Category: अर्थ

भक्तपुर, जेठ १६ ।
अर्थमन्त्री डा. प्रकाशशरण महतले सोमवार संसदको संयुक्त बैठकमा सार्वजनिक गर्नु भएको आगामी आर्थिक वर्ष २०८०÷०८१ को बजेटमा भक्तपुरका ८ ठूला परियोजना समेटिएका छन । बजेटको विभिन्न शिर्षक मध्ये पाँच वटा शिर्षकमा भक्तपुरका ८ ठूला परियोजना समेटिएका हुन ।
बजेटमा संस्कृति, पर्यटन र नागरिक उड्डयन, स्वास्थ्य तथा जनसंख्या, खानेपानी तथा सरसफाई, महिला, बालबालिका र ज्येष्ठ नागरिक र यातायात पुर्वाधार गरी चार वटा शिर्षकमा ८ परियोजना उल्लेख भएको हो
बजेटको संस्कृति, पर्यटन र नागरिक उड्डयन शिर्षकको १८६ नं. बुँदामा भक्तपुरको एक योजना समेटिएको छ । सो बुँदामा भुकम्पका कारण क्षती भएको भक्तपुर दरवार क्षेत्रको पुनर्निर्माण कार्यलाई निरन्तरता दिने उल्लेख गरेको छ ।
यस्तै बजेटको स्वास्थ्य तथा जनसंख्या शिर्षकको बुँदा नंं २३५ मा भक्तपुरको दुधपाटीस्थित शहिद धर्मभक्त राष्ट्रिय मानव अंग प्रत्यारोपण केन्द्रको क्षमता विकास गरिने उल्लेख गरिएको छ ।
बजेटमा उल्लेख गरिएका ठूला परियोजनाहरु मध्ये भक्तपुरमा सबै भन्दा धेरै खानेपानी तथा सरसफाई क्षेत्रमा योजना समेटिएको छ । यस शिर्षकमा ४ वटा योजना समेटिएका छन । यस शिर्षकको बुँदा नंं २५७ मा भक्तपुरको महादेव खोलाबाट पानी आपुर्तीको सम्भाव्यता अध्ययन लगायतका पुर्व तयारीका कार्य गरिने उल्लेख गरिएको छ ।
यसैगरी बजेटको बुँदा नं. २५८ मा काठमाण्डौं उपत्यकामा नयाँ वितरण प्रणाली मार्फत खानेपानी वितरणको लागि दोस्रो चरणमा भक्तपुर र थिमिमा पाइपलाइन निर्माण शुरु गर्ने जनाएको छ ।
बुँदा नं. २६१ मा शहरी खानेपानी तथा सरसफाई आयोजना अन्तर्गत निर्माणाधिन भक्तपुरको दधिकोट खानेपानी आयोजना आगामी आर्थिक वर्षभित्र सम्पन्न गर्ने लक्ष्यका साथ बजेट विनियोजन गरिएको जनाएको छ ।
यस्तै बुँदा नं. २६४ मा राष्ट्रिय अभियानको रुपमा सरसफाई र स्वच्छता कार्यक्रम सञ्चालन गरी भक्तपुरको कटुञ्जे ढल निर्माण तथा प्रशोधन आयोजना सम्पन्न गर्ने उल्लेख गरिएको छ ।
महिला, बालबालिका र ज्येष्ठ नागरिक शिर्षक अन्तर्गत बजेटको बुँदा नंं २७८ मा लैङ्गिक हिंसा पिडित तथा प्रभावित व्यक्तिका लागि प्रदान गरिने कानुनी सहायता, मनोसामाजिक परामर्श लगायतका सेवा गुणस्तरीय बनाईने उल्लेख गर्दै हिंसा पिडित महिलाको पुनःस्थापना गर्न भक्तपुरको सूर्यविनायकमा मङ्गला–साहना पुर्नस्थापना केन्द्र निर्माण गरिने जनाएको छ ।
सडक पुर्वाधारतर्फ बजेटमा भक्तपुरको ठूलो परियोजना एउटा उल्लेख गरिएको छ । बजेटको यातायात पुर्वाधार शिर्षक अन्तर्गत बुँदा नं. ३०९ मा सूर्यविनायक–धुलिखेल सडक खण्डको बिस्तार कार्य अघि बढाउन आवश्यक रकम विनियोजन गरेको जनाएको छ ।
बजेटमा समावेश गर्न भक्तपुर क्षेत्र नं. २ का प्रतिनिधि सभा सदस्य एवम् नेपाली कांग्रेस भक्तपुरका सभापति दुर्लभ थापाले सचिवालय मार्फत जिल्लाका स्थानीय तहका वडा तहबाटै योजना संकलन गर्नुभएको थियो । वडाकार्यालय मार्फत माग आएका योजनाहरुलाई विभिन्न चरणमा जनप्रतिनिधिहरु सँग समेत छलफल गरी मन्त्रालयगतरुपमा गत बैशाख १२ गते सिफारिस सहित बुझाएका थिए ।
सोही अनुसार बजेटमा ७ ठूला परियोजना समावेश भएको सांसद थापाले बताउनुभयो । उहाँले बजेटको विस्तृत विवरण समेटिएको रातो कितावमा अन्य साना योजनाहरु समावेश हुने जानकारी दिनुभयो ।
(यसअघि प्रकाशित समाचारमा एउटा योजना छुट भएकाले सो समावेश गरी पुनः प्रकाशन गरिएको छ । सं.)

भक्तपुर, जेठ १६
अर्थमन्त्री डा.प्रकाशशरण महतले संघीय संसदका दुवै सदनको संयुक्त बैठकमा सोमवार सरकारले आगामी आर्थिक वर्ष २०८०÷८१ का लागि १७ खर्ब ५१ अर्ब ३१ करोडको बजेट सार्वजनिक गरेको छ ।
उहाँका अनुसार चालूतर्फ ११ खर्ब ४१ अर्ब ७८ करोड अर्थात् ६५ दशमलव २ प्रतिशत छुट्याइएको छ । पूजिँगततर्फ ३ खर्ब २ अर्ब ७ करोड अर्थात् १७ दशमलब २५ प्रतिशत बजेट राखिएको छ । त्यस्तै वित्तीय व्यवस्थापन तर्फ ३ खर्ब ७ अर्ब ४५ करोड अर्थात् १७ दशमलव ५५ प्रतिशत बजेट छुट्याइएको छ ।
यो खर्च अनुमान चालू आर्थिक वर्षको विनियोजन विधेयकभन्दा २ दशमलव ३७ प्रतिशतले कम हो भने संशोधित अनुमानको तुलनामा १६ दशमलब ३७ प्रतिशत बढी हो ।
बजेटका स्रोतमध्ये राजश्वबाट १२ खर्ब ४८ अर्ब ६२ करोड उठाउने लक्ष्य राखिएको छ । वैदेशिक अनुदानबाट ४९ अर्ब ९४ करोड प्राप्त गर्ने लक्ष्य सरकारको छ । यसो गर्दा ४ खर्ब ५२ अर्ब ७५ करोड न्यून हुने रकम वैदेशिक ऋणबाट २ खर्ब १२ अर्ब ६२ करोड र २ खर्ब ४० अर्ब आन्तरिक ऋणबाट व्यहोरिने अर्थमन्त्री महतले बताउनुभयो ।

