Category: भर्खरै

भक्तपुर, जेठ २३
डेनमार्कले नेपाललाई १४ लाख डोज कोरोना विरुद्धको खोप दिने भएको छ । डेनमार्कले एस्ट्राजेनिकाको खोप १४ लाख दिने जानकारी पत्रमार्फत स्वास्थ्य सेवा विभागलाई जानकारी दिएको विभागको आपूर्ति व्यवस्थापन महाशाखाका प्रमुख भीमसिंह तिंकरीले बताउनुभयो ।
उहाँले खोप ल्याउन सहजीकरण गरिदिन विभागका महानिर्देशकले युनिसेफलाई पत्राचार समेत गरिसकेको जानकारी दिनुभयो । डेनमार्कले दिने खोप कोभ्याक्स अन्तर्गतको भने नभएको उहाँले जानकारी दिनुभयो ।

भक्तपुर, जेठ २३
प्रधानमन्त्री केपी शर्मा ओलीले आज साँझसम्म मन्त्रिपरिषद बिस्तार गर्ने तयारी गर्नुभएको छ । उहाँले आफुसँग भएका ६ मन्त्रालयमा पुर्व माओवादी, एमालेबाट निष्कासित नेता माधवकुमार नेपालसमूह छाडेर आएका र आफ्ना पक्षका केही नेतालाई समेटेर मन्त्रिपरिषदलाई पूर्णता दिने तयारी गर्नुभएको हो ।
प्रधानमन्त्री ओलीले शुक्रवार मात्रै जनता समाजवादी पार्टी (जसपा)का १० नेतालाई समावेश गर्दै मन्त्रिपरिषद पुनर्गठन गर्नुभएको थियो । उहाँले तत्कालिन मन्त्रिपरिषदका १२ जनालाई बिदा दिएर १३ जना नयाँ मन्त्री नियुक्त गर्नुभएको थियो ।
शुक्रवार प्रधानमन्त्री ओलीको दल नेकपा एमालेबाट मन्त्री बन्ने नाम टुंगो लाग्न नसक्दा मन्त्रिपरिषदले पूर्णता पाउन नसकेको स्रोतले बताए । विशषेगरी गृहमन्त्रीमा कुरा नमिल्दा एमालेबाट मन्त्री बन्नेको नाम टुंगो लाग्न नसकेको बताईएको छ ।
शुक्रवार दिनभरी भक्तपुरका नेता महेश बस्नेतको नाम गृहमन्त्रीमा चर्चामा थियो । उहाँ निकट युवा विद्यार्थी नेताहरुलाई उहाँलाई सामाजिक सञ्जालमार्फत बधाई पनि दिईसकेको थियो, तर अन्तमा रोकिएको थियो ।
प्रधानमन्त्री ओलीले रक्षा आफैंसँग राखी बाँकी रहेका गृह, उद्योग, कृषि, सामान्य प्रशासन, वन र सञ्चार मन्त्रालयमा मन्त्री नियुक्त गर्ने तयारी गर्नुभएको छ । सो अनुसार मन्त्री बन्नेहरुमा महेश बस्नेत नारदमुनी राना, खगराज अधिकारी, कर्ण थापा, पार्वती बिसुंखे, राजबहादुर शाहीक विशाल भट्टराई र राजेन्द्र राई (धनकुटा), विद्या भट्टराईको नाम चर्चामा छ ।
बस्नेतलाई गृहप्रशासनले नरुचाएका कारण गृहमन्त्री बनाउन ओली पछि हटेको बताईएको छ । चुनाव घोषणा गरिएको र संसद पुनःस्थापना नभए चुनाव गराउन सक्नेलई गृहमन्त्री बनाउने तयारी ओलीको रहेको छ । बस्नेत नभए खगराज अधिकारीलाई गृहमन्त्री बनाउने तयारी पनि गरिएको स्रोतले जानकारी दिए । गहमन्त्रीमा कर्ण थापाको पनि दावी रहेको बताईएको छ । ओलीले माधव समूह छाडेर आएका दैलेखकी पार्वती बिसुंखेलाई मन्त्री बनाउने तयारी गरेको छ ।
ओलीले राष्ट्रियसभामा लुम्बिनी प्रदेशमा पराजित पूर्वमाओवादीका चन्द्रबहादुर खड्कालाई मन्त्री बनाउने तयारी गरेको छ । त्यस्तै माओवादीबाट एमाले प्रवेश गरेका अछामका झपट बोहोरा, ज्वालाकुमारी साहलगायतको नाम पनि मन्त्री बन्ने चर्चामा रहेको छ ।

