Author: news

भक्तपुर, जेठ २०
काठमाण्डौंमा मेलम्चीको पानी वितरण दुई महिना बन्द हुने भएको छ । मेलम्ची आयोजनाको सुरुङमार्गको परीक्षण कार्यविधि (प्रोटोकल) पुरा गर्न आगामी असार १ गतेदेखी दुई महिना उपत्यकामा मेलम्चीको पानी वितरण बन्द गर्न लागेको हो ।
काठमाण्डौंमा मेलम्चीको पानी वितरण गर्नुअघि सुरुङको प्रोटोकल पुरा गरिएको थिएन । उद्घाटनको हतारोले प्रोटोकल पुरा नहुँदैं पानी वितरण शुरु गरेको थियो । सुरुङको प्रोटोकल अनुसार सुरुङमा पानी भरेपछि ग्याल्थुम, अम्बाथान, सिन्धु र सुन्दरीजलका ४ वटा फ्लसिङ टनेलबाट बाहिर फाल्नुपर्ने थियो । त्यसपछि सुरुङ पुरै खाली गरेर समस्या भए÷नभएको अध्ययन गर्नुपर्ने थियो । त्यसैको लागि अहिले पानी बन्द गर्न लागेको आयोजनाका प्रवक्ता राजेन्द्र पन्तले बताउनुभयो ।
उहाँका अनुसार असार १ देखि पानी पठाउन बन्द गरेपछि सुरुङ खाली हुन १५ दिन लाग्छ । त्यसपछि विज्ञ र प्राविधिकले सुरुङभित्र गएर अवस्थाको अध्ययन गर्नेछन् । समस्या देखिएको भए त्यसको समाधान गर्नेछन् । ‘सुरुङमा कुनै समस्या नदेखिएमा १५ दिनमा भित्रको सुपरीवेक्षणको काम सकिन्छ,’ प्रवक्ता पन्तले भन्नुभयो, ‘त्यसपछि सुरुङमा पानी भर्न १५ दिन लाग्छ, समस्या देखिएमा भने भित्र सुधारको काम गर्न थप समय पनि लाग्न सक्छ ।’
साढे २६ किलोमिटर लामो सुरुङमा फागुन १० गते पानी भर्न शुरु गरेको थियो । सुरुङ भरिएपछि फागुन २२ गते सुन्दरीजलमा पानी खसालिएको थियो । सुरुङबाट सफा पानी आउन थालेपछि वितरण केन्द्रबाट पानी प्रशोधन गरेर चैत १५ गतेबाट वितरण लाइनमा पठाउन थालिएको थियो ।

भक्तपुर, जेठ २०

भक्तपुरका कोरोना संक्रमितको संख्या २० हजार नाघेको छ । २०७७ बैशाख ३० गते पहिलो पटक कोरोना संक्रमण देखिएको भक्तपुरमा बुधवार १५६ जना थपिएसँगै यहाँ कोरोना संक्रमितको संख्या २० हजार १४६ पुगेको हो । जसमध्ये ११ हजार ६२ पुरुष र ९ हजार ८४ महिला छन ।
स्वास्थ्य कार्यालयका अनुसार भक्तपुरमा ८५ दशमलव ४४ प्रतिशत संक्रमित संक्रमण मुक्त भएका छन । यहाँ हालसम्म १७ हजार २१४ संक्रमण मुक्त भएको स्वास्थ्य कार्यालयका प्रमुख कृष्णबहादुर मिजारले बताउनुभयो । संक्रमण मुक्त भएकाहरुमा ९ हजार ४४६ पुरुष र ७ हजार ७६८ महिला छन ।
भक्तपुरमा २ हजार ६६७ सक्रिय संक्रमित छन । ती मध्ये १०५ पुरुष र ६७ महिला अस्पताल र संस्थागत आइसोलेसन केन्द्रमा उपचाररत छन । त्यस्तै एक हजार ३४० पुरुष र एक हजार १५५ महिला होम आइसोलेसनमा छन ।
भक्तपुरमा पछिल्लो २४ घण्टामा थप दुई जनाको कोरोना संक्रमणका कारण मृत्यु भएको छ । मृत्यु हुनेमा चाँगुनारायण नगरपालिकाका एक पुरुष र मध्यपुर थिमि नगरपालिकाकी महिला हुन । यो सँगै भक्तपुरमा २६५ जनाको कोरोना संक्रमणका कारण मृत्यु भएको छ ।
जिल्लामा सबैभन्दा धेरै मध्यपुर थिमि नगरपालिकामा ९० जनाको मृत्यु भएको छ । ती मध्ये ६२ पुरुष र २८ महिला छन । त्यस्तै भक्तपुर नगरपालिकामा ४२ पुरुष र २९ महिलागरी ७१ जनाको मृत्यु भएको मिजारले बताउनुभयो । चाँगुनारायण नगरपालिकामा २३ पुरुष र ११ महिलागरी ३४ जना र सूर्यविनायक नगरपालिकामा ४४ पुरुष र २६ महिलागरी ७० जनाको मृत्यु भइसकेको छ ।

