Category: खेलकुद

भक्तपुर, असार २
नेपाल एसियन कप छनोटको तेस्रो चरणमा प्रवेश गरेको छ । एसियाली फुटबल महासंघ (एएफसी)ले छनोट प्रक्रिया परिमार्जन गरेसँगै नेपाल सिधै छनोटको तेस्रो चरणमा प्रवेश गरेको हो ।
यसअघिको प्रावधान अनुसार नेपालले प्लेअफ खेल्नुपर्ने थियो । एएफसीका अनुसार एसियन कप आयोजना गर्ने चीन, विश्वकपको आयोजक तथा एसियन कपको साविक विजेता कतारले विश्वकप छनोट तथा एसियन कपमा स्थान बनाएपछि समूहको चौथो स्थानमा रहने टोलीले पनि सिधै तेस्रो चरणमा स्थान बनाउने भएको हो ।
विश्वकप तथा एसियन कप छनोटको दोस्रो चरणको समापनसँगैं एएफसीले प्रकाशन गरेको नयाँ प्रावधान अनुसार दोस्रो चरणको छनोटमा समूहमा दोस्रो स्थान हासिल गर्ने मध्ये पुछारका तीन टोली, तेस्रो स्थानमा रहेका ८ टोली, चौंथो स्थानमा रहेका ८ टोली र पाँचौं स्थान हासिल गर्ने मध्ये शिर्ष तीन टोलीले एसियन कपको तेस्रो चरणको छनोट खेल्ने भएको हो ।

अब पाँचौ स्थान हासिल गर्ने पुछारका चार टोलीले मात्र प्लेअफ खेल्नुपर्ने भएको छ । सो अनुसार इन्डोनेसिया, कम्बोडिया, चाइनिज ताइपेइ र गुआमले मात्र प्लेअफ खेल्नेछन् । प्लेअफका विजयी दुई टोलीले एसियन कप छनोटको तेस्रो चरणमा स्थान पक्का गर्नेछन् ।
छनोटको दोस्रो चरणको समापनसँगै जापान, सिरिया, कतार, दक्षिण कोरिया, अष्ट्रेलिया, इरान, यूएई, साउदी अरेबिया, इराक, ओमान, भिएतनाम, लेबनान र चीन एसियन कपका लागि सिधै छनोट भएका छन भने विश्वकप छनोटको तेस्रो चरणमा प्रवेश गरेको छ ।
त्यस्तै एसियन कप छनोटको तेस्रो चरण खेल्ने टोलीहरुमा नेपालसहित ताजिकिस्तान, उज्बेकिस्तान, किर्गिस्तान, कुवेत, जोर्डन, बहराइन, प्यालेस्टाइन, भारत, थाइल्याण्ड, फिलिपिन्स, तुर्कमेनिस्तान, अफगानिस्तान, मलेसिया, सिंगापुर र मंगोलिया छन् । त्यसैगरी हङकङ, माल्दिभ्स, श्रीलंका, म्यानमार, यमन र बंगलादेश छन ।

भक्तपुर, असार १
चेक रिपब्लिकले युरोकप फुटबलमा सोमवार स्कटल्याण्डलाई २–० ले पराजित गर्दै सुखद शुरुवात गरेको छ । ह्याम्पडेन पार्कमा चेक रिपब्लिकलाई जित दिलाउन जर्मन क्लब बायर लिभरकुसनका फरवार्ड प्याट्रिक शिकले दुई गोल गरे ।
प्याट्रिकले खेलको ४२ औं मिनेटमा हेडरमार्फत गोल गर्दै चेक रिपब्लिकलाई अग्रता दिलाएका थिए । त्यसपछि खेलको ५२ औं मिनेटमा स्कटल्याण्डका गोलकिपर डेभिड मार्सल अघि बढेको स्थितिमा प्याट्रिकले व्यक्तिगत दोस्रो गोल गर्दै चेक रिपब्लिकलाई २–० को जित दिलाए ।

