Category: भर्खरै

भक्तपुर, फागुन ८
भक्तपुरको चाँगुनारायण नगरपालिका–४ खोरियास्थित एक घरमा मृत भेटिएका युवकको हत्या भएको दावी गर्दै उनको परिवारले प्रहरीमा जाहेरी दिएका छन् । मृतक १९ वर्षीय युवक निरोज लामाको परिवारले जिल्ला प्रहरी परिसर भक्तपुरमा ज्यानसम्बन्धी कसुरमा निरोजकै साथी बादल तामाङविरुद्ध किटानी जोहरी दिएका हुन ।
प्रहरीका अनुसार निरोज ६ फागुनको राति बादलको घरमा गएका थिए । तर त्यसको भोलीपल्ट फागुन ७ गते निरोज बादलको घरमा मृत फेला परेका हो । दिउँसो ३ बजे मात्र बादलले साथी निरोज कोठामा अचेत अवस्थामा फेला परेको भन्दै प्रहरीलाई जानकारी दिएका थिए ।
तत्काल प्रहरी घटनास्थल पुग्दा निरोज मृत फेला परेको प्रहरी परिसर भक्तपुरका सूचना अधिकारी प्रहरी नायव उपरीक्षक (डिएसपी) ढुण्डीराज नेउपानेले बताउनुभयो । उहाँका अनुसार बादललाई ज्यानसम्बन्धी कसुरमा अदालतबाट म्याद लिएर थप अनुसन्धान हुनेछ ।
यद्यपी निरोजको हत्या हो÷होइन अहिलेसम्म यकिन हुन नसकेको प्रहरीको भनाइ छ । पोस्टमार्टम रिपोर्ट आउन बाँकी नै रहेकाले निरोजको मृत्युको कारण खुल्न बाँकी नै रहेको डिएसपी नेउपानेले बताउनुभयो ।

भक्तपुर, फागुन ८
मध्यपुर थिमि नगरपालिकाले ज्येष्ठ नागरिक स्वास्थ्य सेवा तथा महिला सु–स्वास्थ्य कार्यक्रम शुरु गरेको छ । नगरपालिकाले बिहिवार वडा नं. ६ स्थित पाटी बिहारमा कार्यक्रम आयोजना गरी ६० वर्ष भन्दा माथिका ज्येष्ठ नागरिक र महिलाहरुको निःशुल्क स्वास्थ्य सेवा शुरु गरेको हो ।
कार्यक्रमको शुभारम्भ गर्दै मध्यपुर थिमि नगरपालिकाका प्रमुख सुरेन्द्र श्रेष्ठले निर्वाचनमा शिक्षा, स्वास्थ्य र रोजगारीलाई प्राथमिकता दिने प्रतिवद्धता जनाए अनुसार वडा वडामा ज्येष्ठ नागरिक र गर्भवती महिलाहरुको स्वास्थ्य जाँच शुरु गरिएको बताउनुभयो ।
नगरपालिकाले सञ्चालन गरेको नेपाल कोरिया मैत्री नगरपालिका अस्पतालमा हाल दैनिक एक हजारको हाराहारीमा सेवाग्राही आइरहेको अवस्थामा ज्येष्ठ नागरिक र गर्भवती महिलाहरुको सहजताको लागि अस्पतालका विशेषज्ञ चिकित्सकसहितको टोलीले वडा वडामा स्वास्थ्य सेवा उपलब्ध गराएको नगर प्रमुख श्रेष्ठले जानकारी दिनुभयो ।

