राष्ट्रिय मातृभाषा पत्रकारिता सम्मेलन ११४५ शनिवार सम्पन्न गरेको छ । दुईदिने सम्मेलनमा बंगलादेश, भारत र नेपालका विभिन्न प्रदेशबाट पत्रकारहरुको सहभागिता रहेको थियो ।
अन्तर्राष्ट्रिय सम्मेलन मार्फत पत्रकारहरुले मातृभाषाको पत्रकारितालाई प्रवद्र्धन गर्नुपर्ने, नेपाल सरकार लगायत सार्क राष्ट्रका सरकार प्रमुखहरुले मातृभाषाको पत्रकारिता गर्ने अधिकार सुनिश्चित गर्नुपर्ने, सरकारी स्तरमा नीति तर्जुमा गरेर बजेटको व्यवस्था गर्नुपर्ने लगायतका माग गरेका छन् ।
भक्तपुरको थिमिमा सम्पन्न भएको दोस्रो अन्तर्राष्ट्रिय मातृभाषा पत्रकारिता सम्मेलनमा मध्यपुर थिमि नगरपालिकाका प्रमुख सुरेन्द्र श्रेष्ठले मातृभाषा संरक्षण गर्न स्थानिय सरकार प्रतिबद्ध रहेको बताउनुभयो । विद्यालयस्तरमा मातृभाषाको अध्यापन गर्नको लागि नगरपालिकाले तयारी गरिरहेको समेत उहाँले जानकारी दिनुभयो ।
नेपालका प्रथम मातृभाषी पत्रकार धर्मादित्य धर्माचार्यले नेपालभाषाको माध्यमबाट पत्रकारिता सुरु गर्नुभएको १०१ वर्ष पुगेको उपलक्ष्यमा सम्मेलनको आयोजना गरिएको नेवाः पत्रकार राष्ट्रिय दबूका केन्द्रीय अध्यक्ष नृपेन्द्रलाल श्रेष्ठले बताउनुभयो ।
करिब ५० विदेशी पत्रकार तथा सय जना नेपाली पत्रकारहरु समिल्लित रहेको अन्तर्राष्ट्रिय सम्मेलनलाई सार्क जर्नलिष्ट फोरम र फोनिजले सहकार्य गरेको थियो ।
सम्मेलनमा नेपाल लगायत विश्वव्यापी रहेको मातृभाषा पत्रकारिताको चुनौती, अवसर र भविष्यका सम्भावनाहरूमा केन्द्रीत रहेर विभिन्न चरणमा प्यानल छलफल गरेको थियो । गोरखापत्रका पूर्व प्रधान सम्पादक पुस्करभक्त माथेमाले नेपालको सरकारी सञ्चारगृहमा मातृभाषाको पत्रकारिताको अभ्यासको विषयमा कार्यपत्र प्रस्तुत गर्नुभएको थियो ।
सम्मेलनमा मातृभाषा संरक्षणका लागि पत्रकारिता, मातृभाषा पत्रकारिताको अभ्यास र प्रवृत्ति, सरकारी सञ्चार माध्यममा मातृभाषा पत्रकारिताको उपलब्धि, धर्मादित्य धर्माचार्यदेखि अहिलेसम्म मातृभाषा पत्रकारिता, बहुल समाज विकासमा मातृभाषा पत्रकारिताको भूमिका, मातृभाषा पत्रकारिता विकासमा संस्थागत भूमिका र मातृभाषा पत्रकारितामा बजार व्यवस्थाको विषयमा छलफल भएको थियो ।
सम्मेलनमा मल्ल के सुन्दर, गणेश राई र अजितमान तामाङ्गलाई सम्मान गरिएको थियो भने रेडियो नेपाल, गोरखापत्र, राष्ट्रिय समाचार समिति, नेपाल टेलिभिजन र प्रेस काउन्सिल नेपाललाई संस्थागतरुपमा सम्मान गरिएको थियो ।
कार्यक्रममा नेपाल, भारत र बंगलादेशका गरी पाँच जना वरिष्ठ सञ्चारकर्मीहरुलाई नेपालका प्रथम मातृभाषी पत्रकार धर्मादित्य मातृभाषा पत्रकारिता सम्मान प्रदान गरिएको थियो । यसअघि सन् २०२४ मा पहिलो अन्तर्राष्ट्रिय मातृभाषा पत्रकारिता सम्मेलन, सन् २०१८ र २०२२ मा राष्ट्रिय सम्मेलन गरेको थियो ।
दुईदिने सम्मेलनको शुक्रवार उद्घाटन गर्नुहुँदै प्रतिनिधि सभाका सभामुख देवराज घिमिरेले मातृभाषाको पत्रकारितामार्फत नेपालको संविधानले सुनिश्चित गरेको बहुल समाजभित्रको एकतालाई व्यवहारमा लागू गर्न सकिने बताउनुभयो । उहाँले सरकारी सञ्चारमाध्यममा भाषाभाषीका समाचार प्रकाशन र प्रशारण हुँदै आएको सन्दर्भ जोड्दै यसमा थप समृद्ध गर्नुपर्ने विचार राख्नुभयो ।
दुईदिने सम्मेलनले जारी गरेको सात बुँदें घोषणापत्र यसप्रकार रहेको छ ः
१. उहाँको उत्कृष्ट योगदानको कदर गर्दै, धर्मादित्य धर्माचार्यलाई नेपाल सरकारले विधिवत सम्मान र मान्यता दिनुपर्छ ।
२. राज्य समर्थन र नीतिगत प्रतिबद्धता नेपाल सरकार लगायत सार्क सरकारका प्रमुखहरूलाई मातृभाषामा काम गर्ने पत्रकारहरूको अधिकारको रक्षा गर्ने मिडिया नीतिहरू तर्जुमा र लागू गर्न र स्थानीय तथा आदिवासी भाषाहरूमा सञ्चालित मिडिया आउटलेटहरूको विकास र दिगोपनका लागि बढ्दो बजेट सहयोग विनियोजन गर्न आग्रह गरिएको छ ।
३. सरकारले आदिवासी तथा आदिवासी भाषाहरूमा पत्रकारितालाई सामाजिक न्याय र सांस्कृतिक संरक्षणको उपकरणको रूपमा मान्यता दिनुपर्छ र प्रवद्र्धन गर्नुपर्छ, यी समुदायहरूलाई आफ्नो आवाज उठाउन र सान्दर्भिक समाचार र जानकारीमा पहुँच गर्न प्लेटफर्महरू छन् भनी सुनिश्चित गर्नुपर्छ ।
४. मातृभाषामा काम गर्ने पत्रकारहरूका लागि नियमित प्रशिक्षण कार्यक्रम, कार्यशाला र फेलोशिपहरू आयोजना गर्न तत्काल कदम चाल्नुपर्छ ।
