Category: राजनीति

भक्तपुर, साउन २६
नेपाली कांग्रेस भक्तपुर क्षेत्र नं. २ को प्रदेशसभा ‘ख’को प्रथम ऐतिहासिक प्रदेश सम्मेलन यही साउन २७ गते हुने भएको छ । नेपाली कांग्रेस केन्द्रीय कार्यसमितिको परिपत्र र कांग्रेसको विधान अनुसार भक्तपुरमा पहिलो पटक प्रदेश सभा क्षेत्र अन्तर्गत भक्तपुर क्षेत्र नं. २ को प्रदेशसभा ‘ख’को सम्मेलन हुन लागेको हो ।
सम्मेलनको बन्द सत्रमा भक्तपुर क्षेत्र नं. २ को प्रदेशसभा ‘ख’ अन्तर्गत मध्यपुर थिमि नगरपालिकाको ९ वटै वडाका क्षेत्रीय प्रतिनिधि, वडा समितिका पदाधिकारी, यस क्षेत्रबाट प्रतिनिधित्व गर्ने पार्टी केन्द्रीय सदस्य, महासमिति एवम् महाधिवेशन प्रतिनिधिहरु, जिल्ला, क्षेत्र र नगरका पदाधिकारीहरु, पर्यवेक्षकहरु र पार्टीका शुभचिन्तकहरु समेत गरी करिव ५ सय जनाको सहभागिता रहने नेपाली कांग्रेस भक्तपुर क्षेत्र नं. २ को प्रदेशसभा ‘ख’ का सभापति ओमप्रकाश श्रेष्ठले बताउनुभयो ।
सम्मेलनको उद्घाटन सत्र खुल्ला हुनेछ । सम्मेलनमा सहभागी हुने पार्टीका नेता, कार्यकर्ता, शुभचिन्तक, शुभेच्छुक एवम् सर्वसाधारण नागरिकहरु गठ्ठाघर चोकमा भेला भई ¥यालीसहित कार्यक्रम स्थल कौशलटारको ह्वाईट प्यालेसमा आउने व्यवस्था गरिएको छ । खुल्ला सत्रमा करिव एक हजार ५ सय जनाको सहभागिता रहने अनुमान गरिएको सभापति श्रेष्ठले जानकारी दिनुभयो ।

सम्मेलनको उद्घाटन नेपाली कांग्रेसका वरिष्ठ नेता डा. शेखर कोइरालाले गर्नुहुनेछ । सम्मेलनमा पार्टी सहमहामन्त्री जीवन परियार, पार्टी बागमती प्रदेशका सभापति ईन्द्र बानिया, जिल्ला सभापति एवम् सांसद दुर्लभ थापा, पार्टी केन्द्रीय सदस्यहरु अतिथीको रुपमा रहनेछन ।
बन्दसत्रमा सहमहामन्त्री जीवन परियारले ‘वर्तमान परिस्थिती र नेपाली कांग्रेस’ विषयमा कार्यपत्र प्रस्तुत गर्दै नेता कार्यकर्ताहरुलाई प्रशिक्षण प्रदान गर्नेछ । त्यसैगरी बन्दसत्रमा नेपाली कांग्रेस भक्तपुर क्षेत्र नं. २ को प्रदेशसभा ‘ख’का सभापति ओम प्रकाश श्रेष्ठले राजनीतिक प्रतिवेदन, सचिव बालकृष्ण श्रेष्ठले सांगठानिक प्रतिवेदन, सचिव प्रेम कुटुले आगामी वर्षको कार्ययोजना, कोषाध्यक्ष विनु केसीले आर्थिक प्रतिवेदन पेश गर्नेछन । ती प्रतिवेदनहरु माथि सहभागीहरुबीच छलफल गरी पारित गर्ने र सम्मेलनको घोषणापत्र जारी गरी समापन हुनेछ ।
मध्यपुर थिमि नगरसभापति हरिदास प्रजापतिले सम्मेलनले नेपाली कांग्रेसलाई मध्यपुर थिमिमा थप गतिशिल बनाई संगठन बिस्तारमा सहयोग पुग्नुका साथै पार्टी संगठन बिस्तारमा समेत मद्दत पुग्ने विश्वास व्यक्त गर्नुभयो ।
सम्मेलनका लागि कान्छा श्रेष्ठको संयोजकत्वमा सम्मेलन तयारी समिति गठन गरिएको छ । त्यसैगरी निराकर श्रेष्ठको संयोजकत्वमा प्रचार प्रसार समिति, सचिव प्रेम कुटुको संयोजकत्वमा व्यवस्थापन उपसमिति र कोषाध्यक्ष विनु केसीको संयोजकत्वमा आर्थिक उपसमिति गठन गरिएको तयारी समितिका संयोजक श्रेष्ठले जानकारी दिनुभयो ।

भक्तपुर, साउन २१
नेपाली कांग्रेस सूर्यविनायक नगर सम्मेलन यही भदौ १६ गते हुने भएको छ । नगरसभापति निशान ढुंगेलको सभापतित्वमा शनिवार बसेको नगरसमितिको १८ औं बैठकले नगर सम्मेलन भदौ १६ गते गर्ने निर्णय गरेको हो ।
बैठकले नगर सम्मेलन भव्यरुपमा सम्पन्न गर्न विभिन्न उपसमिति गठन गर्नुका साथै सचिव विश्वराम थापाको संयोजकत्वमा नौ सदस्यीय तयारी समिति गठन गरेको नगर प्रवक्ता रमेश खड्काले बताउनुभयो ।
यसैगरी बैठकले सूर्यविनायक नगरपालिका ३ का हरिकृष्ण श्रेष्ठलाई कोषाध्यक्षमा मनोनयन गरेको छ । यस्तै बैठकले क्रियाशिल सदस्यता नविकरण विषयमा छलफल गरी यथासक्य छिटो सदस्यता नविकरण सम्पन्न गर्ने, पार्टी केन्द्रीय कार्यालयको निर्देशन, केन्द्र, प्रदेश र जिल्ला प्रतिनिधिसहितको बैठक बस्ने र पार्टीको वार्षिक क्यालेण्डर प्रकाशन गर्ने सम्बन्धमा समेत छलफल भएको सभापति निशान ढुंगेलले बताउनुभयो ।

