Category: खेलकुद

भक्तपुर, फागुन ३
सुधारोन्मुख र बलियो मानिएको व्याटिङ अन्तिम र महत्वपूर्ण अवस्थामा चल्न नसक्दा नेपाल ओमानमा सम्पन्न चार देश सम्मिलत टि–२० सिरिजमा ऐतिहासिक जितबाट वञ्चित भएको छ ।
सिरिजको अन्तिम खेलमा सोमवार टेष्ट राष्ट्र आयरल्यान्डविरुद्ध उत्कृष्ट बलिङ गरेपनि अन्तिममा व्याटिङमा चुक्दा नेपाल पहिलो पटक टेष्ट राष्ट्रलाई हराउने अवसर चुकाउन पुगेको हो ।
ओमानको अल अमरेत क्रिकेट मैदानमा टस जितेर नेपालले पहिले बलिङ रोजेको थियो । नेपालका दिपेन्द्रसिंह ऐरीले उत्कृष्ट बलिङ गरेपछि आयरल्यान्ड २० ओभरमा अलआउट हुँदैं १२७ रनमा खुम्चिएको थियो । १२८ रनको सामान्य लक्ष्य पछ्याएको नेपालको व्याटिङ कमजोर हुँदा निर्धारित २० ओभरमा ९ विकेट गुमाउँदै १ सय ११ रन मात्र बनाउन सक्यो र खेलमा १६ रनको पराजय भोग्न बाध्य भयो । नेपालले आयरल्यान्डमाथि जित निकाल्न सकेको भए नेपालले नेट रनरेटको आधारमा सिरिज जित्ने सम्भावना थियो, तर पराजयसँग चार देशमा सबैभन्दा पुछारमा रहन पुग्यो ।
१ सय २८ रनको सामान्य विजयी लक्ष्य पछ्याएको नेपालले नेपालका दीपेन्द्रसिंह ऐरीले ३० बलमा १ चौका र १ छक्कासहित सर्वाधिक २८ रन बनाए । पहिलो विकेटका लागि कुशल भुर्तेल र आसिफ शेखले ४.१ ओभरमा २६ रनको साझेदारी गरेका थिए । कुशल ब्यारी म्याकर्थीको बलमा दील स्कुप सट खेल्ने धुनमा बोल्ड भए । युवा ब्याटर लोकेश बम मार्क आदिरको छैटौं ओभरको चौथो बलमा ठूलो सट खेल्ने धुनमा डिप मिडविकेटमा जर्ज डोकरेलबाट ६ क्याच आउट भए । स्पिनर एन्डी म्याकबर्नीको बलमा ठूलो सट खेल्नेक्रममा डिप मिडविकेटमा डोकरेलबाट क्याच भए ।

आसिफले २२ बलमा २ चौका र १ छक्का प्रहार गरे । ज्ञानेन्द्र मल्ल ५ रनमा आउट हुँदा शरद भेषवाकर १ रनमा आउट भए । कमल ऐरी १३, कुशल मल्ल ९ रनमा आउट भए । कप्तान सन्दीप लामिछाने १ रनमा आउट भए । अविनाश बोहरा ३ र जितेन्द्र मुखिया १ रनमा अविजित रहे ।
नेपाललाई अन्तिम १२ बलमा २४ रन जितको लागि चाहिँएको थियो । सिमी सिंहले कुशल मल्ल र कमल सिंह ऐरीलाई तेस्रो र चौथो बलमा क्याच गराएसँगै नेपालको जितको सम्भावना सकिएको थियो । आयरल्याण्डका सिमि सिंह, एन्डी म्याकब्राइन, मार्क एडिर र बेरी मकार्थीले २÷२ विकेट लिए ।
यस अघि टस हारेर पहिले ब्याटिङ गरेको आयरल्याण्डले २० ओभरमा अलआउद हुदै १ सय २७ रन बनाएको थियो । आयरल्याण्डका लागि जर्ज डोकरेलले सर्वाधिक २८ रन जोड्दा कर्टिस क्याम्फरले २० रन बनाए । कप्तान एन्डी विलवार्नीले १९, लोर्कन टकरले १५, शेन गेटकाटेले १४, एन्डी म्याकब्राइनले ११ रन, ग्यारेथ डिलानीले ९, पल स्टर्लिङले २ र सिमी सिंहले १ रन जोडे ।
नेपालका लागि दिपेन्द्र सिंह ऐरीले सर्वाधिक ४ विकेट हात पारे । दिपेन्द्रले चार ओभर बलिङ गर्दै २१ रन मात्र खर्चिएका थिए । अविनाश बोहराले दुई विकेट लिए । सन्दीप लामिछाने, कमल सिंह ऐरी र जितेन्द्र मुखियाले १÷१ विकेट लिए ।
सिरिजको पहिलो खेलमा नेपालले ओमानलाई ६ विकेटले हराएको थियो । दोस्रो खेलमा युएईसँग २५ रनले पराजित भएको थियो । योसँगै नेपालको आइसिसी टि–२० विश्वकप ग्लोबल छनोट एको तयारी पूरा भएको छ ।

