भक्तपुरका साप्ताहिक, मासिक र दैनिक पत्रिकाका प्रकाशकहरुले साना लगानीका स्वरोजमूलक पत्रपत्रिकाहरुको संरक्षणका लागि विशेष कार्यक्रम ल्याउन सरकारसँग माग गरेको छ । कोरोना महामारी नियन्त्रणका लागि जारी लकडाउन र निषेधाज्ञाका कारण साना लगानीका स्वरोजमूलक पत्रपत्रिकाहरु आर्थिकरुपमा धराशायी भएको भन्दै उनीहरुले विशेष कार्यक्रमको माग गरेका हुन ।
नेपाल पत्रकार महासंघ जिल्ला शाखा भक्तपुरले मंगलवार कार्यालयमा आयोजित छलफलमा सहभागी प्रकाशकहरुले लकडाउन र निषेधाज्ञाले साना लगानीका स्वरोजमूलक पत्रपत्रिका प्रभावित बनेको र यसले गम्भिर आर्थिक संकट निम्त्याएको निष्कर्ष सहित समानुपातिक विज्ञापन प्रणाली कार्यान्वयन र सहुलियतपूर्ण कर्जाको समेत माग गरेका छन ।
छलफलमा धरहरा टाईम्स साप्ताहिकका प्रकाशक सम्पादक रमेश खड्काले लकडाउन र निषेधाज्ञाले पत्रिका छपाई र वितरणमा समस्या आएको र प्रकाशित विज्ञापनको शुल्क समेत उठ्न नसक्दा पत्रिकाले आर्थिक संकट व्यहोर्नु परेको बताउनुभयो । महासंघ भक्तपुरका संस्थापक अध्यक्ष समेत रहनुभएका खड्काले पत्रपत्रिकालाई संरक्षणका लागि महासंघले विशेष पहल गर्नुपर्नेमा जोड दिनुभयो ।
दवाब साप्ताहिकका सम्पादक एवम् महासंघ उपत्यका प्रदेश समितिका सचिव अमर भुजुले लकडाउन र निषेधाज्ञाले बजार बन्द हुँदा पत्रिका वितरण र छपाई संख्यामा कमी आएको बताउनुभयो ।
ङातापोल एक्सप्रेस दैनिकका प्रकाशक विश्वराम दुवालले कागजको अभावले मूल्यबृद्धि भएको, बढी तौलको कागज प्रयोग गर्नुपरेको र छपाई मजदुरलाई अतिरिक्त पारिश्रमिक दिनुपर्दा आर्थिक भार बृद्धि भएको बताउनुभयो ।
हाम्रो समाज साप्ताहिकका प्रकाशक मणिराम लामिछानेले साना लगानीका पत्रपत्रिकाको संरक्षणका लागि बैंक तथा वित्तिय संस्था, सरकारी निकाय र स्थानीय तहमा पत्रिकाको नियमित ग्राहक बनाउने प्रणालीको विकास गर्नुपर्ने सुझाव दिनुभयो । उहाँले केही समयदेखी नियमित विद्युत आपुर्तीमा अवरोध आएको र यसले पत्रिकाको कार्य सम्पादन गर्न तथा छपाईमा समस्या आएको बताउनुभयो ।
नुवागी मासिकका प्रकाशक मतिना त्वानावासुले आफैं कोभिड संक्रमण हुँदा पत्रिका नै बन्द गर्नुपरेको समस्या सुनाउनुभयो । उहाँले विज्ञापन संकलनमा आफैंबीचको अस्वस्थ प्रतिष्पर्धाले पनि साना लगानीका पत्रपत्रिकालाई विज्ञापनदाताको विश्वास गर्न नसकेको बताउनुभयो ।
त्रिपुरा न्यूजका प्रकाशक विकास थापा ‘प्रहर’ले कामदार नपाउँदा प्रेस नै बन्द भएको र त्यसले गर्दा पत्रिका नियमित प्रकाशन गर्न नसकिएको बताउनुभयो ।
महासंघ जिल्ला सचिव सन्जीप घिमिरे ‘शुभचिन्तक’ले साना लगानीका पत्रपत्रिका सबैका समस्या समान र साझा देखिएको भन्दै सबैले स्वस्थ प्रतिष्पर्धागरी समाधानका लागि सामूहिकरुपमा प्रयास गर्नुपर्ने सुझाव दिनुभयो ।
महासंघ भक्तपुरका अध्यक्ष जगतकृष्ण प्रजापतिले साना लगानीका पत्रपत्रिकाहरुको संरक्षणका लागि आगामी आर्थिक वर्षको नीति तथा कार्यक्रम र बजेटमा लोककल्याणकारी विज्ञापनको व्यवस्थागरी नियमितरुपमा सूचना प्रवाहको व्यवस्था नीतिगत रुपमै गर्न आग्रह गरिएको जानकारी दिनुभयो ।