भक्तपुर, जेठ २०

एमाले नेता गोकर्ण विष्टले पार्टीको सम्पूर्ण एकता नै आफ्नो विश्वास र अडान भएको बताउनुभएको छ । उहाँले बिहिवार सामाजिक सञ्जाल फेसबुकमार्फत पार्टी र जनसंगठनका सबै तहका कमिटीहरूलाई २०७५ जेठ २ गतेको पूर्ववत् अवस्थामा फर्काएर राष्ट्र, जनता, लोकतन्त्र र कम्युनिस्ट आन्दोलनका पक्षमा निरन्तर लागिरहने बताउनुभएको हो ।
‘पार्टी र जनसंगठनका सबै तहका कमिटीहरूलाई २०७५ जेठ २ गतेको पूर्ववत् अवस्थामा फर्काएर राष्ट्र, जनता, लोकतन्त्र र कम्युनिस्ट आन्दोलनको हितमा सही विचार र कार्यदिशा सहितको सबल एवं एकीकृत कम्युनिस्ट पार्टी निर्माण गर्ने हाम्रो चाहना हो’, विष्टले भन्नुभयो, ‘ हामी यसमा निरन्तर प्रयत्नशील छौँ । अन्तिमसम्म लागिरहनेछौँ । पार्टीको सम्पूर्ण एकता नै हाम्रो विश्वास हो । हाम्रो अडान हो ।’

विष्टले नेकपा एमालेको एकता जोगाउन भैरहेको प्रयासलाई कमजोर पार्ने दुराशयले आफ्नो नाम समेत जोडेर केही सञ्चार माध्यमहरुमा भ्रमपूर्ण समाचार प्रकाशित गर्दै एकताका लागि गरिएका इमान्दारपूर्ण प्रयासहरूलाई कमजोर पार्न कसले, किन र कसका लागि झुठा प्रचार गराउँदैछन् ? भन्दै प्रश्न समेत गर्नुभएको छ ।
विष्टसहित सुरेन्द्र पाण्डे, घनश्याम भुषाल र योगेश भट्टराई ओली समुहका नेताहरुसँग निरन्तर संवादमा छन् । विष्ट ओलीतर्फ नै लाग्न सक्ने संकेत गरेका खबर आएका थिए । यसबारे प्रष्टाउन विष्टले बिहीबार फेसवुकमा आफ्ना धारणा राख्नुभएको हो ।

यस्तो छ बिष्टको भनाई

नेकपा एमालेको एकता जोगाउन भैरहेको प्रयासलाई कमजोर पार्ने दुराशयले मेरो नाम समेत जोडेर केही सञ्चार माध्यमहरूमा भ्रमपूर्ण समाचार प्रकाशित गरिएका छन् ।

एकताका लागि गरिएका इमान्दारपूर्ण प्रयासहरूलाई कमजोर पार्न कसले, किन र कसका लागि यस्ता झुठा प्रचार गराउँदै छन् ? समयले नै बताउला ।

पार्टी र जनसंगठनका सबै तहका कमिटीहरूलाई २०७५ जेठ २ गतेको पूर्ववत अवस्थामा फर्काएर राष्ट्र, जनता, लोकतन्त्र र कम्युनिस्ट आन्दोलनको हितमा सही विचार र कार्यदिशा सहितको सबल एवं एकीकृत कम्युनिस्ट पार्टी निर्माण गर्ने हाम्रो चाहना हो ।

रामकृष्ण अधिकारी

जेठ २ मा पार्टी फर्काउन तयार ओलीको नेपाल पक्षका नेतासँग एउटै शर्त छ-अदालतमा वुझाएको हस्ताक्षर फिर्ता लिनुपर्ने 

