Category: खेलकुद

भक्तपुर, जेठ २०
कतार विश्वकप फुटबल २०२२ तथा एसिया कप २०२३ छनोट अन्तर्गत समूह चरणको चाईनिज ताईपेईविरुद्ध अहिले पौने १० बजे हुने खेलका लागि नेपालको शुरुवाती ११ सार्वजनिक भएको छ । प्रशिक्षक अव्दुल्लाह अलमुताइरीले इराकविरुद्ध मैदानमा उतारेको टोलीमा दुई परिवर्तन गरी ताईपेईविरुद्धको टोली घोषणा गरेको छ ।
अलमुताईरीले नवयुग श्रेष्ठ र मनिष डाँगीको स्थानमा सुनिल बल र आशिष लामालाई टोलीमा समावेश गरेका छन । नेपाली शुरुवाती ११ मा गोलकिपर किरण चेम्जोङ, सेन्टर डिफेन्समा रोहित चन्द र अनन्त तामाङकै जोडीले निरन्तरता पाएको छ । लेफ्ट ब्याकमा सुमन अर्याल तथा राइट ब्याकमा गौतम श्रेष्ठले दीनेश राजवंशीभन्दा अघि रहेर शुरुवात गर्नेछन । मिडफिल्डमा पुजन उपरकोटीसँग सन्तोष तामाङ र सुमन लामाले खेल्नेछन् । आक्रमणमा अन्जन विष्टलाई आशिष र सुनिल बलले साथ दिनेछन् ।
ईराकविरुद्ध डेब्यु गर्दै गोल गरेका मनिष चोटका कारण दोस्रो हापमा मैदान प्रवेश गरेका थिएन । उनको स्थानमा सुनिलले अवसर पाएका थिए । अलमुताईरीले त्यसैलाई निरन्तरता दिनएका छन भने नवयुगको स्थानमा आशिषले शुरुवात गर्दैछन् ।

भक्तपुर, जेठ १८
फिफा विश्वकप २०२२ तथा एसिया कप २०२३ का छनोट चरणका बाँकी खेलका लागि कुवेत पुगेको नेपाली राष्ट्रिय फुटबल टोलीले प्रशिक्षण शुरु गरेको छ । शनिबार इराकसँग मैत्रीपूर्ण खेल खेलेको नेपाली टोली त्यहाँबाट स्थलमार्ग हुँदै आइतबार राती स्थानिय समय अनुसार करिब १० बजे कुवेत पुगेको थियो ।
नेपाली टोलीले जेठ २० गते चाइनिज ताइपेइ, जेठ २५ गते गते जोर्डन र जेठ २८ गते अष्ट्रेलियासँग प्रतिस्पर्धा गर्नेछ । कोरोना महामारीका कारण नेपालले दशरथ रंगशालामा खेल्नु पर्ने खेल तथस्त मैदानको रुपमा कुवेत सारिएको हो ।
नेपाल अहिले अंक तालिकामा ३ अंकका साथ चौथो स्थानमा छ । नेपालको ५ खेलमा १ जित र ४ खेलमा हार बेहोरेको थियो । अंक तालिको पुछारमा रहेको ताइपेइले अंक जोड्न सकेको छैन । अष्ट्रेलिया १२ अंकका साथ शीर्षस्थानमा छ भने कुवेत र जोर्डनको समान १० अंक छ । अंक तालिकाको चौथो स्थानमा रहँदै छनोट चरण सकेको खण्डमा नेपालले एसियन कप छनोटको तेस्रो राउन्डमा सोझै स्थान बनाउने अवसर रहनेछ ।