भक्तपुर, असार १
बन्दाबन्दी (लकडाउन) र निषेधाज्ञाकाबीच पनि सरकारलाई कर तथा राजश्व उठाउन बाटो खुल्ला भएको छ । सर्वोच्च अदालतले यसअघि दिएको अन्तरिम आदेश खारेज गरेसँगै सरकारलाई बन्दाबन्दी र निषेधाज्ञाले व्यवसाय बन्द भएपनि कर उठाउन बाटो खुल्ला भएको हो ।
यसअघि सर्वोच्चको एक न्यायधिशको इजलासले गत जेठ ५ गते निषेधाज्ञा वा बन्दाबन्दी लागू भएको अवधिसम्म मूल्य अभिबृद्धि कर विवरण र कर दाखिला नगरेमा जरिवाना असुल नगर्नु नगराउनु, बन्दाबन्दी पूर्णरुपमा खुलेपछि बाटोको म्याद बाहेक ३० दिनभित्र विवरण र कर बुझाउन सक्ने गरी आवश्यक व्यवस्था मिलाउनु भन्ने अन्तरिम आदेश जारी गरेको थियो ।
सर्वोच्चका न्यायाधीश डा. आनन्दमोहन भट्टराई र नहकुल सुवेदीको इजलासले मंगलवार सो आदेश खारेज गरिदिएपछि सरकारलाई बन्दाबन्दी र निषेधाज्ञामा पनि कर उठाउन सक्ने बाटो खुलेको हो ।
सर्वोच्चले आर्थिक ऐन २०७७ को दफा १९ अनुसार आवागमनमा अवरोध, विपदलगायतको कारणले कर तिर्न समस्या भएमा अर्थ मन्त्रालयले वाधा अड्काउ फुकाउ गर्न सक्ने व्यवस्था भएकाले कर तिर्ने विषयमा छुट्टै आदेश गर्नु नपर्ने निश्कर्ष निकालेको हो ।
आदेशमा सर्वोच्चले ‘अर्थ मन्त्रालयले आर्थिक ऐन २०७७ को दफा १९ बमोजिम निर्णय गरी प्रकाशित गर्ने सूचनामा उल्लेख भएको अवधिसम्मको लागि मात्र कर विवरण र कर दाखिला नगरेमा जरिवाना असुल नगर्न नगराउन’ आदेश दिएको छ । अब सरकारले कर विवरण र कर दाखिला गर्ने निश्चित अवधि तोकेर त्यो मितिसम्म कर नतिरेमा जरिवाना लिन सक्नेछ । हेर्नुहोस् आदेश
नयाँ भेरियन्टसहितको कोरोना भाइरस संक्रमणको जोखिम बढेपछि त्यसको नियन्त्रण र रोकथामका लागि काठमाण्डौं उपत्यकामा बैशाख १६ गतेदेखी जारी गरिएको निषेधाज्ञाका कारण विद्यालय बन्द हुँदा ईन्टरनेट र स्मार्ट मोवाईल सेटको पहुँच नभएका विपन्न वर्गका भक्तपुरका सयौं विद्यार्थी पढाईबाट मात्र होइन वार्षिक परीक्षाबाट समेत बञ्चित भएका छन । लक्ष्मी गारु, भक्तपुर, असार १
सुविन र ओम सैंजु दुई दाजुभाई हुन् । उनीहरु दुवै जना भक्तपुर नगरपालिका–१०, कमलनिायकस्थित बागेश्वरी माध्यामिक विद्यालयको कक्षा ४ र १ मा अध्ययनरत छन । सूर्यविनायक नगरपालिका–८, जगातीस्थित हनुमानचामा बस्ने सैंजु दाजुभाईका बुबाको ३ वर्ष अघि जण्डिसका कारण निधन भयो । सैंजुका आमा लक्ष्मी ईंटाभट्टामा चिया पसल चलाउँछिन । यसवर्ष कोरोनाको जोखिमका कारण व्यवसायीले ईंटाभट्टा सञ्चालन नगर्दा लक्ष्मीको पसल पनि बन्द भएको छ ।
सैंजु दाजुभाई
आयस्रोतको एक मात्र बाटो चिया पसल बन्द भएपछि अहिले उनीहरुलाई दैनिक गुजारा चलाउन समेत धौ धौ छ । दैनिक ज्याला मजदुरी गरेर दुई छोराहरुको लालनपालन गर्दै आएकी लक्ष्मीले घरमा ईन्टरनेट जोड्न र छोराहरुलाई स्मार्ट मोवाईल सेट जोडिदिन नसक्दा सैंजु दाजुभाईको पठनपाठन समेत बन्द भएको छ । उनीहरुको पढाई मात्र छुटेको छैन परीक्षा दिन समेत बञ्चित हुनुपरेको छ ।
