Category: भर्खरै

भक्तपुर, बैशाख १६
मध्यपुर थिमि नगरपालिका वडा नं. १ लोहकिल्थलीमा जिल्लाव्यापी बासुरी बाजा प्रतियोगिता हुने भएको छ । मध्यपुर थिमि नगरपालिकाले स्थानीय श्री सिद्धि गणेश दाफा भजन खलःको सहकार्यमा यही बैशाख २७ गते शनिवार उक्त प्रतियोगिता आयोजना गर्न लागेको हो ।
प्रतियोगिताको लागि बासुरी बाजा प्रतियोगिता मूल समिति गठन गरिएको समितिका संयोजक करन द्धारेले जानकारी दिनुभयो । उहाँका अनुसार प्रतियोगितालाई व्यवस्थितरुपमा सम्पन्न गर्न आर्थिक व्यवस्थापन उपसमिति, मञ्च व्यवस्थापन उपसमिति, अतिथी सत्कार व्यवस्थापन उपसमिति, प्रचार प्रसार उपसमिति र निर्णायक मण्डल व्यवस्थापन उपसमिति गठन गरिएको छ ।
प्रतियोगितामा भक्तपुर जिल्लाका बासुरी बाजा खलः, गुठी, पुचः, समूह र संघ संस्थाहरुले भाग लिन सकिन्छ । प्रतियोगिताका लागि एक टोलीमा एक जना गुरु र १५ जना बाद्यवादन समूहको नाम दर्ता गर्नुपर्ने छ ।
प्रतियोगितामा सहभागी टोलीलाई प्रस्तुतीका लागि २० मिनेट दिईने छ । उक्त २० मिनेट भित्र सहभागी टोलीले तयारी, वार्म अफ प्रस्तुती दिनुपर्ने छ भने निर्णायक मण्डलले दिएको एउटा धुनमा प्रस्तुती दिनु पर्नेछ ।
सहभागी हुने टोलीले कम्तीमा ५ वटा बोल दर्ता गर्नुपर्ने संयोजक द्धारेले बताउनुभयो । उक्त ५ वटा मध्ये एउटा वार्म अपमा र एउटा निर्णायक मण्डलको फर्माइसमा प्रस्तुती दिनुपर्ने छ ।
टोलीले प्रस्तुतीलाई विभिन्न विधामा मूल्यांकन गरी निर्णायकले दिएको अंकको आधारमा प्रथम, द्धितिय, तृतिय र सान्त्वना विजेता घोषणा गरिने छ ।
प्रतियोगितामा विजयी टोलीले प्रमाण पत्र र आकर्षण शिल्डसहित नगद ६० हजार पुरस्कार प्रदान गरिने छ । दोस्रो हुने टोलीले नगद ३० हजार, शिल्ड र प्रमाणपत्र, तृतिय हुने टोलीलाई नगद १५ हजार शिल्ड र प्रमाणपत्र, सान्त्वना स्थान प्राप्त गर्ने टोलीले प्रमाणपत्र र नगद १० हजार पुरस्कार प्राप्त गर्ने छ ।
स्थानीय कला संस्कृति, मूर्त तथा अमूर्त सम्पदाहरुको संरक्षण गर्ने नगरपालिकाको उद्देश्य अनुसार बासुरी बाजामा युवाहरुको आकर्षण बृद्धिका लागि प्रतियोगिता आयोजना गर्न लागेको नगर प्रमुख सुरेन्द्र श्रेष्ठले बताउनुभयो ।

भक्तपुर, बैशाख १६
मध्यपुर थिमि नगरपालिकाले स्थानीय रैथाने चरा संरक्षण गर्ने प्रयासको थालनी गरेको छ । आधुनिक भवन निर्माणसंगै चराचुरुङ्गीको बासस्थान घट्दै गएकोप्रति मध्यपुर थिमि नगरपालिकाको ध्यानाकर्षण जनाउँदै सार्वजनिक स्थानमा चराको गुँड राख्ने कार्यको थालनी गरेको हो । नगरपालिकाले चरा संरक्षणका लागि चरामैत्री बासस्थान अर्थात् उनीहरूका लागि गुँड बनाइदिन शुरु गरेको हो ।
चरा संरक्षण अभियानका अभियन्ता बाबुकाजी श्रेष्ठ लगायतको पहलमा नगरपालिकाले चराको लागि बासस्थान बनाउन सहयोग गरेको नगर प्रमुख सुरेन्द्र श्रेष्ठले बताउनुभयो । “हाल दुई पोखरी लगायतका क्षेत्रमा नमूनाको रुपमा २५ वटा बासस्थान बनाइएको छ ,” श्रेष्ठले भन्नुभयो ।

