Category: खेलकुद

भक्तपुर, असार ७
युरोकप अन्तर्गत समूह ए को अन्तिम चरणको खेलमा आइतबार राती इटालीसँग वेल्स १–० पराजित भएपनि गोल अन्तरका आधारमा अन्तिम १६ मा प्रवेश गरेको छ । समूहको अर्को खेलमा स्विट्जरल्यान्डले टर्कीलाई ३–१ ले पराजित गरेपनि वेल्स अन्तिम १६ मा प्रवेश गरेको हो ।
इटालीलाई समूह चरणमा शतप्रतिशत जित दिलाउन म्याटियो पेस्सिनाले खेलको ३९ औं मिनेटमा गोल गरे । पेस्सिनाले मार्को भेराट्टीको फ्रिकिकमा हल्का बलको दिशा परिवर्तन गर्दै गोलरक्षक ड्यानी वार्ड झुक्याएर गोल गरेका थिए ।

खेलमा वेल्सले पनि केही काउन्टरमा गोल गर्ने अवसर बुनेको थियो । तर कप्तान ग्यारेथ बेलले केही अवसरमा फिनिसिङ निकाल्न नसक्दा वेल्स पराजित हुन बाध्य भए ।
अर्को खेलमा स्विट्जरल्यान्डले टर्कीलाई ३–१ ले पराजित गरेपनि भाग्यमानी बन्न सकेन । पहिलो खेलमा वेल्ससँग १–१ को बराबरी खेलेको स्विट्जरल्यान्ड इटालीसँग ३–० ले पराजित भएको थियो भने टर्कीलाई ३–१ ले पराजित गरेको थियो । वेल्सले टर्कीलाई २–० ले पराजित गरेको थियो । समग्रमा टर्की र स्विट्जरल्यान्डले १ जित, १ बराबरी र १ पराजय भोगेको थियो । तर वेल्सले ३ गोल गर्दा २ गोल खाएको थियो भने स्विट्जरल्यान्डले ४ गोल गरेपनि ५ गोल खानपुग्दा १ गोल बढी खाएको कारण सिधै अन्तिम १६ मा प्रवेश गर्न पाएन । अव स्विट्जरल्यान्ड उत्कृष्ट तेस्रो टोलीको रुपमा अन्तिम १६ मा प्रवेश गर्ने सम्भावना बाँकी छ ।

टर्की विरुद्ध स्विट्जरल्यान्डलाई जित दिलाउन जेर्डान शाकिरीले २ र हरिस सेफेरोभिले एक गोल गरे । टर्कीका लागि इरफान च्यान काभेचीले एक गोल गर्दै गोल अन्तर घटाए ।
खेलमा स्विट्जरल्यान्डले छैटौं मिनेटमा सेफेरोभिचको गोलमा अग्रता लिएको थियो । उनले स्टिभन जुबरको पासमा सुन्दर गोल गर्दै टोलीलाई अग्रता दिलाए । २६ औं मिनेटमा शाकिरीले दर्शनीय गोल गर्दै अग्रता दोब्बर पारे । जुबरकै पासमा शाकिरीले पेनाल्टी क्षेत्रको ठिक बाहिरबाट गरेको प्रहार टप कर्नरमा गोल भएको थियो । शकिरीले आफ्नो बायाँ खुट्टाले गरेको प्रहारलाई गोलरक्षक उगुर्कान साकिरले बचाउने कुनै अवसर नै पाएनन् ।

दोस्रो हाफको ६२ औं मिनेटमा इरफान च्यान काभेचीले गोल अन्तर घटाउँदै टर्कीलाई खेलमा फर्काउने प्रयास गरे । उनले पेनाल्टी क्षेत्र बाहिरबाट गरेको शक्तिशाली प्रहार सिधै गोलमा परिणत भएको थियो ।
६८ औं मिनेटमा शाकिरीले व्यक्तिगत दोस्रो गोल गर्दै स्विट्जरल्यान्डलाई जिततर्फ डो¥याए । जुबरले झाकासँग पास साटफेर गर्दै बनाएको मुभमा गोल सम्भव भएको थियो । जुबरले दिएको अन्तिम लो क्रसलाई शाकिरीले गोलमा परिणत गर्दै स्विट्जरल्यान्डलाई जितनजिक पु¥याएका थिए ।

