Category: राजनीति

भक्तपुर, जेठ १९
भक्तपुरका पाँच राजनीतिक गठबन्धनले बुधवार प्रमुख जिल्ला अधिकारीमार्फत प्रधानमन्त्री के पी शर्मा ओलीलाई ज्ञापनपत्र बुझाएको छ । जिल्लामा क्रियाशिल नेपाली कांग्रेस, नेकपा माओवादी केन्द्र, नेकपा एमाले, जनता समाजवादी पार्टी नेपाल र राष्ट्रिय जनमोर्चाले संयुक्तरुपमा विभिन्न ११ वटा माग र कोभिडको माहामारी विरुद्ध सबै शक्ति एकताबद्ध भएर लड्नुपर्ने बेलामा सरकार असंवैधानिक कदम चाल्दै प्रतिगमनको बाटोमा हिँडेको आरोपसहित ज्ञापनपत्र बुझाएका हुन ।
ज्ञापनपत्रमा पाँच दलिय गठबन्धनले विभिन्न ११ वटा माग समेत अघि सारेको छ । ज्ञापनपत्रमा नेपाली जनतासँग गम्भिर आत्मा आलोचना गरी संविधान कुल्चिएर गरिएका सबै असंवैधानिक कदम खारेज गरी देशलाइ संवैधानिक बाटोमा हिडाउन, कोभिड नियन्त्रणमा प्रभावकारी कदम चाल्न, कोभिड विरुद्ध तत्काल निःशुल्क खोपको ब्यवस्था गर्न, कोभिडका कारण बिरामी भएका सबै नागरिकको निःशुल्क उपचारको ब्यवस्था मिलाउन तथा अस्पतालमा आवश्यक औषधी र उपकरणको ब्यवस्थापन गर्न, लकडाउनले अभावसँग जुधिरहेका नागरिकलाइ तत्काल राहत दिन, कोभिड विरुद्ध अग्रमोर्चामा रहेर लडेका स्वास्थ्यकर्मी र राष्ट्र सेवकको मनोबल उच्च राख्न शत प्रतिशत भत्ताको ब्यवस्था गर्न माग गरिएको छ ।
त्यस्तै लकडाउनका कारण आम विद्यार्थीको शैक्षिक सत्र बिग्रिएकाले वैकल्पिक ब्यवस्था गर्न, किसानहरुलाई सहजरुपमा आफ्नो उपज बजारमा लैजान सहजीकरण गर्दै खेतीपातीको यो समयमा मल, बिउ बिजनको सहज रुपमा सुपथ मुल्यमा उपलब्ध गराउन, लकडाउनका कारण समस्यामा परेका साना तथा मझौला व्यवसायीहरुलाई किस्ता तिर्ने समय थप गर्न र लकडाउन अवधिको ब्याज र हर्जना मिनाह गरी पुर्न कर्जाको ब्यवस्था गर्न, विकास आयोजनाहरुलाई सम्पन्न गर्न आवश्यक ब्यवस्था मिलाउन र कृतिम मूल्यबृद्धि नियन्त्रण गरी आपुर्तीको सहज वातावरण निर्माण गर्न माग गरिएको छ ।
‘कोभिडको माहामारीमा सबै शक्ति एकताबद्ध भएर त्यसका विरुद्ध राष्ट्रिय एकताका साथ लड्ने वातावरण निर्माण गर्नुपर्ने बेलामा तपाईंको सरकारले असंबैधानिक र अलोकतान्त्रिक तबरले जनताको जनप्रतिनीधि संस्था प्रतिनिधि सभाको विघटन गरेर प्रतिगमनको बाटो लिएको देखिन्छ,’ ज्ञापनपत्रमा उल्लेख छ ।

