Category: भर्खरै

भक्तपुर, असार २
सिन्धुपाल्चोकको मेलम्ची र हेलम्बु बजार डुवानमा पर्ने गरी बाढी आउनुमा मेलम्ची नदिमा आएको पहिरो भएको पाईएको छ । पहिरोले मेलम्ची नदि थुनिने गरी बाँध बनेको र केही समयपछि सो बाँध फुट्न गई आएको बाढीले मेलम्ची र हेलम्बुमा वितण्डा मचाएको पाईएको हो ।
बाढीले मेलम्ची बजारको तल्लो क्षेत्र डुवानमा पर्दा करोडौंको क्षति भएको छ । दर्जनौ घर डुवानमा परेको छ । बुधवार दिउँसो मेलम्ची बजारको मुख्य सडकमा समेत पानी भरिएको थियो ।
जिल्ला प्रशासन कार्यालयका अनुसार मेलम्चीमा आएको बाढीका कारण मेलम्ची नगरपालिका र हेलम्बु गाउँपालिकाका २० जना हराएका छन् । शव फेला परेका एक जनाको सनाखत हुन सकेको छैन । सम्पर्कविहीन भएका २० जनामध्ये ३ जना भारतीय र ३ जना चिनियाँ नागरिक छन् ।
नेपाल प्रहरी, नेपाली सेना र सशस्त्र प्रहरीले ७४ जनालाई सकुशल उद्धार गरेको छ । एक चिनियाँ नागरिकसहित ५ जना घाइतेलाई धुलिखेल अस्पतालमा उपचारका लागि ल्याइएको छ ।
बाढीले मेलम्ची नगरपालिकाका ६०० जना, हेलम्बु गाउँपालिकाका ३०० जना स्थानीय वासिन्दा प्रभावित भएका छन् । हेलम्बु गाउँपालिकाका ३ वटा र मेलम्चीमा एउटा झोलुंगे पुल, हेलम्बु गाउँपालिकामा ३ वटा र मेलम्चीमा एउटा पक्की पुल बाढीले बगाएको छ ।
हेलिकप्टरबाट गरेको निरीक्षणका क्रममा पाँचपोखरी थाङपाल गाउँपालिका वडा नं ३ भोताङस्थित लाङटाङ राष्ट्रिय निकुञ्जमा पर्ने लार्के भन्ने ठाउँमा ठूलो पहिरो गएको पाइएको हो ।उक्त पहिरोले मेलम्ची नदी थुनिएर ठूलो दह बनेको फुटेर बाढी आएको सहायक प्रमुख जिल्ला अधिकारी बाबुराम खनालले जारी गरेको विज्ञप्तिमा उल्लेख छ । थुनिएको मेलम्ची नदी एक्कासी पहिरोको माटोसहित बग्दा मेलम्ची बजार तहसनहस भएको हो ।

मेलम्ची बजार डुवानमा परेपछि स्थानीय वासिन्दा इन्द्रेश्वर माध्यमिक विद्यालय र प्रहरी चौकी भएको क्षेत्रमा आश्रय लिएर बसेका छन् ।
यसैबीच नेपाली कांग्रेसका केन्द्रीय सदस्य एवम् खेलकुद विभाग प्रमुख मोहनबहादुर बस्नेत मेलम्ची पुगेर स्थलगत अवलोकन गर्नुभएको छ । पुर्वसञ्चारमन्त्री समेत रहनुभएका बस्नेत निरिक्षणका लागि मेलम्ची बजार पुग्दा नदिको पानी बजारको मुख्य सडकमा चढेको थियो ।
हेर्नुहोस् जिल्ला प्रशासन कार्यालयको सूचना ः

भक्तपुर, असार २
नेपाल एसियन कप छनोटको तेस्रो चरणमा प्रवेश गरेको छ । एसियाली फुटबल महासंघ (एएफसी)ले छनोट प्रक्रिया परिमार्जन गरेसँगै नेपाल सिधै छनोटको तेस्रो चरणमा प्रवेश गरेको हो ।
यसअघिको प्रावधान अनुसार नेपालले प्लेअफ खेल्नुपर्ने थियो । एएफसीका अनुसार एसियन कप आयोजना गर्ने चीन, विश्वकपको आयोजक तथा एसियन कपको साविक विजेता कतारले विश्वकप छनोट तथा एसियन कपमा स्थान बनाएपछि समूहको चौथो स्थानमा रहने टोलीले पनि सिधै तेस्रो चरणमा स्थान बनाउने भएको हो ।
विश्वकप तथा एसियन कप छनोटको दोस्रो चरणको समापनसँगैं एएफसीले प्रकाशन गरेको नयाँ प्रावधान अनुसार दोस्रो चरणको छनोटमा समूहमा दोस्रो स्थान हासिल गर्ने मध्ये पुछारका तीन टोली, तेस्रो स्थानमा रहेका ८ टोली, चौंथो स्थानमा रहेका ८ टोली र पाँचौं स्थान हासिल गर्ने मध्ये शिर्ष तीन टोलीले एसियन कपको तेस्रो चरणको छनोट खेल्ने भएको हो ।