नेपालले अब ओमानमै आयोजना हुने आइसिसी टि–२० विश्वकप ग्लोबल छनोट खेल्नेछ । नेपालको समूह ए मा ओमान, फिलिपिन्स र क्यानडा छ । समूह बी मा आयरल्यान्ड, युएई, जमर्नी र फिलिपिन्स छन् । शीर्ष दुई दुई टोली सेमिफाइनल खेल्ने छन् । फाइनल पुग्ने टोली विश्वकपको लागि छनोट हुनेछन् । नेपालले पहिलो खेल १८ फेबु्रअरीमा ओमानसँग खेल्नेछ । नेपाल सेमिफाइनल हुँदै फाइनल पुग्ने सके आगामी अक्टोबर नोभेम्बरमा अष्ट्रेलियामा हुने टि–२० विश्वकप खेल्न पाउने छ ।

भक्तपुर, माघ २८
दीपेन्द्रसिंह ऐरीको उत्कृष्ट ब्याटिङ मद्दतले नेपालले ओमानमाथि ६ विकेटको कीर्तिमानी जित हात हासिल गरेको छ । ओमान जारी चारदेशीय टी–२० क्रिकेट शृंखलाको पहिलो खेलमा नेपालले ओमानमाथि जित निकालेको हो ।
स्पिनर सन्दिप लामिछानेको कप्तानी र प्रशिक्षक रोय् लुक डायसको प्रशिक्षणमा पहिलो पटक मैदानमा ओर्लेको नेपाली टोलीले श्रृंखलामा विजयी शुरुवात गर्न सफल भएको हो । ओमानको अल अमरेत क्रिकेट मैदानमा टस जितेर नेपालले ओमानलाई व्याटिङको निम्तो दिएको थियो ।
ओमानले निर्धारित २० ओभरमा ६ विकेट गुमाउँदै १ सय ३५ रन बनाएको थियो । ओमानका कप्तान जिशान मकसुदले ४१ बलमा ४ चौका र १ छक्का सहित सर्वाधिक ४३ रनमा अविजित रहे । ओमानका काश्यकपले ११, जितेन्दर सिंहले १३ रन बनाउँदा सोएब खानले ११ र आयन खानले ११ रन बनाए ।
पाँचौ र छैटौं नम्बरमा मैदान पसेका मकसुद र मोहम्मदन नदिमले उत्कृष्ट साझेदारी गरेपछि ओमानको ब्याटिङ सम्हालिएको थियो । यी दुई खेलाडीले ६१ रनको साझेदारी गरे । उनीहरुले ९ ओभर ३ बलमा ५८ रनसँगै ४ विकेट गइसके पनि टिमलाई १ सय १९ रनमा पु¥याए । नदिमले ३१ रन बनाए ।
नेपालका लागि अभिनाश बोहराले ३ विकेट लिए भने आरिफ शेख, सन्दीप लामिछाने र कमल सिंह ऐरीले समान १÷१ विकेट झारे ।

