Category: राजनीति

भक्तपुर, जेठ २१

नेपाली कांग्रेसले भोली शनिवार बिहान भक्तपुरका चार नगरपालिकाका ३८ वटै वडामा दिप प्रज्वलन गर्नेभएको छ । नेपाली कांग्रेस भक्तपुर क्षेत्र नं. १ र २ का सभापतिहरुको निर्देशनमा बिहान ७ बजे जिल्लाका ३८ वटै वडाका मन्दिरहरुमा दिप प्रज्वलन र पुजा अर्चना गर्न लागेको हो ।
कोरोना भाइरसको महामारीले आक्रान्त पारेको बेला कांग्रेसले संmक्रमितको स्वास्थ्यलाभ र मृतकको आत्माको चीर शान्तिको कामना गर्दै दिप प्रज्वलन गर्न लागेको क्षेत्र नं. का सभापति जीवन खत्रीले बताउनुभयो ।
वडाका स्थानीय पायक पर्ने मन्दिरमा स्थानीय जनप्रतिनिधि, पार्टी कमिटी र भातृ संगठनका पदाधिकारीहरुको उपस्थितीमा सामाजिक दुरी कायम गरी स्वास्थ्य सुरक्षा अपनाई कार्यक्रम गर्न निर्देशन दिईएको क्षेत्र नं. २ का सभापति नारायण खायमलीले बताउनुभयो ।

भक्तपुर, जेठ २१

प्रधानमन्त्री के पी शर्मा ओलीले शुक्रवार साँझ मन्त्रिपरिषद पुनर्गठन गर्नुभएको छ । प्रधानमन्त्री ओलीले जनता समाजवादी पार्टी (जसपा)को महन्थ ठाकुर पक्षका १० सहित १३ नयाँ अनुहारलाई समावेश गर्दै मन्त्रिपरिषद पुनर्गठन गर्नुभएको हो । नवनियुक्त मन्त्रीहरुले आजै राष्ट्रपति भवन शितल निवासमा शपथ ग्रहण भएको छ ।
प्रधानमन्त्री ओलीले मन्त्रिपरिषद पुनर्गठन गर्नेक्रममा मौजुदा मन्त्रिपरिषदका उपप्रधानमन्त्रीसहित ९ मन्त्री र ३ राज्यमन्त्रीलाई बिदा गर्नुभएको छ । पुरानो मन्त्रिपरिषदका अर्थमन्त्री विष्णु पौडेल, भौतिक पूर्वाधारमन्त्री वसन्त नेम्वाङ, शिक्षामन्त्री कृष्णगोपाल श्रेष्ठ र कानूनमन्त्री लीलानाथ श्रेष्ठलाई मात्र निरन्तरता दिईएको छ ।
नयाँ मन्त्रिपरिषदमा तीन उपप्रधानमन्त्री छन् । प्रधानमन्त्री ओलीले अर्थमन्त्री विष्णु पौडेललाई उपप्रधानमन्त्रीमा बढुवा गर्नुभएको छ । त्यस्तै नेकपा एमालेका रघुवीर महासेठ उपप्रधानसहित परराष्ट्र र जसपाका वरिष्ठ नेता राजेन्द्र महतोलाई पनि उपप्रधानमन्त्री सहित शहरी विकास मन्त्रालयको जिम्मेवारी दिइएको छ ।
नयाँ मन्त्रिपरिषदमा जसपाबाट उपप्रधानमन्त्री महतोसहित ८ मन्त्री र दुई राज्यमन्त्री छन् । शरदसिंह भण्डारीले उर्जा, जलस्रोत तथा सिचाई, अनिलकुमार झाले खानेपानी, लक्ष्मणलाल कर्णले भूमि व्यवस्था, सहकारी तथा गरिबी निवारण, विमल श्रीवास्तवले श्रम, रोजगार तथा सामाजिक सुरक्षा र उमाशंकर अरगरियाले वन तथा वातावरण मन्त्रालयको जिम्मेवारी पाएको छ ।
त्यस्तै चन्दा चौधरी महिला, बालबालिका तथा जेष्ठ नागरिक, एकवाल मिया युवा तथा खेलकुद मन्त्री बन्नुभएको छ । जसपाकै चन्द्रकान्त चौधरी उर्जा र रेनुका गुरुङ महिला बालबालिका राज्यमन्त्री नियुक्त हुनुभएको छ । सत्तारुढ एमालेबाट शेरबहादुर तामाङ स्वास्थ्य तथा जनसंख्या मन्त्री नियुक्त भएका छन् ।
मन्त्रिपरिषदबाट एमाले महासचिव ईश्वर पोखरेल, परराष्ट्रमन्त्री प्रदीप ज्ञवाली, स्वास्थ्य तथा जनसंख्यामन्त्री हृदयेश त्रिपाठी, संस्कृति पर्यटन तथा नागरिकमन्त्री भानुभक्त ढकाल, कृषि तथा पशुपक्षी विकासमन्त्री पद्माकुमारी अर्याल, सञ्चारमन्त्री र्पावत गुरुङ र भूमि व्यवस्था, सहकारी तथा गरिबी निवारणमन्त्री डा. शिवमाया तुम्बाहाम्फे बिदा हुनुभएको छ । यस्तै संघीय मामिला तथा सामान्य प्रशासनमन्त्री गणेश गठुन्ना, वन तथा वातावरणमन्त्री प्रेमबहादुर आले, महिला बालबालिका तथा ज्येष्ठ नागरिकमन्त्री जुलीकुमारी महतो, स्वास्थ्य राज्यमन्त्री नवराज राउत, सहरी विकास राज्यमन्त्री रामवीर मानन्धर र उद्योग राज्यमन्त्री विमला विकलाई पनि सरकारबाट बिदा गरिएको छ ।
प्रधानमन्त्र िओलीले सात मन्त्रालयको जिम्मेवारी आफैंसँग राख्नुभएको छ । प्रधानमन्त्री ओलीले रक्षा, गृह, सञ्चार, पर्यटन, कृषि, उद्योग वाणिज्य र सामान्य प्रशासन मन्त्रालय आफैंसँग राख्नुभएको छ ।
सरकारमा रहेका केही वरिष्ठ नेताहरुलाई पार्टीमा सक्रिय बनाउन सरकारबाट बिदा गरिएको बुझिएको छ । त्यस्तै पुर्वमाओवादी पृष्ठभुमिका केही नेता र एमाले भित्र पनि माधव–झलनाथ समूह छाडेर आउने नेतालाई मन्त्री बनाउन सात मन्त्रालयले ओली आफैंले राखेको स्रोतले बताएको छ ।