भक्तपुर, साउन १६
नेपाल मजदुर किसान पार्टीका अध्यक्ष नारायणमान बिजुक्छें (रोहित)ले निःस्वार्थ रुपमा गरिएको राजनीतिले मात्र देशको आर्थिक उन्नति र गतिशील बनाउने बताउनुभएको छ । ख्वप माध्यमिक विद्यालय स्थापनाको २५ औं वर्ष प्रवेशको अवसरमा मंगलवार आयोजित कार्यक्रममा अध्यक्ष बिजुक्छेंले राज्यको उन्नति र प्रगतिमा राजनीतिले मुख्य भूमिका खेल्ने बताउनुभएको हो ।
“राज्यको उन्नति र प्रगतिमा राजनीतिले मुख्य भूमिका खेल्छ । निःस्वार्थ रुपमा गरिएको राजनीतिले देशको आर्थिक उन्नति गतिशील बनाउने हुँदा विद्यार्थी जीवनदेखि असल राजनीति गर्नतर्फ उत्प्रेरित गरिँदै लानुपर्छ,” उहाँले भन्नुभयो ।
बिजुक्छेंले कलेजमा अध्ययनरत विद्यार्थीहरुले अध्ययन सँगसँगै राष्ट्रिय र अन्तर्राष्ट्रिय राजनीतिको विषयमा पनि चासो राखी देश र समाजको निःस्वार्थ सेवा गर्ने भावनाले अगाडि बढ्न प्रेरित गर्नुभयो ।
बिजुक्छेँले किताबी ज्ञानमा मात्र भर नपरी विभिन्न अध्ययन अनुसन्धानबाट नयाँ नयाँ पत्ता लगाउनेतर्फ विद्यार्थीहरुको चासो हुनुपर्ने बताउनुभयो । देश विदेशको भूगोल अध्ययनले विद्यार्थीहरुमा व्यापक दृष्टिकोणको विकास हुने बताउँदै उहाँले विदेशमा सिकेको ज्ञान र सीपलाई आफ्नै देशमा प्रयोग गरी उपलब्धीपूर्ण काम गर्नु आफैमा एउटा सफलता भएकोमा जोड दिनुभयो ।
नेपाल मजदुर किसान पार्टीका सचिव एवम् भक्तपुर क्षेत्र नं. १ प्रतिनिधि सभा सदस्य प्रेम सुवालले ख्वप विश्वविद्यालय सञ्चालन गरी विद्यार्थीहरुलाई नयाँ नयाँ विषयमा अध्ययन अनुसन्धान गराउने लक्ष्य रहेको बताउनुभयो ।
शिक्षा क्षेत्रमा भइरहेको राजनीतिक भागबण्डाकै कारण देश लथालिंग अवस्थामा पुगेको बताउँदैं उहाँले सरकारले युवालाई विदेशी भूमिमा सस्तो ज्यामी बनाउन लिएको नीतिको सबैले विरोध गर्नुपर्नेमा जोड दिनुभयो ।
ख्वप माविको जगमा उभिएर भक्तपुर नपाले नयाँ–नयाँ शैक्षिक संस्थाहरु स्थापना गर्दै सस्तो र गुणस्तरीय शिक्षा प्रदान गर्नुका साथै २१ औं शताब्दीको लागि योग्य, देशभक्त नागरिक तयार गर्नेमा यी शैक्षिक संस्थाहरुको विशेष भूमिका रहेको सांसद सुवालले बताउनुभयो ।
“ललिता निवास जग्गा प्रकरण, नक्कली भुटानी शरणार्थी प्रकरण र सुन काण्ड प्रकरण आदिमा शासक दलको संलग्नता रहनु आफैमा राजनैतिक नैतिकताको कमीको कारण हो,” उहाँले भन्नुभयो ।

भक्तपुर नगरपालिकाका प्रमुख एवं विद्यालय सञ्चालक समितिका अध्यक्ष सुनिल प्रजापतिले भक्तपुर नपाले शिक्षा क्षेत्रमा गरेको लगानीले देश र समाजले उपलब्धी हासिल गरेको बताउँदै देशभर जनस्तरबाट शैक्षिक संस्थाहरु सञ्चालन भएमा गरिब जनताका छोराछोरीहरु महँगा विद्यालय र कलेजहरुमा गएर पढ्नुपर्ने बाध्यताको अन्त्य हुने धारणा राख्नुभयो । उहाँले अध्ययनको सिलसिलामा वर्षेनी लाखौं विद्यार्थीहरु विदेशिंदै गर्दा नेपालका कलेजहरु संकटग्रस्त अवस्थामा पुगेको बताउनुभयो ।
भक्तपुर नगरपालिकाका उपप्रमुख एवम् विद्यालय सञ्चालक समितिका उपाध्यक्ष रजनी जोशीले ख्वप विश्वविद्यालय सञ्चालन गर्ने भक्तपुर नपाको दीर्घकालीन सोच भएको बताउनुभयो ।
नेपाल खुल्ला विश्वविद्यालय व्यवस्थापन तथा कानुन संकायका डीन प्रा.डा. अरहन स्थापितले नेपालमा २०१७ सालबाट खुल्ला विश्वविद्यालय स्थापना भएको र उक्त विश्वविद्यालयले प्रविधिमा आधारित विषयवस्तुहरुको अध्ययन अध्यापनमा जोड दिंदै आएको बताउनुभयो । नेपाल खुल्ला विश्वविद्यालयको शैक्षिक विशेषताहरुमाथि प्रष्ट पार्दै डा. स्थापितले दक्ष जनशक्ति देशकै लागि अर्थपूर्ण सम्पत्तिको रुपमा रहेको बताउनुभयो ।
ख्वप अस्पतालका मेडिकल डाइरेक्टर, डा. मजेशप्रताप मल्लले ख्वप सर्कलको गौरवपूर्ण इतिहासलाई अझ उँचो बनाउन विद्यार्थीहरुले थप मेहेनत गर्नुपर्ने बताउनुभयो ।
ख्वप इन्जिनियरिङ कलेजका प्राचार्य ई. सुजन माकले भक्तपुर नपाले ‘एक घर एक स्नातक’को अवधारणाका साथ स्थापित कलेजहरुको उद्देश्य क्रमशः पूरा हुने क्रममा रहेको बताउनुभयो ।
कार्यक्रममा ख्वप कलेजका प्राचार्य तथा ख्वप मा.वि.का पूर्वप्राचार्य प्रकाशकुमार श्रेष्ठ र ख्वप मा.वि.का प्राचार्य लक्ष्मीप्रसाद कर्माचार्यले कक्षा ११ मा १९ सय २० भन्दा बढी विद्यार्थी भर्ना भएको तथ्यांक प्रस्तुत गर्दै विद्यार्थीहरुलाई खोजमूलक स्वअध्ययनमा सहभागी हुन र सामाजिक सञ्जालको विवेकपूर्ण उपयोग गर्न मार्गनिर्देश गर्नुभयो । सो अवसरमा विद्यार्थीहरुले सांस्कृतिक प्रस्तुति प्रदर्शन गरेका थिए ।