५. संयुक्त राष्ट्र संघ, युनेस्को, अन्तर्राष्ट्रिय गैरसरकारी संस्थाहरू र विकास साझेदारहरूलाई आफ्नो विकास एजेन्डा र कोष प्राथमिकताहरूमा मातृभाषा पत्रकारिता समावेश गर्न, प्राविधिक सहयोग, क्षमता निर्माण समर्थन, र तल्लो तहका मिडिया पहलहरूको लागि स्रोत परिचालन प्रदान गर्न आह्वान गरिएको छ ।
६. विश्वविद्यालयहरू, मिडिया संस्थाहरू र अनुसन्धान निकायहरूले यस क्षेत्रमा मातृभाषा पत्रकारिताको वर्तमान अवस्था, चुनौतीहरू र सम्भावनाहरूको बारेमा व्यापक अध्ययन गर्नुपर्छ र सरकारहरू र प्रविधि प्लेटफर्महरूले अनलाइन मातृभाषा पत्रकारितालाई प्रवद्र्धन गर्न डिजिटल उपकरणहरू, फन्टहरू र भाषा अनुवाद प्रशोधन प्रविधिहरूमा लगानी गर्नुपर्छ र स्थानीय मिडिया आउटलेटहरूलाई मातृभाषामा डिजिटल ढाँचामा संक्रमण गर्न सहयोग दिनुपर्छ ।
७. मातृभाषा पत्रकारिताको प्रवद्र्धनका लागि काम गर्ने राष्ट्रिय र क्षेत्रीय पत्रकार संघहरूलाई मान्यता दिइनुपर्छ र उनीहरूको पहुँच र वकालत विस्तार गर्न आर्थिक रूपमा सहयोग गरिनुपर्छ। निष्कर्ष हामी, सहभागीहरू, हाम्रो मातृभाषामा पत्रकारिता डिजिटल युगमा मात्र बाँच्दैन तर फस्टाउँछ भन्ने कुरा सुनिश्चित गर्न सहकार्य गरेर काम गर्ने हाम्रो संकल्प दोहोर्याउँछौं । हामी सबै सरोकारवालाहरूलाई यी शब्दहरूलाई कार्यमा रूपान्तरण गर्न आह्वान गर्छौं ताकि दक्षिण एसियाका विविध आवाजहरूले स्वतन्त्र र निर्भयतापूर्वक बोल्न, रिपोर्ट गर्न र प्रेरणा दिन जारी राख्न सकून् ।
भक्तपुर, जेठ ३१
भक्तपुरको मध्यपुर थिमि राधेराधे र कमेरोटार क्षेत्रबाट प्हरीले लागु र्आषधसहित ४ जनालाई पक्राउ गरेको छ । पक्राउ पर्नेहरुमा एक युवती र तीन युवक छन ।
प्रहरीले मध्यपुर थिमि–७ राधेराधे भाटभटेनी नजिकबाट लागुऔषध सहित खोटाङको रुपाकोट मझुवागढी नगरपालिका–१४ का २६ वर्षिय केवल राईलाई बिहिवार पक्राउ गरेको हो ।
प्रहरीले उनको साथबाट ट्रामाडोल हाइड्रोक्लोराइड क्याप्सुल आइपी ट्रामाडेक्स लेखेको लागुऔषध १४६ थान बरामद भएको जनाएको छ ।
यस्तै प्रहरीले मध्यपुर थिमि–५ कमेरोटार क्षेत्रबाट लागुऔषधसहित तीन जनालाई पक्राउ गरेको छ । पक्राउ पर्नेहरुमा मध्यपुर थिमि–६ कुण्डोल बस्ने २२ वर्षिय रिकेश थापा, सिन्धुपालचोक चौतारा साँगाचोकगढी–३ बस्ने ३२ वर्षिय तारा बहादुर भारती, काठमाण्डौं चन्द्रागिरी नगरपालिका–७ बस्ने २२ वर्षिया रेश्मा ठकुरी हुन ।
उनीहरुको साथबाट लागुऔषध खैरो हिरोईन लागेको स्टिलको थाल एक थान, खैरो हिरोईन जस्तो पदार्थको पोका थान ५ प्लास्टिक सहित तौल गर्दा ६४० मिलिग्राम, नेपाली नगद ५ हजार ७५० रुपैंयाका साथै अमेरिकी डलर, कुवेती डिनार, साउदी रियाल, मलेसियन रिङ्गेट, कतारी रियाललगायतका विदेशी मुद्रा पनि बरामद भएको जिल्ला प्रहरी परिसर भक्तपुरका सूचना अधिकारी प्रहरी नायव उपरीक्षक ढुण्डीराज नेउपानले बताउनुभयो ।
पक्राउ परेका चारै जनालाई भक्तपुर जिल्ला अदालतबाट लागुऔषध कसुरमा म्याद थप गरी अनुसन्धान भइरहेको प्रनाउ नेउपानले बताउनुभयो ।
भक्तपुर, जेठ ३०
जापानिज भाषा स्कुल संघ (जाल्सान), नेपालले आन्तरिक राजस्व कार्यालय नयाँ वानेश्वरसँगको सहकार्यमा शैक्षिक परामर्श व्यवसायीलाई बुधवार करदाता शिक्षा र लेखा व्यवस्थापन तालिन प्रदान गर्नुका साथै करका विषयमा अन्तरक्रिया गरेको छ ।
कार्यक्रममा प्रमुख कर अधिकृत गोविन्दराज आचार्यले परामर्श व्यवसायीले पालना गर्नुपर्ने कानुनी प्रावधानका बिषयमा जानकारी दिनुका साथै व्यवसाय मैत्री नीतिमार्फत अर्थतन्त्रमा स्वस्थ प्रतिस्पर्धा प्रवद्र्धन गर्न निजी क्षेत्रबाट सकारात्मक भूमिकाको खेल्नुपर्नेमा जोड दिनुभएको थियो ।
कर अधिकृत रमेश श्रेष्ठले करसम्बन्धी विविध विषयमा जानकारीमूलक प्रस्तुती सहित व्यवसायीहरुलाई नेपाल सरकारले हालै बजेटमार्फत ल्याएका करका बारेमा शिक्षा दिनुभएको थियो ।
त्यसैगरी कर एवं लेखा व्यवस्थापनका विषयमा सिए नवराज गौतमले प्रशिक्षण दिनुभएको थियो भने सहभागीहरुको जिज्ञासालाई कर अधिकृत वेद प्रसाद खनाल र प्रमुख कर अधिकृत गोविन्दराज आचार्यले सम्बोधन गर्नुभएको थियो ।
सो अवसरमा जाल्सानका अध्यक्ष रमेश देवकोटाले कर शिक्षा कार्यक्रम व्यवसायीका लागि निकै उपयोगी भएको प्रतिक्रिया दिदै आगामी दिनमा समेत सहकार्यको अपेक्षा गर्नुभयो ।
संस्थाका प्रथम उपाध्यक्ष एवं तालिम संयोजक महेश श्रेष्ठको संयोजनमा सम्पन्न कार्यक्रम जाल्सानका महासचिव अरुण पाण्डेले सञ्चालन गर्नुभएको थियो भने कर सम्बन्धि सन्देशमूलक भिडियो सामाग्री प्रशारण गरिएको थियो ।
भक्तपुर, जेठ २९