भक्तपुर, असार ६
युरोपेली च्याम्पियनसिप युरोकपमा जर्मनीले पोर्चुगलविरुद्ध शानदार जित निकालेको छ भने स्पेन पेनाल्टीमा चुक्दा पोल्याण्डसँग बराबरीमा रोकिएको छ ।
समूह डी को खेलमा जर्मनीले पोर्चुगललाई ४–२ गोल अन्तरले पराजित गर्दै शानदार जित हासिल गर्यो । खेलमा पोर्चुगलले अग्रता लिएपनि त्यसलाई जोगाउन नसक्दा हार व्यहोर्नु परेको हो । जर्मनीको जितमा हाभर्ट्ज, रोबिन गोसेन्सले गोल गरे भने दुई गोल आत्मघाती उपहार पाए । उता पोर्चुगलबाट भने कप्तान क्रिस्टियानो रोनाल्डो र जोटाले गोल गरेका थिए ।
खेलको १४ औं मिनेटमा पोर्चुगलले कप्तान क्रिस्टियानो रोनाल्डोको गोलमा अग्रता लिएको थियो । काउन्टर अट्याकमा सुन्दर मुभ बनाएको पोर्चुगलका लागि डिओगो जोटाले पेनाल्टी क्षेत्र भित्रबाट अनमार्क रहेका रोनाल्डोलाई पास दिएपछि रोनाल्डोले खाली पोस्टमा गोल गरेका थिए ।
तर खेलको ३५ औं मिनेटमा जर्मनीले बराबरी गोल गरे । रोबिन गोसेन्सले पेनाल्टी क्षेत्रको बायाँ भागबाट गरेको क्रस डियासले क्लिअर गर्नेक्रममा बल गोल भएको थियो । त्यसको ३ मिनेटपछि नै जर्मनीले अर्को आत्मघाती गोलमा अग्रता लियो । जोशुवा किम्मिखको क्रसमा राफेल गुरेरोले बल क्लिअरेन्स गर्ने क्रममा आफ्नै पोस्टमा गोल हुन पुगेको थियो ।
हाभर्ट्जले खेलको ५१ औं मिनेटमा जर्मनीलाई ३–१ ले अघि बढाए । गोसेन्सको क्रसलाई हाभर्ट्जले ६ यार्ड बक्स भित्रबाट पहिलो टचमा फिनिस गर्न सफल भएका थिए । ६० औं मिनेटमा रोबिन गोसेन्सले जर्मनीलाई ४–१ को अग्रता दिलाए । पेनाल्टी क्षेत्रको दायाँ भागबाट किम्मिखले दिएको क्रसलाई फार पोस्टमा अनमार्क रहेका गोसेन्सले हेडरमार्फत गोल गरे ।
खेलको ६६ औं मिनेटमा जोटाले गोल गर्दै गोल अन्तर कम गरे । गुरेरोको फ्रिकिकलाई रोनाल्डोले फार पोस्टबाट जोगाएपछि आएको पासमा जोटाले गोल गर्दै पोर्चुगललाई खेलमा फर्काउने प्रयास गरेका थिए ।
जर्मनी यस जितसँगै समूहको दोस्रो स्थानमा उक्लिएको छ । जर्मनीसँग समान ३ अंक भएपनि हेड टु हेडमा पोर्चुगल तेस्रो स्थानमा रहेको छ । २ खेलमा ४ अंक जोडेको फ्रान्स शीर्षस्थान तथा हंगेरी १ अंक जोड्दै चौथो स्थानमा रहेको छ । समूहको चारै टोलीको अर्को चरणमा पुग्ने सम्भावना रहेको छ ।
यसैगरी समूह ई को शनिवार राती सम्पन्न खेलमा स्पेन पोल्यान्डसँग बराबरीमा रोकिएको छ । पहिलो हाफमा अग्रता लिएपनि कप्तान रोबर्ट लेवान्डोस्कीले गोल गरेपछि स्पेन १–१ को बराबरीमा रोकिएको हो ।

स्पेनले अल्भारो मोराटाको गोलले खेलको २५ औं मिनेटमा अग्रता लिएको थियो । जेरार्ड मोरेनोले दायाँ विंगबाट दिएको लो क्रसलाई मोराटाले पहिलो टचमा नै गोल गरेका थिए । रेफ्रीले सुरुवातमा असिस्टेन्ट रेफ्रीको झन्डा उठेपछि अफसाइड दिएपनि भिडियो असिस्टेन्ट रेफ्रीले गोललाई मान्यता दिएका थिए ।
पहिलो हाफको अन्तिम मिनेटमा मोरेनोले अग्रता दोब्बर पार्ने अवसर चुकाए । जोर्डी अल्बाले बायाँ विंगबाट दिएको लो क्रसमा मोरेनोको प्रहारले पोस्टको बाहिरी नेटमा लागेको थियो ।
खेलको ५४ औं मिनेटमा नै पोल्यान्डले रोबर्ट लेवान्डोस्कीको हेडर गोल मार्फत खेल बराबरीमा ल्याए । कामील जोज्वियाकले दायाँ विंगबाट दिएको क्रसलाई रोबर्ट लेवान्डोस्कीले हेडरमार्फत गोल गरेका थिए । स्पेनका खेलाडीले लेवान्डोस्कीले हेडर प्रहार गर्नुअघि डिफेन्डर एमेरिक लापोर्टलाई फल गरेको भन्दै विरोध जनाएपनि भीएआरले गोललाई मान्यता दिएको थियो ।

खेल बराबर भएको ४ मिनेटपछि नै स्पेनले अग्रता लिने अवसर खेर फाल्यो । पेनाल्टी क्षेत्रभित्र याकुब मोल्डरले मोरेनोलाई लडाएपछि रेफ्रीले भीएआरको सहायता लिँदै स्पेनलाई पेनाल्टी दिएका थिए । मोरेनो आफैंले गरेको पेनाल्टी प्रहार पोस्टमा लागेर फर्किएको थियो । उक्त रिबाउन्डमा मोराटाको प्रहारले पुनः बाहिरियो ।

