Category: खेलकुद

भक्तपुर, असार २०
कप्तान ह्यारी केनको दुई गोल मद्दतले इंग्ल्यान्ड युरोकप २०२० को क्वाटरफाइनलमा युक्रेनमाथि ४–० को शानदार जित निकाल्दै सेमिफाइनलमा प्रवेश गरेको छ । इंग्ल्यान्ड २५ वर्षपछि युरोकपको सेमिफाइनलमा प्रवेश गरेको हो । यस अघि इंग्ल्यान्ड सन् १९९६ मा सेमिफाइनल पुगेको थियो ।
इटालीको रोममा आइतवार बिहान सम्पन्न खेलमा इंग्ल्यान्डलाई जित दिलाउन कप्तान केनले दुई तथा ह्यारी मग्वाएर र जोर्डन हेण्डरसनले एक एक गोल गरे ।
केनले खेलको शुरुवातमा नै गोल गरेपछि युक्रेन दबाबमा परेको थियो । स्टाडियो ओलम्पिको स्टेडियममा चौंथो मिनेटमा कप्तान केनले गोल गर्दै इंग्ल्यान्डलाई शुरुवाती अग्रता दिलाएका थिए । रहिम स्ट्रर्लिङको पासमा उनले गोल गरे ।
इंग्ल्यान्डले दोस्रो हाफको पहिलो मिनेटमा अग्रता दोब्बर पारे । खेलको ४६ औं मिनेटमा डिफेन्डर मग्वाएरले गोल गर्दै इंग्ल्यान्डलाई २–० को अग्रता दिलाए । लुक शको फ्रिकिक पासमा उनले हेडमार्फत गोल गरे ।

खेलको ५० औं मिनेटमा केनले व्यक्तिगत दोस्रो गोल गर्दै इंग्ल्यान्डलाई ३–० को अग्रता दिलाए । उनले शकै पासमा हेडमार्फत गोल गरे । त्यसपछि युक्रेनले रक्षात्मक खेल खेल्न थाल्यो । वैकल्पिक खेलाडी जोर्डन हेन्डरसनले कर्नरबाट अर्को गोल थपेपछि इंग्ल्यान्ड फराकिलो जिततर्फ उन्मुख भएको थियो । वैकल्पिक खेलाडीको रुपमा मैदान प्रवेश गरेका हेन्डरसनले खेलको ६३ औं मिनेटमा गोल गर्दै इंग्ल्यान्डलाई ४–० को जित दिलाए । राइसको स्थानमा ५७ औं मिनेटमा मैदान पसेका उनले मासन माउन्टको कर्नरमा हेडमार्फत गोल गरे । इंग्ल्यान्डका लागि उनको यो पहिलो गोल हो ।
इंग्ल्यान्डले अब सेमिफाइनलमा डेनमार्कसँग प्रतिष्पर्धा गर्नेछ । डेनमार्क चेक रिपब्लिकलाई २–१ गोलले पराजित गर्दै सेमिफाइनल प्रवेश गरेको हो ।

चेकविरुद्ध डेनमार्कले पनि खेलको शुरुवातमै अग्रता लिएको थियो । खेलको ५ औं मिनेटमा थोमस डेलानेले हेडरमार्फत गोल गर्दै डेनमार्कलाई अग्रता दिलाए । लार्सेनको कर्नरमा अनमार्क रहेका उनले उत्कृष्ट हेडर गोल गरे ।
त्यसपछि खेलको ४२ औं मिनेटमा कास्पर डोलवर्गले गोल गर्दै डेनमार्कलाई २–० को अग्रता दिलाए । उनले जोकिम माहेलको पासमा गोल गरेका हुन् ।

दोस्रो हाफको शुरुवातमा नै चेकले गोल फर्काउँदै खेललाई थप रोमाञ्चक बनाए । चेकका लागि प्याट्रिक सिकले गोल गर्दै खेलमा फर्काउने प्रयास गरे । सौफालको क्रसमा पहिलो टचमा नै सिकको प्रहार गोल भएको थियो । प्रतियोगितामा पाँचौ गोल गर्दै सिकले सर्वाधिक गोलकर्ता सुचिमा पोर्चुगलका कप्तान क्रिस्टियानो रोनाल्डोसँग बराबरी पनि गरे ।
दोस्रो हाफमा सुधारिएको प्रदर्शन गरेपनि चेकले फाइनल थर्डमा अपेक्षित तालमेल मिलाउन नसक्दा बराबरी गोल गर्न सकेन ।

भक्तपुर, असार १९
युरोकप २०२० अन्तर्गत बाकुमा जारी तेस्रो क्वाटरफाइनलको पहिलो हापमा डेनमार्कले चेक रिपब्लिक विरुद्ध २–० को अग्रता लिएको छ ।
खेलमा डेनमार्कले ५ औं मिनेटमा अग्रता लिएको हो । थोमस डेलानेले हेडरमार्फत गोल गर्दै डेनमार्कलाई अग्रता दिलाए । लार्सेनको कर्नरमा अनमार्क रहेका उनले उत्कृष्ट हेडर गोल गरे ।

त्यसपछि खेलको ४२ औं मिनेटमा कास्पर डोलवर्गले गोल गर्दै डेनमार्कलाई २–० को अग्रता दिलाए । उनले जोकिम माहेलको पासमा गोल गरेका हुन् ।
चेक रिपब्लिकले प्रि–क्वाटरफाइनलमा उपाधि दाबेदार मानिएको नेदरल्यान्ड्सलाई हराएको थियो । चेक रिपब्लिकले १० खेलाडीमा सिमित नेदरल्यान्ड्समाथि २–० गोलको जित निकालेको थियो । डेनमार्कले भने प्रि–क्वाटरफाइनलमा वेल्सलाई फराकिलो अन्तरले हराएको थियो । १० खेलाडीमा सिमित वेल्सलाई ४–० गोल अन्तरले पराजित गर्दै डेनमार्कले अन्तिम आठको यात्रा तय गरेको हो ।