हेरौं नेपाली टोलीको प्रशिक्षणका केही झलकहरु :
तस्विर : एन्फा

भक्तपुर, जेठ १८
कोपा अमेरिका कप फुटबल प्रतियोगिता ब्राजिलमा हुने भएको छ । बढ्दो राजनीतिक अस्थिरताका कारण कोलम्बिया र कोरोना संक्रमणका कारण अर्जेन्टिनालाई आयोजकबाट हटाएर दक्षिण अमेरिकी फुटबलको सर्वोच्च निकाय कन्मेबलले प्रतियोगिता ब्राजिलमा गर्ने निर्णय गरेको हो ।
कन्मेबलको विज्ञप्ति जारी गर्दै कोपा अमेरिका २०२१ ब्राजिलमा हुने जनाएको हो । कन्मेबलले प्रतियोगिता यसअघि निर्धारित मितिमा नै हुने जनाएको छ तर खेलस्थलका बारेमा भने उल्लेख गरेको छैन । विज्ञप्तिमा प्रतियोगिताको खेल तालिका र मैदान केही समयमा नै पक्का गर्ने बताएको छ । कोपा अमेरिका दक्षिण अमेरिकी राष्ट्रहरुबीचको सबैभन्दा ठूलो फुटबल प्रतियोगिता हो ।
गतवर्ष नै हुनुपर्ने कोपा अमेरिका कोरोना महामारीका कारण एक वर्ष पछि सारिएको थियो । अर्जेन्टिना र कोलम्वियाले कोपा अमेरिका आयोजना गर्ने तयारी गरिरहेको थियो । ब्राजिलले ४७औं पटक कोपा अमेरिका आयोजना गर्दैछ ।
ब्राजिल दुई वर्ष अघिको च्याम्पियन टोली हो । ब्राजिलले पेरुलाई ३–१ ले हराँउदै दुई वर्षअघि घरमै भएको प्रतियोगिताको उपाधि जितेको थियो । प्रतियोगितामा सहभागी १० टोलीलाई २ समूहमा विभाजन गरिएको थियो । समूह ‘ए’ मा अर्जेन्टिना, बोलिभिया,उरुग्वे, चिली र पाराग्वे थिए । समूह बी’ मा कोलोम्बिया, ब्राजिल, भेनेजुएला, इक्वेडर र पेरु रहेका छन् ।

भक्तपुर – नेपालले खेल्ने फिफा विश्वकप छनोटको तीन खेलको खेल तालिका र समय सार्वजनिक भएको छ । कुवेतमा हुने छनोट खेलमा नेपालले चाइनिज ताइपेइसँग जुन ३ तारिख अर्थात् बिहीबार, जोर्डनसँग जुन ७ अर्थात् सोमबार र अष्ट्रेलियासँग जुन ११ तारिख अर्थात् शुक्रबार खेल्ने छ । तीन वटै खेल नेपाली समय अनुसार राती ९ः४५ हुने अखिल नेपाल फुटबल संघ (एन्फा)ले जनाएको छ ।

छनोट खेल खेल्न नेपाली टोली कुवेत पुगी सकेको छ । जेठ १५ गते ईराकसँग मैत्रीपूर्ण खेल खेल्न गएको नेपाली टोली उतैबाट कुवेत पुगेको हो । करिव २० वर्ष पछि ईराकसँग मैत्रीपूर्ण खेल खेलेको नेपाल ६–२ गोल अन्तरले पराजित भएको थियो ।

विश्वकप छनोटको दोस्रो चरणमा प्रवेश गणितिय रुपमा मात्र सम्भावना बाँकी रहेको नेपालका लागि कुवेत यात्रा एसियन कप छनोटको लागि महत्वपूर्ण मानिएको छ । विश्वकप छनोटसँगै यसको नतिजा एसियन कप छनोटका लागि पनि लागु हुने भएकाले नेपालको आँखा विश्वकप भन्दा पनि एसियन कप छनोटमा रहेको छ ।
नेपाल समूहका चौंथो स्थानमा रहेको छ । नेपाल समूहको उत्कृष्ट चारको रुपमा एसियन कपको तेस्रो चरणमा सिधै प्रवेश गर्ने दाउमा रहेको छ ।