आगामी आर्थिक वर्ष २०८०÷८१ मा सरकारले ६ प्रतिशतको आर्थिक वृद्धि गर्ने लक्ष्य तय गरेको छ । आगामी आर्थिक वर्षको बजेट वक्तव्य घोषणा गर्दै अर्थमन्त्री महतले आर्थिक वृद्धिदरको लक्ष्य ६ प्रतिशतको तय गरिएको बताउनुभएको हो । चालु आर्थिक वर्षमा सरकाले ८ प्रतिशत आर्थिक वृद्धिदरको लक्ष्य तय गरेकोमा २.१६ प्रतिशतले मात्र आर्थिक वृद्धि हुने अनुमान राष्ट्रिय तथ्यांक कार्यालयले गरेको छ ।
यस्तै, सरकारले आगामी आर्थिक वर्षमा मूल्य वृद्धिदर ६.५ प्रतिशतभित्र राख्ने लक्ष्य तय गरेको छ । चालु आर्थिक वर्षमा मूल्य वृद्धिदरको लक्ष्य ७ प्रतिशत तय गरिए पनि त्योभन्दा माथि रहँदै आएको छ ।
बजेटमार्फत सरकारले पहिलो पटक धेरै कमाउनेहरूको आयकरको सीमा ३९ प्रतिशत पु¥याएको छ । ५० लाख रूपैयाँभन्दा बढी कमाउनेको कर ३९ प्रतिशत पु¥याइएको हो । यसअघि २० लाखभन्दा माथिको आयमा ३६ प्रतिशत कर लगाउने गरिएको थियो ।
त्यस्तै सरकारले तारे होटलमा बस्ने ग्राहकबाट ‘लक्जरी कर’ लिने नीति लिएको छ । यो पहिलोपटक गरिएको अभ्यास हो । चारतारे र पाँचतारे होटलमा बस्ने ग्राहकहरूलाई दुई प्रतिशत कर लगाइएको छ ।
त्यस्तै गहनामा समेत सरकारले लक्जरी कर सुरू गरेको छ । हिरा, मोती लगायत जवरात जडित सुनचाँदीमा लक्जरी कर लाग्ने व्यवस्था आर्थिक अध्यादेशले गरेको छ । ‘नेगेटिभ लिस्ट’का वस्तुहरूमा कर बढाइएको छ । यसमध्ये बियरमा प्रतिलिटर ७ रूपैयाँ कर बढाइएको छ । निरन्तर बियरमा कर बढ्दै गएपछि प्रतिकार्टुन कारोबारको ६७ प्रतिशत कर तिर्नुपर्ने भएको छ ।
५० देखि १०० किलोवाटका विद्युतीय गाडीको कर पनि बढेको छ । यी गाडीमा भन्सार ५ प्रतिशत र अन्तःशुल्क १० प्रतिशत पु¥याइएको छ । खाने तेलमा पनि कर बढाइएको छ । उद्योगीहरूका अनुसार १ प्रतिशत भन्सार शुल्क रहेको सोयाबिन, सनफ्लावर र पाम आयलको भन्सार १० प्रतिशत पु¥याइएको छ । तोरीको दानाको भन्सार महसुल १ प्रतिशतबाट ५ प्रतिशत पु¥याइएको छ ।

सरकारले सांसद विकास कोष भनेर चिनिने ‘निर्वाचन क्षेत्र विकास कार्यक्रम’ ब्युँताएको छ । अर्थमन्त्री डा. महतले आगामी आर्थिक वर्ष २०८०÷८१ को बजेटमा प्रत्येक निर्वाचन क्षेत्रका लागि पाँच करोड विनियोजन गरिएको बताउनुभयो ।
“निर्वाचन क्षेत्रका जनताले अपेक्षा गरेका विकास निर्माणका स्थानीय आवश्यकताहरू जनप्रतिनिधि मार्फत सम्बोधन गर्न प्रत्येक निर्वाचन क्षेत्रका लागि ५ करोड विनियोजन गर्ने गरी संसदीय क्षेत्र पूर्वाधार विकास कार्यक्रम प्रस्ताव गरेको छु” अर्थमन्त्री महतले भन्नुभयो, “यसका लागि ८ अर्ब २५ करोड विनियोजन गरिएको छु ।”
आर्थिक वर्ष २०८०÷८१ को बजेटमा सरकारले मूल्य अभिवृद्धि करमा दर्ता भई वार्षिक एक करोड रूपैयाँसम्मको कारोबार गर्ने करदाताले अबदेखि चार÷चार महिनामा पेस गर्ने व्यवस्था गरेको छ । हाल हरेक महिना कर र सोको विवरण पेस गर्ने व्यवस्था रहेको थियो । यसपटक कर सहभागिता लागत र समय घटाई साना करदातालाई सुविधा दिने व्यवस्था सरकारले ल्याएको छ ।
सरकारले हालको वृद्धभत्तालाई यथावत राखेको छ । आगामी आर्थिक वर्ष २०८०÷८१ को बजेटमार्फत अर्थमन्त्री प्रकाशशरण महतले वृद्धभत्ता पाउने उमेर पनि हालकै निरन्तरता दिइएको बताउनुभयो ।
अर्थात् ६८ वर्ष पुगेपछि मासिक ४ हजार रुपैयाँ पाउँदै आएको वृद्धभत्तालाई निरन्तरता दिइएको उनले बताए । विभिन्न सामाजिक सुरक्षाका लागि सरकारले आगामी आर्थिक वर्षका लागि १ खर्ब ५७ अर्ब ७३ करोड बजेट विनियोजन गरेको छ । यो रकम चालु आर्थिक वर्षका लागि विनियोजित भन्दा २३ अर्ब बढी हो ।
६० वर्ष पूरा भएका दलित, एकल महिला, विपन्न, सीमान्तकृत वर्ग र समुदाय तथा बालबालिकालाई दिइँदै आएको सामाजिक सुरक्षा भत्ताका लागि पनि रकम विनियोजन गरिएको छ । छात्रवृत्ति, स्वास्थ्योपचार, स्वास्थ्य बीमा लगायतका क्षेत्रमा प्रदान गरिएको सामाजिक सुरक्षाका कार्यक्रमलाई निरन्तरता दिएको छ ।
सरकारले केही समयदेखी रोक्का रहेको जग्गाको कित्ताकाट फुकुवा गर्ने घोषणा गरेको छ । अर्थमन्त्री डा. महतले बजेटमार्फत जग्गाको कित्ताकाट फुकुवा गर्ने घोषणा गर्दै यसबाट घरजग्गा क्षेत्रको कारोबार विस्तार हुने विश्वास लिएको बताउनुभयो । भूउपयोग योजना तर्जुमा र कार्यान्वयनमा स्थानीय तहलाई सहयोग एवम् सहजीकरण गरी भूमिको वर्गीकरणलाई पारदर्शी र यथार्थपरक बनाइने बताउँदैं उहाँले वैज्ञानिक आधारमा जमिनलाई खेतीयोग्य र अन्य प्रयोजनमा वर्गीकरण गरिने व्यवस्था मिलाइने उल्लेख गर्नुभयो ।
सरकारले ९८ प्रकारका औषधि, खोप लगायतका आधारभूत स्वास्थ्य सेवा निःशुल्क उपलब्ध गराउने भएको छ । मुलुकभरका ६ हजार ७ सय ४३ वडाका आधारभूत स्वास्थ्य सेवा केन्द्रबाट यो सुविधा लिन सकिने सरकारले जनाएको छ ।