भक्तपुर, असार १९
विश्व नम्बर एक बेल्जियमलाई पराजित गर्दै इटाली युरोकप २०२० को सेमिफाइनल प्रवेश गरेको छ । जर्मनीको एलिनाज स्टेडियममा शनिवार बिहान सम्पन्न खेलमा इटाली फिफा वरियतामा शिर्ष स्थानमा रहेको बेल्जियमलाई २–१ गोलले पराजित गर्दै सेमिफाइनलमा प्रवेश गरेको हो ।
इटालीको जितमा निकोलो बरेला र लोरेन्जो इन्सिनेले एक एक गोल गरे भने बेल्जियमका रोमेलु लुकाकुले एक गोल फर्काए ।
खेलमा सम्भव तीनै गोल पहिलो हापमा भएको हो । खेलमा आक्रमक शुरुवात गर्दै इटालीले अग्रता लिएको थियो । इटालीलाई खेलको १३ औं मिनेटमा लियोनार्दो बुनिचीले अग्रता दिलाए तर उनको गोललाई भीएआरले अफसाइड घोषित गरेको थियो ।

खेलको ३० औं मिनेटमा बरेलाले गोल गर्दै इटालीलाई अग्रता दिलाए । मार्को भेराट्टीको पासमा उनले दुई डिफेन्डरलाई बिट गर्दै गोल गरे । खेलको ४४ औं मिनेटमा लोरेन्जोले गोल गर्दै इटालीलाई २–० को अग्रता दिलाए । उनले एकल प्रयासमा बक्स बाहिरबाट उत्कृष्ट गोल गरे । मैदानको बायाँ भागबाट बल लिँदै अघि बढेका लोरेन्जोको प्रहारलाई गोलरक्षक थिबाउट कोर्टुवाले डाइभ दिएपनि बचाउन सकेनन् ।

पहिलो हाफको इन्जुरी समयको दोस्रो मिनेटमा लुकाकुले पेनाल्टीमा गोल गर्दै खेल २–१ को स्थितिमा ल्याए । जियोभानी लोरेन्जोले पेनाल्टी बक्स भित्र जेरीमी डोकुलाई लडाएपछि बेल्जियमले पेनाल्टीको अवसर पाएको थियो । दोस्रो हाफमा दुबै टोलीले केही अवसर बुनेपनि फिनिसिङमा चुक्दा थप गोल हुन सकेन र अन्ततः खेल २–१ ले इटालीको पोल्टामा गयो ।
खेलमा इटालीका गोलकिपर जियानलुइजी डोनारुम्माले केही शानदार बचाउ गरेका थिए भने बेल्जियमका लुकालुले केही अवसर खेल फालेका थिए । लुकालुको कमजोर प्रदर्शनका कारण पनि बेल्जियम युरोकपको क्वाटरफाइनलबाट बाहिरिनुको कारण बन्यो । दोस्रो हाफमा गोलका लागि दुई सुन्दर अवसर पाएको थियो तर लुकालु चुक्दा बेल्जियम बराबरी गर्नबाट चुकेका थिए । बेल्जियमले तुलनात्मक रुपमा बढी आक्रमण गरेपनि गोलको अवसर सदुपयोग गर्न नसक्दा खेल गुमाउन पुग्यो ।
जितसँगै इटालीको अपराजित यात्रा ३२ खेल पुगेको छ । बेल्जियमले भने १४ खेलपछि हारको सामना गरेको हो । इटाली १० अक्टोबर २०१८ मा पोर्चुगलसँग १–० गोलले पराजित भए यता कुनै पनि खेलमा पराजित भएको छैन । इटाली ३२ खेलमा अपराजित हुने क्रममा २७ खेलमा जित हात पारेको छ भने ५ खेलमा बराबरीमा रोकिएको छ । अपराजित खेल संख्याको रेकर्ड भने ब्राजिल र स्पेनको संयुक्त नाममा छ । दुवै टिमले लगातार ३५ खेलसम्म पराजय भोगेका थिएनन् ।
अब इटालीले सेमिफाइनलमा स्पेनसँग प्रतिस्पर्धा गर्नेछ । स्विट्जरल्यान्डलाई पेनाल्टी सुटआउटमा ३–१ गोल अन्तरले पराजित गर्दै स्पेन अन्तिम चारमा पुगेको हो ।

भक्तपु, असार १८
युरोकप २०२० को पहिलो क्वाटरफाइनलमा स्पेनलाई महत्वपुर्ण अग्रता मिलेको छ । रुसको सेन्ट पिटर्सवर्ग स्टेडियममा जारी खेलको पहिलो हाफमा स्पेनले १–० गोलको अग्रता बनाएको हो ।
स्विट्जरल्यान्डका डेनिस जाकारियाले खेलको आठौं मिनेटमा आत्मघाती गोल गर्दै स्पेनलाई अग्रता दिलाएका हुन । स्पेनका जोर्डी अल्बाले बक्स बाहिरबाट प्रहार गरेको बल डेनिसलाई लाग्दै गोलमा परिणत भएको थियो ।