गठबन्धनले राष्ट्रपति समेत तटस्थ र संबैधानिक दायित्वबाट च्युत भएको ठहर गरेको छ । ‘मध्यरातमा सरकारले असंबैधानिक रुपमा गरेको प्रतिनिधि सभा विघटनको सिफारिसमा ल्याप्चे ठोकेर सम्माननिय राष्ट्रपति आफ्नो तटस्थ र संबैधानिक दायित्वबाट च्युत हुनु भएको हाम्रो ठहर रहेको छ,’ ज्ञापनपत्रमा उल्लेख छ ।
संविधानको धारा ७६ (४) को प्रावधानको कार्यान्यनको नगरी धारा ७६ (५) बमोजिमको सरकार निमार्ण गर्न अपिल गर्नु आफैमा एउटा गलत नजिर भएको र संविधानको धारा ७६ (५) बमोजिम प्रतिनिधि सभाका माननिय सांसद शेर बाहादुर देउवालाई प्रधानमन्त्री बनाउन १४९ जना माननिय सांसदको हस्ताक्षर सहित गरिएको दावीलाइ अस्विकार गरीनु संविधान, कानुन र लोकतान्त्रिक मुल्य मान्यताको ठाडो उलंघन भएको पाँच दलिय गठबन्धनले जनाएको छ ।
राष्ट्रपति कार्यालय र प्रधानमन्त्रीकै कार्यालयबाट नेपाली जनताको बलिदानीपुर्ण संघर्षबाट प्राप्त गरेको संघिय लोकतान्त्रिक गणतन्त्र खतरामा परेको र यस माथि निरन्तर प्रहार भइरहेको गठबन्धनले ज्ञापनपत्रमा आरोप लगाएको छ ।
कोभिड–१९ का कारण नेपाली जनताको जिवन संकटमा परेको उल्लेख गर्दै ज्ञापनपत्रमा लामो लकडाउनका कारण नेपाली जनता रोग र भोक दुबैबाट मर्न बाध्य हुने परिस्थिति बनेको उल्लेख गरिएको छ ।
ज्ञापनपत्रमा नेपाली कांग्रेसका उपसभापति हरिप्रसाद नेपाल, नेकपा माओवादी केन्द्रका अध्यक्ष डि पि ढकाल, नेकपा एमालेका अध्यक्ष रजन के.सी., जनता समाजवादी पार्टी नेपालका श्याम शिल्पकार र राष्ट्रिय जनमोर्चाका शिवहरी नेपालले हस्ताक्षर गर्नुभएको छ ।
ज्ञापनपत्र बुझ्दै प्रमुख जिल्ला अधिकारी प्रेम प्रसाद भट्टराईले पाँच दलको मागसहितको ज्ञापनपत्र नेपाल सरकार समक्ष पु¥याउने प्रतिवद्धता व्यक्त गर्नुभयो ।

भक्तपुर, जेठ १८
विवेकशील साझा पार्टीका नेता उज्वल थापाको निधन भएको छ । कोरोना संक्रमणबाट गम्भीर बिरामी परेर मेडिसिटी अस्पतालको भेन्टिलेटरमा उपचार गराइरहेका थापाको मंगलबार अपरान्ह ४ बजेर २५ मिनेट जाँदा निधन भएको हो ।
थापाको स्वास्थ्य अवस्था गम्भीर भएपछि ‘एक्स्ट्राकोपोरियल मेम्ब्रेन अक्सिजेनसन (एक्मो) प्रविधिबाट उपचार भइरहेको थियो । कोरोना संक्रमित भएका उहाँको रिपोर्ट नेगेटिभ देखाए पनि स्वास्थ्य अवस्था भने जटिल बनेको थियो ।
उपचारका लागि आर्थिक अभाव भएपछि गत जेठ १४ गते उहाँको उपचारका आर्थिक सहयोगको आव्हान गरिएको थियो । सो अनुसार शुभेच्छुकहरुले ५० लाख हाराहारी सहयोग जुटाएका थिए ।
थापा नेपालमा वैकल्पिक राजनीति शक्ति स्थापना गर्ने अभियानमा थिए । उहाँ विवेकशील नेपाली दलको संस्थापक अध्यक्ष तथा विवेकशील साझा पार्टीका पूर्व संयोजक हुन ।
नेपालमा युवा नेतृत्वसहितको वैकल्पिक दल स्थापना उद्देश्यले उहाँले २०६९ जेठ १५ गते विवेकशील नेपाली दलको स्थापना गर्नुभएको थियो ।