औषधि, खोप लगायतका आधारभूत स्वास्थ्य सेवा निःशुल्क उपलब्ध गराउन १ अर्ब २८ करोड विनियोजन गरिएको अर्थमन्त्री महतले बजेट घोषणाका क्रममा बताएका छन् । कार्यक्रम अन्तर्गत स्वदेशमा नै उत्पादित औषधि खरिद गर्न प्राथमिकता दिइने समेत उहाँले बताउनुभयो । बहुसंख्यक जनताले सेवा प्राप्त गर्नेगरी पायक पर्ने स्थानमा आधारभूत अस्पताल निर्माण तथा सञ्चालन गर्न प्राथमिकता दिइने महतले बताउनुभयो ।
सरकारले गाँजा खेतीको सम्भाव्यता अध्ययन गर्ने भएको छ । अर्थमन्त्री महतले औषधिजन्य प्रयोगका लागि गाँजाखेतीको सम्भाव्यता अध्ययन गरिने बताउनुभएको हो ।
स्रोतमा परेको चापलाई मध्यनजर गरी आगामी आर्थिक वर्षका लागि सबै प्रकारका प्रोत्साहन भत्ता, अतिरिक्त समय भत्ता लगायतका भत्ता सरकारले खारेज गर्ने भएको छ । अर्थमन्त्री महतले आर्थिक वर्ष २०८०÷८१ को बजेट सार्वजनिक गर्दै नयाँ सवारी साधन र फर्निचर तथा फर्निसिङ खरिदका लागि सरकारले निरुत्साहित गरेको बताउनुभयो ।
नेपाल सरकारले अनिवार्य रूपमा प्रतिनिधित्व गर्नुपर्ने बाहेक अन्य वैदेशिक भ्रमणलाई पनि निरुत्साहित गरिने बजेटमा उल्लेख छ । साथै, सवारी साधनको सुविधा प्राप्त गर्ने पदाधिकारीलाई स्वीकृत मापदण्डको आधारमा इन्धन वापत नगद नै प्रदान गर्ने व्यवस्था मिलाइने भएको छ ।
“सरकारी सवारी साधनको सञ्चालन र व्यवस्थापनमा हुने बढ्दो खर्च नियन्त्रण गर्न सरकारी सवारी साधन सुविधा प्राप्त गर्ने पदाधिकारीलाई सवारी साधनको सट्टा तोकिएको मापदण्डको आधारमा एकमुष्ट रुपमा नगदै प्रदान गर्ने व्यवस्थाको सुरुवात गरिनेछ,” अर्थमन्त्री महतले भन्नुभयो ।
सरकारले राष्ट्रिय प्राकृतिक स्रोत तथा वित्त आयोगको सिफारिसका आधारमा वित्तीय समानीकरण अनुदानतर्फ प्रदेशलाई ५८ अर्ब ६७ करोड र स्थानीय तहलाई ८७ अर्ब ३५ करोड गरी जम्मा १ खर्ब ४६ अर्ब २ करोड वित्तीय हस्तान्तरण गर्ने व्यवस्था मिलाएको छ ।
सशर्त अनुदानतर्फ प्रदेशलाई ३५ अर्ब ७२ करोड र स्थानीय तहलाई १ खर्ब ९१ अर्ब ८९ करोड गरी जम्मा २ खर्ब २७ अर्ब ६१ करोड विनियोजन गरिएको अर्थमन्त्री महतले बताउनुभयो ।
त्यसैगरी समपूरक अनुदानतर्फ प्रदेशलाई ६ अर्ब २२ करोड र स्थानीय तहलाई ७ अर्ब ५ करोड गरी जम्मा १३ अर्ब २७ करोड विनियोजन गरिएको छ । विशेष अनुदानतर्फ प्रदेश र स्थानीय तहलाई क्रमशः ४ अर्ब ४६ करोड र ८ अर्ब ७३ करोड विनियोजन गरिएको छ । राजस्व बाँडफाँटबाट प्रदेश र स्थानीय तहमा जम्मा १ खर्ब ७३ अर्ब ९२ करोड रकम हस्तान्तरण हुने अनुमान गरिएको अर्थमन्त्री महतले बताउनुभयो ।