खेलको १७ औं मिनेटमा कोकेको फ्रिकिक प्रहार पोस्टभन्दा थोरै माथिबाट बाहिरियो भने २५ औं मिनेटमा कोकेकै कर्नरमा सेजार एज्पिलीक्वेटा हेडरलाई सोमरले सहजै बचाए । ३४ औं मिनेटमा कप्तान जेर्दान शाकिरीको कर्नरमा म्यानुएल अकान्जीको हेडरले पोस्टको दिशा लिन सकेन । ३९ औं मिनेटमा शकिरिकै कर्नरमा विडमरले बलसँग राम्रो सम्पर्क गर्न नसक्दा स्विस टोलीले खेलमा फर्कने अवसर गुमायो ।
स्विट्जरल्याण्ड साविक उपविजेता फ्रान्सलाई हराउँदै क्वाटरफाइनलमा प्रवेश गरेको हो । प्रि–क्वाटरफाइनलमा स्विट्जरल्यान्डले फ्रान्सलाई पेनाल्टी सुटआउटमा ५–४ गोल अन्तरले पराजित गरेको थियो । तीन पटकको च्याम्पियन स्पेनले क्रोएसियालाई हराएर अन्तिम आठको यात्रा तय गरेको हो । प्रि–क्वाटरफाइनलमा स्पेनले क्रोएसियालाई अतिरिक्त समयमा ५–३ गोल अन्तरले पराजित थियो ।

भक्तपुर, असार १८
मध्यपुर थिमी नगरपालिका–९, लुखापाटीमा अन्तराष्ट्रियस्तरको जिम्न्यास्टिक कर्भडहल निर्माण हुने भएको छ । कभर्डहल निर्माणका लागि बिहिवार मध्यपुर थिमि नगरपालिका, राष्ट्रिय खेलकुद परिषद र नेपाल जिम्न्यास्टिक संघबीच त्रिपक्षीय सम्झौता भएको छ । सम्झौता पत्रमा मध्यपुर थिमिका नगरप्रमुख मदनसुन्दर श्रेष्ठ, राखेपका सदस्य सचिव रमेश सिलवाल र संघका अध्यक्ष ध्रुवबहादुर प्रधानले हस्ताक्षर गर्नुभएको हो ।

कर्भड हलका लागि नगरपालिकाले जग्गा उपलब्ध गराउने र आवश्यक बजेट राखेप र संघले व्यवस्था गरिने सहमति भएको नगरप्रमुख श्रेष्ठले बताउनुभयो । त्यसका लागि नपाले ३ रोपनी ९ आना क्षेत्रफलको जग्गा उपलब्ध गराईने उहाँले जानकारी दिनुभयो ।
नगरप्रमुख श्रेष्ठले कभर्डहल निर्माणका लागि करिव २५ करोड रुपैंया लाग्ने अनुमान गरिएको जानकारी दिनुभयो । ‘थिमीमा बन्ने अन्तर्राष्ट्रिय स्तरको कर्भडहलका लागि २५ करोड बजेट इष्टिमेड गरिएको छ । बजेट अलि ठूलो रकमको भएपनि आगामी आर्थिक वर्षदेखि हल बनाउने कार्य शुरु हुन्छ,’ प्रमुख श्रेष्ठले भन्नुभयो ।
कभर्डहल निर्माणको सम्झौता पत्रमा हस्ताक्षर गर्नु अघि कभर्डहलको बारेमा विस्तृत प्रस्तुतीकरण समेत गरिएको थियो ।

भक्तपुर, असार १६
युरोपको विभिन्न १० शहरमा जारी १६ औं संस्करणको युरोकप फुटबलको क्वाटरफाइनल समिकरण पुरा भएको छ । प्रिक्वाटरफाइनलको अन्तिम खेलमा मंगलवार राती युक्रेनले स्वीडेनलाई २–१ ले पराजित गरेसँगै युरोकपको क्वाटरफाइनल समिकरण पुरा भएको हो । क्वाटरफाइनलका खेलहरु दुई दिनको विश्रामपछि जुलाई २ बाट शुरु हुनेछ ।
क्वाटरफाइनलमा युक्रेनसँगै डेनमार्क, इटाली, चेक रिपब्लिक, बेल्जियम, स्पेन, स्विट्जरल्यान्ड र इंग्ल्यान्डले स्थान बनाए । प्रिक्वाटरफाइनलका केही अप्रत्यासित नतिजा पनि निस्के । विश्वविजेता फ्रान्स र युरोको साविक विजेता पोर्चुगल प्रिक्वाटरफाइनलबाटै बाहिरियो ।
प्रिक्वाटरफाइनलमा डेनमार्कले वेल्सलाई ४–० ले पराजित गर्दै क्वाटरफाइनलमा स्थान बनाएको हो । त्यस्तै इटालीले संघर्षपुर्ण खेलमा अष्ट्रियालाई अतिरिक्त समयमा २–१ ले पराजित गर्दै क्वाटरफाइनल प्रवेश गरेको हो । प्रतियोगिताको दावेदार मध्येको एक नेदरल्यान्ड्सलाई चेक रिपब्लिकसँग स्तव्ध पार्दै क्वाटरफाइनलमा स्थान बनाए । चेकले दोस्रो हापको शुरुमा १० खेलाडीमा सिमित नेदरल्यान्ड्सलाई २–० ले हराए ।
युरोको साविक विजेता पोर्चुगल बेल्जियमसँग पराजित हुँदै घर फर्कियो । बेल्जियमले १–० को जित दर्ता गर्दै अन्तिम ८ मा पुग्यो । स्पेनले विश्वकपको उपविजेता क्रोएसियालाई अतिरिक्त समयमा ५–३ ले पराजित गर्दै ९ वर्षपछि युरोको क्वाटरफाइनल यात्रा तय ग¥यो ।