बराबरीसँगै स्पेनको २ खेलमा २ अंक जोडेको छ । पोल्यान्ड भने पहिलो अंक जोड्दै समूहको पुछारमा रहेको छ । यस समूहमा स्वीडेनको ४ अंक छ भने स्लोभाकियाको ३ अंक रहेको छ । समूहको अन्तिम खेलमा स्पेनले स्लोभाकियाको र स्वीडेनले पोल्यान्डको सामना गर्नेछ ।

भक्तपुर, असार ५
विश्व च्याम्पियन फ्रान्स युरोकपको समूह चरणको दोस्रो खेलमा हंगेरी विरुद्ध हारबाट जोगिएको छ । पुस्कास एरिना बुडापेस्टमा शनिवार राती सम्पन्न खेलमा फ्रान्स एन्टोइन ग्रिजमनको गोलले हारबाट जोगिएको हो ।
फ्रान्सले घरेलु टोली हंगेरीलाई दवाबमा राखेपनि काउन्टरमा गोल खाँदा खेलमा पछि परेको थियो । हंगेरीले खेलको पहिलो हापको ईन्ज्युरी समयको दोस्रो मिनेटमा गोल गर्दै खेलमा अग्रता लिएको थियो । राफयल भरानको कमजोर क्लियरेन्समा रोलान्ड सल्लाईले काउन्टर अट्याकमा अघि फालेको बललाई एटिला फिओलाले गोलगर्दै हंगेरीलाई १–० ले अग्रता दिलाए । हंगेरीले फ्रान्सको पोष्टमा गरेको पहिलो आक्रमणमै गोल गर्न सफल भएको थियो ।

एक गोलले पछि परेको अवस्थामा फ्रान्सलाई एन्टोइन ग्रिजमनले उद्धार गरे । ग्रिजमनले खेलको ६६औं मिनेटमा कप्तान तथा गोलरक्षक ह्युगो लोरिसले फालेको लामो पासलाई दुई डिफेन्डरबीचबाट नियन्त्रणमा लिदै पेनाल्टी बक्सभित्रबाट गरेको क्रसलाई हंगेरीका विल्ली ओर्वानले क्लियर गर्ने प्रयास गरेपनि नसकेको बललाई जाली चुमाएका थिए ।
यसअघि खेलको १४औं मिनेटमा हंगेरीका गोलरक्षक पिटर गुलाक्सीले दोहोरो बचाउ गर्दा फ्रान्स अग्रता लिनबाट चुकेको थियो । केलियन एमबाप्पेको पासमा करिम बेन्जेमाले पेनाल्टी बक्सबाहिरबाट गरेको प्रहारलाई गोलरक्षक गुलाक्सीले फुत्काएपनि रिवाउन्डमा ग्रिजमनको प्रहार उनकै हातमा पुगेको थियो । १७औं लुकास डिग्नेले मिलाइदिएको पासमा एमबाम्पेको हेड पोस्ट नजिकैबाट बाहिरियो ।
खेलको ३१औं मिनेटमा पउल पोग्वाबाट आएको पासलाई एमबाप्पेले पेनाल्टी बक्समा नियन्त्रणमा लिदै फ्लिक गर्दै दिएको पासमा बेन्जेमाले वान टचमै भलीमार्फत गरेको प्रहार पोस्ट नजिकैबाट बाहिरिदा फ्रान्सले फेरी अग्रता लिन सकेन । खेलको ८१ औं मिनेटमा हंगेरीका कप्तान गुलाक्सीले एमबाप्पेको शक्तिशाली प्रहारलाई विफल पार्दै खेल बराबरीमा राखे । लगत्तै ओलिभिएर जिरुडको फितलो प्रहारमा पनि गुलाक्सीनै बाधक बने ।
समूह ‘एफ’ मा फ्रान्सले दुई खेलबाट ४ अंक जोडेको छ । हंगेरीले दुई खेलबाट १ अंक जोेडेको छ । पोर्चुगलको ३ तथा जर्मनीको शुन्य अंक रहेको छ । यस समूहको अर्को खेल पोर्चुगल र जर्मनीबीच भइरहेको छ ।

भक्तपुर, असार ५
युरोकप अन्तर्गत शुक्रवार राती सम्पन्न समूह डी का दुई खेल बराबरीमा टुंगिएको छ । समूहको दोस्रो चरणको पहिलो खेलमा क्रोएसिया र चेक रिपब्लिकले १–१ को बराबरी खेल्यो ।
खेलमा चेकले अग्रता लिएको थियो । खेलको ३७ औं मिनेटमा प्याट्रिक सिकले पेनाल्टीमा गोल गर्दै चेकलाई अग्रता दिलाएका थिए । पेनाल्टी क्षेत्रभित्र डिफेन्डर डेजान लोभ्रनले फल गरेपछि भीएआरमार्फत पेनाल्टी दिइएको थियो । सिकले लिभाकोभिचलाई गलत दिशामा पठाउँदै प्रतियोगितामा व्यक्तिगत तेस्रो गोल गरेका थिए ।