उहाँले नेपाल कोरिया मैत्री नगरपालिका अस्पतालको ल्याव रिपोर्ट लिन अब अस्पताल धाउनुपर्ने बाध्यता अन्त्य गरेको बताउनुभयो । उहाँका अनुसार ल्याव रिपोर्ट अब मोवाइलमा हेर्न मिल्ने व्यवस्था गरिएको छ । उहाँले यसै वर्ष अस्पतालमा ब्लड बैंक सञ्चालनमा आउने जानकारी दिनुभयो ।
स्वास्थ्य सेवा कार्यक्रममा ल्याव सेवा, आवश्यक औषधी, भिडियो एक्सरे, विशेषज्ञ सेवाका लागि रिफरल सेवा उपलब्ध हुनेछ भने गर्भवती महिलाहरुको स्वास्थ्य जाँच गरिनेछ । सो अवसरमा स्वास्थ्य बिमा नहुने सेवाग्राहीको हकमा स्थानीय स्वास्थ्य संस्थाको पुर्जा प्रयोग गरी आवश्यक औषधी निःशुल्क प्रदान गर्ने व्यवस्था गरिएको नगर प्रमुख श्रेष्ठले बताउनुभयो ।

नगरपालिकाका उपप्रमुख बिजयकृष्ण श्रेष्ठले सुगर, प्रेसर जस्ता दीर्घ रोगका बिरामीहरु धेरै समय खर्चेर आफ्नो उपचार गर्न पालो कुर्नु पर्ने अवस्थाको अन्त्य गर्न वडा वडामा स्वास्थ्य कार्यक्रम सञ्चालन गरिएको बताउनुभयो । उहाँले यो कार्यक्रमबाट रोग लाग्नु अगावै नै रोगको पहिचान गर्न मद्दत पुग्ने विश्वास व्यक्त गर्नुभयो ।
नेपाल कोरिया मैत्री नगरपालिका अस्पतालका प्रमुख डा.दिपेन्द्र कुमार रौशनले स्वास्थ्य सबैको अधिकार हो र यो अधिकारलाई घरघरमा किन नपु¥याउने त भन्ने हेतुले ज्येष्ठ नागरिक तथा महिला स्वास्थ र गर्भवती महिलाहरुको निःशुल्क स्वास्थ्य सेवा कार्यक्रम सञ्चालनमा ल्याइएको तर्क राख्नुभयो । उहाँले निजी अस्पतालको तुलनामा नेपाल कोरिया मैत्री नगरपालिका अस्पतालले प्रदान गर्दै आइरहेको प्रगतीको प्रचार प्रसार हुन नसकेको बताउनुभयो ।

वडा नं. २ का वडाअध्यक्ष एवम् नगरपालिकाको सामाजिक विकास शाखा संयोजक श्रीकृष्ण श्रेष्ठले कार्यक्रमले ज्येष्ठ नागरिकहरुले घरदैलोमा नै स्वास्थ्य सेवा प्राप्त गर्दा समयको वचत हुनुका साथै सेवा प्राप्तीमा पनि सहजता हुने बताउनुभयो ।
कार्यक्रम प्रत्येक महिनाको २ दिन नगरका १ देखी ९ वटै वडामा सञ्चालन हुने मध्यपुर थिमि नगरपालिकाका जनस्वास्थ्य शाखा प्रमुख श्रीकृष्ण प्रजापतिले बताउनुभयो । सेवाग्राही ज्येष्ठ नागरिक क वर्गको अशक्त भएको अवस्थामा मेडिकल अफिसरसहितको टोलीको निजको निवासमा नै स्वास्थ्य जाँच गरी आवश्यक औषधोपचारको व्यवस्था गरिएको उहाँले बताउनुभयो ।