काठमाडौं, जेठ २३
नेपाल कम्युनिस्ट पार्टी (एमाले)का पूर्वमहासचिव माधवकुमार नेपाल समूह नयाँ दल दर्ता गर्ने निष्कर्षमा पुगेको छ ।
प्रतिनिधिसभा विघटन मुद्दा सर्वोच्च अदालतमा बहस जारी रहेकाले आउने फैसलापश्चात् दल दर्ता गर्ने तयारीमा नेपाल समूह छ । यसबीच पार्टी एकताका लागि छलफल जारी राख्ने विकल्प खुलासमेत राखिएको छ ।
पछिल्लो राजनीतिक अवस्थाबारे समूह नेतासँग छलफल गरिरहेका नेपाललाई छुट्टै दल गठन गर्न सुझाव आइरहेको छ । शनिबार पार्टी जिल्ला पदाधिकारी, स्थायी कमिटी सदस्यसंग छलफल गरेका नेपालले गत बिहीबार र शुक्रबार केन्द्रीय कमिटी बैठक राखेका थिए ।
नेपालनिकट एमाले पोलिटब्युरो सदस्य जगननाथ खतिवडाका अनुसार नयाँ दल दर्ताका लागि नेताहरूले सुझाव दिएका छन् । ‘पार्टी एकताका लागि वार्ता गर्नुअघि ११ नेतालाई गरिएको कारबाही फिर्ता लिनुपर्छ, त्यसपछि औपचारिक वार्ता हुन्छ,’ उनले भने, ‘अधिकांश नेताले यही सुझाव दिँदै ढिला नगरी नयाँ दल दर्ता गरी अघि बढ्नुपर्ने सुझाव दिइरहनुभएको छ ।’
सर्वोच्च अदालतको फैसलापश्चात् ब्युँतिएको एमाले पार्टी एकताअघिकै अवस्थाबाट सञ्चालन हुनुपर्ने अडान नेपाल समूहको छ । २ जेठ २०७५ कै एमाले कमिटी, नेतृत्वअनुसार अघि बढ्नुपर्ने अडान राख्दै आएको सो समूहले त्यसयता ओली समूहले गरेका सबै निर्णय खारेज हुनुपर्ने बताउँदै आएको छ ।
‘एक व्यक्ति एक प्रमुख जिम्मेवारी’अनुसार ओलीले प्रधानमन्त्री र पार्टी अध्यक्षमध्ये कुनै एकबाट राजीनामा दिनुपर्ने सर्तसमेत नेपाल समूह नेताले उठाएका छन् ।
राजधानी दैनिक अनलाइनबाट