१ सय ३६ रनको विजयी लक्ष्य पछ्याएको नेपालले १९.३ ओभरमा ४ विकेट गुमाउँदै पूरा गर्यो । दीपेन्द्र सिंह ऐरीले सर्वाधिक ७३ रन बनाएपछि नेपाललाई जित सहज बनेको हो । दीपेन्द्रले ८ चौका र १ छक्काको सहयोगमा ५३ बलमा अविजित ७३ रन बनाए भने आरिफ शेखले २० बलमा २५ रन बनाए । नेपाललाई अन्तिम ६ बलमा ९ रन जितको लागि आवश्यक थियो । तीव्र गतिका बलर मोहम्मद नदिमई दीपेन्द्रले पहिलो बलमा चौका प्रहार गर्दै जित सहज बनाएका थिए । दोस्रो बलमा दुई रन बटुले । तेस्रो बलमा दीपेन्द्रले चौका प्रहार गर्दै जित पक्का गरे ।
दीपेन्द्रको टि–२० आई करिअरको दोस्रो अर्धशतक हो । उनले ४६ बलमा अर्धशतक पूरा गरेका थिए । उनले आफ्नो टि–२० आई करिअरको पाँच सय रन पूरा गरेका छन् ।
नेपालले चौथो ओभरमा ओपनर आसिफ शेख र प्रदीप ऐरीलाई गुमाएको थियो । ओपनर आसिफ शेख ११ बलमा २ चौकासहित १४ रनमा क्याच आउट भए । आसिफ कलिमुल्लाहको चौथो ओभरको दोस्रो बलमा ठूलो सट खेल्नेक्रममा डिप मिडविकेटमा शोहिब खानबाट क्याच भएका थिए । १४ बल खेल्दै ४ रन बनाएका प्रदीप ऐरी अन्तिम बलमा विकेटकिपर नसिम खुशीबाट क्याच भएपछि नेपाल २२–२ को कमजोर अवस्थामा पुगेको थियो ।

तेस्रो विकेटका लागि ज्ञानेन्द्र र दीपेन्द्रले ४२ रनको साझेदारी गरेका थिए । ज्ञानेन्द्र रन आउट हुनुअघि १६ बलमा १३ रन बनाए । चौथो विकेटका लागि आरिफ शेख र दीपेन्द्रले ४५ रनको साझेदारी गर्दै सहज जित दिलाए । ओमानका कलिमुल्लाहले २ र खवर अलीले १ विकेट लिए ।
खेलको प्लेयर अफ दि म्याच नेपालका दीपेन्द्र घोषित भए । सन्दीपको कप्तानीमा विवेक यादव र सागर ढकालले नेपाली राष्ट्रिय सिनियर क्रिकेट टिममा डेब्यु गरे । चार देश सम्मिलित सिरिजमा नेपालले शनिबार युएईसँग खेल्नेछ ।