भक्तपुर, फागुन ६
दुर्घटना न्यूनिकरणका लागि जिल्ला ट्राफिक प्रहरी परिसर भक्तपुरले जिल्लाको दोस्रो मूख्य सडक पेप्सीकोला–पुरानो थिमि–निकोशेरा सडक (पुरानो बाटो)मा तिब्र गति नियन्त्रण अभियान शुरु गरेको छ । परिसरले निकोशेरा चोकबाट यो अभियान शुरु गर्दै उक्त सडकमा सवारीको गति प्रतिघण्टा ४० किलोमिटर निर्धारण गरेको हो ।
अभियान अन्तर्गत जनचेतना अभिबृद्धि र पेप्सीकोला–पुरानो थिमि–निकोशेरा सडक खण्डमा गति निर्धारण सम्बन्धी जानकारीमूलक बोर्डहरु २० स्थानमा राखिएको छ । तोकिएको गति भन्दा बढी गतिमा सवारी साधन चलाय कारवाही हुने चेतावनीयुक्त बोर्ड पनि राखिएको छ ।
परिसरले मध्यपुर थिमि नगरपालिकाको संयोजन एवं सहयोगमा ट्राफिक प्रहरी, नगरपालिका, प्रहरी बृत्त थिमि, डिभिजन सडक कार्यालय भक्तपुर, नगर प्रहरीसमेतको टोलीले आज निकोशेरा चोकदेखि पेप्सीकोला मनोहरा पुलसम्म २० ठाउँमा तिब्र गति नियन्त्रण सम्बन्धि जनचेतना एवं सूचनामलक बोर्डहरु राखेको हो ।
जिल्ला ट्राफिक प्रहरी परिसर भक्तपुरका प्रमुख एवं ट्राफिक प्रहरी निरीक्षक प्रदीप खत्रीले फराकिलो सडकमा सावरी साधनको अत्याधिक तिब्र गतिका कारण दुर्घटना बढेपछि यसलाई नियन्त्रण गर्न तिब्र गति नियन्त्रण अभियान शुरु गरेको बताउनुभयो ।

उहाँले २०८१ साउन १ गतेदेखि यहीँ फागुन २ गतेसम्म सात महिनाको अबधीमा सल्लाघारीबाट निकोशेरा, बाहखा बजार, पुरानो थिमि, सानोथिमी हुदै पेप्सीकोला सडकमा मात्रै १६० वटा सवारी साधन दुर्घटना भएको जानकारी दिनुभयो । दुर्घटना भएका मध्ये ९० प्रतिशत दुई पाङ्ग्रे सवारी साधन भएको खत्रीले बताउनुभयो ।
उहाँले नियमाअनुसार फराकिला सडकमा प्रति घण्टा ४० किलोमिटर र बस्ती भित्रका सडकमा ३० किलोमिटर प्रतिघण्टाको गति कायम गरिएको बताउनुभयो । यसैगरी अरनिको राजमार्ग खण्ड अन्तर्गत मनोहरा खोलादेखि राधेराधे सूर्यविनायकसम्म प्रतिघण्टा ५० किलोमिटरको गति निर्धारण गरिएको छ ।
गति निर्धारण गरिएका सडकहरुमा जुनसुकै समयमा ट्राफिक प्रहरीले राडार गनको सहायताले सवारी साधनहरुको गति मापन गरी तोकिएको भन्दा बढी गतिमा सवारी चलाए कारवाही गरिने भएकाले तिब्र गतिमा सवारी साधान नचलाउन खत्रीले सबैमा आह्वान समेत गर्नुभयो ।
अभियानका क्रममा चाँगुनारायण नगरपालिकाका प्रमुख जीवन खत्रीले भक्तपुर–नगरकोट सडकमा पनि सवारीको गति निर्धारण आवश्यक रहेको बताउनुभयो ।