तस्विर, सेतोपाटीबाट साभार

भक्तपुर, जेठ २१

नेता राजेन्द्र महतोको नेतृत्वमा जनता समाजवादी पार्टी (जसपा) (नेपाल) सरकारमा जाने भएको छ । जसपा १० मन्त्रीसहित सरकारमा सहभागी हुन लागेको जसमध्ये ८ मन्त्री र २ राज्यमन्त्री छन । महतोले उपप्रधानमन्त्रीसहित शहरी विकास मन्त्रालय सम्हाल्ने छ ।
त्यस्तै शरत सिंह भण्डारी उर्जा तथा जलस्रोत, अनिल झा खानेपानी तथा सरसफाई, बिमल श्रीवास्तव श्रम तथा रोजगार, उमाशंकर अरगरिया युवा तथा खेलकुद, लक्ष्मण लाल कर्ण भूमि व्यवस्था तथा सहकारी, चन्दा चौधरी महिला तथा बालबालिका मन्त्री बन्ने भएका छन ।
त्यसैगरी एकवाल मियाँ वन तथा वातावरण, चन्द्रकान्त चौधरी राज्य मन्त्री उर्जा र रेणुका गुरुङ राज्यमन्त्री महिला तथा बालबालिका बन्ने भएको छ । प्रधानमन्त्री केपी शर्मा ओलीले राष्ट्रपति कार्यालयमा साँझ ६ बजे पद तथा गोपनीयताको सपथ ग्रहण गराउने तयारी गरेको छ । दिउँसो जसपा नेताहरूसँगको छलफलपछि प्रधानमन्त्री ओलीले मन्त्रिपरिषद् विस्तार गर्न लाग्नुभएको हो ।

भक्तपुर, जेठ २१

प्रधानन्यायाधीश चोलेन्द्रशमशेर जबराले आज सर्वोच्च अदालतको पूर्ण बैठक (फूल कोर्ट) बोलाउनुभएको छ । संसद विघटन सम्बन्धी रिटको सुनुवाईमा संवैधानिक अदालतका न्यायधीशहरुमाथि प्रश्न उठेपछि प्रधानन्यायाधीश राणाले सर्वोच्चको पूर्ण बैठक बोलाउनुभएको हो ।
बैठकमा संवैधानिक इजलास गठनलगायतका विषयमा देखिएको समस्या समाधान, इजलास गठन सम्बन्धी नियमावली संशोधन र सर्वोच्चको सेवा बिस्तारलगायतका विषयमा छलफल गर्न ‘फुल कोर्ट’को बैठक बोलाइएको जनाइएको छ ।
संसद विघटनसम्बन्धी मुद्दा हेर्न गठित संवैधानिक इजलासका न्यायाधीशका सम्बन्धमा विवाद उठेपछि प्रधानन्यायाधीश राणाले इजलास नै विघटन गर्दै नियमावली संशोधन गरेर वरिष्ठताका आधारमा इजलास पुनर्गठन गर्ने बताउनुभएको थियो ।
प्रधानन्यायाधीश राणा र सर्वोच्च अदालतको बार एशोसियसनका पदाधिकारीहरूसँग भएको छलफलमा नियमावली संशोधन गरेर वरिष्ठताको आधारमा इजलास गठन गर्ने व्यवस्था गर्ने सहमति भएको सार्वजनिक थियो ।