क्रोएसियाले दोस्रो हाफको सुरुवातमा नै खेल बराबरीमा ल्याए । पेरिसिचले पेनाल्टी क्षेत्रको बायाँ भागबाट फार पोस्टतर्फ गरेको प्रहार गर्दै सुन्दर गोल गरे । छोटो फ्रिकिकमा छरितो मुभ बनाएको क्रोएसियाका लागि क्रामारीचको पासमा पेरिसिचले गोल गरेका थिए ।
प्रतिष्पर्धात्मक खेलमा दुवै टोलीले एकपछि अर्को आक्रमण बुनेको थियो । तर दुवै टोली फिनिसिङमा चुक्दा दुवै टोलीले थप गोल गर्न सकेन र खेल १–१ को बराबरीमा सकियो ।
त्यसैगरी यही समूहको अर्को खेलमा स्कटल्यान्ड र इंग्ल्यान्डले पनि गोल रहित बराबरी सकिएको छ । दुवै टोलीका केही अवसर खेर गएपछि खेल गोल रहित बराबरीमा सकिएको हो ।
खेलको ११ औं मिनेटमा जोन स्टोन्सको हेडरमा क्रसबार बाधक बन्दा इंग्ल्यान्डले अग्रता लिन सकेन । मेसन माउन्टको कर्नरमा ६ यार्ड बक्स भित्रबाट फ्री हेडर पाएका स्टोन्सको प्रहार पोस्टमा लागेर फर्किएको थियो । लगत्तै माउन्टको प्रहारले पनि गोलको दिशा लिन सकेन ।

३० औं मिनेटमा इंग्ल्यान्डका गोलरक्षक जोर्डन पिकफर्डले उत्कृष्ट बचाउ गर्दै स्कटल्यान्डलाई अग्रता लिनबाट रोके । स्कट ओ’डनलले पेनाल्टी क्षेत्र भित्रबाट गरेको शक्तिशाली प्रहारलाई पिकफर्डले दायाँतर्फ डाइभ दिँदै बचाएका थिए । त्यसै रिबाउन्डमा चे एडम्सले पनि बललाई पोष्टको दिशा दिन सकेन । इंग्ल्यान्डका डिफेन्डर रीस जेम्सले खेलको ६२ औं मिनेटमा गोललाइनबाट बल क्लियर गर्दै फेरी एक पटक स्कटल्यान्डलाई अग्रता लिन दिएन ।
यस बराबरीसँगै चेक रिपब्लिक नै समूहको शीर्ष स्थानमा कायम रहयो । चेक र इंग्ल्यान्डको समान ४–४ अंक छ भने क्रोएसिया र स्कटल्यान्ड १–१ अंकसहित तेस्रो र चौथो स्थानमा छन् । समूहको अन्तिम खेलमा क्रोएसिया र स्कटल्यान्ड तथा इंग्ल्यान्ड र चेक रिपब्लिक खेल्नेछन् ।

भक्तपुर, असार ४
स्विडेनले स्लोभाकियालाई पराजित गर्दै १६ औं संस्करणको युरोकपमा पहिलो जित निकालेको छ । सेन्ट पिटर्सवर्गमा शुक्रवार सम्पन्न खेलमा स्विडेनले खेलको ७७ औं मिनेटमा पेनाल्टीमार्फत गोल गर्दै जित निकालेको हो ।
स्विडेनलाई जारी युरोकपमा पहिलो जित निकाल्न इमिल फोर्सबर्गले गोल गरे । रबिन क्वेसनलाई पेनाल्टी क्षेत्रभित्र गोलरक्षक मार्टिन डुब्राभ्काले लडाएपछि रेफ्रीले पेनाल्टी दिएका थिए । गोलरक्षक मार्टिन डुभ्रावकाले सही दिशामा डाइभ दिएपनि फोर्सवर्गले गोल गर्न सफल भए ।

स्लोभाकियाले खेलको तेस्रो मिनेटमा नै कप्तान मरेक हाम्सिकको कर्नरमा जुराज कुकाको हेडरमार्फत आक्रमणको शुरुवात गरेको थियो । तर हाम्सिकको प्रहार पोस्ट नजिकैबाट बाहिरियो । स्विडेनले पनि १३औं मिनेटमा सेवास्टिन लार्सनको पासमा मिकाईल लस्टिगको प्रहार बाहिरिदा अग्रता लिनबाट चुकेको थियो ।
दोस्रो हाफको शुरुमै स्विडेनका एलेक्सान्डर इसाकले सुवर्ण अवसर पाएपनि उनले बल भेटाउन सकेन ५८औं मिनेटमा जुराज कुकाको फ्रिकिकमा हाम्सिकले गरेको हेडरलाई पञ्च गर्दै बचाएपनि उनी अफसाइड ठहरिएका थिए ।
६०औं मिनेटमा लार्सनकै पासमा मार्कुस ड्यानिल्सनले अवसर पाएपनि सदुपयोग हुन सकेन । ६१औं मिनेटमा इमिल फोर्सवर्ग र इसाकको समन्वयमा बनेको मुभलाई स्क्रिनिएरले विफल पारे ।
६७औं मिनेटमा इसाकले अर्काे अवसरलाई सदुपयोग गर्न नसक्दा स्वीडेनले अग्रता लिन सकेन । ७१औं मिनेटमा इसाकले तीन डिफेन्डरबीचबाट गरेको प्रहारलाई गोलरक्षक मार्टिन डुभ्रावकाले सहजै नियन्त्रणमा लिए ।
समूह चरणमा स्विडेनको यो पहिलो जित हो । स्विडेनले यसअघि स्पेनलाई गोलरहित बराबरीमा रोकेको थियो । स्लोभाकियाको यो पहिलो हार हो । यसअघि स्लोभाकियाले पोल्यान्डलाई १–० ले स्तब्ध पारेको थियो ।