अब पाँचौ स्थान हासिल गर्ने पुछारका चार टोलीले मात्र प्लेअफ खेल्नुपर्ने भएको छ । सो अनुसार इन्डोनेसिया, कम्बोडिया, चाइनिज ताइपेइ र गुआमले मात्र प्लेअफ खेल्नेछन् । प्लेअफका विजयी दुई टोलीले एसियन कप छनोटको तेस्रो चरणमा स्थान पक्का गर्नेछन् ।
छनोटको दोस्रो चरणको समापनसँगै जापान, सिरिया, कतार, दक्षिण कोरिया, अष्ट्रेलिया, इरान, यूएई, साउदी अरेबिया, इराक, ओमान, भिएतनाम, लेबनान र चीन एसियन कपका लागि सिधै छनोट भएका छन भने विश्वकप छनोटको तेस्रो चरणमा प्रवेश गरेको छ ।
त्यस्तै एसियन कप छनोटको तेस्रो चरण खेल्ने टोलीहरुमा नेपालसहित ताजिकिस्तान, उज्बेकिस्तान, किर्गिस्तान, कुवेत, जोर्डन, बहराइन, प्यालेस्टाइन, भारत, थाइल्याण्ड, फिलिपिन्स, तुर्कमेनिस्तान, अफगानिस्तान, मलेसिया, सिंगापुर र मंगोलिया छन् । त्यसैगरी हङकङ, माल्दिभ्स, श्रीलंका, म्यानमार, यमन र बंगलादेश छन ।

भक्तपुर, असार २
नेपाली कांग्रेसले सूर्यविनायक नगरपालिकाको आगामी नीति तथा कार्यक्रम र बजेट स्वास्थ्यमा केन्द्रीत गर्न माग गरेको छ । नेपाली कांग्रेस सूर्यविनायक नगर समितिले बुधवार नगरप्रमुख बासुदेव थापालाई ज्ञापनपत्र बुझाउँदैं आवश्यक परे विकास बजेट कटौती गरेर भएपनि स्वास्थ्य क्षेत्रलाई प्राथमिकतामा राख्न माग गरेको हो ।
नगरबासी नै सुरक्षित नभए विकास कसका लागि भन्दै कांग्रेसले ज्ञापनपत्रमा ‘सूर्यविनायक नगरपालिकाको आगामी परिषदको पहिलो लक्ष्य कोभिड नियन्त्रण, स्वास्थ्य सामग्रीको व्यवस्थापन, स्थायी र भरपर्दो स्वास्थ्य सेवाका लागि आवश्यक परेमा विकासमा बजेट कटौती गरेर भएपनि रोग नियन्त्रणको लागि बजेट व्यवस्थापन लागि प्रयाप्त ध्यान दिन आग्रह गर्दछौं,’ उल्लेख गरिएको छ ।

त्यस्तै कांग्रेसले सूर्यविनायक नगरबासी सम्पुर्ण नागरिकलाई यथाशक्य छिटो कोरोना विरुद्धको खोपको व्यवस्था गर्न माग गरेको छ । कोभिड १९ को पहिलो उपचार परीक्षण भएको उल्लेख गर्दै ज्ञापनपत्रमा सबै वडाहरुमा रहेको स्वास्थ्य केन्द्रको व्यवस्थापन, अन्तराष्ट्रिय स्वास्थ्य मापदण्ड बमोजिमको परीक्षण सामग्रीहरु, खोप लगायतको उपकरण भण्डारणको व्यवस्थापन, उच्चस्तरिय ल्यावको व्यवस्था गर्न कांग्रेसले माग गरेको छ ।
कांग्रेसले नगरका सार्वजनिक पर्ती जग्गाहरुको अतिक्रमण बढ्दै गएकाले तत्काल पर्ती जग्गाहरुको संरक्षणका लागि ठोस कदम चाल्न माग समेत गरेको छ । वर्षात र खेतीवातीको मौसम शुरु भएको र असारको बेलापनि किसानहरु मल, बिऊविजनको अभावले भौतारिनु परेको भन्दै कांग्रेसले तत्काल मल, बिऊविजनको उचित व्यवस्था गर्न माग गरेको छ ।
कांग्रेसले कोभिडको तेस्रो लहर आउन सक्ने खतरा रहेको र तेस्रो लहरमा बालबालिका बढी जोखिममा पर्ने विज्ञहरुको भनाई रहेको भन्दै बालबालिकालाई कोभिडको तेस्रो लहरबाट जोगाउन अस्पताल तथा स्वास्थ्य केन्द्रहरुमा बालबालिकाहरुको लागि विषेश वार्ड व्यवस्था गर्न माग गरेको छ ।