प्रतिस्पर्धात्मक र रोमाञ्चक खेलमा दुवै टोलीले खेलको शुरुवातदेखि नै आक्रमक फुटबल खेलेका थिए । खेलमा स्कटल्याण्डले पनि गोलको केही अवसर बनाएको थियो, तर मौकालाई सदुपयोग गर्न सकेन ।
चेकले ११ वर्षपछि स्कटल्यान्डलाई हराएको हो । चेकले पछिल्लोपटक स्कटल्यान्डलाई ९ अक्टोवर २०१० मा युरो छनोटको खेलमा १–० ले पराजित गरेको थियो । त्यस यता यी दुई टोली चारपटक आमनेसामने हुँदा एक खेल बराबरी भएको थियो भने तीन खेलमा चेक पराजित भएको थियो । सन् २०११ मा २–२ गोलको बराबरी खेल्दा त्यसपछि स्कटल्याण्डले २०१६ मा १–०, २०२० मा २–१ र १–० ले जित हासिल गरेको थियो ।
स्लोभाकिया २–१ ले विजयी
त्यसैगरी स्लोभाकियाले १० खेलाडीमा समेटिएको पोल्याण्डलाई २–१ गोल अन्तरले पराजित गरेको हो । रुसको सेन्ट पिटर्सवर्ग स्टेडियममा खेलको १८ औं मिनेटमा पोल्याण्डका गोलकिपर वजचिएक सेचेज्नीको आत्मघाती गोलबाट स्लोभाकियाले अग्रता बनाए । स्लोभाकियाका रोबर्ट माकले प्रहार गरेको बल पोस्टमा लागेर फर्कदै गोलकिपर वजचिएकलाई लाग्दै गोलमा परिणत भएको थियो ।

तर, खेलको ४६ औं मिनेटमा कारोल लिन्टीले गोल गर्दै पोल्याण्डलाई १–१ गोलको बराबरीमा फर्काए । ६२ औं मिनेटमा पोल्याण्ड १० खेलाडीमा समेटियो । पोल्याण्डका मिडफिल्डर ग्रेगोर्ज क्रिचोवियकले दोहोरो पहेलो कार्डसहित रातो कार्ड पाउँदै मैदानबाट बाहिरिएका थिए । त्यसपछि खेलको ६९ औं मिनेटमा मिलान स्क्रिनरले गोल गर्दै स्लोभाकियालाई २–१ को जित दिलाए ।
स्पेन र स्विडेन बराबरी
समूह ई को स्पेन स्विडेनको खेल गोलरहित बराबरीमा सकिएको छ । गएराती सेभियामा सम्पन्न खेलमा दुवै टोलीले केही अवसर बनाएपनि गोल गर्न नसक्दा खेल गोलरहित बराबरीमा सकिएको हो ।
घरेलु मैदानमा बल पोसेसनमा पकड जमाएपनि गोल गर्न नसक्दा स्पेनले बराबरीमा चित्त बुझाउनु प¥यो । स्विडेनले पनि खेलमा पाएको मौकालाई सदुपयोग गर्न सकेन ।

भक्तपुर, जेठ ३१
दक्षिण अमेरिकाको प्रतिष्ठित फुटबल प्रतियोगिता कोपा अमेरिका कपको आइतवार राती सम्पन्न खेलमा नेयमार चम्किँदा आयोजक ब्राजिलले भेनेजुएला विरुद्ध सहज जित निकालेको छ । स्टाडियो नेसनल डी ब्रासिलियामा सम्पन्न खेलमा ब्राजिलले भेनेजुएलालाई ३–० ले पराजित गर्दै प्रतियोगितामा सुखद शुरुवात गरेको हो । ब्राजिलको जितमा मार्कविवन्होस, नेयमार र गार्बियल बर्बोसाले एक÷एक गोल गरे ।
ब्राजिललाई खेलको २३ औं मिनेटमा मार्कविवन्होसले अग्रता दिलाएका थिए । उनले कर्नरमा आएको बल क्लियर हुन नसक्दा ६ यार्ड बक्स भित्रबाट हुलमुलमा गोल गरेका थिए ।
खेलको ६४ औं मिनेटमा नेयमारले पेनाल्टीमा गोल गर्दै ब्राजिललाई २–० को अग्रता दिलाए । पेनाल्टी क्षेत्रभित्र ड्यानीलिलाई लुइस मार्टिनेजले लडाएपछि रेफ्रीले पेनाल्टी दिएका थिए । नेयमारले गोलरक्षकलाई विपरित दिशातर्फ पठाउँदै सहजै गोल गरेका थिए । ब्राजिलका लागि नेयमारको यो ६७ औं गोल हो । पेलेको कीर्तिमान भन्दा नेयमार १० गोलले पछि रहेका छन् ।