भक्तपुर, जेठ ४
सहकारी प्रशिक्षण तथा अनुसन्धान केन्द्रका प्राचार्य विष्णु पौडेल नेतृत्वको टोलीले बिहिवार भक्तपुर नगरपालिकाका प्रमुख सुनिल प्रजापतिसँग भेटवार्ता गरेको छ । भेटमा सहकारी क्षेत्रका सम्भावना, चुनौती र समस्याबारे अनुभव आदानप्रदान तथा छलफल भएको जनाएको छ ।
सो अवसरमा प्रमुख प्रजापतिले सहकारीप्रति नागरिकहरुको वितृष्णा बढ्दै गएको अवस्थामा सहकारीलाई नियन्त्रण गर्न नीतिगत रुपमै लाग्नुपर्ने बताउनुभयो । भक्तपुर नगरपालिकाभित्र सञ्चालित सहकारी संस्थाहरुले यहाँको सामाजिक, स्वास्थ्य, शैक्षिक विकास, सम्पदा संरक्षण, विकास निर्माणलगायतका क्षेत्रमा विशेष योगदान गर्नुभएको स्मरण गर्दै उहाँले आर्थिक अनुशासन र पारदर्शिताले सहकारीहरुको दिगो विकास सम्भव हुने बताउनुभयो ।
भक्तपुर नपा वडा नं. २ का वडाध्यक्ष हरिप्रसाद बासुकलाले सहकारी क्षेत्रमा भक्तपर नपाबाट सञ्चालित विविध गतिविधिबारे प्रस्तुतीकरण दिंदै भक्तपुर नगरपालिकाको सहकारी ऐन विपरीत सञ्चालित सहकारी तथा बहुउद्देश्यीय सहकारी संस्थाहरुलाई कानून विपरीत सञ्चालनमा रोक लगाउँदै आएको बताउनुभयो ।
भक्तपुर नगर भित्र सञ्चालित सहकारीहरुलाई सहकारी सिद्धान्तअनुसार सञ्चालन गर्न नगरपालिकाले समय समयमा अनुगमन गर्दै आएको बताउँदै उहाँले अनुगमनको क्रममा देखिएका कमी कमजोरी सुधारको लागि सुझावहरु दिने र त्यसको कार्यान्वयन गराउने प्रयास नगरपालिकाले गर्दै आएको जानकारी दिनुभयो ।

प्रशिक्षार्थीहरुको जिज्ञासामाथि प्रष्ट पार्दै उहाँले विना धितो ऋण प्रवाह गर्दा धेरै सहकारी संस्थाहरु समस्यामा परेको बताउँदै सहकारीसम्बन्धी लेखा तथा कोपोमिस तालिम सञ्चालनले सहकारी व्यवस्थापनमा धेरै मद्दत पुगेको बताउनुभयो ।
कार्यक्रममा सहकारी प्रशिक्षण तथा अनुसन्धान केन्द्रका प्राचार्य विष्णु पौडेलले सहकारी प्रशिक्षण तथा अनुसन्धान केन्द्र सहकारीसम्बन्धी अनुसन्धानमूलक क्रियाकलापहरुमार्फत देशमा सहकारी आन्दोलनलाई अगाडि बढाउने उद्देश्यले सञ्चालनमा रहेको नियमनकारी संस्था भएको बताउनुभयो ।
भक्तपुर नपाले सहकारीसम्बन्धी कार्ययोजना बनाई अनुगमन गर्दै आएको पक्ष प्रशंसनीय भएको बताउँदै उहाँले भक्तपुर नपाको असल अभ्यासबाट देशका अन्य स्थानीय तहले सिक्न सकिने धेरै पक्षहरु रहेको उल्लेख गर्नुभयो ।
सहभागीहरुमध्येबाट चन्द्रपुर नगरपालिका, रौतहटका शेख नसरे आलमले सहकारीकर्मीहरुले सहकारीमार्फत देश निर्माण गर्ने र समाज उत्थान, उन्नति र प्रगतिको लागि आ—आफ्नो तर्फबाट सक्दो योगदान गर्नुपर्ने बताउनुभयो ।
कार्यक्रममा सहभागी प्रशिक्षार्थीहरुले सहकारी शाखाको बजेट र गतिविधि, कोपोमिस तालिमको सान्दर्भिकता, सहकारी अनुुगमन र नियमनमा देखिएका समस्या, सहकारी शाखाको सूचना प्रविधि प्रयोग, विना स्वीकृति सञ्चालन भएका सहकारीहरुको अवस्था, अनुगमन समिति गठन प्रक्रिया, संकटग्रस्त सहकारीको सम्पत्ति रोक्कापश्चात बचतकर्ताको रकम फिर्तामा भक्तपुर नपाको पहल आदिबारे जिज्ञासा राखेका थिए ।
उक्त कार्यक्रममा सहकारी समितिका हरिरत्न गोर्खाली र नारायणप्रसाद त्वानाबासुले पनि बोल्नुभएको थियो । अध्ययन अवलोकन भ्रमणमा देशभरिका ६५ वटा स्थानीय तहका प्रतिनिधिहरुको उपस्थिति रहेको थियो । टोलीले भक्तपुरको दरबार क्षेत्र, टौमढी क्षेत्र, दत्तात्रय भक्तपुर नगरपालिकाद्वारा सञ्चालित ख्वप कलेज, ख्वप इन्जिनियरिङ कलेज र ख्वप अस्पतालको स्थलगत निरीक्षण समेत गरेका थिए ।

भक्तपुर, बैशाख ३१
भक्तपुरको सूर्यविनायक नगरपालिका–५ चुनदेवीस्थित एक फर्निचर उद्योगमा आइतवार राती भिषण आगलागी भएको छ । साँझ करिव ७ बजे लागेको आगो करिव साढे ९ बजे नियन्त्रणमा आएको प्रहरीले जनाएको छ ।
आगलागीबाट फर्निचर उद्योग जलेर पूर्ण नष्ट भएको र सँगै रहेको चार तल्ले घरको दुई तल्लामा क्षती भएको छ । आगलागीको कारण खुल्न सकेको छैन ।

आगलागी नियन्त्रणका लागि भक्तपुरका दुई, काठमाण्डौंको एक र ललितपुरको एक गरी चार वटा दमकल प्रयोग गरिएको थियो । साथै प्रहरी, सशस्त्र प्रहरी बल, नेपाली सेना, स्थानीय बासिन्दा आगो नियन्त्रणमा जुटेका थिए ।
आगलागीको क्षतीको विवरण संकलन भइरहेको जिल्ला प्रहरी परिसर भक्तपुरका सूचना अधिकारी प्रहरी नायव उपरिक्षक बसन्त पाठकले बताउनुभयो । आगलागीमा मानवीय क्षती नभएको उहाँले बताउनुभयो । अचानक हावाहुरीसहितको वर्षाले आगलागी नियन्त्रणका केही कठिनाई भएपनि हावाहुरी रोकिएपछि परेको वर्षाले भने आगलागी नियन्त्रणका लागि सहज भएको उहाँले जानकारी दिनुभयो । घटनाको बारेमा थप अनुसन्धान भइरहेको उहाँले बताउनुभयो ।