ललितपुरको नख्खुस्थित नेपाल मेडिसिटी अस्पतालमा पहिलो पटक कलेजोको सफल प्रत्यारोपण गरिएको छ । पोखरा निवासी ५६ वर्षिय ईश्वर बहादुर कार्कीको कलेजो प्रत्यारोपण गरिएको हो । उहाँलाई उहाँको २६ वर्षिय छोरा आयुष कार्कीले कलेजो दान गर्नुभएको हो । प्रत्यारोपण गत जेठ ८ गते भएको अस्पतालले बिहिवार आयोजना गरेको पत्रकार सम्मेलनमा जानकारी दिए ।
कलेजो प्रत्यारोपण संसारकै जटिल प्रत्यारोपण मध्ये एक पर्दछ भने प्रत्यारोपणको लागि ठूलो मल्टिडिसिप्लिनरी टोलीको आवश्यकता पर्दछ । प्रत्यारोपण गर्दा कलेजो दाता (डोनर)को झण्डै ९ घण्टा र कलेजो प्राप्तकर्ता (रिसिभर) को १३ घण्टा लागेको थियो ।
भारतको प्रसिद्ध परोपकारी अस्पताल अमृता अस्पतालसँग सहकार्य गरी नेपाल मेडिसिटीका चिकित्सकहरुको नेतृत्वमा सफलतापूर्वक प्रत्यारोपण गरिएको अस्पतालका अध्यक्ष डा. उपेन्द्र महत्तोले बताउनुभयो ।
पत्रकार सम्मेलनमा कलेजो दाता आयुष कार्कीले बुबालाई कलेजो दान गर्न पाउँदा आफु जन्मले सार्थकता पाएको बताउनुभयो । “मलाई मेरो जन्म भएको दिन थाहा थियो, तर आज म किन जन्मेको रहेछु भन्ने बारेमा पनि थाहा भयो,” उहाँले भन्नुभयो ।
उहाँले बुबाको उपचारका लागि दुई पटकसम्म भारत जाँदा पनि प्रत्यारोपण गर्न नसकिएको बताउनुभयो । “हामी उपचारका लागि दुई पटक भारत गएका थियौं, तर त्यहाँ डाक्टरको परामर्श चित्त बुझेन । बुबालाई जसरी पनि मिर्गौला र कलेजो प्रत्यारोपण गर्नैपर्छ भनेपछि हामी झन् आँतियौं र नेपाल नै फक्र्याैं,” आयुषले भन्नुभयो ।
नेपालमै विश्वस्तरीय सेवा दिने अस्पताल रहेको थाहा पाएपछि मेडिसिटी अस्पतालमा परामर्शको लागि पुगेको उहाँले बताउनुभयो । कलेजो प्रत्यारोपण गरेर मिर्गौला जोगाउन सकिन्छ भन्ने बुझेपछि यहीँ प्रत्यारोपण गर्ने निर्णय गरेको जानकारी दिँदैं उहाँले भन्नुभयो, “नेपालमै सम्भव हुने उपचारका लागि हामी भारत धाउनु प¥र्यो । यदिपहिले नै यहाँ परामर्श लिएको भएहाम्रो समय र पैसा दुबै खर्च हुने थिएन,”
मेडिसिटी अस्पतालमा कलेजो प्रत्यारोपण गरिएको यो पहिलो पटक हो । अस्पतालमा मल्टिडिसिप्लिनरी टिम भएका कारण जटिल शल्यक्रिया सम्भव भएको हो अस्पतालका अध्यक्ष डा. महत्तोले बताउनुभयो ।
नेपालमा हरेक वर्ष २०० देखि ३०० जनाको कलेजो प्रत्यारोपण गर्नुपर्ने आवश्यकता देखिन्छ । एम्बेसी अफ नेपाल, डिल्लीका अनुसार सन् २०२३ देखि २०२४ मा मात्र ७० जना भन्दा बढि नेपालीहरुले भारतमा गएर कलेजो प्रत्यारोपण गराएका छन् ।
“हामीले नेपालीहरु उपचारका लागि विदेश जान नपरुन् भन्ने उद्धेश्यले नै यो अस्पताल सञ्चालनमा ल्याएका हौं । त्यसैले यहाँका जनशक्तिलाई नै बलियो बनाई जस्तो सुकै जटिल स्वास्थ्य समस्यामा पनि सुलभ र गुणस्तरीय सेवा प्रदान गरिरहेका छौं,” उहाँले भन्नुभयो ।
ग्यास्ट्रोइन्टेरोलोजी, हेपाटोलोजी तथा इन्डोस्कोपी विभागका प्रमुख तथा वरिष्ठ कन्सल्ट्यान्ट प्रोफेसर डा. उमिद कुमार श्रेष्ठका अनुसार बिरामीको कलेजो तथा मिर्गौला दुबै बिग्रिसकेको थियो । निकै जटिल स्वास्थ्य अवस्थामा रहेका उनको सफल कलेजो प्रत्यारोपण गरिएको डा. श्रेष्ठले बताउनुभयो ।
“ईश्वर बहादुर कार्कीको पेटमा पानी जम्ने, बेला बेलामा होस हराएको जस्तो हुने, रगत वान्ता हुने तथा बेहोस हुने जस्ता समस्या थियो । उनको कलेजोसँगै मिर्गौलाले पनि काम गर्न छाडिसकेको थियो । यस क्रममा उनी नेपालका अन्य अस्पताल र भारतमा पनि दुई पटक प्रत्यारोपणका लागि गएका थिए । उनको जटिल अवस्थाका कारण कलेजो तथा मिर्गौला प्रत्यारोपण दुबै गर्नुपर्ने भएकोले जोखिम उठाउन चाहेनन्, तर नेपाल मेडिसिटीमा भने उनको कलेजोको सफल प्रत्यारोपण भएको छ,” डा. श्रेष्ठले भन्नुभयो ।
कलेजोकै कारण मिर्गौला खराब भएकाले हाल बिरामीको मिर्गौलामा पनि सुधार देखिएको उहाँले बताउनुभयो ।
बिरामीको शल्यक्रिया गर्नु अघि नै यसमा जोखिम रहेको र पहिले कलेजो प्रत्यारोपण गर्ने र कलेजोको कारण मिर्गौला बिग्रेको हो वा होइन जाँच गरेर मात्र मिर्गौला प्रत्यारोपण गर्ने जानकारी परिवारलाई गराएर मात्र बिरामीको कलेजो प्रत्यारोपढा गरिएको कलेजो प्रत्यारोपण सर्जन डा.रामबाबु साहले बताउनुभयो ।
“बिरामीले धेरै अस्पतालमा धाइसकेको तथा लामो समय बिति सकेका कारण चुनौतीलाई आत्मसाथ गरी यो प्रत्यारोपण गरेका हौं,” उहाँले भन्नुभयो ।
नेपाल मेडिसिटी अस्पतालले नेपाली जनताका लागि अन्तर्राष्ट्रिय स्तरको स्वास्थ्य सेवा सर्वसुलभ शूल्कमै उपलब्ध गराउन निरन्तर प्रयास गरिरहेको अस्पतालका अध्यक्ष डा. महत्तोले बताउनुभयो ।