एजेन्सी, जेठ २३
अफ्रिकी मुलुक बुर्किना फासोको उत्तरी भागमा रहेको एउटा गाउँमा हतियारधारीहरूले आक्रमण गर्दा एक सय भन्दा बढीको ज्यान गएको छ । अन्तराष्ट्रिय सञ्चारमाध्यमहरुका अनुसार शुक्रवार राति सोल्हान गाउँमा गरिएको गोलाबारी र आगजनीमा कम्तिमा १३२ जनाको ज्यान गएको छ ।
आक्रमणको हालसम्म कसैले जिम्मा लिएको छैन । तर पछिल्ला दिनहरूमा त्यहाँ इस्लामी समूहहरूको गतिविधि बढेको बताईएको छ । उक्त क्षेत्रमा सशस्त्र समूहहरूले छापा मार्ने र अपहरण गर्ने जस्ता गतिविधि गर्दै आएका छन् ।
खासगरी नीजेर र मालीसँग जोडिएका क्षेत्रमा त्यस्ता घटनाहरू सामान्य भइरहेका छन् । बुर्किना फासोले आफ्ना छिमेकी राष्ट्रहरूमा जस्तै गहिरिँदै गएको सुरक्षा संकटको सामना गरिरहेको छ ।
फ्रान्सेली फौजले माली, चाड, मोरीटेनीया, नीजेर र बुर्कीना फासोका सैनिकलाई अतिवादीहरूसँग लड्न सहयोग गरिरहेका छन् । तर हालसालै भएको कु का कारण फ्रान्सले यसै हप्ता मालीलाई गरिरहेको सहयोग भने रोकेको छ ।
बुर्किना फासोको इतिहासमा पछिल्लो वर्षहरुमा भएको यो भयानक आक्रमण हो । बुर्किना फासोका राष्ट्रपति रोच काबोरीले तीन दिनका लागि राष्ट्रिय शोकको घोषणा गर्नुभएको छ । दानवी शक्तिविरुद्ध सबै एक हुनु पर्ने पनि उहाँले उल्लेख गर्नुभएको छ । संयुक्त राष्ट्रसंघका महासचिव एन्टोनिओ गुट्रेसले घटनाको गम्भीर निन्दा गर्दै आफूलाई आक्रोशित बनाएको बताउनुभएको छ ।
शुक्रबार राति नै भएको अर्को आक्रमणमा सोल्हान गाउँबाट १५० किलोमिटर उत्तरमा रहेको तादार्यात गाउँमा १४ जनाको ज्यान गएको छ । अघिल्लो महिना बुर्किना फासोको पूर्वी क्षेत्रमा भएको आक्रमणमा ३० जनाको ज्यान गएको थियो ।