भक्तपुर, साउन ११
नेपाली कांग्रेसका सहमहामन्त्री बद्री पाण्डेले मंसिरमा हुने महासमिति बैठकलाई कांग्रेसको नीति अधिवेशनको रुपमा सम्पन्न गर्ने बताउनुभएको छ ।
नेपाल सार्वजनिक सेवा कर्मचारी संघ (अप्सिन)को राष्ट्रिय समितिले बिहिवार बोडेमा आयोजित सार्वजनिक तथा नीजि क्षेत्र श्रम बजार, अधिकार, चुनौती र आगामी कार्यदिशा विषयक कार्यशाला गोष्ठीको उद्घाटन कार्यक्रममा सहमहामन्त्री पाण्डेले सो बैठकले कांग्रेसको समसामयिक राजनीतिक नीति, आर्थिक नीति, सामाजिक नीतिलगायत आवश्यक सबै नीति पारित गरी कार्यान्वयनको दिशामा जाने बताउनुभएको हो ।
उहाँले महासमिति बैठक र नीति अधिवेशनपछि कांग्रेस सशक्त ढंगले अघि बढ्ने र सरकार एवम् मुलुकलाई नै दिशानिर्देश गर्ने समेत बताउनुभयो । “महासमिति बैठक र नीति अधिवेशनपछि पार्टीका आन्तरिक क्रियाकलाप सशक्त ढंगले सही दिशामा अघि बढाईनेछ । तीन तहका सरकारमध्ये जहाँ जहाँ कांग्रेसको नेतृत्वमा सरकार छ र जहाँ कांग्रेस सरकारमा रहेको छ, ती सरकारलाई जिम्मेवार बनाउने, राम्ररी चलाउने र सरकार एवम् मुलुकलाई दिशानिर्देश गर्नेछ,” उहाँले भन्नुभयो ।
उहाँले नेपालमा लगानीको विश्वास जगाउनुपर्ने खाँचो औंल्याउनुभयो । उहाँले अर्थतन्त्रमा देखा परेको अस्थिरताले श्रम बजार खुम्चन थालेको र सार्वजनिक सेवाका क्षेत्रमा रोजगारी गुमाउँदैं गएको अवस्था रहेको बताउनुभयो । नीजि क्षेत्रमा समेत रोजगारी कटौतीले आम नागरिकको जीवनस्तरमा समेत असर परेको उहाँले बताउनुभयो ।

कार्यक्रममा नेपाली कांग्रेस भक्तपुरका सभापति एवम् भक्तपुर क्षेत्र नं. २ का प्रतिनिधिसभा सदस्य दुर्लभ थापाले भक्तपुरमा कांग्रेस एक्लै निर्वाचन लडेर जितेको इतिहास रहेको भन्दै कांग्रेस गठबन्धन विना पनि निर्वाचनमा जान तयार रहेको बताउनुभयो ।
“पटक पटक भन्ने गरेको छु, भक्तपुरमा कांग्रेस गठबन्धन विना पनि निर्वाचन लडेको छ र जितेको पनि छ । आउँदा निर्वाचनमा पनि गठबन्धन विना निर्वाचन लड्न र जित्न सक्छ । गठबन्धन विना पनि नेपाली कांग्रेसलाई भक्तपुरमा एक नम्बरको पार्टी बनाउन सक्छौं,” उहाँले भन्नुभयो ।
उहाँले भक्तपुरमा कांग्रेस कहिल्यै कमजोर नबनेको जिकिर समेत गर्नुभयो । “भक्तपुरमा नेपाली कांग्रेस कहिल्यै कमजोर भएको छैन । कांग्रेस भक्तपुरमा जहिले पनि एक नम्बरको पार्टी रहँदै आएको छ । नेपाली कांग्रेस भक्तपुरमा जहिले पनि एक नम्बरको पार्टीको रुपमा स्थापित छ । चाहे त्यो ७ सालमा होस या पछिल्लो पटकको निर्वाचनमा होस कांग्रेस पहिलो पार्टीको रुपमा रहेको छ,” उहाँले भन्नुभयो ।
उहाँले सभापतिलाई कमजोर बनाएर पार्टी कहिल्यै बलियो बन्न नसक्ने र कांग्रेस कमजोर भए मुलुकको लोकतान्त्रिक गणतन्त्र समेत कमजोर बन्ने बताउनुभयो । उहाँले भन्नुभयो, “पार्टी सभापति सफल भयो भने कांग्रेस बलियो र सफल हुन्छ, कांग्रेस बलियो र सफल भए मुलुकको लोकतान्त्रिक गणतन्त्र संस्थागत र बलियो बन्छ । उहाँले सामाजिक सञ्जालमा पार्टी र पार्टी नेतृत्वविरुद्ध लेखेर पार्टी बलियो नहुने समेत बताउनुभयो ।
उहाँले ट्रेड अधिकार सुनिश्चित गर्न समेत कांग्रेसलाई बलियो बनाउनुपर्नेमा जोड दिनुभयो । “नेपालमा ट्रेड युनियनको आन्दोलन कांग्रेसले शुरुवात गरेको हो, त्यसैले नेपाली कांग्रेस विना नेपालमा ट्रेड युनियनको अधिकार स्थापित हुन सक्दैन,” उहाँले भन्नुभयो ।