यस्ताे छ परिवारकाे विज्ञप्ति

हाम्रा छोरा, श्रीमान्, दाइ, भान्जा, मित्र, काका, ठूलो बुबा, नाति, मामा, हजूरबुबा, ज्वाइँ, भिनाजु, विवेकशील अभियान तथा विवेकशील नेपाली दलका संस्थापक, विवेकशील साझा पार्टीका पूर्व संयोजक, उद्यमी, सामाजिक उत्प्रेरक, हाम्रा प्रिय उज्वल बहादुर थापा, ४४, हामी सबैको अथक प्रयास, सहयोग र प्रार्थनाका बाबजुद (२०७८ साल जेठ १८ गते, अपराह्न ४:२५ बजे) हामीबीच रहनु भएन।

हामी उहाँप्रति हार्दिक श्रद्धाञ्जलि व्यक्त गर्दछौँ !

उहाँले प्रभाव पारेका जिन्दगीहरू र उनीहरूका सफलताहरू: नेपालको राजनीतिक प्रणालीको सुधार गर्न उहाँले गर्नुभएका हस्तक्षेपहरु: युवाहरूलाई राजनीतिको मूलधारमा समावेश गर्न उहाँको उत्प्रेरणा तथा सहयोग लामो समयसम्म सम्झिइनेछ र त्यसलाई इतिहासले सकारात्मक किसिमले मूल्याङ्कन गर्नेछ भन्ने हामीलाई लागेको छ ! उज्वल थापा व्यक्ति मात्र नभई, एउटा दर्शन र विचार पनि हो र सोहीमा उहाँ जीवन्त रहनु हुनेछ भन्ने हाम्रो अनुभूति हो। उहाँले देखेका सपना पूरा गरी हरेक नेपालीको मुहारमा खुसी ल्याउन हामी सबै दृढ संकल्पित छौँ !

उहाँको उपचारमा संलग्न सम्पूर्ण स्वास्थ्यकर्मीहरूप्रति हामी आभारी छौँ। यस्तो विषम परिस्थितिमा धैर्य धारण गरी संयमताका साथ उज्वलको लागि साथ, सहयोग दिनुहुने र अनवरत प्रार्थना गरिरहनु भएका उज्वलका आफन्तजन, नेपाल भित्र र बाहिरका साथी तथा शुभेच्छुक सबैप्रति हामी कृतज्ञ छौँ। तपाईंहरूले व्यक्त गर्नुभएका सद्भाव, सदिच्छा तथा प्रार्थनाको लागि हामी आभारी छौँ। नेपालका राष्ट्रपतिज्यू, नेपाल सरकार तथा विभिन्न राजनीतिक दलका तर्फबाट व्यक्त भएको सहयोग गर्ने इच्छा, सद्भाव र शुभेच्छाको लागि हामी कृतज्ञ छौँ।

अन्तिम पटक गरिएको कोरोना भाइरस परीक्षणमा नतिजा नेगेटिभ रहेको भए पनि अहिलेको संक्रामक रोगको समयमा उहाँको अन्तिम संस्कार एउटा साधारण पारिवारिक तवरले सम्पन्न गर्ने परिवारको इच्छा भएकोले सम्भव भएसम्म सहभागी नभइदिनुहुन हामी आग्रह गर्दछौँ।​