भक्तपुर, जेठ २३
संसद विघटनविरुद्धको रिटमाथि आजदेखी सर्वोच्च अदालतमा नयाँ संवैधानिक इजलासमा सुनुवाई हुने भएको छ । इजलासमा बसेका न्यायधिशहरु माथि प्रश्न उठेपछि प्रधानन्यायधिश चोलेन्द्रशम्शेर जबराले गत जेठ १८ गते सुनुवाई स्थगित गरी आजलाई पेशी तोक्नुभएको थियो ।
यसअघि प्रधानन्यायाधीश राणासहित न्यायाधीश दीपककुमार कार्की, डा आनन्दमोहन भट्टराई, तेजबहादुर केसी र बमकुमार श्रेष्ठको संवैधानिक इजलास गठन गरेको थियो । तर रिट निवेदक पक्षका अधिवक्ताहरुले इजलासमा बसेका न्यायधिशद्धय केसी र श्रेष्ठमाथि प्रश्न उठाएपछि प्रधानन्याधिश राणाले गत १८ गते सर्वोच्च बारसँग छलफल गरेर सुनुवाई नै स्थगित गर्नुभएको थियो ।
रिट निवेदनमा गत जेठ १४ गतेदेखी सुनुवाई भएपनि विषयवस्तुमा केन्द्रीत भएर सुनुवाई शुरु हुन सकेको छैन । रिट निवेदन पक्षका अधिवक्ताहरुले बहशको शुरु मै इजलासमाथि प्रश्न उठाएपछि विषय प्रवेश गर्न नसकेको हो ।
न्यायाधीश केसी अघिल्लो पटकको प्रतिनिधिसभा विघटनविरुद्धको मुद्दाको सुनुवाइमा पनि सहभागी भएको र श्रेष्ठले नेकपा नाम विवादमा फैसला गरेको उल्लेख गर्दै उहाँहरु इजलासमा बस्न नमिल्ने भनी रिट निवेदकका कानून व्यवसायीले तर्क राखेका थिए । न्यायाधीशद्वय केसी र श्रेष्ठका विषयमा कानून व्यवसायीले प्रश्न उठाएपछि विवाद शुरु भएको हो । उनीहरुले इजलास नछाड्ने लिखित जानकारी दिएपछि इजलासबाट न्यायाधीशद्वय डा भट्टराई र कार्कीले नबस्ने घोषणा गर्नुभएको थियो ।
निवर्तमान प्रतिनिधि सभाका १४६ सदस्यसहितका २६ रिट निवेदन संसद् पुनःस्थापना पक्षमा छन । प्रतिनिधिसभामा आफ्नो बहुमतका आधार पेश गर्नुभएका प्रधानमन्त्री ओलीलाई नै पुनः नियुक्ति गर्नुपर्ने माग गर्दै अधिवक्ता धनजीत बस्नेत, कृष्ण भण्डारी, राजाराम घिमिरे लगायतले छुट्टाछुटै चार रिट निवेदन दर्ता गराउनुभएको छ ।
कांग्रेस सभापति शेरबहादुर देउवा, नेपाल (माओवादी केन्द्र) का अध्यक्ष पुष्पकमल दाहाल ‘प्रचण्ड’, नेकपा )एमाले) का तत्कालीन नेता माधवकुमार नेपाल, जनता समाजवादी पार्टी नेपालका अध्यक्ष उपेन्द्र यादव र राष्ट्रिय जनमोर्चाकी दुर्गा पौडेलसहित १४६ निवर्तमान सांसदले प्रतिनिधिसभा पुनःस्थापना गरी कांग्रेस सभापति देउवालाई प्रधानमन्त्री बनाउनुपर्ने माग गरेका छन् ।
मन्त्रिपरिषद्को गत जेठ ७ को सिफारिसमा प्रतिनिधि सभा विघटन गरी राष्ट्रपति विद्यादेवी भण्डारीले आगामी कात्तिक २६ र मंसिर ३ गते मध्यावधि निर्वाचनको मिति तोक्नुभएको थियो ।
सर्वोच्चमा नयाँ संवैधानिक इजलास वरिष्ठताको आधारमा गठन गर्ने तयारी प्रधानन्याधिश राणाले गर्नुभएको बताईएको छ । त्यसका लागि नियमावली संशोधन गर्न गत शुक्रवार सर्वोच्च अदालतको पूर्ण बैठक बसेको थियो तर बैठकले हालको नियमावलीले नै प्रधानन्यायधिशले वरिष्ठताको आधारमा संवैधानिक अदालत गठन गर्न कुनै बाधा नरहेकाले नियमावली संशोधन गर्नु नपर्ने निष्कर्ष निकालेको थियो । अहिले प्रधानन्यायाधीश चोलेन्द्र शम्शेर जबरापछि दीपककुमार कार्की, मीरा खडका, हरिकृष्ण कार्की र विश्वम्भर श्रेष्ठ रोलक्रममा छन् ।
यसैबीच अधिवक्ता राजाराम घिमिरेले ११ जना न्यायाधीशको संसद विघटनविरुद्धको रिटमा सुनुवाइ गर्न स्वार्थ बाझिने भन्दै ती न्यायधिश संवैधानिक इजलासमा बस्न नमिल्ने निवेदन दिनुभएको छ तर निवेदन भने दर्ता भएको छैन ।
घिमिरेले न्यायाधीश दीपककुमार कार्की, मीरा खड्का, हरिकृष्ण कार्की, विश्वम्भर श्रेष्ठ, ईश्वर खतिवडा, आनन्दमोहन भट्टराई, अनिलकुमार सिन्हा, प्रकाशमान सिंह राउत, सपना मल्ल प्रधान, तेजबहादुर केसी र बमकुमार श्रेष्ठलाई नराख्न माग गर्नुभएको हो ।

अन्तर्राष्ट्रिय ख्याति प्राप्त नेपालका हस्तकलाका वरिष्ठ कलाकार एवं मूर्तिकार राजकुमार शाक्यको आज ५४ वर्षको उमेरमा निधन भएको छ ।
उहाँ केही समय अगाडि कोरोना संक्रमित भइ औषोधोपचार पश्चात निको भइसकेको र केहीदिन अघि पुनः स्वास्थ्यमा खराबीका कारण अस्पताल भर्ना हुनुभएको थियो ।
उहाँले भुटानमा ११५ फिटको पद्मसम्भव गुरुका मूर्ति स्थापना गर्ने कार्यमा प्रमुख भूमिका खेल्नुभएको थियो । जसको कारण भुटानी राजकीय सम्मान समेत उहाँले पाउनु भएको छ । उहाँले थुप्रै राष्ट्रिय अन्तर्राष्ट्रिय पुरस्कारहरु पनि  पाउनु भएको थियो ।
उहाँ वाइएमबिए धम्म स्कलरका दाता पनि हुनुहुन्छ ।
उहाँको श्रीमति र दुइ छोरा हुनुहुन्छ ।