नेपाल ट्रेड युनियन कंग्रेस राष्ट्रिय समितिका अध्यक्ष योगेन्द्र कुमार कुँवरले ट्रेड युनियन अधिकार स्थापित गर्न फेरी आन्दोलनको विकल्प नभएको बताउनुभयो । मुलुकको लोकतान्त्रिक आन्दोलनमा अहम् र महत्वपूर्ण एवम् निर्णायक भूमिका खेलेका मजदुर, श्रमिक र सेवा क्षेत्रका कर्मचारीहरुको अधिकार, हकहित र वृत्तिविकासमा सरकार जिम्मेवार बन्न नसकेको भन्दै उहाँले फेरी आन्दोलन गर्नुपर्ने अवस्था आएको बताउनुभयो ।
अप्सिनका राष्ट्रिय समितिका अध्यक्ष राजेन्द्र दाहालको सभापत्विमा सम्पन्न कार्यक्रममा नेपाल ट्रेड युनियन कंग्रेस राष्ट्रिय समितिका पदाधिकारीहरु, विभिन्न संघका प्रतिनिधिहरुले ट्रेड युनियन अधिकार खुम्चँदै गएको भन्दै चिन्ता व्यक्त गरेका थिए ।
दुई दिन चल्ने कार्यशालामा विज्ञहरुले कार्यपत्र प्रस्तुत गर्ने सोहीको आधारमा अप्सिनको आगामी कार्यदिशासहितको प्रतिवेदन पारित गर्ने अध्यक्ष दाहालले बताउनुभयो ।

भक्तपुर, साउन ११
नेपाली कांग्रेस भक्तपुरका सभापति एवम् भक्तपुर क्षेत्र नं. २ का प्रतिनिधिसभा सदस्य दुर्लभ थापाले कांग्रेस गठबन्धन विना पनि निर्वाचनमा जान तयार रहेको बताउनुभएको छ ।
नेपाल सार्वजनिक सेवा कर्मचारी संघ (अप्सिन)को राष्ट्रिय समितिले बिहिवार बोडेमा आयोजित सार्वजनिक तथा नीजि क्षेत्र श्रम बजार, अधिकार, चुनौती र आगामी कार्यदिशा विषयक कार्यशाला गोष्ठीको उद्घाटन कार्यक्रममा सांसद थापाले विगतमा पनि भक्तपुरमा कांग्रेस एक्लै निर्वाचन लडेर जितेको इतिहास रहेको भन्दै कांग्रेस गठबन्धन विना पनि निर्वाचनमा जान तयार रहेको बताउनुभएको हो ।
“पटक पटक भन्ने गरेको छु, भक्तपुरमा कांग्रेस गठबन्धन विना पनि निर्वाचन लडेको छ र जितेको पनि छ । आउँदा निर्वाचनमा पनि गठबन्धन विना निर्वाचन लड्न र जित्न सक्छ । गठबन्धन विना पनि नेपाली कांग्रेसलाई भक्तपुरमा एक नम्बरको पार्टी बनाउन सक्छौं,” उहाँले भन्नुभयो ।

उहाँले भक्तपुरमा कांग्रेस कहिल्यै कमजोर नबनेको जिकिर समेत गर्नुभयो । “भक्तपुरमा नेपाली कांग्रेस कहिल्यै कमजोर भएको छैन । कांग्रेस भक्तपुरमा जहिले पनि एक नम्बरको पार्टी रहँदै आएको छ । नेपाली कांग्रेस भक्तपुरमा जहिले पनि एक नम्बरको पार्टीको रुपमा स्थापित छ । चाहे त्यो ७ सालमा होस या पछिल्लो पटकको निर्वाचनमा होस कांग्रेस पहिलो पार्टीको रुपमा रहेको छ,” उहाँले भन्नुभयो ।

उहाँले सभापतिलाई कमजोर बनाएर पार्टी कहिल्यै बलियो बन्न नसक्ने र कांग्रेस कमजोर भए मुलुकको लोकतान्त्रिक गणतन्त्र समेत कमजोर बन्ने बताउनुभयो । उहाँले भन्नुभयो, “पार्टी सभापति सफल भयो भने कांग्रेस बलियो र सफल हुन्छ, कांग्रेस बलियो र सफल भए मुलुकको लोकतान्त्रिक गणतन्त्र संस्थागत र बलियो बन्छ । उहाँले सामाजिक सञ्जालमा पार्टी र पार्टी नेतृत्वविरुद्ध लेखेर पार्टी बलियो नहुने समेत बताउनुभयो ।
उहाँले ट्रेड अधिकार सुनिश्चित गर्न समेत कांग्रेसलाई बलियो बनाउनुपर्नेमा जोड दिनुभयो । “नेपालमा ट्रेड युनियनको आन्दोलन कांग्रेसले शुरुवात गरेको हो, त्यसैले नेपाली कांग्रेस विना नेपालमा ट्रेड युनियनको अधिकार स्थापित हुन सक्दैन,” उहाँले भन्नुभयो ।