चरा संरक्षण गर्ने अभियानमा नगरपालिकाको सदैव साथ र सहयोग रहने नगर प्रमुख श्रेष्ठले बताउनुभयो । “नमूनाको रुपमा शुरु भएको गुँड बनाउने अभियान प्रभावकारी भए भविष्यमा हजारौं गुँड बनाइने छ,” उहाँले भन्नुभयो ।
चराले कीराहरू खाएर पर्यावरणमा सहयोग गर्ने मात्र नभई यसले वातावरणलाई पनि प्राकृतिक र मनोरम बनाउन मद्दत गर्ने भएकोले चरा संरक्षणमा नगरपालिकाको सदैव सहयोग रहने नगर प्रमुख श्रेष्ठको भनाइ छ ।
स्थानीय अभियन्ता र नगरपालिकाको यो प्रयासले अरु पालिकालाई पनि प्रेरणा मिल्ने र सदिऔ देखि मानिसको नजिक बस्ने बानी परेका चराहरु माथि न्याय हुने अभियन्ता बाबुकाजी श्रेष्ठले विश्वास ब्यक्त गर्नुभयो ।
आधुनिक घर निर्माण हुने क्रम बढेसंगै भंगेरा, गौथली, मैना र कौवा जस्ता चराहरुको लागि बासस्थान नासिदै गएकोले उनीहरूका लागि उपयुक्त बासस्थान अभियान चलाइएको अभियन्ता श्रेष्ठले बताउनुभयो ।

भक्तपुर, बैशाख १६
भक्तपुरको विभिन्न स्थानमा जुवातास खेलिरहेको अवस्थामा प्रहरीले १४ जनालाई नियन्त्रणमा लिएको छ । प्रहरीका अनुसार मध्यपुर थिमि नगरपालिका–४, एसएस चोक र चाँगुनारायण नगरपालिका–७, हेल्मेटडाँडामा जुवातास खेलिरहेको अवस्थामा सोमवार १४ जनालाई पक्राउ गरेको हो ।
थिमि एसएस चोक बस्ने ४४ वर्षीय राजेन्द्र श्रेष्ठको घरमा जुवातास खेलिरहेको अवस्थामा राजेन्द्र समेत ९ जनालाई प्रहरीले पक्राउ गरेको हो । प्रहरी वृत्त थिमिबाट खटिएको प्रहरीले उनीहरूलाई नगद १ लाख २३ हजार ७ सय ५० रूपैयाँ र ६ बुक तास सहित पक्राउ गरेको जिल्ला प्रहरी परिसर भक्तपुरका सूचना अधिकारी प्रहरी नायव उपरीक्षक ढुण्डीराज नेउपानले बताउनुभयो ।
यसैगरी चाँगुनारायण नगरपालिका–७ हेल्मेटडाँडा बस्ने ५८ वर्षीय कृष्णराम छुस्याबागको घरमा जुवातास खेलिरहेको अवस्थामा कृष्णराम समेत ५ जनालाई प्रहरीले पक्राउ गरेको छ । प्रहरी प्रभाग खरिपाटीबाट खटिएको प्रहरीले उनीहरूलाई नगद ३४ हजार ९ सय ५० रूपैयाँ र ३ बुक तास सहित पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको प्रनाउ नेउपानले बताउनुभयो ।

भक्तपुर, बैशाख १५
मध्यपुर थिमि नगरपालिकाद्धारा सञ्चालित नेपाल कोरिया मैत्री नगरपालिका अस्पतालले सोमवार १७ औं स्थापना दिवस मनाएको छ । अस्पताल हातामा आयोजित कार्यक्रममा अस्पतालमा मध्यपुर रक्तसञ्चार केन्द्र (ब्लड बैंक) सञ्चालनमा ल्याएको छ भने अस्पतालका बिरामीहरुलाई फलफुल वितरण गर्नुका साथै खुल्ला रक्तदान आयोजना गरिएको थियो ।
सो अवसरमा स्वास्थ्य तथा जनसंख्या मन्त्री प्रदिप पौडेलले स्वास्थ्य बिमा कोषको आम्दानीको दाँजोमा बिमा दावी अत्याधिक बढी भएका कारण हाल भुक्तानीमा समस्या आएको बताउनुभयो । उहाँले स्वास्थ्य बिमाको मोडल परिमार्जन गरी योगदानमा आधारित बिमा नीति ल्याउने तयारी भइरहेको जानकारी दिनुभयो ।

यसो गर्दा बिमा कोषमा वार्षिक एक खर्ब रुपैंया आम्दानी हुने र बिमाको दावी भुक्तानीमा समस्या नआउने उहाँले जिकिर गर्नुभयो । “सक्नेले योगदानको आधारमा बिमाको प्रिमियम तिर्नुपर्ने र नसक्नेको सरकारले स्वास्थ्य बिमा गरिदिने व्यवस्थाले मात्र स्वास्थ्य बिमा दिगो हुन्छ र निःशुल्क आधारभुत स्वास्थ्य सेवा दिने राज्यको उद्देश्य पुरा हुन्छ,” उहाँले भन्नुभयो ।
उहाँले स्वास्थ्य करमा बृद्धि गरी उक्त करको रकम, कर्मचारीको तलब, राज्यले लिने विभिन्न करको निश्चित प्रतिशत बिमा कोषमा जाने व्यवस्था हुनुपर्नेमा जोड दिनुभयो । उहाँले रोगको प्रकृति अनुसार ५ लाख सम्म स्वास्थ्य बिमाको लाभ लिन सकिने व्यवस्था गरिने बताउनुभयो ।
उहाँले शहरी क्षेत्रमा नयाँ अस्पताल बनाउनु भन्दा पनि विशेषज्ञ अस्पतालको खाँचो रहेको बताउनुभयो । देशभरका पालिकाका वडाहरुमा आधारभुत स्वास्थ्य केन्द्रको बिस्तार गर्नुपर्नेमा जोड दिँदैं तिनलाई रिफरल सेन्टरका रूपमा विकास गर्नुपर्ने आवश्यकता औंल्याउनुभयो ।

