भक्तपुर, माघ १२
चाँगुनारायण नगरपालिकाले नगरकोट भ्रमण वर्ष २०८२ को तयारी शुरु गरेको छ । नगरपालिकाले शुक्रवार मूल समारोह समितिको प्रथम बैठक राख्दै नगरकोट भ्रमण वर्ष–२०८२ मने औपचारिक तयारी शुरु गरेको हो ।
नगर प्रमुख एवम् मूल समारोह समितिका संयोजक जीवन खत्रीको अध्यक्षतामा बसेको बैठकले भ्रमण वर्षलाई सफल बनाउन प्रत्येक नगरबासीलाई घरघरबाट जागृत गर्नुपर्नेमा जोड दिईएको छ । बैठकले भ्रमण वर्षलाई व्यापक बनाउन सरोकारवाला सबै निकाय सम्मिलित समितिहरु बनाउनु पर्ने सुझाव समेत दिएको छ ।
बैठकमा प्रमुख खत्रीले चाँगुनारायणको धार्मिक, साँस्कृतिक, ऐतिहासिक र पुरातात्विक महत्वका सम्पदाहरुलाई प्रचार प्रसार गरि पर्यटन मार्फत नगरलाई समृद्ध बनाउन भ्रमण वर्ष आयोजना गरिएको स्पष्ट पार्नुभयो । उहाँले माघभित्र सबैको सुझाव संकलन गरि फागुनदेखि प्रचार प्रसारमा लाग्ने पनि जानकारी गराउनुभयो ।
बैठकमा प्रतिनिधिसभा सांसद तथा समितिका सल्लाहकार दुर्लभ थापाले समग्र चाँगुनारायणको पर्यटन प्रबद्र्धनमा सहयोग पुर्याउने उद्देश्यले नगरकोट भ्रमण वर्ष आयोजना गरिनु सराहनीय कार्य भएको बताउनुभयो ।
सांसद थापाले नगरकोट–कमलविनायक सडक नगरपालिका आफैले निर्माण गर्न बजेट विनियोजन गरेकोमा खुसी ब्यक्त गर्दै कानूनी प्रक्रिया पुर्याएर चाँडो निर्माण गर्नुपर्नेमा जोड दिनुभयो । उहाँले नगरकोट भ्रमण वर्ष सफल बनाउन सबै एकजुट भएर तयारीमा लाग्नुपर्ने समेत बताउनुभयो । अर्का, संघीय सांसद तथा समितिका सल्लाहकार सन्तोष परियारले पर्यटन प्रबद्र्धन गर्दै आन्तरिक तथा बाह्रय पर्यटनमार्फत नगरको विकास गर्ने सोच राख्नु सकारात्मक कदम भएको बताउनुभयो । परियारले नगरकोट भ्रमण वर्ष सफल बनाउन संघबाट गर्नुपर्ने र खेल्नुपर्ने जस्तोसुकै भूमिका निर्वाह गर्न र सहयोग गर्न तयार रहेको बताउनुभयो ।
बागमती प्रदेश सभा सदस्य सुरेश श्रेष्ठले नगरकोट भ्रमण वर्षमार्फत नगरभित्र रहेका विभिन्न जातजाती, धर्म, कला संस्कृतिको जर्गेना, उत्थान तथा संरक्षण गर्नुपर्नेमा जोड दिनुभयो । सांसद श्रेष्ठले भ्रमण वर्ष सफल बनाउन प्रत्येक नगरबासी घर–घर टोल–टोलबाट लाग्नुपर्ने समेत बताउनुभयो ।
बागमती प्रदेशका पूर्व मन्त्री तथा समितिका सल्लाहकार कृष्णलाल भँडेलले भ्रमण वर्ष अवसर र चुनौती दुवै भएको भन्दै नगरपालिका मात्रको एक्लो प्रयासले सफल नहुने भएकाले सबैको सामूहिक प्रयास आवश्यक रहेको बताउनुभयो ।
बागमती प्रदेश सभा सदस्य देवेन्द्र श्रेष्ठले नगरपालिकाले आफ्नै स्रोत र साधनबाट समृद्ध नगर बनाउने सोचका साथ पर्यटन प्रबद्र्धनमा लाग्नु अत्यन्तै महत्वपूर्ण कार्य भएको बताउनुभयो ।
बैठकमा नगर उपप्रमुख रमेश बुढाथोकीले नगरकोट भ्रमण वर्ष मनाउनुको उद्देश्य, हालको तयारी, भ्रमण वर्षले पार्ने प्रभाव र पर्यटन प्रबद्र्धनमा पुग्ने लाभका विषयमा विस्तृत योेजनासहितको प्रतिवेदन प्रस्तुत गर्नुभएको थियो ।
बैठकमा विभिन्न राजनीतिक दलका प्रतिनिधिको तर्फबाट राप्रपाका अर्जुन कार्की, रास्वपाका नगर अध्यक्ष रोशन थापालगायतले नगरकोट भ्रमण वर्षको लागि गर्नुपर्ने तयारीका विषयमा धारणा राख्नुभएको थियो ।
बैठकमा नगर प्रवक्ता एवम् वडा नं. ८ का वडाअध्यक्ष जनक खत्री, वडा नंं ६ नगरकोटका वडाध्यक्ष धन बहादुर लामा भ्रमण वर्षका विषयमा विविध जनाकारी दिनुभएको थियो ।
बैठकमा प्रमुख प्रशासकीय अधिकृत तथा समितिको सदस्य सचिव शिव प्रसाद हुमेगाई र वडा नं. १ देखि ९ वडाका वडाध्यक्षहरु, सल्लाहकारहरु, राजनीतिक दलका प्रतिनिधि, पूर्व जनप्रतिनिधिहरु, विभिन्न संघ संस्थाका प्रमुख एवम् प्रतिनिधिहरुको सहभागिता रहेको थियो ।
