Category: भक्तपुर

भक्तपुर, असार ६
नेपाल पत्रकार महासंघ भक्तपुरले आइतवार प्रमुख जिल्ला अधिकारीमार्फत बागमति प्रदेश सरकारलाई ज्ञापनपत्र बुझाएको छ । बागमति प्रदेश सरकारले नीति तथा कार्यक्रम र बजेटमा आमसञ्चारमाध्यम स्थापना गरी सञ्चालन गर्न बजेट विनियोजन गरेको भन्दै महासंघले प्रदेश सरकारलाई ज्ञापनपत्र बुझाएको अध्यक्ष जगतकृष्ण प्रजापतिले बताउनुभयो ।
ज्ञापनपत्रमा ‘निजी तथा सामुदायिक स्तरबाट सञ्चालित सञ्चारमाध्यमलाई घाँटी निमोठेर स्वतन्त्र प्रेस र नागरिकका आवाजहरुलाई दबाउने मनासयले लोकतन्त्रको मूल्य मान्यतालाई समेत उपहास हुने गरी बागमति प्रदेश सरकार आफैंले सञ्चारमाध्यम स्थापना गरी सञ्चालन गर्न बजेट विनियोजन गरेको हाम्रो ठहर छ, विज्ञप्तीमा उल्लेख छ ।
प्रदेश सरकारको नियन्त्रणमा रहने गरी आमसञ्चारमाध्यम स्थापना र सञ्चालन गर्न दश करोड रुपैंयाँ विनियोजन गर्नु प्रदेश सरकार प्रेस तथा अभिव्यक्ति स्वतन्त्रतालाई कुण्ठित बनाउने दिशामा अघि बढेको महासंघ भक्तपुर शाखाले आरोप लगाएको छ ।
‘संघीय सरकार मातहत रहेका सञ्चारमाध्यमसमेत स्वायत्त र स्वतन्त्र बनाउन गृहकार्य भइरहेको सन्दर्भमा बागमति प्रदेश सरकार आफैले आमसञ्चारगृह सञ्चालन गर्न खोज्नुले स्वतन्त्र पे्रेसलाई निरंकुशताको कडी लगाउन खोजको प्रष्ट भएकोे छ, ज्ञापनपत्रमा उल्लेख छ ।
देशभरका ६६ प्रतिशत सञ्चारमाध्यम र नेपाल पत्रकार महासंघका ४८ प्रतिशत सदस्य बागमति प्रदेशमा रहेको भन्दै महासंघ भक्तपुर शाखाले आमसञ्चार जगतको संरक्षण, प्रवर्धन तथा क्षमता अभिवृद्धिका लागि पुँजीगत अनुदानदेखि लोककल्याणकारी विज्ञापनका लागि बजेट विनियोजन गर्न माग गरेको छ । महासंघले उक्त निर्णय फिर्ता नभए कडा आन्दोलनमा उत्रने चेतावनी दिँदैं सञ्चारमाध्यमको प्रवर्धन र सञ्चारकर्मीहरुको हितमा बजेट ल्याउन माग गरेको छ ।
ज्ञापनपत्र बुझाउन शाखा अध्यक्ष प्रजापतिको नेतृत्वमा शाखाका संस्थापक सभापति रमेश खड्का, पुर्वअध्यक्षहरु विकल प्रसाद श्रेष्ठ, महासंघ उपत्यका प्रदेश समितिका सचिव एवम् शाखाका पुर्वअध्यक्ष अमर भुजु, निवर्तमान अध्यक्ष पुष्करराज बुढाथोकी, शाखा उपाध्यक्ष सुन्दर शिल्पकार, शाखा सचिव संजीप घिमिरे, सदस्य विकास थापालगायतको उपस्थिती थियो ।
ज्ञापनपत्र बुझ्दै प्रमुख जिल्ला अधिकारी प्रेमप्रसाद भट्टराईले महासंघको प्रेस ताथ अभिव्यक्ति स्वतन्त्रता, आमसञ्चारमाध्यमहरु प्रतिको निष्ठाको उच्च सम्मान गर्दै ज्ञापनपत्र सम्बन्धित निकायमा पु¥याउने प्रतिवद्धता व्यक्त गर्नुभयो ।

भक्तपुर, असार ६
भक्तपुरको चाँगुनारायण नगरपालिकाले बाढी पिडित सिन्धुपाल्चोकको दुई स्थानीय तह मेलम्ची नगरपालिका र हेलम्बु गाउँपालिकालाई १५ लाख रुपैंया सहयोग गरेको छ । चाँगुनारायणले मेलम्चीलाई १० लाख र हेलम्बुलाई ५ लाख नगद सहयोग गरेको हो ।
गत असार १ गते मेलम्ची नदिमा आएको बाढीले मेलम्ची नगरपालिका र हेलम्बु गाउँपालिकामा ठूलो क्षति गरेको थियो । चाँगुनारायणका नगरप्रमुख सोमप्रसाद मिश्र र उपप्रमुख विणा बास्तोला शनिवार प्रभावित क्षेत्र मेलम्ची पुगेर सो सहयोग हस्तान्तरण गर्नुभएको हो । नगरसभाको बैठकमा नीति तथा कार्यक्रम पेश गर्दै दुई स्थानीय तहलाई गरेर १५ लाख रुपैयाँ सहयोगको घोषणा गरेको नगरप्रमुख मिश्रले जानकारी दिनुभयो ।
मेलम्ची नगरपालिकलाई प्रदान गरिएको १० लाख रुपैयाँको चेक उपप्रमुख भगवती नेपाल र प्रमुख प्रशासकीय अधिकृत अमृत कुमार धिताललाई हस्तान्तरण गरिएको मिश्रले बताउनुभयो । हेलम्बु पुग्न सडक सञ्जाल बिच्छेद भएका कारण जान नसकिएको र हेलम्बु गाउँपालिकालाई प्रदान गरिने ५ लाख रकम पालिकाको खातामा जम्मा गरिदिने मिश्रले बताउनुभयो ।