नगरपालिकाले सञ्चालन गरेको नेपाल कोरिया मैत्री नगरपालिका अस्पतालमा दैनिक एक हजार भन्दा बढी सेवाग्राही आउनु अस्पतालको विश्वसनीयताको आधार भएको उहाँको भनाई थियो । उहाँले अस्पतालको प्रगतिको प्रशंसा गर्दै देशभरका विशिष्ट अस्पतालहरूमा समेत उपलब्ध नभएका सिटिस्क्यान र डायलाइसिस सेवाजस्ता उच्चस्तरीय सेवा विस्तार गर्नु व्यवस्थापनको सफलता भएको बताउनुभयो ।
कार्यक्रममा नेकपा (माओवादी केन्द्र)का पोलिट्व्युरो सदस्य दिलीप कुमार प्रजापतिले अस्पतालको सेवा उच्च गुणस्तरको रहेको चर्चा गर्दै अस्पतालले आसपासका जिल्लाका बिरामीलाई समेत सेवा प्रवाह गर्नुले यसको महत्व अझ बढेको बताउनुभयो ।

मध्यपुर थिमि नगरपालिकाका पुर्व नगरप्रमुख मदनकृष्ण श्रेष्ठले अस्पतालले सरकारी स्तरमा भन्दा पहिले नै समूदायमा आधारित स्वास्थ्य बिमा कार्यक्रम लागु गरी नेपालमा स्वास्थ्य बिमाको अवधारणा ल्याएको चर्चा गर्नुभयो ।
अस्पतालका कार्यकारी निर्देशक डा. डि के रौशनले अस्पतालले चालु आर्थिक वर्षको ९ महिनामा एक लाख ५० हजारलाई ओपिडि, ३ हजार ११८ जनालाई अन्तरंग सेवा, ७० हजार भन्दा बढीको प्रयोगशाला परीक्षण, ५७ हजार ४१३ जनालाई एक्सरे, १ हजार ५५१ जनालाई सिटीस्क्यान, १७ हजार ८८० जनाको युएसजी परीक्षण, १ हजार ६३१ वटा शल्यक्रिया, ७४४ हेमोडायलाइसिस सेवा, ९९० कोलोनोस्कोपी र एन्डोस्कोपी परीक्षण गरिएको जानकारी दिनुभयो ।
उहाँले चालु आ.व.को ९ महिनामा अस्पतालले अस्पतालले ३९ करोड २९ लाख ३४ हजार रुपैयाँ आम्दानी र ३३ करोड ७७ लाख ८१ हजार रुपैयाँ खर्च गरेको बताउँदैं अस्पतालले स्वास्थ्य बिमा बोर्डसँग २६ करोड रुपैयाँ भुक्तानी पाउन बाँकी रहेको जानकारी दिनुभयो ।

अस्पताल सञ्चालन तथा व्यवस्थापन समितिका सदस्य एवम् नेपाली कांग्रेस मध्यपुर थिमिका सभापति हरीदास प्रजापतिले अस्पतालले अस्पतालको सेवा प्रवाह, आर्थिक अनुशासन र पूर्वाधार विकासमा अस्पतालले जोड दिइरहेको बताउनुभयो ।
कार्यक्रममा नगरप्रमुख सुरेन्द्र श्रेष्ठले अस्पतालको निर्माणाधिन भवनको तयारी पछि अस्पताल ३ सय शैयामा बिस्तार हुने र त्यसपछि नर्सिङ कलेज सञ्चालन गर्ने गरी तयारी थालिएको जानकारी दिनुभयो । उहाँले अस्पतालको सेवा बिस्तारका क्रममा ब्लड बैंक सञ्चालनमा ल्याएको जानकारी दिँदैं अब मध्यपुर थिमिका जनता मात्र नभइ आसपासका नागरिकहरुले समेत सहजरुपमा रगत पाउने विश्वास व्यक्त गर्नुभयो ।

उहाँले अस्पतालमा अत्याधुनिक एचडियु सञ्चालनको तयारी अन्तिम चरणमा पुगेको, एमरजेन्सी र शल्यक्रिया सेवालाई अध्याधुनिक बनाएको, स्वास्थ्य बिमा मार्फत जनताको घरदैलोमा स्वास्थ्य सेवा बिस्तार गरिएको जानकारी दिँदैं अस्पतालमा एमआरआई सेवा बिस्तारको लागि आवश्यक पहल भइरहेको बताउनुभयो ।
सो अवसरमा खुल्ला रक्तदान आयोजना गर्नुका साथै अस्पतालका बिरामीहरुको शिघ्र स्वास्थ्यलाभको कामना गरी फलफुल वितरण गरिएको थियो । कार्यक्रममा बागमती प्रदेशका सांसदहरु सुरेश श्रेष्ठ, धनेश्वरी प्रजापति, भुवनकेशरी श्रेष्ठ, राजनैतिक दलका प्रतिनिधिहरु, विभिन्न संघसंस्थाका प्रतिनिधिहरु, स्थानीय बासिन्दा, नगरपालिकाका जनप्रतिनिधिहरुलगायतको उपस्थिती थियो ।

