Category: भर्खरै

भक्तपुर, जेठ २९
गण्डकी प्रदेशको मख्यमन्त्रीमा पृथ्वी सुब्बा गुरुङले पनि दावी गर्नुभएको छ । गुरुङले राष्ट्रिय जनमोर्चाका सांसद कृष्ण थापा र जनता समाजवादी पार्टीका अध्यक्ष महन्थ ठाकुर पक्षको पत्रसहित मुख्यमन्त्रीमा नियुक्त गरियोस भनी प्रदेश प्रमुख समक्ष शनिवार दावी प्रस्तुत गर्नुभएको हो ।
गण्डकी प्रदेशको ठूलो दलको हैसियतले संविधानको धारा १६८ को उपधारा ३ बमोजिम मुख्यमन्त्री नियुक्त हुनुभएका गुरुङले बिहिवार प्रदेश सभामा विश्वासको मत गुमाएपछि नयाँ सरकार गठनको प्रक्रिया शुरु भएको थियो । प्रदेश प्रमुख सिता पौडेलले शनिवार दिउँसो ३ बजेसम्म संविधानको धारा १६८ को उपधारा ५ बमोजिमको सरकार गठनका लागि प्रदेश सभामा बहुमत प्राप्त गर्न सक्ने आधारसहित मुख्यमन्त्री दावी गर्न शुक्रवार आह्वान गर्नुभएको थियो ।
सोही अनुसार शुक्रवार नै नेपाली कांग्रेस गण्डकी प्रदेश संसदिय दलका नेता कृष्णचन्द्र नेपाली पोखरेलले नेकपा माओवादी केन्द्र, राष्ट्रिय जनमोर्चा, जसपा र स्वतन्त्र सांसद राजिव गुरुङसहित प्रदेश सभाका बहुमत ३१ सदस्यको हस्ताक्षरसहित मुख्यमन्त्रीमा दावी गर्नुभएको थियो । तर प्रदेश प्रमुख पौडेलले आवश्यक अध्ययन गरेर समयावधीभित्रै निर्णय लिने जानकारी विपक्षी गठबन्धनलाई दिएको थियो ।
मुख्यमन्त्री र प्रदेश प्रमुखले केन्द्रमा जस्तै प्रदेश सभाका सदस्यहरुको हस्ताक्षरको विषयमा प्रश्न उठाएर अर्कै राजनीतिक चाल चाल्ने आशंकाले विपक्षीहरुले हिजो नै ३१ प्रदेश सभा सदस्यहरुलाई सशरीर प्रदेश प्रमुखको कार्यालयमा उपस्थित गराएर हस्ताक्षर सनाखत समेत गराएका थिए ।
मुख्यमन्त्रीमा गुरुङले समेत दावी गरेपछि गण्डकी प्रदेशको राजनीतिमा नयाँ ट्वीस्ट देखिएको छ । गुरुङको दावीले गण्डकीमा पनि केन्द्रमा जस्तै दावी नपुगेको भन्दै प्रदेश प्रमुखले प्रदेश सभा भंग गरेर मध्यावधी निर्वाचनको घोषणा गर्न सक्ने आशंका व्यक्त गर्न थालेको छ ।