खेलको ८९ औं मिनेटमा ग्याब्रिएल बार्बोसाले नेयमारको असिस्टमा गोल गर्दै ब्राजिलको जित सुनिश्चित गरे । नेयमारको क्रसलाई बार्बोसाले सहजै गोल गर्दै ३–० को जितसम्म डो¥याएका थिए ।
कोरोना संक्रमणका कारण भेनेजुएलाका ८ खेलाडीले कोपा गुमाउने भएपछि टोली केहि कमजोर देखिएको थियो । बल पोसेसनमा कमै पकड जमाएको भेनेजुएलाले केहि अवसर सिर्जना गरेपनि ब्राजिलको डिफेन्ससामु निरिह बनेको थियो । यस जितसँगै समूह ‘बी’ मा रहेका ब्राजिलले पहिलो खेलमै महत्वपूर्ण ३ अंक जोडेको छ । यस समूहको अर्को खेलमा आज कोलोम्बिया र इक्वेडर भिड्दैछन् । ब्राजिलले अब अर्को खेलमा पेरुको सामना गर्नेछ भने भेनेजुएलाले कोलोम्बियासँग खेल्नेछ ।

भक्तपुर, जेठ ३०
युरोकप अन्र्तगत आइतवार राती सम्पन्न समूह सीको रोमाञ्चकारी खेलमा घरेलु टोली नेदरल्यान्ड्सले युक्रेनलाई ३–२ गोल अन्तरले पराजित गरेको छ । आम्स्टरड्याममा सम्पन्न खेलमा युक्रेनले दुई गोलले पछि रहेको स्थितिबाट खेललाई बराबरीमा ल्याएपनि अन्ततः नेदरल्यान्ड्सले ३–२ को जित निकाल्न सफल भएको हो ।
खेलमा सम्भव पाँचै गोल दोस्रो हापमा भएको थियो । पहिलो हापमा एकपछि अर्को आक्रमण बुनेर युक्रेनलाई दवाबमा राखेपनि गोलरक्षक जर्ज बुस्कान बाधक बनेपछि नेदरल्यान्ड्सले गोल गर्न सकेन ।

दोस्रो हाफको ५२ औं मिनेटमा भने कप्तान वाइनाल्डमले गोल गर्दै नेदरल्यान्ड्सलाई अग्रता दिलाए । देन्जेल डमफ्रिजको क्रसलाई गोलरक्षक बुस्कानले बचाएपनि रिबाउन्डमा वान टचमा वाइनाल्डमले शक्तिशाली प्रहार गर्दै गोल गरेका थिए । त्यसको सात मिनेटपछि नै घरेलु टोलीले अग्रता दोब्बर पा¥यो । वोट वेघर्स्टले पेनाल्टी क्षेत्रभित्र क्लिअर हुन नसकेको बललाई गोलमा परिणत गरेका थिए । गोल गर्नुअघि डम्फ्रिजले फल गरेको भन्दै युक्रेनका खेलाडीले विरोध गरेअनि रेफ्रीले भीएआरको सहयोग लिँदा गोलले मान्यता पाएको थियो ।
खेलको ७५ औं मिनेटमा रोमन यारेम्चुकको पासमा कप्तान आन्द्रे यार्मलेंकोले गोल गर्दै युक्रेनलाई खेलमा फर्काए । त्यसको ४ मिनेट नबित्दै यारेम्चुकले रुस्लान मालिनोभ्स्कीको क्रसलाई हेडरमार्फत गोल गर्दै खेल २–२ को बराबरीमा ल्याए ।
तर खेल सकिन ५ मिनेट बाँकी रहँदा डेन्जेल डमफ्रिजले हेडरमार्फत गोल गर्दै नेदरल्यान्ड्सलाई पुनः अग्रता दिलाए । उनले नाथन आकेको पासमा गोल गरे र टोलीलाई महत्वपूर्ण जितका साथ तीन अंक दिलाए ।
अष्ट्रिया नर्थ म्यासेडोनियाविरुद्ध ३–१ ले विजयी
समूह सी कै पहिलो खेलमा अष्ट्रियाले नर्थ म्यासेडोनियालाई ३–१ ले पराजित गर्दै विजयी शुरुवात गरेको छ । अष्ट्रियालाई खेलको १८ औं मिनेटमा स्टेफान लाइनरले गोल गर्दै अग्रता दिलाएका थिए । उनले मार्सल साबिट्जरको क्रसलाई फार पोस्टबाट गोल गर्न सफल रहेका थिए । त्यसको १० मिनेटपछि नै म्यासेडोनियाले बराबरी गोल फर्कायो । कप्तान गोरान पान्डेभले पेनाल्टी क्षेत्र भित्र गोलरक्षकले बचाउन नसकेको बललाई सहजै गोलमा परिणत गर्दै खेल बराबरीमा ल्याएका थिए ।