ज्ञापनपत्रमा कांग्रेसले कोभिड नियन्त्रणमा हरदम सहयोग गर्नुहुने नगरबासी, स्वास्थ्यकर्मी, सुरक्षा निकाय, सञ्चार क्षेत्र र नगरपालिकाका जनप्रतिनिधि, कर्मचारी सबैलाई धन्यवाद दिँदैं कोरोना महामारीको विषम परिस्थितीमा राजनीतिक, सामाजिक र अन्य विषयमा रहेका असहमतिलाई थाँती राखी कांग्रेस हरतरहले साथ सहयोग दिन तयार रहेको पनि उल्लेख गरेको छ ।
कांग्रेसले नगरपालिकाले फरक मत राख्ने राजनैतिक दलको उपस्थिती आवश्यक नठानेको, जायज माग र आवाजलाई समेत महत्व नदिएको आरोप समेत लगाएको छ ।
ज्ञापनपत्र बुझाउन कांग्रेस सूर्यविनायक नगरसभापति बालकृष्ण थापा र नेपाली कांग्रेसबाट नगरप्रमुखका प्रत्याशी उम्मेदवार विष्णुराज कार्कीको नेतृत्वमा नेताहरु कविर राणा, अनन्त खड्कालगायतका नेता कार्यकर्ताहरु नगरपालिका कार्यालय पुगेका थिए ।

भक्तपुर, असार २
भक्तपुरमा ९५ प्रतिशत संक्रमित कोरोना संक्रमण मुक्त भएका छन । भक्तपुरका २१ हजार २३४ जना संक्रमित मध्ये मंगलवार साँझसम्म २० हजार २१६ जना संक्रमण मुक्त भएका छन । जुन ९५ दशमलव २० प्रतिशत हो ।
संक्रमितको संख्या घटेसँगै भक्तपुरमा कोरोना संक्रमणबाट मृत्यु हुनेको संख्या समेत घटेको छ । यहाँ जेठ २५ गते यता एक जनाको मात्र कोरोना संक्रमणका कारण मृत्यु भएको स्वास्थ्य कार्यालय भक्तपुरले जनाएको छ । जेठ २४ गते एकै दिन तीन जनाको मृत्यु भएको थियो । त्यस यता जेठ २८ गते एक पुरुषको मात्र मृत्यु भएको स्वास्थ्य कार्यालय प्रमुख कृष्णबहादुर मिजारले बताउनुभयो ।
भक्तपुरमा हालसम्म २७७ जना कोरोना संक्रमितको मृत्यु भएको मिजारले जानकारी दिनुभयो । ती मध्ये १८० पुरुष र ९७ महिला छन । स्वास्थ्य कार्यालयका अनुसार जिल्लामा सबैभन्दा बढी मध्यपुर थिमि नगरपालिकामा ६३ पुरुष र २८ महिला गरी ९१ जना कोरोना संक्रमितको ज्यान गईसकेको छ । भक्तपुर नगरपालिकामा ७४ जनाको मृत्यु भएको छ । ती मध्ये ४४ पुरुष र ३० महिला छन । सूर्यविनायक नगरपालिकामा ४७ पुरुष र २८ महिलागरी ७५ जनाले ज्यान गुमाएका छन । त्यस्तै चाँगुनारायण नगरपालिकामा २६ पुरुष र ११ महिला गरी ३७ जना संक्रमितको मृत्यु भएको मिजारले बताउनुभयो ।
भक्तपुरमा कोरोना संक्रमण घटेसँगैं अस्पताल र आइसोलेसन केन्द्रहरु धमाधम खाली हुन थालेका छन । स्वास्थ्य कार्यालयका अनुसार यहाँ ५७ जना मात्र अस्पताल र आइसोलेसन केन्द्रमा उपचाररत छन । ती मध्ये २९ पुरुष र २८ महिला छन । यहाँ सक्रिय संक्रमित मध्ये ३२५ पुरुष र ३५९ महिलागरी ६८४ जना होम आइसोलेसनमा छन ।

भक्तपुर, असार २
मनसुन शुरु भएसँगै केही दिन यता परेको अविरल वर्षाले देशका विभिन्न भागमा बाढी, पहिरो र डुवानले क्षति गरेको छ । वर्षापछि नदिहरुमा आएको बाढीले नदि तटीय क्षेत्रमा बाढी पसेको छ भने पहाडी भेगका केही स्थानमा पहिरो आउँदा राजमार्ग समेत अवरुद्ध भएका छन ।
सिन्धुपाल्चोकको मेलम्ची र ईन्द्रावती खोलामा आएको भिणष बाढीले मेलम्ची र हेलम्बु बजार डुवानमा परेको छ । बाढीले चार जना मानिस वेपत्ता भएका छन । जिल्ला प्रहरी कार्यालयका प्रमुख राजन अधिकारीले बाढीले तीन पुरुष र एक महिला बेपत्ता भएको जानकारी दिनुभयो ।
बाढीले मेलम्ची खानेपानीको क्याम बगाएको छ । मेलम्चीदेखि माथिको राजमार्ग खण्डहरु बगाएको छ । सो कारण सडक सम्बन्ध बिच्छेद भएको छ । बिद्युत आपूर्ति बन्द भएको छ । हेलम्बु गाउँपालिका किउलमा रहेको टाउट्र माछा फार्म बगाएको छ ।