भक्तपुर, जेठ २९
बागमती प्रदेशका प्रदेशसभा सदस्य नरोत्तम वैद्यले शुक्रवार बसेको संसद बैठकमा बोल्दै आफ्नो विवादास्पद अभिव्यक्ति फिर्ता लिनुका साथै माफी समेत माग्नुभएको छ । प्रदेश सभामुख सानुकमार श्रेष्ठसँग विशेष समय लिएर वैद्यले आफुले भावावेशमा आएर त्यस्तो अभिव्यक्ति दिएको भन्दै आत्मालोचना सहित सो अभिव्यक्ति फिर्ता लिनुका साथै माफी माग्नुभएको हो ।
वैद्यले वाक स्वतन्त्रताको प्रयोग गरेर निर्धक्कसँग बोल्न पाउने अधिकारको प्रयोग गर्दै बोल्ने क्रममा आफूले आवश्यकताभन्दा धेरै बोल्न पुगेको बताउनुभयो । उहाँले भन्नुभयो, ‘प्रधानमन्त्री ओलीसँग मेरो व्यक्तिगत रिस छैन । संसदमा निर्धक्क बोल्न पाउने अधिकार प्रयोग गरेर बोलिरहँदा मैले स्वतन्त्रतालाई धेरै प्रयोग गरेर त्यस्तो बोल्न पुगेछु । त्यसलाई म फिर्ता लिन चाहान्छु ।’
शुक्रबारको बैठकमा वैद्यले प्रधानमन्त्रीको मनोमानी रोक्न नाथुराम गोड्सेको आवश्यकता रहेको र आवश्यक परे आफु गोड्से बन्न तयार रहेको अभिव्यक्ति दिनुभएको थियो । उहाँको सो अभिव्यक्तिको चौतर्फी विरोध हुनुका साथै उहाँको पार्टी नेपाली कांग्रेस, नेपाली कांग्रेस बागमति प्रदेश संसदिय दलले समेत वैद्यलाई अभिव्यक्ति फिर्ता लिन र माफी माग्न निर्देशन दिएको थियो ।
वैद्यले आफूले दिएको अभिव्यक्तिको सामाजिक सञ्जालमा धेरै प्रतिक्रिया आएको र पार्टीले पनि आत्मालोचना गर्न निर्देशन दिएकोले आफ्नो अभिव्यक्ति फिर्ता लिएको घोषणा गर्नुभयो । ‘म महात्मा गान्धीलाई धेरै नै मान्ने मान्छे हो। बोलेर पनि कसैलाई हिंसा गर्नु हुँदैन भन्ने मलाई लाग्छ,’ उहाँले भन्नुभयो, ‘तर प्रधानमन्त्री ओलीको पछिल्लो गतिविधिले गर्दा आवेगमा आएर मैले त्यस्तो बोल्न पुगेछु ।’
सांसद वैद्यले लिखित रुपमा अभिव्यक्ति फिर्तासम्बन्धी पत्र पढेर माफी माग्नुभएको थियो । उहाँले आत्मालोचनासहित अभिव्यक्ति फिर्ता लिँदै सो अभिव्यक्ति संसदको रेकर्डबाट हटाउन अनुरोध गरेपछि सभामुखले सो अभिव्यक्ति रेकर्डबाट हटाउन निर्देशन दिनुभएको छ ।

भक्तपुर, जेठ २९
नेपाली कांग्रेसले आफ्ना बागमति प्रदेश सभा सदस्य नरोत्तम वैद्यलाई शब्द फिर्ता लिएर आत्मालोचना गर्न निर्देशन दिएको छ । नेपाली कांग्रेस बागमति प्रदेश संसदिय दलका नेता ईन्द्र बानियाँ र कांग्रेस प्रवक्ता विश्वप्रकाश शर्माले वैद्यलाई आफ्नो अभिव्यक्तिप्रति आत्मालोचना गर्न र शब्द फिर्ता लिन निर्देशन दिनुभएको हो ।
वैद्यले शुक्रवार प्रदेश सभामा सरकारको नीति तथा कार्यक्रम माथिको छलफलमा भाग लिँदैं प्रधानमन्त्री के पी शर्मा ओलीप्रति आपत्तिजनक अभिव्यक्ति दिनुभएको थियो । उहाँले प्रदेशसभाको रोष्ट्रमबाट प्रधानमन्त्री ओलीले देश खान लागेको भन्दै नाथुराम गोड्सेको खाँचो भएको र कोही बन्न तयार नभए आफु बन्ने की भनी प्रश्न गर्नुभएको थियो । ‘ओली यसरी आइरहेको छ कि आफ्नो सत्ता बचाउनका लागि, जे कुरामा पनि सम्झौता गरिराखेको छ । यो समयमा खड्ग ओलीलाई यसरी नै छोड्ने हो भने यो नेपाल खाइदिन्छ है । त्यसैले मेरो आग्रह, कोही नाथुराम गोड्से आवश्यक प¥यो है, अब यो देश बचाउनका लागि । कोही नाथुराम गोड्से बन्न तयार छैन भने म बन्ने कि ?’ उहाँले भन्नुभएको थियो । गोड्से त्यही व्यक्ति हुन जसले माहात्मा गान्धिको हत्या गरेका थिए ।