‘चिया पसल बन्द भएपछि कमाई भएन, ज्याला मजदुरी गर्थे त्यो पनि लकडाउनले गर्दा बन्द छ । दैनिक छाक टार्न मुस्किल भएको बेला नेट जोड्ने, मोवाईल फोन किन्ने पैसा कहाँबाट जोहो गर्ने ?’ लक्ष्मीले प्रश्न गरिन ।
छिमेकीको सहारा लिएर छोराहरुलाई पढाउँ भन्दा पनि छिमेकीको घरमा समेत नेट नभएकाले सम्भव नभएको उनले बताईन । ‘हामी बसेको ठाउँमा जम्मा दुई घर छौं । नेट राख्ने कोही छैन । राख्ने हैसियत पनि छैन । पैसा नभएरै बच्चाहरुलाई सामुदायिक विद्यालयमा पढाएको हो । क्षमताले भ्याए त बोर्डिङ्ग स्कुलमा पढाउने मेरो पनि ठूलो रहर छ । नेटको के कुरा गर्ने ? मसँग भएको मोवाईल यही हो,’ भन्दै पुरानो मोडलको मोवाइल सेट देखाईन ।
सौगात नगरकोटीले पनि निषेधाज्ञा जारी भए यता पढ्न पाएको छैन । उनी बागेश्वरी माविको कक्षा ३ मा पढ्छन । निषेधाज्ञाले विद्यालय बन्द भएपछि विद्यालयले अनलाईन कक्षा सञ्चालन गरेपनि सौगातले पनि नेट र स्मार्ट मोवाइल फोन नहुँदा पढ्न नपाएको हो ।
सौगात नगरकोटी
सौगातको घर काठमाण्डौंको डाँछीमा हो । उनको बुबा दैनिक ज्याला मजदुरीको काम गर्छन । भक्तपुरमा डेरा लिएर बस्दै आएका सौगातले गत वर्षको लकडाउनमा पनि पढ्न पाएन, कारण उही इन्टरनेट र स्मार्ट फोन थियो । केही समय पाल्पामा मजदुरी गरेर निषेधाज्ञाकै कारण फर्किएका सौगातका बुबा अजय नगरकोटी भन्छन, ‘श्रीमती गर्भवती छिन् । दैनिक गुजारा गर्न गाह्रो छ । कोठा भाडा तिर्नुपर्छ । यस्तो बेला कसरी छोरालाई ईन्टरनेट राखेर कक्षा लिन लगाउने । अहिले परीक्षा भइरहेको छ । इन्टरनेट नभएका कारण परीक्षा पनि दिलाउन सकेको छैन । अव नयाँ भर्ना खुलेपछि छोरालाई दोहो¥याएर पढाउनु पर्ला जस्तो छ ।’ परीक्षा दिन प्रिन्सिपलको मोवाईल, छिमेकीको ईन्टरनेट
१२ वर्षिया दिया तण्डुकार माउण्ट भ्याली ईङ्गलिस स्कुलको कक्षा ४ मा अध्ययनरत छिन । जेहेन्दार र कक्षाका उत्कृष्ट विद्यार्थी भएका कारण उनलाई छात्रवृत्ति पनि उपलब्ध गराएको छ । पढाईमा निक्कै रुची राख्ने दियाको पनि निषेधाज्ञासँगै पढाई छुटेको थियो । विद्यालयले पटक पटक ताकेता गरेपनि दियाकी आमा दिव्यश्वरीले छोरीको लागि न त इन्टरनेट नै जडान गर्न सकिन न त एउटा गतिलो मोवाइल सेट किनेरै दिन सकिन ।
दियाका बुबाको ६ वर्ष अघि ह्दयघाटका कारण मृत्यु भएको थियो । जग्गा जमिन नभएका उनकी आमा स्थानियको घरमा लुगा धुने, घरसफाई गर्ने र सुत्केरी स्याहारसुसारको काम गर्छिन । यी कामले सामान्य घरको खर्च टार्दै आएकी उनकी आमा दिव्यश्वरीले छोरीको लागि आवश्यक स्मार्ट मोबाइल किनिदिने क्षमता नभएको बताइन् । उनले भने, ‘जसोतसो छोराछोरी र मेरो पेट भर्न अर्कोको घरमा गएर सरसफाई गर्ने, लुगाधुने, सुत्केरीलाई तेल लगाएर अलि अलि जोगाएको पैसा पनि सकियो । समय यस्तो छ, काम छैन । जग्गा जमिन छैन । घर खेत छैन । माइतीले दिएको सानो घरमा अहिले मिलाएर बसिरहेका छौं । दैनिक गुजारा गर्न नै नसकिरहेको समयमा छोराछोरीको लागि ठूलो मोबाइल र ईन्टरनेट कसरी जडान गर्ने ?’
