भक्तपुर, साउन १३
जापानमा जारी टोकियो ओलम्पिकमा पौडीका एलेक्जेन्डर गाडेगार्ड शाह (एलेक्स) ले राष्ट्रिय कीर्तिमान बनाएका छन् ।
टोकियो एक्वेटिक सेन्टरमा मंगलबार एलेक्सले पुरुषको १ सय मिटर फ्रीस्टाइलमा राष्ट्रिय कीर्तिमान बनाएका हुन् ।
हिट चरणमा एलेक्सले ५३.४१ सकेन्डको समय निकाले । एलेक्स आफ्नो हिट–१ मा शीर्ष स्थानमा रहे । ७ खेलाडी रहेको यस हिटमा एलेक्स छैटौं लेनमा रहेका थिए ।
भक्तपुर, साउन १२
टोकियो ओलम्पिकमा आज नेपालका पौडी खेलाडी एलेक्जेन्डर (एलेक्स) शाहले प्रतिस्पर्धा गर्दैछ । एलेक्सले पुरुषको १ सय मिटर फ्रीस्टाइलमा प्रतिस्पर्धा गर्नेछन् । उनको खेल नेपाली समय अनुसार दिउँसो ३ बजेर ४५ मिनेटमा हुनेछ ।
टोकियो एक्वेटिक सेन्टरमा हुने प्रतिस्पर्धामा एलेक्स हिट १ मा रहेका छन् । ७ खेलाडी रहेको यस हिटमा एलेक्स छैटौं लेनमा रहेका छन् । एलेक्स रहेको हिट १ मा प्यालेस्टाइन, भुटान, माल्दिभ्स, कोसोभो, गुएना र सोलोमोन आइसल्याण्डका खेलाडी रहेका छन् ।
टोकियो ओलम्पिकमा पौडीका अर्का खेलाडी गौरिका सिंहले बुधवार महिला १ सय मिटर फ्रीस्टाइलमै प्रतिस्पर्धा गर्नेछिन् ।
भक्तपुर, साउन १०
दक्षिण एसियाली फुटबल महासंघ (साफ) च्याम्पियनसिप आयोजनाका लागि नेपालले औपचारिक प्रस्ताव पाएको छ । साफको शुक्रवार बसेको बैठकमा आयोजक बंगलादेशले कोरोना संक्रमणका कारण प्रतियोगिता आयोजना गर्न नसकिने औपचारिक जानकारी दिएपछि नेपाललाई आयोजना गर्न प्रस्ताव गरेको हो ।
बैठकमा नेपालसहित भारत र माल्दिभ्सले पनि आयोजनाको दावेदारी प्रस्तुत गरेको थियो । सो अनुसार आज साफले नेपाललाई प्रतियोगिता आयोजना गर्न प्रस्ताव गरेको अखिल नेपाल फुटबल संघ (एन्फा)का महासचिव इन्द्रमान तुलाधरले जानकारी दिए ।
आगामी अक्टोवरमा हुने प्रतियोगितामा ५ टोलीको मात्र सहभागिता रहने सम्भावना रहेको छ । पाकिस्तानले फिफाको प्रतिबन्धका कारण सहभागिता जनाउने पाउने छैन । कोरोना संक्रमणका कारण भुटानमा देशबाहिर जान प्रतिबन्ध छ । सोही कारण भुटानको सहभागिता अनिश्चित छ ।
भक्तपुर, साउन १०
नेपाली राष्ट्रिय फुटबल टिमका मुख्य प्रशिक्षक अब्दुल्लाह अल्मुताइरीले राजीनामा दिने भएका छन । उनले सामाजिक सञ्जाल फेसबुकमार्फत राजीनामा दिने लागेको जानकारी दिएको हो ।
अल्मुताइरीले अखिल नेपाल फुटबल संघ (एन्फा)का वरिष्ठ उपाध्यक्ष पंकज विक्रम नेम्वाङका कारण राजीनामा दिन लागेको बताए । उनले विगत ३ हप्तादेखी दैनिकरुपमा नेम्वाङले समस्यामा पार्ने गरेको आरोप लगाएका छन ।