इंग्लिस क्लब चेल्सीले प्रिमियर लिग च्याम्पियन म्यानचेस्टर सिटीलाई पराजित गर्दै युरोपेली च्याम्पियन्स लिगको उपाधि जितेको छ । पोर्चुगलको पोर्टोस्थित स्टाडियो डो ड्रागाओ स्टेडियममा शनिवार राती भएको खेलमा चेल्सीले सिटीलाई १–० ले पराजित गरी उपाधि जितेको हो ।
चेल्सीले च्याम्पियन्स लिगको उपाधि जितेको यो दोस्रो अवसर हो । यसअघि उसले सन् २०१२ मा उपाधि जितेको हो । चेल्सीलाई उपाधि जिताउन पहिलो हापमा जर्मन मिडफिल्डर काइ हाभर्ट्जले गरेको गोल काफी रह्यो । सिटीले अपेक्षित प्रदर्शन गर्न नसक्दा पहिलो पटक फाइनलमा पुगेर पनि च्याम्पियनसिपको उपाधि जित्नबाट वञ्चित हुनुप¥यो ।
चेल्सीका लागि पहिलो हाफको अन्त्यतिर हाभर्ट्जले गोल गरे । मेसन माउन्टले आफ्नै हाफबाट दिएको उत्कृष्ट थ्रु पासलाई हाभर्ट्जले सिटीका गोलरक्षक एडरसन मोराएसलाई छलाउँदै गोल गरेका थिए । अन्ततः खेलमा अन्य कुनै गोल हुन नसक्दा चेल्सीलाई दोस्रो पटक उपाधि जिताउन उक्त गोल निर्णायक बन्यो ।
चेल्सीले दोस्रो हाफको ७३ औं मिनेटमा खेल बराबरीमा ल्याउने सुवर्ण अवसर खेल फालेका थिए । क्रिस्टियन पुलिसिचको प्रहार गोलरक्षक बिट भएपनि बलले पोस्टको दिशा लिन सकेन । दोस्रो हाफमा मिडफिल्डर केभिन डे ब्रुयन चोट लागेपछि मैदान छाड्न बाध्य भए । डिफेन्डर एन्टोनियो रुडीगरसँग जुध्न पुग्दा उनको अनुहारमा चोट लागेको थियो । त्यसपछि सिटीले लगातार खेलाडी परिवर्तन गर्दै खेलमा फर्कने प्रयास गरेपनि सफल हुन सकेन ।
सिटीबाट अन्तिम खेल खेलिरहेका अर्जेन्टिनी स्टार सर्जियो अगुएरो वैकल्पिक खेलाडीको रुपमा मैदान प्रवेश गरेपनि उनले पनि टोलीलाई उद्धार गर्न सकेन । उनले सिटीको यात्रा हारका टुंग्याए ।
चेल्सीका मुख्य प्रशिक्षक थोमस टुचेलले क्लब आएकै सिजन चेल्सीलाई च्याम्पियन्स लिगको उपाधि दिलाउन सफल भएका छन् । जर्मन प्रशिक्षक टुचेलको यो पहिलो च्याम्पियन्स लिग उपाधि समेत हो । तर, टुचेल दुई फरक क्लबबाट लगातार दुई सिजन च्याम्पियन्स लिगको फाइनल पुग्ने पहिलो प्रशिक्षक हुन् । गत सिजन जर्मन प्रशिक्षक टुचेलले फ्रेन्च क्लब पीएसजीलाई च्याम्पियन्स लिगको फाइनलमा पु¥राएका थिए । तर, गत सिजन पीएसजी फाइनलमा बायर्न म्युनिखसँग पराजित भएको थियो ।