भक्तपुर, साउन ११
नेपाली कांग्रेसको गत साउन २ गते शुरु भएको केन्द्रीय कार्यसमिति बैठक १८ बुँदे निर्णय सार्वजनिक गर्दै बुधवार सम्पन्न भएको छ । सभापति शेरबहादुर देउवाको अध्यक्षतामा पार्टीको केन्द्रीय कार्यालय, वी.पी.स्मृति भवन, वी.पी. नगर, ललितपुरमा बसेको बैठकमा महामन्त्री विश्वप्रकाश शर्माले निर्णयार्थ प्रस्तुत गर्नु भएका प्रस्तावहरु पारित गर्दै सम्पन्न भएको हो ।
बैठकले संघीय लोकतान्त्रिक गणतन्त्रलाई कमजोर गर्ने र लोकतन्त्रका मुलभूत आधारमानै प्रहार हुन थालेको भन्दै नेपाली कांग्रेस संविधानको रक्षा र कार्यान्वयन गर्ने र संघीय लोकतान्त्रिक गणतन्त्रलाई सुदृढ गर्न प्रतिवद्ध रहेको जनाएको छ ।
नेपाली कांग्रेसको तर्फवाट निर्वाचित सबै तहका जनप्रतिनिधिहरुलाई जनताको अधिकतम हितमा कार्य गर्न, भ्रष्टाचार नियन्त्रण गर्न, विकास निर्माणमा देखिएको बेथिती अन्त्य गर्दै आर्थिक अनियमिततावाट अलग रहन र जनतामा सुशासनको प्रत्याभूति हुने गरि परिचालन गर्ने सङ्कल्प बैठकले गरेको छ ।
सुशासन र भ्रष्टाचार सँगसंगै जान नसक्ने ठहर गर्दै कांग्रेसले नक्कली भुटानी शरणार्थी प्रकरण, ललिता निवास प्रकरण लगायतका भ्रष्टाचारका सन्दर्भमा कुनै पनि दोषी नउम्किउन र कोही निर्दोष नफसुन भन्ने पार्टीको नीति रहेको स्पष्ट पारेको छ ।
जनताले चाहेको भ्रष्टाचार नियन्त्रण, पारदर्शिता, जवाफदेहिता र विकास निर्माणका क्षेत्रमा देखिएको अनियमिततालाई अन्त्य गरी सुशासनको प्रत्याभूति दिलाउन कांगे्रसले राहदानी, राष्ट्रिय परिचय–पत्र, सवारी चालक अनुमति पत्र लगायतका अति आवश्यक कागजात छिटो छरितो एवं सर्वशुलभ सेवा प्रदान गर्न, अर्थतन्त्रमा देखिएका सुधारलाई व्यापक र दिगो बनाउदै अर्थतन्त्रलाई चलायमान बनाउन, मूल्यवृद्धि र कालावजारी नियन्त्रणको लागि थप प्रभावकारी कार्य गर्न, दैनिक ज्यालादारी गरेर जीवकोपार्जन गर्ने, सडकपेटीमा सानातिना व्यापार गरि गुजारा चलाउँदै आएका तर हाल विस्थापन भई वेराजगार रहेका व्यक्ति परिवारका बारेमा सुक्ष्म अध्ययन गरि उनीहरुको जीविकोपार्जन गर्ने उचित बन्दोवस्त मिलाउन नेपाली कांग्रेसले सरकारसँग माग गरेको छ ।
यसैगरी सुन तस्करीमा संलग्न दोषीलाई अविलम्व कार्वाहीको दायरामा ल्याउन, किसानलाई समयमै सर्वशुलभ रुपमा मल बीऊ प्राप्त गर्न सक्ने प्रवन्ध मिलाउन ६ मुलुकभरका पशुमा देखिएको लम्पीस्किन रोग निवारणको तत्काल उपाय खोज्न र पिडित किसानलाई उचित क्षतिपूर्ति समयमै उपलव्ध गराउन, आवश्यक खाद्यान्न भण्डारणको प्रबन्ध गर्न समेत बैठकले सरकारसँग माग गरेको छ ।
लघुवित्त बैंक र सहकारी संचालकहरुको लापरवाही, अनियमितता र अपचलनका कारण वचतकर्ता सदस्यहरु ठगिएको, सामूहिक जमानीमा लिएका ऋण तिर्न नसकेका ऋणीहरुको समस्यालाई मध्यनजर गर्दै आवश्यक निर्णय गरि पीडितलाई न्याय दिलाउन नेपाली कांग्रेसले सरकारसँग माग गरेको छ ।
संविधान र कानून बमोजिम वास्तविक नागरिकलाई नागरिकता प्रदान गर्न, संक्रमणकालीन न्याय सम्बन्धी विधेयक संसदमा प्रस्तुत भैसकेको वर्तमान सन्दर्भमा सहमतिका आधारमा संक्रमणकालिन न्याय सम्वन्धी विधेयक यथाशीघ्र संसदबाट पारित गर्न बैठकले सरकारको ध्यानाकर्षण गराएको छ ।
भूमिहिन दलित, सुकुम्वासी तथा अव्यवस्थित वसोवासीहरुको समस्या दीर्घकालिन समाधानका लागि गठन भएको आयोगको तोकिएको जिम्मेवारी समयमै सम्पन्न गर्न गराउन, तराई मधेशमा यस वर्ष न्यून वर्षाका कारण समयमा खेती गर्ने अवस्था नरहेकोले सुख्खा क्षेत्र घोषणा गरी किसानलाई उचित राहत दिन र दीर्घकालिन समाधान खोज्न, बाढी पहिरो र भूकम्पका कारण भएको जनधनको क्षतिबाट प्रभावितहरुलाई उचित राहत तथा क्षतिपूर्ति उपलब्ध गराउन, जातीय विभेद र लैङ्गिक हिंसाजन्य व्यवहार जस्ता घटना घट्न नदिन प्रभावकारी कार्ययोजना सहित कानून कार्यान्वयन गरी पिडकलाई कानूनी कार्वाहीको दायरामा ल्याउन कांग्रेसले माग गरेको छ ।
यस्तै बैठकले नेपाली कांग्रेसको विधान, २०१७ (संशोधन सहित) को धारा १७ (५) बमोजिम २०८० मंसिर १३—१५, काठमाण्डौंमा महासमितिको बैठक बोलाउने निर्णय गरेको छ ।
नेपाली कांग्रेसको सांगठनिक सुदृढीकरणका लागि श्रावण २० देखि ३० आन्तरिक, भदौ १० देखि २४ समुदायमा कांग्रेस ‘राष्ट्रव्यापी अभियान’ संचालन गर्ने निर्णय समेत बैठकले गरेको छ ।
बैठकले गत स्थानीय निर्वाचन र प्रदेश सभा निर्वाचनमा पार्टीका आधिकारिक निर्णय नमानी निर्वाचनमा उम्मेदवार भई विजयी भएका १४ जनाको कार्वाही फुकुवा गरिएको छ ।
कांग्रेसले जनताको सुखदुःखमा सहयात्री बन्न र गाउँ, वडा र टोल तहमा मानवीय सेवाका कार्यहरु अझ व्यवस्थित रुपले सम्पादन गर्न ७५३ वटै स्थानीय तहमा ‘गाउँ सेवा दल’ गठन गर्ने निर्णय गरेको छ ।
जातीय विभेद, घरेलु हिंसा या अन्य कुनै पनि सामाजिक विसंगतिहरुमा प्रमाणित एवं कुनै पनि प्रकृतिका मागहरु सारेर आन्दोलन गर्ने क्रममा अमर्यादित व्यवहार (शारीरिक आक्रमण, कालोमोसो दल्ने आदि) गर्ने पार्टी सदस्य एवं भ्रातृ र शुभेच्छुक संस्थामा आवद्ध व्यक्तिको सदस्यता अविलम्व खारेज गर्ने निर्णय समेत कांग्रेसले गरेको छ ।
यसैगरी कांग्रेसले सामाजिक सञ्जालको प्रभाकारिताको विष्लेषण गर्दै नेपाली कांग्रेसको विचार, सिद्धान्त, कार्यक्रमहरुलाई जनता बीच लिएर जान सामाजिक सञ्जालको उच्चतम प्रयोग गर्न पार्टी संगठनका सबै तहका समितिले “पार्टीको नाम, झण्डा, चुनाव चिन्ह” प्रयोग गरि सामाजिक सञ्जालमा आफ्नो छुट्टै आधिकारिक एकाउण्ट आवश्यकता अनुसार सञ्चालन गर्नेभएको छ । साथै पार्टीको नाम, झण्डा र चुनाव चिन्हको दुरुपयोग गरी विभिन्न व्यक्तिहरुले संचालन गरेका यस्ता एकाउन्टहरुलाई तत्काल बन्द गर्न सचेत समेत गराएको छ ।