अष्ट्रिया पुनः अग्रता लिन खेलको ७८ औं मिनेट कुर्नुप¥यो । ७८ औं मिनेटमा दायाँ विंगबाट कप्तान डेविड अलाबाले गरेको उत्कृष्ट क्रसलाई ग्रेगोरीचले पहिलो टचमै बललाई जाली चुमाएपछि अष्ट्रिया पुनः अग्रता बनाएको हो । ८९ औं मिनेटमा कोन्राड लाइमरले फ्लिक गर्दै डिफेन्सलाई बिट गरेपछि प्राप्त पासलाई अर्नाउटोभिचले गोल गर्दै अष्ट्रियाको जित पक्का गरे ।

अष्ट्रियाले युरोपेली च्याम्पियनसिपको इतिहासमा पहिलो जित दर्ता गर्न सफल रहयो । तेस्रो पटक युरो खेलिरहेको अष्ट्रियाले डेब्यु गरिरहेको म्यासेडोनियालाई हराउनुअघि २ जित र ४ हारको नतिजा बेहोरेको थियो । यस जितसँगै अष्ट्रियाले समूह सी मा ३ अंक जोडेको छ ।

भक्तपुर, जेठ ३०
युरोकपमा इंग्ल्यान्डले क्रोसियालाई १–० गोलले पराजित गरेको छ । घरेलु मैदान वेम्बेली स्टेडियममा उपस्थित साढे २२ हजार दर्शक सामु इंग्ल्यान्डलाई जित दिलाउन खेलको ५७ औं मिनेटमा रहिम स्ट्रर्लिङले निर्णायक गोल गरे । स्ट्रर्लिङले काल्भिन फिलिप्सको पासमा गोल गरेका हुन् ।
लिड्सका मिडफिल्डर फिलिप्सले दुई खेलाडीलाई बिट गर्दै दिएको चलाखीपुर्ण पासमा स्टर्लिङले गोल गरेका थिए । क्रोएसियन डिफेन्डरले उक्त प्रहार ब्लक गर्ने प्रयास गरेपनि वान टचमै गरेको प्रहार गोलरक्षक डोमिनिक लिभाकोभिकको हातमा लाग्दै गोल हुन पुगेको थियो ।
त्यसअघि पहिलो हाफको छैटौं मिनेटमा फिल फोडेनको प्रहार पोस्टमा लागेर फर्किदा इंग्ल्यान्ड अग्रता बनाउन चुकेको थियो । क्रोएसियाले पनि केहि गोलको अवसर पाएको थियो । ६०औं मिनेटमा मासन माउन्टको क्रसमा कप्तान ह्यारी केनले सदुपयोग गर्न नसक्दा इंग्ल्यान्ड अग्रता दोब्बर पार्नबाट चुक्यो । ६५औं रिवाउन्डमा एन्टी रेविचको प्रहार बाहिरिदा क्रोएसिया बराबरीबाट चुक्यो । ६७औं मिनेटमा मासन माउन्टको फ्रिकिक पोस्ट नजिकैबाट बाहिरिदा इंग्ल्यान्डले अग्रता दोब्बर पार्न सकेन ।
खेलको अन्त्यतिर क्रोसियाले लगातार इंग्ल्यान्डमाथि दवाब बढाएपनि गोल निकाल्न भने सकेन र हारलाई आत्मसाथ गर्नुप¥यो । जितसँगै इंग्ल्यान्डले तीन अंक जोडेको छ । इंग्ल्यान्डले जितसँगै ईतिहासको क्रमभंग भएको छ । यसअघि युरोकप ईतिहासमा इंग्ल्यान्डले पहिलो खेल जितेको रेकर्ड थिएन । यो जितसँगै इंग्ल्यान्ड युरोकपको पहिलो खेल जित्न नसकेको दाग मेट्न सफल भएको छ । यसको ठिक उल्टो क्रोसिया युरोकपको ईतिहासमा पहिलो चोटी पहिलो खेलमा पराजित भएको छ । यसअघि उसले युरोकपमा पहिलो खेल गुमाएको ईतिहास थिएन ।