भक्तपुर – घरेलु टोली इराकविरुद्ध शनिवार राती सम्पन्न अन्तर्राष्ट्रिय मैत्रीपूर्ण खेलमा नेपाल ६–२ गोल अन्तरले पराजित भएको छ । इराकको बसरास्थित अल्फायहा अन्तराष्ट्रिय मैदानमा नेपालले एक समय २–१ ले अग्रता बनाएपनि लय गुमाउँदा अन्त्यमा खेलको नतिजा इराकलाई सुम्पिन पुगेको हो ।
इराकको जितमा अयमन हुसेन गबधनले दुई, कप्तान अला अब्दुल जहर खासिन, मोहमद अब्दुल्जारा ओबेद, मोहनद अलि र सजाद जासिमले एक÷एक गोल गरे । नेपालका लागि मनिष डाँगीले एक गोल फर्काउदा इराकका अहमेद इब्राहिम खलाफले एक आत्मघाती गोल गरे ।
शारिरीकरुपमा निक्कै बलिया इराकविरुद्ध नेपालले खेलको सातौं मिनेटमै गोल व्यहोरेको थियो । कप्तान अला अब्दुल जहर खासिनले फ्रिकिकमा गोल गरेर इराकलाई अग्रता दिलाए । उनले झन्डै २५ यार्ड टाढाबाट गरेको फ्रिकिक प्रहार गोलरक्षक किरणको टाउको माथिबाट गोल भएको थियो । नेपालका मनिष डाँगीले अला अब्दुललाई फल गरेपछि इराकले फ्रिकिकको मौका पाएको थियो ।
तर इराकी खेलाडीले गोल खुसी मनाउन नपाउँदैं नेपालले बराबरी गोल गरे । खेलको आठौं मिनेटमा अञ्जन बिष्टको शक्तिशाली प्रहार बचाउने क्रममा इराकी अहमद इब्राहिम खलाफले आत्मघाती गोल गर्दा नेपाल बराबरी गर्न सफल भयो ।
त्यसअघि खेलको दोस्रो मिनेटमा नै बल हेड गर्नेक्रममा विपक्षी खेलाडीसँग ठोकिएपछि नेपालका रोहित चन्दको टाउकोमा चोट लागेको थियो । उनी त्यसपछि पट्टि बाँधेर खेलेका थिए ।
खेलको १३ औं मिनेटमा नेपालले अग्रता बनाउन अवसर गुमाए । अन्जनले इराकी डिफेन्डरको गल्तिको फाइदा उठाउँदै गरेको प्रहारलाई गोलरक्षक फाहद तालिम रहिमले बचाए । त्यस लगत्तै इराकले केहि मुभ सिर्जना गरेपनि नेपालको डिफेन्स चिर्न सकेन । सुरुवाती १५ मिनेटपछि खेलको गति केहि सुस्त हुँदा इराकले बल पोसेसनमा पकड जमाउन सुरु गरेको थियो ।
खेलको २७ औं मिनेटमा किरणले क्रसमा आएको हेडरलाई बचाउँदै नेपालको संकट टारे । त्यसकै काउन्टरमा सिर्जना भएको आक्रमणमा मनिषले पेनाल्टी क्षेत्रबाहिर बल नियन्त्रण गर्न खोज्दा ह्याण्ड भएपछि नेपालले अग्रता बनाउने अर्को अवसर गुमाए ।
मनिषले नै खेलको २९ औं मिनेटमा शानदार गोल गर्दै नेपाललाई अग्रता दिलाए । मनिषले सन्तोष तामाङको पासलाई सदुपयोग गर्दै इराकी गोलकिपर अघि बढेको अवस्थामा पेनाल्टी क्षेत्र बाहिरबाट उत्कृष्ट गोल गर्दै नेपाललाई २–१ को अग्रता दिलाएका थिए । उनको यो डेब्यु खेलमा डेब्यु गोल हो ।