भक्तपुर, साउन ९
निर्वाचन आयोगले ठूला दलका पदाधिकारी र मन्त्रीसहित दुई हजार ४३५ जनालाई जनही १५ हजार रुपैयाँका दरले जरिवाना तोकेको छ । आयोगले गत मंसिर ४ मा भएको प्रदेशसभा र प्रतिनिधिसभा निर्वाचनको खर्च विवरण सार्वजनिक नगर्ने उमेदवारलाई सो जरिवाना तोकेको हो ।
जरिवाना तोकिएका ठूला दलका नेता र पदाधिकारीहरुमा नेपाली कांग्रेसका महामन्त्री गगन थापा, थापासँगै चुनावी प्रतिस्पर्धा गरेका एमाले नेता राजन भट्टराई, जनता समाजवादी पार्टी (जसपा)का अध्यक्ष उपेन्द्र यादव, लोकतान्त्रिक समाजवादी पार्टी (लोसपा)का अध्यक्ष महन्थ ठाकुर, लोसपाकै नेता तथा वर्तमान श्रम रोजगार तथा सामाजिक सुरक्षा मन्त्री शरद सिंह भण्डारी, नेपाल समाजवादी पार्टी (नेसपा)का अध्यक्ष एवं हालका खानेपानी मन्त्री महिन्द्र राय यादव, राष्ट्रिय प्रजातन्त्र पार्टी (राप्रपा)का उपाध्यक्ष रवीन्द्र मिश्र, राष्ट्रिय स्वतन्त्र पार्टी (रास्वपा)का सांसद सोविता गौतम, रास्वपाकै गणेश पराजुली लगायत छन् ।
यस्तै, परराष्ट्रमन्त्री एवं कांग्रेस नेता एनपी साउद, कांग्रेसका प्रमुख सचेतक रमेश लेखक, कांग्रेसकै उमाकान्त चौधरी, स्वतन्त्र उम्मेदवार मिलन पाण्डे, अर्का स्वतन्त्र उम्मेदवार रञ्जु दर्शना, सुशासन पार्टीका अध्यक्ष रमेश खरेल लगायत कारबाहीमा परेका छन् । समयमै निर्वाचन खर्च विवरण नबुझाएका कारण पूर्व सभामुख ओनसरी घर्ती मगर पनि १५ हजार जरिवानामा पर्नुभएको छ ।
नेकपा (माओवादी केन्द्र)की नेतृ पम्फा भुसाल, कांग्रेसको तनहुँ–२ का उमेदवार शंकर भण्डारी, काठमाडौं–६ का उमेदवार भीमसेनदास प्रधान पनि कारबाहीमा परेका छन् । पुर्वमुख्यमन्त्री तथा एमाले नेता शेरधन राईले पनि विवरण सार्वनजनिक गरेका छैनन् ।
आयोगले चुनावी खर्च विवरण ०८० वैशाख ६ गतेदेखि १२ गतेसम्म सार्वजनिक गरी त्यसको जानकारी गराउन भनेको थियो । आयोगको मंगलबार बसेको बैठकले खर्च विवरण सार्वजनिक नगरेका प्रदेशसभा र प्रतिनिधिसभाका कुल दुई हजार ४३५ जनालाई जनही १५ हजार रुपैयाँका दरले जरिवाना तोकेको आयोगका प्रवक्ता शालिग्राम शर्मा पौड्यालले जारी गरेको विज्ञप्तिमा उल्लेख छ ।
“संवत् २०७९ साल मंसिर ४ गते सम्पन्न भएको प्रतिनिधिसभा सदस्य तथा प्रदेशसभा सदस्य निर्वाचनमा उमेदवार भएर कानुनले तोकेको समयभित्र प्रदेश वा जिल्ला निर्वाचन कार्यालयमा निर्वाचन खर्चको विवरण पेस गर्ने प्रतिनिधिसभातर्फका २३७४ जना र प्रदेशसभातर्फका ३१८८ जना समेत जम्मा ५५६२ जना उमेदवारहरूलाई निर्वाचन (कसूर तथा सजाय) ऐन, २०७४ को दफा ३१ को उपदफा (२) बमोजिम मिति २०८०÷१÷६ देखि मिति २०८०÷१÷१२ सम्म निर्वाचन खर्चको विवरण सार्वजनिक गरेको लिखित जानकारी आफू उम्मेदवार रहेको प्रदेश वा जिल्ला निर्वाचन कार्यालयमा गराउन निर्देशन दिइएकोमा तोकिएको समयभित्र निर्वाचन खर्चको विवरण सार्वजनिक नगर्ने प्रतिनिधिसभातर्फका १०३७ जना र प्रदेशसभातर्फका १३९८ जना समेत जम्मा २४३५ जना उमेदवारलाई निर्वाचन (कसूर तथा सजाय) ऐन, २०७३ को दफा ३१ को उपदफा (४) बमोजिम जनही रु. १५,०००।– (पन्ध्र हजार रुपैयाँ)का दरले जरिवाना गर्ने निर्णय भएको छ ,” विज्ञप्तीमा उल्लेख छ ।
आयोगले उनीहरुलाई ३५ दिनभित्र राजस्व दाखिला गरी सोको भौचरसहितको निवेदन आयोग वा सम्बन्धित निर्वाचन कार्यालयमा पेस गर्न भनिएको छ । त्यस्तै, निर्वाचन खर्चको विवरण सात दिनभित्र सार्वजनिक गरी सोको जानकारी सात दिनभित्र दिन आदेशसमेत आयोगले दिएको छ । आयोगले तोकेको समयमा जरिवाना नबुझाए अर्को निर्वाचनमा भाग लिन नपाउने निर्णय समेत गरेको छ ।
“जरिवाना बापतको रकम तोकिएको समयभित्र नबुझाउने उमेदवारहरूलाई तत्काल हुने एक निर्वाचनमा भाग लिन नपाउने गरी रोक लगाउने र जरिवाना बापतको रकम सरकारी बाँकी सरह असुल उपर गर्न केन्द्रीय तहसिल कार्यालयमा लेखी पठाउने निर्णय भएको छ,” पौडेलले जारी गरेको विज्ञप्तिमा भनिएको छ ।
आयोगले सार्वजनिक गरेको निणर्यअनुसार कुल जरिवानाको रकम तीन करोडभन्दा बढी हुन्छ । खर्च विवरण सार्वजनिक नगर्ने कुल दुई हजार ४३५ जनालाई १५ हजारको दरले जरिवाना गर्दा कुल तीन करोड ६५ लाख २५ हजार रुपैयाँ हुन आउँछ ।