भक्तपुर, जेठ २०

मध्यपुर थिमि नगरपालिकाको नगर कार्यपालिकाको ५२ बैठक सोमवार दिउँसो १ बजे नगरपालिका परिसरमा बस्ने भएको छ । कार्यपालिकाका १९ सदस्य मध्ये उपप्रमुख अञ्जनादेवी मधिकर्मीको नेतृत्वमा १५ सदस्यले शुक्रवार बैठक राख्न माग गर्दै निवेदन दिने तयारी गरेको समाचार सार्वजनिक भए लगत्तै नगरप्रमुख मदनसुन्दर श्रेष्ठले सोमवारका लागि बैठक डाक्नु भएको हो ।
नगरपालिकाका प्रमुख प्रशासकिय अधिकृत चुरामणि पन्थीले पठाएको पत्रमा नगरसभाको तयारी र कोभिड–१९ को व्यवस्थापन सम्बन्धमा छलफल गर्न बैठक राखिएको उल्लेख छ ।
यसअघि उपप्रमुखसहितको टोलीले कोरोनाको पिसिआर परीक्षण निःशुल्क गर्न र कोरोना विरुद्धको खोप नगरपालिकाले खरिद गरी वा दातृ निकायसँग पहल गरी अनुदानमा ल्याएर नगरबासीलाई निःशुल्क उपलब्ध गराउने विषयमा छलफलका लागि कार्यपालिकाको बैठक माग गर्न शुक्रवार निवेदन दिने तयारी गरेको समाचार ईन्यूज डटकममा प्रकाशन भएको थियो ।

स्थानीय सरकार सञ्चालन ऐन २०७४ र नियमावली २०७५ मा कार्यपालिका बैठक महिनामा एक पटक बस्नुपर्ने व्यवस्था भएपनि मध्यपुर थिमिमा लामो समयदेखी नगर कार्यपालिका बैठक बस्न सकेको छैन ।

भक्तपुर, जेठ २०, लक्ष्मी गारु

मध्यपुर थिमि नगरपालिकाका उपप्रमुख र ६ जना वडाअध्यक्षसहित कार्यपालिकाका १९ मध्ये १५ सदस्यले कार्यपालिकाको बैठक माग गर्ने भएको छ। नगरपालिकामा नेपाली कांग्रेसको तर्फबाट निर्वाचित कार्यपालिका सदस्यहरुले शुक्रवार दुईं बुँदें एजेण्डासहित बैठक माग गरी नगरप्रमुख मदनसुन्दर श्रेष्ठ समक्ष निवेदन पेश गर्ने भएको हो।
त्यसको लागि आज उपप्रमुख अञ्जनादेवी मधिकर्मीको नेतृत्वमा कांग्रेसबाट निर्वाचित कार्यपालिकाको बैठक बसेको स्रोतले जानकारी दिएको छ। स्रोतको अनुसार नगरपालिकामा कार्यपालिका बैठक बस्न नसकेको लामो समय भइसकेको छ। स्थानीय सरकार सञ्चालन ऐन २०७४ र नियमावली २०७५ मा कार्यपालिका बैठक महिनामा एक पटक बस्नुपर्ने व्यवस्था छ।
स्रोतका अनुसार उपप्रमुखसहितको टोलीले कोरोनाको पिसिआर परीक्षण निःशुल्क गर्न र कोरोना विरुद्धको खोप नगरपालिकाले खरिद गरी वा दातृ निकायसँग पहल गरी अनुदानमा ल्याएर नगरबासीलाई निःशुल्क उपलब्ध गराउने विषयमा छलफलका लागि कार्यपालिकाको बैठक माग गर्न लागिएको हो।
त्यसैगरी आगामी आर्थिक वर्ष २०७८÷०७९ को नीति तथा कार्यक्रम र बजेट तर्जुमा गर्नुपर्ने बेला आएको तर नगरप्रमुखले बैठक राख्ने कुनै चासो नदिएकाले पनि नगरप्रमुखलाई दवाब दिने उद्देश्यले उपप्रमुखसहितको टोलीले बैठक राख्न माग गर्न लागिएको बुझिएको छ।
बैठक माग गर्ने तयारी गरेका कार्यपालिका सदस्यहरुमा उपप्रमुख अञ्जनादेवी मधिकर्मी, वडा नं. १ का वडाअध्यक्ष सुरज खड्का, २ का वडाअध्यक्ष राम थापामगर, ३ का वडाअध्यक्ष प्रेमबहादुर कुटु, ४ का वडाअध्यक्ष कुमार श्रेष्ठ, ६ का वडाअध्यक्ष ईन्द्रबहादुर प्रजापति, ९ का वडाअध्यक्ष रामकाजी चक्रधर, चन्द्रवती मिझार, बिलबहादुर विश्वकर्मा, विष्णु परियार, विनु केसी, अरुणा कारञ्जित, सुजाता बाडे, रमिता जिमा (साँया) श्रेष्ठ र मिरा खड्का छन।