भक्तपुर, असार ३
आयोजक ब्राजिलले कोपा अमेरिका कपको शुक्रवार बिहान सम्पन्न खेलमा पेरुलाई ४–० गोल अन्तरले पराजित गर्दै लगातार दोस्रो जित निकालेको छ ।
ओलम्पिक निल्टन सान्तोस स्टेडियममा ब्राजिललाई जित दिलाउन एलेक्स सान्ड्रो, नेयमार, एभर्टन र रिचार्लीसनले एक एक गोल गरे । ब्राजिलले खेलको १२ औं मिनेटमा एलेक्सको गोलले अग्रता लिएको थियो । एलेक्सले ग्राबियल जिससको पासमा गोल गर्दै ब्राजिललाई अग्रता दिलाएका थिए ।

ब्राजिलयन सुपरस्टार नेयमारले खेलको ६८ औं मिनेटमा गोल गर्दै ब्राजिलको अग्रता दोब्बर बनाए । खेलको ८९ औं मिनेटमा एभर्टनले गोल गर्दा ब्राजिलले ३–० को अग्रता बनायो । त्यसपछि खेलको इन्जुरी समयमा रिचार्लीसनले गोल गर्दै ब्राजिललाई ४–० को सानदार जित दिलाए । यस जितसँगै समूह ‘बी’ मा रहेका ब्राजिल २ खेलमा ६ अंक जोड्दै समूहको शीर्ष स्थानमा रहेको छ । ब्राजिलले पहिलो खेलमा भेनेजुएलालाई ३–० गोल अन्तरले पराजित गरेको थियो ।
यसै समूहको अर्को खेलमा कोलम्बिया र भेनेजुएलाले गोलरहित बराबरी खेल्दै अंक बाडेका छन् । शुक्रवार बिहान सम्पन्न खेलमा कोलम्विया र भेनेजुएलाले गोलरहित बराबरी खेल्दै अंक बाँडेका हुन । दुवै टोलीले गोलका केही सुवर्ण अवसर सृजना गरेपनि खेर फाल्दा खेल गोल रहित बराबरीमा टुंगिएको हो ।

ब्राजिलको स्टेडियो ओलिम्पिको पेड्रो लुडोभिको टेइसेरिया सम्पन्न खेलमा बल पोसेसनमा पकड बनाएपनि फिनिसिङमा चुक्दा कोलम्विया बराबरीमा रोकिन बाध्य भएको हो ।
समूह ‘बी’ मा ब्राजिल दुई खेलबाट ६ अंक जोड्दै शिर्ष स्थानमा रहेको छ । कोलम्वियाले दुई खेलबाट ४ अंक जोडेको छ । भेनेजुएलाले पहिलो अंक जोड््दै तेस्रो स्थानमा उक्लिएको छ । पेरु भने अंक विहिन रहेको छ ।

भक्तपुर, असार ४
नेदरल्यान्ड्स र बेल्जियम युरोकपको नकआउट चरणमा प्रवेश गरेको छ । नेदरल्यान्ड्सले बिहिवार राती सम्पन्न खेलमा अष्ट्रियामाथि २–० र बेल्जियमले एक गोलले पछि परेको स्थिती उल्ट्याउँदै डेनमार्कमाथि २–१ को जित निकाल्दै नकआउट चरणमा प्रवेश गरेको हो ।
समूह सी खेलमा लगातार दोस्रो जित निकाल्नेक्रममा नेदरल्यान्ड्सले घरेलु मैदानमा खेलको ११ औं मिनेटमा मेम्फिस डिपाएको पेनाल्टी गोलमा अग्रता लिएको थियो । अष्ट्रियाका कप्तान डेविड अलाबाले पेनाल्टी क्षेत्रभित्र डेन्जेल डम्फ्राईजलाई लडाएको भिडियो असिस्टेन्ट रेफ्रीले देखेपछि रेफ्रीले पेनाल्टी दिएका थिए । गोलरक्षक बाक्म्यानले डिपाएको प्रहारको दिशा ठम्याएपनि रोक्न भने सकेनन् ।
खेलको ६७ औं मिनेटमा नेदरल्यान्ड्सले डम्फ्राइजको गोलमा अग्रता दोब्बर पा¥यो । वैकल्पिक खेलाडी डनि मालेनले अफसाइड ट्रयाप बिट गर्दै पेनाल्टी क्षेत्र भित्रबाट दिएको पासलाई अनमार्क रहेका डम्फ्राइजले पहिलो टचमा नै गोल गरेका थिए ।
जितसँगै नेदरल्यान्ड्सको समूहको अन्तिम खेल अगावै नकआउट चरणमा प्रवेश गरेको छ । नेदरल्यान्ड्स १३ वर्षपछि युरोको नकआउट चरणमा पुगेको हो । यसअघि टोली सन् २००८ को युरोमा समूह चरण पार गर्न सफल रहेको थियो । यसै समूहमा रहेको युक्रेन र अष्ट्रियाको ३–३ अंक छ । नर्थ म्यासेडोनिया भने अंकविहिन रहेको छ । अन्तिम चरणमा युक्रेन र अष्ट्रिया तथा नेदरल्यान्ड्स र नर्थ म्यासेडोनिया भिड्नेछन् ।
बेल्जियम २–१ ले विजयी