विश्वकप विजेता फ्रान्सको यात्रामा पनि स्विट्जरल्यान्डले पूर्णविराम लगाइदियो । एक समय ३–१ को अग्रता लिएको फ्रान्स अन्तिम समयमा सम्हालिन नसक्दा टाइब्रेकरमा हार व्यहोर्दै प्रतियोगिताबाट बाहिरियो । फ्रान्सका युवा फरवार्ड किलीयन एमबाप्पेले पेनाल्टी चुकाएका थिए । प्रिक्वाटरफाइनलको मात्र होइन यसपटकको युरोकपकै सनसनीपुर्ण नतिजा यो खेलको रहेको छ । इंग्ल्यान्डले जर्मनीलाई २–० ले स्तव्ध पार्दै क्वाटरफाइनलमा स्थान बनाए । इंग्ल्यान्डको जितमा कप्तान ह्यारी केन र रहिम स्टर्लिङले गोल गरे ।
युक्रेन क्वाटरफाइनलमा स्थान बनाउने अन्तिम टोली बने । उसले स्वीडेनलाई २–१ ले पराजित गरे । खेलको करिव करिव अन्तिम क्षणमा वैकल्पिक फरवार्ड आर्टेम दोभ्बिकले गोल गरेपछि युक्रेनले स्वीडेनलाई २–१ ले पराजित गर्दै युरोको क्वाटरफाइनलमा स्थान बनाएको हो ।

आक्रमक शुरुवात गरेको स्वीडेनलाई युक्रेनको डिफेन्स र गोलरक्षकको संयमित प्रदर्शनले अग्रता बनाउन रोकेको थियो । खेलको २७ औं मिनेटमा युक्रेनले ओलेक्जान्दर जिन्चेन्कोको गोलमा अग्रता लियो । पेनाल्टी क्षेत्रको दायाँ भागबाट कप्तान आन्द्रे यार्मालेन्कोले आउटसाइड फुटबाट दिएको क्रसलाई बायाँ विंगबाट जिन्चेन्कोले गोल गरेका थिए ।
खेलको ४२ औं मिनेटमा फोर्सबर्गले गोल गर्दै स्वीडेनलाई खेलमा फर्काए । उनले पेनाल्टी क्षेत्र बाहिरबाट गरेको प्रहार डिफेन्डरलाई डिफ्लेक्ट हुँदै गोलमा परिणत भएको थियो ।
दोस्रो हाफमा दुवै टोलीले एकपछि अर्को आक्रमण गरेपनि गोल गर्न नसक्दा खेल अतिरिक्त समयमा लम्बिएको थियो । अतिरिक्त समयको पहिलो हाफमा स्वीडेन १० खेलाडीमा समेटिएपछि युक्रेनले खेलमा दवाब बढाए ।
खेल ट्राइब्रेकरतर्फ लम्कँदै गर्दा अतिरिक्त समयको दोस्रो हापको इन्ज्युरी समयमा दोभ्बिकले गोल गर्दै युक्रेनलाई जित दिलाए । उनले जिन्चेन्कोको क्रसमा गोल गर्दै युक्रेनलाई पहिलो पटक क्वाटरफाइनलमा युरोकपको पुर्याए ।
क्वाटरफाइनलका खेलहरु जुलाई २ देखी शुरु हुनेछ । क्वाटरफाइनलको पहिलो खेलमा स्विट्जरल्यान्ड र स्पेन भिड्नेछन । सेन्ट पिटर्सवर्गमा हुने खेल नेपाली समयअनुसार राती ९ः४५ बजे हुनेछ । इटालीले बेल्जियमको सामना गर्नेछ । जुलाई २ मा यो खेल म्युनिखमा राती नेपाली समयअनुसार १२ः४५ बजे हुनेछ ।
चेकले जुलाई ३ मा डेनमार्कविरुद्ध खेल्नेछ । खेल बाकुमा राती ९ः४५ बजे हुनेछ । क्वाटरफाइनलको अन्तिम खेलमा युक्रेनले इंग्ल्यान्डको सामना गर्नेछ । रोममा हुने यो खेल राती १२ः४५ बजे हुनेछ ।

भक्तपुर, असार १५

इंग्ल्यान्ड युरोकप २०२० को क्वाटरफाइनलमा प्रवेश गरेको छ । प्रतियोगिताको मंगलवार राती घरेलु मैदान वेम्बलीमा सम्पन्न खेलमा इंग्ल्यान्ड जर्मनीलाई २–० गोलले पराजित गर्दै क्वाटरफाइनल प्रवेश गरेको हो ।

इंग्ल्यान्डको जितमा रहिम स्टर्लिङ र ह्यारी केनले गोल गरे । पहिलो हाप बराबरीमा सकिएको खेलको ७५ औं मिनेटमा स्टर्लिङले गोल गर्दै इंग्ल्यान्डलाई अग्रता दिलाए ।

स्टर्लिङले मैदानको मध्यभागबाट तिब्र गतिमा बल अगाडि बढाउँदैं आफैंले बुनेको अवसरमा केन र ग्रिलिस हुँदै लुक शाको अन्तिम क्रसलाई गोलमा परिणत गरेका थिए । शाले बायाँ विंगबाट गरेको लो क्रसमा दुई डिफेन्डरसँगै गोलरक्षक नोएरलाई बिट गर्दै स्टर्लिङले गोल गरेका थिए ।

खेलको ८१ औं मिनेटमा जर्मनीले बराबरी गोल गर्ने सुवर्ण अवसर गुमाए । स्टर्लिङले दिएको निकै खराब ब्याक पासलाई हाभर्ट्जले नियन्त्रणमा लिँदै उपलब्ध गराएको बलमा थोमस मुलरले एक्लै अघि बढाउँदै वन भर्सेस वनको स्थितिमा गरेको अन्तिम प्रहार पोस्टभन्दा बाहिर जाँदा जर्मनी बराबरी गर्नबाट चुकेको थियो ।

खेलको ८६ औं मिनेटमा इंग्ल्यान्ड अग्रता दोब्बर पार्दै जित नजिक पुगे । शाले मिडफिल्डमा गनाब्रीबाट बल खोस्दै ग्रिलिसलाई पास दिए । ग्रिलिसको क्रसमा कप्तान केनले डाइभिङ हेड गर्दै बललाई जाली चुमाए र इंग्ल्यान्डलाई २–० को जित दिलाए । केनको जारी युरोमा यो पहिलो गोल हो ।