भक्तपुर, बैशाख १३
साविक विजेता ललितपुर सिटी एफसीले अपराजित रहँदैं नेपाल सुपर लिग (एनएसएल)को उपाधि रक्षा गरेको छ । दशरथ रंगशालमा भएको शनिवार सम्पन्न फाइनलमा पोखरा थण्डर्सलाई २–१ ले पराजित गर्दै ललितपुर तेस्रो संस्करणमा अपराजित रहेर च्याम्पियन बन्दै उपाधि रक्षा गरेको हो ।
ललितपुरका लागि दुई विदेशी खेलाडी इमोह इजेकेल र पापा इबोउ केबेले गोल गरे । पोखराका लागि एनआरएन खेलाडी सुदिल राईले एक गोल फर्काए ।
उपाधिसँगै ललितपुरले एनएसएलमा दुई किर्तिमान बनाएको छ । ललितपुर अपराजित रहँदै उपाधि जित्ने पहिलो टोली बनेको छ भने एनएसएलको उपाधि रक्षा गर्ने पनि ललितपुर पहिलो टिम बनेको छ ।
ललितपुरले एनएसएलमा अपराजित खेलको शृंखला पनि बढाउँदै ११ पु¥याएको छ । दोस्रो सिजन अन्तिम ३ खेलमा अपराजित रहेको ललितपुर यस सिजन खेलेको ८ वटै खेलमा अपराजित रह्यो ।
च्याम्पियन ललितपुरले नगद ८० लाख रुपैया पुरस्कार प्राप्त गरेका छन भने उपविजेता पोखराले ३० लाख हात पारे ।
दुई उत्कृष्ट टिमबीचको फाइनल अनुमान गरे जस्तै प्रतिस्पर्धात्मक र रोमाञ्चक बन्यो । खेलको सुरुवात केही सुस्त रहेपनि इमोह इजेकेलले पहिलो हाफको अन्त्यतिर गोल गर्दै साविक विजेता ललितपुरलाई अग्रता दिलाए ।
इमोह इजेकेलले खेलको ४२औं मिनेटमा गोल गर्दै ललितपुर सिटीलाई अग्रता दिलाएका थिए । इमोह इजेकेलले मनोज राईको क्रसमा गोल गर्दै साविक विजेतालाई अग्रता दिलाए । मनोज राईको क्रसलाई गोलकिपर प्रिसोले जम्प गरेर पन्च गर्न खोजे । तर उनी सफल नहुँदा इमोह इजाकियलको गोल गरे ।
यसअघि खेलको १४ औं मिनेटमा पापा इबाउ केबेको प्रहार क्रसबार माथिबाट बाहिरियो । खेलको २३ औं मिनेटमा पोखराका सुदिल राईको क्रस ललितपुरका डिफेन्डरलाई लागेर रिबाउन्डमा आएको बललाई कप्तान आयुष घलानले बक्स बाहिरबाट हानेको प्रहारले सही दिशा लिन सकेन् ।
२७ औं मिनेटमा पोखरा फेरि चुक्यो । जो आइडोको फ्रि–किकमा स्टेफन समिर बिनोङको पावरफुल सट पोष्ट नजिकैबाट बाहिरियो । ३४ औं मिनेटमा आयुषले दिएको थ्रु–पासमा स्ट्राइकर बिनोङले प्रहार गर्नपर्ने बललाई कन्ट्रोल गर्न खोजे । ललितपुरका कप्तान तथा डिफेन्डर अनन्त तामाङले सो बललाई क्लियर गरिदिए ।
खेलको ४८ औं मिनेटमा ललितपुरले अग्रता दुगुना गर्ने अवसर गुमायो । इमोह इजिकियलल राईट फ्लयांकबाट दिएको उत्कृष्ट पासमा केरभेनमस बेलफोर्टले छ यार्ड बक्सबाट बललाई राम्ररी कनेक्ट गर्न सकेनन् ।
खेलको ६१ औं मिनेटमा इमोहले तीन डिफेन्डरलाई छल्लाउँदै हानेको पावरफुल सट पोष्टमा लागेर फर्कियो ।
खेलको ६३ औं मिनेटमा पोखराले खेललाई १–१ को बराबरीमा पुर्यायो पदम भट्टराईको क्रसमा स्टेफन समिरको हेडरलाई ललितपुरका गोल किपर जेफ्री बाल्टसले ब्लक गरे । तर रिबाउन्डमा क्लोज रेन्जबाट गोल गर्न सफल रहे । खेल १–१ को रोमाञ्चक मोडमा पुग्यो ।
तर फेरि ललितपुरले अग्रता बनायो । खेलको ७४ औं मिनेटमा पोखराका डिफेन्डरहरूले क्लियर गर्ने नसकेको बलमा इमोहको क्रसमा पापा इबाउले बक्सभित्रबाट सहज गोल गरे । यही गोल निर्णायक बन्दा ललितपुरले लगातार एनएसएल उपाधि जिते ।
ललितपुरका कप्तान अनन्त तामाङसहित सनिश श्रेष्ठ, आदित्य शाक्यसँगै विदेशी खेलाडीहरु जेफ्री बाल्टुस, इमोह इजेकेल र पापा इबोउ केबेले लगातार दोस्रो पटक एनएसएल उपाधि जिते ।
यसैबीच पोखरा थन्डर्सका आयुष घलान नेपाल सुपर लिग (एनएसएल)को सर्वोत्कृष्ट घोषित भएका छन् । उनले २ लाख ५० हजार रुपैयाँ प्राप्त गरे । ललितपुर सिटी एफसीका सन्तोष खत्री इमर्जिङ खेलाडी चुनिए छन् । ललितपुरका मणि कुमार लामा इनरजेटिक खेलाडी चयन भएका छन् । दुवैले समान १ लाख रुपैयाँ प्राप्त गरे ।
पोखराका गिलामो प्रिसो एनएसएलको उत्कृष्ट गोल किपर बने । उनले ५ खेलमा क्लि सिट राखेका थिए । उनले पनि १ लाख रुपैयाँ प्राप्त गरे । धनगढी एफसीका अहमद हिजाजी सर्वाधिक गोलकर्ता रहे । उनले यो सिजन कुल ५ गोल गरेका थिए । ३ सिजनमा उनले कुल ९ गोल गरेका छन् । झापा एफसी फेयर प्ले टिम बनेको छ ।
यसैगरी नेपाली राष्ट्रिय महिला टिमकी खेलाडी प्रिती राईलाई स्कुटर प्रदान गरिएको छ । उनी एनएसएलकी गुडविल एम्बेसडर हुन् ।