काठमाडौं । झण्डै २७ वर्ष आफैले हाँकेको पार्टी एमालेसँगको साइनो सम्वन्ध तोडदै छुट्टिन ‘तम्तयार’ देखिएका झलनाथ खनाल र माधव नेपाल समुहभित्रै प्रधानमन्त्री केपी ओलीले विभाजन प्रयास थालेका छन् । पार्टी स्थायी कमिटिबाट नेपाल, खनाल सहित ११ विघटित संसदका सांसदलाई निश्कासन गरेका ओलीले नेपाल समुहका प्रभावशाली चार नेतालाई मूल घरमै अल्झाउने अस्त्र फ्याँकेका छन् ।

नेपाल समुहमा रहेका चार नेता सुरेन्द्र पाण्डे, घनश्याम भुषाल, योगेश भट्टराई र गोकर्ण विष्टको मनोविज्ञान वुझेरै ओलीले नेपालसमुहभित्र खेल्न थालेका हुन् । चार नेतालाई नेपाल समुहबाट अलग्याउन सके अन्य युवा पुस्ताका नेता-कार्यकर्तालाई पनि नेपाल समुहबाट छुट्टयाउन सकिने वुझाईमा ओली छन् ।

त्यसका लागि नेपाल समुहका एक-एक नेतालाई बालुवाटार बोलाएर प्रधानमन्त्री ओलीले सघन छलफल जारी राखेका छन् । सुरेन्द्र पाण्डे, घनश्याम भुषाल लगायतका थप १२ नेतालाई २४ घण्टे स्पष्टीकरण सोधेका ओलीले हप्तादिन पुग्दा पनि कारवाही प्रक्रिया अगाडी नबढाई नेपाल समुह फोर्ने रणनीति अगाडी बढाएका हुन् ।
तीन दिन अगाडी मात्रै ओलीले नेपाल समुहका नेता भीम् आचार्यलाई बालुवाटार बोलाएर झण्डै चार घण्टा कुरा गरेर फर्काए । सुवास नेम्वाङ, विष्णु पौडेल र प्रदीप ज्ञवालीलाई परिचालन गरेर नेपाल पक्षका नेताहरु पाण्डे, भुषाल, भट्टराई र विष्टलाई ‘इन्गेज’ गराईराखे ।

एमालेभित्रै स्पेस खोजिरहेका भुषाल वाहेकका नेतासँग त ओली पक्षका नेताहरुले भित्रीरुपमा अनेकौ पटक वार्ता गरेका थिए । भुषालसहित पनि दुई पटक ओली पक्षका नेताले सम्वाद गरेर पार्टीभित्रको एकता जोगाउने , नेपाल र खनाललाई कमजोर बनाउने रणनीति अवलम्वन गरिरहेका छन् ।

ओलीले नेपाल पक्षका चार नेता सामु २०७६ जेठ २ मा पार्टी फर्काउन र त्यसका लागि नीतिगत बक्तब्य दिन आफु तयार रहेको प्रष्टाईसकेका छन् । तर त्यसका लागि उनले नेपाल पक्षका नेतासँग शर्त राखेका छन्,-सर्वाेच्च अदालतमा शेरवहादुर देउवाको पक्षमा लागेर गरेको हस्ताक्षर फिर्ता लिनुपर्ने र विगत गतिविधिप्रति आत्मआलोचित हुनुपर्ने ।’ ‘योगेशहरु यसका लागि तयार भईसक्नुभएको छ,’ ओली पक्षका एक स्थायी समिति सदस्यले मेरोन्यूज सँगको कुराकानीका क्रममा भने,–‘यसको परिणाम अव छिट्टै देखिन्छ ।’

संसद पूर्नस्थापना र देउवालाई प्रधानमन्त्री बनाउन माग गदै सर्वाेच्चमा हस्ताक्षर बुझाउन योगेश गएका थिएनन । त्यसमा गोकर्ण विष्टको पनि हस्ताक्षर छैन । घनश्याम र सुरेन्द्रको मात्र त्यहाँ हस्ताक्षर छ । ‘सुरेन्द्रले वारेसनामामार्फत गराउनुभएको हो, उहाँ फिर्ता लिन तयार हुनुहुन्छ, घनश्यामसग भने अझै यसमा छलफल जारी छ,’ ओली निकटका ति नेताले भने ।

नेपाल समुहका यी प्रभावशाली चार नेतालाई अलग्याउन सके उनीहरुसँग निकट रहेका गणेश पहाडी, दीपकप्रकाश भट्ट, नारायण खतिवडा लगायतका नेताहरु पनि नेपाललाई छोडेर एमालेमै रहने आकलन ओली पक्षले गरेको छ । यो समुहमा यज्ञराज सुनुवार स्पष्ट भई नसकेपनि उनी पनि आउन सक्ने सम्भावना ओली पक्षले गरेको छ ।