भक्तपुर, असार ५
मध्यपुर थिमि नगरपालिकामा शनिवार गरिएको समूदायस्तरको परीक्षणमा ३ दशमलव ६६ प्रतिशतमा कोरोना संक्रमण देखिएको छ । नगरपालिकाले समूदायमा कोरोना संक्रमणकोस्थिती पहिल्याउने उद्देश्यले १० हजार जनाको परीक्षण गर्ने लक्ष्यसहित बृहत कोरोना भाइरस एन्टिजिन परीक्षण गरेको हो ।

तर परीक्षणमा अपेक्षा अनुसार जनसहभागिता भने हुन सकेन । समूदायस्तरमा नगरका १० हजार नागरिकको परीक्षणको लक्ष्य राखेपनि अपेक्षा गरिएभन्दा निक्कै कम सहभागिता भएको पाईएको छ ।
परीक्षणमा एक हजार ३ सय जना सहभागी भएको नगरप्रमुख मदनसुन्दर श्रेष्ठले जानकारी दिनुभयो । ती मध्ये ४८ जना अर्थात ३ दशमलव ६६ प्रतिशतको नतिजा पोजिटिभ आएको नगरप्रमुख श्रेष्ठले बताउनुभयो ।

मध्यपुर थिमि नगरपालिकाले नेपाल कोरिया मैत्री नगरपालिका अस्पतालको व्यवस्थापनमा नेपाल रेडक्रस सोसाईटी, जिल्ला स्वास्थ्य कार्यालय र नेपाल स्काउट समेतको सहयोग र सहकार्यमा नगरका ९ वटा वडा र नेपाल कोरिया मैत्री नगरपालिका अस्पतालमा समेत गरी १० वटा बुथमा परीक्षणको व्यवस्था गरिएको थियो ।
नगरभित्र समूदायस्तरमा कोरोना संक्रमणको अवस्था विष्लेषण गरी संक्रमणको तथ्यगत अवस्था थाहा पाउन महत्वाकांक्षीरुपमा सो एन्टिजिन परीक्षण गरिएको थियो । परीक्षण नगरका १ देखि ९ वटै वडामा र कोरिया मैत्री अस्पतालमा एकै साथ बिहान १० बजेदेखि ५ बजेसम्म निःशुल्क गरिएको थियो ।

परीक्षणमा कोरोना संक्रमण देखिएकाहरुको कोरिया मैत्री अस्पतालमा निःशुल्क उपचार गरिने नगरप्रमुख श्रेष्ठले बताउनुभयो । साथै वडागत रुपमा वितरण गरिएका नौ थरी रङ्गका कार्ड बहाकलाई कोरिया मैत्री अस्पतालमा १० प्रतिशत छुट दिने व्यवस्था गरिएको छ । नगरप्रमुख श्रेष्ठले वडागत विवरण भोलीसम्म सार्वजनिक गरिने जानकारी दिनुभयो ।

परीक्षणको स्वास्थ्य तथा जनसंख्या मन्त्रालयका प्रवक्ता डा.कृष्णप्रसाद पौडेल, राष्ट्रिय जनस्वास्थ्य प्रयोगशालाकी निर्देशक डा. रुना झा, सिसिएमसिका प्रमुख विशेषज्ञ डा. महेन्द्र श्रेष्ठ, विश्व स्वास्थ्य संगठनका नेपाल प्रतिनिधि डा. राजेश संभाजीराव पाण्डब, सिएमडिएनका डा. दिवेश कर्माचार्यसहितको टोलीले विभिन्न केन्द्रमा गएर अनुगमन तथा निरिक्षण गरेका थिए ।

नगरपालिकाले वडा नंं. १ को निर्मल बैँक्वेट, २ को महेन्द्र निमावि जातिगाल, ३ को वडा कार्यालयको नयाँ भवन कौशल्टार चोक, ४ को जनआदर्श क्याम्पस, ५ को भुँलाखेल पुरानो वडा कार्यालय, ६ को स्वास्थ्य चौकी, ७ को नगदेश स्वास्थ्य चौकी, ८ को बोडे शहरी स्वास्थ्य केन्द्र बोडे, र ९ को बोडे स्वास्थ्य चौकी भवनमा केन्द्र तोकिएको थियो ।