दिया तन्डुकार
दियाले पढाईलाई नियमित गर्न नसकेपनि परीक्षा दिन बाट बञ्चित भने नभएको दिव्यश्वरीले बताईन । दियाको परीक्षाको लागि प्रिन्सिपल स्वयम्ले आफ्नो मोवाइल दिएको दिव्यश्रीले जानकारी दिईन ।
‘विद्यालयबाट पटक पटक फोन आएपछि प्रिन्सिपलसँग कुरा गरेर अन्तिम परीक्षा एउटा दिलाउन उहाँले नै मोबाइल दिएर पठाउनु भएको छ । परीक्षा सकेपछि फिर्ता गर्न जानुपर्छ,’ उनले भनिन् ‘परीक्षा भरीको लागि सँगै घर भएका एकजना भाईसँग कुरा गरेर एकसय रुपैयाँ दिन्छु, परीक्षा सकेपछि नेट काट्नु भनी अहिले अन्तिम परीक्षा दिलाइराखेको छु ।’ गएको वर्षपनि लकडाउन हुँदा पढाउन नसकिएको उनले बताईन ।
दिया भन्छन्, ‘म सानो हुँदादेखि बुबा नभएका कारण बुबाआमा भएर मम्मीले पढाइराख्नु भएको छ । मम्मीलाई पनि कत्ति भन्नु । अनलाईन कक्षा लिन नसकेपनि मैलै घरमा मेरो किताबहरु अध्ययन गरेकी छु । भाइलाई पनि पढाउँछु ।’
कोरोना भाइरसको महामारीले धेरै प्रभावित पारेको क्षेत्र मध्ये शिक्षा क्षेत्र पनि प्रमुख हो । गतवर्ष लामो समय लकडाउन हुँदा विद्यालयको नियमित पठनपाठन बन्द मात्र भएन परीक्षा समेत प्रभावित बनेको थियो । कक्षा १० को एसईई परीक्षा समेत विद्यालयको आन्तरिक मुल्यांकनबाट सम्भव भएको थियो । सरकारले गतवर्ष नै लकडाउनका बेला पठनपाठन सुचारु गर्न विभिन्न वैकल्पिक उपाय अपनाउने नीति ल्याएपनि निम्न वर्गिय र दैनिक ज्याला मजदुरी गरेर गुजारा चलाउनु पर्ने हजारौं परिवारका छोराछोरीहरु शिक्षाबाट बञ्चित भएका केही उदाहरण मात्र हुन, दिया, सौगात र सैंजु दाजुभाई । अनलाइन परीक्षा छुटेकालाई विद्यालय खुलेपछि लिईने
गतवर्ष लकडाउनका कारण शैक्षिक क्षेत्र प्रभावित बनेपछि सरकारले शैक्षिक सत्र समेत हेरफेर गरेको थियो । सोही अनुसार असारदेखी नयाँ शैक्षिक सत्र शुरु हुनेभएपछि विद्यालयहरुले जेठको दोस्रो सातादेखी अनलाइनमार्फत भएपनि परीक्षा सञ्चालन गरेका थिए । वागेश्वरी माध्यामिक विद्यालयका प्राथमिक तहका इन्चार्ज कृष्णमान मलेपतिले अनलाईन कक्षामा उपस्थित भएका बिद्यार्थीहरुको जेष्ठ १६ गतेदेखि अन्तिम परीक्षा लिएको जानकारी दिए ।
उनले अनलाईनमा उपस्थित नभएका विद्यार्थीहरुको अन्तिम परीक्षा विद्यालय खुलेपछि भौतिक रुपमा लिने बताए । उनले भने, ‘वागेश्वरीमा पढ्ने अधिकासं विद्यार्थीहरु मजदुर वर्गका भएकाले प्राय विद्यार्थीहरु इन्टरनेटको पहुँचबाट टाढा छन । उनले विद्यालयमा करिब ७० प्रतिशत मजदुर वर्ग र ३० प्रतिशत मात्र स्थानीयका छोराछोरी अध्ययनरत रहेको बताए । केही विद्यार्थीहरु अभिभावकसँगै गाउँ गएका कारणले पनि दुई चरणमा परीक्षा सञ्चालन गर्नुपरेको उनले बताए । भक्तपुर नगरभित्र ४ प्रतिशत विद्यार्थी अनुपस्थित
भक्तपुर नगरपालिका भित्र सामुदायिक विद्यालयको कक्षा ८ बढ्ने ४ प्रतिशत विद्यार्थी परीक्षामा सामेल नभएको नगर शिक्षा शाखा प्रमुख हरिप्रसाद निरौलाले बताए । ती अनुपस्थित विद्यार्थीहरुको छुट परीक्षा लिएर नतिजा प्रकाशन गरिने उनले जानकारी दिए । उनले भने, ‘कक्षा ८ को विद्यार्थीहरुको हकमा लगभग ९६ दशमलब उपस्थित भएको देखिन्छ । बाँकी छुटेका केही विद्यार्थीहरुको हकमा होम असाइन्मेट र छुट परीक्षा लिएर नतिजा प्रकाशित गछौं ।’