खेलमा दुवै टोलीले आक्रमक खेल पस्केको थियो । खेलको पहिलो हापमा दुवै टोलीले गोलका केही सुन्दर अवसर खेर फालेका थिए भने केही अवसरमा गोलकिपर बाधक बने । खेलको १६ औं मिनेटमा कप्तान म्यानुएल नोएरले सुन्दर बचाउ गर्दै इंग्ल्यान्डलाई अग्रता लिनबाट रोके । रहिम स्टर्लिङले पेनाल्टी क्षेत्र बाहिरबाट गरेको प्रहारलाई नोएरले आफ्नो बायाँतर्फ डाइभ दिँदै विफल पारेका थिए ।

ह्यारी मगाएरको २७ औं मिनेटमा गरेको हेडरले पोस्टको दिशा लिन सकेन । खेलको ३२ औं मिनेटमा जर्मनीका काइ हाभर्ट्जको पासमा टिमो वेर्नरले वन भर्सेस वनको स्थितिमा पेनाल्टी क्षेत्र भित्रबाट गरेको प्रहारलाई इंग्ल्यान्डका किपर पिकफर्डले विफल पारे ।

पहिलो हापको इन्ज्युरी समयमा इंग्ल्यान्डका कप्तान ह्यारी केनले अग्रता लिने अवसर सदुपयोग गर्न सकेनन् । स्टर्लिङले अघि बढाएको आक्रमणमा पेनाल्टी क्षेत्रभित्र अनमार्क रहेका केनले पहिलो टच नै खराब गरेपछि जर्मन डिफेन्सले बल क्लियर गरेर इंग्ल्यान्डलाई अग्रता लिन रोकेका थिए । इंग्ल्यान्ड ३–४–३ को सेट मैदानमा उतार्दै आक्रमक रणनीति बनाएको थियो भने जर्मनीले ३–४–२–१ सेट मैदानमा उतारेको थियो ।

भक्तपुर, असार १५
विश्व विजेता फ्रान्स युरोकप २०२० बाट प्रिक्वाटरफाइनलबाटै बाहिरिएको छ । रोमानियाको बुकारेस्टमा सोमवार राती भएको खेलमा फ्रान्स स्विट्जरल्यान्डसँग ट्राईब्रेकरमा पराजित हुँदैं प्रिक्वाटरफाइनलबाटै बाहिररिएको हो ।
निर्धारित ९० मिनेट र थप गरिएको अतिरिक्त ३० मिनेटमा पनि ३–३ को बराबरी भएपछि खेल टाइब्रेकरमा पुगेको थियो । फ्रान्सलाई विश्वकपको उपाधि दिलाउन उत्कृष्ट खेल प्रदर्शन गरेका युवा फरवार्ड केलियन एमबाम्पे पेनाल्टीमा गोल गर्न चुक्दा फ्रान्स युरोकपबाट बाहिरिएको हो ।

फ्रान्सका लागि पाँचौ प्रहार गर्न आएका युवा स्टार एमबाप्पेको पेनाल्टीलाई गोलरक्षक यान सोमरले विफल पारेपछि स्विट्जरल्यान्ड ऐतिहासिक जित निकाल्दै युरोकपको क्वाटरफाइनल प्रवेश गरेको हो । टाइब्रेकरमा स्विट्जरल्यान्डका सबै ५ खेलाडीले गोल गरेका थिए ।
स्विट्जरल्यान्डका मारियो गाभ्रानोभिच, फाबियन, अकान्जी म्यानुएल, रुबेन भेर्गास र एडमिर मेहमेदीले पेनाल्टीमा गोल गरे । फ्रान्सका पाउल पोग्बा, ओलिभर जिराउड, मार्कुस थुराम र प्रेसनल किम्पेम्बेले गोल गरे ।
स्विट्जरल्यान्डको यो युरो कपको इतिहासमा नकआउट चरणको पहिलो जित हो । यसअघि तीन पटक ट्राइब्रेकरमा पराजित स्विट्जरल्यान्डको यो पहिलो ट्राइब्रेकर जित पनि हो । फ्रान्सको भने सातौंपटक टाइब्रेकरमा पुग्दा यो चौथो हार हो ।

खेलमा स्विट्जरल्यान्डले अग्रता लिएको थियो । पहिलो हाफमा औसत प्रदर्शन गरेको फ्रान्स हरिस सेफेरोभिचको गोलमा पछि परेको थियो । खेलको १५ औं मिनेटमा हरिस सेफेरोभिचले स्टेभन जुबरको पासमा हेडरमार्फत उत्कृष्ट गोल गर्दै स्विट्जरल्यान्डलाई अग्रता दिलाएका थिए ।
पहिलो गोलमा गल्ती गरेका लेंगलेटलाई दोस्रो हापमा फ्रान्सले परिवर्तन गर्दै उनको स्थानमा किंग्सले कोमानलाई मैदान पठाउँदै आक्रामक रणनीति अपनाए । फ्रान्सले एक गोलले पछि परेको अवस्थामा दोस्रो हापमा लगातार ३ गोल गर्दै खेलमा एक समय ३–१ को अग्रता बनाएको थियो ।
एक गोलले पछि परेको फ्रान्समाथि खेलको ५५ औं मिनेटमा अर्को संकट आइलाग्यो । फ्रान्सका बेन्जामिन पाभार्डले जुबरलाई पेनाल्टी क्षेत्रभित्र लडाएको भन्दै भीएआरले पेनाल्टी दिएपछि फ्रान्स थप दवाबमा परेको थियो । तर रिकार्डो रोड्रीग्वेजले प्रहार गरेको पेनाल्टीलाई कप्तान लोरिसले विफल पार्दै फ्रान्सलाई थप संकटबाट जोगाए ।
स्विट्जरल्यान्डले पेनाल्टीमा अग्रता दोब्बर पार्ने सुवर्ण अवसर खेर फालेपछि फ्रान्सले लगातार गोल गर्दै खेलमा पकड जमायो । पेनाल्टीमा चुकेको २ मिनेट नबित्दै स्विट्जरल्यान्डले गोल खान पुग्यो । करिम बेन्जेमाले पेनाल्टी क्षेत्रभित्र उत्कृष्ट बल नियन्त्रण र फिनिसको नमुना प्रस्तुत गर्दै फ्रान्सलाई बराबरीमा ल्याएका थिए । उनले किलियन एमबाप्पेले आफ्नो पछाडीबाट दिएको पासलाई उत्कृष्ट ढंगले पहिलो टचमा नियन्त्रण गर्दै दोस्रो टचमा गोलरक्षकलाई बिट गर्दै गोल गरेका थिए ।