सो अभिव्यक्तिपछि सामाजिक सञ्जालमार्फत प्रवक्ता शर्माले तर्कले आपत्तिजनक शब्द छोप्ने परम्परा कांग्रेसको नभएको बताउनुभएको छ । उहाँले लेख्नुभएको छ, ‘सडकमा पनि राख्नुपर्ने संयम संसदमा गुमाउन पाइँदैन । आवेगको बोली र व्यवहार भावनात्मक उत्तेजना भनेर उन्मुक्ति हुँदैन । शब्द फिर्ता लिइ आत्मालोचना गर्न पार्टीको निर्देशन रहन्छ । तर्कले आपत्तिजनक शब्द छोप्ने हाम्रो परम्परा छैन ।’ उहाँले अभिव्यक्ति स्वतन्त्रता र अभिव्यक्ति अराकता एउटै नभएको पनि प्रष्ट पार्नुभएको छ ।
त्यस्तै बाँनियाले पनि वैद्यलाई पार्टीको नीति विपरीतको अभिव्यक्ति फिर्ता लिएर आत्मालोचना गर्न आग्रह गर्नुभएको छ । उहाँले पनि सामाजिक सञ्जाल मार्फत भन्नुभएको छ, ‘कांग्रेस सांसद नरोत्तम बैद्यले वाग्मती प्रदेश सभामा दिएको अभिव्यक्तिप्रति गम्भीर ध्यानाकर्षण भएको छ । आलोचना गर्दा राख्नुपर्ने संयम, परिपक्वता र पार्टीको नीति विपरीतको अभिव्यक्ति फिर्ता लिएर आत्मालोचना गर्न संसदीय दलको नेताको हैसियतले आग्रहसहित निर्देशन गर्दछु ।’

भक्तपुर, जेठ २९

शताब्दी पुरुष सत्यमोहन जोशीको स्वास्थ्य सुधार देखिएको छ । छातीमा सामान्य दुखाइ महसुस गरेपछि ग्वार्कोस्थित किस्ट मेडिकल कलेजमा भर्ना भएका शताब्दी पुरुष जोशीको स्वास्थ्य अवस्था सामान्य रहेको पारिवारिक स्रोतले जानकारी दिएको छ । उहाँ जेठ २६ गते अस्पताल भर्ना हुनुभएको थियो ।

स्वास्थ्य परीक्षणका क्रममा जोशीको छातीमा सानो दाग देखिएको छ । उक्त दाग पुरानो हो की नयाँ हो भन्ने बारे थप परीक्षण भइरहेको चिकित्सकले बताएका छन ।

शुक्रबार अपराह्न शताब्दी पुरुष जोशीलाई भेटेर फर्किएका ललितपुर उद्योग वाणिज्य संघका पूर्वअध्यक्ष अजरमान जोशीले जोशीको स्वास्थ्य अवस्था सामान्य रहेको चिकित्सकले बताएको जानकारी दिनुभयो । फोक्सोमा दायाँ भागमा पानी जमेर २०७१ सालमा जोशी लामो समय बिरामी पर्नुभएको थियो ।