भक्तपुर, साउन ९
जापानमा जारी टोकियो ओलम्पिक २०२० मा शनिवार नेपालका दुई खेलाडीले प्रतिष्पर्धा गरेका छन तर दुवै जना पहिलो चरणबाटै बाहिरिएका छन ।
ओलम्पिकमा नेपालकी कल्पना परियारले सुटिङको महिला १० मिहटर एयर राइफल इभेन्टमा प्रतिष्पर्धा गरेका थिए भने जुडोकी सोनिया भट्ट महिला ४८ के जी तौल समूहमा प्रतिष्पर्धा गरेका थिए ।
कल्पनाले उत्कृष्ट प्रदर्शन गर्दै राष्ट्रिय कीर्तिमान कायम गरिन । उनले छनोट चरणमा ६ सय १६.८ स्कोर बनाउँदै कीर्तिमान राखेकी हुन् । उनले यसअघि १३ औं दक्षिण एसियाली खेलकुदमा आफैंले बनाएको ६ सय १४.५ स्कोरको राष्ट्रिय किर्तिमान तोडेकी हुन ।
कल्पनाले पहिलो सिरिजमा १०२.२, दोस्रोमा १०५.४ तथा तेस्रोमा १०१.१ स्कोर गरेकी थिइन् । चौथोमा १०४.१ र पाँचौमा १०३.४ स्कोर गरेकी कल्पनाले अन्तिम सिरिजमा भने कमजोर प्रदर्शन गरिन् । अन्तिम सिरिजको पाँचौ प्रहारमा ८.८ स्कोर हुँदा समग्रमा जम्मा १००.७ स्कोर जोडिन् । समग्रमा ६ सय १६.८ स्कोरसहित उनी राष्ट्रिय कीर्तिमान कायम गर्न भने सफल भइन् ।
आसाका सुटिङ रेन्जमा भएको खेलमा कल्पना समग्रमा ४६ औं स्थानमा रहन सफल भइन । इभेन्टमा ५० जनाको सहभागिता थियो । कल्पनाले बोस्निया, किर्गिस्तान, श्रीलंका र शरणार्थी टोलीका खेलाडीलाई पछि पारेकी हुन् ।
छनोटबाट शिर्ष ८ मा रहने खेलाडीहरुले मात्र फाइनल खेल्न पाउने छन । छनोटमा नर्वेकी हेग दुस्तादले ६ सय ३२.९, दक्षिण कोरियाकी पार्क हिमुन ६३१.७, अमेरिकी मेरी टकर ६३१.४, दक्षिण कोरियाकै यूंजी क्वोन ६३०.९, फ्रान्सेली ओसिएन मुलर ६३०.७, चीनकी किआन याङ ६२८.७, स्विस निना क्रिस्तिएन र आरओसीकी अनास्तासिया गलाशिना ६२८.५ ले पदकका लागि प्रतिस्पर्धा गर्नेछन् ।
त्यसैगरी जुडो खेलाडी सोनिया भट्ट पहिलो खेलमै पराजित भएकी छिन् । सोनिया राउण्ड अफ ३२ अन्तर्गतको खेलमा रुसी खेलाडी डोल्गोभा इरिनासँग पराजित भएकी हुन् ।
१९ वर्षीय सोनिया विश्व वरीयताको नवौं स्थानमा रहेकी रुसी खेलाडी इरिनासँग इप्पोनको आधारमा पराजित भईन् । सोनियाले १ मिनेट १६ सेकेण्डमै खेल गुमाएकी थिइन् । सोनिया वाइल्ड कार्ड प्राप्त गर्दै ओलम्पिकमा छनोट भएकी हुन् ।
सोनिया नेपालमा आयोजना भएको १३ औं सागकी कास्यधारी खेलाडी हुन् । सोनियाले महिला ४८ केजीमुनि कास्य जितेकी थिइन् । उनी विश्व जुडो च्याम्पियनसिपमा एक बाउट जित्ने पहिलो नेपाली खेलाडी हुन् ।