केभिन डे ब्रुएनको प्रभावशाली प्रदर्शनमा बेल्जियमले डेनमार्कलाई पराजित गर्दै अन्तिम खेल अगावै युरोकपको अन्तिम १६ मा प्रवेश गरेको छ । बेल्जियमको जितमा थोर्गन हाजार्ड र ब्रुएनले गोल गरे । खेल बेल्जियमले जिते भने अग्रता भने डेनमार्कले लिएको थियो ।
दोस्रो हापमा मैदान प्रवेश गरेका ब्रुएनले ५५ औं मिनेटमा डेनमार्कको पेनाल्टी क्षेत्रभित्र संयमित भएर डिफेन्स लाइन तोड्दै दिएको पासमा हाजार्डले गोल गर्दै नेदरल्यान्ड्सलाई बराबरीमा ल्याएका थिए ।
यसअघि घरेलु मैदानमा दर्शकलाई खुसी बनाउँदैं डेनमार्कले खेलको दोस्रो मिनेटमा नै अग्रता लिएको थियो । बेल्जियमको डिफेन्समा कमजोरीको फाइदा उठाउँदै युसुफ पाउल्सेनले गोल गरेका थिए । उनले पिएर एमिल होएबिएरको पासलाई नियन्त्रणमा लिँदै पेनाल्टी क्षेत्रको ठिक भित्रबाट गरेको प्रहार गोलमा परिणत भएको थियो ।

खेलको ७१ औं मिनेटमा डे ब्रुएनले सानदार गोल गर्दै टोलीलाई अग्रता दिलाए । उनले इडेन हाजार्डको पासमा पेनाल्टी क्षेत्र बाहिरबाट गोल गर्दै टोलीलाई अग्रता दिलाएका थिए । अन्ततः खेलमा थप गोल भएन र बेल्जियम जित आत्मसाथ गर्दै नकआउट चरणमा प्रवेश ग¥यो ।
बेल्जियमले पहिलो हाफमा गोलको केही अवसर सिर्जना गरेपनि त्यसको सदुपयोग गर्न सकेन । डेनमार्कले पनि बेल्जियमलाई निरन्तर दवाब राखेको थियो तर गोल भने निकाल्न सकेन । दोस्रो हाफमा प्रशिक्षक रोबर्टो मार्टिनेजले मिडफिल्डर डे ब्रुएनलाई मैदान प्रवेश गराउँदै खेलको रुप नै बदलेका थिए ।

डेनमार्कले ८७ औं मिनेटमा खेल बराबरी गर्न अवसर पाएपनि क्रसबार त्यसमा बाधक बन्यो । ८७ औं मिनेटमा मार्टिन ब्रेथवेटले स्कोभ ओल्सनको क्रसमा गरेको हेडरमा कोर्टुवा निरिह बनेपनि क्रसबारले बेल्जियमको अग्रता जोगाएको थियो ।

यस जितसँगै बेल्जियम समूह बीको २ खेलमा ६ अंक जोड्दै शीर्षस्थानमा पुगेको छ । बेल्जियमले नकआउट चरणमा पनि स्थान पक्का गरेको छ । समूहमा फिनल्यान्ड र रसियाको समान ३–३ अंक छ । डेनमार्क भने दुवै खेलमा पराजित हुँदै समूह चरणबाट नै बाहिरिने सम्भावना बढेको छ ।

भक्तपुर, असार ३
युरोकप अन्तर्गत रोमानियाको नेसनल एरिनामा बिहिवार राती सम्पन्न खेलमा युक्रेनले नर्थ म्यासेडोनियालाई २–१ गोल अन्तरले पराजित गरेको छ । युक्रेनले १६ औं संस्करणको युरोकप फुटबलमा यो पहिलो जित हो ।
युक्रेनको जितमा एन्ड्री यार्मोलेन्को र रोमन यारेमचुकले एक एक गोल गरे । म्यासेडोनियाका एजान एलिओस्कीले एक गोल फर्काएपनि खेलमा फर्काउन सकेन ।
यार्मोलेन्कोले खेलको २९ औं मिनेटमा गोल गर्दै युक्रेनलाई अग्रता दिलाएका थिए । एलेक्सान्डर काराभाइवको पासमा उनले सहजै फिनिस गरेका थिए । ३४औं मिनेटमा यार्माेलेन्कोले पासमा रोमन यारेमचुकले अफसाइड बिट ट्रयापमा गोल गर्दै युक्रेनको अग्रता दोब्बर पारे । ३९औं मिनेटमा कप्तान गोरान पाण्डभले गोल गरेपनि उनी अफसाइड ठहरिदा म्यासेडोनियाले गोल अन्तर घटाउन सकेन ।