खेलको ३६ औं मिनेटमा कप्तान किरणले क्रसमा आएको अर्को हेडरलाई विफल पार्दै नेपालको अग्रता जोगाए । इराकले ३९ औं मिनेटमा मोहमद अब्दुल्जारा ओबेदको हेड गोलबाट खेल बराबरी गोल गरे । कर्नरमा आएको बललाई ओबेदले ६ यार्र्ड बक्स नजिकबाट हेडरमार्फत गोल गरेका थिए ।
त्यस लगत्तै नेपालको डिफेन्स लाईनले गम्भिर गल्ती गरे । रोहितले डिबक्स भित्र दिएको ब्याकपासमा अयमन हुसेनले गोल गर्दै इराकलाई ३–२ को अग्रता दिलाए । रोहितले दिएको ब्याकपासमा किरण निकै पछाडी हुँदा गबधनले सहज अवसर पाएका थिए । पहिलो हाफको इन्जुरी समयमा अयमन हुसेनले व्यक्तिगत दोस्रो गोल गर्दै इराकलाई ४–२ को अग्रता दिलाए ।
दोस्रो हाफमा नेपालले तीन खेलाडी परिवर्तन गरे । सन्तोष तामाङ, नवयुग श्रेष्ठ र मनिष डाँगीको स्थानमा सुनिल बल, अभिषेक रिजाल र विशाल राई मैदान प्रवेश गरेका थिए । दोस्रो हाफको सुरुवातमा इराकले दबाब बनाएपनि गोल भने निकाल्न सकेन ।
खेलको ६८ औं मिनेटमा नेपालको डिफेन्स लाइनले अर्को गम्भिर गल्ती गरे । फेरी एक पटक डिफेन्स र गोलकिपरबीच तालमेल नमिल्दा नेपालले अर्को गोल व्यहोर्नु प¥यो । डिफेन्डर सुमन अर्यालको खराब व्याकपासमा वैकल्पिक खेलाडी मोहमद अलि अलसम्मारीले गोल गर्दै इराकलाई ५–२ को अग्रता दिलाए ।
खेलको ७४ औं मिनेटमा सज्जाद जसिमले गोल गर्दै इराकलाई ६–२ को अग्रता दिलाए । उनले पेनाल्टी क्षेत्र भित्रबाट गरेको शक्तिशाली प्रहार गोलमा परिणत भएको थियो ।
नेपालले इराकविरुद्ध पहिलो हापमा प्रभावशाली प्रदर्शन गरेको थियो । नेपालले डिफेन्स र गोलरक्षणमा समन्वय नहुँदा ६–२ को हार व्यहोर्नु परेको थियो । पहिलो हाफमा एक समय अग्रता समेत लिएको नेपालले पहिलो हाफको अन्त्यतिर लगातार तीन गोल खाएपछि खेलमा पकड गुमाएको थियो । दोस्रो हाफमा इराकले खेलाडी परिवर्तनसँगै खेलमा आफ्नो गति कायम नै राख्दा नेपाल भने कमजोर सावित भयो । नेपालभन्दा निकै माथिल्लो स्तरको इराकविरुद्ध नेपालको प्रदर्शन भने विगतभन्दा केहि सुधारिएको देखियो ।
नेपाली टोली अब स्थलमार्ग हुँदै कुवेत प्रस्थान गर्नेछ । जहाँ नेपालले विश्वकप २०२२ र एसियन कपको छनोटका बाँकी खेल खेल्नेछ । समूहको चौंथो स्थानमा रहेको नेपालको विश्वकप छनोटको दोस्रो चरणमा पुग्ने सम्भावना कम भएपनि एसियन कपमा छनोट हुने सम्भावना भने बाँकी रहेको छ ।
छनोट अन्तर्गत तीन खेल खेल्न बाँकी छ । नेपालले जुन ३ मा चाइनिज ताइपेइ, जुन ७ मा जोर्डन तथा जुन ११ मा अष्ट्रेलियासँग खेल्नेछ । एसियाली पवार हाउसविरुद्ध अंक खोस्न सके नेपालले कम्तिमा एसिया कप छनोटको तेस्रो चरणमा स्थान बनाउने छ ।
नेपालको ५ खेलमा १ जित र ४ हारको नतिजा रहेको छ । समूहको पुछारमा रहेको ताइपेइको ५ खेलमा कुनै अंक छैन । अष्ट्रेलिया १२ अंक जोड्दै शीर्षस्थान तथा कुवेत र जोर्डनको १०–१० अंक छ ।