भक्तपुर, बैशाख ८
चालु आर्थिक वर्ष २०७९÷०८० को पहिलो नौ महिनामा भक्तपुर नगर अवलोकन गर्ने विदेशी पर्यटकको संख्या एक लाख १६ हजार नाघेको छ । गत साउनदेखी चैत्र मसान्तसम्म एक लाख १६ हजार ८ सय १२ जना विदेशी पर्यटकले भक्तपुर नगरको अवलोकन गरेको हो ।
जसमध्ये ६७ हजार ७ सय जना गैरसार्क र ४९ हजार १ सय १२ जना सार्क राष्ट्र र चीनका पर्यटकहरू रहेका छन् ।
गत आर्थिक वर्ष २०७८÷०७९ को साउनदेखी चैत्र मसान्तसम्मको तुलनामा भक्तपुरमा ९३ हजार ६ सय ४५ जना विदेशी पर्यटक बृद्धि भएको हो । जसमध्ये गैर सार्क मुलुकका ५६ हजार २६० जना र चीनसहित सार्क राष्ट्रका ३७ हजार ३ सय ८५ जना छन ।

पर्यटकको संख्या बृद्धिसँगै भक्तपुर नगरपालिकाको पर्यटन शुल्कको आम्दानी समेत बृद्धि भएको छ । भक्तपुर नगरपालिकाले चालु आ.व.को साउनदेखी चैत्र मसान्तसम्म १३ करोड ४४ लाख ५५ हजार रुपैयाँ आम्दानी गरेको छ । जसमा गैरसार्क मुलुकका पर्यटकबाट १० करोड ९८ लाख ९९ हजार र चीनसहित सार्क राष्ट्रका पर्यटकबाट २ करोड ४५ लाख ५६ हजार पर्यटन शुल्क उठेको छ । जुन गत आर्थिक वर्ष २०७८÷०७९ को तुलनामा ११ करोड १४ लाख ३१ हजार पाँच सय रुपैयाँ बढी हो ।
गत आर्थिक वर्ष २०७८÷०७९ को तथ्यांक हेर्ने हो भने साउनदेखि चैत्रसम्मको अवधिमा जम्मा २३ हजार १ सय ६७ जना पर्यटकहरूले भक्तपुर अवलोकन गरेका थिए । जसमा गैरसार्कअन्तर्गत ११ हजार ४ सय ४० जना र चीनसहितका सार्क राष्ट्रका ११ हजार ७ सय २७ जना पर्यटकहरूले भक्तपुर अवलोकन गरेको तथ्यांक छ । आ.व. २०७८÷०७९ मा जम्मा २ करोड ३० लाख २३ हजार ५ सय रुपैयाँ पर्यटन शुल्क उठेको थियो ।

भक्तपुर नगरपालिकाले १ जनवरी २०२३ बाट डलरको विदेशी विनिमय दरसँग समायोजन गर्न गैरसार्क मुलुकका पर्यटकसँग उठाउँदैं आएको पर्यटन शुल्क बृद्धि गरेको थियो । यसअघि नेपाली एक हजार ५ सय लिँदैं आएकोमा गत जनवरी १ देखी डलरको विनिमय दरसँग समायोजन गर्दै एक हजार ८ सय लिन थालेको हो ।
भक्तपुर नगरपालिकाले पर्यटक शुल्कबाट उठेको रकमले नगरको सम्पदाहरू संरक्षण, शिक्षा, स्वास्थ्य, सरसफाई, विकास निर्माणजस्ता जनताका आधारभूत आवश्यकतामा खर्च गर्दै आइरहेको छ ।
भक्तपुर नगरमा हाल दैनिक ५÷६ सयको हाराहारीमा विदेशी पर्यटकहरू ऐतिहासिक सम्पदा क्षेत्र अवलोकन गर्न आएको तथ्यांकले देखाउँछ । विश्वव्यापी रुपमा फैलिएको कोरोना भाइरसको महामारीले पर्यटन क्षेत्रमा नराम्रोसँग असर पारेकोमा हाल भने विदेशीहरूको आगमनसँगै व्यवसाय फस्टाउने आशा पलाएको व्यवसायीहरु बताउँछन ।
विश्व सम्पदा सूचीमा सूचिकृत यहाँका सम्पदाहरूको अवलोकन गर्न विदेशी पर्यटकहरूको आगमन बढेसँगै भक्तपुरका पर्यटन व्यवसायीहरू पनि खुशी देखिन्छन् । पर्यटकहरूको आगमनसँगै भक्तपुरको पर्यटन व्यवसायमा पनि चहलपहल बढ्दो छ ।

भक्तपुर घुम्न आउनेमा पर्यटकहरुमा भारत, चीन, अमेरिका, जापान, दक्षिण कोरिया र युरोपेली मुलुकका पर्यटकहरूको आगमन बढ्न थालेको नगरपालिकाले जानकारी दिए ।
भक्तपुर अहिले आन्तरिक र बाह्य पर्यटकहरूको आकर्षणको केन्द्र भएको छ । पर्यटकहरूको चहलपहल बढेसँगै यहाँका विभिन्न पेशा व्यवसायीहरूमा पनि आर्थिक गतिविधिहरू बढ्न थालेको बताइन्छ ।
भक्तपुरमा पर्यटकको आगमनमा बृद्धिका साथै रात्रीकालिन बसोबासका लागि पर्यटकलाई आकर्षित गर्न नगरपालिकाले विविध कार्यक्रम आयोजना गर्दै आइरहेको छ । २०७२ को भूकम्पले क्षति गरेका सम्पदाहरुको पुनर्निर्माणका साथै ममर्त सम्भार र संरक्षणमा विशेष जोड दिँदैं आइरहेको नगरपालिकाले जनाएको छ ।
नगरपालिकाले स्थानीय जनताको साथ र सहयोगमा चालु आर्थिक वर्ष मात्र १४ वटा सम्पदाहरूको पुनःनिर्माण र जीर्णोद्धार कार्य सम्पन्न गरिसकेको छ भने एक दर्जन भन्दा बढी सम्पदाहरूको पुनःनिर्माण र जीर्णोद्धार कार्य भइरहेको छ ।
पर्यटकको आकर्षणका लागि नगरपालिकाले सन्ध्याकालीन सांस्कृतिक सम्पदा पदयात्रा, प्रभातकालिन सम्पदा पदयात्रा, स्थानीय पथप्रदर्शकहरुलाई तालिम तथा परिचालन, पर्यटन व्यवसायीहरुसँग छलफललगायतका कार्यमा जोड दिँदै आएको छ ।
त्यसैगरी पर्यटन गतिविधि बढाउन सांस्कृतिक कार्यक्रमसहित योम्हारी उत्सव, भजन प्रतियोगिता, स्थानीय उत्पादनलाई प्रवद्र्धन गर्न घरेलु उत्पादन मेला, गाईजात्रामा सांस्कृतिक प्रतियोगितालगायतका गतिविधिहरू नगरपालिकाले सम्पन्न गरेको छ ।