भक्तपुर, जेठ २९
युरोपेली महादेशीय युरो कप फुटबल प्रतियोगितामा इटालीले विजयी शुरुवात गरेको छ । इटालीको रोमस्थित ओलम्पियन स्टेडियममा गएराती सम्पन्न उद्घाटन खेलमा इटालीले टर्कीलाई ३–० गोल अन्तरले पराजित गर्दै विजयी शुरुवात गरेको हो ।
इटालीको जितमा चिरो इम्मोबिले, लोरेन्जो इन्सिग्नेले गोल गरे भने एक गोल आत्मघाती गोलको रुपमा उपहार पाए । इटालीले आक्रमक खेल पस्केपनि टर्कीको रक्षापंक्तिले इटालीलाई पहिलो हापमा अघि बढ्न दिएन । बल पोसेसनमा पकड जमाउँदै आक्रमण बढाएपनि इटालीले अग्रता बनाउन आत्मघाती गोलको सहायत लिनुप¥यो । खेलको ५३ औं मिनेटमा डोमेनिको बेरार्डीको क्रसलाई क्लियर गर्न नसक्दा टर्कीका मेरिह डेमिराललाई लाग्दै गोल भएको थियो ।

इटालीले ६६ औं मिनेटमा अग्रता दोब्बर बनाए । इटालीका लागि लिओनार्डो स्पिनाज्जोलाको प्रहार गोलरक्षक उगुर्चान चुकारले बचाएपनि रिबाउन्डमा गोल गर्दै चिरो इम्मोबिलेले इटालीको अग्रता दोब्बर पारेका थिए । त्यस्तै ७९ औं मिनेटमा लोरेन्जो इन्सिग्नेले गोल गर्दै इटालीलाई ३–० ले अघि बढाए र जित पक्का गरे । उनले इम्मोबिलेको पासलाई पेनाल्टी क्षेत्र भित्रबाट पहिलो टचमा नै गोल गरेका थिए ।
यो सँगै इटालीले लगातार ९ खेलमा गोल नखाई जित हासिल गरेको छ । समग्रमा इटालीले आफ्नो अपराजित यात्रालाई २८ खेल पु¥याएको छ । इटालीले युरो कपको इतिहासमा एकै खेलमा तीन गोल गरेको यो नै पहिलो अवसर समेत हो । यस जितसँगै इटालीले समूह ए मा ३ अंक जोडेको छ । यसै समूह अन्तर्गत शनिबार वेल्स र स्विटजरल्यान्डले खेल्नेछन् । उक्त खेल नेपाली समयानुसार साँझ ६ः४५ बजे सुरु हुनेछ ।

भक्तपुर, जेठ २८
विश्वकप तथा एसियन कप छनोट अन्तर्गत अष्ट्रेलियाविरुद्ध नेपाल ३–० गोलले पराजित भएको छ । कुवेतको जाबेर अल अहमद अन्तर्राष्ट्रिय स्टेडियममा शुक्रवार राती सम्पन्न खेलमा अष्ट्रेलियालाई जित दिलाउन कप्तान म्याथ्यु लेकि, फ्रान कारासिचल र मार्टिन बोएलले गोल गरे ।
अष्ट्रेलियाका लागि खेलको छैंटौं मिनेटमा अजिज बेहिचले बायाँ विंगबाट दिएको क्रसलाई लेकिले रोहित चन्दभन्दा अघि रहेर हेडरमार्फत गोल गर्दै अग्रता दिलाए । त्यस्तै खेलको ३७ औं मिनेटमा लेकिले दायाँ विंगमा उत्कृष्ट मुभ बनाउँदै दिएको कटब्याकमा फ्रान कारासिचले गोल गर्दै अष्ट्रेलियाको अग्रता दोब्बर पारे ।
त्यसो त २८ औं मिनेटमा कप्तान किरणले एज्दीन हर्सतितचको फ्रिकिक बचाउँदा अष्ट्रेलिया अग्रता दोब्बर पार्नबाट चुकेका थिए । ३५ औं मिनेटमा अनन्त तामाङले अष्ट्रेलियालाई गोल थप्नबाट रोके । कप्तान लेकिले पेनाल्टी क्षेत्रभित्रबाट गरेको प्रहार अनन्तले उत्कृष्ट ट्याकल गर्दै रोकेका थिए । लगत्तै त्यसै क्लियरेन्समा नेपालको काउन्टर अट्याक विपक्षी गोलरक्षक एन्ड्रयु रेडमेनको हातमा पुगेर रोकिएको थियो ।