भक्तपुर, बैशाख १३
भक्तपुरमा पहिलो पटक राष्ट्रव्यापी फुल कन्ट्याक्ट किक बक्सिङ प्रतियोगिता हुने भएको छ । नेपाल किक बक्सिङ संघ भक्तपुर जिल्ला समितिले शनिवार पत्रकार सम्मेलन गर्दै भक्तपुरमा पहिलो पटक राष्ट्रव्यापी फुल कन्ट्याक्ट किक बक्सिङ प्रतियोगिता हुन लागेको जानकारी दिएको हो ।
प्रतियोगिता यही वैशाख १९ र २० गते दुई दिन भक्तपुरको जगातीमा हुने छ । दुई दिने प्रतियोगितामा सातै प्रदेशका २० भन्दा बढी जिल्लाबाट करिब १२० जना खेलाडीहरू सहभागी हुने आयोजक किक बक्सिङ संघ भक्तपुरका अध्यक्ष कृष्णराम जाकिबञ्जारले जानकारी दिए ।
उनका अनुसार प्रतियोगिताबाट राष्ट्रिय स्तरका उत्कृष्ट खेलाडीहरू पहिचान गरी प्रशिक्षण दिई भविष्यमा अन्तर्राष्ट्रिय प्रतियोगितामा नेपालको प्रतिनिधित्व गर्न सक्ने खेलाडी उत्पादन गर्ने उद्देश्य रहेको छ ।
प्रतियोगिता अन्तर्राष्ट्रिय मान्यता अनुसार तौल तथा वर्गगत रूपमा हुने समेत अध्यक्ष जाकिबञ्जारले जानकारी दिए । प्रतियोगितामा कुल ११ वटा तौल तथा वर्गगत प्रतिस्पर्धाहरू हुने छन् जसमा पुरुषतर्फ ५१ केजी, ५४ केजी, ५७ केजी, ६३ दशमलव ५ केजी, ६७ केजी, ७५ केजी र खुल्ला तौल वर्गमा प्रतिस्पर्धा हुने छ भने महिलातर्फ ५२ केजी, ५७ केजी, ६० केजी र खुल्ला तौल वर्गमा प्रतिस्पर्धा हुने छ ।
यस्तै प्रतियोगिताको विशेष आकर्षणको रूपमा २ वटा प्रो फाइट (व्यावसायिक स्तरका खेल) समेत खेलाइने अध्यक्षले जानकारी दिए ।
यस्तो किसिमको प्रतियोगिता भक्तपुरमा पहिलो पटक हुन लागेको बताउँदै उनले यस्ता प्रतियोगिताबाट खेलाडी तिखारिने तथा व्यावसायिक रूपमा खेलमा लाग्न सहयोग समेत मिल्ने अपेक्षा गरिएको बताए ।
खेलाडीहरूको सुरक्षालाई मध्यनजर गर्दै आयोजक समितिले प्रत्येक खेलाडीलाई प्रतियोगिता अवधिभर लागू हुने गरी रु. २ लाख सम्मको बिमा व्यवस्था गरेको सङ्घका सचिव राजु सिंह बजिकोले जानकारी दिनुभयो । उहाँका अनुसार प्रतियोगिता विश्व किक बक्सिङ महासङ्घ(धब्प्इ) द्वारा स्वीकृत प्–१ नियमावली अनुसार सञ्चालन हुनेछ । प्रत्येक बाउट ३ राउन्डको हुनेछ, र प्रत्येक राउन्डको अवधि २ मिनेट निर्धारण गरिएको समेत उहाँले जानकारी दिनुभयो ।
प्रतियोगितामा खेलाडीहरूलाई शिल्ड प्रमाणपत्र तथा नगद पुरस्कारले समेत सम्मान गरिने उहाँले जानकारी दिनुभयो ।