खेलको ५७औं मिनेटमा इज्ग्जान एलिओस्कीले गोल गर्दै म्यासेडोनियालाई खेलमा फर्काउने संकेत दिए । एलेक्सान्डर ट्राजकोभ्स्कीको प्रहार क्रसबारमा लागेर फर्केपछि रिवाउन्डमा कप्तान गोरान पाण्डभले प्रहार गर्न खोजेका थिए । त्यसक्रममा काराइभले फउल गरेपछि रेफ्रीले भिएआरको सहायता लिदै म्यासेडोनियालाई पेनाल्टी प्रदान गरे । इज्ग्जान एलिओस्कीको पेनाल्टीलाई गोलरक्षक जर्ज बुस्चाले बचाएपनि रिवाउन्डमा एलिओस्कीनै गोल गर्न सफल भए ।
यस्तै खेलको ८४ औं मिनेटमा युक्रेनका रुस्लान मालिनोभ्सकीले पेनाल्टीमा गोल गर्न सकेनन् । उनको प्रहार नर्थ म्यासेडोनियाका गोलकिपर स्टोलले बचाएका थिए ।
यस जितसँगै समूह ‘सी’ मा रहेको युक्रेनले २ खेलमा ३ अंक जोडेको छ । पहिलो खेलमा युक्रेन नेदरल्यान्ड्ससँग ३–२ गोल अन्तरले पराजित भएको थियो । युक्रेन समूहको तेस्रो स्थानमा रहेको छ ।

नर्थ म्यासेडोनियाको यो लगातार दोस्रो हार हो । नर्थ म्यासेडोनिया पहिलो खेलमा अष्ट्रियासँग ३–१ ले पराजित भएको थियो । म्यासेडोनिया पुछारमा रहेको छ ।

भक्तपुर, असार ३
युरोकप अन्तर्गत बुधवार राती सम्पन्न खेलमा इटाली स्विटजरलयान्डलाई सहजै पराजित गरी प्रतियोगिताको प्रिक्वाटर फाइनलमा प्रवेश गरेको छ । समूह ए को दोस्रो चरणको खेलमा इटाली स्विट्जरल्यान्डलाई ३–० ले पराजित गर्दै अन्तिम १६ मा प्रवेश गरेको हो । जारी प्रतियोगितामा अन्तिम १६ मा प्रवेश गर्ने इटाली पहिलो टोली बनेको छ ।
इटालीको जितमा म्यानुएल लोकाटेलीको दुई तथा चिरो इम्मोबिलेको एक गोल गरे । खेलको २६ औं मिनेटमा इटालीले अग्रता लिएको थियो । डोमेनिको बेरार्डीको कटब्याकमा म्यानुएल लोकाटेलीले ६ यार्ड बक्सभित्र अनमार्क रहेको अवस्थामा गोल गरेका थिए । लोकाटेली आफैंले मिडफिल्डबाट लामो पास निकाल्दै बल बेरार्डीलाई बायाँ विंगमा दिएका थिए । बेरार्डीले विंगमा मुभ सिर्जना गर्दै दिएको बललाई लोकाटेलीले सहजै गोल गरेका थिए ।

त्यसअघि इटालीले कप्तान जिओर्जियो किएलिनीको गोल गरेका थिए तर त्यसलाई भीएआरले मान्यता दिएन । लोरेन्जो इन्सिग्नेको कर्नरमा किएलिनीले बललाई जाली चुमाएपनि रिप्लेमा हातले छोएको स्पष्ट देखिएको थियो ।
दोस्रो हाफको ५२ औं मिनेटमा निको बरेल्लाको पासमा पेनाल्टी क्षेत्र बाहिरबाट लोकाटेलीले व्यक्तिगत दोस्रो गोल गर्दै इटालीको अग्रता दोब्बर पारे । लोकाटेलीले आफ्नो व्यावसायिक करिअरमा एकै खेलमा दुई गोल गरेको यो पहिलो अवसर हो ।
खेलको ८९ औं मिनेटमा इम्मोबिलेले गोल गर्दै इटालीलाई ३–० को जित पक्का गरे । उनले राफाएल टोलोइको पासमा लामो दुरीबाट गरेको प्रहार गोल भएको थियो । इटालीले पछिल्लो १० खेलमा दुई वा सोभन्दा बढी गोल गर्ने सिलसिलालाई कायम नै राख्यो । यस जितसँगै इटालीको अपराजित यात्रा पनि २९ खेलमा लम्बिएको छ । इटालीले पछिल्लो १० खेलमा गोल समेत खाएको छैन ।
वेल्स २–० ले विजयी
त्यस्तै बुधवार राती नै सम्पन्न समूह ए को अर्को खेलमा वेल्सले टर्कीलाई २–० ले पराजित गर्दै नकआउट चरणमा पुग्ने सम्भावनालाई बलियो बनाएको छ । वेल्सका लागि राम्सीले ४२ औं मिनेटमा र इन्ज्युरी समयको पाँचौ मिनेटमा कनर रोबर्ट्सले गोल गरेका थिए ।
राम्सीले ग्यारेथ बेलको लामो पासलाई पेनाल्टी क्षेत्रभित्र उत्कृष्ट नियन्त्रण गर्दै फिनिस गरेका थिए । त्यसअघि उनले २४ औं मिनेटमा बेलकै पासमा गरेको प्रहार पोस्टभन्दा माथिबाट गएको थियो । ३७ औं मिनेटमा बुराक इल्माजको प्रहारले पनि पोस्टको दिशा लिन सकेको थिएन ।