भक्तपुर, असार ५
चाँगुनारायण नगरपालिका–९ ताथलीमा शुक्रवार हराएका १० वर्षे बालक शनिवार मृत फेला परेको छ । स्थानीय राजु मछेका १० वर्षिय छोरा रोजन मछे हराएको २४ घण्टापछि घर नजिकै रहेको ईंटाभट्टाको खाल्डोमा मृत फेला परेको हो ।
रोजन शुक्रवार बिहान ११ बजे हराएका थिए । खाना खाई बाहिर निस्केका उनी केही समयसम्म घर नफर्केपछि अभिभावकले खोजी गरेका थिए । रोजन जान सक्ने सम्भावित स्थानमा र उनका साथीहरु कहाँ समेत खोजी गर्दा नभेटिएपछि अभिभावकले प्रहरीलाई मौखिक जानकारी दिएका थिए ।
प्रहरीले खोजतलास गर्ने क्रममा शनिवार मध्यान्ह रोजनको घर नजिकै रहेको सेतो बि.एम ईट्टा भट्टाको कम्पाउण्डमा रहेको पानी जमेको खाल्डोमा बाँस भित्र छिराई पोखरीको पानी हल्लाउँदा रोजन मृत अवस्थामा फेला परेको महानगरिय प्रहरी परिसर भक्तपुरका सूचना अधिकारी प्रहरी नायव उपरिक्षक दिपक गिरीले जानकारी दिनुभयो ।
बाँसले खाल्डोको पानी चलाएपछि शव पानीमा तैरिएको प्रनाउ गिरीले बताउनुभयो । घटनास्थलमा महानगरीय प्रहरी वृत्त जगातीका प्रहरी निरिक्षक सुर्य बहादुर शाहीको कमाण्डको अनुसन्धान टोली खटिएको र शव पोष्टमार्तमका लागि के एम सी अस्पताल दुवकोट पठाएको प्रनाउ गिरीले बताउनुभयो । प्रहरीले घटनाको थप अनुसन्धान गरिरहेको जनाएको छ ।

लक्ष्मी गारु, भक्तपुर, असार ५
मनसुन भित्रिएसँगै परेको अविरल वर्षाले खेतका गरागरामा पानी जमेपछि भक्तपुरका किसानहरुलाई रोपाईंको चटारो परेको छ । कोरोना भाइरसको संक्रमण रोकथाम र नियन्त्रणका लागि सरकारले निषेधाज्ञा जारी गरेपनि खेती किसानी गर्ने कार्यलाई प्रशासनले सहजीकरण गर्ने निर्देशन दिएसँगै किसानहरु निर्धक्क रोपाईंमा व्यस्त भएका छन ।
जेठको अन्तिम सातादेखी वर्षा हुन थालेपछि असारको पहिलो साता नै भक्तपुरका अधिकांश स्थानमा खेतका गराहरुमा किसानहरुको मेला जस्तै लागेको छ । कोही खेत खन्ने, कोही बाउसे गर्ने, कोही बिउ काढ्ने, कोही रोपाईं गर्ने, रोपाईंको मनमोहक दृष्य देख्न पाईन्छ । रोपारहरुले असारे भाकामा लोकगित गाउनु, बाउसेहरुले हिलो छ्यापाछ्याप गर्नु, व्याडेहरुले रोपारहरुले गाएको भाका छोप्दै बिउ काढ्नु, बेठी गाउनु, लाठेहरुले गोरु जोत्नु र अन्तमा नाचगान गरेर रमाइलो गर्नु रोपाईं संस्कृति हो । तर अचेल काँठ क्षेत्रमा असारे भाका र रोपाईं संस्कृति बिस्तारै लोप हुँदैं गएको संस्कृतिकर्मीहरु बताउँछन ।

बढ्दो शहरीकरण, बेमौसमी नगदे बालीको बिस्तार र जग्गा प्लटिङ गरेर बाँझो राख्ने प्रवृत्तिले वर्षेनी धान खेती घट्दै गएपनि भक्तपुरमा रोपाईंको रौनक भने नघटेको किसानहरु बताउँछन । वर्षको एक पटक हिलो खेल्नुपर्छ भन्ने परम्परागत मान्यताले पनि युवा पिँढी हिलोसँग पौंठेजोरी खेल्नकै लागि भएपनि रोपाईंमा जुट्ने भएकाले रोपाईंको रौनक घट्न नपाएको संस्कृतिविदहरुको भनाई रहेको छ ।

काठमाण्डौं उपत्यकामा नेवार समूदायमा रोपाईंको छुट्टै पहिचान झल्कने संस्कृति रहेको छ । नेवारी लोकभाका गाउँदैं एक आपसमा हिलो छ्यापाछ्याप मात्र होईन साँधेको आलुसँगैं सगुनको रुपमा थ्ओं (जाँड) सेवन गरेर रमाइलो गर्ने र खेतका आलीमा बसेर भोज खाने प्रचलन नेवारी समूदायमा रहेको छ । यस्ता मौलिक परम्परा भने अचेल हराउँदै गएको छ । तथापी रोपाईंलाई महोत्सवको रुपमा मनाउने प्रचलन यदाकदा देख्न पाईन्छ । रोपाईंको मौलिक परम्परा हराउँदै गएपनि यसकोे रौनक भने वर्षेनी बढ्दै जान थालेको छ ।