उनले नगरपालिकाको सहयोगमा स्थानीय भादगाउँ टेलिभिजनमार्फत कक्षा सञ्चालन गरिएकाले ईन्टरनेटको पहुँच नहुने विद्यार्थीलाई शिक्षा लिन सहजता भएको बताए । त्यस्तै कक्षा १, २, ३ का लागि सबै साुमदायिक विद्यालयमा वर्कसित वितरण गरी सहजता पु¥याएको र सबै विद्यालयहरुले आन्तरिक मुल्याङन अनुसारै परीक्षाको नतिजा प्रकाशन गर्ने व्यवस्था गरिएको निरौलाले जानकारी दिए ।
चाँगुनारायण नगरपालिकाका शिक्षा, युवा तथा खेलकुद महाशाखा प्रमुख विरबहादुर खड्काले विद्यार्थीहरु विद्यालयमा उपस्थित हुँदा उनीहरुको हरेक क्रियाकलापको मुल्याङकन अनुसार विद्यार्थीहरुको नतिजा निकाल्ने योजना रहेको बताए । नगर परीक्षा परिषदले एउटा कार्य विधिको ढाँचा निर्माण गरेको छ । यही ढाँचा अनुसार कक्षा ८ को नगर स्तरीय परीक्षा नपाबाटै लिइन्छ । अरु बाँकी सबै विद्यालयहरुमा विद्यार्थीहरुको क्रियाकलापका आधारमा विद्यालयहरुले नै नतिजा प्रकाशन गर्ने व्यवस्था गरेका छौं, उनले भने ।
मध्यपुर थिमि नगरपालिकाको शिक्षा शाखा प्रमुख ज्ञानेन्द्र बनले विद्यार्थीहरुको उपस्थिति, मासिक, त्रैमासिक, प्रिवोर्ड परीक्षा र गएको दोस्रो त्रैमासिकसम्मको परीक्षाको नतिजा लगायत उनीहरुको क्रियाकलापको आधारमा नतिजा प्रकासित गरिने जानकारी दिए ।
तल्लो तहका बढी अनुपस्थित
नीजि तथा आवासिय विद्यालय अर्गनाइजेसन नेपाल (प्याव्सन) भक्तपुरका उपाध्यक्ष सुरेन्द्र श्रेष्ठले प्याव्सन अन्तर्गतका विद्यालयहरुमा तल्लो तहका विद्यार्थी अनलाइन कक्षा र परीक्षामा सहभागी हुन नसकेको बताए। ‘विद्यार्थीहरु विद्यालयमा उपस्थित हुँदा र अहिले भर्चुअल कक्षा सञ्चालन गर्दा अलि कठिनाई भयो,’ उनले भने, सबैको घर घरमा ईन्टरनेटको पहँच त हुन्छ भन्ने पनि भएन।’
यस समस्याको सम्बोधन सरकारबाट पनि नभएको उनले गुनासो गरे। विद्यालयहरुले सम्भव भएसम्म सम्पर्क गरेर नजिकको आफन्त, साथीभाई र छरछिमेकमा राखेर सयुंक्त रुपमा तीनजना सम्म राखेर परीक्षा लिनुपरेको अनुभव उनले सुनाए। उनले साना कक्षामा अनुपस्थित भएका विद्यार्थीहरुको लागि उनीहरुको क्रियाकलापको आधारमा विद्यालयको उपस्थितिको आधारमा मुल्याङन गर्ने विधि अपनाएको जानकारी दिए।
भक्तपुर, असार १
भक्तपुर नगरपालिकाको प्रकोप व्यवस्थापन कोषमा करिव ६ करोड रुपैंया जम्मा भएको छ । नगरपालिकाले सञ्चालन गरेको ख्वप अस्पतालमा अक्सिजन प्लान्ट जडान गर्न आवश्यक रकम अभाव भएपछि नगरपालिकाले आर्थिक सहयोगको आह्वान गरेको थियो ।
सोही आह्वानलाई स्वीकार्दै नगरबासी, विभिन्न संघसंस्था, शुभेच्छुक एवम् शुभचिन्तकहरुले स्वतःस्फुर्तरुपमा सहयोग गर्ने क्रममा कोषमा मंगलवार दिउँसोसम्म ५ करोड ९३ लाख ९८ हजार १७६ रुपैंया जम्मा भएको नगरपालिकाले जनाएको छ । कोषमा मंगलवार मात्रै विभिन्न संघसंस्था र व्यक्तिहरुले १२ लाख ६६ हजार ३ सय ४३ रुपैयाँ आर्थिक सहयोग गरेको नगरप्रमुख सुनिल प्रजापतिले जानकारी दिनुभयो ।
कोषमा स्व. नाइके कृष्णमान प्रजापति किर्ति संरक्षण समिति राममन्दिर बोलाछेंले ४ लाख एक रुपैंया सहयोग गरे । त्यस्तै श्री पासा पुचः गुठी लन्डन युकेले अनलाइन टन्सफरमार्फत एक लाख ६७ हजार ९७०, श्री राजाराम जोशी र भवानी जोशी ५१ हजार १११, प्रा. डा. सर्वज्ञ भक्त मल्ल र कोमल बदन मल्ल ५० हजार १११, कृष्णलाल प्रधान ३० हजार, हरिश्रेणीलाल श्रेष्ठ ३० हजार, धर्मभक्त बल्ल २५ हजार, भक्तपुर विकास सहयोग संघ एक लाख २५ हजार, भक्तपुर नगरपालिकाका जनप्रतिनिधिहरुले एक लाख ५० हजार, भक्तपुर जिल्ला मानन्धर युवा संघ ३३ हजार ३५५ र बेल्जियम निवासी ज्ञानेन्द्र÷जोई प्रजापति, एलिन, टोम सराह, क्रिस्टोफ, बी, जेफ, कट्रिइन, जेरोइन, असवार्ड, विल्मा, सुरेन र निरनले ८४ हजार सहयोग गरेको नगरप्रमुख प्रजापतिले बताउनुभयो ।