भक्तपुर, माघ १९
दक्षिण कोरिया कतारमा आयोजना हुने फिफा विश्वकप फुटबलका लागि छनोट भएको छ । दक्षिण कोरियाले मंगलवार राती दुवईमा सम्पन्न छनोट खेलमा सिरियालाई २–० गोल अन्तरले हराउँदै विश्वकपको टिकट काटेको हो । दक्षिण कोरियालाई जित दिलाउन किम जिन सु र क्वोन चाङ होनले एक÷एक गोल गरे ।
खेलको ५३ औं मिनेटमा किमले गोल गर्दै दक्षिण कोरियालाई अग्रता दिलाएका थिए । त्यसपछि खेलको ७१ औं मिनेटमा क्वोनले गोल गर्दै दक्षिण कोरियालाई २–० को जित दिलाए ।
जितसँगै समूह ए मा रहेको दक्षिण कोरियाले ८ खेलमा २० अंक जोडेको छ । यस समूह इरान २२ अंकका साथ शिर्ष स्थानमा रहेको छ । उसले यसअघि नै विश्वकपमा स्थान पक्का गरिसकेको छ । समूहका दुई चरणका खेल बाँकी रहँदा तेस्रो स्थानमा रहेको युएईको ९ अंक रहेको छ । इरानले युएईलाई १–० ले पराजित गरेसँगै दक्षिण कोरिया विश्वकपका लागि सिधै छनोट भएको हो ।
दक्षिण कोरिया इरानपछि एसियाबाट विश्वकपमा छनोट हुने दोस्रो टिम बनेको छ । दक्षिण कोरिया लगातार १० औं पटक विश्वकपका लागि छनोट भएको हो । सन् १९८६ को विश्वकपमा पहिलो पटक छनोट भएको दक्षिण कोरिया त्यसयता लगातार छनोट हुँदै आएको छ । सन् २००२ मा जापानसँग मिलेर विश्वकप आयोजना गरेको दक्षिण कोरिया सेमिफाइनलमा प्रवेश गरेको थियो ।
यसैगरी जापान पनि विश्वकप छनोटको नजिक पुगेको छ । मंगलवार राती जापानको उत्तरी शहर साइतामामा सम्पन्न समूह बी को छनोट खेलमा शिर्ष स्थानमा रहेको साउदी अरेबियालाई २–० ले पराजित गर्दै जापान छनोटको नजिक पुगेको हो ।
जापानका लागि लिभरपुलका फरवार्ड ताकुमी मिनामिनो र जुन्या ईटोले गोल गरे । समूहमा दुई चरणको खेल बाँकी छँदा साउदी अरेबिया १९ अंकसहित शिर्ष स्थानमा रहेको छ भने जापान १८ अंकसहित दोस्रो र १४ अंक बटुलेको अष्ट्रेलिया तेस्रो स्थानमा रहेको छ । जापानले मार्च २४ मा सिड्नीमा अष्ट्रेलिया विरुद्ध खेल्दै छ भने अन्तिम खेल भियतनामसँग घरेलु मैदानमा खेल्ने छ ।