भक्तपुर, असार २८
इंग्ल्यान्डलाई उसैको मैदानमा पराजित गर्दै इटाली युरोपियन च्याम्पियन बनेको छ । लन्डनको वेम्बली स्टेडियममा सोमवार बिहान सम्पन्न युरोकप २०२० को फाइनलमा इटाली टाईब्रेकरमा इंग्ल्यान्डलाई ३–२ ले पराजित गर्दै युरोपियन च्याम्पियन बनेको हो ।
टाईब्रेकरमा इंग्ल्यान्डका तीन खेलाडीले गोल गर्न इटाली युरोपियन च्याम्पियन बनेको हो । इटालीले सन् १९६८ पछि पहिलो पटक युरोकपको उपाधी उचालेको हो । इटालीले पछिल्लो पटक सन् १९६८ मा पुनः खेलाईएको फाइनलमा युगोस्लाभियालाई २–० ले पराजित गर्दै युरोकप जितेको थियो । अतिरिक्त समयमा लम्बिएको पहिलो फाइनल १–१ को बराबरीमा सकिएपछि पुनः खेलाईएको थियो ।
पहिलो पटक युरोकपको फाइनलमा पुगेको इंग्ल्यान्डलाई उपाधीबाट विमुख बनाउन मार्कुस राषफोर्ड खलनायक बने । पेनाल्टीमा उनको प्रहार पोष्टमा लागेर फर्किँदा इंग्ल्यान्ड हारको आधार बनेको थियो ।
इटालीलाई ५२ वर्ष पछि युरोपियन च्याम्पियन बनाउन टाईब्रेकरमा इटालीका डोमिनिको बेरार्डी, लियोनार्दो बुनिची र फेडेरिको बेर्नाडेस्चीले गोल गरे । आन्द्रे बेलोट्टी र जोर्गिन्होको प्रहार इंग्ल्यान्डका गोलकिपर जोर्डन पिकफोर्डले रोकेका थिए ।
इंग्ल्यान्डका ह्यारी केन र ह्यारी मग्वाएरले मात्र गोल गरे । तर, मार्कुस राषफोर्डको प्रहार पोस्टमा लागेर फर्कदा जाडोन सान्चो र साका बाकुयोको प्रहार इटालीका गोलकिपर जियानलुइजी डोनारुम्माले रोकेका थिए ।
यसअघि निर्धारित ९० मिनेटको समय १–१ को बराबरी र थप ३० मिनेटमा गोल हुन नसक्दा खेल टाइब्रेकरमा पुगेको थियो । खेलमा शुरुवाती अग्रता इंग्ल्यान्डले बनाएको थियो । खेलको दोस्रो मिनेटमा लुक शले गोल गर्दै इंग्ल्यान्डलाई अग्रता दिलाएका थिए । उनले किएरन ट्रिपिएरको क्रसमा वान टच गोल गरे ।
तर, खेलको ६७ औं मिनेटमा लियोनार्दो बुनिचीले गोल गर्दै इटालीलाई १–१ गोलको बराबरीमा फर्काए । मार्को भेराट्टीको हेडर पोस्टमा लागेर फर्किएको बलमा उनले गोल गरेका थिए । निर्धारित ९० मिनेटको खेल १–१ को बराबरीमा सकिएपछि खेल अतिरिक्त समयमा धकेलिएको थियो । अतिरिक्त समयमा थप गोल हुन नसक्दा खेल टाइब्रेकरमा लम्बिएको थियो ।
टाइब्रेकरमा पहिलो प्रहार गर्न आएका इटालीका डोमेनिको बेरार्डीले सहजै गोल गरे । इंग्ल्यान्डका कप्तान ह्यारी केनले पनि आफ्नो पेनाल्टीमा कुनै गल्ति गरेनन् । दोस्रो प्रहारमा आन्द्रीए बेलोट्टीको प्रहार पिकफर्डले बचाएपछि इंग्ल्यान्डले अघि बढ्ने अवसर पाएको थियो । ह्यारी मगाएरले शक्तिशाली प्रहार टप कर्नरमा गोल गरेपछि इंग्ल्यान्ड अघि बढेको थियो ।