भक्तपुर, जेठ २०

एमाले नेता गोकर्ण विष्टले पार्टीको सम्पूर्ण एकता नै आफ्नो विश्वास र अडान भएको बताउनुभएको छ । उहाँले बिहिवार सामाजिक सञ्जाल फेसबुकमार्फत पार्टी र जनसंगठनका सबै तहका कमिटीहरूलाई २०७५ जेठ २ गतेको पूर्ववत् अवस्थामा फर्काएर राष्ट्र, जनता, लोकतन्त्र र कम्युनिस्ट आन्दोलनका पक्षमा निरन्तर लागिरहने बताउनुभएको हो ।
‘पार्टी र जनसंगठनका सबै तहका कमिटीहरूलाई २०७५ जेठ २ गतेको पूर्ववत् अवस्थामा फर्काएर राष्ट्र, जनता, लोकतन्त्र र कम्युनिस्ट आन्दोलनको हितमा सही विचार र कार्यदिशा सहितको सबल एवं एकीकृत कम्युनिस्ट पार्टी निर्माण गर्ने हाम्रो चाहना हो’, विष्टले भन्नुभयो, ‘ हामी यसमा निरन्तर प्रयत्नशील छौँ । अन्तिमसम्म लागिरहनेछौँ । पार्टीको सम्पूर्ण एकता नै हाम्रो विश्वास हो । हाम्रो अडान हो ।’

विष्टले नेकपा एमालेको एकता जोगाउन भैरहेको प्रयासलाई कमजोर पार्ने दुराशयले आफ्नो नाम समेत जोडेर केही सञ्चार माध्यमहरुमा भ्रमपूर्ण समाचार प्रकाशित गर्दै एकताका लागि गरिएका इमान्दारपूर्ण प्रयासहरूलाई कमजोर पार्न कसले, किन र कसका लागि झुठा प्रचार गराउँदैछन् ? भन्दै प्रश्न समेत गर्नुभएको छ ।
विष्टसहित सुरेन्द्र पाण्डे, घनश्याम भुषाल र योगेश भट्टराई ओली समुहका नेताहरुसँग निरन्तर संवादमा छन् । विष्ट ओलीतर्फ नै लाग्न सक्ने संकेत गरेका खबर आएका थिए । यसबारे प्रष्टाउन विष्टले बिहीबार फेसवुकमा आफ्ना धारणा राख्नुभएको हो ।

यस्तो छ बिष्टको भनाई

नेकपा एमालेको एकता जोगाउन भैरहेको प्रयासलाई कमजोर पार्ने दुराशयले मेरो नाम समेत जोडेर केही सञ्चार माध्यमहरूमा भ्रमपूर्ण समाचार प्रकाशित गरिएका छन् ।

एकताका लागि गरिएका इमान्दारपूर्ण प्रयासहरूलाई कमजोर पार्न कसले, किन र कसका लागि यस्ता झुठा प्रचार गराउँदै छन् ? समयले नै बताउला ।

पार्टी र जनसंगठनका सबै तहका कमिटीहरूलाई २०७५ जेठ २ गतेको पूर्ववत अवस्थामा फर्काएर राष्ट्र, जनता, लोकतन्त्र र कम्युनिस्ट आन्दोलनको हितमा सही विचार र कार्यदिशा सहितको सबल एवं एकीकृत कम्युनिस्ट पार्टी निर्माण गर्ने हाम्रो चाहना हो ।

रामकृष्ण अधिकारी

जेठ २ मा पार्टी फर्काउन तयार ओलीको नेपाल पक्षका नेतासँग एउटै शर्त छ-अदालतमा वुझाएको हस्ताक्षर फिर्ता लिनुपर्ने 

काठमाडौं । झण्डै २७ वर्ष आफैले हाँकेको पार्टी एमालेसँगको साइनो सम्वन्ध तोडदै छुट्टिन ‘तम्तयार’ देखिएका झलनाथ खनाल र माधव नेपाल समुहभित्रै प्रधानमन्त्री केपी ओलीले विभाजन प्रयास थालेका छन् । पार्टी स्थायी कमिटिबाट नेपाल, खनाल सहित ११ विघटित संसदका सांसदलाई निश्कासन गरेका ओलीले नेपाल समुहका प्रभावशाली चार नेतालाई मूल घरमै अल्झाउने अस्त्र फ्याँकेका छन् ।

नेपाल समुहमा रहेका चार नेता सुरेन्द्र पाण्डे, घनश्याम भुषाल, योगेश भट्टराई र गोकर्ण विष्टको मनोविज्ञान वुझेरै ओलीले नेपालसमुहभित्र खेल्न थालेका हुन् । चार नेतालाई नेपाल समुहबाट अलग्याउन सके अन्य युवा पुस्ताका नेता-कार्यकर्तालाई पनि नेपाल समुहबाट छुट्टयाउन सकिने वुझाईमा ओली छन् ।

