विद्युतको खपट बढाऔं – घिसिङ

भक्तपुर, पुस ३
विद्युत प्राधिकरणका प्रमुख कार्यकारी कुलमान घिसिङले अहिलेको अवस्थामा विद्युतको खपट बढाउने चुनौती रहेको बताउनुभएको छ । भक्तपुर ख्रिसमस समाजले ख्रिसमस र ई. सम्वतको नयाँ वर्ष २०२२ को अवसरमा शनिवार भक्तपुरमा आयोजित शुभकामना आदानप्रदान तथा चियापान कार्यक्रममा सम्मान ग्रहण गर्दै घिसिङले पहिलो कार्यकालमा लोडसेडिङ हटाउने चुनौती रहेकोमा अहिले विद्युतको खपट बढाउनु पर्ने चुनौती रहेको बताउनुभएको हो ।
उहाँले विद्युतको खपट बढाउन आग्रह समेत गर्नुभयो । “कुनै बेला बिजुली कहिले आउँछ भन्ने अवस्था थियो, अहिले विद्युत कसरी खपट गर्ने भन्ने चुनौती छ,” उहाँले भन्नुभयो, “आम नागरिकलाई विद्युतको खपट बढाउन आग्रह गर्दछु ।”
आफु एक्लैको प्रयासले नभई टिमका सबैको सहकार्य र परिश्रमले नेपालमा लोडसेडिङको अन्त्य गर्न सम्भव भएको स्पष्ट पार्दै घिसिङले त्यसको जस सबैलाई जाने बताउनुभयो । “म एक्लैको प्रयासले लोडसेडिङ अन्त्य भएको होइन । मैले मेरो कर्तव्य र जिम्मेवारी इमान्दारिकता पूवर्क निर्वाह गरेको हुँ । यसमा सबैको साथ र सहयोगका साथै उत्तिकै मेहनत र परिश्रम पनि रहेको छ,” उहाँले भन्नुभयो ।