उज्वल बहादुर थापाको परिवार, साथी र शुभेच्छुकहरूको तर्फबाट,

२०७८ जेठ १८ गते

भक्तपुर ः जेठ १८
जनता समाजवादी पार्टी (जसपा) नेपालका अध्यक्ष महन्थ ठाकुरसहित चार नेतालाई पार्टीबाट निष्कासन गरेको छ । अर्का अध्यक्ष उपेन्द्र यादवको अध्यक्षतामा सोमवार बसेको कार्यकारिणी समितिको बैठकले अध्यक्ष ठाकुरसहित वरिष्ठ नेता राजेन्द्र महतो, नेताद्वय लक्ष्मण लाल कर्ण र सर्वेन्द्रनाथ शुक्ललाई पार्टी सदस्यबाटै निष्कासन गरेको हो ।
बैठकपछि पार्टी प्रचार विभाग प्रमुख डम्बर खतिवडाले जारी गरेको विज्ञप्तीमा दुई दुई पटक स्पष्टिकरण सोध्दा पनि ठाकुरसहितका नेताहरु पार्टीको सम्पर्कमा नै नआएको उल्लेख गरिएको छ ।
विज्ञप्तीमा प्रधानमन्त्री के पी शर्मा ओलीको सरकार गठनको प्रारम्भदेखी नै लोकतन्त्र, गणतन्त्र, संघियता, समावेशीता, धर्मनिरपेक्षतालगायतका संवैधानिक मूल्य मान्यताप्रति सकारात्मक नभएको र ठाकुरसहितका नेताहरुले ओली सरकारले मधेशका माग सम्बोधन गरेको भ्रम छर्दै संकटग्रष्ट ओली सरकारलाई काँध थाप्ने र प्रतिगमनको मतियार बन्ने कार्य गरेको आरोप लगाएको छ ।
यता ठाकुर पक्ष भने बबरमहलस्थित पुर्व राजपा पार्टी कार्यालयमा सरकारमा समावेश हुनेबारे छलफल भइरहेको बताईएको छ ।

भक्तपुर, जेठ १८
नेकपा एमालेको बालुवाटारमा सम्पन्न स्थायी समितिको मंगलवार बसेको बैठकले पार्टी एकता बचाउन अन्तिमसम्म प्रयास जारी राख्ने निर्णय गरेको छ । प्रधानमन्त्री एवम् पार्टी अध्यक्ष के पी शर्मा ओलीको अध्यक्षमा बसेको बैठकले पार्टीलाई एकतावद्ध बनाउन जारी छलफलबारे विवेचना गर्दै त्यसका लागि लचकता अपनाउने निर्णय गरेको पार्टी प्रवक्ता प्रदीपकुमार ज्ञवालीले जानकारी दिनुभयो ।
‘पार्टीको आन्तरिक एकताका लागि भइरहेका छलफलबारे विवेचना भयो, एकता बचाउन नेतृत्व तहबाट अन्तिम समयसम्म पनि प्रयास जारी राख्ने बारेमा छलफल भएको छ’, ज्ञवालीको भन्नुभयो ।
त्यस्तै बैठकमा प्रतिनिधि सभा विघटनपछिका राजनीतिक घटनाक्रम र सर्वोच्च अदालतमा विचाराधीन मुद्दा प्रभावित गर्नेगरी भइरहेका बहस, सरकारले अध्यादेश मार्फत प्रस्तुत बजेट र लुम्बिनी प्रदेशमा भएको राष्ट्रिय सभा उप निर्वाचनको बारेमा समिक्षा भएको ज्ञवालीले बताउनुभयो ।
बैठकमा स्पष्टिकरण सोधेका १२ जना नेतालाई कारवाहीबारे एजेण्डा पेश नभएको प्रवक्ता ज्ञवालीले बताउनुभयो । उहाँले एमाले एकता जोगाउन गठित कार्यदलको औचित्य समाप्त भएकाले अहिले अस्तित्वमा नरहेको जानकारी समेत दिनुभयो ।
नेकपा एमालेको आन्तरिक मतभेद हटाई पार्टीलाई एकतावद्ध बनाउने प्रयास स्वरुप सोमवार राती एमालेका दोस्रो तहका नेताहरु छलफलमा जुटेका थिए । दरवारमार्गको एक होटलमा सम्पन्न छलफल करिव ५ घण्टा चलेको बताईएको छ । सो छलफलमा प्रधानमन्त्री ओलीको तर्फबाट सुभाषचन्द्र नेम्वाङ, अर्थमन्त्री विष्णु पौडेल, पार्टी प्रवक्ता समेत रहनुभएका परराष्ट्रमन्त्री प्रदिप ज्ञवाली तथा माधव नेपाल पक्षबाट सुरेन्द्र पाण्डे, घनश्याम भुसाल, गोकर्ण बिष्ट र योगेश भट्टराई सहभागी भएका थिए । छलफल केही सकारात्मक भएकोले आजको स्थायी समिति बैठकले स्पष्टिकरण सोधिएका १२ जनालाई कारवाही गर्ने एजेण्डामा प्रवेश नगरेको बताईएको छ ।