यस्तो अवस्थामा नेपाल समुहमा अमृत बोहोरा, मुकुन्द न्यौपाने, रघुजी पन्त, वेदुराम भुषाल लगायतका नेताहरु मात्र देखिने छन् । भीम रावल, युवराज ज्ञवाली, अष्टलक्ष्मी शाक्यपनि नेपाल समुहमा हुनेछन् । पार्टी विभाजित हुँदा नेपाल समुहलाई यसरी विभाजन गर्न सकिए फिल्डमै अलिक पकड भएका रावल वाहेक अन्य नेताहरु नरहेको निश्कर्ष सहित ओली समुह नेपाल समुह विभाजित गर्ने कसरथमा जुटेको हो ।

युवा पुस्तामा राजेन्द्र राई र जगन्नाथ खतिवडा मात्र नेपाललाई साथ दिन कम्मर कसेका देखिन्छन् । ठकुर गैरे एकताका लागि नै पहल गरिरहेका छन । रामकुमारी झाँकी पनि योगेश, घनश्यामहरु एमालेभित्रै मिल्न प्रयास गरेपछि अहिले वीचवीचमा देखिन खोजेकी छिन् । कतिपय नेतालाई ओली आफैले बालुवाटार बोलाएर छलफल गरिरहेका छन् । भीम आचार्य, विरोध खतिवडालगायतसँग ओली आफैले छलफल गरिरहेको बालुवाटार स्रोतको भनाई छ ।

ओलीले कथंकदाचित अदालतबाट संसद पूर्नस्थापना भयो भनेपनि निर्वाचित सांसद आफनो पक्षमा पार्ने र समानुपातिक लाई फेर्ने गरी योजना बनाएको देखिन्छ । त्यसो गर्दा फेरि पनि सरकार गठनको कोसिस हुँदा आफ्नै पल्लाभारी बनाउने गरी ओली अगाडी बढेका देखिन्छन् ।

अहिले नेपाल समुहमा रहेका जिल्ला तहका करिव ६० देखि ७० प्रतिशत नेताहरु पार्टी फोडेरै भएपनि ओलीलाई ‘सवक’ सिकाउनु पर्ने बताईरहेका छन् । तर विभाजनकै घडीमा पुग्दा र ओलीले नेपाल समुहभित्रका योगेश, सुरेन्द्रहरुलाई मिलाउँदा त्यो समिकरणमा फेरवदल गर्नेगरी खेल्न सकिनेमा ओली समुह देखिएको छ । सोही कारण पनि नेपाल समुह पार्टीभित्रै टास्सिएर अव धेरै नखेलिरहुन् भन्ने ओलीले ठानेको देखिन्छ ।

उनी माधव नेपालले पार्टी फोड्ने नै भएपनि छिटो फोडिदिएर जाउन भन्ने पक्षमा उभिईसकेका छन् । त्यहीकारण पनि उनले एक सार्वजनिक कार्यक्रममै माधव नेपालसँगको सम्वन्ध अव ‘पास्ट टेन्स’ भईसकेको बताएका थिए । अव नेपाल, झलनाथ खनाल र भीम रावल एमालेमा नरहने सम्मको निश्कर्षमा ओली पुगिसकेका छन् । त्यसो हुँदा ओलीले नेपालले पार्टी फोडेमा त्यही समयमा एमाले २०७५ जेष्ठ २ मा पुगेको सन्देश दिने गरेर वक्तब्य दिने तयारी सम्म गरेका छन् ।

खासगरी नेपाललाई ‘घर न घाट’को बनाउने योजना ओलीको देखिन्छ । ओलीले आफु निकट नेताहरुसँग भन्ने गरेका पनि छन्,– एमाले छोड्दा सिपि मैनालीको जुन हाल अहिले भएको छ, माधव नेपालको हालत पनि हुने त्यही हो । माधव नेपाल हुने सिपि मैनाली नै हो ।’

नेपाल समुहले अडान लिईरहेकै जेष्ठ २ मा पार्टी फर्किएको नीतिगत वक्तब्य दिन, साविक एमालेको स्थायी कमिटि बैठक बोलाउन ओली तयार भईसकेका छन् ।