मेडिसिटीमा कलेजोसँगैं विभिन्न अंगको प्रत्यारोपण हुँदै आइरहेको छ । अस्पतालमा हालसम्म ४५ जनाको सफलता पूर्वक मिर्गौला प्रत्यारोपण भईसकेको छ भने ५०० जनाभन्दा बढिको हिप तथा जोर्नी प्रत्यारोपण भइसकेको छ ।
भक्तपुर, जेठ २९
भक्तपुरको मध्यपुर थिमि नगरपालिका एलोपेथिक, आयुर्वेद र होमियोप्याथिक गरी तीन वटै स्वास्थ्य सेवा शुरु गर्ने देशकै पहिलो पालिका बनेको छ । मध्यपुर थिमिले बिहिवार वडा नं. ७ नगदेशमा होमियोप्याथिक स्वास्थ्य सेवा केन्द्र शुरु गरेसँगैं स्वास्थ्यका तीन वटै सेवा उपलब्ध गराउने पहिलो पालिका बनेको हो ।
मध्यपुर थिमिले नगरका ९ वटै वडामा स्वास्थ्य चौकी र शहरी स्वास्थ्य केन्द्र एवम् पालिका स्तरमा नेपाल कोरिया मैत्री नगरपालिका अस्पतालबाट विशेषज्ञ सेवा सहित एलोपेथिक र मध्यपुर आयुर्वेद औषधालयमार्फत आयुर्वेद स्वास्थ्य सेवा उपलब्ध गराउँदैं आएको छ ।
होमियोप्याथिक स्वास्थ्य सेवा केन्द्रमा हाल दुई जना डाक्टर, एक जना नर्स र एक जना कार्यालय सहयोगीले सेवा दिने नगरपालिकाका स्वास्थ्य शाखा प्रमुख श्रीकृष्ण प्रजापतिले जानकारी दिनुभयो । उहाँका अनुसार दुई जना डाक्टर मध्ये एक जनाले दिनको ४ घण्टाको दरले आलोपालो सेवा दिनेछ । केन्द्रले दिने सबै सेवा निःशुल्क हुने प्रजापतिले बताउनुभयो ।
केन्द्रमा बाथ, हाडजोर्नीको दुखाई, युरिक एसिड, नसा सम्बन्धी, प्यारालाईसिस, मृर्गौला र पित्तथैलीको पत्थरी, पाइल्स, फिस्टुला, ट्युमर, सिष्ट, दाद पोतो, दुवी, सेतो दुवी, मुसा, छाला चिलाउने, पिनास नाकमा मासु पलाएको, रुघाखोकी र टनसिलको उपचार हुनेछ ।
यसैगरी टाउको दुखाई, माइग्रेन, नाक कान घाँटी, ग्याष्ट्रिक, कब्जियत, अपच, पखाला, पेट सम्बन्धी, सेतो पानी बग्ने, महिनावारी सम्बन्धी, फाइब्रोइड, यौन रोग, सिष्ट महिला पुरुष सम्बन्धी विभिन्न रोग, पिसाब पोल्ने, पिसाब र प्रोष्टेट सम्बन्धी, दम, छाति दुःखेको, मनोरोग, तनाव, चिन्ता डिप्रेशन, मोटोपना, उच्च रक्तचाप, मधुमेहलगायतका रोगको उपचार हुने केन्द्रका डा. रामहरी श्रेष्ठले बताउनुभयो ।
मध्यपुर थिमि नगरपालिकाका प्रमुख सुरेन्द्र श्रेष्ठले नगरवासीलाई घरदैलोमा नै निःशुल्क स्वास्थ्य सेवा उपलब्ध गराउने नीति अनुरुप नगदेशमा होमियोप्याथिक स्वास्थ्य केन्द्र स्थापना गरी सेवा शुरु गरेको बताउनुभयो । उहाँले एलोपेथिक र आयुर्वेदसँगै होमियोप्याथिक सेवाको शुरुवातले स्वास्थ्यका तीन वटै सेवामा नगरबासीको सहज र सरल पहुँच पुग्ने विश्वास व्यक्त गर्नुभयो ।
उपप्रमुख विजयकृष्ण श्रेष्ठले वैकल्पिक स्वास्थ्य सेवाको रुपमा विकास भएको होमियोप्याथिक स्वास्थ्य सेवाले रोगको निदान गर्न र नगरवासीलाई स्वस्थ राख्न सहयाग पुग्ने बताउनुभयो ।
वडा नं. ७ का वडाअध्यक्ष कृष्णकुमार प्रजापतिले आर्थिक र सामाजिकरुपमा सक्षम नागरिक बन्न स्वास्थ्य स्वस्थ हुनुपर्ने भएकोले नगरपालिकाले स्वास्थ्य क्षेत्रलाई विशेष प्राथमिकतामा राखिएको बताउनुभयो ।
नगरपालिकाका सामाजिक विकास महाशाखा एवम् शिक्षा शाखा प्रमुख ज्ञानेन्द्र प्रसाद भट्टले सन् १७९६ मा जर्मनीबाट शुरु नेपालमा वि. सं. २०१० मा औपचारिक प्रवेश पाएको होमियोप्याथिक स्वास्थ्य सेवा थोरै मात्र औषधिको प्रयोगले रोगको राम्रो व्यवस्थापन र विना साईट इफेक्ट उपचार गर्न सकिने सेवा भएकोले नगरपालिकाले यसको शुरुवातमा जोड दिएको बताउनुभयो ।
भक्तपुर, जेठ २८
मध्यपुर थिमि नगरपालिकाका जनप्रतिनिधिहरुले तीन वर्षमा गरेका कार्य प्रगति बुधवार सार्वजनिक गरेको छ । मध्यपुर सञ्चार समाजले आयोजना गरेको ‘नगरप्रमुख र सञ्चारकर्मीबीचको सम्वाद’ कार्यक्रममा नगर प्रमुख सुरेन्द्र श्रेष्ठले उपप्रमुख विजयकृष्ण श्रेष्ठ, वडाअध्यक्षहरु, प्रमुख प्रशासकिय अधिकृत र नगरपालिकाको महाशाखा प्रमुखलाई साथै राखी १५ पृष्ठ लामो प्रगति विवरण सार्वजनिक गरेको हो ।
कार्यक्रममा नगर प्रमुख श्रेष्ठले तीन वर्षमा ऐन कानून, नियम, नियमावली, कार्यविधि र निर्देशिका ४९ वटा निर्माण गरेको जानकारी दिनुभयो । “हामी निर्वाचित भएर आउँदा नगरपालिकाको न्यून मात्र ऐन नियम, कानून थियो । यो तीन वर्षमा ४९ वटा ऐन नियम निर्माण गरी नगरपालिकालाई नीतिगत रुपमा कानून बमोजिम सञ्चालन गरेका छौं,” उहाँले भन्नुभयो ।