भक्तपुर – राष्ट्रिय सभा रिक्त एक सदस्यका लागि भएको लुम्बिनी प्रदेशमा सोमवार सम्पन्न निर्वाचनमा विपक्षी गठबन्धनका तर्फबाट उम्मेदवार बन्नुभएका नेपाली कांग्रेसका दृगनारायण पाण्डे निर्वाचित हुनुभएको छ । पाण्डेले सत्तारुढ नेकपा एमालेका उम्मेदवार चन्द्रबहादुर खड्कालाई ५ सय २८ मत भार अन्तरले पराजित गरेको हो ।
पाण्डेले स्थानीय तहतर्फ २ हजार १ सय २४ र प्रदेशसभा तर्फ २ हजार १६ गरी कूल ४ हजार १ सय ४० मत भार प्राप्त गर्नुभयो । निकतम प्रतिद्धन्द्धी खड्काले स्थानीय तहतर्फ १ हजार ६ सय ९२ र प्रदेश सभातर्फ १ हजार ९ सय २० गरी कूल ३ हजार ६ सय १२ मत भार प्राप्त गर्नुभएको निर्वाचन कार्यालयले जनाएको छ ।
पाण्डेलाई स्थानीय तहका प्रमुख–उपप्रमुख १ सय १८ र प्रदेशसभा सदस्य ४२ जनाले मतदान गरेका थिए भने खड्कालाई स्थानीय तहका प्रमुख–उपप्रमुख ९४ र प्रदेश सभा सदस्य ४० जनाले मतदान गरेका थिए । प्रदेशसभा सदस्य र स्थानीय तह तर्फ एक–एक मत बदर भएको निर्वाचन आयोगले जनाएको छ । प्रदेश सभा सदस्यको एक मतको ४८ र स्थानीय तहका प्रमुख र उपप्रमुखको १८ मतभार गणना हुन्छ ।
पाण्डे हालै एमाले छाडेर कांग्रेस प्रवेश गरेका हुन् भने खड्का माओवादी छाडेर एमाले प्रवेश गरेका हुन । खड्का एमाले प्रवेश गरेकाले खाली भएको स्थानमा उपनिर्वाचन भएको हो ।
कांग्रेस उम्मेदवार पाण्डेलाई माओवादी केन्द्र, जसपा उपेन्द्र यादव समूह, राष्ट्रिय जनमोर्चा र एमाले माधव नेपाल समूहको समर्थन रहेको थियो । खड्कालाई जसपाका महन्थ ठाकुर–राजेन्द्र महतो पक्षले भोट दिएका थिए ।
तीन सय मतदाता रहेकोमा प्रदेशतर्फ ८३ र स्थानीय तहतर्फ २१३ गरी २९६ मत खसेको थियो । दाङको घोराहीस्थित कर्मचारी मिलन केन्द्रमा बिहान ९ बजे दिउँसो ३ बजेसम्म मतदान भएको थियो ।