भक्तपुर, साउन ६
नेपाल तरुण दलले गृहमन्त्री नारायणकाजी श्रेष्ठको राजीनामा माग्ने भएको छ । नेपाल तरुण दल भक्तपुरले ४१ औं विपि जयन्तीको अवसरमा मध्यपुर थिमि वडा नं. १ लोहकिल्थलीस्थित विपि पार्कमा आयोजित विपिको पूर्ण कदको शालिकमा माल्यापर्ण र वृक्षारोपण कार्यक्रममा तरुण दलका केन्द्रीय अध्यक्ष विद्धान गुरुङ र पुर्व केन्द्रीय अध्यक्ष जितजंग बस्नेतले गृहमन्त्री श्रेष्ठको नाम सुन तस्करीमा मुछिएको भन्दै उनको राजीनामा माग्ने बताएको हो ।
“भन्सारबाट क्विन्टलका क्विन्टल सुन तस्करी भएको छ । प्रहरी र गृहमन्त्रालयको सहमति विना कसरी सम्भव हुन्छ ? सुन तस्करीमा गृहमन्त्रीको नाम जोडिएको छ । छानविनलाई सहज बनाउन पनि गृहमन्त्री नारायणकाजी श्रेष्ठले राजीनामा दिएर सहयोग गर्नुपर्छ,” उहाँले भन्नुभयो । उहाँले गृहमन्त्रीले गठन गरेको छानविन समितिले सुन तस्करीमा संलग्न उच्च तह र ओहोदाका व्यक्तिलाई समाउन नसकिने दावी समेत गर्नुभयो ।

अध्यक्ष गुरुङले कांग्रेस नेता एवम् तरुण दलका पूर्वअध्यक्ष बालकृष्ण खाँड भुटानी शरणार्थी प्रकरणमा निर्दोष रहेको दावी गर्दै गहृ प्रशासनले नै खाँडलाई भुटानी शरणार्थी प्रकरणको सम्पूर्ण दोषी जस्तै व्यवहार गरेको आरोप समेत लगाउनुभयो ।
अध्यक्ष गुरुङले विपि कोइराला समकालिन नेताहरुमा विश्व स्तरको नेता भएको जिकिर गर्नुभयो । विश्व कम्युनिष्ट र समाजवादी दुई धारमा विभाजन भइरहेको अवस्थामा विपिले समाजवादको व्याख्या गरेर विश्वमा समाजवादको बिऊ रोप्न सफल भएको बताउनुभयो ।
कांग्रेस केन्द्रीय सदस्य एवम् तरुण दलका पूर्वअध्यक्ष जितजंग बस्नेतले ३ महिनामा दर्जनौ पटक क्विन्टलका क्विन्टल सुन तस्करी हुनुमा गृह प्रशासनको संलग्नता विना सम्भव नभएको जिकिर गर्दै गृहमन्त्री श्रेष्ठले राजीनामा माग गर्नुभयो ।
उहाँले सुन तस्करीमा माओवादी उपाध्यक्ष कृष्णबहादुर महरा, नेकपा एमालेका अध्यक्ष केपी शर्मा ओली निकटका व्यवसायीको नाम समेत मुछिएको बताउँदैं सुन तस्करीमा महरा र ओलीको समेत संलग्नता भएको हुन सक्ने आशंका व्यक्त गर्नुभयो । उहाँले भन्नुभयो, “जुन व्यवसायी मुछिएको छ, उसको सिधा सम्पर्क गृहमन्त्री नारायणकाजी श्रेष्ठ, माओवादीका नेता कृष्णबहादुर महरा र केपी ओलीसँग जोडिएका व्यक्ति हुन ।”

कांग्रेसमा आफ्नै नेतालाई गाली गर्ने सँस्कृति मौलाएको र यसले कांग्रेसलाई कमजोर बनाउँदैं लगेको बताउनुभयो । उहाँले आफ्ना दलका नेता भुटानी शरणार्थी प्रकरणमा मुच्छिएर पक्राउ पर्दा गृहमन्त्रीलाई भेटेर धन्यवाद दिन जाने नेताहरुले विपक्षी दलका नेताहरुको नाम अन्य काण्डमा जोडिदाँ र गृहमन्त्री स्वयम् सुन तस्करीमा मुच्छिँदा उनलाई भेटेर राजीनामा माग्न नसकेको भन्दै आलोचना गर्नुभयो ।
“नेता कार्यकर्ता सबै चिया पसलमा बस्छौं, चिया पसलमा बसेर म बाहेक सबै खराब हो । कांग्रेसले केही गर्दै गरेन भन्दै आफ्नै बदनाम आफैंले गरिरहेका छौं । एउटा पक्षले अर्को पक्षलाई गाली गर्छौं, भ्रष्टाचारका ठूला ठूला काण्डमा अरु दलका ठूला नेताका नाम पनि जोडिएका छन तर हामी किन अरु दलका नेताहरुलाई गाली गर्न सक्दैनौं ?,” उहाँले भन्नुभयो ।
भुटानी शरणार्थी प्रकरण हालका अख्तियार प्रमुख प्रेम राई गृहसचिव, केपी ओली प्रधानमन्त्री र रामबहादुर थापा गृहमन्त्रीको भएको बेला शुरु भएको दावी गर्दै उहाँले प्रेम राईको विषयमा किन प्रश्न गर्न सक्दैनौं भनी कांग्रेस नेताहरुलाई प्रश्न समेत गर्नुभयो । भुटानी प्रकरणमा केपी ओलीका नातेदार, स्वकिय सचिव, ओलीको धर्मपत्नीको नाममा रहेको संस्था समेत जोडिएको भन्दै उहाँले त्यस्ता विषयमा कुरा उठाउन नसक्नु कांग्रेस नेताको कमजोरी भएको बताउनुभयो ।