मध्यपुर थिमि नगरपालिकाले आन्तरिक आम्दानी एवम् राजश्व संकलनमा पनि उल्लेख्य बृद्धि गरेको छ । आर्थिक वर्ष २०७८÷०७९ मा १८ करोड ४५ लाख रुपैंया आन्तरिक आम्दानी तथा राजश्व संकलन रहेको नगरपालिकामा आ.व. २०७९÷०८० मा २४ करोड १९ लाख, आ.व. २०८०÷०८१ मा ३० करोड र चालु आ.व.को बैशाखसम्म २२ करोड संकलन भएको नगर प्रमुख श्रेष्ठले जानकारी दिनुभयो ।
उहाँले पुँजीगत खर्च आ.व. २०७९÷०८० मा ५३ दशमलव ९९ प्रतिशत , आ.व. २०८०÷०८१ मा ६३ दशमलव २५ प्रतिशत र आ.व. २०८१÷०८२ मा जेठ १५ गतेसम्म ३१ प्रतिशत रहेको बताउनुभयो ।
यसैगरी चालुखर्चतर्फ आ.व. २०७९÷८० मा ७४ दशमलव ५३ प्रतिशत, आ.व. २०८०÷८१ मा ७३ दशमलव ०८ प्रतिशत र चालु आ.व.को १० महिनामा ५१ दशमलव ७४ प्रतिशत रहेको छ ।
पूर्वाधार विकासतर्फ सडक कालोपत्रे तथा ढलान १५९५५.४ मिटर, ढुंगा तथा ब्लक छपाई ८०९८.४५ मिटर, बाटो खोल्ने, फराकिलो पार्ने, सिमांकन सहित ८५९८.३ मिटर, ग्राभेल ६०५५.२२ मिटर, ढल निकास ९२३८.४ मिटर गरिएको नगर प्रमुख श्रेष्ठले बताउनुभयो ।
उहाँका अनुसार तीन वर्षमा मध्यपुर थिमिमा सामूदायिक भवन, वडा कार्यालय भवन, ट्रस निर्माण २९ वटा, सार्वजनिक शौचालय ६, मन्दिर २६, ज्येष्ठ नागरिक गृह २, फल्चा, पाटी, सत्तल ३०, बहा बही, बिहार, गुम्बा ९, पार्क, उद्यान, बगैंचा, चौतारा २८, ऐतिहासिक दरवार पुनःनिर्माण ३, देवी देवताको खट ११, विद्यालय भवन निर्माण तथा मर्मत ४, पोखरी ५, मसान घाट, सुधारिएको शवदाह गृह ५, हिटी, इनार कुवा १३ वटा निर्माण भएका छन ।
यसैगरी मन्दिर रंगरोगन ३४३, नदी नियन्त्रण ३०० मिटर, पहिरो नियन्त्रण १४७ स्थानमा भएको छ । शिशु स्याहार केन्द्र, आपतकालिन आश्रयस्थल, सेन्ट्रल किचेन, ध्वखा (गेट) पनि निर्माण भएको छ ।
उहाँले मध्यपुर थिमिको धार्मिक क्षेत्रलाई समेटेर क्षयरोग अस्पताल देखि निलबाराही मन्दिरसम्म सम्पदा मार्गको रुपमा विकास गरेको जानकारी दिँदैं सम्पदा मार्ग अन्तर्गत सिद्दिकाली देखि (दुनेंग) क्षयरोग अस्पताल सम्म र बोदे महालक्ष्मी निलबाराहीको निर्माण कार्य भइरहेको बताउनुभयो ।
लोकल मास्टर प्लान अन्तर्गत नगर भित्रका ऐतिहासिक बस्ती क्षेत्रका घरहरुको स्वरुप परिवर्तन कार्य सुरु गर्न विज्ञहरुसंग छलफल गरि कार्य अगाडि बढाएको छ ।
मध्यपुर उज्यालो अभियानः अन्तर्गत मध्यपुर क्षेत्रभित्र पेटी रहेका सम्पूर्ण सडक र अरनिको राजमार्गसहित १६ किलोमिटर क्षेत्रमा स्मार्ट लाइट जडानका लागि नेपाल विद्युत प्राधिकरणसँग सम्झौता भई सो परियोजना अन्तर्गत सानोथिमिमा स्मार्ट लाइट जडान कार्य धमाधम भइरहेको नगर प्रमुख श्रेष्ठले बताउनुभयो ।
नीलबाराही क्षेत्र संरक्षणका लागि डिपिआर तयार गरी उक्त स्वीकृत डिपिआर अनुसारको निर्माणका लागि काठमाडौँ उपत्यका विकास प्राधिकरणसंग साझेदारीमा १ वटा र नगरपालिकाबाट १ गरी दुई वटा निर्माण कार्यको टेण्डर भई ठेक्का सम्झौता सम्पन्न भएको उहाँले बताउनुभयो ।
उहाँले परम्परागत माटोको भाँडा बनाउने पेशा संरक्षण गरी पर्यटकीय गन्तव्य निर्माणका लागि संग्रहालय स्थापना, नपा प्रशासकिय भवनको टेण्डर प्रक्रिया, वडा नं. २ को प्रशासकिय भवन निर्माण, मध्यपुर महोत्सव २०८१, इकोज इन द भ्याली संगीत महोत्सव, दिव्यश्वरी मन्दिर गुरुयोजना कार्यान्वयन, स्वंगा पुखु पुनःनिर्माण, नायगाचा क्षेत्रको सरसफाई, सौन्दर्यकरण र खुल्ला क्षेत्र बिस्तार प्रमुख उपलब्धी रहेको बताउनुभयो ।
उहाँले नगरका ९ वटै वडामा स्वास्थ्य सेवा बिस्तार, ६० वर्ष नाघेका र ७० वर्ष नपुगेका जेष्ठ नागरिक, एकल महिला, अपांगता भएका व्यक्ति र दलित परिवारको साथै महिला स्वास्थ्य स्वयम् सेविका, दर्ता सहयोगीसहित २७३३ परिवारको निःशुल्क स्वास्थ्य बिमा, निःशुल्क रगत वितरण १०८३ जना, घरदैलो स्वास्थ्य कार्यक्रम अन्तर्गत नेपाल कोरिया मैत्री नगरपालिका अस्पतालका विशेषज्ञ चिकित्सक सहितको स्वास्थ्य टोलीले महिनाको २ दिन प्रत्येक वडामा स्वास्थ्य शिविर सञ्चालनलाई स्वास्थ्य सेवाको उपलब्धीको रुपमा व्याख्या गर्नुभयो ।
नगर प्रमुख श्रेष्ठले स्ववासीको रुपमा रहेका नगरवासीलाई करिव २४०० वटा पुर्जा वितरण र २०५६ साल देखि नक्सा पास रोक्का रहेको बुढाथोकी, काँलाडोल, मनोहरा फाँट बोडे तथा २०७७ साल देखि पुनः रोक्का रहेका कोँला फाँट, विसंतकी, राधेराधे, कुण्डोल र गाँखु क्षेत्रमा एकिकृत जग्गा विकास योजना सञ्चालन गर्ने उद्देश्यले प्रारम्भिक सम्भाव्यता अध्ययन गराई सो अध्ययनको प्रतिवेदनको आधारमा जग्गा विकास आयोजना सञ्चालन सम्भव नभएका स्थानमा घरनक्सा फुकुवा गरी नियमित र अभिलेखिकरण गर्ने निर्णय गरी कार्यान्वयन ल्याएको जानकारी दिनुभयो ।