भक्तपुरका अधिकांश स्थानमा धान खेती गरिन्छ । तर बढ्दो शहरीकरणले खेतीयोग्य जमिन घट्दै गएपनि सुडाल, ताथली, चित्तपोल, सिपाडोल, गुण्डु, सिरुटार, दधिकोट, दुवाकोट, चाँगुनारायण, बागेश्वरी, छालिङलगायतका ग्रामिण भेगमा भने अझै प्रशस्त धानखेती गरिन्छ ।
भक्तपुरका अधिकांश स्थानमा आकाशे पानीको भरमा रोपाईं गर्नुपर्ने अवस्था छ । परम्परागत राजकूलोहरु मासिँदैं गएकोले पनि धानखेतीका लागि आकासे पानीको भर पर्नुपर्ने अवस्था छ । जिल्लाको दुई मुख्य नदी हनुमन्ते र मनोहराका साथै यसका सहायक खोलानाला नजिकका फाँटहरुमा भने वाटर पम्पसेटको सहायताले सिचाई गरेर किसानहरुले रोपाईं गर्ने गरेका छन ।
धानबाली नेपालको मुख्य अन्नबाली हो। भक्तपुरमा प्रतिहेक्टर ६ टन धान उत्पादन हुने तत्कालिन कृषि कार्यालयको तथ्यांक रहेको छ ।

भक्तपुर, असार ४
मध्यपुर थिमि नगरपालिकाले सिन्धुपाल्चोकको दुई स्थानीय तहलाई आर्थिक सहयोग गर्नेभएको छ । नगरपलिकाको शुक्रवार बसेको नगर कार्यपालिका बैठकले सिन्धुपाल्चोकको मेलम्ची नगरपालिका र हेलम्बू गाउँपालिकालाई जनही ११ लाख ११ हजार १११ रुपैंया सहयोग गर्ने निर्णय गरेको हो ।
हालै मेलम्ची नदिमा आएको भिषण बाढीले ती दुई स्थानीय तहमा ठूलो क्षति गरेकोमा कार्यपालिका बैठकले दुःख व्यक्त गर्दै आर्थिक सहयोग गर्ने निर्णय गरेको नगरप्रमुख मदनसुन्दर श्रेष्ठले बताउनुभयो ।

भक्तपुर, असार ४
मध्यपुर थिमि नगरपालिकामा विकास निर्माणका गतिविधि तिब्ररुपमा अघि बढीरहेको छ । जनप्रतिनिधिले नगरपालिका सम्हाले यताको चार वर्षमा मध्यपुर थिमिमा दर्जनौ पाटीपौवा र मठमन्दिरको पुनःनिर्माण भएका छन र त्यति नै संख्यामा नगरका ऐतिहासिक पोखरीहरुले नयाँ जीवन पाएका छन । नगरका प्रत्येक वडामा सुन्दर पार्क बनेका छन र बन्ने क्रममा छन । सांस्कृतिक सम्पदा संरक्षणमा पनि त्यति नै उत्कृष्ट काम भएका छन ।
अझ कोभिडको महामारीमा नगरपालिकाले नेपाल कोरिया मैत्री नगरपालिका अस्पताल र बोडेस्थित कृषि विकास बैंकको तालिम केन्द्रमा सञ्चालन गरेको आइसोलेसन केन्द्रमार्फत नमूना योग्य कार्य गरेको छ । खानेपानीको क्षेत्रमा पनि उत्कृष्ट काम भएको छ । सडक कालोपत्रे मात्र होइन नगरका गल्ली गल्लीका बाटो समेत ढुंगा छापेर चिटिक्क बनेका छन । तर तमाम उपलब्धीलाई नगरपालिका कार्यालयको आँगनैको बाटोको दुरावस्थाले भने गिज्याई रहेको जस्तो देखिएको छ ।

नगरपालिका कार्यालय जाने मुख्य र एक मात्र यो सडक विगत केही वर्षदेखी हिउँदमा धुलाम्य र वर्षातमा हिलाम्य हुने गरेको छ । यो सडकको अवस्था हेर्न लायकको छ । सडकमा ठूला ठूला खाडल बनेका छन, जहाँ पानी जमेर स–सानो पोखरी नै जस्तो भएको छ । हिलो जमेर थिलथिलो बनेको छ । सर्वसाधरण आवतजावत गर्न मात्र होइन दुई पाङ्ग्रे सवारीसाधन चलाउन समेत जोखिमपूर्ण रहेको छ । यो सडक कालोपत्रे गर्न स्थानीयले दजर्नौ पटक नगरपालिका पुगेर अनुनय विनय गरेपनि विविध कारण देखाउँदैं ढिलासुस्ती गर्दा स्थानीयले दैनिक सास्ती भोग्नु परेको स्थानीय लक्ष्मीशोभा प्रजापतिले बताउनुभयो ।