भक्तपुर, जेठ २२

नेपाल आयल निगमले शनिबार राती १२ बजेदेखि लागु हुनेगरि पेट्रोलियम पदार्थको मूल्य बृद्धि गरेको छ । निगमले एक विज्ञप्ती जारी गर्दै पेट्रोल, डिजेल, मट्टितेल र हवाई इन्धनमा २–२ रुपैयाँको दरले मूल्य बृद्धि भएको जनाएको हो । अब काठमाडौं उपत्यकामा पेट्रोल १२५ रुपैयाँ, डिजेल र मट्टितेल १०८ रुपैयाँ तथा हवाई इन्धन ८० रुपैयाँ कायम गरिएको छ ।
निगमका अनुसार ईन्डियन आयल कर्पोरेसनले गत जेठ १८ गते पठाएको मुल्य अनुसार नयाँ मुल्य निर्धारण गरिएको हो । मुल्य समायोजन पश्चात पनि पेट्रोलमा प्रतिलिटर ५ रुपैंया ३२ पैसा, डिजेलमा प्रतिलिटर ३ रुपैंया १७ पैसा, खाना पकाउने एलपी ग्याँस प्रति सिलिण्डर २५८ रुपैंया ४६ पैसा घाटा रहेको निगमले जनाएको छ ।

भक्तपुर, जेठ २२

नेपालमा विगत २४ घण्टामा १६ हजार ८१४ नमुना परीक्षण गर्दा ५ हजार ४२ जना कोरोना संक्रमण देखिएको छ । त्यस्तै सो अवधिमा थप ६८ जनाको मृत्यु भएको र ८ हजार २४३ जना नयाँ संक्रमित थपिएको स्वास्थ्य तथा जनसंख्या मन्त्रालयले शनिवार जनाएको छ ।
नेपालमा पीसीआर परीक्षणबाट कुल संक्रमित संख्या पाँच लाख ८५ हजारभन्दा बढी पुगेको छ । कुल संक्रमितमध्ये ३९ प्रतिशत महिला छन । कुल संक्रमितमध्ये ८३ प्रतिशत निको भएका छन् भने १.६ प्रतिशतको मृत्यु भएको छ । अहिलेसम्म कुल ७ हजार ७९९ जनाको मृत्यु भएको मन्त्रालयले जनाएको छ ।
शनिवार काठमाण्डौं उपत्यकामा ९३७ जना संक्रमित थपिए, जसमध्ये काठमाण्डौंमा ७२३, भक्तपुरमा ७३ र ललितपुर १४१ जना छन ।
कुल ८६हजार २६८ सक्रिय संक्रमितमध्ये ६ हजार ६६० जना संस्थागत आइसोलेसनमा छन् । तीमध्ये १ हजार ४५१ आईसीयूमा र ३८४ जना भेन्टिलेटरमा छन ।