भक्तपुर, जेठ ३०
युरोपका विभिन्न १० शहरमा जारी युरो कप अन्तर्गत शनिवार राती बेग्लाबेग्लै खेलमा बेल्जियम, फिनल्यान्डले विजयी शुरुवात गरेको छ भने वेल्स र स्विट्जरल्याण्डले बराबरी खेले ।
उपाधि दावेदारको रुपमा हेरिएको र फिफा वरियतामा पहिलो स्थानमा रहेको बेल्जियमले रुसलाई ३–० ले पराजित ग¥यो । बेल्जियमको जितमा फरवार्ड रोमेलु लुकाकुको दुई गोल गरे भने थोमस मुनिएरले एक गोल गरे ।
बेल्जियमले रुसको कमजोर डिफेन्सको फाइदा उठाउँदै पहिलो हाफमा २–० को अग्रता बनाए । खेलको दशौं मिनेटमा रुसको डिफेन्सले सहज बल क्लियर गर्न नसक्दा पेनाल्टी क्षेत्र भित्र रहेका लुकाकुले सहजै गोल गरेर बेल्जियमलाई अग्रता दिलाए ।
खेलको ३४ औं मिनेटमा थोमस मुनिएरले बेल्जियमको अग्रता दोब्बर पारे । थोर्गन हाजार्डको क्रसलाई गोलरक्षक एन्टोन शुनिनले बचाएपनि रिबाउन्डलाई अनमार्क रहेका मुनिएरले गोलमा परिणत गरे । उनले मैदान छिरेको ७ मिनेटमा नै गोल गरेका थिए ।
दोस्रो हाफमा लुकाकुले मुनिएरकै पासमा गोल गर्न सफल रहे । ८८ औं मिनेटमा मुनिएरले दिएको क्रसलाई लुकाकुले गोल गर्दै ३–० को जित पक्का गरेका थिए ।
फिनल्यान्डको ऐतिहासिक जित
यसै समूहको अर्को खेलमा युरोपेली च्याम्पियनसिपमा डेब्यु गरिरहेको फिनल्यान्डले डेनमार्कलाई १–० ले पराजित गर्दै विजयी शुरुवात गरे । समूह बी को पहिलो खेलको ५९ औं मिनेटमा जोल पोहान्पालोले गोल गर्दै फिनल्याण्डलाई अग्रता दिलाए । उनले जेरे उरोनेनको क्रसमा गरेको हेडर गोलरक्षक कास्पर स्माइकलको हातमा लाग्दै गोल भएको थियो । पहिलोपटक ठूलो अन्तर्राष्ट्रिय प्रतियोगिता खेलिरहेको फिनल्याण्डका खेलाडीले गोलको खुसी भने मनाएनन् । यसै खेलको ४३ औं मिनेटमा डेनमार्कका मिडफिल्डर क्रिस्टियन एरिक्सन एक्कासी मैदानमा लडेर अचेत भएपछि उपचारका लागि अस्पताल लगिएका कारण एरिक्सनले गोलको खुसी नमनाएको हो ।

खेलको ७३ औं मिनेटमा डेनमार्कले खेल बराबरी गर्ने मौका गुमाए । पओलोस अराजुरीले पेनाल्टी क्षेत्रभित्र युसुफ पौल्सेनलाई लडाएपछि डेनमार्कले पेनाल्टी प्राप्त गरेको थियो तर पिएर इमिल होएबिएर चुक्न पुगे । होएबिएरले आफ्नो दायाँतर्फ गरेको प्रहारलाई गोलरक्षक लुकास ह्राडेच्कीले सहजै बचाएका थिए ।
मैदानमै ढले क्रिस्टियन एरिक्सन