शिक्षामा कक्षा १ देखी १२ सम्मका करिव ३ हजार विद्यार्थीलाई आंशिक र पूर्ण छात्रवृत्ति, सामुदायिक विद्यालयमा ईसिडीलाई २ वर्षको बनाई थप १ जना गरी १५ जना शिक्षकको व्यवस्था, शिक्षक दरबन्दी मिलान तथा शिक्षक नपुगेको विद्यालयहरुमा नगरपालिकाको अनुदानमा ५ जना शिक्षक व्यवस्था, सामूदायिक विद्यालयहरुमा अतिरिक्त क्रियाकलापहरु खेलकुद, नृत्य, गित संगीत तथा कम्प्युटर शिक्षकको व्यवस्था गरेको छ ।
यस्तै सामूदायिक विद्यालयका विद्यार्थीहरुको दिवा खाजाका लागि केन्द्रीकृत भान्छा घर निर्माण गरी खाजामा एकरुपकता ल्याउनुका साथै स्वस्थकर एवम् पौष्टिक खाजा खुवाउने गरी भवन निर्माण कार्य सम्पन्न भएको र खाजा खुवाउनका लागि डब्लुएफपी र फुड फर लाइफ र नगरपालिका बीच सम्झौता भएको छ ।
कक्षा ६ सम्मका विद्यार्थीहरु लागि स्टेशनरी सामाग्री निःशुल्क वितरण, माध्यमिक विद्यालय स्तरीय विज्ञान, गणित प्रदर्शनीका साथै नृत्य, वक्तृत्वकला, चित्रकला लगायतका प्रतियोगिताहरु नियमित सञ्चालन गर्नुका साथै नगर प्रमुख श्रेष्ठले स्थानीय पाठ्यक्रम कक्षा ६ देखी ८ सम्म लागू भएको र कक्षा १ देखी ५ सम्मको पाठ्यक्रम तयारी अन्तिम चरणमा पुगेको जानकारी दिनुभयो ।
उहाँका अनुसार हरियाली प्रर्वद्धनका लागि विभिन्न स्थानमा वृक्षारोपण गरिएको, फोहर मैला संकलनका लागि २० जना सफाइकर्मी, १३ जना द्रुत सहयोगी ४ सवारी चालक, टिप्पर ठूलो २, हात्ति गाडी ३ वटा, जेट मेसिन १, व्याको लोडर २ वटा परिचालन, चार वटा नीजि क्षेत्र परिचालन गरी दैनिक रुपमा करिब ४५ टन फोहर संकलन तथा व्यवस्थापन र नीजि क्षेत्रसंग समन्वय गरी २००० वटा भान्छा(किचन) को फोहर श्रोतमै बर्गिकरण गरी संकलन गरिएको छ ।
उद्यम र उद्यमशिलता विकासका लागि ९० जनालाई विभिन्न सिपमूलक तालिम, बेरोजगारमा सूचिकृत २६७ जना मध्ये ९३ जनालाई एक सय दिन बराबरको रोजगारी, महिलाहरुलाई आत्मनिर्भर बनाउन, उद्यमशिलता विकास गरी स्वरोजगार बनाउन विभिन्न ९० वटा तालिम मार्फत १८४६ जनालाई विभिन्न किसिमका छोटो अवधीको आय आर्जन तथा सीप विकास तालिम र ईन्स्योर परियोजना मार्फत कार्यगत अभ्यासमा आधारित लामो अवधी (१६९६ घण्टाको ) व्यवसायिक तालिम २ वटा मार्फत १२० जनालाई तालिम प्रदान गरिएको छ ।
तीन वर्षमा कृषि उत्पादन बृद्धि गर्न माटो सुधारको लागि ५० प्रतिशत अनुदानमा ४३२ जनालाई कृषि चुन, ४३२ जनालाई कौशी खेती तालिम तथा सामाग्री वितरण गरिएको छ । हिउदे तथा बर्षे तरकारी वीउ मिनिकिट ४१७५ पकेटर कृषि व्यावसाय प्रवद्र्धन गर्न ५०% अनुदानमा प्लाष्टिक १२१ वटा र स्प्रेयर २३९ वटा वितरण गरिएको छ ।
यस्तै पशु उपचार ६६४५, सर्जिकल उपचार २३५, कृत्रिम गर्भाधान ३३२१, रेविज खोप २८०७, एफएमडी खोप ३९५० पशुलाई दिईएको छ ।
नगरभित्रको सार्वजकिन जग्गाहरुको संरक्षणका लागि प्रत्येक वडाको सार्वजनिक जग्गाको विवरण अद्यावधिक गरी हालसम्म विभिन्न १९ स्थानको सार्वजनिक, पर्ती र सरकारी जग्गा सिमांकन गरी संरक्षणको कार्य अघि बढाएको नगर प्रमुख श्रेष्ठले बताउनुभयो ।
उपप्रमुख विजयकृष्ण श्रेष्ठ नेतृत्वको न्यायीक समितिले समितिका दर्ता भएका १८६ निवेदन मध्ये ११६ वटा निवेदनको मेलमिलाप, सहमती र निर्णय भएको र तामेलीमा पठाएको निवेदन संख्या ३४ रहेको छ ।
नगरपालिकाले दिने सेवा सूविधाहरुका सूचना प्रवाह, पारदर्शी सुशासन र नागरिक सहभागिताका लागि नगरपालिकाको आधिकारिक वेवसाइट, फेसबुक, युट्युव सञ्चालन गरिएको जानकारी दिँदैं नगरपालिकाको गतिविधि जानकारी दिन रेडियो कार्यक्रम सञ्चालन गर्नुका साथै हाम्रो मध्यपुर थिमि बुलेटिन प्रकाशन गरिएको बताउनुभयो ।
नगरपालिकाले सञ्चालन गरेको नेपाल कोरिया मैत्री नगरपालिका अस्पतालमा, डायलासिस, एन्जियोग्राम सहितको सिटि स्क्यान शुरु गरिएको छ । ब्लड बैंक सञ्चालनको अन्तिम तयारीमा छ । ३ करोड ५० लाखको आकस्मिक कोष स्थापना, कोइकाको १ अर्ब ३० करोड बराबरको सहयोगमा १०० शैयाको अत्याधुनिक नयाँ भवन निर्माण भइरहेको छ ।
यस्तै अत्याधुनिक मोडुलर अपरेशन थिएटर (ओटी) सञ्चालन, अत्याधुनिक आइसियू र एचडियू सेवा बिस्तारको क्रम शुरु, आमा सुरक्षा कार्यक्रमसँगै नवजात शिशुको सघन उपचार कक्ष (एनआइसियू) सञ्चालन पनि तीन वर्षे उपलब्धी भएको नगर प्रमुख श्रेष्ठले बताउनुभयो ।
नगर प्रमुख श्रेष्ठले ९१ वटा सहकारी संस्थाहरु कोपोमिसमा आबद्ध गराइएको, वटा सहकारी संस्थालाई समस्याग्रस्त घोषणा गरी व्यवस्थापन अगाडि बढीरहेको जानकारी दिनुभयो ।