भक्तपुर, माघ १८
नेपालले तनावपुर्ण खेलमा मोरिससलाई १–० गोलले पराजित गरेको छ । काठमाण्डौंको दशरथ रंगशालामा मंगलवार सम्पन्न दोस्रो मैत्रीपूर्ण खेलमा नेपालले सुजल श्रेष्ठको गोल मद्दतले मोरिससलाई १–० ले पराजित गरेको हो ।
सुजलले खेलको १० औं मिनेटमा गोल गरेका थिए । नविन गुरुङले प्रहार गरेको कर्नरमा मोरिससका गोलरक्षक लोइक मिचेलले पञ्च गरेर क्लियर गर्दा रिवाउण्ड भएर आएको बललाई डि बक्स बाहिरबाट आशिष लामाले प्रहार गरे । सो बललाई पुजन उपरकोटीले व्याक पास मिलाए र सुजलले वन टचमा बललाई जाली चुमाए । उनको यो तेस्रो अन्तर्राष्ट्रिय गोल हो ।
लगत्तै मोरिससले बराबरी गर्ने सुवर्ण अवसर पाए । नेपालका दिनेश राजवंशीले मोरिससका कप्तान एण्डी सोफीलाई डि बक्समा लडाएपछि मोरिससले पेनाल्टीको अवसर पाए । मोरिससको पेनाल्टीलाई नेपाली गोलकिपर किरण चेम्जोङले दाँयातर्फ डाइभ दिँदै उत्कृष्ट बचाउ गरे । रिबाउण्ड भएर आएको बललाई एरिक बिष्टले क्लियर गरेर नेपालको संकट टारे गरेका थिए ।
यसअघि खेलको छैटौ मिनेटमा दर्शन गुरुङले पेनाल्टी बक्स बाहिरबाट गरेको प्रहार पोस्टमाथिबाट आकासियो भने सातौ मिनेटमा मोरिससका लिन्स्ले ब्रासीको प्रहारले पोस्टको दिशा लिन सकेन ।
३६औं मिनेटमा तेज तामाङको झन्डै ३० यार्ड टाढाको सशक्त प्रहार पहिलो बार च्याप्दै बाहिरियो । खेलको ४०औं मिनेटमा गोलरक्षक किरण पोजिसनमा नरहेको अवस्थामा एड्रियन बोट्लरको प्रहार पोस्टमाथिबाट बाहिरिदा मोरिसस बराबरीबाट चुक्यो ।
५१औं मिनेटमा भासिस्ट कुलकुट्टाको पेनाल्टी बक्सबाहिरको भली प्रहार गोलरक्ष किरणले मुस्किलले नियन्त्रणमा लिए । ६२औं मिनेटमा सुजल श्रेष्ठको फ्रिकिकमा मनिष डाँगीको टच पोस्ट नजिकैबाट थोरै बाहिरियो । ६८ औं मिनेटमा मरिससका कप्तान एन्डीले पेनाल्टी क्षेत्रको एजबाट प्रहार गरेको बल नेपालका गोलकिपर किरणले मुश्किलले बचाए ।
खेलको ७० औं मिनेटमा मरिसस र नेपाल १० खेलाडीमा समेटियो । एक अर्काविरुद्ध घम्साघम्सीमा उत्रिएपछि मोरिससका एड्रियन बोटलरले दुई पहेलो कार्डसहित रातो कार्ड पाए । नेपालका पुजन उपरकोटीलाई पनि रातो कार्ड देखाउदै रेफ्री नविन्द्र महर्जनले मैदानबाट बाहिर पठाए । नेपालका सहायक प्रशिक्षक बिकास मल्ललाई रेफ्री नविन्द्र महर्जनले रातो कार्ड देखाएका थिए ।
७८ औं मिनेटमा मरिसस ९ खेलाडीमा समेटियो । गौतम श्रेष्ठलाई फउल गरेपछि मरिससका इम्यानुएलले रातो कार्ड पाएका थिए । यस्तै खेलको इन्जुरी समयमा अन्जन विष्टले सिक्स यार्ड बक्स भित्रबाट प्रहार गरेको बल मरिससका गोलकिपरले उत्कृष्ट बचाऊ गरेपछि नेपाल अग्रता दोब्बर बनाउन चुकेको थियो ।
तनावपूर्ण खेलमा कार्डको वर्षा
मैत्रीपूर्ण खेल भए पनि नेपाल मोरिससबीचको दोस्रो खेल तनावपूर्ण हुँदा खेलमा कार्डको वर्षा भएको छ । खेलमा चार रातो र ६ पहेँलो कार्ड प्रयोग भए । पहिलो हाफको खेल सौहार्दपूर्ण रहे पनि दोस्रो हाफको १५ मिनेटमा स्थिति तनावपूर्ण बनेको थियो । खेलमा दुवै टोलीका खेलाडी घम्साघम्सीमा उत्रेका थिए । खेलाडीहरुको झगडा मिलाउन नेपाली टोलीका अफिसियल समेत मैदान प्रवेश गरेका थिए । नेपालका दुई र मोरिससका ४ खेलाडीले पहेंलो कार्ड पाए ।
मोरिससका एड्रियन बोटलरले दुई पहेलो कार्डसहित रातो कार्ड पाए । नेपालका पुजन उपरकोटीलाई पनि रातो कार्ड पाए । नेपाली टोलीका गोलकिपर कोच विकास मल्लले पनि रातो कार्ड पाए । उनी खेलाडीको झगडाबीच मैदान प्रवेश गरेका थिए ।
दशरथ रंगशालाको फ्लड लाइटमा समस्या आएका कारण पनि खेल झण्डै ८ मिनेट रोकिएको थियो । खेलको निर्धारित समय सकिए लगत्तै रंगशालाको लाईटमा समस्या आएको थियो । रेफ्रिले खराव प्रकाशका कारण खेल रोके ।
खेलमा नेपाली गोलकिपर एवम् कप्तान किरण चेम्जोङ खेलको म्यान अफ दि म्याच चुनिए । उनले मोरिससको पेनाल्टी रोक्नुका साथै केही अवसरमा उत्कृष्ट बचाउ गर्दै नेपाललाई जित दिलाएका थिए ।