यो सडकलाई चौडा पारी कालोपत्रे गर्न दुई वर्ष अघि नै योजना परेको थियो । तर कहिले सिमांकनको विवाद त कहिले विभिन्न बहानाले यो सडक निर्माणले पुर्णता पाउन सकेको छैन, जसले गर्दा नगरप्रमुख, उपप्रमुख, प्रमुख प्रशासकिय अधिकृतदेखी लिएर नगरपालिकाका सबै विभागिय प्रमुखहरु दैनिक ओहोरोदोहोर गर्ने यो सडकको अवस्था दयनीय बनेको छ ।
सो सडक यथाशिघ्र छिटो निर्माण सम्पन्न गरी कालोपत्रे गर्न माग गर्दै शुक्रवार स्थानीयले निषेधाज्ञाकाबीच नगरपालिका मुलढोका अघि नारा जुलुशसहित धर्ना दिए । नगरपालिकाको नगरकार्यपालिका बैठक चलिरहँदा बाहिर जनताले नारा जुलुस गरेका हुन ।
नगरपालिकाको आसन्न नगरसभाको विषय, आगामी आर्थिक वर्षको नीति तथा कार्यक्रम र बजेटबारे नगरपालिकाभित्र नगरप्रमुख, उपप्रमुखसहित नगरकार्यपालिकाको बैठक बसिरहँदा बाहिर स्थानीयले धर्ना दिएर नारा जुलुस गरेका हुन ।
सडकमा उत्रिएका स्थानीयले तत्काल सडक कालोपत्रे गर्न माग गर्दै नारा लगाएका थिए । ‘दुई वर्षभन्दा धेरै भइसकेको छ, यो बाटो वर्षामा हिलाम्य र हिउँदमा धूलाम्य भएको, पटकपटक कालोपत्र गर्न माग गर्दा पनि नगरेपछि हामी आन्दोलनमा उत्रिएका हौं’ प्रजापतिले भन्नुभयो । उहाँले कहिले के कहिले के भनी नगरपालिकाले आलटाल गर्दै पन्छिने गरेको आरोप लगाउनुभयो ।

नगरपालिका कार्यालय जाने मुख्य सडक भएर पनि नगरपालिकाले प्राथमिकतामा नराखेको र सडक चौडा पारी स्तरोन्नती गर्ने नाममा साविकको कालोपत्रे समेत उप्काउँदा अहिले आवतजावत गर्न समेत समस्या भएको स्थानीयको भनाई छ ।
‘अहिले पनि बाटो खनेर खलपत्र छोडिएको छ, हामीले खानेपानीको होला भन्ने सोचेका थियौं, त्यहाँ त बिजुलीका तारहरु अण्डरग्राउण्ड गर्न लागिएको रहेछ, त्यसले अझ बाटो पीच नहुने भयो, हामीले कहिलेसम्म सास्ती खेप्नुपर्ने हो ?, स्थानीय शाभाले प्रश्न गर्नुभयो ।
शुरुमा सडक सिमांकन सम्बन्धी विवादले रोकिएको यो सडकको निर्माण अहिले विद्युतको तार भूमिगत गर्ने विषयमा विवाद भएकाले रोकिएको नगरप्रमुख मदनसुन्दर श्रेष्ठले जानकारी दिनुभयो । उहाँले यो सडक कालोपत्रे गर्न ६० लाखको टेण्डर भइसकेको जानकारी दिँदैं सडक सम्बन्धी विवाद समाधान गरी निर्माण सम्पन्न गर्न उपप्रमुखलाई जिम्मा दिएको बताउनुभयो । ‘विद्युतको तार भूमिगत गर्ने विषयमा सहमति हुने बित्तिकै सडक निर्माणको काम अघि बढ्छ,’ उहाँले भन्नुभयो ।
उपप्रमुख अञ्जनादेवी मधिकर्मीले स्थानीय धर्ना दिएपनि कार्यपालिका बैठकमा सो सडकको विषयमा केही निर्णय नभएको जानकारी दिनुभयो । बैठकमा पुर्वनिर्धारित विषयमा छलफल भएको उहाँले बताउनुभयो ।