हेलम्बु गाउँपालिकाको चनौटे बजार, किउल, तालामाराङ, ग्याल्थुम, तिपेनी हुदै मेलम्ची बजार डुबानमा परेका छन् । इन्द्रावती गाउँपालिका र मेलम्ची नगरपालिका जोड्ने पुल बगाएको छ । स्थानीयहरु घर छाडेर सुरक्षित स्थानमा बसिरहेका छन् । मेलम्ची माथिका सबै झोलंगे पुल बगाएका छन् ।
घटनास्थलमा नेपाल प्रहरी, सशस्त्र प्रहरी र नेपाली सेना उद्धारका लागि खटीएको छ । सडक मार्ग विच्छेद भएका कारण उद्धारका लागि हेलिकप्टर प्रयोग गरिएको छ ।
यसैबीच हेलिकप्टरले स्थानीय राज होटको छतमा फसेका दुई जनालाई उद्धार गरेको । बाढीले बगाएर वेपत्ता दुई जनाको शव फेला परेको छ । प्रमुख जिल्ला अधिकारीका अनुसार एक जनाको शव भीमटार र अर्का व्यक्तिको शव काभ्रेको मण्डनमा भेटिएको हो । अन्य थप मानविय क्षति भएको जानकारी आइनसकेको प्रजिअ अरुणकुमार पोखरेलले बताउनुभयो ।

जिल्ला प्रहरी कार्यालय सिन्धुपाल्चोकका डिएसपी प्रकाश सापकोटाले मेलम्ची ड्यामसाइट र हेलम्बुको चनौटे आसपासमा करिब ५० जनाभन्दा बढी बेपत्ता भएको सुन्नमा आएपनि त्यसबारे बुझ्ने प्रयास भइरहेको बताउनुभयो ।
त्यस्तै बाजुराका प्रमुख जिल्ला अधिकारी गोपालकुमार अधिकारीका अनुसार बूढीनन्दा नगरपालिकाकी वर्ष ३५ की मोतीकला लोहारलाई बड्डीगाड खोलाले सोमबार राति बगाएकोमा मङ्गलबार शव फेला परेको हो । बाजुराकै त्रिवेणाी नगरपालिकाका १२ वर्षीय बालक कमल बुढालाई किन्नी खोलाले बगाउँदा बेपत्ता छन ।
गोरखाको स्थानीय खोला तर्न खोज्दा एक मजदुरलाई बाढीले बगाएको प्रमुख जिल्ला अधिकारी शालिग्राम शर्मा पौडेलले जानकारी दिनुभएको छ । ।
सल्यानमा खहरे खोलाले बगाएको अवस्थामा दुई जनाको शव भेटिएको छ । डीएसपी गोविन्द थापाका अनुसार दाम्ना गाउँपालिका वडा नम्बर ५ को ठूलो खोलाले बगाएको अवस्थामा ३० वर्षीय गीता खड्काको शव फेला परेको हो । त्यस्तै दाम्ना–४ का ४५ वर्षीय वीरमान विकको शव खानीखोलाले बगाएको अवस्थामा फेला परेको हो ।
नारायणी नदिमा आएको बाढीले नारायणगढ र गैँडाकोटको तटीय क्षेत्र डुबानमा परेको छ । नारायणीको बाढीले उग्र रूप लिएपछि त्रिवेणीको गण्डक बाँधको सबै ढोका खोलिएका छन । नारायणीको तटीय क्षेत्र त्रिवेणी, गैँडाकोट, सुस्तालगायतका क्षेत्रका बासिन्दालाई बस्तीबाट अन्य सुरक्षित स्थानमा जान सन्देश पठाइएको छ ।
यस्तै म्याग्दी नदीमा पनि पानीको सतह बढेको छ । म्याग्दीको उच्च हिमाली भेग र बेनी बजार आसपासमा भारी वर्षा भएको छ । यसैगरी निरन्तरको वर्षाका कारण विभिन्न स्थानहरुमा बाढी र पहिरो गएपछि बेनी जोमसोम सडक,बेनी दरवाङ सडक र ग्रामिण सडकहरु पूर्णरुपमा अवरुद्ध भएका छन् ।
अविरल वर्षापछि आएको पहिरोले राप्तीलोक मार्ग अवरुद्ध भएको छ । सडक माथिबाट ठूलो ढुङ्गासँगै पहिरो आएपछि दाङ–सल्यान सडकखण्ड अन्र्तगतको राप्ती राजमार्ग मंगलबार साँझदेखि अवरुद्ध भएको हो । सडक अवरुद्ध हुँदा दाङ्ग, सल्यान, रुकुम पूर्व, रुकुम पश्चिमको आवागन बन्द भएको छ । सडकमा एक सय सवारी साधन रोकिएका छन् ।
स्रोत विभिन्न न्यूज एजेन्सी