राष्ट्रियसभाको एक रिक्त सदस्यको लागि आज लुम्बिनी प्रदेशमा उपनिर्वाचन हुँदैछ । उपनिर्वाचनको लागि प्रदेश राजधानी दाङको घोराहीस्थित कर्मचारी मिलन केन्द्रमा मतदान स्थल तोकिएको छ ।
उपनिर्वाचनमा दुई जनाको उम्मेदवारी परेको छ । नेपाली कांग्रेस, नेकपा माओवादी केन्द्र, जनता समाजवादी पार्टी (जसपा) नेपाल र राष्ट्रिय जनमोर्चाको विपक्षी गठबन्धनका तर्फबाट दृगनारायण पाण्डे र नेकपा एमालेका तर्फबाट चन्द्रबहादुर खड्का चुनावी मैदानमा छन ।
खड्का यसअघि माओवादी केन्द्रबाट राष्ट्रिय सभा सदस्यमा निर्वाचित भएका थिए । पार्टी विभाजनसँगै खड्का एमाले प्रवेश गरेपछि माओवादी केन्द्रले उहाँलाई कारवाही  गरी पद मुक्त गराएका थिए । सोही पदका लागि उपनिर्वाचन हुन  लागेको हो । एमालेले खड्कालाई पुनः उम्मेदवार बनाएको छ ।
कांग्रेसका पाण्डे २०७४ को निर्वाचन अघि एमाले प्रवेश गरेर प्रदेशसभामा उम्मेदवार बनेका थिए । पाण्डे प्रदेशसभा सदस्यबाट राजिनामा दिएर पुनः कांग्रेस प्रवेश गरेका हुन ।
मतदान स्थलमा तीन वटा केन्द्र तयार गरिएको मुख्य निर्वाचन अधिकृत रीतेन्द्र थापाले जानकारी दिनुभयो । निर्वाचनमा मतदान गर्ने मतदाताहरुले अनिवार्य पिसिआर परीक्षण रिपोर्ट ल्याउनुपर्ने आयोगले जनाएको छ । कोभिड पोजेटिभका लागि छुट्टै मतदानस्थल बनाइएको छ । बिहान ९ बजेदेखि दिउँसो ३ बजेसम्म मतदान समय तोकिएको थापाले बताउनुभयो ।
निर्वाचनमा कुल मतदाता ३ सय छन् । जसमा प्रदेश सांसदको संख्या ८३ छ भने स्थानीय तहका प्रमुख–उपप्रमुख र अध्यक्ष–उपाध्यक्ष गरी २१७ मतदाता रहेका छन् । उपनिर्वाचनमा मतदाता नामावलीमा नाम नभएका चार जना मन्त्रीले पनि मत दिन पाउने भएपछि प्रदेशसभा सदस्यको संख्या ८३ पुगेको हो ।
यसअघि प्रकाशित मतदाता नामावलीमा जसपाका चार सांसदको नाम थिएन । जसपाले कारवाही गरी सांसद पद खारेज गरेका कल्पना पाण्डेय, सन्तोषकुमार पाण्डेय, सुमन शर्मा रायमाझी र विजयबहादुर यादवलाई सर्वोच्च अदालतले पुनर्बहाली गरेपछि निर्वाचन आयोगले पुरक मतदाताको रुपमा मताधिकार दिएको हो ।