त्यसका लागि नेपाल समुहका एक-एक नेतालाई बालुवाटार बोलाएर प्रधानमन्त्री ओलीले सघन छलफल जारी राखेका छन् । सुरेन्द्र पाण्डे, घनश्याम भुषाल लगायतका थप १२ नेतालाई २४ घण्टे स्पष्टीकरण सोधेका ओलीले हप्तादिन पुग्दा पनि कारवाही प्रक्रिया अगाडी नबढाई नेपाल समुह फोर्ने रणनीति अगाडी बढाएका हुन् ।
तीन दिन अगाडी मात्रै ओलीले नेपाल समुहका नेता भीम् आचार्यलाई बालुवाटार बोलाएर झण्डै चार घण्टा कुरा गरेर फर्काए । सुवास नेम्वाङ, विष्णु पौडेल र प्रदीप ज्ञवालीलाई परिचालन गरेर नेपाल पक्षका नेताहरु पाण्डे, भुषाल, भट्टराई र विष्टलाई ‘इन्गेज’ गराईराखे ।

एमालेभित्रै स्पेस खोजिरहेका भुषाल वाहेकका नेतासँग त ओली पक्षका नेताहरुले भित्रीरुपमा अनेकौ पटक वार्ता गरेका थिए । भुषालसहित पनि दुई पटक ओली पक्षका नेताले सम्वाद गरेर पार्टीभित्रको एकता जोगाउने , नेपाल र खनाललाई कमजोर बनाउने रणनीति अवलम्वन गरिरहेका छन् ।

ओलीले नेपाल पक्षका चार नेता सामु २०७६ जेठ २ मा पार्टी फर्काउन र त्यसका लागि नीतिगत बक्तब्य दिन आफु तयार रहेको प्रष्टाईसकेका छन् । तर त्यसका लागि उनले नेपाल पक्षका नेतासँग शर्त राखेका छन्,-सर्वाेच्च अदालतमा शेरवहादुर देउवाको पक्षमा लागेर गरेको हस्ताक्षर फिर्ता लिनुपर्ने र विगत गतिविधिप्रति आत्मआलोचित हुनुपर्ने ।’ ‘योगेशहरु यसका लागि तयार भईसक्नुभएको छ,’ ओली पक्षका एक स्थायी समिति सदस्यले मेरोन्यूज सँगको कुराकानीका क्रममा भने,–‘यसको परिणाम अव छिट्टै देखिन्छ ।’

संसद पूर्नस्थापना र देउवालाई प्रधानमन्त्री बनाउन माग गदै सर्वाेच्चमा हस्ताक्षर बुझाउन योगेश गएका थिएनन । त्यसमा गोकर्ण विष्टको पनि हस्ताक्षर छैन । घनश्याम र सुरेन्द्रको मात्र त्यहाँ हस्ताक्षर छ । ‘सुरेन्द्रले वारेसनामामार्फत गराउनुभएको हो, उहाँ फिर्ता लिन तयार हुनुहुन्छ, घनश्यामसग भने अझै यसमा छलफल जारी छ,’ ओली निकटका ति नेताले भने ।

नेपाल समुहका यी प्रभावशाली चार नेतालाई अलग्याउन सके उनीहरुसँग निकट रहेका गणेश पहाडी, दीपकप्रकाश भट्ट, नारायण खतिवडा लगायतका नेताहरु पनि नेपाललाई छोडेर एमालेमै रहने आकलन ओली पक्षले गरेको छ । यो समुहमा यज्ञराज सुनुवार स्पष्ट भई नसकेपनि उनी पनि आउन सक्ने सम्भावना ओली पक्षले गरेको छ ।

यस्तो अवस्थामा नेपाल समुहमा अमृत बोहोरा, मुकुन्द न्यौपाने, रघुजी पन्त, वेदुराम भुषाल लगायतका नेताहरु मात्र देखिने छन् । भीम रावल, युवराज ज्ञवाली, अष्टलक्ष्मी शाक्यपनि नेपाल समुहमा हुनेछन् । पार्टी विभाजित हुँदा नेपाल समुहलाई यसरी विभाजन गर्न सकिए फिल्डमै अलिक पकड भएका रावल वाहेक अन्य नेताहरु नरहेको निश्कर्ष सहित ओली समुह नेपाल समुह विभाजित गर्ने कसरथमा जुटेको हो ।

युवा पुस्तामा राजेन्द्र राई र जगन्नाथ खतिवडा मात्र नेपाललाई साथ दिन कम्मर कसेका देखिन्छन् । ठकुर गैरे एकताका लागि नै पहल गरिरहेका छन । रामकुमारी झाँकी पनि योगेश, घनश्यामहरु एमालेभित्रै मिल्न प्रयास गरेपछि अहिले वीचवीचमा देखिन खोजेकी छिन् । कतिपय नेतालाई ओली आफैले बालुवाटार बोलाएर छलफल गरिरहेका छन् । भीम आचार्य, विरोध खतिवडालगायतसँग ओली आफैले छलफल गरिरहेको बालुवाटार स्रोतको भनाई छ ।