४० औं मिनेटमा मार्टिन बोएलले झन्डै २५ यार्ड टाढाबाट गरेको प्रहारलाई गोलरक्षक किरणले बचाए । खेलको ४४ औं मिनेटमा रोहित चन्दले रातो कार्ड पाउँदै मैदान छाड्न बाध्य भए । मार्टिन बोएललाई पेनाल्टी क्षेत्र बाहिर वन भर्सेस वनको स्थितिमा अघि बढेको अवस्थामा फल गरेको भन्दै रेफ्रीले रातो कार्ड देखाएका थिए ।
अष्ट्रेलियाले बल पोसेसनमा वर्चस्व जमाएको पहिलो हाफमा निकै आक्रमण बुनेको थियो । सुरुवातमा नै अग्रता लिएपछि अष्ट्रेलियाले पोसेसनमा ध्यान दिँदै आक्रमण बुनेको थियो ।
दोस्रो हाफको ५७ औं मिनेटमा ज्याक्सन अर्भाइनको सानदार पासलाई मार्टिन बोएलले सहजै बललाई जाली चुमाउँदैं अष्ट्रेलियलाई ३–० को अग्रता दिलाए । अर्भाइनले पेनाल्टी क्षेत्र बाहिरबाट नेपालको डिफेन्स लाइनलाई चिर्दै निकालेको पासलाई फार पोस्टमा बोएलले सहजै गोल गरे । ५९ औं मिनेटमा ह्यारी सुटरको प्रहार पोस्टमा लागेर फक्र्यो ।
७६ औं मिनेटमा हर्सतितचको पेनाल्टी क्षेत्र बाहिरको प्रहार सिधै गोलरक्षक किरणको हातमा पुगे । ८४ औं मिनेटमा किरणले लगातार दुई बचाउ गर्दै स्कोर बढ्न दिएनन् । इन्ज्युरी समयमा नेपालका लागि तीन खेलाडीले डेब्यु गरेका थिए । सुरज जिउ ठकुरी, आयुष घलान र कमल थापाले मैदान प्रवेश गर्दै राष्ट्रिय सिनियर टोलीबाट पहिलो खेल खेले ।
यस हारसँगै नेपालको एसियन कप छनोटको तेस्रो चरण पुग्ने सम्भावना सकिएको छ । अब तेस्रो चरण पुग्न नेपालले प्लेअफ चरण पार गर्नुपर्ने हुन्छ । सबै समूहका पुछारका टोली र चौथो स्थानमा रहने कमजोर चार टोलीले प्लेअफमा प्रतिस्पर्धा गर्नेछन् । अष्ट्रेलिया भने ७ खेलमा २१ अंकसहित विश्वकप छनोटको तेस्रो चरण तथा एसियन कपका लागि छनोट भएको छ । नेपाल भने ८ खेलमा ६ अंकसहित चौथो स्थानमा रहयो ।

भक्तपुर, जेठ २८
विश्वकप तथा एसियन कप छनोट अन्तर्गत कुवेतमा जारी खेलको पहिलो हापमा अष्ट्रेलियाले नेपालविरुद्ध २–० को अग्रता लिएको छ । अष्ट्रेलियाले कप्तान म्याथ्यु लेकि र फ्रान कारासिचलको गोलको मद्दतले २–० को अग्रता बनाएको हो ।

अष्ट्रेलियाका लागि खेलको छैंटौं मिनेटमा अजिज बेहिचले बायाँ विंगबाट दिएको क्रसलाई लेकिले रोहित चन्दभन्दा अघि रहेर हेडरमार्फत गोल गर्दै अग्रता दिलाए । त्यस्तै खेलको ३७ औं मिनेटमा लेकिले दायाँ विंगमा उत्कृष्ट मुभ बनाउँदै दिएको कटब्याकमा फ्रान कारासिचले गोल गर्दै अष्ट्रेलियाको अग्रता दोब्बर पारे ।