‘साविक कमिटि ब्यूँताउने विषयमा ओली धेरै नजिक पुगेका छन् । तल्लो कमिटिमा उनले सिनियरलाई माथील्लो पदमा र जुनियरलाई तल्लो पदमा राखेर जाने भन्ने कुरा बोलिरहेका छन्,’ एकता प्रयासमा लागेका नेपाल समुहमा रहेका एक नेता भन्छन्,–‘कमिटि ब्यूताएपनि जस्ताको तस्तै ब्यूताउने या अलिक सिनयिरलाई मुख्य जिम्मेवारी दिएर थोरै तलमाथी गर्ने भन्ने मात्र नमिलेको हो, सायद अव छलफलका क्रममा त्यो विषय पनि फिनिसिङ भईसकेको होला ।’

यदि नेपाल समुहका दोस्रो तहका यी नेताहरुले ओलीसग सहमति जनाए भने नेपाल समुह विभाजित हुनेछ । विभाजित हुदा झण्डै ५०/५० प्रतिशतकै रुपमा नेपाल समुहमा विभाजन आउन सक्ने नेपाल समुहकै एक नेता बताउँछन् । नेता नेपाल भने अहिले जेठ २ मा फर्किने भने पनि ओलीले चालवाजी मात्र गरेकोले अव नयाँ क्रान्तिकारी पार्टी निर्माण गरेरै जानुपर्नै निश्कर्षमा पुगिसकेका देखिन्छन् । यसले एमालेमा पनि नेपाल समुहभित्र विभाजनको रेखा कोरिने सम्भावना वढेर गएको देखिन्छ ।

ओलीसँग सहमति भएमा नेपाल पक्ष छोडेर आउन चाहने योगेश, सुरेन्द्रहरुले आफु पक्षका नेता–कार्यकर्ताको राष्ट्रिय भेला जस्तो गरेर पार्टी जेठ २ मै फर्काउदासम्म नेपाल र खनालले नमानेको आरोप लगाएर ओलीमा समाहित हुने गरी भित्री योजना बनाएको वुझिएको छ ।

नेपाल पक्षका दोस्रो तहका नेताहरुसँग सघन छलफल बढाएको ओली पक्षले अझै स्थायी समितिको बैठक रोकेर नेपाल पक्षका नेतासँग थप छलफल गर्न चाहिरहेको छ । वुधबार साँझ बोलाईएको स्थायी समिति अव विहिवार साँझलाई सारिएको छ । ‘नेपाल पक्षका साथीहरुसँग अझै छलफल जारी छ, निश्कर्ष निस्कन केही ढिलाढाली भएकोले स्थायी समिति एक दिन पछि सार्ने निर्णय भएको हो,’ ओली पक्षका नेताहरु बताउँछन् ।

नेपाल समुह फोर्ने योजनामा ओली कति सफल हुन्छन् ? त्यो आज-भोलिमै छिनोफानो लाग्ने देखिएको छ ।

साभारः मेरो न्यूज डटकम

 

भक्तपुर, जेठ २०, सुनिता तुलाधर

थाइल्याण्डको राजपरिवारले नेपाललाई स्वास्थ्य सामग्री सहयोग गरेको छ । थाई रोयल एडका रूपमा ती स्वास्थ्य सामग्रीहरू काेराेनाकाे कहर भाेगीरहेकाे नेपाललाई सहयोग गरिएको हो । राष्ट्रपति विद्यादेवी भण्डारीले पठाएको पत्र नेपाली राजदूतावासमार्फत थाई नरेशलाई प्राप्त भएपछि थाई नरेश महावजिरलंकन फ्रा वजिरक्लावचावयुहुआ र महारानी सुथिदा वज्रसुविमलालाक्सनाले नेपाललाई सहयोग गर्न निर्देशन जारी गर्नुभएको थियो ।

सोही आधारमा सरकारले १० लाख थान सर्जिकल मास्क, ४ हजार ५ सय पीपीई गाउन,१० हजार जोडी लेग कभर, १० हजार थान सर्जिकल क्याप, ५ हजार थान फेस सिल, २० हजार थान एन्टिजेन किट, ६ सय थान पल्स अक्सिमिटर, १ हजार ५ सय थान डिजिटल थर्मामिटर, १ हजार थान बडी ब्याग सहयोग सामग्री नेपाललाई उपलब्ध गराइएको छ । ती सामग्रीबाहेक थाई राजकुमारी वज्रकिटियाभा नरेनदिरादेव्यावतिले ७ हजार थान पीपीई गाउन उपलब्ध गराउनुभएको छ । यसका लागि थाइल्याण्डमा रहनुभएका नेपालका प्रा. डा. भिक्षु सुगन्ध महास्थविर र लुम्विनी विकास कोषका सदस्य सानुराज शाक्यले समेत विषेश पहल गर्नुभएको थियो ।