भक्तपुर, असार ३
नेपाली कांग्रेस चाँगुनारायण नगरसमितिले कोभिडका कारण ज्यान गुमाउने नगरवासीका परिवारको भरणपोषणका लागि प्रति मृतक एक लाख रुपैंया राहत प्रदान गर्न माग गरेको छ । कांग्रेसले बिहिवार नगरप्रमुख सोमप्रसाद मिश्रलाई ज्ञापनपत्र बुझाउँदैं सो माग गरेको हो ।
कांग्रेसले सबै नगरवासीको स्वास्थ्य विमाको अभियान चलाउन समेत माग गरेको छ । कांग्रेसले नगरपालिकाको आगामी नगरसभाको पहिलो लक्ष्य कोभिड नियन्त्रण, स्वास्थ सामग्रीको ब्यवस्थापन, स्थायी र भरपर्दो स्वास्थ सेवाको तथा रोग नियन्त्रणको लागि बजेट ब्यवस्थापनका लागि पर्याप्त ध्यान दिन आग्रह गरेको छ । सवै वडाहरुमा रहेको स्थास्थ्य केन्द्रको स्तरबृद्धि गरी अन्तर्राष्ट्रिय स्वास्थ्य मापदण्ड बमोजिमको परिक्षण सामाग्रीहरु, खोप लगायतको उपकरण भण्डारणको ब्यवस्थापन, उच्चस्तरीय ल्यावको ब्यबस्था गर्न माग समेत कांग्रेसले माग गरेको छ ।
नगरपालिकाको उत्तरपुर्वी भाग विकासका दृष्टिले पछि परेको उल्लेख गर्दै कांग्रेसले सो क्षेत्रमा महिला तथा बालबालिका केन्द्रीत अस्पताल खोल्न माग गरेको छ । महिलाहरुमा बढी देखिने पाठेघरको क्यान्सर र प्रसुती सम्बन्धी रोगको उपचारको लागि विशेष व्यवस्था गर्न पनि कांग्रेसले माग गरेको छ ।
चाँगुनारायण ईञ्जिनियरिङ कलेज (नेक) सञ्चालन सम्बन्धमा कलेजको आयव्यय विवरण, वासलात सार्वजनिक गरी सर्वपक्षीय छलफल र कलेजबारे स्वेतपत्र जारी गर्न कांग्रेसले ज्ञापनपत्रमा माग गरेको छ । नगरभित्रको शैक्षिक संस्थाहरुको प्रभावकारीता लागि श्री कृष्ण मा.बि., चाँगुनारायण मा.बि., गणेश मा.बि. ताथली, सरस्वती मा.बि., बाल्मिकेश्वर मा.बि., चुनादेबी मा.बि., आजाद मा.बि., देबी मा.बि., गणेश मा.बि. छालिङ, डोलागिरी मा.बि., महेन्द्रग्राम मा.बि., कालिका मा.बि. लगायतका सम्पुर्ण माविहरुमा स्तरोन्नतीका लागि आवश्यक बजेट व्यवस्था गर्न पनि कांग्रेसले माग गरेको छ ।
कांग्रेसले ज्ञापनपत्रमा सवै बिद्यालयमा पर्याप्त शैक्षिक सामग्रीको ब्यवस्थापन, बालबालिकाहरुको शैक्षिक गुणस्तरीयता, पर्याप्त खेलकुद, मनोरञ्जनका साधनहरुको ब्यबस्थापन गर्न भनिएको छ ।
नगरपालिका भित्र सञ्चालनमा रहेका विभिन्न खानेपानी उपभोक्ता समितिहरुलाई एकत्रित गरि सवै नागरिकहरुलाई स्वच्छ पिउन योग्य पानी उपलब्ध गराउन ठोस कार्ययोजना बनाउन आवस्यक रहेको भन्दै कांग्रेसले मेलम्चीको खानेपानीको सञ्जालमा नगरपालिकाको सहभागिता र परम्परागत पानीका मुहानको संरक्षण, ब्यवस्थापनमा ठोस पहल कदमी चाल्न माग गरेको छ । नगरपालिकाको उत्तर पूर्वी क्षेत्रमा रहेको पानीको मुल जलाधार (मुहान पोखरी, तेलकोट) ड्यामको लागि बिशेष कार्यक्रम ल्याउन जोडदार माग गरेको छ । कांग्रेसले पानीका प्राकृतिक श्रोतहरु रहेको वोजिनी, कलमसी क्षेत्रको तत्काल संरक्षण गर्न आवस्यक रहेकोले कार्ययोजना बनाउन आग्रह गरेको छ ।
ज्ञापनपत्रमा नगरपालिकाले सडक मापदण्ड निर्माण गर्दा सर्वपक्षीय छलफल गर्न आवस्यक नठान्ने र कोही कसैको लहड र स्वार्थमा मापदण्डहरुको हेरफेर भईरहेको आरोप लगाउँदैं सडक मापदण्डका बिषयमा गम्भीर हुन आग्रह गरिएको छ । कांग्रेसले सवै वडाहरुमा भक्तपुर चक्रपथको बाँकी कार्यका लागि पहल गर्न र सवै वडा छुने गरी नगरभित्र सार्वजनिक यातायात सञ्चालनको लागि पहल कदमी चाल्न तथा नगरपालिकाभित्रका गोरेटो र कच्चीबाटोको स्तरोन्नती गरी उपभोग योग्य बनाउन माग गरेको छ ।
त्यस्तै पयर्टनतर्फ ऐतिहासिक विश्व सम्पदा सूचीमा सूचिकृत चागँुनारायण मन्दिरको आवश्यक पुननिर्माण तथा संरक्षण, पर्यटकीय क्षेत्र नगरकोटको विकासका लागि छिमेकी स्थानीय तहहरुसँग सहकार्य समन्वय गरी एकिकृत योजना बनाउन, नगरपालिका भित्रका सार्वजनिक पर्ति जग्गाको अतिक्रमण बढ्दै गएकोले तत्काल पर्ति जग्गाहरुको संरक्षणका लागि ठोस कदम चाल्न, दुवाकोट सरस्वती खेल हुदै चाँगुनारायण मन्दिर, तेलकोट, त्रिशुल डाँडा, कालिकादेवी मन्दिर, नगरकोट, भट्टेडाँडा, नगरकोट भंगेरी दरवार, महादेव पोखरी, कलममसी हुदै ताथली गढीसम्म पर्यटकीय पदमार्गको निर्माण, विकास र संरक्षणको लागि कार्य गर्न आग्रह गरिएको छ ।
त्यसैगरी किसानहरुलाई समयमै मल तथा बिउविजन सहज रुपमा पाउन सकिने व्यवस्था, कृषिमा आधुनिकीकरण गर्दै उन्नत खालका बिउबिजन, कृषिऔजारको ब्यवस्था गर्न माग गर्दै कांग्रेसले कृषि योग्य जमिनमा भइरहेको बस्ती विकासलाई ध्यान राख्दै सर्वपक्षीय सहमतिमा केही क्षेत्रलाई कृषि क्षेत्रको रुपमा विकास गर्न ध्यान दिनुपर्ने उल्लेख गरेको छ ।
त्यस्तै २०७२ सालको भूकम्पबाट पिडित नगरबासीहरुले अझै पनि राहतका लागि समस्या भोग्नु परेको अवस्था भएकोले सो तर्फ बिषेश ध्यान दिन कांग्रेसले अनुरोध गरेको छ ।
नगरसभाबाट विनियोजित विकास बजेटहरु खर्च नहुने, पछि आफूखुसी तोकआदेशमा रकमान्तर गर्ने, वडासमितिहरुबाट आफूखुसी बिना सार्वजनिक सूचना उपभोक्ता समितिहरु बनाउने, खर्च गर्ने कार्य भै रहेकोले तत्काल यस्ता कार्य रोक्न कांग्रेसले आग्रह गरेको छ । नगरपालिकाले आफुखुसी करका दायरा बढाएकाले नगरवासी समस्यामा परेको भन्दै कांग्रेसले अध्ययन, रोजगारीका लागि विदेश जाने नागरिकहरुलाई लाग्ने सिफारिस दस्तुर छुट दिन माग गरेको छ ।
नगरपालिकाका सवै वडाहरुमा बालबालिकाहरुको लागि मनोरञ्जनात्मक बाल उद्यान, ब्यायामशाला, खेल मैदानहरुका लागि आवश्यक प्रवन्ध मिलाउन, नगरपालिका क्षेत्रभित्र रहेका मठ मन्दिर, धारा, पाटी, पौवा धार्र्मिक तथा पर्यटकीय क्षेत्रको बिकास लागि कार्यक्रम सञ्चालन गर्न पनि कांग्रेसले माग गरेको छ ।
कांग्रेसले विकास निर्माण, जनताको जिउधनको रक्षा, कोभिड महामारी विरुद्धको सबै अभियानमा राजनैतिक, सामाजिक, आर्थिक तथा अन्य बिषयमा रहेका असहमतीलाई थाँती राखी हरतरहले सहयोग गर्न तयार रहेको प्रतिवद्धता पनि जनाएको छ ।
कांग्रेस चाँगुनारायण नगरसभापति शिवहरी केसी र नगरप्रमुखमा कांग्रेसका प्रत्याशी उम्मेदवार राजाराम खड्काको नेतृत्वमा ज्ञापनपत्र बुझाउन बागमति प्रदेशसभाका सांसद एवम् नेपाली कांग्रेस बागमति प्रदेश संसदिय दलका उपनेता कृष्णलाल भँडेल, नेपाली कांग्रेस भक्तपुर क्षेत्र नं. १का सभापति जीवन खत्री, जिल्ला उपसभापति हरिप्रसाद नेपाल, सहसचिव किरण न्यौपाने, उपप्रमुखका प्रत्याशी एवम् नेपाल महिला संघ भक्तपुरका सभापति सरु बानियालगायतका नेता कार्यकर्ताहरुको सहभागिता रहेको थियो ।