मध्यपुर थिमि नगरपालिका वडा नं. ६ का वडासदस्य रामचन्द्र थापा मगर, डिभिजन सडक कार्यालय भक्तपरका सुपरभाईजर सजन श्रेष्ठलगायतले भक्तपुरका मुख्य सडकहरुमा यस्ता अभियान आवश्यक रहेको बताउनुभयो ।
यसैबीच जिल्ला ट्राफिक प्रहरी परिसर भक्तपुरले रातीको समयमा पनि राडार गन मार्फत तिब्र गति मापन गर्दै कारबाही प्रक्रिया शुरु गरेको छ । गत सोमबार राती ८ बजेदेखी ९ बजेसम्म एकघण्टा गरेको जाँचमा ४९ वटा सवारी साधन तिब्र गतिका कारण कारबाहीमा परेको खत्रीले जानकारी दिनुभयो ।
तिब्र गतिका कारण अरनिको राजमार्ग अन्तर्गत लोहकिल्थली मनोहरा पुलदेखी सूर्यविनायक चोकसम्म सवारी दुर्घटनामा बृद्धि भएकाले न्यूनिकरणका लागि रातीको समयमा पनि राडार गनको सहायताले सवारीको गति मापन गरी तिब्र गतिमा सवारी चलाउनेलाई कारवाही शुरु गरिएको खत्रीले बताउनुभयो ।

भक्तपुर, फागुन ६
भक्तपुरको चाँगुनारायणमा मंगलवार दिउँसो एक युवक मृत फेला परेका छन । चाँगुनारायण नगरपालिका –४ खोरिया भन्ने स्थानमा १९ वर्षिय निरोज लामा मृत फेला परेका हुन ।
साथीको घरमा आएका लामा सुतेकै स्थानमा मृत फेला परेको हो । चाँगुनारायण–४ स्थित २१ वर्षीय बादल तामाङको घरमा लामा मृत फेला परेको हो । मृतक लामा र तामाङ साथी हुन ।
सोमवार राती लामा तामाङको घरमा गई खाना खाई सुतेका थिए । दिउँसो ३ बजेसम्म लामा नउठेपछि बोलाउन जाँदा मृत अवस्थामा फेला परेको घरधनी तामाङले बताएको जिल्ला प्रहरी परिसर भक्तपुरका सूचना अधिकारी प्रहरी नायव उपरीक्षक (डिएसपी) ढुण्डीराज नेउपाने जानकारी दिनुभयो । घटनाको बारेमा प्रहरीले अनुसन्धान गरिरहेको डिएसपी नेउपानेले बताउनुभयो ।

भक्तपुर, फागुन ५
फोर नेसन्स वमन्स इन्टरनेसनल फुटबल च्याम्पियनसिपमा नेपालले विजयी शुरुवात गरेको छ । काठमाण्डौंको दशरथ रंगशालामा सोमवार साँझ सम्पन्न खेलमा नेपालले १–० गोल अन्तरले किर्गिस्तानलाई पराजित गरेको हो ।
नेपालले खेलको पहिलो हापमा विमला चौधरीले गरेको हेडर गोलको मद्दतले जित हासिल गरेको हो । विमलाले खेलको ११ औं मिनेटमा उत्कृष्ट हेडर गोल गर्दै नेपाललाई अग्रता दिलाएका थिए । खेलमा थप गोल हुन नसकेपछि विमलाको गोल निर्णायक बनेको हो । सविता रानामगरले मैदानको बाँयातर्फबाट गरेको क्रसमा विमलाले उत्कृष्ट हेड गर्दै गोल गरेका थिए । नेपाली जर्सीबाट उनको यो दोस्रो गोल हो । यसअघि उनले सन् २०२१ मा फिलिपिन्सविरुद्ध गोल गरेकी थिइन् ।
खेलमा नेपालले किर्गिस्तानमाथि निरन्तर दवाब दिए पनि थप गोल भने गर्न सकेन । केही अवसरमा नेपाली खेलाडीहरु फिनिसिङमा चुके भने केही अवसरमा किर्गिस्तानी डिफेन्डर र गोलकिपर बाधक बने । किर्गिस्तानले पहिलो हाफमा नेपाली गोलपोष्ट चार्ज समेत गर्न सकेन् ।
खेलको छैटौं मिनेटमा नेपालले मौका सिर्जना गरेको थियो । रेखा पौडेलले टाइट एङगलबाट हानेको प्रहारलाई किर्गिस्तानकी गोल किपर दिलनुरा अबिबुल्लाहले बचाइन् । रिबाउन्डमा सबिता राना मगरको प्रहार बाहिरियो ।
१८ औं मिनेटमा प्रिती राईको फ्रि–किकमा विमला चौधरीको प्रहारलाई गोल किपर दिलनुराले बचाइन् । फर्किएको बलमा रेणुका नगरकोटीको लङ रेन्ज प्रहार क्रसबार माथिबाट थोरैले बाहिरियो ।
२७ औं मिनेटमा प्रिती राईको प्रहारलाई गोलकिपरले पन्च गरेर बचाइन् । यसपछि पहिलो हाफको इन्जुरी समयमा नेपालले सुनौलो मौका गुमायो । रश्मि कुमारी घिसिङको प्रहार क्रस बारमा लागेर फर्कियो । रिबाउन्डमा पनि सबिताको प्रहारले फेरि क्रसबारमा लाग्यो । रिबाउन्डमा रेखाको प्रहारलाई किर्गिस्तानकी डिफेन्डरले क्लियर गरिदिईन् ।