भक्तपुर, माघ १८
दक्षिण अफ्रिकी मुलुक मोरिससविरुद्ध काठमाण्डौंको दशरथ रंगशालामा जारी दोस्रो अन्तराष्ट्रिय मैत्रीपूर्ण खेलमा नेपालले अग्रता लिएको छ ।
खेलको १० औं मिनेटमा नेपालले सुजल श्रेष्ठको गोलले अग्रता लिएको हो । नविन गुरुङले प्रहार गरेको कर्नरमा रिफ्लेक्ट भएर आएको बललाई आशिष लामाले प्रहार गरे । सो बललाई पुजन उपकोटीले व्याक पास मिलाए र सुजलले वन टचमा बललाई जाली चुमाए ।
लगत्तै मोरिससले बराबरी गर्ने सुवर्ण अवसर पाए । नेपालका दिनेश राजवंशीले मोरिससका खेलाडीलाई डि बक्समा लडाएपछि मोरिससले पेनाल्टीको अवसर पाए । मोरिससको पेनाल्टीलाई नेपाली गोलकिपर किरण चेम्जोङले दाँयातर्फ डाइभ दिँदै उत्कृष्ट बचाउ गरे । रिबाउण्ड भएर आएको बललाई एरिक बिष्टले क्लियर गरेर नेपालको संकट टारे ।

भक्तपुर, माघ १५
फरवार्ड बिमल घर्तीमगरको एकमात्र निर्णायक गोलको मद्दतले नेपालले मौरिससविरुद्धको पहिलो अन्तर्राष्ट्रिय मैत्रीपुर्ण खेलमा जित हासिल गरेको छ । काठमाण्डौंको दशरथ रंगशालामा शनिवार सम्पन्न नेपाली राष्ट्रिय फुटबल टिमले पहिलो मैत्रीपूर्ण खेलमा अफ्रिकी राष्ट्र मौरिसस विरुद्ध १–० को जित हासिल गरेको हो ।
पहिलो हाप बराबरीमा सकिएको खेलमा नेपाललाई जित दिलाउन खेलको ५५ औं मिनेटमा विमलले निर्णायक गोल गरेका हुन् । एक वर्षपछि टिममा पुनरागमन गरेका विमलले पहिलो खेलमै गोल गरेका हुन् ।
विमलले अञ्जन विष्टको पासमा गोल गरेका हुन । अञ्जनको लामो पासमा पेनाल्टी क्षेत्रको ठिक बाहिरबाट विमलले प्रहार गरेको बलले पोस्टमा लाग्दै जाली चुमेको थियो । नेपालको लागि यो विमलको नवौं गोल हो । विमलले सन् २०१८ मा भएको साफ च्याम्पियनसिपपछि पहिलो गोल गरेका हुन् ।

मौरिससविरुद्ध नेपाल शुरुआतबाटै आक्रामक रुपमा प्रस्तुत भएको थियो । खेलको दोस्रो मिनेटमा नै नेपालले फ्रिकिकको मौका पायो । सुनिल बलको प्रहार डिफ्लेक्ट हुँदै बाहिरिदा नेपाल अग्रता लिनबाट चुक्यो । नेपालका केही प्रयासमा मौरिससका गोलरक्षक तथा कप्तान केभिन जित लुइस बाधक बने ।
खेलको १४ औं मिनेटमा नेपालका सुमन लामाले पेनाल्टी क्षेत्र बाहिरबाटको सशक्त प्रहार पोस्टको माथिबाट बाहिरिएको थियो । खेलको १६औं मिनेटमा एड्रिएन फ्रान्कोइसको प्रहारलाई नेपालका डिफेन्डर देवेन्द्र तामाङको ब्लक गरे । खेलको २२ औं मिनेटमा मरिससका स्टेभेन नाजिराको प्रहार नेपालका गोलकिपर तथा कप्तान किरण चेम्जोङले सहजै बचाए ।
३१औं मिनेटमा सुमन लामाको ३० यार्ड टाढाको सशक्त प्रहार पोस्टनजिकैबाट बाहिरिदा नेपाल पुनः अग्रता लिनबाट चुक्यो । ३६औं मिनेटमा एड्रिएन फ्रान्कोइसको वान भर्सेस वानको प्रहारलाई गोलरक्षक तथा कप्तान किरण चेम्जोङले नियन्त्रणमा लिदै नेपालको खतरा टारे ।