ओलीले कथंकदाचित अदालतबाट संसद पूर्नस्थापना भयो भनेपनि निर्वाचित सांसद आफनो पक्षमा पार्ने र समानुपातिक लाई फेर्ने गरी योजना बनाएको देखिन्छ । त्यसो गर्दा फेरि पनि सरकार गठनको कोसिस हुँदा आफ्नै पल्लाभारी बनाउने गरी ओली अगाडी बढेका देखिन्छन् ।

अहिले नेपाल समुहमा रहेका जिल्ला तहका करिव ६० देखि ७० प्रतिशत नेताहरु पार्टी फोडेरै भएपनि ओलीलाई ‘सवक’ सिकाउनु पर्ने बताईरहेका छन् । तर विभाजनकै घडीमा पुग्दा र ओलीले नेपाल समुहभित्रका योगेश, सुरेन्द्रहरुलाई मिलाउँदा त्यो समिकरणमा फेरवदल गर्नेगरी खेल्न सकिनेमा ओली समुह देखिएको छ । सोही कारण पनि नेपाल समुह पार्टीभित्रै टास्सिएर अव धेरै नखेलिरहुन् भन्ने ओलीले ठानेको देखिन्छ ।

उनी माधव नेपालले पार्टी फोड्ने नै भएपनि छिटो फोडिदिएर जाउन भन्ने पक्षमा उभिईसकेका छन् । त्यहीकारण पनि उनले एक सार्वजनिक कार्यक्रममै माधव नेपालसँगको सम्वन्ध अव ‘पास्ट टेन्स’ भईसकेको बताएका थिए । अव नेपाल, झलनाथ खनाल र भीम रावल एमालेमा नरहने सम्मको निश्कर्षमा ओली पुगिसकेका छन् । त्यसो हुँदा ओलीले नेपालले पार्टी फोडेमा त्यही समयमा एमाले २०७५ जेष्ठ २ मा पुगेको सन्देश दिने गरेर वक्तब्य दिने तयारी सम्म गरेका छन् ।

खासगरी नेपाललाई ‘घर न घाट’को बनाउने योजना ओलीको देखिन्छ । ओलीले आफु निकट नेताहरुसँग भन्ने गरेका पनि छन्,– एमाले छोड्दा सिपि मैनालीको जुन हाल अहिले भएको छ, माधव नेपालको हालत पनि हुने त्यही हो । माधव नेपाल हुने सिपि मैनाली नै हो ।’

नेपाल समुहले अडान लिईरहेकै जेष्ठ २ मा पार्टी फर्किएको नीतिगत वक्तब्य दिन, साविक एमालेको स्थायी कमिटि बैठक बोलाउन ओली तयार भईसकेका छन् ।

‘साविक कमिटि ब्यूँताउने विषयमा ओली धेरै नजिक पुगेका छन् । तल्लो कमिटिमा उनले सिनियरलाई माथील्लो पदमा र जुनियरलाई तल्लो पदमा राखेर जाने भन्ने कुरा बोलिरहेका छन्,’ एकता प्रयासमा लागेका नेपाल समुहमा रहेका एक नेता भन्छन्,–‘कमिटि ब्यूताएपनि जस्ताको तस्तै ब्यूताउने या अलिक सिनयिरलाई मुख्य जिम्मेवारी दिएर थोरै तलमाथी गर्ने भन्ने मात्र नमिलेको हो, सायद अव छलफलका क्रममा त्यो विषय पनि फिनिसिङ भईसकेको होला ।’

यदि नेपाल समुहका दोस्रो तहका यी नेताहरुले ओलीसग सहमति जनाए भने नेपाल समुह विभाजित हुनेछ । विभाजित हुदा झण्डै ५०/५० प्रतिशतकै रुपमा नेपाल समुहमा विभाजन आउन सक्ने नेपाल समुहकै एक नेता बताउँछन् । नेता नेपाल भने अहिले जेठ २ मा फर्किने भने पनि ओलीले चालवाजी मात्र गरेकोले अव नयाँ क्रान्तिकारी पार्टी निर्माण गरेरै जानुपर्नै निश्कर्षमा पुगिसकेका देखिन्छन् । यसले एमालेमा पनि नेपाल समुहभित्र विभाजनको रेखा कोरिने सम्भावना वढेर गएको देखिन्छ ।

ओलीसँग सहमति भएमा नेपाल पक्ष छोडेर आउन चाहने योगेश, सुरेन्द्रहरुले आफु पक्षका नेता–कार्यकर्ताको राष्ट्रिय भेला जस्तो गरेर पार्टी जेठ २ मै फर्काउदासम्म नेपाल र खनालले नमानेको आरोप लगाएर ओलीमा समाहित हुने गरी भित्री योजना बनाएको वुझिएको छ ।