दोस्रो हाफको शुरूवातमा नै डिफेन्डर विमला विकेलाई रिप्लेस गर्दै स्टार स्ट्राइकर साबित्रा भण्डारी मैदान प्रवेश गरिन् । ५३ औं मिनेटमा विमला चौधरीले पहेंको कार्ड पाइन् । रेखा पौडेलको क्रसमा विमलाले हातले गोल गरेपछि रेफ्रीले कार्ड दिएकी थिइन् । ८२ औं मिनेटमा सबिताको प्रहार पोष्ट नजिकैबाट बाहिरियो ।
आजै भएको पहिलो खेलमा म्यानमारले लेबनानलाई ३–१ ले हराएको थियो । चारै टिमले एक–एक खेल खेल्दा म्यानमार र नेपालले समान ३÷३ अंक जोडेका छन् ।
अब बिहिवार हुने पहिलो खेलमा किर्गिस्तानले म्यानमारको सामना गर्नेछ । दोस्रो खेल नेपाल र लेबनानबीच खेल हुनेछ ।

भक्तपुर, फागुन २
भक्तपुरको चाँगुनारायण नगरपालिका–३ कोल्पाकोट ओरालोमा निशान मिनि ट्रकको ठक्करले शुक्रवार ७२ वर्षिया बृद्धाको मृत्यु भएको छ । भक्तपुरको व्यासीबाट झौखेलतर्फ जाँदैं गरेको प्रदेश ३–०१–००३ क ४६३७ नम्बरको निशान मिनि ट्रकले ठक्कर दिँदा चाँगुनारायण नगरपालिका–५, पिखेल बस्ने ७२ वर्षिया केकई मग्रराती मगरको मृत्यु भएको हो ।
ट्रकको ठक्करले गम्भिर घाईते भएकी मगरलाई उपचारको लागि काठमाण्डौं मेडिकल अस्पताल दुवाकोट लगिएकोमा त्यही उपचारको क्रममा उनको मृत्यु भएको जिल्ला प्रहरी परिसर भक्तपुरका सूचना अधिकारी डिएसपी ढुण्डीराज नेउपानेले जानकारी दिनुभयो ।
प्रहरीले मिनि ट्रक चालक भक्तपुर नगरपालिका–१०, कमलविनायक बस्ने ५४ वर्षिय ईन्द्र नारायण सितखुलाई नियन्त्रणमा लिएर थप कारवाही गरिरहेको डिएसपी नेउपानेले बताउनुभयो ।