४१ औं मिनेटमा नेपालका सुनिल बलको क्रसमा देवेन्द्र तामाङको हेडरले पोस्टको दिशा लिन सकेन । खेलको ४५औं मिनेटमा अन्जन विष्टले सुवर्ण अवसर गुमाए । लामो दुरीबाट प्राप्त बलमा मौरिससका डिफेन्डरको गल्तीबाट अन्जनले अवसर पाएपनि उनको प्रहार दोस्रो बार च्याप्दै बाहिरिएको थियो ।
खेलको ४६ औं मिनेटमा फेर्नान्डो ज्याक्सनको प्रहार पोस्टमा लाग्दै फर्किएपछि मरिसस अग्रता बनाउन चुकेको थियो । ६५ औं मिनेटमा मौरिससका स्टेभेन नाजारियाको प्रहार गोलकिपर किरणले बचाए ।
खेलको ७५ औं मिनेटमा जगजित श्रेष्ठको फ्रि–किकमा अन्जनको फ्लिक हेडर बल पोस्टको क्रसबारमा लागेर फर्किदा नेपाल दोब्बर अग्रता बनाउन चुकेको थियो । ७७ औं मिनेटमा अन्जनले पेनाल्टी क्षेत्रभित्रबाट प्रहार गरेको बल पुनः पोस्टमा लागेर फर्किएको थियो । त्यहिँ रिबाउन्डमा जगजितको हेडर मौरिससका गोलकिपर केभिनले उत्कृष्ट बचाऊ गरे ।
नेपालले पहिलो पटक आधिकारिक रुपमा अफ्रिकी राष्ट्रसँग खेलेको हो । नेपालले अब मौरिससविरुद्धको दोस्रो मैत्रीपूर्ण मंगलबार खेल्नेछ ।

भक्तपुर, माघ १५
काठमाण्डौंको दशरथ रंगशालामा जारी मौरिसस विरुद्धको पहिलो अन्तराष्ट्रिय मैत्रीपूर्ण खेलमा नेपालले दोस्रो हापको ५५ औं मिनेटमा अग्रता लिएको छ । नेपालका लागि खेलको ५५ औं मिनेटमा विमल घर्तीमगरले अग्रता दिलाएका हुन ।
प्रतिबन्ध र चोटबाट फर्किएर राष्ट्रिय टोलीमा पुनरागमन गरेका विमलले अञ्जन विष्टको पासमा गोल गर्दै नेपाललाई महत्वपूर्ण अग्रता दिलाएका हुन । उनको प्रहार पोलमा लाग्दै गोलमा परिणत भएको थियो । उनले सन् २०१८ मा भएको साफ च्याम्पियनसिपपछि पहिलो गोल गरेका हुन् । यससँगै बिमलको गोलसंख्या ९ पुगेको छ ।

भक्तपुर, माघ १५
भक्तपुरको नलिञ्चोक बाँसघारीमा शनिवार दिउँसो बसले ठक्कर दिँदा मोटरसाइकलमा सवार यात्रुको मृत्यु भएको छ । बनेपाबाट भक्तपुरतर्फ आउँदैं गरेको बा. ५ ख ३०२० नं. को यात्रुबाहक बसले सूर्यविनायक नगरपालिका–९ नलिञ्चोक बाँसघारीस्थित अरनिको राजमार्गमा बा. ७० प. ९१३८ नं. मोटरसाईकललाई ठक्कर दिँदा मोटरसाईकलमा सवार दोलखा गौरीशंकर गाउँपालिका–२ घर भई हाल नलिञ्चोक बस्ने ४० वर्षिया गंगा बस्नेतको मृत्यु भएको हो ।
दुर्घटनामा घाईते बस्नेतलाई उपचारका लागि भक्तपुर अस्पताल लगिएको थियो । उनको उपचारकै क्रममा मृत्यु भएको महानगरिय प्रहरी परिसर भक्तपुरका सूचना अधिकारी प्रहरी नायक उपरिक्षक राजु पाण्डेले बताउनुभयो ।
प्रहरीले बस चालक काभ्रेपलाञ्चोक बनेपा नगरपालिका–९ बस्ने ४१ वर्षिय रविन श्रेष्ठ र बस महानगरीय प्रहरी वृत्त जगाती भक्तपुरको नियन्त्रणमा राखी थप अनुसन्धान भईरहेको जनाएको छ ।