भक्तपुर, बैशाख १३
नेपाल पुलिस क्लबले पहिलो पटक केएनपी नेरोल्याक शेर बहादुर खड्का स्मृति राष्ट्रिय महिला भलिबलको उपाधि जितेको छ । राष्ट्रिय खेलकुद परिषदको कभर्ड हलमा शनिवार सम्पन्न प्रतियोगिताको आठौं संस्करणको फाइनलमा पुलिसले ६ पटकको विजेता एपिएफलाई ३–० को सोझो सेटमा पराजित गर्दै पहिलो पटक उपाधि जितेको हो ।
एपिएफ विरुद्ध पुलिसले सुरुवात बाटै रवाफिलो प्रदर्शन गर्दै सहज जितका साथ उपाधि जित्न सफल भएको हो । एकपक्षीय शैलीको खेलमा पुलिसले पहिलो सेट २५–१५ ले जित्दै १–० को अग्रता बनायो । दोस्रो सेटमा एपिएफले केहि चुनौती दिने प्रयास गर्यो । तर यो सेट पनि २५–२३ ले गुमायो ।
उपाधि रक्षाको लागि एपिएफलाई तेस्रो सेट जित्नै पर्ने दवाब थियो । तर खेल पुलिसले २५–१६ ले सहजै आफ्नो पक्षमा पा¥यो र जितसँगै पहिलो पटक उपाधि पनि जित्न सफल भयो । उपाधिसँगै पुलिसले ४ लाख ९९ हजार र एपिएफले २ लाख ५० हजार रुपैयाँ प्राप्त गर्यो ।
प्रतियोगितामा पुलिस उपाधि जित्ने तेस्रो टोली हो । यसअघि छ पटक एपिएफ र एक पटक टिप टप न्यु डायमण्ड स्पोर्टस क्लबले जितेको थियो ।
प्रतियोगितामा पूर्व विजेता टिप टप न्यु डायमण्ड तेस्रो हुन सफल भयो । शनिवार नै सम्पन्न तेस्रो स्थानको लागि भएको प्रतिस्पर्धामा टिपटप न्यु डायमण्डले विभागीय टोली त्रिभुवन आर्मी क्लबलाई २५–१९, २५–१२ र २५–१८ को सेटमा हराउँदैं तेस्रो स्थानमा चित्त बुझाएको हो । तेस्रो भएको न्यु डायमण्डले १ लाख २५ हजार रुपैयाँ प्राप्त गर्यो ।
प्रतियोगितामा विजेता पुलिसकी कामना बिष्ट सर्वोत्कृष्ट खेलाडी बनिन् । उनलाई नगद ५० हजार प्रदान गरियो । पुलिसकी कमला पुन उत्कृष्ट सेटर, शान्ति कला उत्कृष्ट लिबरो र रूपेश कुमार बिष्ट उत्कृष्ट प्रशिक्षक बन्न सफल रहे ।
व्यक्तिगत एपिएफकी निरूता ठगुन्ना बेस्ट स्पाइकर र पुजा चौधरी उत्कृष्ट सर्भर बने । व्यक्तिगत पुरस्कार विजेताले जनही २५ हजार रुपैयाँ प्राप्त गरे । शेर बाहादुर खड्का मेमोरियल ट्रष्टको आयोजनामा बैशाख १० गते सुरु भएको प्रतियोगितामा ५ टोलीको सहभागिता थियो ।

भक्तपुर, बैशाख १३
नेपाल क्रिकेट संघ (क्यान)ले आइसिसी महिला विश्वकप एसिया छनोट खेल्ने १४ सदस्यीय टोली घोषणा गरेको छ । क्यानले शुक्रवार इन्दु बर्माको कप्तानीमा १४ सदस्यीय टोली घोषणा गरेको हो । घोषित टोलीमा क्यानले पुजा महतोलाई उपकप्तान बनाएको छ ।
टोलीमा इन्दु र पूजाबाहेक रुविना क्षेत्री, रोमा थापा, बिन्दू रावल, कविता जैशी, सम्झना खड्का, राजमती ऐरी, रुवि पोद्दार, कविता कुँवर, सबनम राई, ईश्वरी विष्ट, मनीषा उपाध्यय र रिया शर्मा छन ।
प्रतियोगिता ९ मेदेखि २० मेसम्म थाइल्यान्डमा हुनेछ । प्रतियोगितामा घरेलु टोली र नेपालसहित बहराइन, भुटान, हङकङ, कुवेत, मलेसिया, कतार र युएई छन् ।
यी टोलीलाई तीन समूहमा विभाजन गरिएको छ । नेपाल भने समूह सी मा छ । यो समूहमा हङकङ र बहराइन छन् । नेपालले पहिलो खेल हङकङसँग ९ मेमा खेल्नेछ ।
यस्तै, १० मेमा बहराइन र १३ मेमा हङकङसँग पुनः खेल्नेछ । १५ मेमा बहराइनसँग अर्को खेल खेल्दै नेपालले लिगचरण सक्काउने छ । हरेक समूहको विजेताले फाइनल राउन्ड खेल्नेछन् । प्रतियोगिताको शीर्ष दुई टोलीले ग्लोबल क्वालिफायरमा स्थान बनाउने प्रावधान रहेको छ ।
ग्लोबल क्वालिफायरमा भने १० राष्ट्रबीच प्रतिस्पर्धा हुनेछ । यहाँबाट शीर्ष चार टोली अर्को वर्ष इङ्गग्ल्यान्डमा हुने महिला टि ट्वान्टी विश्वकपमा छनोट हुनेछन् ।