भक्तपुर, साउन ५
भक्तपुर क्षेत्र नं. २ का प्रतिनिधिसभा सदस्य एवम् नेपाली कांग्रेस भक्तपुरका सभापति सांसद दुर्लभ थापाले भक्तपुरमा विकासका नाममा भ्रमको खेती गर्ने पक्षमा आफु नभएको बताउनुभएको छ ।
नेपाल तरुण दल भक्तपुरले ४१ औं वि पि जयन्तीको अवसरमा मध्यपुर थिमि वडा नं. लोहकिल्थलीस्थित विपि पार्कमा आयोजित विपिको पूर्ण कदको शालिकमा माल्यापर्ण र वृक्षारोपण कार्यक्रममा सांसद थापाले विकासका नाममा कुनै पार्टी वा नेताले ठेक्का लिएको जस्तो भ्रम छर्दै हिँड्ने आफ्नो स्वभाव नभएको बताउनुभएको हो ।
“सडक बढार्ने पनि माननीयले गर्नुपर्ने, सडक पिच र पिचको निरिक्षण पनि माननीयले गर्नुपर्ने, कुनै विकास निर्माणका केन्द्रीय रुपमा, प्रदेश र स्थानीय तह, वडाको बजेटको योजनामा पनि संघीय माननीयले उद्घाटन र शिलान्यास गर्दै हिँड्ने परिपाटी हिजो भक्तपुरमा शुरु भएको थियो । त्यस्ता परिपाटी र प्रवृत्तिको म सक्त विरोधी हुँ,” उहाँले भन्नुभयो, “कुनै पनि हालतमा यस्ता खाले गतिविधि र क्रियाकलाप गरेर जनतालाई सबै विकास मैले गरेको हुँ भन्ने भ्रम जनतामा छर्ने पक्षमा म छैन ।”

कांग्रेस निरन्तर विकास निर्माणको प्रक्रियामा जोडिँदैं आएको बताउँदैं उहाँले यसलाई निरन्तरता दिइरहने प्रतिवद्धता जनाउनुभयो । “२०४६ सालको राजनीतिक परिवर्तन पछि कांग्रेस विकास निर्माणका प्रक्रियासँग जोडिएको छ । भक्तपुर पनि त्यही प्रक्रिया र पद्धतीमा जोडिएर अघि बढेको छ । शिक्षा, स्वास्थ्य, खानेपानी, सडक आधारभुत आवश्यता हुन । जनताका यी आधारभुत आवश्यकतासँग कांग्रेस नजिकबाट जोडिएको छ,” उहाँले भन्नुभयो ।
कांग्रेसकै नेतृत्वमा विगतदेखी वर्तमानसम्म ‘समृद्ध भक्तपुर अभियान’मा अघि बढेको बताउँदैं उहाँले भन्नुभयो, “चाहे त्यो खानेपानीमा होस, चाहे त्यो बाटोघाटोको सवालमा होस, चाहे त्यो बिजुलीको समस्या होस, चाहे त्यो शिक्षा, स्वास्थ्य र रोजगारीका विषयमा होस, नेपाली कांग्रेस सबै विषयमा जोडिएको छ, भविष्यमा पनि यसले निरन्तरता पाउनेछ ।”
मध्यपुर थिमि र चाँगुनारायण नगरपालिकामा कांग्रेसको नेतृत्व स्थापित भएपछि विगत पाँच वर्षमा हुन नसकेका र सञ्चालन गर्न नसकेका विकास निर्माणका योजना सूचारु भएको उदाहरण प्रस्तुत गर्दै उहाँले भक्तपुरमा मात्र होइन मुलुकको विकासमा कांग्रेस नेतृत्वमा मात्र सम्भव हुने दावी गर्नुभयो ।

उहाँले पार्टी भित्र एकले अर्कोको टिप्पणी गर्ने, आलोचना गर्ने र गाली गर्ने प्रवृत्तिले पार्टीलाइ कमजोर बनाउने भएकाले यस्तो गतिविधि नगर्न नेता कार्यकर्ताहरुलाई सचेत पार्नुभयो । उहाँले कांग्रेसले विकास निर्माणका गतिविधिसँगै पार्टीका नेता कार्यकर्ताको संरक्षण गर्ने, उनीहरुलाई परेका समस्यासँग पार्टी जोडिएर सहकार्य गर्ने पद्धतीको विकास गर्नुपर्नेमा जोड दिनुभयो ।
“एक नेताले अर्को नेतालाई गाली गरेर, चाहे त्यो रुपान्तरणको नाममा होस, चाहे त्यो संस्थापन पक्ष र विपक्षको नाममा होस, एउटाले अर्कोलाई खुत्लाउने भन्दा पनि कांग्रेस र विपिको विचार, सिद्धान्त र आदर्श बोकेर पार्टीभित्र आन्तरिक स्वच्छ प्रतिष्पर्धा गरेर अघि बढ्नुपर्ने खाँचो छ,” उहाँले भन्नुभयो ।
महामानव विपि यस शताब्धीकै महान समाजवादी नेता भएको दावी गर्दे उहाँले नेपालका पुराना र नयाँ सबै दलको राजनीति कांग्रेसको मूल्य मान्यता र सिद्धान्तको वरिपरी घुमिरहेको बताउनुभयो । “हिजो कांग्रेसलाई प्रतिक्रियावादी ठान्ने दल होस या आज नयाँ हुँ भन्ने दलहरु, ती सबै कांग्रेस र विपिको समाजवाद, मूल्य मान्यता र सिद्धान्त बोकेर सहकार्य गर्दै अघि बढेको छ,” उहाँले भन्नुभयो ।