कोप रापिड रेटिङ चेसको उपाधि रुपेशले जित्यो

भक्तपुर, बैशाख २७
नेपाल च्याम्पियन एफएम रुपेश जैसवालले दोश्रो खुल्ला कोप रापिड रेटिङ चेस प्रतियोगिताको उपाधि जितेको छ । नेपाल बुद्धिचाल महासंघको प्राविधिक सहयोगमा राष्ट्रिय सहकारी महासंघको आयोजना तथा प्रभु महालक्ष्मी जीवन बिमाको मुख्य प्रायोजनमा आयोजित प्रतियोगिताको ९ चरणको खेलमा रुपेशले ८ अंक प्रोग्रेसिभ ५२ प्वाइन्टका आधारमा उपाधि जितेको हो ।
रुपेशले १० लाख रुपैयाँ बराबरको आवधिक जीवन बिमा तथा नगद ४० हजार रुपैयाँसहित प्राप्त गरे । दुई दिन सञ्चालन भएको प्रतियोगितामा समान ८ अंक जोडेका एफएम क्षितिज भण्डारी ५१ प्रोग्रेसिभ प्वाइन्ट प्राप्त गर्दै दोश्रो भए ।
एफएम क्षितिजले ७ लाख रुपैयाँ बराबरको आवधिक बिमा, २५ हजार रुपैयाँ नगद प्राप्त गरे । अन्य ८ जना खेलाडीले समान ७ अंक जोडेर शीर्ष दस स्थानमा रहे । जसमा सिएम पुरुषोत्तम सिलवालले ५४.५ प्रोग्रेसिभ प्वाइन्ट जोडेर तेश्रो स्थान प्राप्त गरेका छन् ।
सिएम पुरुषोत्तम ५ लाख बराबरको जीवन बिमा र १५ हजार रुपैयाँ प्राप्त गरे । प्रतियोगितामा प्रकाशचन्द्र नेपाल, आशिष फुयाल, भारतका आशुतोष कुमार यादव, हर्कबहादुर चोङ्वनङ, धिरेन राई, अशोक मोहन श्रेष्ठ र शैलेन्द्र न्यौपाने क्रमशः चौथो देखि दशौं स्थानमा रहे ।
यसैगरी महिला विधा तर्फ ५.५ अंकमा शान्ति धिमाल विजयी भइन् । उनले ७ हजार रुपैयाँ प्राप्त गरिन् । यस्तै ५ अंक जोडेकी बिनिता कपालीले दोश्रो र सिन्दिरा जोशी तेस्रो भइन् ।
उत्कृष्ट नव प्रवेश खेलाडी स्पर्श अर्याल, सिनियर खेलाडी बद्रीलाल नेपाली, १८ सय रेटिङ मुनि सुरज सिंह, १६ सय मुनि उज्वल दहाल, युवा १६ वर्ष सुभनदीप थापा, युवा १४ हार्दिक पन्त, उत्कृष्ट बिमा गोविन्द नेपाल र उत्कृष्ट सहकारी रामशरण तिमल्सिनाले नगद पुरस्कार जिते ।
कार्यक्रममा भेट्रान चेस खेलाडी सिताराम अग्रवाल, फोटोग्राफर देवु राजवंशी, ग्राफिक डिजाइनर विश्वराज सापकोटा, गुल्मीजी र हरिश्यामलाई सम्मान प्रदान गरिएको थियो ।
यसैबीच विजेता खेलाडीलाई नेपाल सरकारका भूमि व्यवस्था सहकारी तथा गरिबी निवारण मन्त्री बलराम अधिकारीले पुरस्कार वितरण गरे । समापन समारोहमा राष्ट्रिय सहकारी महासंघका अध्यक्ष श्रीमती ओमदेवी मल्ल, प्रभु महालक्ष्मी लाइफ इन्सुरेन्सका प्रमुख कार्यकारी अधिकृत सन्तोष प्रसाई, नेपाल बुद्धिचाल महासंघका अध्यक्ष हेराकाजी महर्जन, महाप्रबन्धक सुरेश थापाको उपस्थिति थियो ।