भक्तपुर, माघ १३
काठमाण्डौंको त्रिपुरेश्वरस्थित राष्ट्रिय खेलकुद परिषद् (राखेप) कभर्डहलमा जारी कबड्डीको फ्रेन्चाइज प्रतियोगिता नेपाल कबड्डी लिग (एनकेएल) को प्ले–अफ समिकरण पूरा भएको छ । लिगमा शनिवार सम्पन्न खेलमा विराटनगर ब्यान्डिट्सले पोखरा लेकर्समाथि एकपक्षीय जित हात पारेसँगै एनकेएलको प्ले–अफ समिकरण पूरा भएको हो । खेलमा विराटनगर ५०–२५ ले विजयी भएको हो ।
योसँगै पहिलो क्वालिफायरमा अपराजित जनकपुर नाइट्स र विराटनगर भिड्ने भएका छन् । अपराजित रहँदै २३ अंक जोडेको जनकपुरले शीर्ष स्थानमा रहँदै पहिलो क्वालिफायरमा स्थान बनाएको हो ।
विराटनगरले भने अंक तालिका काठमान्डु माभरिक्सलाई दुई अंकले पछि पार्दै जनकपुरसँगको भेट पक्का ग¥यो । यो खेलमा जित हात पार्ने टोली फाइनलमा प्रवेश गर्ने छ भने पराजित हुनेले अर्को मौका पाउने छन् ।
विराटनगरले २१ र काठमान्डुले १९ अंक जोडे । काठमान्डुलाई भने इलिमिनेटरमा धनगढी वाइल्डक्याट्सले चुनौती पेस गर्नेछ । शनिबार नै भएको खेलमा हिमालयन रेइडर्सलाई ४१–३८ अंकले पराजित गर्दै धनगढीले इलिमिनेटरमा स्थान बनाएको हो ।
पाँच खेलबाट ११ अंक जोड्दै धनगढी चौथो स्थानमा रह्यो । समान खेलबाट सात अंक जोडेको हिमालयन र जितविहीन पोखरा प्रतियोगिताबाट बाहिरिएका छन् । पोखराले चार अंकसहित पहिलो संस्करण सक्काएको हो ।