भक्तपुर, बैशाख ६
भक्तपुरको एक सहकारीका प्रबन्ध निर्देशकलाई कालोमोसो दलेको अभियोगमा प्रहरीले ५ जनालाई मंगलवार पक्राउ गरेको छ । जिल्लाको मध्यपुर थिमि–३, गठ्ठाघरस्थित कृषि विकास वचत तथा ऋण सहकारी संस्थाका प्रबन्ध निर्देशकलाई कालोमोसो दलेको अभियोगमा प्रहरीले ५ जनालाई पक्राउ गरेको हो ।
पक्राउ पर्नेहरुमा मध्यपुर थिमि नगरपालिका–७, धुन्चेपाखा बस्ने ४४ वर्षिय ४४ मुरारी नेपाल, ओखलढुंङगा हर्कपुर घर भई हाल भक्तपुर गठ्ठाघर ३६ वर्षिया प्रेम कुमारी तामाङ, झापा कोहोरा गाउँपालिका–२ घर भई हाल गठ्ठाघर बस्ने ३९ वर्षिय कृष्ण संग्रौला, मध्यपुर थिमि नगरपालिका–९ बोडे बस्ने ६३ वर्षिय गोरख बहादुर गिरी र ओखलढुङगा लिखु गाउँपालिका–४ घर भई हाल मध्यपुर थिमि नगरपालिका –३, कौशलटार बस्ने ३४ वर्षिया पबित्रा तामाङ छन ।
सो सहकारीका प्रबन्ध निर्देशकलाई हातपात गरी कालोमोसो समेत दली जुत्ताको माला लगाइएको भन्ने खबर प्राप्त हुनासाथ प्रहरी नायव निरिक्षक केशव बशादुर कार्की र प्रहरी हवल्दार सञ्जिव कुमार चौधरी नेतृत्वको प्रहरी टोली घटनास्थल पुगेको प्रहरी परिसर भक्तपुरका प्रमुख प्रहरी उपरिक्षक एसपी प्रजित केसीले बताउनुभयो ।
विगत १२ वर्षदेखी सञ्चालनमा रहेको उक्त सहकारी केही महिना यता संकटग्रष्ट अवस्थामा सञ्चालन भइरहेको छ । सहकारीले सदस्यहरुको निक्षेप फिर्ता गर्न सकेको छैन । सहकारीका सदस्यहरुले उजुरी दिएपछि मध्यपुर थिमि नगरपालिकाले उक्त सहकारीका सबै सम्पत्ति रोक्का राखेको छ ।

भक्तपुर, बैशाख ४
भक्तपुर क्षेत्र नं. २ का प्रतिनिधि सभा सदस्य एवम् नेपाली कांग्रेस भक्तपुरका सभापति दुर्लभ थापाले राजनीतिलाई व्यापार ठान्ने नेतालाई जनताले बहिस्कार गर्नुपर्ने बताउनुभएको छ । भक्तपुरमा गत चैत्र २३ गतेदेखी शुरु भएको सातौं भक्तपुर औद्योगिक, सांस्कृतिक, पर्यटन तथा व्यापार महोत्सवको आइतवार समापन समारोहमा सांसद थापाले केही भ्रष्ट नेताका कारण राजनीति बदनाम भएको टिप्पणी गर्दै त्यस्ता नेतालाई जनताले बहिस्कार गर्नुपर्ने बताउनुभएको हो ।
“अहिले राजनिति एउटा रातारात करोड पति बन्ने ब्यापार बनेको छ । केही भ्रष्ट नेताका कारण राजनीति नै बदनाम हुँदै गएको छ । जनताले त्यस्ता ब्यापार ठानेर राजनितिमा आउने र भ्रष्ट नेतालाई आजै देखी बहिस्कार गर्नु जरूरी छ,” सांसद थापाले भन्नुभयो ।
उहाँले राजनिति एउटा समाज सेवा भएको बताउँदैं आफुले राजनितिलाई सेवाको रूपमा लिई अगाडि बढेको जिकिर गर्नुभयो । उहाँले जनताले दिएको जिम्मेवारी ईमान्दारीपूर्वक निभाउने प्रतिवद्धता व्यक्त गर्नुभयो ।

सांसद थापाले महोत्सव, मेला र प्रदर्शनीले स्थानीय उत्पादन, कृषि, पर्यटन, घरेलु तथा साना उद्योग र व्यापार व्यवसायमा टेवा पुग्ने विश्वास व्यक्त गर्दै भन्नुभयो, “स्थानीय स्तरमा उत्पादन भएका बस्तुहरूले मेलामा बजार पाएका छन । खानेकुरा देखि यहाँका परिकारले मेला अबधिमा बजार पाएका छन । यसले भक्तपुरको चिनारी गराएको छ ।”
उहाँले बिस्का जात्रा जस्तो मौलिक चाडपर्वले आम नागरिकलाई पिडा र समस्या भुलाएर खुसी बनाउने गरेको जात्राका क्रममा जनतासँग हातेमालो गरेर अघि बढ्दा अनुभुती भएको चर्चा गर्दै देश र जनताको खुसीका लागि कांग्रेस जो कोहीसँग हातेमालो गरेर अघि बढ्न तयार रहेको बताउनुभयो ।
सो अवसरमा उहाँले अन्तर्राष्ट्रिय खेलमा पदक प्राप्त गर्ने सात जना खेलाडीलाई नगद सहित सम्मान गर्नुका साथै महोत्सवलाई सफल बनाउन विभिन्न तवरले सहयोग गर्नेलाई समेत सम्मान गर्नुभयो ।
कार्यक्रममा महोत्सव आयोजक औद्योगिक शान्ति नेपालका अध्यक्ष सन्दिप महत, जिल्ला खेलकुद समिति भक्तपुरका अध्यक्ष दिपक थापालगायतले महोत्सवका गतिविधिबारे चर्चा गर्दै महोत्सव सफल भएको बताउनुभयो । कार्यक्रममा रचना रिमाल, सुमित थापा, अनिता बस्नेत (माष्टर्नी) लगायतले सांगितिक प्रस्तुति गरेका थिए ।