डेनमार्क र फिनल्याण्डको खेलको ४३ औं मिनेटमा डेनमार्कका मिडफिल्डर क्रिस्टियन एरिक्सन एक्कासी मैदानमा लडेर अचेत भए । उनी लडेपछि रेफ्रीले तत्काल स्वास्थ्य टिम मैदान बोलाएका थिए । बल उनको स्थानसम्म नआउँदै एक्कासी ढलेका एरिक्सनलाई मैदानमा स्वास्थ्य टोलीले सिपिआर (कार्डियो पल्मोनरी रिससिटेसन) पनि दिएका थिए । झन्डै १५ मिनेट मैदानमा नै उपचार गरेपछि उनलाई स्ट्रेचरमा मैदान बाहिर लागिएको थियो ।
मैदानबाट बाहिर लग्ने क्रममा नै एरिक्सनको होस आएको थियो । उनलाई थप उपचारका लागि नजिकैको अस्पताल लागिएको थियो । अस्पतालबाट उनले आफ्नो सहकर्मीलाई भिडियो कलमार्फत कुरा गर्दै खेल सुचारु गर्न भनेका थिए । दुवै टोलीसँग यूईएफएले छलफल गरेपछि खेल झन्डै डेढ घण्टापछि पुनःसुचारु भएको थियो ।
रेफ्रिले खेल जहाँ रोकिएको थियो, त्यहीबाट पुनः शुरु गरे । पहिलो हापको ४ मिनेट खेलाएर रेफ्रिले मध्यान्तरको सिटी बजाए । रेफ्रिले ५ मिनेट पछि दोस्रो हाफ शुरु गरे ।
वेल्स र स्वीट्जरल्यान्डको रोमाञ्चक बराबरी
युरो कप अन्तर्गत नै शनिवार साँझ भएको खेलमा वेल्स र स्वीट्जरल्यान्डले बरबरी खेल्दै अंक बाँड । एक गोलले पछि परेको अवस्थामा वेल्सले स्वीट्जरल्यान्डलाई १–१ गोलको बराबरीमा रोक्न सफल भएको हो ।
अजरवैजानस्थित बाकी स्टेडियम बाकुमा शनिबार राति भएको समूह ‘ए’ को खेलमा स्वीट्जरल्यान्डले खेलको सुरुवात देखि नै वेल्सलाई दवावमा राखेपनि वेल्सको रक्षापङ्ति तोड्न धौ धौ भएको थियो । खेलमा पकड जमाएपनि स्वीट्जरल्यान्डलाई अग्रता लिन दोस्रो हापसम्म कुर्नु प¥यो । स्वीट्जरल्यान्डलाई खेलको ४९ औं मिनेटमा ब्रिल इम्वोलोले अग्रता दिालए । इम्वोलोले जेद्रान शाकिरीको पासलाई सदुपयोग गरेका थिए ।

एक गोलले पछि परेको वेल्सले सम्हालिएको खेल पस्कँदै ७४औं बराबरी गर्न सफल भयो । जोइ मोररेलको पासमा अनमार्क रहेका किफर मुरले फ्लिक हेडर गर्दै बललाई जाली चुमाएपछि खेल १–१ को बराबरीमा सकिएको थियो । ८५औं मिनेटमा मारियो गाभरानोभिकले गोल गरेपनि भिएआरले उनको गोललाई मान्यता नदिदा स्वीट्जरल्यान्डले अग्रता लिनबाट चुक्यो । मैदान प्रवेश गरेको केहिबेरमा नै गोल गरेको खुसी मनाएपनि उनी अफसाइड ठहरिएका थिए ।
यो बराबरीपछि दुवै टोलीले समान एक अंक जोडेका छन् । शुक्रबार राती टर्कीलाई ३–० ले पराजित गरेको इटालीको ३ अंक छ । यो समूहमा टर्की अंक विहीन छ ।

भक्तपुर, जेठ २९
युरोपेली महादेशीय युरो कप फुटबल प्रतियोगितामा इटालीले विजयी शुरुवात गरेको छ । इटालीको रोमस्थित ओलम्पियन स्टेडियममा गएराती सम्पन्न उद्घाटन खेलमा इटालीले टर्कीलाई ३–० गोल अन्तरले पराजित गर्दै विजयी शुरुवात गरेको हो ।
इटालीको जितमा चिरो इम्मोबिले, लोरेन्जो इन्सिग्नेले गोल गरे भने एक गोल आत्मघाती गोलको रुपमा उपहार पाए । इटालीले आक्रमक खेल पस्केपनि टर्कीको रक्षापंक्तिले इटालीलाई पहिलो हापमा अघि बढ्न दिएन । बल पोसेसनमा पकड जमाउँदै आक्रमण बढाएपनि इटालीले अग्रता बनाउन आत्मघाती गोलको सहायत लिनुप¥यो । खेलको ५३ औं मिनेटमा डोमेनिको बेरार्डीको क्रसलाई क्लियर गर्न नसक्दा टर्कीका मेरिह डेमिराललाई लाग्दै गोल भएको थियो ।

इटालीले ६६ औं मिनेटमा अग्रता दोब्बर बनाए । इटालीका लागि लिओनार्डो स्पिनाज्जोलाको प्रहार गोलरक्षक उगुर्चान चुकारले बचाएपनि रिबाउन्डमा गोल गर्दै चिरो इम्मोबिलेले इटालीको अग्रता दोब्बर पारेका थिए । त्यस्तै ७९ औं मिनेटमा लोरेन्जो इन्सिग्नेले गोल गर्दै इटालीलाई ३–० ले अघि बढाए र जित पक्का गरे । उनले इम्मोबिलेको पासलाई पेनाल्टी क्षेत्र भित्रबाट पहिलो टचमा नै गोल गरेका थिए ।
यो सँगै इटालीले लगातार ९ खेलमा गोल नखाई जित हासिल गरेको छ । समग्रमा इटालीले आफ्नो अपराजित यात्रालाई २८ खेल पु¥याएको छ । इटालीले युरो कपको इतिहासमा एकै खेलमा तीन गोल गरेको यो नै पहिलो अवसर समेत हो । यस जितसँगै इटालीले समूह ए मा ३ अंक जोडेको छ । यसै समूह अन्तर्गत शनिबार वेल्स र स्विटजरल्यान्डले खेल्नेछन् । उक्त खेल नेपाली समयानुसार साँझ ६ः४५ बजे सुरु हुनेछ ।