पर्यटन, कला, धर्म संस्कृति अन्तर्गत मध्यपुर थिमि क्षेत्रमा मनाईने विभिन्न ऐतिहासिक, साँस्कृतिक एवँ पौराणिक नाच, जात्रा, चाडपर्व, रितिरिवाज र संस्कृतिको संरक्षण र सम्वद्र्धन कार्यका लागि वार्षिक रुपमा बजेटको व्यवस्था गरिएको नेपाल भाषा लिपि (रञ्जना लिपि र प्रचलित लिपि) लेखन तालिम सञ्चालन गरिएको उहाँले बताउनुभयो ।
यसैगरी पर्यटन प्रवद्र्धनका लागि लायन्स क्लव, नेपाल सम्पदा संघ, प्याव्सन भक्तपुर, टुरिष्ट गाइड एशोसियसन.लगायतका संघ संस्थाहरुको सहकार्यमा सम्पदा पदयात्रा गराईएको छ ।
महिला हिंसा निवारण कोषको स्थापना गरिएको, किशोरीहरुका लागी जिवन उपयोगी सिप तालिम प्रदान गरिएको, बालमैत्री स्थानिय शासनयुक्त नगर घोषणाको तयारी शुरु गरिएको उहाँले बताउनुभयो ।
उहाँले नगरपालिकाले पर्यटन, संस्कृति र वातावरण क्षेत्रमा गरेको उल्लेख्य कार्यको मूल्यांकन गरी नेपाल नगरपालिका संघले मध्यपुर थिमिलाई देशकै उत्कृष्ट नगरपालिकाको रुपमा पुरस्कृत गर्नु, सूचना आयोगको १८ औ स्थापना दिवसको अवसरमा मध्यपुर थिमि नगरपालिकाका सूचना अधिकारी राष्ट्रपतिबाट उत्कृष्ट सूचना अधिकारीको रुपमा पुरस्कृत हुनु, स्थानीय तह संस्थागत क्षमता स्वमूल्यांकन (लिजा) र स्थानीय तह वित्तिय सुशासन जोखिम मूल्यांकन (एफएआर)मा मा मध्यपुर थिमि भक्तपुरको उत्कृष्ट हुनु, जनस्वास्थ्य कार्यालयको मूल्यांकनमा मध्यपुर थिमिको स्वास्थ्य सेवा उत्कृष्ट घोषित हुनु र आ.व. २०८०÷०८१ को महालेखा परीक्षकको कार्यालयको प्रतिवेदन अनुसार मध्यपुर थिमि नगरपालिका भक्तपुरमा सबैभन्दा कम बेरुजु भएको पालिका बन्न सफल हुनुलाई नगरपालिकाको पारदर्शी, जवाफदेहिता र सुशासनमा प्राप्त महत्वपूर्ण उपलब्धी रहेको नगर प्रमुख श्रेष्ठले बताउनुभयो ।
कार्यक्रममा नेपाल पत्रकार महासंघ भक्तपुर अध्यक्ष सुन्दर श्रेष्ठ, पत्रकारहरु रत्न श्रेष्ठ, पृथ्वीराम श्रेष्ठ, कृष्ण प्रजापति, कृष्ण किसी, विज्ञान श्रेष्ठ, हेमराज ढकाल, रत्नकाजी प्रजापति, प्रदिप ढकाललगायतले विभिन्न विषयमा जिज्ञासा राख्नुभएको थियो ।
पत्रकारहरुको जिज्ञासाको विषयमा नगर प्रमुख सुरेन्द्र श्रेष्ठ, उपप्रमुख विजयकृष्ण श्रेष्ठ, वडा नं. १ का वडाअध्यक्ष बाबुकाजी डंगोल, वडा नं. ६ का वडाअध्यक्ष ज्ञानदास प्रजापति, वडा नं. ८ का वडाअध्यक्ष रमेश थापा श्रेष्ठले स्पष्ट पार्नुभएको थियो ।
आयोजक समाजका अध्यक्ष चन्द्रकृष्ण श्रेष्ठको सभापतित्वमा सम्पन्न कार्यक्रममा जिल्लामा क्रियाशिल करिव ५० जना सञ्चारकर्मीहरुको सहभागिता रहेको थियो ।
भक्तपुर, जेठ २८
मध्यपुर थिमि–८, बोदेमा मंगलवार आयोजित स्थलगत सम्पदा चित्रकला प्रतियोगितामा ग्ल्याडस्टोन एकेडेमीका जेनिस बलम्पाकी प्रथम हुनुभएको छ । वडा नं. ८ कार्यालयले अमेजिङ्ग आर्ट एण्ड ट्रेनिङ्ग सेन्टरको सहकार्यमा आयोजना गरेको सो प्रतियोगितामा ईम्यानुयल ई. स्कुलका करिन राई दोस्रो हुनुभयो ।
मध्यपुर थिमि नगरपालिका ब्यापी विद्यालय स्तरीय उक्त प्रतियोगितामा सिद्धार्थ विद्यापीठका आरोही बल्ल तृतीय, क्रियटिभ लनर्स एकेडेमीका संजीव श्रेष्ठ चौथो र प्राईम एकेडेमीका उत्कर्ष पाँले सान्त्वना पुरस्कार जित्न सफल हुनुभयो ।
प्रतियोगिताका विजयी विद्यार्थीहरुलाई पुरस्कृत गर्दै मध्यपुर थिमि नगरपालिकाका प्रमुख सुरेन्द्र श्रेष्ठले शिल्ड, नगद, मेडल र प्रमाणपत्र तथा सहभागी छात्रछात्रारुलाई प्रशंसा पत्र वितरण गर्नुभयो ।
सो अवसरमा नगरप्रमुख श्रेष्ठले नगरपालिका शैक्षिक गुणस्तर बृद्धिका साथै विद्यार्थीहरुको प्रतिभा प्रस्फुटन एवम् व्यक्तित्व विकासका लागि काम गर्दै आइरहेको बताउनुभयो । सम्पदा, कला र संस्कृतिका बारेमा नयाँ पुस्तामा सचेतना फैलाउने कार्यमा प्रतियोगिता उपयोगी र उपलब्धिमुलक हुने विश्वास व्यक्त गर्नुभयो ।
वडाअध्यक्ष रमेश थापा श्रेष्ठले कला सम्पदाको संरक्षण तथा प्रचारप्रसारमा विद्यालय तहबाट नै अभियान चलाउनु पर्ने र चित्रकला त्यसमा शसक्त एवम् सकारात्मक माध्यम भएको धारण ब्यक्त गर्नुभयो ।
चित्रकला मार्फत बोदेको सम्पदाहरुहरु प्रचारप्रसार तथा छात्रछात्राहरु र अभिभावकहरुलाई कला सम्पदा संरक्षणमा सहभागी गराई जागरण ल्याउने उदेश्यले बोदेमा दोस्रो पटक सम्पदा चित्रकला प्रतियोगिता आयोजना गरिएको वडा नं. ८ का सचिव रञ्जन प्रजापतिले जानकारी दिनुभयो ।