भक्तपुर, असार २, लक्ष्मी गारु

नेवार समुदायले आज धुमधामका साथ सिथि नखः पर्व मनाउँदैछन । जेष्ठ शुक्ल पक्ष षष्ठी अर्थात कुमार षष्ठीका दिन मनाउने यस पर्वलाई नेवार समुदायले वर्षा अघिको अन्तिम चाडको रुपमा समेत मनाउँछन ।
भगवान कुमारको जन्म दिन समेत भएकाले यस दिन कुमारको पुजा गरी मास, मुगी, केराउ लगायतका दलहनबाट बनेका विशेष प्रकारको पकवान वः (बारा) खाने प्रचलन रहेको छ । त्यसैगरी घरमा भर्खर भित्रिएको नयाँ गहुँको म्हुछ्यामढी (मुठ्ठी पारी बनाइएको विषेश खालको रोटी) समेत खाने गरिन्छ ।
नेवार समुदायमा ऋतु अनुसारको चाडपर्व र चाडपर्व अनुसारका पकवान खाने प्रचलन रहेको छ । त्यसैले नेवार समुदायका चाडपर्व खानेकुराको नामले समेत प्रसिद्ध छ । त्यस्तै पर्व मध्ये एक हो सिथि नखः पर्व ।
सिथि नखःको दिन नेवार समूदाय मुहान, इनार, कुवा, पोखरी, धारालगायतका पानीको स्रोत सरसफाइ गर्दछन । वर्षातको बेला बगेर आउने भेल र फोहोर पानी खानेपानीको मुहानमा मिसिएर पानी दुषित नहोस भनी पानीको मुहान र स्रोतको वरिपरी समेत सरसफाइ गरी निकास खोल्नु यसको विशेषता हो । साथै हिँउदमा पुरिएको, थुनिएको र सुकेको मुललाई वर्षातको पानीले फुटाउने भएकाले पनि सिथि नखःको दिन पानीको मुलको सफाइ गर्ने गरेको हो ।
सिथि नखः पर्वको नेवार समुदायमा विशेष महत्व राख्ने गर्दछ । यस चाडसँगै वर्षा शुरु हुने र किसानको वर्षको महत्वपूर्ण कार्य सिन्या ज्याः (धान रापाईं) शुरु हुने भएकोले यस चाडलाई वर्षा अघिको अन्तिम चाडको रुपमा समेत लिईन्छ ।
नेवार समुदायमा सिथि नखःको दुई कारणले विशेष महत्व राख्ने गरेको संस्कृतिकर्मी प्रा. डा. पुरुषोत्तमलोचन श्रेष्ठ बताउँछन । “पहिलो सिथि नखः महादेव पार्वतीका जेष्ठ सुपुत्र कुमारको जन्म दिन । यसले गर्दा पनि धार्मिक महत्व रहेको छ । गणेश देवताहरुका गणनायक हुन भने कुमार देवगणका सेनापति हुन । देवी देवताहरु मध्ये सबैभन्दा पहिला पुजा गरिने कुमारको पुजा आराधना गर्नाले वर्षातको बेला धान रोपाई जस्तो कृषि कार्य गर्न शरीरमा बल र शक्ति प्राप्त हुने विश्वास रहेको छ,” प्रा. डा. श्रेष्ठ भन्नुभयो ।

नेवार समूदाय कला सँस्कृति र साँस्कृतिक मनोरञ्जनका पारखी हुन । उनीहरु वर्षभरी अनेकथरी कला, साँस्कृतिक झाँकी र सांस्कृतिक चाडपर्व मनाउने गर्दछन । तर वर्षासँगै ती सबै थाँती राखी धान बाली लगाउन व्यस्त हुन्छन ।
नेवारीमा प्रचलित एउटा भनाई, ‘मनु स्युसाः लप्ते कुसाँ तपुया साँ न्हापाँ सिना ज्याः सिद्यके माः’ अर्थात ‘मान्छे मरे घुमले छोपेर भएपनि पहिला धान रोपाईं सक्नुपर्छ’ ले पनि धान खेतीको महत्व र प्राथमिकतालाई झल्काउँछ । यस्तो अवसरमा किसानहरुलाई जात्रा पर्व सबै थाँती राखेर अन्न उत्पादनका लागि मानसिक र शारीरिक रुपले पनि तयार पार्ने चाडको रुपमा सिथि नखःको विशेष महत्व रहने गरेको प्रा. डा. श्रेष्ठको कथन रहेको छ ।
धान खेती धेरै मेहनत र परिश्रमयुक्त खेती हो । वर्षातको झरीमा रुझेर, हिलो माटोसँग पौंठेजोरी खेल्दै गरिने धान रोपाईंलाई अन्य खेतीपातीमा भन्दा बढी नै शक्ति र तागत आवश्यक पर्छ । यही तथ्य बुझेर नेवार समूदायले सिथि नखःको दिन शरीरमा तागत उत्पन्न गराउने मास र मुगीका बारा, चामलको चटामरी, पापड, गहुँको मालपुवा लगायतका पकवान खाने चलन रहेको प्रा. डा. श्रेष्ठले बताउनुभयो । साथै भर्खरै गहुँ भित्र्याईने भएकाले नयाँ गहुँको पिठोको विभिन्न प्रकारका रोटीहरु खाने चलन समेत रहेको छ ।
यस दिन शुद्ध भई नवदुर्गा भवानी र शिक्तिपिठहरुको पुजागरि नयाँ गहुँबाट तयार गरिएको म्हुछ्यामढी चढाउनाले गहुँ उत्पादनमा बृद्धि हुनुका साथै वर्षा फाप्ने तथा घरपरिवारमा सुख शान्ति हुने जनविश्वास समेत रहेको पाईन्छ ।
यस दिन किसानहरुले खेत बारीमा काम गर्दैनन । एका बिहानै घरमा रहेको गाई वस्तुको गोबर मल, कम्पोष्ट मललाई खेतबारीमा पु¥याउने गर्दछ । त्यसपछि आफ्नो घर सफा गरि सिथि नखः पर्व मनाउन व्यस्त हुन्छन । यस दिन खेतको माटोलाई चोट पु¥याउन नहुने जनश्रुती रहेको पाईन्छ ।