भक्तपुर, माघ १५
काठमाण्डौंको दशरथ रंगशालामा जारी नेपाल र अफ्रिकी मुलुक मरिससबीचको पहिलो अन्तर्राष्ट्रिय मैत्रीपूर्ण फुटबल खेल गोलरहित बराबरीमा सकिएको छ । खेलको पहिलो हापमा दुवै टोलीले केही अवसर बुनेपनि गोल गर्न नसक्दा खेल गोलरहित बराबरीमा सकिएको हो ।
खेलमा नेपालले आक्रमक शुरुवात गरेको थियो । खेलको दोस्रो मिनेटमा नै नेपालले फ्रिकिकको मौका पायो । सुनिल बलको प्रहार डिफ्लेक्ट हुँदै बाहिरिदा नेपाल अग्रता लिनबाट चुक्यो । नेपालका केही प्रयासमा मौरिससका गोलरक्षक तथा कप्तान केभिन जित लुइस बाधक बने ।
खेलको १६औं मिनेटमा एड्रिएन फ्रान्कोइसको प्रहारलाई नेपालका डिफेन्डर देवेन्द्र तामाङको ब्लक गरे । ३१औं मिनेटमा सुमन लामाको ३० यार्ड टाढाको सशक्त प्रहार पोस्टनजिकैबाट बाहिरिदा नेपाल पुनः अग्रता लिनबाट चुक्यो । ३६औं मिनेटमा एड्रिएन फ्रान्कोइसको वान भर्सेस वानको प्रहारलाई गोलरक्षक तथा कप्तान किरण चेम्जोङले नियन्त्रणमा लिदै नेपालको खतरा टारे ।
खेलको ४५औं मिनेटमा अन्जन विष्टले सुवर्ण अवसर गुमाए । लामो दुरीबाट प्राप्त बलमा मौरिससका डिफेन्डरको गल्तीबाट अन्जनले अवसर पाएपनि उनको प्रहार दोस्रो बार च्याप्दै बाहिरिएको थियो ।
नेपालले पहिलो पटक आधिकारिक रुपमा अफ्रिकी राष्ट्रसँग खेलेको हो । नेपालले मौरिससविरुद्धको दोस्रो मैत्रीपूर्ण भने मंगलबार खेल्नेछ ।

भक्तपुर, माघ १४
इरान आगामी वर्ष कतारमा हुने फिफा विश्वकप फुटबलको लागि छनोट भएको छ । गएराती सम्पन्न खेलमा इरान चिरपरिचित प्रतिद्धन्द्धी इराकलाई १–० ले पराजित गर्दै विश्वकप २०२२ मा छनोट हुने पहिलो एसियाली मुलुक बन्न सफल भएको हो ।
समूह ए को खेलमा इरानलाई विश्वकप पुर्याउन खेलको ४८ औं मिनेटमा मेहदी तेरामीले गोल गरे । जितसँगै समूह ए मा इरानको ७ खेलबाट १९ अंक भएको छ । दोस्रो स्थानमा रहेको दक्षिण कोरियाको १७ अंक रहेको छ भने तेस्रो स्थानको संयुक्त अरब इमिरेट्सको ९ अंक रहेको छ ।
समूहको शिर्ष दुई स्थानमा रहेका टोली सिधै विश्वकपमा छनोट हुने प्रावधान रहेको छ । जसअनुसार समूहमा बाँकी ३ वटै खेल गुमाएपनि इरान कम्तिमा दोस्रो हुँदैं सिधै विश्वकपका लागि छनोट हुने निश्चित भएको हो ।
इरानको तेहरानस्थित अजिदी स्टेडिएममा सम्पन्न खेलमा करिव १० हजार दर्शकलाई प्रत्यक्ष खेल अवलोकनका लागि प्रवेश दिईएको थियो जहाँ कम्तिमा एक तिहाई इरानी महिला थिए । इरानले विगत ३ वर्षमा पहिलो पटक रंगशालामा महिला समर्थकलाई प्रवेश दिईएको थियो । जहाँ उनीहरुले इरानी टोली विश्वकप पुगेको साक्षी बनेका थिए ।