बराबरी गरेको दुई मिनेटपछि बेन्जेमाले नै फ्रान्सलाई अग्रता दिलाए । खेलको ५९ औं मिनेटमा बेन्जिमाले व्यक्तिगत दोस्रो गोल गर्दा फ्रान्सले २–१ को अग्रता बनायो । उनले एन्टोनियो ग्रीजम्यानको पासमा हेड मार्फत गोल गरे । अघिल्लो गोलमा देखिएको एमबाप्पे, बेन्जेमा र ग्रिजमन बीचको साझेदारी यस गोलमा पनि निर्णायक बनेको थियो ।
खेलको ७५ औं मिनेटमा पाउल पोग्बाले गोल गर्दै फ्रान्सलाई ३–१ गोलको अग्रता दिलाए । पोग्बाले बक्स बाहिरबाट विश्वस्तरीय गोल गर्दै फ्रान्सको अग्रता दोब्बर पारे । पेनाल्टी क्षेत्रको बाहिरबाट पोग्बाले गरेको प्रहार टप कर्नरमा गोल भएको थियो । गोलरक्षक यान सोमरले डाइभ दिएपनि उक्त बलसम्म पुग्न सकेनन् ।

तर ८१ औं मिनेटमा सेफेरोभिचले व्यक्तिगत दोस्रो गोल गर्दै फ्रान्समाथि दवाब बढाए । केभिन एम्बाबुको क्रसमा सेफेरोभिचले हेडरमार्फत गोल गर्दै खेल ३–२ को स्थितिमा ल्याएका थिए ।
खेलको ९० औं मिनेटमा दृष्यमा देखिए गाभ्रनोभिच । शाकिरीको स्थानमा ७४ औं मिनेटमा मैदान प्रवेश गरेका उनले कप्तान ग्रानिटको पासमा गोल गर्दै स्विटजरल्यान्डलाई खेलमा मात्र फर्काएन खेललाई अतिरिक्त समयमा धकेल्यो ।
अतिरिक्त समयमा केही मुभ बनेपनि दुवै टोलीले गोल गर्न सकेन । ९५ औं मिनेटमा पाभार्डको प्रहारलाई गोलरक्षक सोमरले विफल पारे । ९८ औं मिनेटमा कोमनको प्रहार पोस्टको बाहिरि भागमा लाग्दा फ्रान्सले अग्रता लिन चुक्यो । १ सय ९ औं मिनेटमा एमबाप्पेले अवसर सदुपयोग गर्न सकेनन् । पोग्बाको पासबाट वन भर्सेस वनको स्थितिमा उनको खराब प्रहारले गोलरक्षकलाई कुनै समस्या दिन सकेन ।

खेलको १ सय १३ औं मिनेटमा पोग्बाको पासमा मार्कस थुरामले दिएको क्रसलाई जिरुडले पोस्टतर्फ प्रहार गरेपनि एमबाप्पेलाई लाग्दै बल बाहिरिएको थियो । १ सय १९ औं मिनेटमा जिरुडको हेडरलाई सोमरले बचाउँदै फ्रान्सलाई अघि बढ्न दिएन र खेल टाइब्रेकरमा पुगयो ।
टाइब्रेकरमा पहिलो प्रहार गरेको स्विट्जरल्यान्डका लागि मारिओ ग्राभानोभिच, फाबियन सेर, म्यानुएल अकान्जी, रुबेन भार्गास र आदमिर मेहमेदी सबैले गोल गरे । फ्रान्सका लागि पल पोग्बा, ओलिभिएर जिरुड, मार्कस थुराम र प्रेस्नेल किम्पेम्बे गोल गरेपनि पाँचौ प्रहार गर्न आएका एम्बाप्पे गोल गर्न चुके ।
उनको प्रहारलाई गोलरक्षक यान सोमरले विफल पार्दै स्विटरजरल्यान्डलाई ६७ वर्षपछि पहिलो पटक मुख्य प्रतियोगिताको क्वाटरफाइनलमा पुर्याए । यस अघि स्विट्जरल्यान्ड १९५४ को विश्वकपमा क्वाटरफाइनल पुगेको थियो ।