भक्तपुर, असार १
व्यवसायी दिपक मल्होत्राले सूर्यविनायक नगरपालिकालाई २० थान अक्सिजन सिलिण्डर सहयोग गरेको छ । कटुञ्जेस्थित नगरपालिकाका कार्यालयमा मंगलवार आयोजित कार्यक्रममा व्यवसायी मल्होत्रा र पुर्वमन्त्री एवम् निवर्तमान सांसद महेश बस्नेतले संयुक्तरुपमा सो सिलिण्डर नगरप्रमुख बासुदेव थापालाई हस्तान्तरण गर्नुभयो । व्यवसायी मल्होत्राले बस्नेतको पहलमा नगरपालिकाले सञ्चालन गर्ने सूर्यविनायक अस्पतालको लागि सो सहयोग गरेको हो ।
सो अवसरमा निवर्तमान सांसद बस्नेतले निजी क्षेत्रको साथ् र सहयोगले सरकार र जनतालाई कोभिड–१९ बिरुद्ध लड्ने साहस बढेको बताउनुभयो ।
सूर्यविनायक नगर प्रमुख बासुदेव थापाले जनताको स्वास्थ्य सुरक्षाका लागि नगरपालिकाले गरेका प्रयासबारे अवगत गराउदै जगातीमा सञ्चालनमा आउन लागेको नगर अस्पतालसँगै नगरको स्वास्थ्य क्षेत्रमा नयाँ युग शुरु हुने जिकिर गर्नुभयो ।
व्यवसायी मल्होत्राले सहयोग गर्न पाउँदा आफुलाई सन्तोष मिलेको बताउनुभयो । नेपाल चेम्बर अफ कमर्सका उपाध्यक्ष समेत रहेका व्यवसायी मल्होत्राले सामाजिक संस्था डीएम फाउन्डेसन मार्फत सामाजिक काम गर्दै आउनुभएको छ । कोरोना भाइरस संक्रमणको महामारीमा अक्सिजन अभाव भएसंगै मल्होत्राले चीनबाट अक्सिजन सिलिन्डर खरिद गरी अस्पतालहरुलाई निःशुल्क उपलब्ध गराउदै आएका बताइएको छ । सूर्यविनायक नगरपालिकालाई पनि सोही संस्थामार्फत सहयोग गरिएको हो । सो अवसरमा नगर उपप्रमुख जुना बस्नेत, प्रमुख जिल्ला अधिकारी प्रेमप्रसाद भट्टराई लगायतको समेत उपस्थिति रहेको थियो ।

भक्तपुर, असार १
नेपाल मजदुर किसान पार्टीका अध्यक्ष नारायणमान बिजुक्छें (रोहित) ले नेपालमा कोरोना महामारीको रुपमा फैलिनुमा सरकार दोषी भएको छ । भक्तपुर नगरपालिकाले सञ्चालन गरेको ख्वप अस्पतालमा स्थापना गरेको अक्सिजन प्लान्टको मंगलवार उद्घाटन गर्दै अध्यक्ष बिजुक्छेंले नेपाल भारत सिमानाका समयमा नियन्त्रण गरेको भए नेपालमा कोरोना महामारीको रुपमा फैलिएको र यसमा सरकार दोषी भएको बताउनुभएको हो ।
उहाँले भन्नुभयो, ‘नेपाल भारतबीचको सीमा नाका समयमै आवश्यक निगरानी, नेपाल भित्रिनेहरुको स्वास्थ्य जाँच र कडाइ गर्न नसक्दा नेपालमा कोभिड १९ को संक्रमण महामारीको रुपमा फैलिएको हो । यसमा सरकार नै दोषी छ ।’
जनताको जीवन रक्षामा सरकार चुकेको बताउँदैं अध्यक्ष बिजुक्छेँले जनतालाई सामुदायिक र निजी संस्थाहरुबीचको भिन्नता र महत्वबारे सचेत पार्नुपर्ने र समाजमा आमूल परिवर्तनको निमित्त जनतालाई नै राजनैतिक रुपले सचेत पार्नुपर्नेमा जोड दिनुभयो ।

उहाँले कोभिड महामारीविरुद्धको लडाइँमा संसारका धनी र विकसित देशहरुलाई समेत कठिन भएको चर्चा गर्दै कोभिड जस्ता महामारीबाट सर्वसाधारण जनताको जीवन रक्षाको लागि नेपालका सातै प्रदेशमा सुविधा सम्पन्न अस्पताल बनाउनुपर्ने बताउनुभयो ।
जनताको सहयोगी भावनाले प्राप्त भएको आर्थिक र भौतिक सहयोगबाट निर्मित अक्सिजन प्लान्टले जनताकै हित हुनेमा विश्वास व्यक्त गर्दै उहाँले भक्तपुर नगरपालिकाले पनि जनताको सहयोगको सही सदुपयोग गरी जनताकै सेवामा बढीभन्दा बढी उपयोग हुनुपर्ने बताउनुभयो ।
उहाँले जनप्रतिनिधिहरुले समयमै सक्रियतापूर्वक कोभिड नियन्त्रणका लागि आवश्यक कदम चालेकाले भक्तपुर नगरपालिकाले कम क्षति व्यहोरेको बताउनुभयो ।

