नेपाल बौद्ध परियत्ति शिक्षाको ६१ औं दीक्षान्त समारोह, कोविद उपाधिका बोर्ड प्रथम कृष्ण प्रसाद मानन्धर सम्मानित

न्यूजअफ । बैशाख ३० गते, काठमाण्डौ ।

“सद्धम्म कोविद” उपाधि परियत्ति शिक्षामा अति सम्मानीय मानिन्छ, उक्त ‘कोविद’ उपाधिमा यसवर्ष बोर्ड प्रथम हुनुभएका कृष्ण प्रशाद मानन्धरलाई एक समारोहका बीच विश्वशान्ति विहार, मीनभवन, काठमाण्डौमा स्वर्ण पदकले सम्मानित गरिएको छ । उक्त विहारमा हिजो सम्पन्न नेपाल बौद्ध परियत्ति शिक्षाको बु.सं. २५६७ सालको ६१ औं दीक्षान्त तथा पुरस्कार वितरण समारोहमा अखिल नेपाल भिक्षु महासंघका अध्यक्ष एवं ने.बौ.प.शि.का शिक्षाध्यक्ष भिक्षु धम्मशोभन महास्थविरले बोर्ड प्रथम हुनुभएका उहाँलाई सम्मान गर्नुभएको थियो ।

उक्त समारोहमा मानन्धरका साथै र परियत्ति सद्धम्म पालक उपाधिमा बोर्डप्रथम हुनुभएका रितादेवी मानन्धर लगायत अन्य कक्षा १ देखि १० सम्म बोर्डमा आउन सफल भएका विद्यार्थीहरुलाई स्वर्ण, रजत तथा कास्य पदक प्रदान गरिएको थियो ।

साथै उक्त समारोहमा ललितपुरको श्री शाक्यसिंह परियत्ति तथा प्रौढ शिक्षालय तथा नेपालगञ्जका अनागारिका यशोधरा गुरुमालाई उहाँहरुले परियत्ति शिक्षा प्रचारप्रसारमा पुर्याउनुभएको योगदानलाई कदर गर्दै सम्मान गरिएको थियो ।
समारोहमा शिक्षाध्यक्ष भिक्षु धम्मशोभन महास्थविर, अ.ने.भि. महासंघका महासचिव भिक्षु धर्मगुप्त महास्थविर, ने.बौ.प.शि.का केन्द्रीय परीक्षा नियन्त्रक भिक्षु बोधिज्ञान महास्थविर, प्रमुख अतिथि बागमती प्रदेशका संस्कृति, पर्यटन तथा सहकारी मन्त्री शैलेन्द्र बज्राचार्य, विशेष अतिथि प्रदेश मन्त्री रमा आलेमगर, नेपालका लागि थाइल्याण्डका राजदूत सुवापोङ्ग सिरिसोर्न लगायतले मन्तव्य राख्नुभएका थिए ।