भक्तपुर, असार ३
मध्यपुर थिमि नगरपालिकाका ९ वटै वडामा शनिवार बृहतरुपमा कोभिडको एन्टीजिन परीक्षण गर्न लागिएको छ । नगरपालिकामा कोभिड संक्रमणको अवस्था विष्लेषण गर्न नगरपालिकाले ९ वटै वडामा करिव १० हजार जनाको एन्टीजिन परीक्षण गर्न लागेको हो ।
नगरपालिकाले नेपाल कोरिया मैत्री नगरपालिका अस्पतालको व्यवस्थापन, जिल्ला स्वास्थ्य कार्यालय, नेपाल रेडक्रस सोसाईटी भक्तपुर र नेपाल स्काउटको समन्वयमा सो परीक्षण गर्न लागेको हो । परीक्षणको रिपोर्ट तत्काल सार्वजनिक गरिने छ । त्यसका लागि ११ हजार किट नगरपालिकाले व्यवस्था गरिसकेको नगरप्रमुख मदनसुन्दर श्रेष्ठले जानकारी दिनुभयो ।
समूदायस्तरमा कोरोना संक्रमणको अवस्था विष्लेषण गरी संक्रमणको तथ्यगत अवस्था थाहा पाउन महत्वाकांक्षीरुपमा एन्टीजिन परीक्षण गर्न लागिएको नगरप्रमुख श्रेष्ठले बताउनुभयो । ‘समूदायस्तरमा कोरोनाको संक्रमण कस्तो छ ? सुशुप्तरुपमा कोरोना फैलिरहेको छ की छैन ? संक्रमितहरु टोलटोलमा हिँडडुल गरिरहेको छ की छैन ? भन्ने जानकारी र यसको निराकरणका लागि महत्वाकांक्षीरुपमा एकै पटक १० हजार जनाको परीक्षण गर्न लागिएको हो,’ नगरप्रमुख श्रेष्ठले भन्नुभयो ।
एन्टीजिन परीक्षणमा कोभिड संक्रमण देखिएकाहरुको तत्काल नेपाल कोरिया मैत्री नगरपालिका अस्पतालमा पिसिआर परीक्षणको पनि व्यवस्था गरिएको उहाँले जानकारी दिनुभयो । उहाँले भन्नुभयो, ‘एन्टीजिन परीक्षणमा कोभिड संक्रमण देखिएकाहरुको तत्काल पिसिआर परीक्षण गर्ने व्यवस्था गरेका छौं । दुई वटै परीक्षण निःशुल्क गरिनेछ ।’
यसले उपत्यकामा कोभिड संक्रमण घटेको भन्ने जुन तथ्यांक छ त्यो सँग वास्तविक वस्तुस्थित मेल खान्छकी खाँदैन भन्ने तथ्यांक र अन्वेषनात्मक रुपमो पुष्टि हुन जाने नगरप्रमुख श्रेष्ठले बताउनुभयो । परीक्षणको अनुसन्धानकर्ता वैज्ञानिकहरुले पनि अध्ययन गरिने नगरप्रमुख श्रेष्ठले जानकारी दिनुभयो ।
हाल उपत्यकामा कोरोना संक्रमण घटेको भनेर लकडाउन हटाउने तयारी भइरहेको अवस्थामा मिल्ने नमिल्ने वा कुन तहसम्म जान सकिन्छ भन्नेमा पनि नीतिगत तहमै निर्णय गर्न परीक्षणले सहज हुने श्रेष्ठले विश्वास व्यक्त गर्नुभयो ।
मध्यपुर थिमि नगरपालिकामा मात्र कोरोनाको पहिलो र दोस्रो लहरमा ६ हजार भन्दा बढी संक्रमित भएको छ । दोस्रोमा १ हजार ७ सय जनासम्म संक्रिय संक्रमित रहेको अवस्था थियो । अहिले मध्यपुर थिमिमा सक्रिय संक्रमितको संख्या ३ सय भन्दा तल रहेको छ । संक्रमण दर ५० प्रतिशतसम्म पुगेको मध्यपुर थिमिमा अहिले घटेर ७ देखी १० प्रतिशतमा झरेको नगरप्रमुख श्रेष्ठले बताउनुभयो ।