भक्तपुर नगरपालिकाका प्रमुख सुनिल प्रजापतिले ख्वप अस्पतालमा अक्सिजन प्लान्ट र अन्य स्वास्थ्य उपकरणहरुको निम्ति जनता आफै अग्रसर भएर श्रोतको बन्दोबस्त गर्नु जनप्रतिनिधि र जनताबीच एकताको प्रमाण भएको बताउनुभयो ।
संकटको बेला जनताले नगरपालिकाबाट बढी सहयोगको आशा गर्नु स्वभाविक भएको बताउँदैं प्रमुख प्रजापतिले कोभिडको दोस्रो लहरको संकेत भक्तपुर नगरपालिकामा देखा पर्ने बित्तिकै बैशाख १७ गतेदेखि नै ख्वप अस्पताल कोभिड युनिट सञ्चालनमा ल्याएको बताउनुभयो ।
अक्सिजन प्लान्ट राख्न १ करोड ४१ लाख २५ हजार लागत इष्टिमेट तयार भएकोमा हालसम्म १ करोड २३ लाख ३६ हजार रुपैया खर्च भएको जानकारी दिँदैं प्रमुख प्रजापतिले ख्वप अस्पतालले दिने सेवा सुविधा सरल र सहज बनाउन प्रयत्नरत रहेको बताउनुभयो ।

उपप्रमुख रजनी जोशीले ख्वप अस्पताललाई जनताको अस्पतालको रुपमा सञ्चालन गर्ने उद्देश्यअनुरुप नगरपालिका लागिपरेको र मानव जीवन रक्षा गर्ने अक्सिजन प्लान्ट नगरपालिकाको लागि गौरवको कार्य भएको बताउनुभयो ।
वडा नं. ७ का वडाध्यक्ष उकेश कवांले महामारीको मौका छोपी कृत्रिम अक्सिजन अभावको स्थिति सृजना गरी कालोबजारी गर्नेहरुलाई अपराधीको संज्ञा दिनुभयो । उहाँले भक्तपुरबासी जनताको अपार माया र सहयोगकै कारण अक्सिजन प्लान्ट स्थापना निर्धारित समयमै गर्न सम्भव भएको बताउनुभयो ।

ख्वप कलेज अफ इन्जिनियरिङका प्राचार्य ई. सुनिल दुवालले अक्सिजन प्लान्टको खरिद प्रक्रिया र जडानको प्राविधिक पक्षमाथि जानकारी दिनुभयो । जनस्वास्थ्य केन्द्रका इन्चार्ज डा. रत्नसुन्दर लासिवाले ख्वप अस्पताल कोभिड युनिट र जनस्वास्थ्य केन्द्रका कोभिड संक्रमित बिरामीहरुको अवस्था र अस्पतालबाट बिरामीहरुको सेवासम्बन्धी भइरहेका गतिविधिहरुबारे जानकारी गराउनुभयो ।