सो सामग्री नेपालका लागि थाई राजदुत भोसिता भोरसाफले परराष्ट्रमन्त्री प्रदिप ज्ञवाली, शिक्षामन्त्री कृष्ण गोपाल श्रेष्ठको उपस्थितिमा स्वास्थ्यमन्त्री हृदयेश त्रिपाठीलाई हस्तान्तरण गर्नुभयो ।

 

भक्तपुर, जेठ १९

नेपाली कांग्रेसका सभापति शेरबहादुर देउवाले सरकारले बजेटमा व्यापार घाटा कम गर्ने नाममा चुरेभावर क्षेत्रको नदिजन्य वस्तु निकासी गर्ने योजना ल्याएर तराई मधेशलाई मरुभुमि बनाउने गम्भिर षडयन्त्र गरेको आरोप लगाउनुभएको छ । सभापति देउवाले बुधवार विज्ञप्ती जारी गर्दै चुरे दोहन गरेर, पानीको स्रोत सुकाएर ब्यापार घाटा न्यून गर्ने नारा खरानीको ब्यापार गर्न घर जलाए जस्तै हुने चेतावनी समेत दिनुभएको छ ।
विगतमा चुरे क्षेत्रबाट ढुंगागिटी, बालुवा उत्खनन गरिंदा त्यसले पानीका स्रोतहरु सुक्न थालेको, भूक्षय बढेको र समग्रमा पर्यावरणलाई गम्भीर असर परेको अध्ययन विश्लेषण गरिएको उल्लेख गर्दै सभापति देउवाले विज्ञप्तीमा विगतका गल्ती सच्याएर अघि बढ्न निश्चित गरिएको नीतिलाई विस्थापित गरेर पुनः दोहनलाई प्रोत्साहन सामान्य गल्ती होइन, प्रकृतिविरुद्ध अपराध र देशको तराई–मधेस क्षेत्रलाई भविष्यमा मरुभूमीकरण गर्ने गम्भीर षड्यन्त्र भएको उल्लेख गर्नुभएको छ ।
देउवाले ढुंगागिटी, बालुवा निकासी गर्नेगरी सरकारले हचुवाका भरमा बजेटमा नीतिगत भ्रष्टाचार गरेको आरोप लगाउँदै राष्ट्रका लागि दुरगामी घातको कार्यक्रम फिर्ता लिन सरकारलाई चेतावनी समेत दिनुभएको छ । ‘ढुंगा, गिटी, बालुवा उत्खनन र निकासीमा रोक लगाएको निति र निर्णयलाई विस्थापित गर्दै ‘ब्यापार घाटा न्यूनीकरण गर्न’ भन्ने नारा दिएर ढुंगा, गिटी, बालुवा निकासीको कार्यक्रम ल्याउनु ‘खरानीको ब्यापार गर्न घर जलाए जस्तो’ मात्रै हो,’ देउवाले विज्ञप्तीमा भन्नुभएको छ, ‘निश्चयनै देशले बर्सौंदेखि ब्यापार घाटा ब्यहोरिरहेको छ, तर त्यसलाई न्यून गर्न या सन्तुलनमा ल्याउन तराई–मधेस र समग्र देशलाई नै दीर्घकालीन असर पर्ने कदम चाल्नु किमार्थ स्वीकार्य हुन सक्दैन र त्यो नै उचित विकल्प होइन ।’
अनेक जनविरोधी कार्य गर्दै आएको वर्तमान सरकारले संसद विघटनको असंवैधानिक कदम चालेको समयमा बजेट वक्तव्य मार्फत चुरे दोहनलाई मार्ग प्रशस्त गर्न लिएको नितिलाई नेपाली कांग्रेसले गम्भीर रूपमा लिएको देउवाले विज्ञप्तीमा उल्लेख गर्नुभएको छ ।
नेपाली कांग्रेसका तत्कालीन सभापति सुशील कोइरालाको नेतृत्वमा रहेकोे सरकारले ‘राष्ट्रपति चुरे–तराई मधेस संरक्षण विकास समिति’ गठन गरेर चुरे क्षेत्रको दोहन रोक्न र चुरे संरक्षण गर्न विकास समिति मार्फत विभिन्न मापदण्ड निर्धारण गरेको स्मरण समेत देउवाले गराउनुभएको छ ।