भक्तपुर, जेठ २८
विश्वकप तथा एसियन कप छनोट अन्तर्गत कुवेतमा जारी खेलको पहिलो हापमा अष्ट्रेलियाले नेपालविरुद्ध २–० को अग्रता लिएको छ । अष्ट्रेलियाले कप्तान म्याथ्यु लेकि र फ्रान कारासिचलको गोलको मद्दतले २–० को अग्रता बनाएको हो ।

अष्ट्रेलियाका लागि खेलको छैंटौं मिनेटमा अजिज बेहिचले बायाँ विंगबाट दिएको क्रसलाई लेकिले रोहित चन्दभन्दा अघि रहेर हेडरमार्फत गोल गर्दै अग्रता दिलाए । त्यस्तै खेलको ३७ औं मिनेटमा लेकिले दायाँ विंगमा उत्कृष्ट मुभ बनाउँदै दिएको कटब्याकमा फ्रान कारासिचले गोल गर्दै अष्ट्रेलियाको अग्रता दोब्बर पारे ।

त्यसो त २८ औं मिनेटमा कप्तान किरणले एज्दीन हर्सतितचको फ्रिकिक बचाउँदा अष्ट्रेलिया अग्रता दोब्बर पार्नबाट चुकेका थिए । ३५ औं मिनेटमा अनन्त तामाङले अष्ट्रेलियालाई गोल थप्नबाट रोके । कप्तान लेकिले पेनाल्टी क्षेत्रभित्रबाट गरेको प्रहार अनन्तले उत्कृष्ट ट्याकल गर्दै रोकेका थिए । लगत्तै त्यसै क्लियरेन्समा नेपालको काउन्टर अट्याक विपक्षी गोलरक्षक एन्ड्रयु रेडमेनको हातमा पुगेर रोकिएको थियो ।

४० औं मिनेटमा मार्टिन बोएलले झन्डै २५ यार्ड टाढाबाट गरेको प्रहारलाई गोलरक्षक किरणले बचाए । खेलको ४४ औं मिनेटमा रोहित चन्दले रातो कार्ड पाउँदै मैदान छाड्न बाध्य भए । मार्टिन बोएललाई पेनाल्टी क्षेत्र बाहिर वन भर्सेस वनको स्थितिमा अघि बढेको अवस्थामा फल गरेको भन्दै रेफ्रीले रातो कार्ड देखाएका थिए ।

अष्ट्रेलियाले बल पोसेसनमा वर्चस्व जमाएको पहिलो हाफमा निकै आक्रमण बुनेको थियो । सुरुवातमा नै अग्रता लिएपछि अष्ट्रेलियाले पोसेसनमा ध्यान दिँदै आक्रमण बुनेको थियो ।

भक्तपुर, जेठ २८
प्रशिक्षक अब्दुल्लाह अलमुताईरीले अष्ट्रेलियाविरुद्ध खेल्ने शुरुवाती ११ खेलाडीको घोषणा गरेको छ । फिफा विश्वकप–२०२२ तथा एसियन कप–२०२३ अन्तर्गत दोस्रो चरणको छनोटको अन्तिम खेलमा नेपालले आज बलियो टिम अष्ट्रेलियासँग प्रतिस्पर्धा गर्दैछ ।
कुवेत सिटीस्थित जाबेर अल अहमद अन्तर्राष्ट्रिय स्टेडियममा हुने खेलमा लागि प्रशिक्षक अलमुताईरीले अष्ट्रेलियाविरुद्ध नेपाली टोलीलाई ४–३–३ को रणनीतिमा मैदानमा उतार्ने तयारी गरेको छ । जसका लागि अलमुताईरीले जोर्डनविरुद्धको टोलीमा चार परिवर्तन गरेका छन ।
अलमुताईरीले जोर्डनविरुद्ध सुरुवाती–११ मा रहेका रहेका अन्जन विष्ट, दिनेश राजवंशी, अभिषेक रिजाल र सन्तोष तामाङ बेन्चमा राखेर फरवार्ड नवयुग श्रेष्ठ, मिडफिल्डर विशाल राई, एरिक विष्ट र डिफेन्डर गौतम श्रेष्ठ सुरुवाती–११ मा मौका दिएका छन ।
गोलकिपरमा किरण चेम्जोङ, डिफेन्डरमा रोहित चन्द, अनन्त तामाङ, गौतम श्रेष्ठ, सुमन अर्याल, मिडफिल्डरमा पुजन उपरकोटी, एरिक विष्ट, विशाल राई र फरवार्ड नवयुग श्रेष्ठ , सुमन लामा र सुनिल बललाई अलमुताईरीले मैदानमा उतार्दै छन ।