भक्तपुर, असार १

भक्तपुरका साप्ताहिक, मासिक र दैनिक पत्रिकाका प्रकाशकहरुले साना लगानीका स्वरोजमूलक पत्रपत्रिकाहरुको संरक्षणका लागि विशेष कार्यक्रम ल्याउन सरकारसँग माग गरेको छ । कोरोना महामारी नियन्त्रणका लागि जारी लकडाउन र निषेधाज्ञाका कारण साना लगानीका स्वरोजमूलक पत्रपत्रिकाहरु आर्थिकरुपमा धराशायी भएको भन्दै उनीहरुले विशेष कार्यक्रमको माग गरेका हुन ।
नेपाल पत्रकार महासंघ जिल्ला शाखा भक्तपुरले मंगलवार कार्यालयमा आयोजित छलफलमा सहभागी प्रकाशकहरुले लकडाउन र निषेधाज्ञाले साना लगानीका स्वरोजमूलक पत्रपत्रिका प्रभावित बनेको र यसले गम्भिर आर्थिक संकट निम्त्याएको निष्कर्ष सहित समानुपातिक विज्ञापन प्रणाली कार्यान्वयन र सहुलियतपूर्ण कर्जाको समेत माग गरेका छन ।
छलफलमा धरहरा टाईम्स साप्ताहिकका प्रकाशक सम्पादक रमेश खड्काले लकडाउन र निषेधाज्ञाले पत्रिका छपाई र वितरणमा समस्या आएको र प्रकाशित विज्ञापनको शुल्क समेत उठ्न नसक्दा पत्रिकाले आर्थिक संकट व्यहोर्नु परेको बताउनुभयो । महासंघ भक्तपुरका संस्थापक अध्यक्ष समेत रहनुभएका खड्काले पत्रपत्रिकालाई संरक्षणका लागि महासंघले विशेष पहल गर्नुपर्नेमा जोड दिनुभयो ।
दवाब साप्ताहिकका सम्पादक एवम् महासंघ उपत्यका प्रदेश समितिका सचिव अमर भुजुले लकडाउन र निषेधाज्ञाले बजार बन्द हुँदा पत्रिका वितरण र छपाई संख्यामा कमी आएको बताउनुभयो ।
ङातापोल एक्सप्रेस दैनिकका प्रकाशक विश्वराम दुवालले कागजको अभावले मूल्यबृद्धि भएको, बढी तौलको कागज प्रयोग गर्नुपरेको र छपाई मजदुरलाई अतिरिक्त पारिश्रमिक दिनुपर्दा आर्थिक भार बृद्धि भएको बताउनुभयो ।
हाम्रो समाज साप्ताहिकका प्रकाशक मणिराम लामिछानेले साना लगानीका पत्रपत्रिकाको संरक्षणका लागि बैंक तथा वित्तिय संस्था, सरकारी निकाय र स्थानीय तहमा पत्रिकाको नियमित ग्राहक बनाउने प्रणालीको विकास गर्नुपर्ने सुझाव दिनुभयो । उहाँले केही समयदेखी नियमित विद्युत आपुर्तीमा अवरोध आएको र यसले पत्रिकाको कार्य सम्पादन गर्न तथा छपाईमा समस्या आएको बताउनुभयो ।
नुवागी मासिकका प्रकाशक मतिना त्वानावासुले आफैं कोभिड संक्रमण हुँदा पत्रिका नै बन्द गर्नुपरेको समस्या सुनाउनुभयो । उहाँले विज्ञापन संकलनमा आफैंबीचको अस्वस्थ प्रतिष्पर्धाले पनि साना लगानीका पत्रपत्रिकालाई विज्ञापनदाताको विश्वास गर्न नसकेको बताउनुभयो ।
त्रिपुरा न्यूजका प्रकाशक विकास थापा ‘प्रहर’ले कामदार नपाउँदा प्रेस नै बन्द भएको र त्यसले गर्दा पत्रिका नियमित प्रकाशन गर्न नसकिएको बताउनुभयो ।
महासंघ जिल्ला सचिव सन्जीप घिमिरे ‘शुभचिन्तक’ले साना लगानीका पत्रपत्रिका सबैका समस्या समान र साझा देखिएको भन्दै सबैले स्वस्थ प्रतिष्पर्धागरी समाधानका लागि सामूहिकरुपमा प्रयास गर्नुपर्ने सुझाव दिनुभयो ।
महासंघ भक्तपुरका अध्यक्ष जगतकृष्ण प्रजापतिले साना लगानीका पत्रपत्रिकाहरुको संरक्षणका लागि आगामी आर्थिक वर्षको नीति तथा कार्यक्रम र बजेटमा लोककल्याणकारी विज्ञापनको व्यवस्थागरी नियमितरुपमा सूचना प्रवाहको व्यवस्था नीतिगत रुपमै गर्न आग्रह गरिएको जानकारी दिनुभयो ।

भक्तपुर, असार १
बन्दाबन्दी (लकडाउन) र निषेधाज्ञाकाबीच पनि सरकारलाई कर तथा राजश्व उठाउन बाटो खुल्ला भएको छ । सर्वोच्च अदालतले यसअघि दिएको अन्तरिम आदेश खारेज गरेसँगै सरकारलाई बन्दाबन्दी र निषेधाज्ञाले व्यवसाय बन्द भएपनि कर उठाउन बाटो खुल्ला भएको हो ।
यसअघि सर्वोच्चको एक न्यायधिशको इजलासले गत जेठ ५ गते निषेधाज्ञा वा बन्दाबन्दी लागू भएको अवधिसम्म मूल्य अभिबृद्धि कर विवरण र कर दाखिला नगरेमा जरिवाना असुल नगर्नु नगराउनु, बन्दाबन्दी पूर्णरुपमा खुलेपछि बाटोको म्याद बाहेक ३० दिनभित्र विवरण र कर बुझाउन सक्ने गरी आवश्यक व्यवस्था मिलाउनु भन्ने अन्तरिम आदेश जारी गरेको थियो ।
सर्वोच्चका न्यायाधीश डा. आनन्दमोहन भट्टराई र नहकुल सुवेदीको इजलासले मंगलवार सो आदेश खारेज गरिदिएपछि सरकारलाई बन्दाबन्दी र निषेधाज्ञामा पनि कर उठाउन सक्ने बाटो खुलेको हो ।
सर्वोच्चले आर्थिक ऐन २०७७ को दफा १९ अनुसार आवागमनमा अवरोध, विपदलगायतको कारणले कर तिर्न समस्या भएमा अर्थ मन्त्रालयले वाधा अड्काउ फुकाउ गर्न सक्ने व्यवस्था भएकाले कर तिर्ने विषयमा छुट्टै आदेश गर्नु नपर्ने निश्कर्ष निकालेको हो ।
आदेशमा सर्वोच्चले ‘अर्थ मन्त्रालयले आर्थिक ऐन २०७७ को दफा १९ बमोजिम निर्णय गरी प्रकाशित गर्ने सूचनामा उल्लेख भएको अवधिसम्मको लागि मात्र कर विवरण र कर दाखिला नगरेमा जरिवाना असुल नगर्न नगराउन’ आदेश दिएको छ । अब सरकारले कर विवरण र कर दाखिला गर्ने निश्चित अवधि तोकेर त्यो मितिसम्म कर नतिरेमा जरिवाना लिन सक्नेछ ।
हेर्नुहोस् आदेश