भक्तपुर, चैत्र १८
नेपाल मजदुर किसान पार्टीका अध्यक्ष नारायणमान बिजुक्छेंले स्वदेशी उत्पादनको प्रयोग गर्नुपर्नेमा जोड दिनुभएको छ । स्थानीय उत्पादनबाट पर्यटन प्रर्वद्धन गर्ने उद्देश्यले भक्तपुर नगरपालिकाले नासमना र तालाक्वमा आयोजना गरेको दुई दिने घरेलु मेलाको उद्घाटन गर्दै अध्यक्ष बिजुक्छेंले देशलाई आत्मनिर्भर बनाउन स्वदेशी उत्पादनको प्रयोग गर्नुपर्नेमा जोड दिनुभएको हो ।
उहाँले देशमै उत्पादन हुने सामग्रीहरु सबैले खरिद गरेर सहयोग गर्न विशेष जोड दिँदैं देशमा उत्पादन भएका घरेलु उत्पादन तथा सामग्रीहरुलाई उत्साहित गर्नुपर्ने बताउनुभयो ।

भक्तपुर नगरपालिकाका प्रमुख सुनिल प्रजापतिले घरेलु उद्योगले नयाँ नयाँ रोजगारी सृजना गर्ने, आत्मनिर्भर बनाउने र देशको व्यापार घाटा कम गर्न टेवा पुर्याउने भएकाले घरेलु उद्योग देश विकासको आधार समेत भएको बताउनुभयो ।
वडा नं ३ का वडा अध्यक्ष राजकृष्ण गोराले मेला भक्तपुरको मौलिक उत्पादन प्रचारप्रसार गर्न महत्वपूर्ण हुने बताउनुभयो ।
वडा नं ९ का वडा अध्यक्ष रविन्द्र ज्याख्वले स्थानीय उत्पादनलाई बढावा दिन र व्यापक प्रचारप्रसार नगरपालिकाले विभिन्न समयमा मेला तथा महोत्सवको आयोजना गर्दै आइरहेको बताउनुभयो ।

दुई दिनसम्म चल्ने मेलाको प्रमुख आकर्षणहरुमा भक्तपुरका मौलिक उत्पादनहरु, परम्परागत घरेलु उद्योगबाट उत्पादित वस्तु, काष्ठकला, धातुकला र प्रस्तरकलाहरु, हस्तकलाका सामाग्रीहरु, नेवारी खाजा स्टल र सांस्कृतिक प्रस्तुती रहेका छन् ।
भक्तपुर घरेलु तथा साना उद्योग संघ र पर्यटन विकास समितिको सहआयोजनामा आयोजित मेलाको प्रचारको लागि वडा नं. ८ जेँला टोलबाट दत्तात्रय, सलागणेश, नागपोखरी, महालक्ष्मी, भुलाछेँ, तुछिमला, तुलाछेँ, त्रिपुरासुन्दरी, दरबार क्षेत्र, खौमा, इताछेँ, बसपार्क, भार्वाचो, तेखापुखु, वंशगोपाल हुँदै नासमनामासम्म प्रभातकालिन पदयात्रा आयोजना गरिएको थियो ।

भक्तपुर, चैत्र १६
भक्तपुर क्षेत्र नं. २ का प्रतिनिधि सभा सदस्य एवम् नेपाली कांग्रेस भक्तपुरका सभापति सांसद दुर्लभ थापाले विकासमा राजनीति नगर्न आग्रह गर्नुभएको छ । सूर्यविनायक – धुलिखेल, धुलिखेल – सिन्धुली – बर्दिवास सडक आयोजना अन्र्तगत सूर्यविनायक – साँगा सडक खण्डको बिस्तार कार्य बिहिवार भक्तपुरमा शुभारम्भ गर्दै सांसद थापाले विकास निर्माणमा राजनीतिक दलहरुबीच सहकार्य र समन्वय हुनुपर्नेमा जोड दिनुभयो ।
उहाँले सडक सबैको साझा सम्पत्ति भएको बताउँदैं यसको निर्माण समयमा सम्पन्न गर्न स्थानीय तह, प्रदेश र संघिय संसदका जनप्रतिनिधिहरुले सहकार्य समन्वय गर्नुपर्नेमा जोड दिनुभएको हो ।
सडक सबैको साझा सम्पत्ति हो । यसको निर्माण समयमा सम्पन्न गर्नुपर्छ । यसका सरोकारवाला सबैले अपनत्व लिएर अघि बढ्नु पर्छ, उहाँले भन्नुभयो ।

उहाँले बजेटका कारण सडक निर्माणको काम रोकिनु नहुने बताउँदैं समयमा बजेट उपलब्ध गराउन संघिय सरकारमा आवश्यक पहल गर्ने प्रतिवद्धता जनाउनुभयो । उहाँले भाषण धेरै गर्नेले काम नगर्ने चर्चा गर्दै अहिलेको परिस्थितीमा भाषण भन्दा बढी काम गरेर देखाउनु पर्ने जरुरी रहेको औंल्याउनुभयो ।
उहाँले कमलविनायक नगरकोट सडकको दुरावस्थाले त्यहाँका जनताले जुन खालको सास्ती व्यहोर्नु पर्यो त्यस्तो अवस्था यो सडकमा आउन नहुने बताउनुभयो । काठमाण्डौंको चक्रपथ निर्माण सम्पन्न भएको केही वर्षमा पुनः विभिन्न निर्माण कार्यका लागि भत्काउनु परेको उदाहरण प्रस्तुत गर्दै सूर्यविनायक धुलिखेल सडकमा पनि त्यस्तो अवस्था आउन नदिन सडकका ओभरहेड क्रस ब्रिजलगायतका आवश्यक पुर्वाधार समेत एकै पटकमा निर्माण हुने गरी कार्य अघि बढाउन सडक आयोजनालाई निर्देशन दिनुभयो ।

उहाँले एक पटक निर्माण भएको सडकमा कम्तिमा २५ वर्ष भत्काउन र पुनः निर्माण गर्न नपर्ने गरी योजनावद्ध र गुणस्तरिय कार्य हुनुपर्नेमा जोड दिँदैं निर्माण कम्पनीलाई समयमा निर्माण कार्य सम्पन्न गर्न सुझाव दिनुका साथै त्यसका लागि आवश्यक सहकार्य समन्वय गर्ने प्रतिवद्धता जनाउनुभयो ।
बागमती प्रदेशका सांसद किरण थापाले २०७४ मा स्थानीय तहको जनप्रतिनिधिमा निर्वाचित भए लगत्तै सूर्यविनायकदेखी जगातीसम्मको सभिर्स ट्रयाक खोल्ने क्रममा स्थानीय जनताले कुनै अवरोध नगरी सहयोग गरेको स्मरण गराउँदैं योजनावद्ध ढंगले समयमा निर्माण कार्य सम्पन्न हुने गरी कार्य गरे स्थानीयबाट कुनै वाधा अड्चन नआउने विश्वास दिलाउनुभयो ।
उहाँले सडक निर्माण गर्दा निर्माण सामग्री, सडकका संरचनाले दुर्घटना हुन सक्ने र मानवीय तथा भौतिक क्षती हुनेतर्फ सचेत भइ निर्माण कार्य अघि बढाउनुपर्नेमा जोड दिनुभयो । सूर्यविनायक साँगा सडक अत्याधिक सवारी चाप हुने सडक भएकाले निर्माण कार्यलाई सहज बनाउन दुई पाङग्रे र हलुका सवारी साधनलाई वैकल्पिक मार्गको व्यवस्था गर्न सुझाव दिनुभयो ।