भक्तपुर, फागुन २
वैदेशिक रोजगारीमा पठाईदिने भन्दै ठगी गरेको अभियोगमा भक्तपुर प्रहरीले दुई जनालाई पक्राउ गरेको छ । पक्राउ पर्नेहरुमा सिन्धुपाल्चोकको बाह्रविसे नगरपालिका–७ घर भई हाल चाँगुनारायण नगरपालिका–२, दुवाकोट बस्ने ४१ वर्षिय गणेश बहादुर थापा र काभ्रेपलान्चोक नमोबुद्ध नगरपालिका–४, काफ्लेचोक घर भई हाल बनेपा नगरपालिका–६, बनेपा बस्ने ३९ वर्षिय दिनेश प्रसाद अधिकारी रहेका छन ।
उनीहरुले बेरोजगार युवा युवतीहरुलाई आकर्षक तलबको प्रलोभनमा पारी क्यानाडा, अजरबैजान र मोरिसस लैजाने भन्दै विभिन्न व्यक्तिहरुबाट ७१ लाख ७० हजार ठगी गरी फरार भएको प्रहरीको आरोप छ ।
पिडितहरुलाई लामो समयसम्म झुक्यानमा राखी विदेश नपठाई सम्पर्क विहिन भएकोमा पिडितहरुले दिएको जाहेरी दरखास्त उपर अनुसन्धानका क्रममा उनीहरुलाई पक्राउ गरिएको जिल्ला प्रहरी परिसर भक्तपुरका सूचना अधिकारी डिएसपी ढुण्डीराज नेउपानेले बताउनुभयो ।
उनीहरुलाई मुलुकी फौजदारी कार्यविधी संहिता २०७४ को ठगी सम्बन्धी कसूरको दफा १४(६) बमोजिम भक्तपुर जिल्ला अदालतबाट म्याद थप गरी थप अनुसन्धान भइरहेको डिएसपी नेउपानेले जानकारी दिनुभयो । प्रहरीले पक्राउ परेका अधिकारी र थापाबाट अन्य व्यक्तिहरु समेत ठगिएको भए जिल्ला प्रहरी परिसर भक्तपुरमा सम्पर्क गर्न आग्रह गरेको छ ।

भक्तपुर, फागुन २
परम्परागत मौलिक खाना र जडिबुटीको सही प्रयोगका साथ यसलाई व्यवसायिकरण गर्ने ध्येयका साथ सिद्धि गणेश बचत तथा ऋण सहकारी संस्थाले सदस्यहरुलाई अभिमुखीकरण गरेको छ । सिद्धि गणेशको लघुवित्त तथा वचत कोष परिचालन उपसमितिको आयोजनामा सदस्यहरुलाई सो अभिमुखीकरण गरेको हो ।
कार्यक्रममा डा. सरिता श्रेष्ठले नेपालको मौलिक खाना वैज्ञानिक रुपले पोषण युक्त भएको बताउनुभयो । नेवारहरुको विभिन्न पर्वको खानाको छुट्टै विशेषता र अद्धितीय भएको बताउँदै उहाँले यसलाई पकाउने र खाने शैलीमा विज्ञान लुकेको दृष्टान्त स्पष्ट पार्नुभयो ।
जडिबुटीको प्रयोग गर्दा पनि आयुर्वेदका चिकित्सकको परामर्शमा मात्र लिनुपर्ने जानकारी दिंदै उहाँले जडिबुटीको प्रयोगको पनि पद्धति भएको र यसको खाने समय एवम् मात्रा हुने जानकारी दिनुभयो ।
परम्परागत औषधी जडिबुटी र औषधीको सही प्रयोगसम्वन्धि पुस्तकका सम्पादक पूर्णभक्त दुवालले गलत, बिग्रेका वा म्याद नाघेका औषधि सेवन गर्नाले रोग ठीक हुनुको सट्टा अर्को रोग वा उपद्रव भई पैसा, समय र स्वास्थ्य बरबाद हुनसक्ने हुँदा सहि, नबिग्रेको, गुणवान् औषधि मात्र प्रयोग गर्नुपर्ने सल्लाह दिनुभयो ।
नेपाली बजार विदेशी जडिबुटीबाट बनेको औषधिले भरिएको र नेपाली उत्पादन धरासायी भएको दृष्टान्त पनि उहाँले प्रस्तुत गर्नुभयो ।