भक्तपुर, जेठ २२

नेकपा एमालेका नेता वामदेव गौतमले उपप्रधानमन्त्री एवम् जनता समाजवादी पार्टीका नेता राजेन्द्र महतोले संविधानको मर्म र भावना विपरित अभिव्यक्ति दिएको भन्दै दुःख व्यक्त गर्नुभएको छ । उहाँले सामाजिक सञ्जाल फेसबुकमार्फत शपथग्रहण गरेको आधा घण्टा नबित्दै महतोले अहिले पनि नेपाललाई बहुराष्ट्र र बहुराज्य बनाउने आन्दोलनमा रहेको भन्ने अभिव्यक्ति दिएकोमा आफु दुःखी भएको बताउनुभएको हो ।
‘नेपाल सरकारका उपप्रधानमन्त्री एवं जसपाका नेता राजेन्द्र महत्तोले संविधानको मर्म विपरित कार्य गर्नेछैन भनि सपथ ग्रहण गरेको आधा घण्टा नबित्दै नेपाललाई बहुराष्ट्र र बहुराज्य बनाउने मुक्ति आन्दोलन आफुले अहिले पनि संचालन गरिरहेको अन्तरवार्ता सुन्दा म अत्यन्त दुखी भएको छु,’ उहाँले लेख्नुभएको छ ।
गौतमले प्रधानमन्त्री के पी शर्मा ओलीले महतोको मुक्ति आन्दोलनबारे अनभिज्ञता प्रकट गरेकामा आश्चर्य व्यक्त गर्नुभएको छ । ‘राजेन्द्र महतोले अहिले पनि संचालन गरिरहेको त्यो कथित आन्दोलन नेपाललाई विखण्डन गर्ने भन्दा अर्को हुन सक्दैन । नेपाललाई बिघटन गर्ने आन्दोलनलाई कुनै पति देशभक्त नेपालीका निम्ति स्वीकार्य हुन सक्दैन । राजेन्द्र जीको त्यो मागलाई अस्विकार र विरोध मात्र गर्न सकिन्छ । प्रधानमन्त्री श्री के.पी.ओलीले राजेन्द्र महतोले संचालन गरिरहेको मुक्ति आन्दोलनका सम्बन्धमा अनभिज्ञता प्रकट गरेको सुन्दा आश्चार्य चकित भएको छु,’ नेता गौतमले उल्लेख गर्नुभएको छ ।
उहाँले नेपाल अनेकौं विशेषतासहितको राष्ट्र भएको उल्लेख गर्नुभएको छ । ‘नेपालको संविधानको धारा ३ मा स्पष्ट लेखिएको छ, नेपाल अनेकौं विशेषता सहितको राष्ट्र हो । त्यस्तै संविधानको धारा ४ मा स्पष्ट भनिएको छ अनेकौं विशेषता सहित नेपाल राज्य हो । यसको अर्थ हो, नेपालमा एउटा मात्र राष्ट्र छ र एउटा मात्र राज्य छ त्यो नेपाल हो,’ गौतमले लेख्नुभएको छ ।