भक्तपुर – राष्ट्रिय सभामा रिक्त एक सदस्यका लागि लुम्बिनी प्रदेशमा आज (सोमवार) हुने उपनिर्वाचनको अघिल्लो दिन नेपाली कांग्रेस, नेकपा माओवादी केन्द्र, जनता समाजवादी पार्टी (जसपा) नेपाल, राष्ट्रिय जनमोर्चाले विरोध जनाएको छ ।
जसपाले प्रदेश सांसदबाट हटाएका लुम्बिनी प्रदेशका ४ सदस्यले निर्वाचनको पुर्वसन्ध्यामा मतदान गर्न पाउने व्यवस्था गरेपछि गठबन्धन दलले विरोध जनाएका हुन । मतदान शुरू हुनु भन्दा करिब १६ घण्टाअघि मतदाता थप्नु निर्वाचन आचार संहिता र निर्वाचन प्रणालीको आम मान्यता विपरीत भएको उनीहरूको भनाइ छ ।
विपक्षी गठबन्धनले प्रेस विज्ञप्ति जारी गर्दै यस कदमले सम्पूर्ण संवैधानिक अंगमाथिको विश्वसनीयतामै समेत प्रश्नचिह्न खडा भएको उल्लेख गरेका छन्। त्यस्तै निर्वाचन आयोग जस्तो संवैधानिक अंग केपी ओली एमालेको विभागमा परिणत भएको प्रमाणित गरेको आरोप समेत लगाएका छन । यसले राष्ट्रिय सभाको उपनिर्वाचन मात्र नभइ सबै निर्वाचन निष्पक्ष नहुने संकेत गरेको उनीहरुको भनाई छ ।
यस कदमको घोर विरोध गर्दै निष्पक्ष निर्वाचनका लागि आइतबार निर्वाचन आयोगको निर्णय र आदेशको कार्यान्वयन नगर्न र नगराउन समेत लुम्बिनी प्रदेशका नेपाली कांग्रेस सांसद एवं संसदीय दलका नेता वीरेन्द्र कनौडिया, सांसद एवं माओवादी केन्द्रका संसदीय दलका नेता कुल प्रसाद केसी, सांसद जनता समाजवादी पार्टी एवं संसदीय दलका प्रमुख सचेतक पूर्मती डङ्गा मगर र राष्ट्रिय जनमोर्चाका सांसद तारा जिसीले जोडदार आह्वान गरेका छन् ।
जसपाले आफ्ना ४ सदस्यलाई कारवाही गरी दलबाट निस्कासन गरेको पत्र लुम्बिनी प्रदेशसभा सचिवालयमा दर्ता गरेको थियो । सो अनुसार उनीहरुको सदस्यता खोरज भएको निर्वाचन आयोगले निर्णय गरी उपनिर्वाचनमा ७९ जना प्रदेशसभा सदस्यले मात्र मतदान गर्ने भनेर नामावली निकालेको थियो । तर आयोगले आइतबार मात्रै हाल मन्त्री समेत रहेका ४ जना जनालाई पुरक मतदाताको अधिकार दिएपछि पछिल्लो विवाद देखिएको हो ।
जिल्ला निर्वाचन कार्यालय दाङका सूचना अधिकारी गेहेन्द्र कुँवरका अनुसार निर्वाचन आयोगको पछिल्लो निर्णयअनुसार थप ४ जना मन्त्रीलाई पनि पुरक मतदाताको अधिकार दिइएको हो ।
योसहित अब लुम्बिनी प्रदेश सभामा कुल ८३ जना प्रदेशसभा सदस्यले मताधिकार पाएका छन् । आयोगको पछिल्लो निर्णय संगै आइतबार दिउँसो सम्म मताधिकारबाट वञ्चित रहेका मन्त्री समेत रहेका जसपा सांसदहरू कल्पना पाण्डेय, सन्तोषकुमार पाण्डेय ,सुमन शर्मा रायमाझी र विजय बहादुर यादवले पनि मताधिकार पाएका हुन् ।

१२ पुस, जनकपुरधाम । नेपाली कांग्रेसका सभापति शेरबहादुर देउवाले संघीयतालाई बचाउन कांग्रेसभित्र एकता अपरिहार्य भएको बताएका छन् ।

स्थानीय नेता बलराम नायकको १३ औं पुण्यतिथिमा धनुषाको सबैलामा शनिबार आयोजित श्रद्धाञ्जली सभालाई सम्बोधन गर्दै देउवाले सरकार संघीयतालाई बर्बाद गर्ने उन्मुख रहेको बताए । ‘संघीयतालाई बचाउन कांग्रेसका सबै शक्तिलाई एकजुट हुनु आवश्यक छ । पार्टीभित्र एकताको विकल्प छैन ।’