उहाँले जडिबुटी र परम्परागत उत्पादन थलोमा पु¥याएर ‘कृषक समूह’ गठन गरी ‘प्राविधिक प्रशोधन तालिम’ दिएर व्यवसायसँग जोड्नुपर्ने जानकारी दिंदै परम्परागत खाना र जडिबुटीलाई आयआर्जनको माध्यम बनाउन सहकारी संस्थाहरुले पहल गर्नुपर्ने बताउनुभयो ।
कार्यक्रममा सिद्धि गणेश बचत तथा ऋण सहकारी संस्थाका अध्यक्ष रुद्रनारायण लाखाले सदस्यहरुको आय आर्जन बृद्धि गर्न र क्षमता अभिवृद्धि गर्न सहकारीले विभिन्न तालिम दिंदै आएको जानकारी दिनुभयो ।
सिद्धि गणेश सहकारीका वित्त अधिकृत चन्द्रप्रसाद दुमरुले स्वागत गरेको कार्यक्रममा सहकारीका सञ्चालक रत्नश्वरी चवालले सिद्धि गणेशले सदस्यहरुको स्वास्थ्य सवल पार्दै आय आर्जन गर्ने हौसला दिन कार्यक्रमको आयोजना गरेको जानकारी दिनुभयो ।

भक्तपुर, फागुन २
स्थानीय तह संस्थागत क्षमता स्वमूल्यांकन (लिजा)मा मध्यपुर थिमि नगरपालिका भक्तपुर जिल्लामा दोस्रो भएको छ । आर्थिक वर्ष २०८०÷०८१ को लिजाको नतिजामा मध्यपुर थिमि १०० अंकमा ९१ अंक प्राप्त गरी जिल्लामा दोस्रो बनेको हो ।
जिल्लाका चार पालिका मध्ये चाँगुनारायण नगरपालिका पहिलो बनेको छ । चाँगुनारायणले १०० पूर्णाङ्कमा ९२ दशमलव ५ अंक प्राप्त गरी जिल्ला पहिलो बनेको हो । जिल्लमा सूर्यविनायक नगरपालिकाले ९०.५ अंक प्राप्त गर्दै तेस्रो र भक्तपुर नगरपालिकाले ८९ अंक प्राप्त गर्दै चौंथो बनेको छ ।
यस्तै चाँगुनारायण भक्तपुर जिल्ला प्रथमका साथै काठमाण्डौं उपत्यकाका १८ वटा पालिकामध्ये तेस्रो बन्न सफल भएको छ । उपत्यकामा काठमाण्डौंको तारकेश्वर नगरपालिका ९८.५ अंक प्राप्त गर्दै प्रथम, ललितपुर महानगरपालिका ९३.५ अंक प्राप्त गर्दै दोस्रो बनेको हो ।
संघीय मामिल तथा सामान्य प्रशासन मन्त्रालयले देशभरका ७ सय ५३ वटै स्थानीय तहमा जवाफदेहिता, पारदर्शिता र प्रतिस्पर्धा प्रवद्र्धन गर्दै सुशासन कायम गर्ने उद्देश्यले स्थानीय तह स्वमूल्यांकन गर्दै आएको छ ।