त्यसो त २८ औं मिनेटमा कप्तान किरणले एज्दीन हर्सतितचको फ्रिकिक बचाउँदा अष्ट्रेलिया अग्रता दोब्बर पार्नबाट चुकेका थिए । ३५ औं मिनेटमा अनन्त तामाङले अष्ट्रेलियालाई गोल थप्नबाट रोके । कप्तान लेकिले पेनाल्टी क्षेत्रभित्रबाट गरेको प्रहार अनन्तले उत्कृष्ट ट्याकल गर्दै रोकेका थिए । लगत्तै त्यसै क्लियरेन्समा नेपालको काउन्टर अट्याक विपक्षी गोलरक्षक एन्ड्रयु रेडमेनको हातमा पुगेर रोकिएको थियो ।

४० औं मिनेटमा मार्टिन बोएलले झन्डै २५ यार्ड टाढाबाट गरेको प्रहारलाई गोलरक्षक किरणले बचाए । खेलको ४४ औं मिनेटमा रोहित चन्दले रातो कार्ड पाउँदै मैदान छाड्न बाध्य भए । मार्टिन बोएललाई पेनाल्टी क्षेत्र बाहिर वन भर्सेस वनको स्थितिमा अघि बढेको अवस्थामा फल गरेको भन्दै रेफ्रीले रातो कार्ड देखाएका थिए ।

अष्ट्रेलियाले बल पोसेसनमा वर्चस्व जमाएको पहिलो हाफमा निकै आक्रमण बुनेको थियो । सुरुवातमा नै अग्रता लिएपछि अष्ट्रेलियाले पोसेसनमा ध्यान दिँदै आक्रमण बुनेको थियो ।

भक्तपुर, जेठ २८
प्रशिक्षक अब्दुल्लाह अलमुताईरीले अष्ट्रेलियाविरुद्ध खेल्ने शुरुवाती ११ खेलाडीको घोषणा गरेको छ । फिफा विश्वकप–२०२२ तथा एसियन कप–२०२३ अन्तर्गत दोस्रो चरणको छनोटको अन्तिम खेलमा नेपालले आज बलियो टिम अष्ट्रेलियासँग प्रतिस्पर्धा गर्दैछ ।
कुवेत सिटीस्थित जाबेर अल अहमद अन्तर्राष्ट्रिय स्टेडियममा हुने खेलमा लागि प्रशिक्षक अलमुताईरीले अष्ट्रेलियाविरुद्ध नेपाली टोलीलाई ४–३–३ को रणनीतिमा मैदानमा उतार्ने तयारी गरेको छ । जसका लागि अलमुताईरीले जोर्डनविरुद्धको टोलीमा चार परिवर्तन गरेका छन ।
अलमुताईरीले जोर्डनविरुद्ध सुरुवाती–११ मा रहेका रहेका अन्जन विष्ट, दिनेश राजवंशी, अभिषेक रिजाल र सन्तोष तामाङ बेन्चमा राखेर फरवार्ड नवयुग श्रेष्ठ, मिडफिल्डर विशाल राई, एरिक विष्ट र डिफेन्डर गौतम श्रेष्ठ सुरुवाती–११ मा मौका दिएका छन ।
गोलकिपरमा किरण चेम्जोङ, डिफेन्डरमा रोहित चन्द, अनन्त तामाङ, गौतम श्रेष्ठ, सुमन अर्याल, मिडफिल्डरमा पुजन उपरकोटी, एरिक विष्ट, विशाल राई र फरवार्ड नवयुग श्रेष्ठ , सुमन लामा र सुनिल बललाई अलमुताईरीले मैदानमा उतार्दै छन ।