तेस्रो प्रहारमा इटालीका लिओनार्दो बोनुचीले गोल गरे । लगत्तै मार्कस रासफर्डको प्रहार पोस्टमा लागेर बाहिरिंदा खेल बराबरीमा पुगेको थियो । चौथो प्रहारमा बर्नार्डेसकीले सिधै प्रहारमा गोल गरे । जेडन सान्चोले पेनाल्टीमा गोल गर्न नसक्दा इटालीले अग्रता लिएको थियो । पाँचौ प्रहारमा जर्जिन्होले गोल गर्न चुकेपनि त्यसपछि बुकायो साकाको प्रहार डोनारुम्माले बचाएपछि इटालीले ३–२ को जित दर्ता गर्दै उपाधि जित्यो ।
भक्तपुर, असार २७
अर्जेन्टिनाका सुपरस्टार फुटबलर लियोनल मेस्सीलाई म्यारोडोनासँग तुलना गरिन्छ । शारिरीक उचाई मात्र होइन खेल्ने कला कौशल र शैलीका कारण पनि मेस्सीलाई म्यारोडोनासँग तुलना गरिन्छ । व्यक्तिगत जीवनमा जति नै उत्कृष्ट प्रदर्शनसँगै अनेकौं उपाधी जितेपनि देशका लागि उपाधी दिलाउन नसक्ने कप्तानको रुपमा मेस्सीको नाम जोडिएको थियो । तर ब्राजिललाई उसैको मैदानमा हराएर अर्जेन्टिनाले १५ औं पटक कोपा अमेरिका कपको उपाधी जितेसँगै मेस्सीको नाममा रहेको त्यो दाग अब मेटिएको छ ।
हो, अर्जेन्टिनाका लागि मेस्सीले पहिलो अन्तर्राष्ट्रिय उपाधी जिते आइतवार बिहान । अर्जेन्टिनाले २८ वर्षको उपाधि खडेरी तोड्दै कोपा अमेरिकाको उपाधि जित्दा मेस्सीले पहिलो अन्तर्राष्ट्रिय उपाधि जितेका हुन । अर्जेन्टिनाले पछिल्लो पटक सन् १९९३ मा कोपाको उपाधी जितेको थियो । त्यस यता अर्जेन्टिना चार पटक कोपा, एक पटक विश्वकप र दुई पटक कन्फ्रेडेरेसन कपको फाइनल खेलेपनि उपाधी भने जित्न सकेको थिएन ।
पछिल्लो पटक सन् १९९३ मा ईक्वेडरमा सम्पन्न कोपा कपको फाइनलमा अर्जेन्टिनाले मेक्सिकोलाई २–१ ले पराजित गर्दै उपाधी जितेको थियो । त्यस यता सन् २००४, २००७, २०१५ र २०१६ को कोपा र २०१४ को विश्वकपको फाइनलमा पुगेपनि अर्जेन्टिना उपाधी जित्न असफल भएको थियो ।
अर्जेन्टिना सन् २००४ र २००७ को कोपामा ब्राजिलसँग र सन् २०१५ र २०१६ को फाइनलमा चिलीसँग पराजित भएको थियो । ब्राजिलसँग सन् २००४ मा अर्जेन्टिना २–२ गोलमा बराबरीमा सकिएको खेलमा टाईब्रेकरमा ४–२ ले पराजित भएको थियो भने २००७ मा ३–० ले पराजित भएको थियो ।
त्यसैगरी २०१५ र १६ मा चिलीसँग गोलरहित बराबरी खेलको अर्जेन्टिना टाईब्रेकरमा क्रमशः ४–१ र ४–२ ले पराजित हुन पुगेको थियो ।