भक्तपुर, असार ३
भक्तपुरको मध्यपुर थिमि नगरपालिका ४ चारदोबाटोस्थित ट्राफिक आइल्याण्डमा बुधवार राती मोटरसाइकल ठोक्किँदा एक जनाको मृत्यु भएको छ भने दुई जना घाईते भएका छन । घाईतेको त्रि.बि. शिक्षण अस्पताल महाराजगंज काठमाण्डौमा उपचार भइरहेको छ ।
मृत्यु हुनेमा मोटरसाइकल चालक सोलुखुम्बु चौलाखर्क–३ घर भई हाल काठमाण्डौ काँडाघारी बस्ने २७ वर्षिय रमेश कुमार बस्नेत हुन । त्यस्तै घाईते हुनेहरुमा मोटरसाईकलमा सवार हाल काँडाघारी बस्ने उदयपुर ताप्ले गाउँपालिका–५ का २२ वर्षिय लोकेन्द्र मगराती र सिन्धुली तिनपाटन गाउँपालिका–५ का २५ वर्षिय अमित जैरु छन ।
तिब्र गतिमा काठमाण्डौंबाट भक्तपुरतर्फ आइरहेको बा ७७ प ५६०५ नं. को मोटरसाइकल आफैं अनियन्त्रित भई बुधवार राती करिव ११ बजे सडक बिचमा रहेको ट्राफिक आइल्याण्डमा ठोक्किएर दुर्घटना भएको महानगरिय प्रहरी परिसर भक्तपुरले जानकारी दिए ।
घटना लगत्तै दुर्घटनामा घाईते तीनै जनालाई नागरिक सामूदायिक अस्पताल गट्ठाघरमा उपचारका लागि लगिएको परिसरका सूचना अधिकारी प्रहरी नायव उपरिक्षक दिपक गिरीले जानकारी दिनुभयो । नागरिकमा प्रारम्भिक उपचार पछि तीनै जनालाई थप उपचारका लागि त्रि वि शिक्षण अस्पताल पठाएकोमा त्यही उपचारका क्रममा मोटरसाइकल चालक बस्नेतको मृत्यु भएको प्रनाउ गिरीले बताउनुभयो । प्रहरीले घटनाको थप अनुसन्धान कार्य भइरहेको जनाएको छ ।