भक्तपुर, जेठ २८
युरोपको प्रतिष्ठित फुटबल प्रतियोगिता युरो कपको १६ औं संस्करण आज (शुक्रवार) राती ईटलीको रोममा आयोजक इटली र टर्कीबीचको खेलसँगै शुरु हुँदैंछ । खेल नेपाली समय अनुसार राति १२ः४५ बजे सुरु हुनेछ । ओलम्पिक स्टेडियम हुने उद्घाटन खेलमा दुबै टोली जित निकाल्दै सुखद सुरुवात गर्ने लक्ष्यमा रहेका छन् ।
मिनी विश्वकपको रुपमा समेत लिईने युरो कप गत वर्ष नै सम्पन्न हुनुपर्ने थियो, तर कोरोना महामारीका कारण एक वर्ष पछि सरेको हो ।
युरोकपमा २४ टोलीले प्रतिष्पर्धा गर्दैछ । युरो कप अहिलेसम्म १० राष्ट्रले जितिसकेको छ । ती १० मध्ये यो पटक ९ पुर्वविजेता सहभागी हुँदैछ । युरो कपका पुर्वविजेताहरु मध्ये ग्रिस यसपटक छनोट हुन असफल भएको छ ।
युरोकपको ६०औं वर्षको अवसरमा यस पटक प्रतियोगिता विभिन्न देशका ११ शहरमा हुँदैछ । युरोकप लण्डन, आम्स्टरडाम, बाकु, सेभिया, बुचारेस्ट, बुडापेस्ट, कोपनहेगन, ग्लासगो, म्युनिख, रोम र सेन्ट पिटर्सवर्गमा आयोजना हुनेछ । फाइनल खेल जुलाई ११ मा लण्डनको वेम्बली स्टेडियममा हुनेछ ।
सहभागी २४ मध्ये झण्डै एक तिहाइ टिम उपाधिको दाबेदारको रुपमा छन् । साविक विजेता पोर्चुगल, विश्व विजेता र साविक उपविजेता फ्रान्स, सर्वाधिक ३ पटकको च्याम्पियन जर्मनी र स्पेन अनि विश्व वरीयताको शीर्ष स्थानमा रहेको बेल्जियम प्रमुख दाबेदारको रुपमा छन् । यस्तै इंग्ल्याण्ड, एक पटकको विजेता इटली र नेदरल्याण्ड्स पनि उपाधि दाबेदारकै रुपमा छन् । उपाधि दाबेदार भएर पनि अहिलेसम्म युरोकप जित्न नसकेका बेल्जियम र इंग्ल्याण्ड हुन ।
पूर्व च्याम्पियनमध्ये डेनमार्क, रसिया र चेक रिपब्लिकलाई उपाधि दाबेदारको रुपमा हेरिएको छैन । डेनमार्क र नेदरल्याण्ड्स २०१६ मा छनोट हुन नसके पनि यस पटक पुनरागमन गरेका छन् । यसबाहेक सन् २०१८ मा फ्रान्सले विश्वकप जित्दा अप्रत्यासितरुपमा फाइनल पुगेको क्रोएसियाले पनि अर्को अप्रत्यासित नतिजा निकाल्न सक्छ ।
कुन समूहमा कुन टिम ?

समूह ए – इटाली, टर्की, वेल्स, स्विजरल्याण्ड

समूह बी – डेनमार्क, फिनल्याण्ड, बेल्जियम, रसिया

समूह सी – नेदरल्यान्ड्स, युक्रेन, अस्ट्रिया, नर्थ म्यासेडोनिया

समूह डी – इंग्ल्यान्ड, क्रोएसिया, स्कटल्याण्ड, चेक रिपब्लिक

समूह ई – स्पेन, स्विडेन, पोल्याण्ड, स्लोभाकिया

समूह एफ – हंगेरी, पोर्चुगल, फ्रान्स, जर्मनी