सूर्यविनायक नगरपालिकाका प्रमुख बासुदेव थापाले सडक निर्माणका लागि नगरपालिकाले आवश्यक सहयोग र समन्वय गर्ने प्रतिवद्धता जनाउँदैं सडक निर्माणमा अनुशासित, मेहनत र लगनशिलताका साथ सम्झौतामा उल्लेख भए अनुसार काम गरे कुनै वाधा अवरोध नआउने बताउनुभयो ।
भक्तपुर नगरपालिका वडा नं. ७ का वडाअध्यक्ष उकेश कवाँले पारदर्शी ढंगले मापदण्ड अनुसार गुणस्तरिय कार्य हुनुपर्ने र सडकमा आवश्यक क्रसिङ व्रिजहरु पनि अहिले नै निर्माण हुनुपर्नेमा जोड दिनुभयो ।
आयोजनाका प्रमुख राजेन्द्र प्रसाद दासले २०७९ पुसमा ठेक्का सम्झौता भएको यो सडकको निर्माण अवधी ३ वर्षको भएको जानकारी दिँदैं स्थानीय, प्रदेश र संघिय जनप्रतिनिधिहरुको साथ सहयोग समन्वय र सहकार्य भए समयमा काम सम्पन्न हुने विश्वास दिलाउनुभयो । उहाँले सडक निर्माण गर्दा सडक सुरक्षालाई विशेष ध्यान दिने र क्रसिङ व्रिजको लागि आवश्यक पहल गर्ने प्रतिवद्धता जनाउनुभयो ।
कार्यक्रममा निर्माण कम्पनीका प्रमुख मुकेश पन्त, ईं सि एन यादवले सूर्यविनायक साँगा खण्डको करिव ७ दशमलव ५ किलोमिटर सडक मध्ये पलाँसेसम्म ६ लेन र पलाँसेदेखी साँगा खण्ड ४ लेनको हुने जानकारी दिँदैं सम्झौता बमोजिम गुणस्तरिय कार्य गरी तोकिएको समयमा निर्माण सम्पन्न गर्ने प्रतिवद्धता जनाउनुभयो ।

भक्तपुर, चैत्र ११
भक्तपुरमा ‘सातौं भक्तपुर औद्योगिक, साँस्कृतिक, पर्यटन तथा व्यापार महोत्सव–२०७९÷८०’ आयोजना हुने भएको छ । नयाँ वर्ष २०८० को अवसरमा भक्तपुरको सल्लाघारीमा औद्योगिक शान्ति नेपाल संस्था, मध्यपुर ब्वाईज व्याण्डकोे आयोजना र भक्तपुर जिल्ला खेलकुद विकास समितिको सहयोगमा उक्त महोत्सव हुने भएको हो ।
महोत्सव यही चैत्र २३ गतेदेखी २०८० बैशाख ३ गतेसम्म सञ्चालन हुने शनिवार आयोजित पत्रकार सम्मेलनमा जानकारी दिए । महोत्सवमा २०० भन्दा बढी स्टल रहनेछन् । महोत्सवमा मानवीय जीवनमा दैनिक प्रयोगमा आउने सम्पूर्ण उपभोग्य सामग्रीहरु, खाद्यान्नका सामग्रीहरु, विभिन्न प्रकारका लत्ताकपडाहरुका स्टलहरु हुनेछ ।
यसैगरी कृषि तथा हस्तकलाका सामग्रीहरु, भाँडाकुडाका सामाग्रीहरु, पर्यटन प्रवद्र्धन गर्ने स्टल रहने महोत्सव आयोजक समितिका संयोजक एवम् जिल्ला खेलकुद समिति भक्तपुरका अध्यक्ष दिपक थापाले बताउनुभयो ।
महोत्सवमा अटोमोवाईल, राष्ट्रिय तथा स्थानीय खाना महोत्सव, विभिन्न ब्राण्डका मोवाईल, ईलेक्ट्रोनिक्स सामानहरुको स्टल रहने औद्योगिक शान्ति नेपाल संस्थाका अध्यक्ष सन्दीप महतले जानकारी दिनुभयो । उहाँले महोत्सवमा २० देखी ५० प्रतिशतसम्म छुट दिने व्यवस्था गरिएको छ ।
“हामीले उपभोक्तालाई एकै थलोबाट सम्पूर्ण सामान उपलब्ध गराउने उद्देश्यले नयाँवर्षको अवसरमा बृहत औद्योगिक तथा व्यापार महोत्सव आयोजना गर्न लागेको हौं,” संयोजक थापाले भन्नुभयो ।

आयोजकका अनुसार महोत्सवमा बाल उद्यान, रोटेपिङ्ग, मारुती सर्कस, कोलम्बस, जादु, बालबालिकाको खेल सामाग्रीका साथै दर्जनौं राष्ट्रिय स्तरका कलाकारहरुको सांगितिक र हाँस्य व्यङ्गय सहितका मनोरञ्जनात्मक प्रस्तुती रहनेछ । महोत्सवमा हरेक दिन व्याण्डको प्रस्तुति, नृत्य प्रतियोगिता, बि–बोईङ र अन्य मनोरञ्जनात्मक कार्यक्रमहरुको समेत आयोजना हुनेछ ।
महोत्सवमा करिब ५ लाख उपभोक्ताले अवलोकन तथा सेवा लिने र करिब स्टलहरुबाट करिब १० देखि १२ करोड रुपैयाको कारोबार हुने अपेक्षा आयोजकले गरेको छ । प्रवेश शुल्क रु. ५० र ७० रहेकोका विद्यार्थी र जेष्ठ नागरिकलाई छुटको व्यवस्था गरिएको संयोजक थापाले बताउनुभयो ।
बैशाख ४ गते भने विशेष सांस्कृतिक कार्यक्रम हुने र सो कार्यक्रमको टिकटको मुल्य रु. २०० रहेको आयोजकले जानकारी दिएको छ ।