यसैबीच ख्वप अस्पतालमा अक्सिजन प्लान्ट जडान भई अक्सिजन उत्पादन हुन थालेको छ । प्लान्टको परीक्षण सफल भएको र आजै मंगलवार नेपाल मजदुर किसान पार्टीका केन्द्रीय अध्यक्ष नारायणमान बिजुक्छेंले उद्घाटन गर्दैछ ।
भक्तपुर नगरपालिकाले उक्त अक्सिजन प्लान्ट चीनको छेन्दुस्थित कम्पनीबाट सिधा खरिद गरेको हो । नगरपालिकाले सिधै कम्पनीमा सम्पर्क गरी त्यहाँको व्यवस्थापनसँग प्रस्ताव पेश गरी मोलमोलाई गरी खरिद गरेका हौं । ‘यसमा हामीलाई कम्पनीदेखी ग्राहकसम्मका बीचका कम्पनी वा सहजकर्ता, आयातकर्ता कसैको पनि सहभागिता नभएकाले बजार मूल्यभन्दा केही कम मूल्यमा पनि पाएका छौं,’ उहाँले भन्नुभयो ।
भक्तपुर, असार १
आफुलाई प्रहरीको नायव उपरिक्षक (डिएसपी) हुँ भन्दै हिँड्ने एक व्यक्तिलाई प्रहरीले सोमवार पक्राउ गरेको छ । महानगरीय अपराध महाशाखाको टोलीले काठमाण्डौंको तार्केश्वर नगरपालिका–६ जरंगुबाट नक्कली डिएसपी ४४ वर्षीय कृष्णप्रसाद ढुंगाना उर्फ डा. एस के ढुंगानालाई पक्राउ गरेको हो ।
प्रहरीले ढुंगानाको साथबाट नेपाल प्रहरीका विभिन्न पदका पोशाक लगाएका तस्वीर तीन वटा, डिएसपीको पोशाक एउटा, एक जोर नेपाल प्रहरीको जर्सी र मोबाइल बरामद गरेको महाशाखाका प्रवक्ता तथा प्रहरी उपरीक्षक (एसपी) कृष्ण कोइरालाले जानकारी दिनुभयो ।
ढंगानाले सशस्त्र प्रहरीका कर्मचारीलाई नेपाल प्रहरी र नेपाल प्रहरीका कर्मचारीलाई सशस्त्रको ‘डिएसपी हुँ’ भन्दै हिँड्ने गरेको पाईएको एसपी कोइरालाले बताउनुभयो । ढुंगानाले आफु प्राविधिक प्रहरी कर्मचारी ‘डाक्टर हुँ’ भन्ने गरेको प्रहरीको प्रारम्भिक अनुसन्धानबाट खुलेको छ ।
‘उसले आफ्नो फेसबुकमा पनि डिएसपीको लुगा लगाएको फोटो राखेको रहेछ,’ एसपी कोइरालाले भन्नुभयो, ‘फेरि आफैँले आफ्नो बढुवा भएको भनेर फोटो पनि राखेको पायौं ।’
ढुंगानाले तर्केश्वरको जरंगुमा भिक्टोरिया फार्मेसी समेत सञ्चालन गर्दै आएका छन । तर, पक्राउ परेपछि ढुंगानाले सो फार्मेसी आफ्नो नभएको प्रहरीलाई बताएका छन् । ढुंगानासँग चिकित्सकमा हुनुपर्ने योग्यता नभएको प्रहरीको प्रारम्भिक अनुसन्धानबाट थाहा भएको छ । ढुंगानाले आफुलाई डाक्टर एसके ढुंगाना र मेडिकल डाईरेक्टर भनेर समेत चिनाउने गरेको अनुसन्धानमा खुल्न आएको एसपी कोइरालाले बताउनुभयो । ढुंगानाबाट कोही ठगीएको भए प्रहरी कार्यालयमा सम्पर्क गर्न समेत महाशाखाले आग्रह गरेको छ । ढुंगानामाथि थप अनुसन्धान भइरहेको प्रहरीले जनाएको छ ।
भक्तपुर, असार १
चेक रिपब्लिकले युरोकप फुटबलमा सोमवार स्कटल्याण्डलाई २–० ले पराजित गर्दै सुखद शुरुवात गरेको छ । ह्याम्पडेन पार्कमा चेक रिपब्लिकलाई जित दिलाउन जर्मन क्लब बायर लिभरकुसनका फरवार्ड प्याट्रिक शिकले दुई गोल गरे ।
प्याट्रिकले खेलको ४२ औं मिनेटमा हेडरमार्फत गोल गर्दै चेक रिपब्लिकलाई अग्रता दिलाएका थिए । त्यसपछि खेलको ५२ औं मिनेटमा स्कटल्याण्डका गोलकिपर डेभिड मार्सल अघि बढेको स्थितिमा प्याट्रिकले व्यक्तिगत दोस्रो गोल गर्दै चेक रिपब्लिकलाई २–० को जित दिलाए ।
प्रतिस्पर्धात्मक र रोमाञ्चक खेलमा दुवै टोलीले खेलको शुरुवातदेखि नै आक्रमक फुटबल खेलेका थिए । खेलमा स्कटल्याण्डले पनि गोलको केही अवसर बनाएको थियो, तर मौकालाई सदुपयोग गर्न सकेन ।