भक्तपुर, बैशाख १३
सशस्त्र प्रहरी बलको नेपाल एपिएफ एफसीले लुम्बिनी कप अन्तर्राष्ट्रिय आमन्त्रण महिला फुटबल प्रतियोगिताको उपाधि जितेको छ । नेपालगञ्ज रंगशालामा शुक्रवार सम्पन्न फाइनलमा एपिएफले अर्को विभागिय क्लव नेपाल पुलिस क्लवलाई १–० ले पराजित गर्दै उपाधि जितेको हो ।
एपिएफलाई उपाधि दिलाउन खेलको अन्तिम समयमा गिता रानामगरले निर्णायक गोल गरे । उनले इन्ज्युरी समयमा गरेको हेड गोलमा परिणत भएपछि एपिएफलाई विजयी बनाएको हो ।
निर्धारित समयमा गोलरहित बराबरी भई खेल टाइब्रेकरतर्फ धकेलिएको बेला एपिएफले लगातार तीन कर्नरको मौका पायो । उक्त सेटपिसको अन्तिम कर्नरमा प्राप्त बललाई गिताले हेड मार्फत गोल गर्दै टोलीलाई च्याम्पियन बनाएका हुन । गीता प्लेयर अफ द फाइनल घोषित भइन् ।
विजेता एपिएफले ५ लाख ५ हजार ५ सय ५५ रुपैयाँ र दोस्रो पुलिसले २ लाख ५० हजार रुपैयाँ प्राप्त गर्यो । यो एपिएफको महिला फुटबलमा वर्षको पहिलो उपाधि हो । गत वर्ष लिगसहित ३ वटा उपाधि जितेको थियो ।
एपिएफकी प्रशिक्षक भगवती थापाले फाइनलमा टोलीले सोचे अनुरुपको प्रदर्शन गर्न नसकेको र पुलिसले कडा चुनौती दिएको बताइन् ।

एपिएफकी कप्तान अनिता बस्नेत प्रतियोगिताको सर्वोत्कृष्ट खेलाडी घोषित भइन् । पुलिसकी उषानाथ उत्कृष्ट गोलकिपर, एपिएफकी गिता राना उत्कृष्ट डिफेन्डर, सुरु लिम्बु उत्कृष्ट मिडफिल्डर, अनिता केसी उत्कृष्ट फरवार्ड र भगवती थापा उत्कृष्ट प्रशिक्षक घोषित भइन् । उत्कृष्टले समान १० हजार रुपैयाँ प्राप्त गरे ।
अन्तरालको आयोजना तथा बाँके जिल्ला फुटबल संघको सहकार्यमा भएको प्रतियोगितामा घरेलु टिम बाँके–११, सशस्त्र प्रहरी बलको एपिएफ, नेपाल पुलिस क्लब, त्रिभुवन आर्मी क्लब, कर्णाली प्रदेश फुटबल संघ, सुदूरपश्चिम प्रदेश फुटबल संघ, रौतहट जिल्ला फुटबल संघ र भारतको सिलगुडी फुटबल क्लब सहभागी थिए ।
यस्तै फाइनल अघि बाँके जिल्लाकै खेलाडी नेपाल पुलिसकी कप्तान निरु थापालाई सम्मान गरिएको थियो ।
बाँकेको जानकी गाउँपालिका वडा नम्बर १ शिवपुरी घर भएर देश तथा विदेशमा पहिचान बनाइसकेकी खेलाडी निरुलाई बाँके जिल्ला फुटबल संघले नगद २५ हजार र प्रमाणपत्रले सम्मान गरेको हो । निरूलाई लुम्बिनी प्रदेशका सामाजिक विकास मन्त्री जन्मजय तिमिल्सिना,बाँके जिल्ला फुटबल संघका अध्यक्ष भोजराज शाही र अन्तरालका कार्यकारी जयनारायण शाह लगायतले सम्मान गरेका थिए ।