खेलको ६० औं मिनेटमा वेल्सले पेनाल्टी पायो । जेकी चेलीकले पेनाल्टी क्षेत्रभित्र बेललाई लडाएपछि रेफ्रीले पेनाल्टी दिएका थिए । तर बेलको प्रहार पोस्टभन्दा निकै माथि गएपछि स्कोर १–० नै कायम रहयो । टर्कीले त्यसपछि लगातार आक्रमण गरेपनि गोलरक्षक वार्डले लगातार बचाउ गर्दै टर्कीलाई खेलमा फर्कन दिएनन् । इन्ज्युरी समयको पाँचौ मिनेटमा कनर रोबर्ट्सले गोल गर्दै वेल्सको जित सुनिश्चित गरे । उनले बेलको पासलाई नै पेनाल्टी क्षेत्रभित्र भिडभाड भएको अवस्थामा गोल गरेका थिए ।
समूह ए मा दोस्रो चरणको खेलको समाप्तिमा इटालीले २ खेलबाट ६ अंक बटुलेको छ भने वेल्सको ४, स्विट्जरल्यान्डको १ र टर्कीको शुन्य अंक रहेको छ । इटालीले समूहको अन्तिम खेलमा वेल्सको सामना गर्नेछ । त्यस्तै स्विट्जरल्यान्डले अंकविहिन रहेको टर्कीसँग खेल्नेछ ।

भक्तपुर, असार २
युरोकपमा रसियाले फिनल्यान्डविरुद्ध १–० को झिनो जित निकालेको छ । घरेलु मैदानमा बुधवार राती सम्पन्न खेलमा रसियाले एलेक्सी मिरान्चुकको गोल मद्दतले फिनल्यान्डलाई पराजित गरेको हो ।
रसियालाई पहिलो जित दिलाउन मिरान्चुकले खेलको पहिलो हापको अन्त्यतिर सुन्दर गोल गरे । पहिलो हाफको इन्ज्युरी समयको थप गरिएको दोस्रो मिनेटमा इटालियन क्लब एटलान्टाका मिरान्चुकले कप्तान अर्टिम ज्युवासँगको वान टु वान पासमा गोल गरे । मिरान्चुकले तीन डिफेन्डरबीचबाट प्रहार गरेको लेफ्ट फुटेट प्रहारले जाली चुम्दा फिनल्यान्डका गोलरक्षक लुकास ह्रादेच्कीले रोक्ने कुनै मौका पाएनन् । उनले २०१९ नोभेम्बरपछि रसियाका लागि पहिलो गोल गरेका हुन् ।
रसिया पहिलो खेलमा बेल्जियमसँग ३–० ले पराजित भएको थियो । च्याम्पियनसिपमा पहिलो हार बेहारेको फिनल्यान्डले पहिलो खेलमा डेनमार्कलाई १–० ले पराजित गरेको थियो ।
सेन्ट पिटर्सबर्गमा भएको खेलको चौथो मिनेटमा जोएल पोहानपालोले गोल गरेपनि उनको गोललाई भिएआरबाट मान्यता दिएन । भिएआरले जुक्का राइटाले डलेर कुजाएभलाई बिट गर्दै दिएको क्रसमा पोहानपालोले सिक्स यार्ड बक्सभित्रबाट हेडमार्फत गोल गर्नुअघि उनी अफसाइड देखिएको थियो ।

खेलको १०औं मिनेटमा रसियाले खेलमा अग्रता लिने सुवर्ण अवसर खेर फाल्यो । डलेर कुजाएभले ओभरल्यापमा जाँदै एलेक्सी मिरानचुकलाई दिएको पासमा उनले अनमार्क रहेका ओजडाइभ पास दिँदा उनको प्रहार पोस्टबाट आकासिएको थियो । १४औं मिनेटमा मिरानचुककै पासमा कप्तान अर्टिम ज्युवाको प्रहार क्रसबारमा लागेर फर्कदा रसिया अग्रता लिनबाट चुक्यो ।
यो जितसँगै समूह ‘बी’ बाट रसियाले २ खेलबाट ३ अंक जोड्दै नकआउट चरण पार गर्ने सम्भावना जीवितै राखेको छ । समान ३ अंक नै भएपनि बेल्जियम बढी गोलको आधारमा शीर्ष स्थानमा रहँदा फिनल्यान्ड हेड टु हेडमा रसिया भन्दा अघि छ । रसियाले डेनमार्कसँग तथा फिनल्यान्डले बेल्जियमसँग खेल्न बाँकी छ । बिहीबार राति बेल्जियम र डेनमार्क खेल्दैछन् ।