मेस्सीको प्रेरणादायी खेलसँगै अर्जेन्टिना सन् १९९० पछि पहिलो पटक सन् २०१४ को विश्वकपको फाइनलमा प्रवेश गरेको थियो । सो खेलमा अर्जेन्टिना जर्मनीसँग अतिरिक्त समयमा ०–१ ले पराजित भएको थियो ।
अर्जेन्टिनाले सर्वाधिक १५ पटक कोपा जित्ने क्रममा उरुग्वेको कीर्तिमानको बराबरी गरेको छ । सन् १९९३ पछि २८ वर्षमा अर्जेन्टिनाले कुनै पनि ठूलो उपाधी जित्ने क्रममा मेस्सीले पाँचौं पटकको प्रयासमा पहिलो अन्तर्राष्ट्रिय उपाधी जित्न सफल भएको हो । मेस्सीले २००७, २०१५ र २०१६ मा कोपा र २०१४ को विश्वकप फाइनल खेलेका थिए तर कुनैमा पनि उपाधी जित्न सकेन ।
डेढ दशकको प्रयासपछि पहिलो उपाधी जितेका मेस्सीले ब्राजिल विरुद्ध गोल गर्न भने सकेन । यद्यपी यस संस्करणमा ४ गोल गर्नुका साथै ५ असिस्ट समेत गरेर मेस्सी उत्कृष्ट खेलाडी र सर्वाधिक गोलकर्ताको उपाधी पनि हात पारे । मेस्सीले यसअघि सन् २००८ मा चीनमा भएको ओलम्पिकमा गोल्ड मेडल जितेका थिए । तर त्यो यु–२३ टिमले खेल्ने प्रतियोगिता थियो ।
भक्तपुर, असार २७
विंगर एन्जल डी मारियाको गोलमा अर्जेन्टिनाले कोपा अमेरिका कप २०२१ को उपाधी जितेको छ । ब्राजिलमा आइतवार बिहान सम्पन्न फाइनलमा अर्जेन्टिनाले आयोजक ब्राजिललाई १–० गोलले पराजित गर्दै उपाधी जितेको हो ।
अर्जेन्टिनाले कोपाको उपाधी सन् १९९३ पछि पहिलो पटक जितेको हो । अर्जेन्टिनाले कोपाको उपाधी जितेको यो १५ औं पटक हो । स्टार खेलाडी मेसीको लागि भने यो अर्जेन्टिनाको लागि पहिलो उपाधी हो ।
अर्जेन्टिनालाई उपाधी जिताउन मारियाले खेलको २२ औं मिनेटमा गोल गरेका थिए । उनले रोड्रीगो डे पलले दिएको लामो पासमा ब्राजिलका रेनान लोडीले राम्रो क्लिअरेन्स गर्न नसक्दा डी मारियाले बलमा नियन्त्रण गर्दै गोलरक्षकको माथिबाट चिप गर्दै गोल गरेका थिए ।
निकै प्रतिस्पर्धात्मक खेलको ब्राजिलले आक्रमक शुरुवात गरेपनि गोल भने गर्न सकेन । खेलको १३ औं मिनेटमा ब्राजिलका रिचार्लीसनको प्रहारलाई डिफेन्डर निकोलस ओटामेन्डीले विफल पारेका थिए । २० औं मिनेटमा नेयमारको प्रहारलाई अर्का डिफेन्डर क्रिस्टियन रोमेरोले रोक्दै ब्राजिललाई अघि बढ्न रोकेका थिए ।
त्यस्तै पहिलो हापको २९ औं मिनेटमा ब्राजिलका लागि खतरा बनेका डी मारियालाई थियागो सिल्भाले गोलरक्षकसम्म पुग्न दिएनन् । उक्त रिबाउन्डमा लाउटारोको प्रहारलाई अर्का डिफेन्डर मार्किन्हसले विफल पारेका थिए ।
