‘कायनगर’ पुस्तक विमोचन तथा बुद्ध धर्म संघ जूम परिवारद्वारा भन्ते, गुरुमाहरु अभिनन्दित

ललितपुर, असार ९ गते ।

भिक्षु धर्मगुप्त महास्थविरद्वारा नेपालभाषा, नेपाली र अंग्रेजी तीनवटा भाषामा अनुवादित पुस्तक ‘कायनगर’ को हिजो शनिवार एक कार्यक्रमका बीच विमोचन गरिएको छ । ललितपुरको सुनागुथिस्थित बौद्धजन विहारमा आयोजित उक्त कार्यक्रममा भिक्षु धर्मगुप्त महास्थविर, भिक्षु भद्दिय महास्थविर, भिक्षु बोधिज्ञान महास्थविर र भिक्षु अशोक महास्थविरले संयुक्त रुपमा विमोचन गरिएको उक्त पुस्तक ‘बुद्ध धर्म संघ जूम परिवार’ ले प्रकाशित गरेको हो । यस पुस्तक थाई भाषामा लेखक प्लाय्क शोन्थिराकले लेख्नुभएको हो ।
बुद्ध धर्म संघ जूम परिवार चौथो वर्षमा प्रवेश गरेकाे उपलक्ष्यमा आयोजित उक्त कार्यक्रममा जूम परिवारद्वारा दैनिक रुपमा संचालन गरिरहेको बुद्ध धर्मको अनलाइन जूम कार्यक्रममा बुद्ध पुजा, ध्यान निर्देशन तथा धर्मदेशना दिइरहनु भएका भन्ते, गुरुमाहरुलाई कृतज्ञता ज्ञापन–पत्र प्रदान गरिएको थियो ।

सो कार्यक्रममा भिक्षु धर्मगुप्त महास्थविर, भिक्षु भद्दिय महास्थविर, भिक्षु बोधिज्ञान महास्थविर, उपासक शाक्यरत्न, उपासिका शान्ता शाक्य लगायतले विमोचित पुस्तक तथा अनलाइन जूम कार्यक्रमका सम्बन्धमा आ – आफ्ना विचारहरु पोख्नुभएका थिए । साथै ‘कायनगर’ पुस्तक प्रकाशनका लागि सहयोग गर्ने सबै दाताहरुको मंगल कामनार्थ भिक्षु संघ र अनागारिका संघद्वारा परित्राण पाठ पनि गरिएको थियो ।