भक्तपुर, असार १५
रोमाञ्चक र सनसनपुर्ण खेलमा तीन पटकको च्याम्पियन स्पेन क्रोएसियालाई ५–३ गोलले पराजित गर्दै १६ औं संस्करणको युरोकप फुटबलको क्वाटरफाइनलमा प्रवेश गरेको छ । डेनमार्कको कोपनहेगनस्थि पार्केन रंगशालामा सोमबार राती सम्पन्न खेलमा स्पेनलाई जित दिलाउन पाब्लो सराबिया, सिजर अज्पिलिकुइटा, फेरान टोरेस, अल्भारो मोराटा र मिकेल ओयार्जाबलले एक एक गोल गरे । क्रोएसियाका मिस्लाभ ओर्सिच र मारियो पासालीचले एक एक गोल गर्दा एक गोल आत्मघाती उपहार पाए ।
खेलमा स्पेन हावी भएपनि अग्रता भने क्रोएसियाले लिए । खेलको शुरुवातदेखी नै क्रोएसियालाई दवाबमा राखेको स्पेनले एकपछि अर्को आक्रमण गरेपनि फिनिसिङ गर्न सकेको थिएन । यस्तैमा खेलको २० औं मिनेटमा स्पेनले उल्टै गोल खान पुग्यो । क्रोएसियाले २० औं मिनेटमा आत्मघाती गोल उपहार पाएर खेलमा महत्वपूर्ण अग्रता बनाए ।
पेड्रीको ब्याक पासमा स्पेनका गोलकिपर उनाई सिमोनले आत्मघाती गोल गरेका थिए । पेड्रीले मैदानको बीच भागबाट आफ्नो गोलरक्षक उनाइ सिमोनलाई व्याप पास दिएका थिए । गोलरक्षक सिमोनको ठिक अगाडि झरेको बल उनको खुट्टालाई छुँदै पोस्टमा छिरेको थियो । युरोको यस संस्करणमा यो नवौं आत्मघाती गोल हो भने आत्मघाती गोल गर्ने सिमोन चौंथो गोल किपर हुन् ।

अप्रत्यासितरुपमा एक गोलले पछि परेको स्पेनले खेलको ३८ औं मिनेटमा बराबरी गोल गरे । अल्भारो मोराटाको प्रहार क्रोएसियाका गोलकिपर डोमिनिकले रोकेपछि प्राप्त रिबाउन्डमा सराबियाले गोल गर्दै स्पेनलाई १–१ गोलको बराबरीमा ल्याए ।
पहिलो हाप १–१ को बराबरीमा सकिएको खेलको दोस्रो हापमा पनि स्पेनले आक्रमक शुरुवात गरे । परिणाम खेलको ५७ औं मिनेटमा स्पेनले सफलता प्राप्त गरे । अज्पिलिकुइटाले गोल गर्दै ५७ औं मिनेटमा स्पेनलाई २–१ को अग्रता दिलाए । उनले फेरान टोरेसको क्रसमा हेडमार्फत गोल गरेका हुन् ।
६६ औं मिनेटमा आन्टे रेबिचको प्रहारलाई गोलरक्षक सिमोनले सानदार बचाउ गरे । पेनाल्टी क्षेत्रको ठिक भित्रबाट उनले गरेको शक्तिशाली प्रहारलाई सिमोनले आफ्नो बायाँतर्फ डाइभ गर्दै बचाएर खेल बराबरी हुन बाट जोगाए ।
खेलको ७२ औं मिनेटमा स्पेनले अग्रता दोब्बर पारेपनि भीएआरले गोललाई मान्यता दिएन । मोराटाले सहज गोल गरेपनि उनी बल आउनुअघि नै गोललाइन नजिक रहेकाले भीएआरले अफसाइडको निर्णय दिएको थियो ।
खेलको ७७ औं मिनेटमा फेरान टोरेसले गोल गर्दै स्पेनलाई ३–१ को अग्रता दिलाए । उनले पाउ टोरेसको लामो पासलाई पेनाल्टी क्षेत्रभित्र उत्कृष्ट ढंगले नियन्त्रणमा लिँदै गोलरक्षक लिभाकोभिचलाई बिट गर्दै गोल गरेका थिए ।
स्पेन जितको नजिक पुगेको बेला वैकल्पिक खेलाडीकोरुपमा मैदान प्रवेश गरेका क्रोएसियाका मिस्लाभले खेलको नक्सा बदले । उनले खेलको ८५ औं मिनेटमा गोल गर्दै स्पेनमाथि दवाब बनाए । उनी ६७ औं मिनेटमा एन्टी रेबिकको स्थानमा मैदान प्रवेश गरेका थिए ।

मैदानको ६ यार्ड बक्सभित्र लगातार एकपछि अर्को क्रोएसियाली खेलाडीको प्रहारलाई स्पेनिस रक्षकहरुले रोकेपनि भिडियो असिस्टेन्ट रेफ्रीले मिस्लाभ ओर्सिचको प्रहारलाई एज्पिलीक्वेटाले पोस्टभित्र छिरेर रोकेपछि गोलको मान्यता दिएका थिए ।
खेलको इन्जुरी समयको दोस्रो मिनेटमा क्रोएसियाका अर्को वैकल्पिक खेलाडी मारियोले गोल गर्दै खेल ३–३ को बराबरीमा ल्याए । उनले मिस्लाभको पासमा हेडरमार्फत गोल गरेका थिए । मारियो ७९ औं मिनेटमा निकोलाको स्थानमा मैदान प्रवेश गरेका थिए ।

निर्धारित समय ३–३ गोलको बराबरीमा सकिएपछि खेल अतिरिक्त समयमा गयो । अतिरिक्त समयको ३० मिनेटमा स्पेनले २ गोल गर्न सफल भयो र खेल ५–३ ले आफ्नो पक्षमा पार्दै क्वाटरफाइनलमा प्रवेश ग¥यो ।
स्पेनका लागि खेलको १०० औं मिनेटमा मोराटाले गोल गर्दै ४–३ को अग्रता दिलाए । ड्यानी ओल्मोले दायाँ विंगबाट दिएको क्रस डिफेन्डरले भेट्न नसक्दा मोराटाले पहिलो टचमा बललाई नियन्त्रणमा राख्दै हाफ भलीमा सुन्दर गोल गरे । उनको शक्तिशाली प्रहारलाई लिभाकोभिचले जोगाउने कुनै अवसर नै पाएनन् ।
खेलको १ सय ३ औं मिनेटमा मिकेल ओयाराज्बालले पेनाल्टी क्षेत्रभित्र संयमित रहेर फिनिस गर्दै स्पेनलाई ५–३ ले अघि बढाएका थिए । अफसाइड ट्रयाप बिट गर्दै अघि बढेका ओल्मोले दिएको लो क्रसलाई ओयाराज्बालले राम्रो फिनिस गरेका थिए ।
यससँगै स्पेन क्वाटरफाइनलमा पुग्ने पाँचौं टिम बनेको छ । अब स्पेनले अन्तिम आठमा स्विट्जरल्यान्डसँग खेल्नेछ । स्पेनले समूह ’ई’ बाट उपविजेता बन्दै नकआउट चरणमा स्थान बनाएको थियो । समूह चरणमा स्पेनले ३ खेलमा ५ अंक जोडेको थियो । क्रोएसियाले समूह ’डी’ बाट उपविजेता बन्दै अन्तिम १६ मा स्थान पक्का गरेको थियो । क्रोएसियाले ३ खेलमा ४ अंक जोडेको थियो ।