अर्जेन्टिनाले टोलीमा ५ परिवर्तन गरेका थिए । अर्जेन्टिनाले आक्रमणमा एन्जल डी मारियालाई अवसर दिएको थियो । उनलाई लाउटारो मार्टिनेज र कप्तान लिओनेल मेस्सीलाई साथ दिएका थिए ।
भक्तपुर, असार २४
इंग्ल्यान्ड युरोकप २०२० को फाइनलमा प्रवेश गरेको छ । लन्डनको वेम्बलीमा बिहिवार बिहान सम्पन्न खेलमा इंग्ल्यान्ड डेनमार्कलाई अतिरिक्त समयमा २–१ गोलले पराजित इतिहासमै पहिलो पटक युरोकपको फाइनलमा प्रवेश गरेको छ । गर्दै ५५ वर्षपछि युरोकपको फाइनलमा प्रवेश गरेको हो ।
युरोकपको इतिहासमा एकपछि अर्को किर्तिमान गर्दै अघि बढेको इंग्ल्यान्डलाई फाइनलमा पु¥याउन कप्तान ह्यारी केनले निर्णायक गोल गरे । खेलको १ सय ४ औं मिनेटमा कप्तान केनले गोल गर्दै इंग्ल्यान्डलाई २–१ को जितका साथ उपाधी नजिक पु¥याएका हुन ।
उनले आफैले हानेको पेनाल्टीको रिबाउन्डमा गोल गरेका हुन् । रहिम स्ट्रर्लिङलाई जोकिम माहेलले पेनाल्टी बक्स भित्र फउल गर्दै लडाएपछि इंग्ल्यान्डले भीएआरको सहायताबाट पेनाल्टीको अवसर पाएको थियो । जसमा केनको पेनाल्टी प्रहार डेनमार्कका गोलकिपर कास्परले रोकेका थिए । तर, रिबाउन्डमा आएको बलमा केनले सहजै गोल गरे ।
यसअघि खेलको ३० औं मिनेटमा युवा खेलाडी डाम्सगार्डले फ्रिकिकबाट गोल गर्दै डेनमार्कलाई अग्रता दिलाएका थिए । उनले डि बक्सको ठिक बाहिरबाट फ्रिकिकबाट उत्कृष्ट गोल गरेका थिए ।
इंग्ल्यान्डले खेलको ३९ औं मिनेटमा आत्माघाती गोलबाट बराबरी गरे । इंग्ल्यान्डका बुकायो साकाको क्रसमा डेनमार्कका कप्तान सिमोनले आत्मघाती गोल गरेपछि खेल १–१ को बराबरीमा पुग्यो ।
दोस्रो हाफमा दुबै टोलीले थप गोल गर्न नसकेपछि खेल अतिरिक्त समयमा गएको थियो । अतिरिक्त समयको १०४ औं मिनेटमा केनले गोल गर्दै इंग्ल्यान्ड सन् १९६६ पछि पहिलो पटक मुख्य प्रतियोगिताको फाइनलमा पु¥याए ।
इंग्ल्यान्डले युरोकपको पहिलो खेलमा क्रोएसियालाई हराउँदैं ठूला प्रतियोगितामा पहिलो पटक विजयी शुरुवात गरेको थियो भने ठूलो प्रतियोगिताको पहिलो खेलमा नहार्ने क्रोएसियाको इतिहासलाई भंग गरेको थियो । त्यस्तै जर्मनीलाई पराजित गर्ने क्रममा इंग्ल्यान्डले पहिलो पटक नकआउट चरणमा जर्मनी विरुद्ध जित किर्तिमान बनाएको थियो ।
अब इंग्ल्यान्डले फाइनलमा इटालीसँग प्रतिस्पर्धा गर्नेछ । फाइनल खेल आइतबार राति वेम्बली स्टेडियममा हुनेछ । इटाली पहिलो सेमिफाइनलमा स्पेनलाई पेनाल्टी सुटआउटमा ४–२ ले हराएर फाइनल प्रवेश गरिसकेको छ ।
भक्तपुर, असार २३