भक्तपुर, जेठ २८
भक्तपुरमा लगातार तेस्रो दिन कोरोना संक्रमितको मृत्यु शुन्यमा रहेको छ । भक्तपुरमा पछिल्लो पटक गत जेठ २४ गते सोमवार ३ जना कोरोना संक्रमितको मृत्यु भएको थियो । त्यस यता बिहिवारसम्म मृत्यु दर शुन्य रहेको स्वास्थ्य कार्यालय भक्तपुरले जनाएको छ ।
‘गएको ३ दिनदेखी भक्तपुरमा कोरोना संक्रमणको कारण कसैको ज्यान गएको छैन,’ स्वास्थ्य कार्यालय प्रमुख कृष्णबहादुर मिजारले भन्नुभयो । भक्तपुरमा २७६ जना कोरोना संक्रमितको मृत्यु भइसकेको छ । ती मध्ये १७९ पुरुष र ९७ महिला छन । स्वास्थ्य कार्यालयका अनुसार जिल्लामा सबैभन्दा बढी मध्यपुर थिमि नगरपालिकामा ६३ पुरुष र २८ महिला गरी ९१ जना कोरोना संक्रमितको ज्यान गईसकेको छ । भक्तपुर र सूर्यविनायक नगरपालिकामा समान ७४ जना संक्रमितको मृत्यु भएको छ । भक्तपुरमा कोरोनाका कारण ज्यान गुमाउनेहरुमा ४४ पुरुष र ३० महिला छन भने सूर्यविनायकका ४६ पुरुष र २८ महिला छन । त्यस्तै चाँगुनारायण नगरपालिकामा २६ पुरुष र ११ महिला गरी ३७ जना संक्रमितको मृत्यु भएको मिजारले बताउनुभयो ।
भक्तपुरमा ९३ प्रतिशत कोरोना संक्रमित संक्रमण भएका छन । भक्तपुरका कुल २० हजार ९७४ संक्रमित मध्ये १९ हजार ५५४ संक्रमण मुक्त भएका छन । जुन ९३ दशमलव २२ प्रतिशत हो ।
भक्तपुरमा एक हजार १४४ संक्रमित उपचाररत छन । ती मध्ये ४४ पुरुष र ३८ महिला गरी ८४ जना अस्पताल र संस्थागत आइसोलेसनमा रहेका छन् । सक्रिय संक्रमितमध्ये ५३२ पुरुष र ५३० महिला गरी एक हजार ६२ जना होम आइसोलेसनमा रहेको मिजारले बताउनुभयो ।

भक्तपुर, जेठ २८
गण्डकी प्रदेशको मुख्यमन्त्रीमा नेपाली कांग्रेसका कृष्णचन्द्र नेपाली पोखरेलले दावी गर्नुभएको छ । विपक्षी गठबन्धनको नेतृत्व गरी पोखरेलले प्रदेश सभाका ३१ सांसदको हस्ताक्षरसहित मुख्य मन्त्रीमा दावी गर्नुभएको हो । उहाँले गठबन्धनमा रहेका दल नेपाली कांग्रेस, नेकपा माओवादी केन्द्र, जनता समाजवादी पार्टी (जसपा), राष्ट्रिय जनमोर्चा र स्वतन्त्र सांसद राजिव गुरुङसहितको समर्थन र सांसदहरुको हस्ताक्षर समेत प्रदेश प्रमुख सिताकुमारी पौडेललाई बुझाउनुभएको हो ।
गण्डकीमा मुख्यमन्त्री पृथ्वी सुब्बा गुरुङले शुक्रवार प्रदेश सभामा विश्वासको मत पाउन नसकेपछि नयाँ सरकार गठनको प्रक्रिया शुरु भएको थियो । प्रदेश प्रमुख पौडेलले आजै दिउँसो संविधानको धारा १६८ को उपधारा ५ बमोजिम प्रदेश सभाको विश्वास प्राप्त गर्न सक्ने सांसदलाई आधारसहित मुख्यमन्त्री दावी गर्न भोली शनिवार ३ बजेसम्मको समय सिमासहित आह्वान गर्नुभएको थियो । सोही अनुसार विपक्षी गठबन्धनले बहुमत सांसद सहितको दावी प्रस्तुत गरेको हो ।

हस्ताक्षर गर्ने सांसदहरुको सुची–