भक्तपुर, असार १४
उपाधि दाबेदार मध्ये एक नेदरल्यान्ड्सलाई स्तब्ध पार्दै चेक रिपब्लिक र साविक विजेता पोर्चुगललाई पराजित गर्दै बेल्जियम युरोकप २०२० को क्वाटरफाइनलमा प्रवेश गरेको छ । चेकले नेदरल्यान्ड्सलाई २–० र बेल्जियम पोर्चुगललाई १–० ले पराजित गर्दै क्वाटरफाइनलमा प्रवेश गरेको हो ।
हंगेरीको पुस्कास एरिनामा आइतवार राती सम्पन्न रोमाञ्चक खेलमा चेकलाई जित दिलाउन टोमस होल्स र प्याट्रिक सिकले एक एक गोल गरे । टोमसले खेलको ६८ औं मिनेटमा टोमस कालसको पासमा हेडमार्फत गोल गर्दै चेकलाई अग्रता दिलाएका थिए । चेकले खेलको ८० औं मिनेटमा अग्रता दोब्बर पारे । टोमस होल्सको पासमा प्याट्रिकले गोल गर्दै चेकको जित पक्का गरेका थिए ।

खेलको पहिलो हाप गोलरहित बराबरीमा सकिएको थियो । रोमाञ्चक खेलमा दुवै टोलीले केही अवसर सिर्जना गरेपनि पहिलो हापमा दुवै टोलीले गोल निकाल्न सकेन । प्रतिष्पर्धात्मक खेलको ५२ औं मिनेटमा नेदरल्यान्ड्सका मालेन गोलकिपरसँगको वान भर्सेस वानमा गोल गर्नबाट चुके । पुरा खेलको नक्सा यहीबाट बदलियो । चेकको जितमा मालेनको अवसर खेर जानु टर्निङ प्वाइन्ट बन्यो ।

डिपायोको चलाखीपूर्ण फ्लिकमा मालेनले दुई डिफेन्डरको बीचबाट बल अगाडि बढाएर गोल किपर अघि बढेको मौकामा पनि वान भर्सेस वानमा गोल गर्न चुकेका थिए । त्यसको लगत्तै चेकले आक्रमण बुन्यो । तर नेदरल्यान्ड्सका खेलाडीले हातले बल रोकेपछि रेफ्रिले भिएआरको सहायताले रातोकार्ड दिए । खेलको ५५ औं मिनेटमा डिफेन्डर म्याथिस डी लिग्टले रातो कार्ड पाए । बक्स बाहिर हातले बल रोकेपछि रेफ्रीले भीएआरको सहायताबाट उनलाई रातो कार्ड दिएर मैदानबाट बाहिर पठाएका थिए । भीएआर अघि उनलाई पहिलो कार्ड मात्र दिईएको थियो ।
नेदरल्यान्ड्स १० खेलाडीमा समेटिएपछि चेकले त्यसको फाइदा उठाउँदैं लगातार आक्रमण बुन्यो र दुई गोल निकाल्दै प्रतियोगिताको क्वाटरफाइनलमा प्रवेश ग¥यो ।
त्यसैगरी आइतवार राती नै सम्पन्न अर्को खेलमा साविक विजेता पोर्चुगललाई पराजित गर्दै बेल्जियम युरोकपको क्वाटरफाइनलमा प्रवेश ग¥यो । सेभियास्थित स्टाडियो ला कुर्ट्जा स्टेडियममा बेल्जियमलाई जित दिलाउन थोर्गन हाजार्डले निर्णायक गोल गरे । खेलको ४२ औं मिनेटमा हाजार्डले बेल्जियमका लागि निर्णायक गोल गरेका हुन् । थोमस मुनिएरको पासमा उनले बक्स बाहिरबाट उत्कृष्ट गोल गरे ।

दोस्रो हाफमा सुधारिएको प्रदर्शन गरेपनि पोर्चुगल खेलमा फर्कन सकेन । पहिलो हाफमा पनि केहि अवसर सिर्जना गरेको पोर्चुगलसामु बेल्जियमको डिफेन्स निकै बलियो देखिएको थियो । पोर्चुगलको पटक पटकको आक्रमण बेल्जियमका गोलकिपर थोबाउट कोर्टुवाले बचाएका थिए ।

यससँगै बेल्जियम क्वाटरफाइनलमा पुग्ने चौंथो टिम बनेको छ । अब बेल्जियमले क्वाटरफाइनलमा इटालीसँग प्रतिस्पर्धा गर्नेछ । अष्ट्रियालाई अतिरिक्त समयमा २–१ ले हराउँदै इटालीले अन्तिम आठको यात्रा पक्का गरेको थियो । फिफा वरीयताको शीर्ष स्थानमा रहेको बेल्जियम समूह चरणका तीनै खेलमा जित निकाल्दै समूह विजेताकोरुपमा नकआउट चरणमा प्रवेश गरेको थियो ।