नेपाल पक्षका दोस्रो तहका नेताहरुसँग सघन छलफल बढाएको ओली पक्षले अझै स्थायी समितिको बैठक रोकेर नेपाल पक्षका नेतासँग थप छलफल गर्न चाहिरहेको छ । वुधबार साँझ बोलाईएको स्थायी समिति अव विहिवार साँझलाई सारिएको छ । ‘नेपाल पक्षका साथीहरुसँग अझै छलफल जारी छ, निश्कर्ष निस्कन केही ढिलाढाली भएकोले स्थायी समिति एक दिन पछि सार्ने निर्णय भएको हो,’ ओली पक्षका नेताहरु बताउँछन् ।

नेपाल समुह फोर्ने योजनामा ओली कति सफल हुन्छन् ? त्यो आज-भोलिमै छिनोफानो लाग्ने देखिएको छ ।

साभारः मेरो न्यूज डटकम

 

भक्तपुर, जेठ १९

नेपाली कांग्रेसका सभापति शेरबहादुर देउवाले सरकारले बजेटमा व्यापार घाटा कम गर्ने नाममा चुरेभावर क्षेत्रको नदिजन्य वस्तु निकासी गर्ने योजना ल्याएर तराई मधेशलाई मरुभुमि बनाउने गम्भिर षडयन्त्र गरेको आरोप लगाउनुभएको छ । सभापति देउवाले बुधवार विज्ञप्ती जारी गर्दै चुरे दोहन गरेर, पानीको स्रोत सुकाएर ब्यापार घाटा न्यून गर्ने नारा खरानीको ब्यापार गर्न घर जलाए जस्तै हुने चेतावनी समेत दिनुभएको छ ।
विगतमा चुरे क्षेत्रबाट ढुंगागिटी, बालुवा उत्खनन गरिंदा त्यसले पानीका स्रोतहरु सुक्न थालेको, भूक्षय बढेको र समग्रमा पर्यावरणलाई गम्भीर असर परेको अध्ययन विश्लेषण गरिएको उल्लेख गर्दै सभापति देउवाले विज्ञप्तीमा विगतका गल्ती सच्याएर अघि बढ्न निश्चित गरिएको नीतिलाई विस्थापित गरेर पुनः दोहनलाई प्रोत्साहन सामान्य गल्ती होइन, प्रकृतिविरुद्ध अपराध र देशको तराई–मधेस क्षेत्रलाई भविष्यमा मरुभूमीकरण गर्ने गम्भीर षड्यन्त्र भएको उल्लेख गर्नुभएको छ ।
देउवाले ढुंगागिटी, बालुवा निकासी गर्नेगरी सरकारले हचुवाका भरमा बजेटमा नीतिगत भ्रष्टाचार गरेको आरोप लगाउँदै राष्ट्रका लागि दुरगामी घातको कार्यक्रम फिर्ता लिन सरकारलाई चेतावनी समेत दिनुभएको छ । ‘ढुंगा, गिटी, बालुवा उत्खनन र निकासीमा रोक लगाएको निति र निर्णयलाई विस्थापित गर्दै ‘ब्यापार घाटा न्यूनीकरण गर्न’ भन्ने नारा दिएर ढुंगा, गिटी, बालुवा निकासीको कार्यक्रम ल्याउनु ‘खरानीको ब्यापार गर्न घर जलाए जस्तो’ मात्रै हो,’ देउवाले विज्ञप्तीमा भन्नुभएको छ, ‘निश्चयनै देशले बर्सौंदेखि ब्यापार घाटा ब्यहोरिरहेको छ, तर त्यसलाई न्यून गर्न या सन्तुलनमा ल्याउन तराई–मधेस र समग्र देशलाई नै दीर्घकालीन असर पर्ने कदम चाल्नु किमार्थ स्वीकार्य हुन सक्दैन र त्यो नै उचित विकल्प होइन ।’
अनेक जनविरोधी कार्य गर्दै आएको वर्तमान सरकारले संसद विघटनको असंवैधानिक कदम चालेको समयमा बजेट वक्तव्य मार्फत चुरे दोहनलाई मार्ग प्रशस्त गर्न लिएको नितिलाई नेपाली कांग्रेसले गम्भीर रूपमा लिएको देउवाले विज्ञप्तीमा उल्लेख गर्नुभएको छ ।
नेपाली कांग्रेसका तत्कालीन सभापति सुशील कोइरालाको नेतृत्वमा रहेकोे सरकारले ‘राष्ट्रपति चुरे–तराई मधेस संरक्षण विकास समिति’ गठन गरेर चुरे क्षेत्रको दोहन रोक्न र चुरे संरक्षण गर्न विकास समिति मार्फत विभिन्न मापदण्ड निर्धारण गरेको स्मरण समेत देउवाले गराउनुभएको छ ।