चेकले ११ वर्षपछि स्कटल्यान्डलाई हराएको हो । चेकले पछिल्लोपटक स्कटल्यान्डलाई ९ अक्टोवर २०१० मा युरो छनोटको खेलमा १–० ले पराजित गरेको थियो । त्यस यता यी दुई टोली चारपटक आमनेसामने हुँदा एक खेल बराबरी भएको थियो भने तीन खेलमा चेक पराजित भएको थियो । सन् २०११ मा २–२ गोलको बराबरी खेल्दा त्यसपछि स्कटल्याण्डले २०१६ मा १–०, २०२० मा २–१ र १–० ले जित हासिल गरेको थियो ।
स्लोभाकिया २–१ ले विजयी
त्यसैगरी स्लोभाकियाले १० खेलाडीमा समेटिएको पोल्याण्डलाई २–१ गोल अन्तरले पराजित गरेको हो । रुसको सेन्ट पिटर्सवर्ग स्टेडियममा खेलको १८ औं मिनेटमा पोल्याण्डका गोलकिपर वजचिएक सेचेज्नीको आत्मघाती गोलबाट स्लोभाकियाले अग्रता बनाए । स्लोभाकियाका रोबर्ट माकले प्रहार गरेको बल पोस्टमा लागेर फर्कदै गोलकिपर वजचिएकलाई लाग्दै गोलमा परिणत भएको थियो ।
तर, खेलको ४६ औं मिनेटमा कारोल लिन्टीले गोल गर्दै पोल्याण्डलाई १–१ गोलको बराबरीमा फर्काए । ६२ औं मिनेटमा पोल्याण्ड १० खेलाडीमा समेटियो । पोल्याण्डका मिडफिल्डर ग्रेगोर्ज क्रिचोवियकले दोहोरो पहेलो कार्डसहित रातो कार्ड पाउँदै मैदानबाट बाहिरिएका थिए । त्यसपछि खेलको ६९ औं मिनेटमा मिलान स्क्रिनरले गोल गर्दै स्लोभाकियालाई २–१ को जित दिलाए ।
स्पेन र स्विडेन बराबरी
समूह ई को स्पेन स्विडेनको खेल गोलरहित बराबरीमा सकिएको छ । गएराती सेभियामा सम्पन्न खेलमा दुवै टोलीले केही अवसर बनाएपनि गोल गर्न नसक्दा खेल गोलरहित बराबरीमा सकिएको हो ।
घरेलु मैदानमा बल पोसेसनमा पकड जमाएपनि गोल गर्न नसक्दा स्पेनले बराबरीमा चित्त बुझाउनु प¥यो । स्विडेनले पनि खेलमा पाएको मौकालाई सदुपयोग गर्न सकेन ।
भक्तपुर, असार १
माधव कुमार नेपालको निवास कोटेश्वरमा विपक्षी गठबन्धनका शिर्ष तीन नेता नेपाल, नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहालबीच सोमवार साँझ भेटवार्ता भएको छ ।
भेटवार्ताका लागि देउवाले कांग्रेस महामन्त्री पुर्णबहादुर खड्कालाई साथमा लिएर जानुभएको थियो भने देउवा पुगेको केही समयपछि दाहाल नेपाल निवास कोटेश्वर पुग्नुभएको थियो ।
भेटवार्तामा नेताहरुबीच समसामयिक राजनीतिक घटनाक्रमको बारेमा छलफल र समीक्षा भएको बताईएको छ । छलफलमा नेताहरुले गठबन्धन एकले अर्कोलाई उपयोग गर्न नभई राष्ट्र, गणतन्त्र, संविधान र लोकतन्त्रको रक्षा एवं जनताको सुविधा र हितलाई अभिवृद्धि गर्न केन्द्रीत गर्ने प्रतिवद्धता जनाएको बताएका छन ।
अदालतमा विचाराधीन मुद्दालाई प्रभावित गर्न सरकारले गरेका प्रयत्नवारे पनि नेताहरुबीच छलफल भएको छ । अदालतको निष्पक्षतामा विश्वास, प्रभावित पार्ने काम नगर्न र राज्यका कतिपय अंग र केही संबैधानिक निकायहरूका भूमिकाको निष्पक्षता र निर्णय क्षमतामा आंशका, निष्पक्ष र समयमा निर्णय गर्न सरकारको ध्यानाकर्षण गराउने समझदारी नेताहरूबीच भएको स्रोतले बताएको छ । नेताहरुबीच तत्काल सबैलाई पुग्ने गरी कोरोना खोप तथा विपन्नलाई राहत प्याकेज उपलब्ध गराउन सरकारसँग माग गर्ने सहमति पनि भएको छ ।
भक्तपुर, जेठ ३१
गण्डकी प्रदेशसभा सदस्य कृष्ण थापा पदमुक्त हुनुभएको छ । सर्वोच्च अदालतका न्यायाधीश विश्वम्भरप्रसाद श्रेष्ठ र कुमार रेग्मीको संयुक्त इजलासले सांसद थापालाई पदमुक्त गर्ने राष्ट्रिय जनमोर्चा र गण्डकी प्रदेशसभा सचिवालयको निर्णयलाई सदर गरेपछि उहाँ पदमुक्त हुनुभएको थियो । इजलासले यसअघिको अन्तरिम आदेशलाई निरन्तरता दिन नपर्ने आदेश समेत दिएको छ ।