प्रतियोगिताको प्रमुख निर्णायकमा बरिष्ठ चित्रकार बिष्णु पुकार श्रेष्ठ र सदस्यमा जुजुभाई बाँस श्रेष्ठ रहनुभएको थियो । प्रतियोगितामा मध्यपुर थिमि नगरका ३१ विद्यालयका १०९ जना छात्र छात्राहरुले बोदे क्षेत्र अन्तरगतका मुर्तअमुर्त सम्पदाहरुको चित्र स्थलगत रुपमा क्यााभासमा उतारेको थियो ।
भक्तपुर, जेठ २७
आर्थिक वर्ष २०८२÷०८३ का लागि शहरी विकास मन्त्रालयले मध्यपुर थिमि नगरपालिमा १९ करोड ४० लाख बजेट विनियोजन गरेको छ । मन्त्रालयले सार्वजनिक गरेको विनियोजित बजेटको विवरण अनुसार मध्यपुर थिमिका विभिन्न योजनामा सो बजेट विनियोजन भएको हो ।
मन्त्रालयले मध्यपुर थिमि वडा नं. ९ राधेराधेस्थित राधेराधे परिसर सडक कालोपत्रेसहित स्त्तोरन्नतीका लागि ३ करोड, सघन शहरी विकास कार्यक्रम अन्तर्गत मध्यपुर थिमिमा एकीकृत शहरी पुर्वाधार विकास कार्यक्रम लागू गर्न ४ करिड बजेट विनियोजन गरेको छ ।
मध्यपुर थिमिकै वडा नं. १ को अरुण चन्दको घरदेखी डिभिजन वन कार्यालय जाने सडक स्तरोन्नती गर्न ३ करोड, मध्यपुर थिमि–९ निलवाराही परिसर पहिरो नियन्त्रण, वृक्षारोपण तथा मन्दिर परिसर सौन्दर्यीकरण गर्न ३ करोड छुट्याइएको छ ।
मध्यपुर थिमी–८ स्थित श्री द्योमा जगत बृद्धाश्रमको भवन निर्माणका लागि ३ करोड, मध्यपुर थिमि–७ स्थित वादे चोक दुसिटोलसम्म सडक स्तरोन्नती २५ लाख, मध्यपुर थिमि–९ गौतम ईन्जिनियरिङ्ग देखि कुमार निरौलाको घरसम्मको बाटो स्तरोन्नतीका लागि २५ लाख रुपैंया विनियोजन गरेको छ ।
यसैगरी मध्यपुर थिमिका मुख्य सडक तथा शाखा सडकमा सडक बत्ती सहित स्तरोन्नति गर्न २५ लाख, वडा नंं को पावन चोकवाट पश्चिम जाने सडक स्तरउन्नती कार्यका लागि २५ लाख विनियोजन गरिएको छ ।
वडा नं ३, गठ्ठाघरमा नमुनाबस्ती चन्द्रबिनायक गणेश मन्दिर क्षेत्रमा सडक स्तरोन्नति कार्यका लागि २५ लाख, वडा न ७ स्थित बोडे चोकदेखि दुसि डोल सम्म सडक स्तरोन्नति कार्यका लागि ७० लाख, वडा न ३ र ४ को सिमानामा थिमि व्याङ्केटदेखि हनुमन्ते खोला सम्मको सडक( ढल बाटो) निर्माण तथा स्तरोन्नतिका लागि २५ लाख रुपैंया विनियोजन भएको छ ।
मध्यपुर युथ एशोशियसन खेल मैदान स्तरोन्नति एवं प्याराफिट निर्माणका लागि ७० लाख, वडा नं. ९ स्थित राजेन्द्र सिलवालको घर देखि माधव भट्टराईको घर हुँदै शंकर आचार्यको घरसम्मको बाटो स्तरोन्नतीका लागि २५ लाख रुपैंया विनियोजन भएको छ ।
शहरी विकास मन्त्रालयले मध्यपुर थिमिमा पहिलो पटक उल्लेख्यरुपमा योजनाहरुमा बजेट विनियोजन गरेर मध्यपुर थिमिको विकास निर्माणमा सहयोग गरेको भन्दै मध्यपुर थिमि नगरपालिकाले उपप्रधान तथा शहरी विकास मन्त्री प्रकाशमान सिंहलाई धन्यवाद दिनुभएको छ ।
यसैगरी शहरी विकास मन्त्रालयले मध्यपुर थिमिसहित जिल्लाका अन्य पालिकामा समेत खर्च गर्न सक्ने गरी संयुक्त योजनामा १३ करोड ३९ लाख रुपैंया बजेट विनियोजन गरेको छ ।
मन्त्रालयले प्रकाशित गरेको बजेट विवरण अनुसार शहरी सडक विस्तार कार्यक्रम अन्तर्गत भक्तपुर जिल्लाको विभिन्न भागमा स्थानीय निकायको सिफारिसमा सडक चौडा गर्ने, टेवा पर्खाल लगाउने, पर्खाल सार्ने तथा सडक स्तार्रोंनती गर्ने कार्यका लागि ३ करोड विनियोजन भएको छ ।
यस्तै भक्तपुर जिल्लाको विभिन्न क्षेत्रमा हरियाली सहितको अपाङ्गमैत्री फुटपाथ निर्माण, चोक सुधार, सम्पदा संरक्षण, मन्दिर निर्माण, सौन्दर्यकरण तथा सम्पदा क्षेत्रमा ढुंगा छाप्ने कार्य गर्न ३ करोड, भूकम्पीय सुरक्षा पूर्वाधार निर्माण सूर्यविनायक, चाँगुनारायण र मध्यपुर थिमि ३ करोड विनियोजन गरिएको छ ।
भक्तपुर जिल्लामा कायम रहेको निर्देशित जग्गा विकास कार्यक्रम (जिएलडी) को अत्यावधिक, तथा जि. आ. का भक्तपुरबाट जारी गरिएका योजना अनुमती सम्बन्धी विवरण अत्यावधिक गरि जिआइएस म्यापिङ गर्ने कार्यका लागि १३ लाख ५० हजार र भक्तपुर जिल्लाका विभिन्न सरकारी कार्यालयको मर्मत सुधार माग र आवश्यकता अनुसार खर्च गर्न एक करोड १६ लाख रुपैंया विनियोजन गरिएको छ ।
यसैगरी शहरी विकास मन्त्रालयले भक्तपुर जिल्लालाई १ अर्ब भन्दा बढीको बजेट विनियोजन गरेको छ । शहरी विकास मन्त्रालयले भक्तपुरका विभिन्न योजनालाई एक अर्ब ३० लाख बजेट विनियोजन गरेको हो ।
मन्त्रालयका अनुसार भक्तपुर क्षेत्र नं. २ मा ७३ करोड २५ लाख रुपैंया बराबरको विभिन्न योजना परेको छ भने बाँकी क्षेत्र नं. १ मा बजेट परेको छ । नेपाली कांग्रेसका जिल्ला सभापति समेत रहेका प्रतिनिधि सभा सदस्य दुर्लभ थापाको पहलमा यो बजेट परेको हो ।