भक्तपुर, फागुन १
मध्यपुर थिमि नगरस्तरीय तेस्रो राष्ट्रपति रनिङ शिल्ड खेलकुद प्रतियोगिता बिहिवार शुरु भएको छ । तीन दिन चल्ने प्रतियोगितामा मध्यपुर थिमि नगरभित्रका २९ विद्यालयका ७ सय ६९ जना छात्रछात्राहरुले प्रतिष्पर्धा गर्नेछ ।
प्रतियोगितामा एथलेटिक्स, कबड्डी, भलिबल, मार्सल आर्ट अन्तर्गत उसु, कराँते र तेक्वान्दोका कुल ६० स्पर्धामा प्रतिष्पर्धा हुने मध्यपुर थिमि नगरपालिकाको सामाजिक विकास महाशाखा प्रमुख ज्ञानेन्द्र भट्टले जानकारी दिनुभयो ।
प्रतियोगिताका भलिबलका खेलहरु बोदे मावि बोदे, मार्सल आर्टका खेलहरु आदर्श मावि लाय्कू थिमि, कबड्डी आदर्श मावि सानो थिमि र एथलेटिक्सका खेलहरु सानो थिमिस्थित मध्यपुर युथ एशोसियसनको खेल मैदानमा सञ्चालन हुनेछ ।

प्रतियोगिताको उद्घाटन गर्दै भक्तपुर क्षेत्र नं. २ का प्रतिनिधि सभा सदस्य दुर्लभ थापाले पढाई सँगसँगैं शारीरिक तन्दुरुष्टीका लागि खेलकुदमा पनि सक्रियता बढाउनुपर्नेमा जोड दिँदैं प्रतियोगितामा सहभागीहरुलाई स्वस्थ र स्वच्छ प्रतिष्पर्धामार्फत आफ्नो प्रतिभा प्रदर्शन गर्न आग्रह गर्नुभयो ।
उद्घाटन कार्यक्रममा मध्यपुर थिमि नगरपालिकाका प्रमुख सुरेन्द्र श्रेष्ठले राष्ट्रको लागि खेलकुद, स्वास्थ्यको लागि खेलकुद भन्ने मूलनाराका साथ आयोजना गरिएको प्रतियोगितामा खेलाडीहरुले अनुशासित भएर प्रतिष्पर्धा गर्नुपर्नेमा जोड दिनुभयो । उहाँले खेलमा जित हार स्वभाविक भएको बताउँदैं हार जित जे भएपनि सहर्ष स्विकार गरी थप मेहनतका साथ अझ ठूलो प्रतियोगिताको लागि तयारी गर्नुपर्ने सुझाव दिनुभयो ।

यसैगरी उपप्रमुख विजयकृष्ण श्रेष्ठले नगरपालिकाले खेल क्षेत्रको विकासका लागि वडा लिग फुटबल, विद्यालयस्तरीय फुटबल प्रतियोगिता लगायत विभिन्न खेलका प्रतियोगिताहरु आयोजना गर्दै आइरहेको बताउनुभयो । उपप्रमुख श्रेष्ठले नगरपालिकाले खेल मैदान र खेल क्षेत्रको भौतिक पूर्वाधार विकासमा पनि महत्वका साथ योजना निर्माण गरी कार्यान्वयन गरिरहेको जानकारी दिनुभयो ।
भक्तपुर जिल्ला खेलकुद विकास समितिका अध्यक्ष राजु थापाले फागुनको दोस्रो साताभित्र जिल्लाका चार वटै पालिकामा पालिकास्तरीय राष्ट्रपति रनिङ शिल्ड खेलकुद प्रतियोगिता सम्पन्न गरी जिल्ला स्तरीय राष्ट्रपति रनिङ शिल्ड प्रतियोगिता सञ्चालन गर्ने बताउनुभयो । उहाँले राजनीतिक दलहरुलाई एकआपसमा प्रतिष्पर्धा भएता पनि खेल क्षेत्रको विकासका लागि एउटै मञ्चमा उभिन आग्रह गर्नुभयो ।
उद्घाटन समारोहमा आस्था महिला विद्यालयका छात्राहरुले नृत्य, चन्द्र सूर्य तेक्वान्दो डोजाङ्गले तेक्वान्दोको प्रदर्शन खेल, उसुको प्रदर्शन प्रस्तुत गरिएको थियो । साथै सहभागी विद्यालयहरुबीच मार्चपासको प्रतिष्पर्धा पनि गराईएको थियो ।