थापाले गण्डकी प्रदेशका निवर्तमान मुख्यमन्त्रीविरुद्ध अविश्वास प्रस्ताव दर्ता गर्ने विपक्षी गठबन्धनको प्रस्तावमा पार्टी निर्णय विपरित हस्ताक्षर नगर्ने अडान लिएको थियो । साथै उनले हस्ताक्षर नगर्दा यसअघि संविधानको धारा १६८ को उपधारा २ बमोजिमको संयुक्त सरकार गठन गर्ने विपक्षीको प्रयास समेत असफल भएको थियो ।
सोही कारण राष्ट्रिय जनमोर्चाले कारवाही गरी थापालाई पदमुक्त गरेको थियो । थापा सो निर्णय विरुद्ध सर्वोच्च अदालत गएका थिए । अदालतले यसअघि थापालाई पदमुक्त गर्ने निर्णय तत्काल कार्यान्वयन नगर्नु भनी अन्तरिम आदेश दिएको थियो ।
भक्तपुर, जेठ ३१
खाल्सा एड इन्टरनेशनलले कन्ट्रिव्युसन फर नेपालको सहकार्यमा भक्तपुर अस्पताललाई पाँच थान अक्सिजन कन्सन्ट्रेटर प्रदान गरेको छ । खाल्सा र कन्ट्रिव्युसनका प्रतिनिधिहरुले आज अस्पताललाई उक्त स्वास्थ्य सामग्री प्रदान गरेका हुन् ।
बेलायतमा रहेको खाल्सा एड ईन्टरनेशनलले नेपाललाई कोभिड राहतअन्तर्गत एक सय ५० थान अक्सिजन कन्सन्ट्रेटर सहयोग गरेको र सोही अनुसार भक्तपुर अस्पताललाई पाँच थान कन्सन्ट्रेटर प्रदान गरिएको ‘कन्ट्रिव्युसन फर नेपाल’ का अध्यक्ष अशोक धमलाले जानकारी दिनुभयो । धमलाले आवश्यक परेमा देशैभरिका विभिन्न अस्पतालहरुलाई स्वास्थ्य–सामाग्रीहरु उपलब्ध गराउन सकिने बताउनुभयो ।
खाल्साले विशेषगरी विपतमा राहतका काम गर्दै आएको जानकारी दिँदैं अध्यक्ष धमलाले खाल्साले नेपाललाई भुकम्पलगायत प्राकृतिक विपत्तिका बेला धेरैपटक सहयोग गरेको बताउनुभयो ।
भक्तपुर, जेठ ३१
सुरुङमार्गको परीक्षण कार्यविधि (प्रोटोकल) पुरा गर्न असार १ गतेदेखी मेलम्चीको पानी उपत्यकामा बन्द हुने भएपछि काठमाडौं उपत्यका खानेपानी लिमिटेड (काउखालि)ले उपत्यकामा पानी वितरणको नयाँ तालिका सार्वजनिक गरेको छ । काउखालिले आज सार्वजनिक सूचना प्रकाशन गरी उपत्यकाका केही स्थानमा १२ दिनमा एक पटक पानी आउने जानकारी दिएको हो ।
तालिका अनुसार थिमिको बोडेबाट ७ दिन बिराएर थिमि र भक्तपुर नगरमा पानी वितरण गरिने छ भने भक्तपुर वितरण केन्द्रबाट ४ दिन बिराएर सल्लाघारी, सूर्यविनायक र भक्तपुर नगरमा वितरण गरिनेछ ।
महाँकालचौरबाट ७ दिन बिराएर पुरानो बानेश्वर, सिनामंगल, मैतिदेवी, सिफल कालोपुल, चावहिल, विशालनगर, मित्रपार्क, हाडिगाउँ, मालिकागाउँमा खानेपानी वितरण गरिने छ ।
मिनभवनबाट ७ दिन बिराएर बानेश्वर, बुद्धनगर, शंखमुल, थापागाउँ र कुरियागाउँमा वितरण गरिनेछ । त्यस्तै ५ दिन बिराएर बाँसबारीबाट महाराजगंज, बाँसबारी, बालुवाटर र पानीपोखरी तथा पानीपोखरीबाट रानिबारी, लाजिम्पाट, नर्सरीचोक, गैरिधारामा खानेपानी वितरण गरिने छ ।
बालाजु क्षेत्रमा ९ दिन बिराएर पानी आउनेछ । तालिका अनुसार एराहिटी, बनस्थली, चमती, स्वयम्भू, बाफल, ताहाचल, नयाँबजार, सोह्रखुट्टे र पकनाजोलमा बालाजुबाट पानी वितरण हुनेछ ।
किर्तिपुर क्षेत्रमा २ दिन बिराएर पानी दिनेछ ।किर्तिपुरको भाजाङ्गगाल, पाँगा, चिलन्चो, उमामहेश्वर, देवढोका र त्याङ्गला किर्तिपुर वितरण केन्द्रबाट पानी वितरण गरिनेछ ।
सैंबु ललितपुरबाट वितरण हुने पानी १२ दिन बिराएर ललितपुर, सानेपा, मंगलबजार, कुपन्डोलमा पानी आउने छ । मेलम्चीबाट दैनिक १७ करोड लिटर पानी नआउने भएपछि पानी वितरणको कमी आएको खानेपानी लिमिटेडले जनाएको छ । सुरुङ खाली गरेर परीक्षण गर्नुपर्ने भएकोले करिब दुई महिना मेलम्ची पानी नआउने बताइएको छ ।