भक्तपुर, जेठ १९
नेपाली कांग्रेसका केन्द्रिय सदस्य तथा युवा नेता प्रदीप पौडेलले हालै सरकारले बजेटमार्फत सार्वजनिक गरेको ढुंगा, गिट्टी, बालुवा निकासी गरेर व्यापार घाटा कम गर्ने नीतिको चर्को विरोध गर्नुभएको छ ।
सामाजिक सञ्जालमार्फत बुधबार आफ्नो धारणा सार्वजनिक गर्दै पौडेलले लोकतन्त्र र नैतिकता बेचिसकेको सरकारले प्रकृति बेच्न तम्सिएको बताउनुभएको हो । ‘लोकतन्त्र, मुल्य मान्यता, नैतिकता सबै बेचीसकेको सरकारले अब बेच्न बाँकी प्रकृति थियो । सरकार त्यो पनि बेच्न तम्सिरहेको छ,’ पौडेलले भन्नुभयो ।
सरकारले चुरे संरक्षणका लागि विभिन्न नीति तथा कार्यक्रम तर्जुमा गरेको तथ्य प्रस्तुत गर्दै उहाँले भन्नुभएको छ, ‘चुरे क्षेत्रको संरक्षण गर्न र प्राकृतिक जोखिम न्यूनीकरण गर्न नेपाल सरकारले २०६६÷०६७ देखि पहिलो प्राथमिकतामा राखी राष्ट्रपति चुरे संरक्षण कार्यक्रम लागू गरिसकेको छ । त्यस्तै विकास समिति ऐन, २०१३ अन्तर्गत रहेर राष्ट्रपति चुरे–तराई मधेश संरक्षण विकास समिति (२०७१) गठन गरी वातावरण संरक्षण ऐन २०५३, बमोजिम नेपालको ३६ जिल्लाको चुरे अन्तर्गतको भू–भागलाई वातावरण संरक्षण क्षेत्र घोषणा पनि गरेको छ । चुरे संरक्षण क्षेत्रमा विकास निर्माण गर्दा अवलम्बन गर्नुपर्ने कार्यविधि तथा मापदण्ड, २०७७ भनेर नियामावली नै बनिसकेको छ ।’
‘यतिका धेरै कडाई गर्दा पनि अझै प्राकृतिक दोहन रोकिएको छैन । अव्यवस्थित बसोबास, अतिक्रमण, वन विनाश, अवैज्ञानिक भू–उपयोग आदिले चुरे क्षेत्र सधैं उच्च जोखिममा छ । नदी कटान, भू–क्षय, बाढी, पहिरो जस्ता प्रकोपले बर्सेनि आम नागरिकको जीवनमा समस्या माथि समस्या थपीरहेको छ’, पौडेलले भन्नुभएको छ ।
सबै नीति नियमलाई लत्याउँदै सरकारले यस्तो निर्णय गरेर आफ्नो भ्रष्टाचारी अनुहार देखाएको उहाँको आरोप छ ।
‘यस्तो विकराल रूप देख्दादेख्दै प्राकृतिक स्रोत साधनको संरक्षण गर्नुपर्ने जिम्वेवार निकायबाट नै त्यसको बर्खिलाप दोहन गर्न उत्रिनुले सरकारको भ्रष्टाचारी अनुहार झल्काउँछ । आफैंले बनाएका नियम कानुन र ऐनलाई लत्याउने योजना ल्याउनु कहाँ सम्मको गैरजिम्मवारी हो ? लोकतन्त्र, मुल्य मान्यता, नैतिकता सबै बेचीसकेको सरकारले अब बेच्न  बाँकी प्रकृति थियो । सरकार त्यो पनि बेच्न तम्सिरहेको छ । व्यापार घाटा पूर्ति गर्ने नाममा चुरे पहाडका ढुङ्गा, गिट्टी, बालुवा निकासी गरेर सरकारले आफ्ना कार्यकर्ता पोस्ने अखडा बनाउन खोजको प्रष्ट छ । ओली सरकारको अनियमितता र भ्रष्टचारी पोस्ने अभियान आफ्ना विगतका रेकर्ड तोड्दै अर्को उचाई चुम्न दौडिँदै छ । यो किमार्थ स्विकार्य हुँदैन,’ पौडेलले भन्नुभएको छ ।
प्राकृतिक स्रोतमाथि को दोहन राष्ट्रघाती कदम भएको बताउँदै सरकारको निर्णय देशको नियम कानुन साथै प्रकितिक नियमको पनि ठूलो उल्लंघन भएको उहाँको धारणा छ । सिङ्गै पहाड नै उजाड बनाएर बेच्ने कुरा कल्पना पनि गर्न नसकिने उहाँको भनाइ छ । उहाँले देश आजलाई मात्र नभएर भोलिका सन्ततिको भविष्यको आधार भएकाले प्राकृतिक स्रोतलाई हडप्ने अधिकार कसैलाई नभएको पनि बताउनुभएको छ ।