टाईब्रेकरमा कोलम्बियालाई पराजित गर्दै अर्जेन्टिना कोपा अमेरिका फुटबलको फाइनलमा प्रवेश गरेको छ । ब्राजिलको बुधवार बिहान सम्पन्न खेलमा गोलकिपर इमिलियानो मार्टिनेजले दुई पेनाल्टी बचाएपछि अर्जेन्टिना कोलम्बियालाई ३–२ ले पराजित गर्दै फाइनलमा प्रवेश गरेको हो ।
टाईब्रेकरमा अर्जेन्टिनाका लागि लियोनल मेस्सी, लौटारो मार्टिनेज र लियनार्दो डेनियल पेरेडेसले गोल गरेका थिए । अर्जेन्टिनाका रोड्रिगो डी पाउलको टाइब्रेकरमा गोल गर्न चुकेका थिए । कोलम्बियाका जुआन काउड्राडो र मिगुएल बोरजाको प्रहारमात्र सफल रह्यो । डेभिन्सन साञ्चेज, यारी मिना र इडविन कार्डोनाको प्रयास असफल भएको थियो ।
टाईब्रेकरमा पहिलो पेनाल्टी कोलम्वियाका जुआन कोर्डाडोले गोलमा परिणत गरे । त्यसपछि अर्जेन्टिनाका कप्तान लियोनल मेस्सीले गोल गरेर खेल बराबरीमा ल्याए । डाभिन्सन सान्चेजको प्रहारलाई अर्जेन्टिनाका गोलरक्षक मार्टिनेजले बचाउँदै कोलम्बियालाई अग्रता लिनबाट बञ्चित गरे । अर्जेन्टिनाका रोड्रिगो डि पउलको प्रहार आकासिएपछि खेल पुनः बराबरी भयो ।
यारी मिनाको प्रहारलाई पनि मार्टिनेजले विफल पार्दा अर्जेन्टिनाका लियान्द्रो ड्यानियल पारेडेसले गोल गर्दै टोलीलाई अघि बढाए । त्यसपछि मिगुइल बोर्जाले गोल गर्दै कोलम्वियाको सम्भावना जीवित राखेको थियो । लोउटारो मार्टिनेजले गोल गरेपछि अर्जेन्टिना फाइनल नजिक पुगेको थियो । कोलम्वियाका इडविन कोर्डाेनाको पेनाल्टीलाई मार्टिनजेले विफल पार्दै अर्जेन्टिनालाई फाइनलमा पु¥याए ।
यसअघि निर्धारित ९० मिनेटको खेलमा अर्जेन्टिनाले सातौं मिनेटमा लौटारो मार्टिनेजको गोलबाट अग्रता लिएको थियो । लियोनल मेस्सीले डिबक्सभित्र उपलब्ध गराएको पासमा मार्टिनेजले गोल गरेका थिए । तर, ६१ औं मिनेटमा लुइस डियाजको गोल गर्दै खेल बराबरीमा ल्याएका थिए ।
निर्धारित समयमा १–१ गोलको बराबरीमा सकिएपछि खेलको निर्णय टाईब्रेकरबाट गरिएको थियो । कोपा अमेरिका कपमा निर्धारित समयमा खेल बराबरीमा सकिए सिधै टाईब्रेकरमा खेलको निर्णय गर्ने नियम रहेको छ । सो अनुसार भएको टाईब्रेकरमा अर्जेन्टिना ३–२ ले विजयी भयो ।
अर्जेन्टिनाले अब उपाधिका लागि ११ जुलाईमा ब्राजिलसँग प्रतिस्पर्धा गर्नेछ । सन् २०१६ पछि पहिलो पटक अर्जेन्टिना कोपा अमेरिकाको फाइनल पुगेको हो । अर्जेन्टिनाले सन् २००७ पछि पहिलो पटक ब्राजिलसँग फाइनल खेल्न लागेको हो । साविकको विजेता ब्राजिलले मंगलबार बिहान पेरुलाई १–० ले हराउँदै फाइनलमा प्रवेश गरेको हो ।