भक्तपुर, जेठ १९

ख्वप अस्पतालमा अक्सिजन प्लान्ट स्थापना र आवश्यक स्वास्थ्य उपकरण खरिदका लागि बुधवार थप ४४ लाख ७५ हजार रुपैंया आर्थिक सहयोग जुटेको छ । यससँगै सहयोग रकम ४ करोड ५ लाख ८७ हजार ८९ रुपैंया पुगेको नगरपालिकाले जनाएको छ ।
भक्तपुर नगरपालिकाले सञ्चालन गरेको ख्वप अस्पतालले ब्रम्हायणीमा कोभिड युनिटसँगै आइसोलेसन केन्द्र सञ्चालन गर्दै आइरहेको छ । कोभिडका गम्भिर बिरामीलाई अक्सिजन अभाव भएपछि नगरपालिकाले ख्वप अस्पतालमा अक्सिजन प्लान्ट तत्काल स्थापना गर्ने र त्यसका लागि आवश्यक रकम जुटाउन जनस्तरमा सहयोगको अपिल गरेको थियो ।
सोही अपिल बमोजिम नगरका सहकारी संस्था, विद्यालय कलेज, विभिन्न संघ संस्था, व्यवसायिक संघ संगठन र नगरबासीहरुले आर्थिक सहयोग प्रदान गरेका हुन । सहयोग रकम ग्रहण गर्दै भक्तपुर नगरपालिकाका प्रमुख सुनिल प्रजापति र उपप्रमुख रजनी जोशीले विषम परिस्थितिमा जनतालाई स्तरीय उपचार सेवा प्रदान गर्न आवश्यक स्वास्थ्य उपकरण खरिद कार्यमा जनस्तरबाट स्वेच्छाले आर्थिक, भौतिक तथा नैतिक सहयोग प्रदान गर्नुहुने संघ—संस्था, विद्यालय, कलेज, उद्योगी व्यवसायी तथा शुभचिन्तकहरुलाई नगरपालिकाको तर्फबाट धन्यवाद दिनुभयो ।

भक्तपुर, जेठ १९
नेपाली कांग्रेसका केन्द्रिय सदस्य तथा युवा नेता प्रदीप पौडेलले हालै सरकारले बजेटमार्फत सार्वजनिक गरेको ढुंगा, गिट्टी, बालुवा निकासी गरेर व्यापार घाटा कम गर्ने नीतिको चर्को विरोध गर्नुभएको छ ।
सामाजिक सञ्जालमार्फत बुधबार आफ्नो धारणा सार्वजनिक गर्दै पौडेलले लोकतन्त्र र नैतिकता बेचिसकेको सरकारले प्रकृति बेच्न तम्सिएको बताउनुभएको हो । ‘लोकतन्त्र, मुल्य मान्यता, नैतिकता सबै बेचीसकेको सरकारले अब बेच्न बाँकी प्रकृति थियो । सरकार त्यो पनि बेच्न तम्सिरहेको छ,’ पौडेलले भन्नुभयो ।
सरकारले चुरे संरक्षणका लागि विभिन्न नीति तथा कार्यक्रम तर्जुमा गरेको तथ्य प्रस्तुत गर्दै उहाँले भन्नुभएको छ, ‘चुरे क्षेत्रको संरक्षण गर्न र प्राकृतिक जोखिम न्यूनीकरण गर्न नेपाल सरकारले २०६६÷०६७ देखि पहिलो प्राथमिकतामा राखी राष्ट्रपति चुरे संरक्षण कार्यक्रम लागू गरिसकेको छ । त्यस्तै विकास समिति ऐन, २०१३ अन्तर्गत रहेर राष्ट्रपति चुरे–तराई मधेश संरक्षण विकास समिति (२०७१) गठन गरी वातावरण संरक्षण ऐन २०५३, बमोजिम नेपालको ३६ जिल्लाको चुरे अन्तर्गतको भू–भागलाई वातावरण संरक्षण क्षेत्र घोषणा पनि गरेको छ । चुरे संरक्षण क्षेत्रमा विकास निर्माण गर्दा अवलम्बन गर्नुपर्ने कार्यविधि तथा मापदण्ड, २०७७ भनेर नियामावली नै बनिसकेको छ ।’
‘यतिका धेरै कडाई गर्दा पनि अझै प्राकृतिक दोहन रोकिएको छैन । अव्यवस्थित बसोबास, अतिक्रमण, वन विनाश, अवैज्ञानिक भू–उपयोग आदिले चुरे क्षेत्र सधैं उच्च जोखिममा छ । नदी कटान, भू–क्षय, बाढी, पहिरो जस्ता प्रकोपले बर्सेनि आम नागरिकको जीवनमा समस्या माथि समस्या थपीरहेको छ’, पौडेलले भन्नुभएको छ ।
सबै नीति नियमलाई लत्याउँदै सरकारले यस्तो निर्णय गरेर आफ्नो भ्रष्टाचारी अनुहार देखाएको उहाँको आरोप छ ।
‘यस्तो विकराल रूप देख्दादेख्दै प्राकृतिक स्रोत साधनको संरक्षण गर्नुपर्ने जिम्वेवार निकायबाट नै त्यसको बर्खिलाप दोहन गर्न उत्रिनुले सरकारको भ्रष्टाचारी अनुहार झल्काउँछ । आफैंले बनाएका नियम कानुन र ऐनलाई लत्याउने योजना ल्याउनु कहाँ सम्मको गैरजिम्मवारी हो ? लोकतन्त्र, मुल्य मान्यता, नैतिकता सबै बेचीसकेको सरकारले अब बेच्न  बाँकी प्रकृति थियो । सरकार त्यो पनि बेच्न तम्सिरहेको छ । व्यापार घाटा पूर्ति गर्ने नाममा चुरे पहाडका ढुङ्गा, गिट्टी, बालुवा निकासी गरेर सरकारले आफ्ना कार्यकर्ता पोस्ने अखडा बनाउन खोजको प्रष्ट छ । ओली सरकारको अनियमितता र भ्रष्टचारी पोस्ने अभियान आफ्ना विगतका रेकर्ड तोड्दै अर्को उचाई चुम्न दौडिँदै छ । यो किमार्थ स्विकार्य हुँदैन,’ पौडेलले भन्नुभएको छ ।
प्राकृतिक स्रोतमाथि को दोहन राष्ट्रघाती कदम भएको बताउँदै सरकारको निर्णय देशको नियम कानुन साथै प्रकितिक नियमको पनि ठूलो उल्लंघन भएको उहाँको धारणा छ । सिङ्गै पहाड नै उजाड बनाएर बेच्ने कुरा कल्पना पनि गर्न नसकिने उहाँको भनाइ छ । उहाँले देश आजलाई मात्र नभएर भोलिका सन्ततिको भविष्यको आधार भएकाले प्राकृतिक स्रोतलाई हडप्ने अधिकार कसैलाई नभएको पनि बताउनुभएको छ ।

