युरोकप २०२० – इंग्ल्यान्ड र क्रोएसिया अन्तिम १६ मा

भक्तपुर, असार ९
क्रोएसिया र इंग्ल्यान्ड युरोकप २०२० को नकआउटमा चरणमा प्रवेश गरेको छ । च्याम्पियनसिपको समूह डी को मंगलवार राती भएको खेलमा स्कटल्यान्डलाई ३–१ ले पराजित गर्दै क्रोएसिया समूह उपविजेताको रुपमा इंग्ल्यान्ड चेक रिपब्लिकलाई १–० ले पराजित गर्दै समूह विजेताको रुपमा नकआउट चरणमा प्रवेश गरेको हो ।
समूहको अन्तिम खेलमा क्रोएसिया भाग्यमानी सावित बन्यो । उसले चेकसँग अंक र गोल भिन्नता बराबरी गरेपनि समग्रमा बढी गोल गरेका आधारमा नकआउट चरणमा प्रवेश गरेको हो । क्रोएसिया स्कटल्यान्डलाई ३ गोल गर्नु नै भाग्यमानी बन्न सफल भएको हो ।

क्रोएसियालाई जित दिलाउन निकोला भ्लासिच, लुका मोड्रिच र इभान पेरिसिचले एक÷एक गोल गरे । स्कटल्याण्डका कलुम म्याकग्रिगोरले एक गोल फर्काए ।
क्रोएसियाले खेलको १७ औं मिनेटमा निकोला भ्लासिचको गोलमा अग्रता लिए । पेनाल्टी क्षेत्रभित्र इभान पेरिसिचले उपलब्ध गराएको बलमा भ्लासिचले गोल गरेका थिए । तर खेलको ४२ औं मिनेटमा क्यालम मक्ग्रेगरले गोल गर्दै खेल बराबरीमा ल्याए ।

पहिलो हाप बराबरीमा सकिएको खेलको ४२ औं मिनेटमा कप्तान लुका मोड्रीचले दर्शनीय गोल गरी क्रोएसियाललाई अघि बढाए । मोड्रीचले पेनाल्टी क्षेत्रको ठिक बाहिरबाट प्रहार गरेको आउटसाइड फुट सट गोलमा परिणत भएको हो । जित नजिक पुगेको क्रोएसियालाई खेलको ७७ औं मिनेटमा इभान पेरिसिचले गोल गर्दै जित पक्का गरे । उनले मोड्रीचको कर्नरमा हेडरमार्फत गोल गर्दै टोलीलाई २ गोलको अग्रता दिलाए । अन्ततः त्यही गोलले क्रोएसियालाई नकआउट चरणमा पु¥याउन निर्णायक भूमिका खेल्यो ।
उता अर्को खेलमा इंग्ल्यान्ड चेकसँग संघर्षपुर्ण जितका साथ समूहमा शिर्षस्थानमा रहँदै नकआउट चरणमा प्रवेश गरे । पहिलो हाफमा रहिम स्टर्लिङले गरेको गोलले इंग्ल्यान्डलाई जितका साथ समूह विजेता बनाएको हो ।
स्टर्लिङ खेलको १२ औं मिनेटमा इंग्ल्यान्डलाई अग्रता दिलाए । युरोमा पहिलो पटक सुरुवाती रोजाइमा परेका ज्याक ग्रिलिसको क्रसमा स्टर्लिङले हेडरमार्फत गोल गरेका थिए । खेलमा दुवै टोलीले केही आक्रमण बुनेपनि गोल भने गर्न सकेन ।

दोस्रो हाफमा चेकले केहि आक्रमणको प्रयास गरेपनि इंग्ल्यान्डको गोलकिपर र रक्षापंक्तिले विपल पारी दिए । इंग्ल्यान्डले दोस्रो हाफमा थप एक गोल गरेपनि अफसाइडका कारण त्यसले मान्यता पाएन । वैकल्पिक खेलाडी जोर्डन हेन्डरसनले गरेको गोललाई भीएआरले अफसाइड दिएको थियो ।
यस जितसँगै इंग्ल्यान्डले ३ खेलमा ७ अंक जोड्दै समूह डी को विजेताको रुपमा अन्तिम १६ मा प्रवेश गरे । पराजित चेक ४ अंक जोड्दै तेस्रो स्थानमा रहेको छ । समूहका उत्कृष्ट तीन मध्येको टोलीको रुपमा नकआउट चरणमा प्रवेशको सम्भावना रहेको छ ।