भक्तपुर, बैशाख ११
सूर्यविनायक नगरपालिकाले नगरभित्र सञ्चालित सबै खानेपानी आयोजनाहरु काठमाण्डौं उपत्यका खानेपानी लिमिटेड (केयुकेएल)मार्फत सञ्चालन हुने गरी काठमाण्डौं उपत्यका खानेपानी बोर्डलाई हस्तान्तरण गर्ने निर्णय गरेको छ ।
नगरपालिकाले गत चैत्र ३१ बसेको कार्यपालिका बैठकले नगरभित्र स्वायत्तरुपमा उपभोक्ताहरुले सञ्चालन र व्यवस्थापन गरिरहेका नगरपालिका क्षेत्रभरी सञ्चालित सबै खानेपानी आयोजनाहरुको सञ्चालन र व्यवस्थापन केएलकेयु मार्फत हुने गरी काठमाण्डौं उपत्यका खानेपानी बोर्डलाई हस्तान्तरण गर्ने निर्णय गरेको हो ।
नगरपालिकाले नगरभित्रको खानेपानी वितरण र व्यवस्थापनमा दोहोरो तेहोरो व्यवस्थापकिय जिम्मेवारीको अवस्था आउन नदिन यस्तो निर्णय गरेको जनाएको छ । सूर्यविनायक नगरभित्र केयुकेएलद्धारा व्यवस्थापन भइरहेको खानेपानी आपुर्तीको व्यवस्था मिलाउन निर्माण भएको सूर्यविनायक बृहत खानेपानी आयोजनाको संरचना निर्माण कार्य अन्तिम चरणमा पुगी पानी वितरण गर्ने अवस्थामा रहेकोले खानेपानीको दोहोरो तेहोरो व्यवस्थापकिय जिम्मेवारीको अवस्था आउन नदिन तथा समस्त नगरवासीहरुलाई सहज र सर्वसुलभ रुपमा खानेपानी उपलब्ध गराउन नगरपालिका, खानेपानी बोर्ड र केयुकेएलका प्रतिनिधिहरुबीच पटक पटक भएका बैठकको निर्णय अनुसार खानेपानी आयोजनाहरु खानेपानी बोर्डलाई हस्तान्तरण गर्ने निर्णय भएको नगरपालिकाका प्रमुख प्रशासकिय अधिकृत तारानाथ लुईटेलले जानकारी दिनुभयो ।
उक्त निर्णय गर्नुअघि नगरपालिकाले नगरक्षेत्रका सरोकारवालाहरु र संघ तथा प्रदेश तहमा नगरपालिका क्षेत्रबाट प्रतिनिधित्व गरिरहनु भएका निर्वाचित जनप्रतिनिधिहरुसँग छलफल गरेको लुईटेलले बताउनुभयो । उहाँका अनुसार नगरपालिकाको नयाँ निर्णयसँगै यसपूर्व नगरपालिका र केयुकेएलबीच खानेपानी व्यवस्थापनका लागि भएको सम्झौता समेत खारेज हुने छ ।
सूर्यविनायक नगरपालिकाभित्र तत्कालिन गाविसको बेला स्थापना भई सञ्चालनमा रहेका दर्जनौ खानेपानी उपभोक्ता समितिहरु रहेका छन । ती समितिहरुले डिप बोरिङ र लिफ्ट प्रणालीमा आधारित खानेपानी आयोजनाहरु सञ्चालन गरिरहेका छन । ती समितिहरुले खानेपानीको स्रोत व्यवस्थापन गरी उपभोक्ताहरुको घरघरमा खानेपानी वितरण गर्दै आइरहेका छन । ती मध्ये कतिपयले समयमा साधारण सभा र अधिवेशन नगर्ने तथा निष्कृय समेत रहेका छन ।
सूर्यविनायक नगरपालिकाका कतिपय वडाहरुमा खानेपानीको समस्या विकराल रहेको छ । उक्त समस्या समाधान गर्न नगरपालिकाले केयुकेएलको व्यवस्थापनमा रहेको मेलम्चीको पानी ल्याउन विभिन्न चरणमा छलफल गरी सूर्यविनायक बृहत खानेपानी आयोजना सञ्चालनमा आएको हो ।
अहिले उक्त आयोजना सम्पन्न भई पानी वितरणको चरणमा प्रवेश गर्ने बेला नगरपालिकाले नगरभरी सञ्चालित सबै खानेपानी आयोजनाहरु केयुकेएलमार्फत सञ्चालन र व्यवस्थापन गर्ने गरी खानेपानी बोर्डलाई हस्तान्तरण गर्ने निर्णय गरेको हो ।
नगरपालिकाको निर्णयसँगै वडा कार्यालयहरुले वडाभित्र सञ्चालित खानेपानी उपभोक्ता समितिहरुलाई छलफलका लागि बोलाएको कटुञ्जे घट्टेखोला (लिफ्ट) खानेपानी जलस्रोत समितिका सदस्य रमेश खड्काले जानकारी दिनुभयो ।
यसैबीच नगरभरी सञ्चालित सबै खानेपानी आयोजनाहरु केयुकेएलमार्फत सञ्चालन र व्यवस्थापन गर्ने गरी खानेपानी बोर्डलाई हस्तान्तरण गर्ने सूर्यविनायक नगरपालिकाको निर्णयको स्थानीय बासिन्दा र खानेपानी उपभोक्ता समितिहरुले विरोध गरेका छन ।
उनीहरुले नगरपालिकाको निर्णयले स्थानीय सरकार जनताको आधारभुत आवश्यकता परिपुर्ती गर्ने जिम्मेवारीबाट पन्छिएको आरोप समेत लगाएका छन । नगरपालिकाले खानेपानी उपभोक्ता समितिहरुसँग कुनै छलफल नै नगरी स्थानीय जनताको करोडौं लगानी र वर्षौदेखीको मेहनत रहेको खानेपानी आयोजनाहरु अर्को निकायलाई हस्तान्तरण गर्ने निर्णय गैरजिम्मेवारीपूर्ण रहेको जिकिर समेत गरेका छन ।
सो सम्बन्धमा नगर उपप्रमुख सरिता तिमसिना भट्टराई र प्रमुख प्रशासकिय अधिकृत तारानाथ लुईटेलसमक्ष विरोध जनाइसकेको खड्काले जानकारी दिनुभयो । उहाँका अनुसार उपप्रमुख भट्टराई र प्रमुख प्रशासकिय अधिकृत लुईंटेलले गोलमोटल जवाफ दिएका छन ।
उपभोक्ताले आफ्नो गाँस काटेर निर्माण गरेको खानेपानी आयोजना र जनताको करोडरौको सम्पत्ति नगरपालिकाको एउटा निर्णयका भरमा अन्य निकायलाई जिम्मेवारी दिन नसकिने उहाँले बताउनुभयो ।
कटुञ्जे घट्टेखोला (लिफ्ट) खानेपानी जलस्रोत समितिका सदस्य र उपभोक्ताहरू आफुहरूले दुःख गरेर जनताको घरदैलोमा बिहान बेलुकी सहज रूपमा ख्वाइ रहेको पानीमा कसैको गिद्धेदृष्टी परेको ठहर गरेर गर्दै छिट्टै उपभोक्ता भेला बोलाउने समितिले तयारी गरेको खड्काले बताउनुभयो ।