भक्तपुर, जेठ १९

काठमाण्डौं उपत्यकामा जारी निषेधाज्ञा केही खुुकुलो बनाई एक साता लम्ब्याएको छ । उपत्यकाका काठमाण्डौं, भक्तपुर र ललितपुरका प्रमुख जिल्ला अधिकारीको बुधबार बसेको बैठकलेले निषेधाज्ञा जेठ ३१ सम्म लम्ब्याउने निर्णय गरेको हो ।
गत साता थप कडा गरेको निषेधाज्ञा खुकुलो बनाई यो साता खाद्यान्न पसल र डिपार्टमेन्ट स्टोर खोल्न पाउने व्यवस्था गरेको छ । ‘किराना र डिपार्टमेन्ट स्टोर बिहान ९ बजेसम्म खोल्न दिने गरी निषेधाज्ञा एक साता थप्ने निर्णय गरेका छौं,’ भक्तपुरका प्रमुख जिल्ला अधिकारी प्रेमप्रसाद भट्टराईले भन्नुभयो । त्यस्तै तरकारी, फलफूल र पुस्तक पसल पनि बिहान ९ बजेसम्म खुल्नेछन्।
प्रजिअ भट्टराईले विकास निर्माणका कार्य पनि खुला गरिएको बताउनुभयो । कामदारलाई कार्यक्षेत्रमा नै बस्ने व्यवस्था गरी काम गर्न खुला गरिएको छ, उहाँले भन्नुभयो, तर निर्माण सामग्री ओसार्न राति मात्र दिइने छ। दिउँसो लेबर राखेर काम गर्न दिइने छ ।
यातायात सञ्चालनमा भने साविक व्यवस्थालाई निरन्तरता दिईएको प्रजिअ भट्टराईले बताउनुभयो । निजी संघ–संस्था, सरकारी तथा अत्यावश्यक कार्यका लागि सम्बन्धित निकायको परिचय–पत्र चाहिने छ । व्यक्तिगत रुपमा सवारी चलाउन अत्यावश्यक परे प्रमुख जिल्ला अधिकारीले जारी गरेको पास आवश्यक पर्नेछ ।