भक्तपुर, जेठ २२, लक्ष्मी गारु

नेपाल मजदुर किसान पार्टी (नेमकिपा)का अध्यक्ष नारायणमान बिजुक्छेंले चुरे दोहनमा वर्तमान र पुर्व सरकारहरु जिम्मेवार रहेको बताउनुभएको छ । भक्तपुर नगरपालिकाले प्रकाशन गरेको ‘ङातापोल्हँ जीर्णोद्धार २०७७’ पुस्तक र प्राविधिक प्रतिवेदन अनलाइनमार्फत शनिबार सार्वजनिक गर्दै अध्यक्ष बिजुक्छेंले चुरे दोहनमा विदेशी स्वार्थ समेत रहेको बताउनुभएको हो ।
उहाँले चुरे पहाड नेपालको महत्वपूर्ण प्राकृतिक स्रोत भएकाले यसको संरक्षण गर्नुपर्नेमा समेत जोड दिनुभयो । उहाँले भन्नुभयो, ‘चुरे पहाड नेपालको महत्वपूर्ण प्राकृतिक स्रोत हो, यसको संरक्षण गर्नु आवश्यक छ । चुरे दोहनमा पुर्व र वर्तमान सरकारहरु जिम्मेवार रहेको र यसमा विदेशी स्वार्थ रहेको प्रष्ट छ ।’
अध्यक्ष बिजुक्छेंले ङातापोल्हँ (पाँचतले मन्दिर) र अन्य सांस्कृतिक, ऐतिहासिक तथा प्राकृतिक सम्पदाहरु मानव जातिको शिल्प, कला र विश्व शान्तिको निम्ति एक महत्वपूर्ण शिक्षालयको रुपमा रहेको बताउनुभयो । कुनै पनि नयाँ भौतिक निर्माण गर्दा त्यहाँ रहेका प्राकृतिक स्रोतबारे अध्ययन अनुसन्धान गर्नुपर्ने आवश्यकता औंल्याउँदैं उनले मुख्य–मुख्य स्मारकहरुबारे अध्ययनलाई निरन्तरता दिनुपर्ने र पुरातत्व सम्बन्धी विषय पाठ्यक्रममा समावेश गर्नुपर्नेमा जोड दिनुभयो ।
नेमकिपाका सचिव प्रेम सुवालले दुईतिहाई बहुमत प्राप्त सरकारले देश र जनताको सेवा गर्न नसेकेको आरोप लगाउँदैं निर्वाचनको माध्यमबाट यिनीहरुलाई पराजीत गर्नुपर्ने बताउनुभयो । उहाँले जन्मको आधारमा नागरिकता पाएकालाई वंशजको आधारमा नागरिकता दिने अध्यादेश देशको हितमा नभएको बताउनुभयो । काठमाडौं उपत्यका वरपर आधुनिक सहर निर्माण गर्ने सरकारको योजना सन्तुलित विकासको विरोधी योजना भएको उहाँको भनाई छ ।
भक्तपुर नगरपालिकाका प्रमुख सुनिल प्रजापतिले सम्पदा पुनःनिर्माण र जीर्णोद्धार अरुको सहयोगमा भर परेर नभई आफ्नै पौरखले सम्पन्न गर्नुपर्ने भावनासहित सम्पदा पुनःनिर्माण र जीर्णोद्धारका काम प्रचलित कानुनले दिएको अधिकार प्रयोग गरी जनताकै सहयोग र सहभागितामा मौलिक शैलीमै सम्पन्न गर्न निरन्तर नगरपालिका लागिरहने प्रतिबद्धता व्यक्त गर्नुभयो ।
उहाँले भन्नुभयो, “स्थानीय जनताको मौलिक सीप र प्रविधि तथा निर्माण सामग्री प्रयोग गरी निर्माण गरिएको पाँचतले मन्दिरले आधुनिक ज्ञान र प्रविधिलाई समेत चुनौती दिएको छ ।”
विशेष अदालतका पूर्व मुख्य न्यायाधीश गौरीबहादुर कार्कीले पाँचतले मन्दिरबारे थप अध्ययन तथा अन्वेषणहरु आवश्यक भएको बताउँदैं भूकम्प पश्चात पुनःनिर्माण हुन बाँकी सम्पदाहरुको पुनःनिर्माणमा भक्तपुर नपाले जोड दिनुपर्ने सुझाव दिनुभयो । उहाँले सांस्कृतिक सम्पदा संरक्षण कार्यमा अग्रणी भूमिका खेलेका दक्ष कालिगढहरुलाई सरकारले संरक्षण गर्नुपर्नेमा जोड दिनुभयो ।
प्रा.डा. सुदर्शनराज तिवारीले २०७२ सालको भूकम्पबाट क्षति पुगेको पाँचतले मन्दिरको जीर्णोद्धार र सबलीकरणको काममा सल्लाहकारको रुपमा कम गर्न पाउँदा निकै गौरवान्वित महसुस गर्दै मन्दिर जीर्णोद्धारमा देखिएको जनसहभागिताका कारण यस मन्दिरप्रति समाजको अपनत्व हुनु सकारात्मक रहेको बताउनुभयो ।
प्रा.डा. प्रेमनाथ मास्केले सांस्कृतिक र पुरातात्विक महत्वका सम्पदाको नियमित अनुगमन र मर्मत सम्भार हुनुपर्ने सुझाव दिनुभयो । ईतिहासविद् एवम् संस्कृतिविद् प्रा.डा. पुरुषोत्तमलोचन श्रेष्ठले भूपतिन्द्र मल्लको पालामा पाँचतले मन्दिर ६ महिनाको छोटो समयमा निर्माण भएको तथ्यबारे प्रष्ट पार्दै नेपाल अबका दिनमा सांस्कृतिक सम्पदाहरुबाट चिनिनुपर्नेमा जोड दिनुभयो ।
कार्यक्रममा ङातापोल्हँ पुनर्निर्माण उपभोक्ता समितिले मन्दिर जीर्णोद्धारदेखिका कार्यप्रगति प्रतिवेदन प्रस्तुत गर्नुभएको थियो । पुस्तकमा ङातापोल्हँ मन्दिरको धार्मिक, साँस्कृतिक, एतिहासिक र पुरातात्विक विषयवस्तुका साथै यसको निर्माण र जिर्णोद्धारका सम्पूर्ण पक्ष समेटिएको बताईएको छ । मन्दिरको जिर्णोद्धार भक्तपुरबासी जनताको साथ र सहयोगबाट लगभग ८ महिना सम्पन्न भएको थियो । मन्दिर जिर्णोद्धारका लागि दैनिक सयौंको संख्यामा स्थानीयले श्रमदान समेत दिएका थिए ।